الجمعة، 25 فبراير 2011

نقل من مدونة.... البلدى فيها حكومة

كلامي اللي جاي لكل شخص بيقول انا اسف ياريس وارحموا عزيز قوم ذل ورد الجميل للرئيس القائد

انا ياريس اسمي عادل صليب ؛ مصر ؛ مسيحي (حسب بطاقة البلد) ؛ من اللي راحوا ولسه بيروحوا التحرير من اللي نزلوا يوم 25 و28 ياريس عندي يدوب كلمتين وعاوز ااقولك اسف فيهم بجد .

انا اسف ياريس : ان اهلي علموني زي ما اهلهم ربومهم ان المشي جنب الحيط امان وان المشي جوة الحيط استقرار ...
انا اهلي قلولي من خاف سلم ونسيوا ياريس ان الموت مش هيفرق من ظابط او من سكتة قلبية او بلفافة بانجو
انا اسف ياريس لان عمري 24 سنة وقضيتهم في سكوت وخوف وضعف واستستلام
اسف ياريس لاني مكنتش اعرف في مصر غير رسمة اكتوبر في المدرسة كل سنة واللي كانوا بيقوله في التلفزيون عن دورك السياسي والاجتماعي

اسف ياريس لاني اتمردت عليك وكنت ابن عاق لاب وحضن كبير زيك ... كنت ناكر للجميل ياريس لبطل اكتوبر اللي خطط للضربات الجوية (اللي اشك ان حد من مؤيديك قرأ اي كتاب عن حرب اكتوبر وليه الفريق الشاذلي لانهم حتي ميعرفوش مين هو الشاذلي)
اسف ياريس بس مكنش ينفع ان اشوف بطل اكتوبر وهو بيدخلي اكل مسرطن وقتل من الشرطة وهواء ملوث وسرقة اعضاء وتشريد و35% من اهل بلدي تحت خط الفقر ...ياريس مكنش ينفع صدقني
انا اسف ياريس اني كنت مقتنع بان كل قتل المسيحين كان منك وبايدك رجلاتك واشوف بتضيع مني بلدي وحقي كمواطن فيه دون النظر عن ديانتي واشوف ناس بتاخد جنب وكذلك الناس التانية وانا واقف في النص لاني رافض اسمع كلام حد غير عقلي وعقلي قالي العيب في النظام مش في الدين

اسف ياريس اني مقدرتش اصدق رجالتك وهما بيقولوا ان خالد سعيد بلع لفافة بانجو رغم اني معرفوش بس صوره وهو مشوهة خلتني افتكرت اني درست في مدرستي بنظام تعليمك ان البانجو مش بيشوه الوش بس هو ممكن يشوه المخ وينيمه 24 سنة ويسكته علي الظلم والعنف ده كله

انا اسف ياريس عليك انت انك تكون ضحيت عشان تحرر بلدك وتسرقها وتنهبها وتقتل شبابها اللي في يوم كانوا تحت قيادتك ومنهم استشهدوا عشان حضرتك تركب كرسي الرئاسة ياريس وكل مرة تترشح لوحدك وتقتل اكتر وتسرق اكتر وتبوظ تعليمنا وصحتنا وحياتنا
انا اسف ياريس انا صحيح اتعلمت في مدرسة خاصة ومتعلجتش في مستشفي حكومي بس لما اشوف ناس بتموت ياريس وانت سايب ولادك يسرقوني وبتعالج الحرامية اصحابك علي حساب الدولة والاطفال بتموت في مصر عشان مستنين دور الكشف في المستشفي الحكومي
انا اسف ياريس اني خرجت عن طوعك واتظاهرت ماهو يمنفعش اعرف ان 45% من سكان بلدي في العشوائيات وانت وابنك واصحابه بتعملوا مدن وهمية بالملاين وانتم بايعين المتر بنص جنية وب5 قروش (زي ما اصحابك و مواظفينك عملين يطلعوا كل بلاويك دلوقتي بعد تنحيك الاجباري بـ 24 ساعة)

