اهلا بيكى يا ورده

بسم الله الرحمن الرحيم

اول حاجه فكرت فيها بعد صلاة الفجر طبعا وقول الازكار
انى ارد عليكى يا ورده
اولا الف شكر على زيارتك ليا ..مع انك عايزه ترتاحى شويه من الكتابه...الف شكر تانى

ثانيا شكرا لابنى احمد
لانه بجد انسان جميل جدا ومخلص جدا لاحبابه
وعمال يشكر فيا لكل انسان يعرفه ويقابله..(اللهم اغفرلى ماقدمت وماأخرت.. وماأسررت وما أعلنت ..ومانت اعلم به منى )..اللهم امين
بجد يا احمد من هنا ومن عند ورده الصديقه والاخت احييك وبقولك انك ابنى الحبيب فعلا

ثالثا انتى فعلا بنتى يا ورده...واشكرك على دعوتك ليا

رابعا
بقولك ماتقفليش ولا تاخدى قرار الاغلاق سيبى الباب موارب
فى لحظه هاتقولى زهقانه ...وفى التانيه هاتقولى جالى ضيوف...وفى التالته هاتقولى احكيلكم الضيوف عملوا معايا ايه....وفى الرابعه هاتنسى الزهق
صدقينى هى بتبقى حكاية ثقل الامانه اللى بنشيلها..وبنحاول دايما نكون قدها
ياعينى على الكاتب الصحفى الملتزم بكتابة موضوعه اليومى او الاسبوعى فى صحيفته
مايقدرش يمتنع لان دا اكل عيشه ..ولانه ملتزم مع جريدته بعقد موقع وزى مابيقولوا ميثاق شرف

اما احنا فالتزامنا اخلاقى معنوى عاطفى حسى ايمانى...مافيش تعاقد ولا اكل عيش...لكن فى حب اخلاص وشرف التعارف والتآلف الروحى مابينا وبين بعض

فى: اننا بنفتقد حبايبنا بجد
بنفتقد المشاعر الجميله اللى بتحس بينا عن بعد..واللى بنفتقدها لو حد من العقد خرج عن مساره
عرفه المثل اللى بيقول
اللى ماتصبحه وتمسيه
ماتعرفش ايه جرى فيه
هو دا اللى بينا
عارفه لما بكتب بوست جديد..بعد شويه بفتح وادور على اللى كتبولى وعبرونى وتعبوا نفسهم وعلقوا عندى
بدور على حبايبى وابنائى ..واقلق قوى لو حد اتاخر فى التعليق
مش علشان التعليق فى حد زاته..زابدا..لكن لانى بقلق عليه هو فين بيعمل ايه..هو كويس؟ هو بخير؟ ..بطمن لما يكتب اى حاجه ..ان شالله تكون كلمة لاتعليق..المهم انه موجود وحسه بالدنيا وطيب وبخير
ربنا مايحرمناش من بعض


انا لسه هاروح عندك...وحقيقى نفسى اعرفك وتعرفينى
بس عايزه اقرا جديد
يلا ابدأى واكتبى ايه اللى مزهقك..عبرى عن نفسك..عن غضبك..عن كسلك
اكتبى ولا تتوقفى...الكتابه حياه... بنكتبها بارادتنا وتفكيرنا ومزاجنا .....والقرآه عمر تانى بنعيشه بارواحنا وقلبنا..
التدوين دا نعمه من ربنا...ولازم نشكر ربنا على نعمته....والشكر بالتواصل مع الشاكرين والحمد لله..
بان ندعوا للتفائل للفرح.. للايمان.. للسعاده فى الدنيا بالعمل الصالح ..والسعاده فى الاخره برضا ربنا

مش عايزه اطول اكتر من كدا..لانى لو فضلت اكتب عن التدوين والافق الواسع المفتوح علينا من خلاله...اكيد مش هاسكت خالص

بس فى النهايه احب اشكر ابنى واخويا وصديقى (احمد )اى اسماء واحلام فى وجدانى
لانه هو اللى اعطانى الفرصه لاكتب لورده ..وادعوها للتعارف بينا عن طريق هذا الرائع اللى اسمه التدوين

واهنىء اختى وحبيبتى (ايناس)صاحبة مدونه احزان ايناس على العوده الجميله

وادعوا نفس الانسان المدعو اسماء واحلام فى وجدانى ان يكتبلنا بقا وبلاش الدلع ده

ومن هنا برضه اهنىء الاخت جارة القمر على شفاء والدتها الف الف مبروك وربنا يمتعها بالصحه والسعاده والرضا

وكفايه رغى بقا انتوا مازهقتوش
سلام والى لقاء

وربنا قال فى محكم اياته (اقرا )

