اجازة قصيرة

السلام عليكم
احبائى وابنائى
اعتذر عن تاخر التدوين وذلك لانى مريضة بعض الشىء واسمحوا لى باخذ اجازة قصيرة لبعض الوقت

لا تقلقوا على فساعود قريبا ان شاء الله
وساغلق التعليقات حتى لا اتعب احدا فى حمل عبء الرد

سلام عليكم

ساعة.. سحر

بسم الله الرحمن الرحيم

اه يا ضهرى..يارب ارحمنى ..انا خلاص هاموت..مش قادره ..ارحمنى يا رب
يارب الساعه بقت 2 الصبح..نفسى انام شويه..مش قادراااااااااااااااااااااااااااااا
الووووووو..ماما ازيك يا حبيبتى..انتى صاحيه..ربنا يخليكى وانتى بتصلى..ادعيلى انام..ماشى ياماما لو قدرت..حاااااااااااااااااضر :حاضرررررررر..مع السلامه يا حبيبتى
يارب..يارب..طيب والله لتوضى واصلى ركعتين زى ماما ماقلتلى ...الله اكبر الله اكبر
الحمد لله..اللهم لك الحمد والشكر..يارب ساعدنى وخد بايدى..وخلى لى بهاء وباباه..يارب اولد بالسلامه ..

يا خبر كنت هانسى ميعاد حسين..حسين ..اصحى يا حسين..حسين..ميعاد الطياره يا حسين
كدا كنت هاتضيعى الرحله منى....انتى ست انتى..انتى زوجه..والله مش عارف اتجوزتك ازاى؟!!!
معلش حقك عليا...تعبانه والله يا حسين..الحمل النوبدى تاعبنى اوى ..اعمل ايه بس ياربى هلاقيها منين ولا منين
ياحسين حرام عليك..دانا تعبانه بقالى ساعتين ..ومش راضيه اصحيك تودينى للدكتور
طيب حتى قولى سلامتك..قولى مالك فيكى ايه..
اه ..هنبدأ حدوتة كل مره
.بقولك ايه انا مش فضيلك..ابقى أملى شريطين وانا اسمعهم فى الطياره
طيب يا حسين ..انا عايزه 500 جنيه..علشان هاروح للدكتور والادويه..وبهاء محتاج شوية حاجات للمدرسه
هو انا لازم كل مره قبل هامشى تنفضى جيوبى
اتفضلى يا ستى 200 جنيه اهم..وامسكى ايدك شويه..هو مافيش رحمه خالص
دول هايعملوا ايه..دا الدكتور لوحده هايخدهم..
اتفضلى كمان 100 جنيه...يا حسين حرام عليك..بتدينى القرش بالتنقيط..هو يعنى اللى فى بطنى دا ابنى لوحدى..
مش كفايه مارحتش معايا ولا مره للدكتورمن ساعة ماحملت
فاضيلك انا بقا..حاجه غريبه والله..ستات اخر زمن..ال دكتور ال..انا الطيار حسين اروح اقعد فى عيادة دكتور كلها حوامل واستنى المدام لما تولد
طيب يا حسين حقك عليا
بس ابنك لما يزعل منك انك ماجبتش طلباته ابقى رد عليه
انا ماشى....يارب ترتاحوا منى خالص..عيشه تقرف..عيشه تزهق ..كل شويه هات هات ..مافيش مره خد
ياحسين احمد ربنا.. داحنا ساعة سحر.. وربنا بيقبل الدعاء..قول ربنا يبارك..احنا الحمد لله احسن من غيرنا كتير ..وكتير قوى كمان
ناقصنا ايه..الحمد لله ربنا مدينا المال والبنون..ربنا يبارك فيهم
عندنا العربيه..اللى انت مش راضى تدينى مفاتيحها..وربنا مدينا الصحه..عايز ايه تانى..ليه مش بتشكر ربنا
اه ..اشكره على ام قويك اللى انا اتجوزتها
الله يسامحك..انا مش هازعل منك علشان رايح الشغل بس..ولم ترجع بالسلامه يبقلنا كلام تانى..وتكون رايق علشان نعرف نتفاهم
اه يا عاقله..قصدك علشان هاكون قبضت وتاخدى القرشين ..تصرفيهم ولا تضيعيهم عليكى وعلى عيالك وعلى البيت

