السبت، ٢٣ أبريل ٢٠١١

ومازالت المهزلة مستمرة

بسم الله الرحمن الرحيم... وبه نستعين

انهم يستخفوا بعقلنا
ماهذا الذى يحدث؟!!!!!!!!
ماهو دور عصام شرف؟؟؟؟؟؟؟؟؟؟؟
اهو اتفاق على قتل اعصابنا ؟؟؟؟؟؟؟؟؟؟؟؟؟؟؟؟
اهو اتفاق ان ننسى ونرتاح كما كنا فى السابق ؟؟؟؟؟؟؟؟؟؟؟؟؟؟؟؟؟؟؟

نبدأ الحكاية من اخر لحظة

قالوا هانروح شرم نحاكمه ان انتوا ماحكمتوهوش
هنا بقا وخافوا على الراجل....يعملوا ايه ؟؟؟
جرى بسرعه عملوا تمثيلية هزيلة من جزئين

الجزء الاول:::::::::
مبارك خلاص استلم استدعاء النيابة بعد ماكان رافض............سبحان الله بسرعه كدا
مبارك تعبان ونفسيته لاتسمح بالتحقيق..........طيب نعمل ايه فى كتموتو
ندخلة العناية المركزة بالاسلحة والدبابات والحراسة السبع نجوم... فى الحجرة السبع نجوم ...فى الدور السبع نجوم
كدا اطمنتوا عليه خلاص....مافيش حد من الشعب المجنون يقدر يقربله....
نضحك على الشعب بقا.....ونحبسه هنا ((معلش يستحمل ))15 يوم ...وكمان 15يوم.... وهلما جرا
واحنا بقا مصدقين ومبسوطين وشاربين الشربات.....لا احد فوق القانون

نيجى لاولاد الحبيب
نايمين متهنيين وفى حضن العز مستقرين... وبجوار النظيف مرتاحين...ومع الاستاذ فى العلم او القانون بيذاكروا وناجحين...
اوعوا تقولوا امين
هو مخطط تهينونا...ولا مخطط تدخلونا مستشفى الامراض العقلية
ولا مخطط تلهونا بلعبة اسمها النائب العام قال والنائب العام اصدر تعليمات

حرام عليكم .... والله حرام عليكم
كل واحد فى البلد مشترك فى هذه التمثيليه...فلينتظر عقابه من الله
انه مصير امة
دى مش معاملة ناس قتلوا شباب البلد...دى مش معاملة شعب ثار واتكلم ونادى بالحرية وحساب الخونة الفاسدين

بيقولوا قال اعملوا فيا اللى انتو عايزينه بس ولادى مالكوش دعوه بيهم
طيب وولاد البلد اللى ربتك وكبرتك وفى الاخر سرقتها ونهبتها انت وشلة الفاسدين بتوعك واولهم ابنك
لو كان ابنك مات ولا ابن نظيف اتقتل ولا ابن العادلى اتنش برصاصة من قواته
ياترى كنتوا هاتعملوا ايه فى الشعب المسكين
لو ابن كبير الاطباء...ولا ابن النائب العام...كان من شباب الثورة
كانوا برضه قالوا يحبس على زمة التحقيقات فى مستشفى السبع نجوم...ولما يمسك فى السرير ويترجاكوا ماتودونيش القاهرة
تسمعوا كلامه وطبطبوا عليه...
ماهو برضه كبير ((مقاما )) ... والكبير كبير ...وكله يدلع نفسه

نيجى لعم عصام شرف
انت راضى تقعد زى خيال المأته ليه يا عصام
اخترناك وشيلناك على اكتافنا علشان تريحنا ولا تبهدلنا
ماهم بتوع قنا مش ماليين عنيك
بيقولوا مش عايزين المحافظ....خلاص غيره
غيرهم هايعملوا كدا لو رضختوا لدوول!!!!!!!!!!
وماله هما يعنى جايين من الصين
ماكلهم مصراوية
ولا دخلت اللعبة ونسيت مين اللى جابك رئيس للوزارة
اوعى تنسى انك تؤسس لشعب ديقراطى ...وهاتدخل الجنه برضاهم
خليها بالانتخاب ....هاتريح نفسك وتريحهم...وتبقا حطيت مبدأ يمشى عليه من يجيء بعدك


هناك ٧ تعليقات:

كلمات من نور يقول...

محتاجين نصبر يا سيدتي ونشوف الرجل حيلاقيها منين والا منين؟؟؟؟؟؟؟؟؟؟؟ دي مصايب في كل حدب وصوب

وبعدين على ايدينا دكاترة بعتوله تظلم من اللي بيحصل لهم وللمرضى في عدة مستشفيات واستجاب وقابلهم على طول وغيره وغيره ....لازم نصبر احنا في عنق زجاجة

الفراغ يقول...

حاضر هاصبر
وانا ايه ليا غير الصبر
وشكرا يا كلمات

باحث عن حب يقول...

اللى جاى افضل
صدقينى

Soul.o0o.Whisper يقول...

أولا : بأشكر حضرتك جدا على الزيارة
و أتمنى تتكرر دائما و ابدا

ثانيا : بن على اللى اكتشفوا انه اشترى نجم فى السما
فيعنى سؤال برئ هو مبارك قال يعمل زيه ...مشاركة انسانية يعنى و لا حاجة

ثالثا : أعتقد ان د.عصام شخصية محترمة
هو بيحاول بس ياريت مننساش ان اللى اتغير هو الصف الاول بس
يعنى فى صف تانى و تالت دول عاوزين يستأصلوا من جدورهم

و ربنا ييسر و يتغير كل المحافظين لان كلهم بصراحة مغضوب عليهم من الشعب

لكن فى كل الامور محتاجين الصبر و الحكمة فى معالجة الامور
و ربنا يولى امورنا خيارنا ان شاء الله

دمتِ بكل خير

الفراغ يقول...

soul اختى
انا اللى بشكرك والله على زيارتى
لانى كنت جاية اشوف انتى رديتى عليا ولا لسه عندك طبعا بس فتحت للقيتك هنا عندى
اتشرفت بيكى
واتمنى دوام التواصلواتمنى ان ربنا ينصر شعب مصر دائما لانى لسه مش قادرةعلى تصديق ان فى ثورة قامت وخلصتنا من عصبة الشر والفساد
وان شاء الله اخر الصبر خير بأذن الله

الفراغ يقول...

الباحث عن الحب
اتمنى ان اصدق ماتصدقه انت
وشكرا لتواصلك

eng_semsem يقول...

اللي حصل من مشاكل في سنين مش هيتحل في يوم وليله صحيح مش عاجبنا اللي بيحصل ونفسنا انه يدوق من اللي شربنا منه بس مش هنستعجله احنا احسن نصبر شويه ومش هنسيبه الا لما يشرب كاس الذل بايدينا
تقبلي تحياتي