حتى نلقى الله بعملنا الصالح

بسم الله الرحمن الرحيم

محتاره اتكلم عن ايه النهارده..اتكلم عن نعمة الرضا
ولا اتكلم عن الامبلاه..ولا اتكلم عن الحب ومش قصدى اى حب..لا قصدى حب الحياه بكل ما فيها سواء كان ابتلاء او كان فضل من العلى العظيم
تفتكروا اتكلم فى ايه؟؟؟
على فكره هوا دا موضوعى النهارده ،
انا بقالى فتره بفكر فى الحكاية دى..وهى انى بسئل نفسى..ياترى انا بكتب مايحتاجه الناس..ياترى انا بكتب ماينفع القاريء
ياترى اللى بكتبه بيعجب من يزورنى ويقرا عندى ام لا
عموما انا بنتظر رايكم فى اسئلتى دى
ولكن النهارده هاكلمكم عموما فى تجربة العزاء اللى رحتها وحضرتها بنفسى

انا طبعا وانا صغيره كنت بتكسف جدا ..ولما كان حد من اهل والديا يتوفى كنت لايمكن اذهب مع ماما ابدا لاى واجب عزاء..ودا كان شيء بيزعل امى منى .. حتى الافراح برضه... مره رحت معاها فرح وكان عندى وقتها 15 سنه...وفضلت ماسكه فيها ومستخبيه ورا ظهرها واشد فيها واقولها يلا نمشى ..يلا نمشى مع ان البنات حوالينا كانوا مبسوطين وبيرقصوا والكل بيضحك لكن انا فى قمة كسوفى وخايفه ليه ومن ايه معرفش..وماما تقولى قومى اتحركى..طيب روحى باركى للعروسه..ابدا..ولما حد يقولى عقبالك ارد اقول طيب..
ومن وقتها ولغاية دلوقتى الحمد لله ماحضرتش الا عزاء امى وابى رحمهما الله
واترك واجب العزاء لاخوتى الذكور...معرفش دى نداله ولا كسوف برضه

المهم انا رحت العزاء لوحدى وماخدتش بنتى التانيه معايا لان كان عندها كليه ..واصلا ماكنتش هاخدها معايا برضه ..من منطلق انها هتقولى وانا مالى ..هاروح ااقول ايه؟؟وايه لزمتى ..وحاجات كتير هاسمعها منها انا عارفاها مسبقا ومجرباها

طول السكه واحنا رايحين ..زوج بنتى مابطلش يطمن علينا بالموبايل رغم انه حزين جدا لكن متماسك
وصلنا وهو اللى قام واستقبلنا..ونده على والدته رغم الحزن اللى هما فيه..وبرضه قدمولنا الغدا اللى كان مقدم لهم من جيرانهم..ودى ظاهره لفتت نظرى وانا عندهم..كل مايجى اى حد من قرايبهم او اصدقاء اولادهم نلاقى صينية الاكل جايه من خارج البيت جرى وبتتقدم للمعزيين..واللى اتقدم لنا كان فطير وجبنه بيضاء ..وسلاطه وزبادى ...اما ماقدم للى جه بعد مننا فكان طبيخ عادى وارز وفراخ
وهكذا يعنى ..وقصدى ااقول من هذا الشرح ان كل بيت بيقدم ماعنده وليس شيء متفق عليه

احنا كنا وصلنا قبل اذان العصروكانوا مازالو يحضرون الميت للدفن..وكان مكان العزا للسيدات فى فناء المنزل من الداخل..وعزاء الرجال كان يجهز خارج المنزل وايضا امام فناء المنزل من الخارج
وعلى ذلك كنا نجلس ونرى كل مايحدث والقرءان يقريء وسيدة المنزل او حماة بنتى تجلس فى صمت تام وحولها بناتها وزوجات ابنائها كل تجلس بجوار امها او شقيقتها او اهلها كلهم الذين من نفس البلد

وبدانا نسمع الله اكبر الله اكبر ان الشيخ مستعجل وسعوا الطريق لا اله الا الله ..وخرج الابناء يحملون ابوهم وهم يبكون ولا يقولون الا... لا اله الا الله ...ورايت زوج ابنتى وهو غارق فى البكاء .. وعندما مر بجوارنا.. رايت ابنتى تنهار فى البكاء ..ولم افعل شيء الا انى امسكت بيدها ..اشد عليها خوفا من ان تنهار.. وقد كان حماها الله يرحمه فى مثابة الاب لها...ولا انسى يوم اتفاقنا معهم ان قال لها ( يابنتى كل اللى انتى عايزاه وبتحلمى بيه انا اعملهولك . .. واللى ابنى مايقدرش عليه انا ااقدر.. ولو ابنى زعلك فى يوم انا ابوكى واخد حقك منه) الف رحمه عليه