خلاص يا حسين اتفضل فلوسك اهيه..ولما ابنك بقى ولا بنتك يتولدوا محتاجين رعايه ولا حضانه.. ولاالف بعد الشر عن ولادى
مش عايزه منك حاجه ياحسين...يارب هاتهولى بالسلامه..معافى سليم..يارب ماليش غيرك
انا رايح فى داهيه...ابقى قابلينى لما ارجع
مع السلامه ترجع لبيتك بالسلامه..مش لما يبقالى بيت..دابيتك ياهانم انتى وابنك..وبيت اللى جايبهولى فى السكه...دى حاجه تقرف
هو انا لاقى راحتى ولاّعارف اعيش هنا خالص

يا حسين حرام عليك ..دانا كنت بموت من شويه..ومارضتش اقولك ولا اصحيك..ويمكن اولد كمان وانت مش موجود..يعنى انت تقريبا مش بتتعب فى حاجه خالص..دا ربنا يخلى ماما هى اللى قايمه بكل حاجه معايا
طيب يا ستى روحيلها ربنا يخليهالك....انا بقا مش جاى قبل اسبوعين
هاخلص الرحلتين اللى عندى..وعندى حفلة نانسى هاروح احضرها فى لبنا ن...يمكن انسى الهم بتاعك انتى وعيالك

ماشى يا حسين ..ربنا معاك ويوفقك..وابقى قول لنانسى تعمل اغانى للاطفال..علشان ابنك بيحبها ..وصوتها حلو قوى
حتى الحفله اللى هاروحها علشان انسى الغلب اللى انا عايش فيه ..عايزاها لمصلحتك ومصلحة عيالك..يا ساتر على الستات ومخهم
بتتجوز الراجل علشان تخنقه..لكن تدلعه ولا تعيشه نص نص ..حتى..ابدا

ويخرج حسين..ويدفع بابا الشقه بعنف..حتى ان ابنه يستيقظ من الفزع.
ايه ياماما هو فى زلزال ولا ايه يا ماما..
ربنا يستر يا حبيبى....بابا فين ياماما..هو راح المطار..هو هيروح لطنط نانسى.. يقولها تعملى اغنيه.. هو الزلزال ممكن يروح لبابا فى الطياره..ماما انتى مش بتردى ليه؟..ماما انتى هاتولدى امتى؟؟..ماما انا بحبك وبحب بابا..وطنط نانسى..وبحب اخويا الصغير..ماما ردى عليا..ماما ماما..ماما انتى نمتى..
ويجرى بهاء على التليفون ويدير الرقم السريع..الحقينى يا تيتا..ماما مش بترد ..انا كنت بكلمها لما صحيت على الزلزال..بس هى سكتت ومش بترد
اهو يا تيتا كلميها...التليفون على ودنها كلميها
طيب يا تيتا انا هاقعد مؤدب لغاية ماتيجى..وهاجيب لماما ازازة البرفان ..هى بتحبه وبتحطه لما بابا بيجى

وذهب حسين الى عمله غاضبا..ولكنه ينسى كل شيء حتى بيته واولاده وزوجته..ويعيش على فكره واحده انه سيمضى ليله ساهره مع اغانى نانسى..وسيطلب مقابلتها اخر الليله ليسلم عليها..انها النموزج الذى يتمناه ..ويتمنى العيش معها طوال حياته..يابخت جوزها بيها
هى دى الزوجات صحيح بلا حمل بلا ولاده وعيال ومصاريف
وينهى حسين عمله ويذهب الى لبنا ن خصيصا ليحضر حفلة نانسى..ولكن الحفل يؤجل لتعب نانسى وانها تحتاج الى راحه لانها ضعيفه والبيبى محتاج غذا..والام محتاجه رعايه وهدوؤ

