السبت، 6 أغسطس 2011

كل عام والجميع بخير

بسمالله الرحمن الرحيم
اهدار الوقت ليس من حقك ((هذا هو العنوان )

كل انسان حر فى وقته ينفق ساعاته وايامه ولياليه كيفما شاء يمضيهما لهوا او لعبا او جدا او كدا او يمزج بين نقيضين
زليس لاحد التدخل او الاعتراض
هذا التصور سنكتشف جميعا زيفه وبطلان حجته عندما نقف بين يدى الله يوم العرض عليه...ونجد انفسنا مضطرين لان نعرض امام رب العرش العظيم تقارير عما صنعناه طيلة اعمارنا

فهل نفكر كيف يكون الحال اذا لم نجد شيئا يستحق ان نقوله وقتها

دكتور ناصر ابو عامر مدرس الحديث فىالازهر يذكرنا بقول رسول الله صلى الله عليه وسلم ((
لاتزول قدم ابن ادم يوم القيامة حتى يسئل عن اربع:
عن عمره فيما افناه.........وعن شبابه فيما ابلاه ..........وعن ماله من اين اكتسبه وفيما انفقه ..........وعن علمه ماذا فعل به؟
اى ان المسلم رغم مايبدو له من حرية فى اضاعة وقته الا انه سيجد نفسه محاسبا على هذا الوقت لان الله لم يخلقه عبثا او لمجرد الوجود فى الدنيا
ولكن جعله سببا لتعميرها وكلفه مسؤليات ومهام تجاه نفسه وتجاه الاخرين
كما اعلى الله من قيمة العمل والسعى ورفض الكسل والتقاعس والتواكل والاستسلام للشيطان باضاعة الوقت فى اللهو وكثرة الكلام
والعبث...
ونجد الحديث الشريف يذكر لنا السؤال عن العمر ككل ثم يخص بعد ذلك مرحلة الشباب باعتبارها مرحلة التكليف الشرعى والانطلاق نحو المهام والمسؤلياات على كل المستويات كما انها مرحلة الصحة والقوة التى تتيح للمسلم القيام باكبر قدر من الاعمال والطاعات التى يستطيع ان يذكرها لربه عند السؤال
وينبه دكتور ناصر لنقطه اخرى تتعلق بحديث اخر لرسول الله صلى الله عليه وسلم قال فيه ((
خذ من شبابك قبل هرمك ॥وخذ من صحتك قبل مرضك...وخذ من فراغك قبل شغلك ))
وتفسير ذلك ان الانسان فى شبابه يكون اقدر للعباده مثلا على الخروج للحج والعمرة والصلاة فى المسجد وقيام الليل والصيام فرض ونوافل وقراءة القرءان
وكذلك الخروج للعمل واكتساب المال وتربية الابناء وتعليمهم وتقيم كل مايقدر عليه للاخرين
ولكن اذا ماكبرت سنه فقد تقعده امراض الشيخوخه فلا يستطيع الخروج للحج او الذهاب للمساجد ولاتعينه عافيته غلى قيام الليل وصيام التطوع ...ولعله يكون قد ادخر شيئا فى شبابه لهذه الايام ويعتبره رصيدا له فى اخرته
كما ان المسلم قد يكون فى بعض مراحل حياته لديه فسحة من الوقت يمكنه استثمارها فى تحقيق اكبر قدر من الانجازات والعبادات لانه قد ينشغل بعد ذلك باعباء كثيرة تجاه عمله واسرته تقلل من فراغه
ويقول الرسول صلى الله عليه وسلم : (
(نعمتان مبغون فيهما كثير من الناس : الصحة والفراغ ))
والغبن هو ان تبيع سلعة باقل من ثمنها او تشتريها باضعاف ثمنها.... فانت هنا خاسر فى كلا الحالتين
ومعنى الحديث ان من صح بدنه وتفرغ من الاشغال ولم يشغل نفسه ووقته للعباده والاعمال الصالحه والنافعه له ولغيره فهو المغبون وكمن ضيع حياته هباء
والزمن من النعم التى انعم الله بها على العباد لذا نجده (( جل وعلى )) يقسم بها فى قوله ((
والعصر ان الانسان لفى خسر الا الذين امنوا وعملوا الصالحات ))... اى انه عدا الاعمال الصالحه فهو فى خسران ونقصان
ويقول الشيخ الغزالى رحمه الله :
كل مفقود عسى ان نعوضه او نسترجعه الا الوقت
ويكون حساب المضيع لعمره ووقته اشد اذا كان العمر مديدا ولم يحسن صاحبه استغلاله لصالحه
ويقول صلى الله عليه وسلم : ((
خيركم من طال عمره وحسن عمله )
)
وكل عام وانتم فى حسن عمل وصلاح دين ودنيا