وخرج الحاج من بيته معزز مكرم فى وسط ابنائه ..وذهبوا به الى مسجد البلد ليصلوا العصر ثم يصلوا على المتوفى ثم يتوجهوا به الى المقابر
وقرروا الا تذهب السيدات..فلا مقابر للنساء..وقمنا لصلاة العصروامتنا واحده من اهل البلد متخصصه فى اقامة المياتم ..وعرفت بعد ذلك انها ايضا تعطى دروس دينيه فى رمضان لنساء البلد ...وتعمل دروس اجتماعيه وتربويه للمقبلات على الزواج

وجلسنا بعد صلاة العصر نتكلم مع حماة بنتى نواسيها ونحاول نصبرها والست بسم الله ماشاء الله لم يكن على لسانها الا (منه العوض وعليه العوض)..ووجدنا كل اهل البلد بدأوا يستئذنوا..ولما يبقى الا كل اللى جايين من بلاد تانيه زينا
وعزموا علينا اننا نقوم نرتاح شويه حتى يحين العزاء بالليل بعد صلاة العشاء
ولكننا فضلنا البقاء بجوار حماة بنتى وبناتها
ورجع الابناء من دفن والدهم..وقعدنا اسره واحده نتكلم عن المرحوم وكل واحد يقول بابا عمل كدا (الله يرحمه) وزوج البنت يقول حمايا دا كان احسن راجل فى الدنيا مانساش يوم ماعمل معايا كزا وكزا.... وبنتى تقول لو كان بابا عايش ماكنتش هاحبه اكتر من حمايا (الله يرحمه)
وعدى الوقت وكل عزاء يقال يتبعه كلمة (الله يرحمه..)

ان الانسان فعلا ذكرى..وسيره
وحما بنتى لم يترك لاولاده الا السيره الحسنه..التى ترفع الاكف بالدعاء.. وترفع الراس شرفا، بانه هو الذى ربى وعلم وكبر ....الله يرحمه

وجاء عزاء الليل..وكأن اهل البلد كلهم جاءوا للعزى...وكنت فى غاية الاستغراب..كلهم عارفين الحاجه والحاج الله يرحمه
سبحان الله ..احنا فى مصر ..وفى العماره الواحده.. ماحدش يعرف التانى..والله ساعات ابقى طالعه او نازله ومانقلش لبعض لا سلام ولا كلام..واقول يمكن ضيف فى العماره ولا ضيفه..ونعدى حتى لو قلت سلام عليكم ابقى بقولها بشويش خالص كانى مكسوفه وانا بقولها لحد معرفوش ..ويمكن لو سمعها مايردش
لكن هنا فى البلد روح حلوه وجيره جميله تخلى الواحد يكفر بالمدينه والمدنيه

وقضينا الوقت فى سماع القرءان وسكون وصمت يخليك تفتكر من اخذهم التراب ..وخلانى اتذكر زوجى وامى وابى واخواتى الصغار ..
ووجدتنى ابكى احبابى ..وافوق على ايات الله فاهدأ..وانظر لمن حولى وخصوصا حماة بنتى واجدها صابره محتسبه ووجدتها
تقول فى لحظة ضعف انسانى( جايالك يابو محمود..مش هاسيبك ابدا..ماحدش عايزنى خلاص..انا ماليش غيرك)
وبكينا اكتر وبرضه سرحت فى يوم وفاة زوجى وانا لا اتكلم ولا افعل اى شيء الا البكاء فى صمت وراسى لايحمل الا فكرة امتى هاشوف جوزى تانى..وعيالى ليهم ربنا..وافوق على اللى بيقولى ولادك ماعدلهمش غيرك..خدى بالك منهم

وانتهى العزاء بدرس دينى فى ان الموت علينا حقا..وان كل نفس زائقة الموت وانما يوفى الصابرون اجرهم بغير حساب
واننا نعيش على الارض فى كبد .واخر كبد نلاقيه هو قسوة الموت
فيجب علينا ان نعمل لمثل هذا اليوم..حتى نلقى الله بعملنا الصالح..
الا وهو اولادنا الذين احسنا تربيتهم..لانهم العمل الصالح الدائم بعد موتنا
وايضا السيره الحسنه...فلا نترك ورائنا من يلعن اليوم الذى عرفنا فيه.. او تعامل معنا فى نسب ،او تجاره ،او اى مصلحه كانت
والذكرى الطيبه..مثل ان نكون نقف مع الحق وننصر المظلوم على الظالم ..ونوفق بين المتخاصمين ..ونصلح بين المتشاحنين
وكان اخر كلام الدرس..انه ليس بالصلاة وحدها ولا بالصيام وحده نلقى الله على خير.. ولكن من علم فليعمل ..ومن عمل فليلزم
ونرجوا ان نلقى الله جميعا على خير
ودعوا للميت واهله

ودخل زوج ابنتى واخواته وازواج اخواتهم البنات..وانفض العزاء..
وحدث شيء جميل جدا من جميع الابناء الذكور والبنات على حد سواء
ان استأذن كل واحد وواحده من ازواجهم ..بانهم سينامون الليله بجوار امهم.. الله الله على هذا البر وهذا الحب

وطلع النهار..واتفقت مع بنتى انى هاسافربعد ماسلم على الجميع.. وان تبقى هى بجوار زوجها وحماتها
ولم يتركونى الا بعد ان فطرت..وجاء زوج ابنتى معى حتى اتوبيس السفر

وعدت الى بيتى ...ولكنى لن انسى مظاهر الحب والايمان التى رايتها فى هذه البلده المؤمنه
فلم اسمع فيها ولا صرخه..ولا صويت..وكل من رايته لا يقول الا.. لله ماأخذ ولله ما أعطى..