نانسى حبيبتى تعبانه..نانسى محتاجه هدوؤ ورعايه ..انا قاعد هنا مش سايب لبنان الا لما اطمن على نانسى
وبعدين ازاى جوزها المغفل ده يسبها تشتغل ..ولا تروح تغنى وهى حامل وتعبانه..صحيح يدى الحلق للى بلا ودان..اه لو دى مراتى..كنت شيلتها من على الارض شيل....هههههههه كنت حملت انا بدالها
بس دى هاتقعد 3 ايام فى المستشفى..ويمكن الحفله تبقى بعد 4 ايام كمان
ولا يهمنى..هو نانسى حد يسيبها ويمشى..
ويبقى حسين فى لبنان ليبعث لنانسى يوميا باقة ورد يبثها كل الاشواق والتمنيات بولاده سهلااااااااااااااااااااااااااااااااااااا
علشان تجيب نونو جميل زيها وتغنيله اغانى حلوااااااااااااااااااااااااا يحبها زى كل اغانيها السابقه
المهم تقوم بالسلامه وتغني للى بيحبوها..وهايجننوا عليها ..ومش طايلين ضفرها..

وتعدى الايام.. وتقوم نانسى.. وتغنى.. وحسين العاشق الولهان لايدرى من امر بيته شيئا
وتنتهى الرحله.. ويعود حسين الى مصر.. ولكنه لا يعود الى بيته!!
..
انه يعود ليلقى حتفه فى الطريق الى البيت ويذهب حسين الى خالقه

وتلد هناء.. بنت جميله ..ماشاء الله لاقوة الا بالله..انها اجمل ما رأت عيناها
وتسميها نانسى..وتجلس بالساعات لتسمع شريطها الجديد للاطفال
ولكنها تبكى ..الله يرحمك يا حسين..كنت بتزعق صحيح..بس برضه وصيت نانسى على اغانى اطفال لابنك بهاء وبنتك نانسى
عمرى مهانساك ابدا يا حسين
دا حتى بنتك طالعه شبهك
الله يرحمك...يلا يا بهاء...علشان لسه هاطلع العربيه من الجراج
يلا يا بهاء المشوار طويل على مانوصل لتيتا ..ونرجع تانى
بس انتى ياماما لغاية دلوقتى مجاوبتيش على سؤالى.. يوم الزلزال ماحصل..
هواللى خلى بابا يموت
ياه يابهاء..يا حبيبى احنا كنا فى وقت السحر ..اللى ربنا بيقبل فيه الدعاء
ابقى اصحىصلى ..وادعى ربنايخليك ليا انت واختك ..وتكبر وتبقى طيار زى بابا قد الدنيا.. وادعى انك تشوف بابا ..واسئله انت ..يمكن يقدر يرد على سؤالك

ماشى يا ماما ..انا هابقى اصحى واصلى وادعى ربنا
بس نفسى كمان ااقول لربنا ان يخلى طنط نانسى تغنى اغانى حلوه لبابا ..علشان يعرف انى بحبه حتى بعد مامات

صح يا حبيبى ابقى اطلب من ربنا كل اللى انت عايزه
ومتنساش تقول الله يرحمك يابابا ويغفرلك..داهو اللى وصى طنط نانسى تغنيلك
تمت

عالم من التدوينات..الاخلاص دليلها

بسم الله الرحمن الرحيم
احبتى فى الله
لم اكن اعلم ان موضوعى السابق سيكون له..رد الفعل هذا
مابين مؤيد لغضبى ..وبين مندهش منه..وبين رافض له
وكثيرين قالو ان الموضوع لا يستاهل كل هذا الغضب