الأربعاء، 25 مايو 2011

اسئلة لا اجابات لها.....هو الشعب دا كله مش مالى عنيكم

بسم الله الرحمن الرحيم
وبه نستعين

ياترى كل الناس تعبانة زيى...بجد انا تعبت وقرفت
بلدنا دى مافيهاش حد عايز يصلح حالها ابدا....عاملة زى اليتيم اللى مالوش حد يدافع عن مصالحة...
ايه اللى بيجرى دا

ايه؟؟؟؟
هى مصر ماخلفتش الا مبارك ولا ايه؟؟؟؟؟؟؟؟؟؟؟؟
مالهم خايفيين عليه لايموت ومصر تنقهر عليه وتموت وراه!!!!!!!!!!

والله ماشميت هواء نضيف الا لما اتحبس نظيف واعوانه
دانا كنت بنام يوميا من الهم والحزن قهرا على بيع مصر بتراب الفلوس॥॥ وانا شايفة الشباب قاعد يشتغل سواقين تاكسيات وعمال نقاشه وسقالين مبانى
يخرب بيوتهم وبيوت اهاليهم....حولوا نص شباب مصر لفقراء بشهادات جامعيه...والنص التانى لمجانين من اللى بيشفوه
لاهما هايخدوا معاهم حاجه لما يموتوا ولا هاينفعهم يوم الحساب .... ورغم دا برضه باعوا البلد وقبضوا العمولة
البلد دى هى انا وانت وجارى وابن عمى وست ابوها وخالة امها

ياخبر اسود على اللى بيحصل فى البلد

هما فاكريين اانا فعلا اصبحنا مجانيين لا نستوعب مايحدث
مؤتمر الوفاق مالينه اعضاء حزب وطنى....واتلاف شباب الثورة اعترضوا وماحضرووش....ولا حد سئل فيهم ولا انسحب من المؤتمر تاييدا لهم واعترافا برفض هؤلاء الاعضاء...ليه؟؟؟؟؟؟؟؟؟؟؟؟؟؟
وكأنهم بيوصلوا رسالة للشباب بأن لا لكم قيمة ولا كلمة ولا ثقل سياسى
عصام اللى بيقولوا عليه شرف....اللى حواليه مغييبنه بمشاكل مصر الاقتصاديه وكل يوم والتانى مسافر فى بلد
هو مابيقراش الاعتراضات على اللى بيحصل
اكيد هو مع مسامحة زفت الطين....والا ماكنش سكت على المهازل اللى بتحصل وعودة ست الناس كلها لبيت جوزها معززة مكرمة بعد تنازلها عن ماسرقته من جيوبنا ((بجد كتر خيرها وخير اللى اللى جابوها ))
عايزيين ناس شرفاء
عايزيين احزاب من بتوع زمان....بالفعل وليس بالصوت والصوره

بسمع كتير عن ان الثورة ماكنش ليها كبير!!!!!!!!! وهو الشعب دا مش كبير واتكلم بكل اللى تاعبه وهادد حيله
يعنى لازم يفضل الشعب فى الشارع وميدان التحرير طول عمره
ويجى رجال الاحزاب المعمرين وياخدوا الحكم على الطبطاب من غير اراقة دم واحد فيهم دا لو عندهم دم!!!!!!!!!
دلوقتى كل اللى عملوه الجرى على اثيوبيا والسودان علشان قضية المياه وبعد المياه.... خلاص القواضى خلصت!!!!!!!!!! مابيتحركوش ليه فى بلاد الله طولا وعرضا... عربية واجنبية॥॥القاصية والدانية لشرح معضلة الاقتصاد فى بلدنا ...هوكل حاجة لازم تبقى على عصام
امال عايزين يمثلونا اازاى فى مجلس ((موافقون على اى حاجة ))
فرحانين بأوباما علشان هيحاول يساعدنا ب2 مليار
طيب ماحنا ممكن نكسب اكتر من كدنا لو عايزيين... لو اتحركنا ...لو بندور على حل مشاكلنا.. لو بنعرف نتكلم امريكى واوروبى وفرنساوى
مابيتحركوش ليه علشان قضية الفساد الكبيرة اللى خلت مصر ميح ...
.
مابيتحركوش ليه للبلاد العربية( وفوود وراء وفود ) ليقنعوهم بحق مصر اللى جار عليه المأسوف على شبابه هو وعياله ومراته ووزرائه