انا اسف ياريس اني والعيال بتوع التحرير واحنا عارفين انك عضمة كبيرة ومش حمل هزة طلعنا نقولك ارحل وامشي ومرعناش عشرة عمرك معانا 30 سنة ومرعتش شيبتك ولا استنيت تخرج بكرامة مع ان ياريس(كرامة مصر من كرامة المواطن ...ولا مساس بكرامة المواطن)
فاكر كلامك ده ياريس ؟ قد ايه كان مبهر وانا بشوف مروة الشربيني والمصري اللي اتقتل في لبنان ولا اعتقالات المصريين في السعودية والكويت واهو بنجامل بعض كاصحاب كراسي ... ياريس لو المصري الصغير ده ملوش كرامة انا اسف اني مرعتش كرامة حضرتك
ياريس مكنش ينفع اشوف ميتين تاني مكنش ينفع حتي اسيب اصحابي يوم 25 يناير ولا 28 يناير ... مكنش ينفع صدقني
انا اسف ياريس لان معيطيتش لما حضرتك القيت الخطاب اللي كان بعد جمعة الغضب ومكلفتش خاطرم تعزي امهات الشهداء بكلمة ...عيني مدمعتش ياريس بل الاكثر انها مرمشتش ... انا فاكر اني ساعتها عيني احمرت قوي وحسيت قد ايه انت لا تصلح ان يطلق عليك انسان ...انت رجل بلا انسانية
انا اسف ياريس اني مصدقتش وعودك الكدابة لاني جربتها انا واهلي 30 سنة ومكنش عندي استعداد الاقي ناس تانية بيتداس عليها عشان حضرتك تزود رصيدك في البنك او عقارات ولادك واحفادك ورجالاتك
اسف ياريس لاني لما سمعت انك عيان بالمرض البطال (لو كان بجد) متعطفتش معاك ..مش عشان قلبي حجر ..بس عشان قلت ده مصري ولازم يتعالج كمصري بس افتكرت ياريس ان الانتظار في معهد الاورام طويل ياريس ..معرفش وصلك مع شيكات تحويل فلوس مصر ان مصر فيها اعلي نسبة سرطان ولا لا بس دي الحقيقة ...وحضرتك قلت ان المواطن اهم ياريس ...وفيه الاف المواطنين من شعبك واقفين طوابير عاوزين علاج ومش بيلاقوا وبيموتوا في الانتظار

انا اسف ياريس اني مش قادر اسامحك ...مش قادر اشوف بلدي بتضيع بايديك واسكت وحتي لما خلاص ..مش مسامحك لاني كل مابحاول واغمض عيني بشوف صورة سالي واحمد ايهاب وشهداء ثورة 25 يناير وشهداء العبارة(عبارة من اللي بيغرقوا دول) وشهداء الدويقة(اللي ماتوا من عشوائيات جنابك) وشهداء نجع حمادي وكنيسة القديسين وغيرها كنايس كتير

انا اسف ياريس اني ضيعت من وقتي ومجهودي اني اكتب كل الكلام ده وانا ورايا حاجات اهم اعملها ..ادور علي المعتقلين اللي وانت في اخر ايامك سحبتهم علي سجونك و اشوف الناس اللي اتصابت بسبب انك رافض تخرج خروج مشرف وفضلت تقتل شعبك علي انك تسيب السلطة والكرسي (مع اننا مكناش هنزعل لو خدت الكرسي معاك وكنا هنجيب كرسي من الهلال والنجمة)

انا اسف ياريس اني بصلي كل يوم ويتمني امنية واحدة ان ربنا يمد في عمرك ويحفظك وتعيش عشان تتحاكم في بلدك وتتسجن وتشوفنا واحنا بنعيد كل اللي بوظته في الـ 30 سنة دول
اسف انك سرقت وقتلت ونهبت واشتريت بيوت وقصور بس نسيت تسال اهم سؤال لو جه يوم زي 11-2-2011 ولو فعلا تعبان ..هتعمل ايه بكل فلوس العالم وكل العز ده ... هتعرف لما تقف قدام ربنا ويفكرك بحرقة قلب كل اب وام من الشهداء وكل حد مات من الاهمال في المستشفيات واللي سابوا تعليمك البايظ واعلامك الكداب وثقافتنا الضحلة واثارنا المهربة واكلنا المسرطن وهوانا الملوث وصحتنا اللي بايظة ...