وانا اتسائل دلوقتى ..ازاى؟؟؟
اذا كان التاج اللى لف المدونات كلها ..غالبيتهم: اجابوا على سؤال : مااهمية النت لك..بانه كل حياته
وماأهمية المدونه:بانها بتربطهم بالعالم وبتخلى لحياتهم معنى

طيب لما ازعل بقا من حبايبى..يبقى ليا حق
لانى بحس هنا ان بقا ليا اهل وابناء واحباب
صحيح لم نراهم وجها لوجه..ولكن نراهم بقلوبنا..بعقولنا..بعيوننا..باسماعنا
ولا يعنى هما المكفوفين والصم والبكم ..ماينفعوش يكلمونا ويشوفونا
اكيد بيحصل بس بمعاونة الاخرين حواليهم

يعنى مش لازم نعرف بعض بالجسد والشكل والصوره
احنا بنتعارف على المستوى الانسانى
وبنثق فى بعض
ويمكن حد فينا يحب التانى ..ويتعرف عليه وتصبح صداقه على المستوى العملى الفعلى
واعرف صداقه تحولت لزواج ناجح..وهذا شيء جميل..لانه حدث على مدى شهور..ولم يكن ذلك الامر فى الحسبان

ان النت والمدونات اصبحت واقع فى حياتنا لا نستطيع ان نتجاهله او نلغيه من حياتنا
اصبح كالنادى الذى نذهب اليه لنلتقى فيه مع اصحابنا وحبايبنا
وممكن جدا الا نتوافق مع الكثيرين..وممكن ان نختلف..وممكن ان يكرهك ذلك الانسان ..وانت نفسك تكره ذلك الشخص
ولكننا هنا لانكره ولا نحب من الباب للطاق زى مابيقولوا
لا
احنا بنحب ونكره بعد مانتعايش مع افكار هذا وكلمات هذه
يعنى دخلنا جوا الشخص..وخبرناه وتعاملنا معاه..وبعدين خدنا القرار

طيب لما نقابل ناس زى الذهب..وحبيناهم وحبونا
دول نفرط فيهم بسهوله ازاى؟؟ مش ممكن طبعا..لازم نتمسك بيهم لاخر لحظه

طيب لما نقابل ناس زى الالماظ.. أحترمناهم واحترمونا
دول نستغنى عنهم ازاى..مش ممكن طبعا..ولازم ندور عليهم وقت شدتهم وانصهارهم
لانهم بيرجعوا احسن من الاول واقوى وافضل
يبقى لازم اننا ننتظر رجعوهم ..وبشوق كمان
لازم يحسوا ان ليهم مكان عندنا ..فى قلوبنا..قبل عقولنا..لازم يطمنوا ان مهما غابو فمكانهم محفوظ

التعارف هنا بمحض ارادتنا والتعليقات هنا بمحض ارادة صاحبه..وليس على احد ان يجامل..وليس على احد ان يرد المجامله
احنا محتاجين الكلمه الصادقه
ولو حصل اختلاف فى وجهات النظر..ببساطه شديده نقول اننا مختلفين ..وبكل احترام ممكن نتناقش..ودا اللى بيعمل العلاقات الطيبه اللى بينا..
يعنى مش بس الاتفاق فى الرأى
لأ.. كمان الاختلاف فى الرأى
وتعدد الموضوعات..ويمكن نكتب فى نفس الموضوعات ..بس من وجهات نظر مختلفه..ونلاقى نفسنا بنتعرف على نقاط لم نكن نعلمها او اسقطناها من حساباتنا

كمان بنبقى محتاجين رأى محايد..ونلاقى نفسنا بنسمع اراء كتيره ودا شيء جميل جدا
عارفين ليه..لان ماحدش بيجبرك تعمل برأيه..ولا هايزعل انك ماخدتش برأيه..دا نصيحه لوجه الله خالصه..وانت حر فيها ..تعمل بيها او لا
انا عن نفسى لو طلبت نصيحه ولا رأى من احد المقربين ليا..دى بتبقى مشكله معاه
لانه شايف انه بذل مجهود معايا ولازم فى النهاية اعمل بما قاله..وان ماعملتش بكلامه ابقى مش محترماه ولا مقدراه
وكأن عقلى خلاص لغيته واشتريت عقله هو(ودا تقفيل المصنع..وضمان طول العمر)هههههههههههههه
اضحكوا الله يخليكم..
وكملوا قراءه