مابيقولوش للسعودية اننا اتنهبنا ارضا ووبترولا وصناعة وكله دخل جيوب الفاسدين॥॥وانتوا بتدولوا هدايا وناسيين الشعب المتمرمط فى مياه المجارى والارض الرملية ومستشفيات بلا دواء وضرائب ما أنزل الله بها من سلطان
فى حين انهما عمالين يبنوا بلدهم ويخضروا ارضهم (يحاولوا يخلوهم يشوفوا بقلوبهم شعب مصر )مش رئيسهم وبس

مابيقولوش ليه للبحرين والامارات انكم عايشيين وبتعيشوا شعبكم معاكم
لكن زفت الطين موت شعبه علشان هو يعيش ويتمتع فى قصور وروضات الجنات فى الدنيا ((ان شاء الله هايدفع تمن استعجاله الجنة فى الدنيا ))
مابيقموش ليه ويطالبوا المجلس العسكرى بالحقيقة ويتخاصموا امام الله والشعب
ماهو لازم يفهموا اننا مش هانختار الا اللى بيدور على مصالح البلد وشعبها مش اللى بيدور على مصلحته وبس وينزل بقد ايه فى الانتخابات ويمثل اد ايه فى مجلس الشعب ياناس اعملوا ليوم الحساب الكبير مش ليوم تكسبوا فيه قد ايه!!!!!!!!!
ان بصراحة خلاص قرفت من اللى بيحصل بس عمرى ماهقول زى الناس مابدأت تقول ((ياريت الثورة ماقامت ))
بس خايفة أأقول (( منك وعليك العوض يارب ))

لقد بدأت السلسلة تتفك...خروج سرور سعيدا ومبسوطا ((اسم على مسمى ) بتاع موافقون
ولما خرج زكريا بتاع الفساد للركب ولاقوا الناش هاجت خافوا على سيادته فحافظوا عليه امنا مطمئنا ليس حبا فى الشعب ولكن خوفا عل حياته وتأجيل للقرار ليس الا
ماهو العيسوى مش قادر ياحرام يحمى كل واحد فى بيته॥ ولا قادر اصلا يحمى مصر

برائة عيال المخفى من عمولات السياحة
حل الفزورة دى واكسب قصرعلى ماقسم كدا فى شرم الشيخ (ياترى هايطلعوا برائة من ايه كمان )؟؟؟؟

السبت، 23 أبريل 2011

ومازالت المهزلة مستمرة

بسم الله الرحمن الرحيم... وبه نستعين

انهم يستخفوا بعقلنا
ماهذا الذى يحدث؟!!!!!!!!
ماهو دور عصام شرف؟؟؟؟؟؟؟؟؟؟؟
اهو اتفاق على قتل اعصابنا ؟؟؟؟؟؟؟؟؟؟؟؟؟؟؟؟
اهو اتفاق ان ننسى ونرتاح كما كنا فى السابق ؟؟؟؟؟؟؟؟؟؟؟؟؟؟؟؟؟؟؟

نبدأ الحكاية من اخر لحظة

قالوا هانروح شرم نحاكمه ان انتوا ماحكمتوهوش
هنا بقا وخافوا على الراجل....يعملوا ايه ؟؟؟
جرى بسرعه عملوا تمثيلية هزيلة من جزئين

الجزء الاول:::::::::
مبارك خلاص استلم استدعاء النيابة بعد ماكان رافض............سبحان الله بسرعه كدا
مبارك تعبان ونفسيته لاتسمح بالتحقيق..........طيب نعمل ايه فى كتموتو
ندخلة العناية المركزة بالاسلحة والدبابات والحراسة السبع نجوم... فى الحجرة السبع نجوم ...فى الدور السبع نجوم
كدا اطمنتوا عليه خلاص....مافيش حد من الشعب المجنون يقدر يقربله....
نضحك على الشعب بقا.....ونحبسه هنا ((معلش يستحمل ))15 يوم ...وكمان 15يوم.... وهلما جرا
واحنا بقا مصدقين ومبسوطين وشاربين الشربات.....لا احد فوق القانون