انا اسف ياريس حتي بعد ماتنيحت بالاجبار من العيال (سابهم يلعبوا...لحد ما لعبوا في كل تاريخك) .... العيال دي نزلت ولسه بتنزل التحرير ... بتعمر وبتطالب بباقي حقوقها الشرعية كبني ادمين .... كمصريين ... كناس اخرين بطلت تخاف وعرفت ان بعد القنابل المسيلة للدموع والرصاص المطاطي والحي والبلطجية والنومة علي الرصيف في عز التلج ...ان محدش بيموت ناقص عمر
بس كلمة حق وموته افضل من عيشة في ذل ومهانة

اهداء اللي : شهداء 25 يناير وكل شهداء الاهمال والعنف التي تسبب فيها الريس (المخلوع والسابق) محمد حسني مبارك

الخميس، 24 فبراير 2011

الله اكبر ..والنصر للمؤمنين

بسم الله والحمد لله والصلاة والسلام على رسول

اعتقد ان مافيش وقت للكلام والحواديت

هى مش حسبة برما
هى اصرار وتوحيد للصفوف
احمد شفيق قالها بلسانه انا مابشتغلش لوحدى ان فوقى رئيس!!!!!!!!!!!!!!!!!!!!!!!!!!!!!!!!
الحزب الواطى ماتحلش ...والريس ماسبوش
الجيش بيشتغل من راسه صحيح لكن ببطأ شديد!!!!!!!!!!!!!!!!!!!!!!!!!!!!!!!!!!!!!!
اللى فى السجون عيونهم تملؤها الامل بعودة زعيمهم ليحفظ التحقيق معهم ...وتعود ريما لفسادها المتغلغل فى البلاد
احمد ابو الغيط....يلعب ويلعب ويلعب ولا يريد ان يعود المصريين من ليبيا بسهولة!!!!!!!!!!!!!!
وجدى.... يترك اعوانه ليحرقوا ملفات الوزارة ....بحجة انهم اناس خرجوا على القانون ومتغاظين علشان مارجعوش شغلهم
والحقيقة بقا قالها احد شهود العيان من الشارع...انها اتحرقت من جوا المكان مش من بره وواضح طبعا انهم بيخفوا كثيرا من ملفات الفساد
طيب واخرتها؟؟؟.....النظام البطيء والمتستر على الجريمة كله بيحصل بسبب الفساد ويؤدى ايضا الى الفساد
هنعمل ايه؟؟؟؟؟؟؟؟؟؟؟؟ والله مش عارفه....مش فاضل غير انهم يعينوا وزير داخلية مدنى

شفيق على قلبه مراوح ماهو مش مستعجل....لا والله!!!!!!!!!!!!!!!!!!!!!!!!!!!!!!!!!!!!!!
مستنى ايه يا باشا؟؟؟؟؟؟؟؟؟؟؟
مستنى حبيبك ورئيسك ........بترميلنا عضمه ننشغل بيها
سايبنا ناكل فى نفسنا ....وقاعد على كرسى الوزارة
ماتستقيل لو عندك ذرة كرامة....
لو عندك وطنية ذى مابيقولوا عليك!!!!!!!!!!!!!!!!!!!!!!!
حرام عليكم البلد يا فسقة....هاتروحوا من ربنا فين...
اناعارفة الكلام دة لايؤثر فى اى فاسد((تأخذه العزة بالاثم ))