لكن احنا هنا.. بنحترم الكبير والصغير..الشاب والرجل.. والبنت والسيده..الأم والفتاه
كلنا على مستوى واحد من الاحترام المتبادل
بل انا عن نفسى استفيد واتعلم من الشباب الصغير..لان لهم افكار جديده..وقلوب تنبض بالامل..
وايضا احاول من جانبى ان اعطى ماأستطيع من حب او نصيحه لو (حد طلبها)..احاول ان يكون كلامى مفيد على قد ماقدر.. او من وجهة نظرى..
وفى نفس الوقت مانقدرش نستغنى عن الكبار سنا وخبره..دول ليهم مكانه خاصه واحترام كبير جدا

ياجماعة الموضوع مش كلمه فى صفحه
....لا ..الموضوع..عِشْرَة .. زى العيش والملح
وماحدش يخون العيش والملح
وانا عن نفسى ..بعتبر الكلمه امانه..ولو بينا اى حد بيغشنا..فدا يعتبر ليس منا(زى حديث رسول الله صلى الله عليه وسلم)
احنا بينا اتفاق غير مكتوب..بالاحترام..بالحب..بالاخلاص..بالثقه

واحنا هنا لانعرف بعض زى ماقلت قبل كدا..ودا يعتبر حصن امان لكل منا..فلا تجريح.. ولا تعدى على الحريات
بالعكس احنا هنا بنقف مع بعض.. وجنب بعض بمنتهى الاخلاص والحب..ولا ننتظر من بعض حاجه غير الاحساس بالانسانيه المجرده من الاغراض..لاننا مش عايزين من بعض حاجه خالص..غير الاخلاص فى العمل والنصيحه
ودا متهيئلى: بيسموه ..الحب فى الله
وانى يشهد الله انى احب اصدقائى وابنائى هنا فى الله
بارك الله فيكم
مش عايزه اطول عليكم..وان شاء الله نتقابل فى كلام جديد

واللى مش موافق على كلامى ولا عاجبه
هو حر
انا بعمل اللى عليا..والباقى على ربنا

اول مره اغضب

بسم الله الرحمن الرحيم
اول مره هاكتب وانا غضبانه
انا فعلا غضبانه ومضايقه جدا
ايه اللى بيحصل ده
كتير قوى..ادخل مدونه اقرأ فيها..واجى اعلق على الكلام ..يقولى انتِ مش من الاعضاء المدعوين للتعليق
طيب ايه البواخه دى
طيب رضينا ان مالك المدونه ينزل التعليق بعد مايوافق عليه(ال يعنى يملك الدنيا ومافيها)مع ان كلنا عارفين ان الملك لله وحده
لكن يسبنى اقرأ..واركز معاه ..وبعدين يقولى يلا مع السلامه
مامن الاول يقفلها على اللى بيحبهم ولا اللى يستحقوا احترامه وبس..ومايتعبناش معاه..(سواء طبعا كان ذكرا او انثى)
لا اوجه كلامى لشخص معين
بس اكتر حاجه زعلتنى ..انى اروح عند ناس بحبهم الاقيهم قافلين الباب فى وشى..ومن غير مايقولوا ولا يعتذروا..ولا ينوهوا عن هذا الامر
وبعدين بيعملوا كدا ليه؟ نفسى اعرف؟؟
لو حد مزهقهم يلغوا التعليق بتاعه
لو زعلانين من حد يقولوا واحنا نساعدهم ونجيبلهم حقهم
احنا هنا بحس اننا اسره واحده ..مش كفايه اللى بنشوفه فى شغلنا وفى بيوتنا ومع قرايبنا
كمان هانعمل فى بعض كدا هنا
امال الواحد يروح فين بقا
دانا ماصدقت لقيت حبايب هنا من غير غرض ولا تصنع
وعموما اللى يحبنا هانحبه
واللى يكرهنا هانكرهه
والله بجد
لم يعد فى العمر بقيه
ولا انتوا مش واخدين بالكم ..وعايزين تتعبونا على اخر العمر