جزاكم الله خيرا
ونلتقى على خير باذن الله

شكر واجب

بسم الله الرحمن الرحيم

اشكركم ابنائى واحبائى الاعزاء
اشكر جل اهتمامكم
وادعوا الله بالا يريكم مكروه فى عزيز لديكم
واخص بالشكر كلا من :
غير معرف..اشكرك من كل قلبى
همس الاحباب..شكرا يا خالد..وانه للحق لرجل يستحق كل التقدير..ولا ازكى على الله احد

عاشقة الاحزان..ايناس
الدوام لله..واشكرانتظارك
وربنا يخلى حبايبك ويسعدك بيهم

اسماء واحلام....ابنى احمد
معلش يا احمد تعبتك معايا

بنتى ..ميمى
الحمد لله رجعتلكوا
ووحشتونى
ويارب ماتشوفيش حاجه وحشه فى حبايبك

الباشمهندس.. احمد ابو العلا
الف شكر...والبقاء لله

ابنى ثندر
عندك حق يا ثندر
جوز بنتى فى مكانة ابنى
وكان لازم ولابد نكون معاه...وربنا يخلى ماما وبابا ليك..وماتتحرمش منهم

دكتوره بندقه..بجد وحشتينى
واشكرك

اختى المصريه
البركه فى ربنا
وربنا يتقبل دعائك ويسكنه فسيح جناته

ايوش الجميل
البقاء لله..وشكرا على الدعاء

بنتى يويو
البقاء لله يا يويو
واشكرك على انتظارى
وان شاء الله نتكلم مع بعض على خير

ابنتى عابرة السبيل
اسفه على انك جيتى فى الوقت ده
واسفه انى لسه ماجتش ابارك ليكى على مصطفى..ربنا يباركلك فيه ويجعله قرة عين لكِ ولوالده يا رب

ابنى حماده
بجد انا مش عارفه ااقولك ايه
لا اراك الله مكروه فى حبيب
واشكرك على الدعاء للمرحوم
واشكرك على كل كلمه كتبتها


ابنى احمد
ربنا يصبر اهله وابنائه..ويجعل مثواه الجنه..ويجعل قبره روضه من رياض الجنه



اعزائى
انا اسفه جدا
لكن استسمحكم فى يومين راحه..لان السفر متعب جدا
ولكن حبيت اطمنكم انى رجعت لوحدى وتركت بنتى مع زوجها فى بيت حماها
لعلها تكون سبب فى صبر زوجها على فقد ابيه
وربنا يجعله اخر الاحزان
واشكركم جميعا

اجازة...واجب

بسم الله الرحمن الرحيم
والحمد لله والصلاة والسلام على رسول الله

اعزائى
غصب عنى.......هابعد عنكم شويه
مش بخطرى ولا بمزاجى
بنتى جت امبارح...واحنا مسافرين دلوقتى لكى نلحق بزوجها فى بيت اهله...
يعنى اسفه لقولى هذا
لقد توفى حمى بنتى..ولابد للذهاب لعمل الواجب
لا اراكم الله مكروها لديكم
اشوفكم على خير
سلام عليكم

بحبك يارب

بسم الله الرحمن الرحيم
النهارده من اول ماصحيت..حاسه انى عايزه اكلم ربنا..عايزه ااقوله شكرا ..بحبك..وحشتنى قوى يارب
اول ماصحيت..رحت عملتلى مج شاى بلبن ,
وجيت افتح المدونه وارش ميه واروقها والذى منه
لفيت شويه عند حبايبى اللى بحب اقرأعندهم..مش لازم يكونوا بيجوا عندى على فكره يعنى