ولذلك احنا لازم اننا نكلم بعضنا ونفهم بعضنا
لازم نفكر اننا ولابد نكون سابقين بخطوة واتنين
اعداء الثورة مجتمعين تحت عيونا ...واحنا تاركين ليهم الساحة يلعبوا فيها براحتهم... بحجة الاجندات الوزاريه السابقة اللى لازم ينهيها قبل مايسيب الوزارة((دا كلام شفيق بيه ))
طبعا خيانه من واحد عميل لنظام سابق((عنده امل يرجع باى طريقة ممكنة ))
الخبث والدهاء دائما وابدا مع الاشرار يكمن فى صدورهم ...ولا يمكن هايسكتوا
الحل هو الثبات على المطالب...
لا نريد شفيق...
لا نريد دستور قديم
مواجهة الحقائق بأن ريسنا مازال جاثما على قلبنا...وضحك علينا بكلمة تخلى وليس تنحى
ولذلك اللعب شغال على ودنه من اعوان النظام
رؤساء تحرير كثير من الجرائد كتب استقالته كما رجاه الجيش
ولكن مازالت بعض الجرائد لم تفعل ؟؟؟؟؟؟؟؟؟؟؟؟؟؟؟؟ليه
لانها مسنوده ولانها تخاف ان تتخلى عن موقعها ...فلا يجد النظام من يدعمه بالاكاذيب والخدع على الشعب الطيب
شوية جمال وعلاء بيتخانقوا.....طيب مايتخانقوا
شوية الريس مريض ولا يشرب الا التفاح
طيب مايمرض ولا يروح فى ..........مالناس ماتت واتمرضت وجالها كل الامراض على ايده...
وكويس انه يقدر يشترى تفاح ويلاقى اللى يعصره ويشربهوله
فى غيره ملايين بيشربوا عصير بصل وفجل
اه يابلـــدى.... بحبك
وصعبان عليا حالك
الاعداء كتير والمتربصين اكتر
اللى بيحبوكى كتير بس سلاحهم هو الهتاف والصراخ
عشمى فى ربنا كبييييييييييييييييييييييير قوى
انه يسمع صراخ المظلومين وانين المرضى والمساكين
لاتسمعوا للداعين الى الهدوؤ والاستكانه
والا اصبحت الثورة فعلا حركة احتجاجية والسلام
ثورة يعنى تغيير
ثورة يعن كل الى فات يمشى يرحل
ثورة يوليو لما قامت حققت المكاسب برجالها هى مش برجال الملك السابق
فلا تنتظروا خيرا من اعوان السابقين
لازم يمشى شفيق واعوانه
لازم ناخد بالنا من اسماء الحزب الواطى
واذا كان هايرجعوا بطريق الفلوس للعشوائيات
اسبقوهم وروحوا العشوائيات وفهمومهم واكسبوهم بحق وحقيق مش بوعود كاذبة
ليه مافيش حد بيعمل لله واجره على الله
فين امثال ابو بكر الصديق ولا احنا بس نسمع خطب الجمعة وننساها اول مانخرج من الجامع
فين رجال الاعمال الشرفاء علشان يصرفوا على ثورتهم...دى ناس مابتشحتش وراضية بعيش مهينة وامرهم لله
لكن لو لقوا ايد ممدودلهم هايبقوا كويسين جدا
اكتتبوا بفلوس زكاتكم يا رجال الاعمال الشرفاء وطلعوا الناس دى من القبور اللى عايشين فيها
وهما يدلكم اصواتهم ببلاش ॥مش ب50 جنية ولا १०० ولا ३००
ماينفعش نتكلم فى التلفزيون وبس
لازم نروح للناس دى فى بيوتهم الخشبية
اتحركوا يا شباب
فين شباب دكتور عمرو خالد ....فين صناع الحياة؟؟؟؟انزلوا للناس يادكتور انت وشبابك واصنعوا حاضر اقوى وافهم انزلوا وعوا الناس بدورهم حسسوهم بادميتهم وانهم مش شحاتين ॥لا دول ليهم حق وصوت مهم وداعم للمجتمع
يادكتور مش كفاية تكنسوا الشوارع!!!!!!!!!!!!!
يادكتور فى فعل اقوى من كدا....وهو ان تكنسوا افكار وتقطعوا ايد الحزب الواطى

جمال كان بيلعب على وتر القرى الفقيرة
فاين انتم من هذا التفكير الشيطانى
ياجنزوى افعل شيئا غير الكلام والتفكير فيمن ظلمك ونفاك من الوزارة
بلدنا عايزة تحرك فى وسط الناس
شيلوا المنصة من وسط ميدان التحرير
خلى الصوت يعلى ويعلى
وزى ماكانوا بيقولوا فى اول يوم
على وعلى وعلى الصوت
اللى بيهتف مش هايموت

وانا بقول اجرى واجرى فى كل ميدان
اتكلم.. فكر.. علم ... ذن فى كل ودان


ملحوظه مهمه جدا
فين الشاب الفقرى يا جماعة
انا معرفوش ولا عمره كلمنى ولا سابلى اى تعليق حتى
ولكنى اهتم به واقع اهميته بين ثوار التحرير
بقاله اسبوع مش باين ودى مش من عادته خالص
نرجو البحث عنه والاطمئنان عليه فيمن يهمه الامر