اسفه لو كنت زعلانه او متضايقه..بس الموضوع كبر قوى وانا مش حمل دخول على النت والتدوير على دعوه هنا ولا دعوه هناك

وكمان ناس مش عايزه اصلا تعليق
ورغم ذلك حاطين بتاع مش عارفه اسمه ايه.. بيعرفهم مين دخل عندهم ..هما ليهم حق يقفلوا التعليق او مايقفلوهوش
وهما احسن حالا من اللى بيسيبونا نقرا ..وبعدين يقولونا يلا هانرش ميه.. وسعوا من هنا .. مش عايزين دوشه

فى الاخر الله يسامحهم
ولو فضلوا كدا كتير..انا مخصماهم
سلام عليكم

تيجوا نحب ربنا

بسم الله الرحمن الرحيم

قال ابن القيم
اذا اغلق الله فى وجه عبده :باباً بعدله
فتح له بابان برحمته
يا الله يا الله
الله على الرحمه والحنان
وكل دا من 0.5 %بس من رحمته
شوفوا بقا مستنينا قد ايه فى الاخره .. 99.5%
حد بقا يخاف من الاخره
دى الاخره دى ان شاء الله اجمل وارق واسعد من الدنيا اللى كلها شقاء وعذاب (ولقد خلقنا الانسان فى كبد)
حتى اللى بيحبوا متعذبين بحبهم
خايفين من تغير الحبيب..ومن بعده..

ولكنه سبحانه الذى يغير ولا يتغير
وبرضه قال:من تقرب الى شبرا..تقربت منه زراع..ومن تقرب الى زراعا..تقربت اليه باعا..ومن اتانى يمشى ..اتيت اليه هروله

وقال رسول الله صلى الله عليه وسلم:
من احب لقاء الله..احب الله لقائه

يارب اجعلنا من الموعودين وارزقنا حبك وحب من يحبك وحب كل عملا يقربنا لحبك

حب البراءه

بسم الله الرحمن الرحيم
وحشتونى بجد جدا..من هنا لاسوان مثلا..لا لا مايكفيش..وحشتونى قد الدنيا بحالها..
فاكرين زمان وانتوا صغيرين..لما كانوا يقولوا :بتحب ماما قد ايه..تفتح ايدك على قد ماتقدر ..وتقول اد الدنيا بحالها
ولما تبعتوا بايدكم الجميله الصغيره ..بوسه فى الهوا لبابا وهو رايح الشغل..
الله على الطفوله الجميله..الله على البراءه والضحكه الصافيه

معرفش ليه افتكرت البراءه دى وانا حاسه انكم وحشتونى
يمكن لانى بحس معاكم بالبراءه نفسها
بحس انى بيوحشنى الحب اللى من غير غرض
بيوحشنى التعاطف الانسانى الجميل
بيوحشنى الطيبه والنقاء
والله وحشتونى

قد ايه نكت ثندر ..او اللى اسمه ايه..26+1+25+28..يبقوا ايه؟؟؟هــــــــــــــــــــــــــــــــــانى
هانى دا يبقى حكاية من حكايات الزمن الجميل
والله انت اللى مخليه جميل يا ثندر
نرجع لكلامنا
ثندر اول مايلاقينى اتاخرت فى الكتابه شويه
علطول يبعتلى كام رساله..قلق وبعدين خوف..ولما يقلق قوى ويفتكرنى عندى اكتئاب
يا حبيب قلبى يبعتلى اى حاجه تضحكنى وفعلا بضحك
بجد والله الحنان مابيتشحتش
ثندر دا بجد انسان جميل وقلبه كله حنان ودا واضح من اجاباته على التاج
واللى جاوبه علشان خاطرى..ودا تصرف ليس بالجديد على ابنى الغالى ثندر