المهم تعبت..بعد كم التعليقات اللى بكتبها واحاول فيها ماستطعت تلخيص تعليقى على قد ماقدر..قوم اعمل ايه بقا
قلت كفايه كدا يل بت يا حجيجه..وقفلت المدونه وقعدت أقرأسورة الكهف..جميله جدا..وانهارده الحمد لله كان سكرى مظبوط..فعشت معاها بكل عقلى وقلبى...والسوره دى هى اللى عرفتنى ان ربنا هايكون معايا بعد وفاة جوزى الله يرحمه
لما تكلم رب العزة عن اليتيمين فى السوره..وانه (جل وعلا ) شايل كنزهم لما يكبروا ويقدروا يتصرفوا فيه ..ودا لسببين::
الاول.. ان القريه بخيله وظالمه وممكن بسهوله يطمعوا فى مال الايتام
ثانيا.. ان ابوهما كان صالحا.والمال الحلال عمره مايضيع
ثالثا..ان القوه والرعايه والعزه والنصر من الله..مش معنى ان ابويا مات او انهم الاتنين ماتوا ان خلاص مافيش رعايه..لا..ربنا موجود وهو اللى خلقنا وهو اللى بيسبب الاسباب

ودا بيفكرنى ..اول زوجى ما مات .. كان قلبى هايتخلع من بين ضلوعى من شدة الحزن..لانه كان احن عليا من امى وابويا..وفعلا والله بدون مبالغه حسيت باليتم اكتر من بناتى لما مات..لان بناتى كانو صغيرين قوى ومش عارفين حاجه..وكنت انا شخصيه قويه من برج الاسد
لا اقبل بالضعف ..وكنت مشحونه تحدى منه قبل مايموت وكان عمال يقوينى ويدفعنى انى اقابل الحياه بعد منه بقوه

وفعلا كنت اعطى لبناتى الحب من قلبى اللى مليان بحبه... وفى نفس الوقت ادخل حجرتى ابكى لانى مش لاقيه اللى يعوضنى خسارتى الكبيره فى زوجى الغالى
وبمرور الايام..ومع قراءة القرءان..والاستغفار..والدعاء بالصبر..وان ربنا يعوضنى عما ضاع منى خيرا منه..مع انى ماكنتش وقتها فاكره ان فى حاجه احسن من جوزى فى الدنيا دى كلها
عارفين ربنا عوضنى بايه
بانى ختمت القرءان ..ولااول مره فى سنه..........مش معنى ذلك انى ختمته قبل كدا فى وقت اكبر.........لالالالالالا
معنى كلامى انى لاول مره اختمه فى حياتى..30 سنه من عمرى مافيش مره ختمت القرءان فيها

وسورة ياسين ما اجملها وهى تقرا لما نريد..كنت اقراها بنية ان ربنا يرحم زوجى...وكان الله يعطينى نفس الاجر
واية الصبر فى سورة البقره (يايها الذين امنوا استعينوا بالصبر والصلاة ان الله مع الصابرين)
(ولنبلونكم بشىء من الخوف والجوع ونقص من الاموال والانفس والثمرات وبشر الصابرين (155) الذين اذا اصابتهم مصيبة قالوا ان لله وانا اليه راجعون(156)اولئك عليهم صلوات من ربهم ورحمة واولئك هم المهتدون(157) صدق الله العظيم

يمكن انا بحكى الكلام ده..علشان كل مبتلى فى الدنيا يعرف ان الابتلاء رحمه فى حد زاته
ودا ان تعلمته بدرس قاسى من ربنا..بس دلوقتى انا بخاف على كل انسان فى الدنيا..ممن احبهم او حتى لا اعرفهم
ربنا كله رحمه وحنيه ..ربنا كله حنان وعطاء وحب
اتعملت ودا على يد زميل ليا (الله يرحمه الف رحمه والف رحمه على روحه)
ان ربنا هايعوضنى خير لو صبرت..ان ربنا هايدينى ويوسع رزقى ورزق ولادى لو اتقيت الله وصليت بالليل والناس نيام
ان ربنا هايحبنى وهايصلح حال ولادى من غير اى مجهود منى لو استحملت شويه من ايذاء الناس وكلامهم الذى لايرحم سيده ارمله فى عز شبابها زى مايبيقولوا(والله يسامح كل انسان مارحمنيش وانا فى عز ازمتى ومش دريانه بالدنيا حواليا)

ياكل مبتلى..اذكر الله..ياكل مبتلى.. تذكر الله
اللى فقد حبيبه..واللى فقد عمله..واللى اتخلع..واللى اتطلقت..واللى ترملت..واللى مريض..واللى زرعه اتحرق..واللى بيته اتهد..واللى عنده امتحان (اى كان نوعه)
واللى واللى واللى ..وماحدش مرتاح
الدنيا ماهياش رحلة سعاده...بالعكس الدنيا دار امتحان وابتلاء
علشان ربنا يشوف مين اللى بنعبده..ومين اللى بنلجأ اليه

احنا لازم نحطم الصنم اللى فى قلوبنا..لان لا حب الا لله ..لا حب الا فى الله
بنحب ولادنا ونربيهم على طاعة الله ..وان الله ورسوله هو الاول فى قلوبنا
ثم ياتى من ياتى بالدور فى حياتنا
ابائنا
اخواتنا
اصدقائنا
احبابنا
ازواجنا..............كل له دور فى حياتنا..بس الدور ده ..لازم ولابد يكون بيقربنا من الحبيب الاول والاخير.. وهو الله
لازم نعرف ان باب ربنا مفتوح وان ماخذ منك لن يعوضك عنه غير الله...ولن يصبرك عليه غير الله