الاثنين، 14 فبراير 2011

الله اكبر ولله الحمد

بسم الله الرحمن الرحيم

هذه مناسبه لايجدى فيها التحجج بالمرض او الانشغال باى شيء
هذه فرحه وسعادة احسست فيها بانى اصبحت كالطفله التى انتظرت طويلا طويلا مجيء العيد
وهاهو قد اتى بعد طول انتظار
لقد مللت ..ولقد فقدت الامل..ولقد نفذ صبرى..ولكم عشت الاحباط الا ارى هذا اليوم قبل موتى
ولكنه اتى ..اتى الفجر الجديد..يحمل الامل والتفاؤل والبشر لابنائى وابناء بلدى الشباب
كنت انظر للشباب واقول فى نفسى ربنا معاكم ويصبركم ومنه لله اللى خد الامل منكم
البلد اصبحت للاثرياء فقط
الوظائف لابناء الكبار..مصالح الدولة للكبار..
لامكان للدبلومات ولا حتى للبكالوريوس المتواضع من الجامعات الحكوميه...انها شهادة يضحكوا بيها على الفقراء فقط
الان اصبح يوجد امل
باعوا المصانع وباعوا الارض..وبنوا عليها عمارات بالملايين
من يشترى غيرهم
من يشترى الا من تغرب عشرات السنين وضيع عمره وشبابه من اجل شقه
ومن اين ياتى الفقير بثمنها فى بلد تعطى من وجد وظيفه بملاليم...وهم يأخذوا بالمليارات سرقة وعمولات وفساد
ثم يأتوا لينظروا الينا بأحتقار..لاننا اولاد البطه السودا..نحن الخدم للحرامية والمفسدين
انا واحدة من البلدى..انا واحده عاشت ايام الكيلو لحمة من الجزار ب75 قرش اه والله
وعشت لما شفته ب75 جنيه اه يازمن الفلوس اللى اضعفت النفوس
يعنى المدرس المتعاقد يجيب بماهيته اتنين كيلو لحمة ويشحت باقى الشهر
كلام كتير نفسى ااقوله....
اول شيء... ان الشهداء اللى ضحوا علشانى وعلشان ولادى وعلشان كل المصريين دول عمرنا ماهننساهم وان شاء الله فى جنة الخلد وربنا يصبر اهاليهم

تانى شيء...بقول لكل شاب وفتاة وكل رجل وكل سيدة من اللى تواجدوا فى ميدان الثوره ...واللى اتوجدوا فى مكان على ارض مصر ..فى ميادينها وشوارعها من الجنوب حتى الشمال
الف شكر والف تحية ولكم تعظيم سلام.. انا معرفكوش شخصيا لكن شوفت انتوا اد ايه تعبتوا وسهرتوا وجاهدتوا وصبرتوا ونمتوا على الارض واتنبح صوتكوا
تحياتى لوائل غنيم
تحياتى لاسراء محفوظ ...ولكل اسم ساهم وشارك فى صنع ثورة الفيس بوك
تحياتى للسباك اللى عامل دوراة المياه
تحياتى للكهربائى والمهندس اللى عملوا وصلات الكهرباء
تحياتى للى ودا سندوتشات((الهمبورجر والكنتاكى))حسبى الله ونعم الوكيل فى اللى طلعت واللى ساعدوها انها تطلع وتقول دول مأجورين ومتدربين فى ايران وامريكا وبياخدوا فى اليوم 50 يورو
اقسم بالله العظيم ماصدقت منها ولا حرف من اول ماتكلمت..وقلت دى مأجورة وكلبه من كلاب الحزب الواطى