وبجد يا حبايبى يا اولادى الاعزاء كلاًَ باسمه وحشنى الكلام معاكم
ونفسى اكتب بوست لكل واحد باسمه

والى ان يحدث ذلك لكم منى الف تحيه وسلام ومحبه

القنطره.. القنطره

بسم الله الرحمن الرحيم
اشكرك يا ثندر على سؤالك عليا واسفه انى قافله التعليق..لانى ماكنتش عايزاكوا تتعبوا فى الرد عليه
وجت بنتى قالتلى أكيد حد زمانه رد عليكى فى اللى قبل كدا
والله قلت دا لو حصل ..يبقى اكيد هايكون ابنى ثندر
وفعلا رحت البوست اللى فات لقيتك يا ثندر بتسئل عليا
وبكدا برضه انت اللى خلتنى اكتب دلوقتى
انا بس فى حالة رعب من وقت ماكنت تعبانه
اكيد هاتقولوا من ايه؟
هاحكيلكم..كان عندنا سبوع احدى زميلاتى وطبعا انا ماكنتش ااقدر اروح لانى كنت تعبانه ..المهم وصلتنى برضه هدية السبوع ..التى هى عباره عن كتيب صغير ..يقول :خطط لمستقبلك
بدأت القراءه..وها ..ها...وصلت لمرحلة من الذعر والخوف والرهبه.. ليه كل دا ؟...تعالى نشوف سوى

كلنا عارفين هانموت ..وهاندخل القبر..ودا اول لقاء مع حساب ربنا
واما ان يكون روضه من رياض الجنه او حفره من حفر جهنم ..عفانا الله واياكم
وهكذا الى يوم النفخ فى الصور
ثم البعث..وهو ان تنمو اجسادنا مره اخرى على ما متنا عليه..اللهم احسن خاتمتنا
ثم الحشر ويقول العزيز الحكيم فى هذا اليوم(يايها الناس اتقوا ربكم ان زلزلة الساعة شيء عظيم..يوم ترونها ..تزهل كل مرضعة عما ارضعت..وتضع كل زات حمل حملها..وترى الناس سكارى وماهم بسكارى..ولكن عذاب الله عظيم)

وفى هذا اليوم يكون لكل شانه..فيتخاصم الضعفاء والمتكبرون
وفيه يخطب الشيطان قائلا:اعوز بالله من الشيطان الرجيم.زبسم الله الرحمن الرحيم(وقال الشيطان لما قضى الامر ان الله وعدكم وعد الحق ووعدتكم فاخلفتكم..وما كان لى عليكم من سلطان..الا ان دعوتكم فاستجبنم لى ..فلا تلومونى ولموا انفسكم..ما أنا بمصرخكم وماأنتم بمصرخى انى كفرت بما اشركتمونى من قبل..ان الظالمين لهم عذاب اليم)صدق الله العظيم

وحال الاتقياء فى هذا اليوم انهم امنون لا يفزعون ويمر اليوم عليهم كوقت صلاة الظهر او العصر(اللهم اجعلنا منهم)
وينادوا(الا ان اولياء الله لاخوف عليهم ولا هم يحزنون)صدق الله العظيم

ثم الشفاعه(اللهم شفع فينا محمدا واسقنا من يده شربة هنيئه لا نظمأ بعدها ابدا)
ثم الحساب بعد دخول اهل الجنه الجنة بغير حساب

ثم تتطايرالصحف ..فمن ياخذ كتابه بيمينه..ومن ياخذه بشماله(فاما من اوتى كتابه بيمينه..فسوف يحاسب حسابا يسيرا..وينقلب الى اهله مسرورا..واما من اوتى كتابه بشماله..فسوف يدعوا ثبورا ويصلى سعيرا)