اتعلم بقا يا انسان...مش لازم تتعب زى ماغيرك تعب على ما عرف
اتعلم من تجربة غيرك
واول مايحصلك مصيبه(ودا مش كلامى دا كلام ربنا)سبحانه وتعالى هو اللى سمى اى ابتلاء للبنى ادم مصيبه...اجرى على ربك...وقول ان لله وانا اليه راجعون
وتذكر اية 155_156_157..من سورة البقرة
انها ايات جامعه ..لم تترك نوع من انواع الابتلاء..وايضا اعطتك العلاج...
فلا تبعد عن ذكر الله وعن الصلاة وقراءة القرءان

اسئلنى انا...وزى مابيقولوا اسئل مجرب ولا تسئل طبيب
بحبكم فى الله
سلام عليكم

دمتم ودام الحب بيننا

بسم الله الرجمن الرحيم

احبابى وابنائى الغاليين جدا
اصدقائى الاعزاء
بيننا ود لا ينتهى .. بيننا حب يذيد يوما بعد يوم..بيننا شوق يشدنى دوما اليكم..
يعلم الله كم كنت اتعذب وانا ابحث عن النت يوما بعد يوم حتى استطيع ان احدثكم واتواصل معكم..
بالامس فقط جاء النت يجرى وانا اجرى معه..اغنى له..ياوحشنى رد عليا ازيك سلامات
وجيت اسلم..وااقول وحشتونى وحشتونى

نيجى للجد بقا
بجد اشكركم على القلق الذى سببته لكم..انا يا دوبك بفتح المدونه واجرى على التعليقات..وجدت سيل من المحبة يسرى ..فى اعضاء المدونه..
ولكنى واعتذر اليكم..بالامس لم تكن ظروفى مناسبه للرد علي كل ابنائى
فلقد وجدت ان الاقرباء والقاصى والدانى قد بدؤا يتوافدون للتهنئه على عودة الابن التائه
ولم يتركونى الا وانا قد امسيت..احلف بسماها وبترابها ان مدونتى الغاليه.. لا عندى اغلى منها.. ولا لاقى زيها
بجد انا مش عارفه اكتب ايه
ونفسى اكلمكم واحد واحد..بجد انا مش بلاقى نفسى الا وانا معاكم ..فى وسطكم
اكلم بنتى( ايوش)واقولها بحبك..ونفسى اشوفك..ومعلش دايما تعباكى فى السؤال عنى..بس بجد مبروك على المدونه المدموجه

اكلم خالد (همس الاحباب)عضو فريق الضاحكون الغاليين
وااقوله حفظت اسمك ومش هنساه ..فى القلب متربع..وفكراه

اكلم ابنى حماده عفشه..اللى بيسئل عنى واصبح احد ابنائى الاعزاء اللى فرحت بيهم

اكلم احمد(اسماء واحلام فى وجدانى) ابنى الغالى اللى حسسنى انى حاجه كبيره فى حياته..واتمنى انى استطيع تقديم اى حاجه ااقدر ارد بيها على المكانه اللى حطنى فيها ..وكل اطمئنانه عليا فى كل وقت ..وتواصله معى الدائم ..حتى اننى اصبحت اشعر اننا فعلا ابن وامه
ومش اى ابن ..لا دا ابن جميل وكله حنان.....يابختى بيه

ثندر ..وحشتنى
نفسى ااقولك يابنى وحشتنى..كتباتك قلت عن الاول كتير ..الف الف سلامه عليك يا غالى ..
عايزه ااقولك ..اكتب.. طمنى عليك.. قولى مالك فيك ايه ..ايه طبيعة تعبك..ليه مش بتقول انك مريض..لولا ايوش مكنتش عرفت انك تعبان
..وحشنى الكلام معاك والتواصل عبر التعليقات
ومش هاخبى عليك..خالد (همس الاحباب)انا حبيته زيك بالظبط ودخل قلبى معاك(عارف ليه)..
عمل حركه بجد مابقتش عارفه اعمل فى قلبى ايه لما شفتها..عارف الاميل بتاعى ..بتاع الفراغ ..لما لقانى غبت كتير..قام بعت اضافه باسمه..ومعاها رسالة حب ...لما بالصدفه فتحت الماسنجر..وجدت الاضافه وفتحتها..لقيت رسالة حب ..والله خلانى احس انى امه بحق وحقيق..لقيته بيقولى صحيح انتى قافله التعليقات.. لكن مش قافله قلبنا عن حبك..ودى كانت اجمل اضافه ورساله فى نفس الوقت
حقيقى يا ثندر انت تعبان..بس انا كمان قلبى تعبان علشانك ونفسى اطمن عليك
اكتب وكلمنى وطمنى عليك ..او ابعتلى اميلك ..المهم اطمن عليك..وربنا يخليك لماما