تالت حاجه...اشكر ولادى الثوار انهم خلونا نتكلم بعد الخوف اللى كان معششفى قلوبنا واعترف انى واحده من اللى كانوا خايفين على لقمة العيش وخايفة لايؤذوا ولادى كنت خايفة من البهدلة
ولكن الثوار ماخافوش ولا انحنوا..الله اكبر على شبابك يامصر
ربنا يحميكم ويعزكم وينور طريقكم ويحفظكم من كل سوء
ويارب تكون مصر ليكم احسن من مصر اللى شفنها على قبل كدا
يارب يجيلنا رئيس دوله تحبوه زى ماحبانا عبد الناصر
انا بحبه لغاية دلوقتى رغم انى كنت صغيره لما مات.. بس فاكره بكاء امى وابويا عليه.. فاكره السواد اللى كانت مصر متلفحه بيه يوم جنازته
عبد الناصر اللى بنى المصانع والمدارس عبد الناصر اللى بنى السد العالى ونور مصر
مش اللى باع المصانع وحط فلوسها فى جيبه وجيب المنتفعين
مش اللى بنى الجامعات الامريكيه والالمانيه واللى واللى
مش اللى باع ارض مصر للمنتفعين بتراب الفلوس وقبضوا الملايين من تسقيعها
كلنا عارفين الكلام ده بس كنا ساكتين من ضعفنا وخوفنا
وفى غيرنا قال واتكلم ولكن لاحياة لمن تنادى
وجه شباب زى الورد ورافع راسنا وقال كفايه ظلم وفساد وربنا قواهم ونصرهم بدعوات الامهات المقهورات غما وحزنا على دماء ابنائهم الشهداء
ياقلبى على كل ابن
والله حاسه بقلب كل ام وكل اخ وكل اب..لانى جربت فقد الاحبه
ربنا معاكم ويعوضكم عنهم كل خيروعزائنا فيهم انهم فى جنة الخلد بأذن الله
اخر حاجة نفسى فيها
انى اشوف بلدى بلد علمى صناعى متقدم
نفسى اشوف بلدى زراعيه غنية
نفسى اشوف بلدى دين وايمان وضمير
نفسى اشوف زويل فى مكانه الصح
واشوف عمرو خالد فى المقدمة
واشوف كمال الجنزورى واخد حقه ومكانته
واشوف اسامه الباز رافع رايتنا
اشوف اسامه يعقوب على قمة طب بلدنا (الرجل الذى يرسم قلوبنا بيديه مجانا)
اشوف بلال فضل وابراهيم عيسى فى الثقافه والفنون
اشوف عمر موسى على قمة البرلمان
اشوف واشوف واشوف ياااااااااااه دى مصر ماليانه ضمائر حيه وقلوب صاحيه وعقول منوره بالايمان
واشوف شبابنا مالي برلمنا((حزب الشباب الثورىالصاعد ))
وغيرهم كتير وكتير
لان مصر ماليانه كفائات ..مش زى العهد الغابر كل مافتح اتفرج على البرلمان الاقى فى وشى فتحى سرور وزكريا عزمى وغيرهم من فى سن الستين فما فوق
ايه ؟؟؟؟؟؟؟؟؟؟؟؟؟
احنا خلاص رايحين..لازم يجى لمصر دم جديد ..دم فتيى لازم الشباب دول اللى يبنوا مصر ليهم ولولادهم
جمال عبد الناصر لما بنى مصر كان فى الثلاثينات
....مايجوش دلوقتى ويقولوا عايزين خبرة
خلى الخبرة القديمة على جنب شويه...لازم نقول الكلام ده لاحمد شفيق...عين(بفتح العين وتشديد الياء )شباب فى الوزاره
عايزين الفكر الجديد ..عايزين الروح الوثابه ...عايزين دماء نقيه...
لازم تفكر يارئيس الوزارة تفكير جديد معاصر لمصر الجديدة

لازم ياشباب تطلبوا حقوا فى حكم مصر ومستقبل مصر اللى اتولدت من جديد على ايديكم

دول شباب الفيس بوك اللى انا معرفش عنه حاجه
دول شباب الاختراعات اللى مقفلة الادراج عليها
دول الشباب اللى نور مصر بعد الضلمة اللى كانت فيها بعواجيز البرلمان وشيوخ الشورى وذئاب الاعمال
مصر ولاااااااااااااااااااااااااااااادة

ولا بس شاطر يقول انتوا بتزيدوا كل سنة مليون ومش عارف ااكلكوا منين..كانوا بيأكلنا من بيت ابوه
جه زويل وقال انتوا ثروة بشريه جبارة وهو دا الكلام
هو دا اللى منتظرينه مشاريع ونشتغل
مش سرقه وهبل
والف الف الف مبروك ياشباب مصر