ثم الميزان..ويكون بعد الحساب ..لوزن اعمالنا لتقدير ولو حبة خردل من ايمان
ومايثقل الموازين بمتعب لنا فى دنيانا ولا ثقيل على افئدتنا والستنا
فقال رسول الله صلى الله عليه وسلم:كلمتان خفيفتان على اللسان ..ثقيلتان فى الميزان ..حبيبتان الى الرحمن:سبحان الله وبحمه ..سبحان الله العظيم
وقال :الطهور شطر الايمان..والحمد لله تملا الميزان ..وسبحان الله والحمد لله تملآن مابين السماء والارض
وقال:صلى الله عليه وسلم:ان اثقل شيء يوضع فى ميزان العبد يوم القيامه..خُلُقُ حسن وان الله يبغض الفاحش البذىء

ثم ياتى الحوض فى اخر ايام الحشر ..ثم يساق كل امه مع الههم الذى كانوا يعبدونه من دون الله
ثم يتبع المؤمنون ربهم وينصب لهم الصراط..ويعطوا انوارهم ويسيرون على الصراط ويطفأ الله نور الكافرين

والصراط يمر عليه المؤمنون والمنافقون فقط..بعدما يلقى بالكفار فى النار
وكلنا نعلم حديث الصراط..وانه منا من يمر فوقه كطرف العين..او كالبرق..او كالريح..او كالطير ..او كا أجاويد الخيل فنجد
الناجى..المخدوش . المكدوس فى جهنم

ثم النار ..وكلنا تعرفها ونعرف ابوابها السبعه..ونعلم جيدا حرها وجحيمها

ثم القنطره..وما ادراك ما لقنطره؟؟؟
كنت فاكره انها الجنة او النار..وحتى اللى هايدخلوا النار من المسلمين هايخرج بعد ماياخد جزائه من العذاب
ولكنى وجدت القنطره حاجزا بين النار والجنه
وقال رسول الله صلى الله عليه وسلم يخلص المؤمنون من النار فيحبسون على قنطره بين الجنة والنار..فيقتص لبعضهم من بعض..حتى اللطمه..قلنا يارسول الله كيف وانما نحشر حفاة عراه ..قال:: بالسيئات والحسنات

رحمتك يا رب..يبقى خد جزائه ودخل النار ويخرج علشان يروح الجنه مايقدرش ..علشان عليه حقوق لاحد الناس
طيب هو اصلا ماعندوش حسنات..يقوم غريمه يديله من سيئاته..

الله اكبر على العدل الامتناهى..اتخفف من سيئاتى بان اعطيها لمن ظلمنى مثلا..او هو يأخذ من حسناتى

والله انه فعلا يوم يكرم المرء او يهان

ثم الجنه لمن يستحقها والخلود الابدى فيها

رزقنا الله واياكم الجنة بالقول والفعل والعمل الذى يرضى رب العباد
وجعلنا من الصالحين الغير ظالمين(اللهم امين)

اللهم تقبل

اللهم ارزقنا حبك وحب من احبك وحب كل عبد صالح يحبك وحب كل عمل يقربنا الى حبك

اللهم اجعل حبك احب الينا من انفسنا واهلينا ومن الماء البارد على الظمأ

اللهم واجعلنا ممن احببتهم فرضيت عنهم
اللهم وكما جمعتنا على حبك فى الدنيا اجمعنا فى جناتك
جنات النعيم على سرر متقابلين مع الانبياء والصديقين والشهداء والصالحين فى فردوسك الاعلى يوم الدين

اللهم لا تحرمنا رؤيه الصالحين .. اللهم لا تحرمنا من النظر الى وجهك العظيم انك على ذلك قدير وبالاجابه جدير

اللهم امين.. امين.. امين

وصل اللم على نيبينا محمد وعلى آله وصحبه والتابعين لهم بإيمان وإحسان إلى يوم الدين

واخر دعوانا الحمد لله رب العالمين