اكلم... ميمى
بنتى اللى بتقولى (انتى حسستينى انك ام بتلم ولادها حواليها)
وااقولك ياميمى انت فعلا عرفتى احساسى بالظبط..انا فعلا ام بحب ولادى كلهم ..وبفرح بوجودهم حواليا..بس نفسى اديهم زى ماهم بيدونى..نفسى اعرف كل شيء عنهم ..واعرف ايه اللى بيدايقهم ..وايه بيفرحهم..نفسى اعرف ايه بيحبوه وايه بيكرهوه
نفسى اعرف ايه مشاكلهم ونتناقش سوى فى حلها..
نفسى مايكونوش تعبانين واخفف عنهم ..نفسى انام وانا عارفه ان كل واحد فيهم نايم متغطى ومبسوط ومطمن ان فى حد بيفكر فى سعادته
فعلا يا ميمى انا اتمنى اكون امكم ولى الشرف انى امكم ..والتى تعيش بحبكم

واكلم:: القمر الساهر..وواقولها اهلا بيكى فى كل وقت واى وقت
قلبى مفتوح ليكى واخواتك هنا يرحبوا بيكى

واكلم... يويو
الطائر المغرد ..عصفور الكناريا الجديد..
اهلا بيكى يا يويو..نورتى المدونه...وانا امك عند احتياجك لحبى وحنانى..واختك عنما تريدين النصيحه
وصديقتك عندما تريدين الافضاء بما يتعبك او يحزنك...
انا معك كما تريدين..فهو الحب بيننا..والاخلاص ديننا...والثقه طريقنا...والحب فى الله عهد بيننا

وطبعا.. فكره من الزمان ده
وحور الجنه
ومحمد غاليه
دول ولادى الاعزاء اللى مهما راحوا ولا جم ..قاعدين فى القلب

وحتى ولادى اللى ساعات يسافروا وينسونى ..عمرى مابنساهم..ويوم مايجوا عندنا هايلاقوا ان مكانهم محفوظ..بس المهم يعودوا وينوروا فى اى وقت

واخى::بيرم المصرى
نورك منور عندنا..لانتحرم منك ..ندعيلك بالصحه وان تتمتع بروح عاليه من الثقه بالنفس
ودائما يمناك تكتب ..ولسانك يتحدث باصدق حديث


وهكذا تدور الايام ويتجدد العهد بيننا
دمتم ودام الحب بيننا

بشوات زمان... رجعوا يا جدعان

بسم الله الرحمن الرحيم

اعتذر عن التغيب..وربنا يديكم الصحه جميعا
واعتذار رسمى لثندر ابنى الغالى جدا..لانى لم اعطه الفرصه ليسئل عن صحتى
وعاتبنى على غلق التعليقات..وقالى انى عملت زى الناس اللى كنت زعلانه منهم فى البوست اللى فات

بس انا بختلف مع ثندر..ليه
لانى لم اكتب بوست علشان القراءه..انا بس كتبت تنويه عن غيابى..وكمان قدمت اعتذار لقفلى التعليق وهو علشان متعبش حد فى انه يزورنى ويكتب تهنئه..هههههههههههه..قصدى يكتب سلامتك يا ماما..ويعطل نفسه..وخصوصا ان حكاية تعبى دى بقت دمها تقيل وبتتكرر كتير..وبصراحه بحس انى غلسه قوى..وبقول لنفسى هو انتى فاكره نفسك قاعده فى مدونه ولا مستشفى

سيبكم بقى من سيرة المرض و الحاجات البايخه دى.. انا رجعت اهو الحمد لله

بس المشكله بقى انى مافيش فى دماغى حاجه للكتابه

لا فى كتير ..بس مش عايزه اوجع دماغكم
فى انى فكرت ثم فكرت ثم فكرت
ومش عارفه دا تفكير سليم ولا ناتج عن عقل تعبان وضغطه كان 180 على 110وخدوا بالكم..كان كان فعل ماضى

المهم فكرت فى ايه
الحكومه دى عباره عن ايه
رجال اعمال..وهؤلاء رجال الاعمال معاهم ثروات كبيره ..وبيكبروها اكتر واكتر..من بيع مصر واراضيها..والله ومبانيها
بجد بجد تعبانين الوزراء دول

دول قينلهم فى الوزاره لو عرفت تاخد قرش من جيب الشعب هانديك اتنين ليك..وكل ماتحشر الناس فى المواصلات..ليك عندنا عربيه هديه..ولو عرفت تتطفش الشعب ولا تجيبله مصيبه تاخده ..ليك عندى سفريه ..(هانعملها كأنك رايح تتعالج)..دا لزوم منع الحسد والقر
امال هما ماسكين فيها ليه..دول بتوع المسابقات اللى على كبير قوى..مش تقولى كرمبو

يعنى دول ناس متنقيين على الفرازه ..ولاد بشوات
ودول بقى اللى الثوره خدت املاكهم واممت شركاتهم
ووزوعوا ثروتاهم على الشعب..اللى كان غلبان وفقير ..وعملولهم مدارس ومستشفيات وجامعات
وبدا الشعب يقول بلدى وثروتى..علمى ومكانتى..ابحاثى ومصانعى
كانوا عايزين يردوا الجميل لبلدهم واهلهم
لكن ولكن ولكن...........ومليون لكن

لكن بقا دول جاتلهم الفرصه على الطبطاب
عملوا ايه

مدارس اشكال والوان مايقدر عليها الا اللى معاه فلوس.. واللى مامعوهوش يطلع ابنه سمكرى ولا سباك..ليه لان مافيش مدارس مجانى ولان المصانع اتباعت وسرحوا العمال..
يقوموا يروجوا لفكرة الوطن محتاج عمال اكتر منها شهادات جامعيه
ودا طبعا من وجهة نظرى تخلف..بس هما بيضحكوا بيه على عامة الشعب الفقير

كمان عاملين يبنوا عمارات وفيلات وقصور..والله قصور(وهو ياعينى مش قادر يجيب للشعب 6 %علاوه)بجد مسكين هايقطع روحه علشانا

المهم.. لمين هذه الفيلل والقصور..نفسى اعرف ,,للشباب اللى مش لاقى شغل ولا جواز..ولا للحراميه والفنانين..ورجال الاعمال وولادهم ..والوزراء المساكين اللى اتنهبت املاكهم زمان ومازلوا عايشين على احقاد ابائهم اللى حكوهالهم وهما داخلين يناموا

فاكرين من 10 سنين كدا..قالوا العشر الاوائل فى كل كليه هاتعينوا معيدين
ولاد الناس الكادحه اللى نفسها تبان على وش الارض وياخدوا فرصتهم..موتوا نفسهم فى المزاكره وطلعوا اوائل ونافسوا ولاد المدرسين
يادوبك كام سنه يمكن 3 او 4 بكتيره
ولغوا الحكايه دى..ورجع الغلبان اللى مالوش ضهر يحميه يندب حظه ويقول مافيش فايده..دى مش بلدى وراح رمى نفسه فى البحر وهو وحظه ..هو واهله اللى شقيوا عليه لغاية مابقى راجل..
بس بلده مش عايزاه.. لا راجل ولا نص.. يعنى هاتعمل بيه ايه.. ماهو احنا فى سلام وسعاده ..يعنى احنا هانربيك ومش محتاجين تضحيتك لتراب الوطن..لكن هانضحى بيك انت.. بلده رميته للبحر ..بلده بتقوله اشتغل نقاش.. ولا مكوجى.. ولا مندوب مبيعات فى احسن الاحوال
ولما يصرخ ويقول انا خريج جامعه يقولوله ماحدش قالك اتعلم

امال انتو عاملين وزراء على مين وليه
يطلعوا لسانهم لينا
ويردوا يقولوا:امال هاناخد فلوسكم ازاى ..ونشغلكم عندنا عبيد لينا ازاى..ونرجع بوس الايادى ازاى

و انت يا فقير يا عدمان يا صدمان ياللى لا ليك كلمه ولا كيان
عايز توصل تبقى انت الوزير وانا اروح فى خبر كان

احنا رجعنا لزمن ماقبل الثوره يا جدعان
رجعنا لزمن الثروه فى ايد حفنه من الحراميه ...هما يملكوا واحنا نستنى الفتات الواقع من ايديهم تحت ارجلهم
القلب موجوع والفكر مشغول..والعقل رايح جاى
هذا غيض من فيض
لسه كتير موجوعين منه..نقول على الكهربا اللى البشوات الكبار هما وولادهم مابيدفعوش ولا مليم فيها واحنا اللى بنكع فواتير قد كدا
نقول على البنزين اللى يملا عربياتهم هما واهاليهم واهالى اهاليهم بيملوها بفواتير مدفوعه مسبقا
نقول ايه ونعيد ايه..وماخفى كان اعظم..(.ماهم مداستهم على رسنا )دى كانت كلمة عبيد زمان....فاكرينها!!!!!!!!!
معلش وجعت دماغكم..اصل كانت حرارتى عاليه..
زى مصر بالظبط..

سؤال اخير وهامشى علطول..
لما هو مش عارف يدبر شئون بلده..مايسبها للى يقدر
لما احنا كتير وتاعبينه مايروح يرتاح
يظهر حرارتى هاتعلى تانى
ااقولكم سلام عليكم
اسيبكم بعافيه