نيجى لاولاد الحبيب
نايمين متهنيين وفى حضن العز مستقرين... وبجوار النظيف مرتاحين...ومع الاستاذ فى العلم او القانون بيذاكروا وناجحين...
اوعوا تقولوا امين
هو مخطط تهينونا...ولا مخطط تدخلونا مستشفى الامراض العقلية
ولا مخطط تلهونا بلعبة اسمها النائب العام قال والنائب العام اصدر تعليمات

حرام عليكم .... والله حرام عليكم
كل واحد فى البلد مشترك فى هذه التمثيليه...فلينتظر عقابه من الله
انه مصير امة
دى مش معاملة ناس قتلوا شباب البلد...دى مش معاملة شعب ثار واتكلم ونادى بالحرية وحساب الخونة الفاسدين

بيقولوا قال اعملوا فيا اللى انتو عايزينه بس ولادى مالكوش دعوه بيهم
طيب وولاد البلد اللى ربتك وكبرتك وفى الاخر سرقتها ونهبتها انت وشلة الفاسدين بتوعك واولهم ابنك
لو كان ابنك مات ولا ابن نظيف اتقتل ولا ابن العادلى اتنش برصاصة من قواته
ياترى كنتوا هاتعملوا ايه فى الشعب المسكين
لو ابن كبير الاطباء...ولا ابن النائب العام...كان من شباب الثورة
كانوا برضه قالوا يحبس على زمة التحقيقات فى مستشفى السبع نجوم...ولما يمسك فى السرير ويترجاكوا ماتودونيش القاهرة
تسمعوا كلامه وطبطبوا عليه...
ماهو برضه كبير ((مقاما )) ... والكبير كبير ...وكله يدلع نفسه

نيجى لعم عصام شرف
انت راضى تقعد زى خيال المأته ليه يا عصام
اخترناك وشيلناك على اكتافنا علشان تريحنا ولا تبهدلنا
ماهم بتوع قنا مش ماليين عنيك
بيقولوا مش عايزين المحافظ....خلاص غيره
غيرهم هايعملوا كدا لو رضختوا لدوول!!!!!!!!!!
وماله هما يعنى جايين من الصين
ماكلهم مصراوية
ولا دخلت اللعبة ونسيت مين اللى جابك رئيس للوزارة
اوعى تنسى انك تؤسس لشعب ديقراطى ...وهاتدخل الجنه برضاهم
خليها بالانتخاب ....هاتريح نفسك وتريحهم...وتبقا حطيت مبدأ يمشى عليه من يجيء بعدك


الثلاثاء، 12 أبريل 2011

ها يأكلونا الاونطه

بسم الله الرحمن الرحيم

استنى لما سمع كلمة السر ثم اتنطط واتشقلب ومثل الغيظ وانفجر فى وشنا
وقـــــــــــــــــــــــــــــــال :
هاتولى حسنى مبارك الكداب

هاهاهاهاهاهاهاهاهاهاهاهاها

دلوقتى افتكرت
قصدى دلوقتى بقا حسنى كداب ونقل ثروته وغيرها بالدهب

طيب ماعنده الدهب ال5 كيلو اللى واخدها من ارضنا هدية من سامح فهمى
طيب ماعنده العمولات اللى باع بيها مصانعنا وشاركتنا

ياراجل حرام عليك
مشارك معاه فى التمثيلية.........وجاى تلعب معانا
منه لله كل واحد ساعده وبساعده
هايروحوا من ربنا فين
اااااااااااااااه نسيت
دول اصلا مايعرفوش ربنا ولا يعرفوا اّخرة
"("(نسوا الله فانساهم انفسهم))

ليك يوم يا ظالم....تترد فيه المظالم
قريب او بعيد
هانتقابل يوم الوعيد....وخلى الحرام ينفعكوا
يا نائب جهنم....ياريس الحرامية....يا وريث

هاقول ايه!!!!!!!!!!!!!!!!!!!
وجعوا قلبنا............الهى يوجع قلبهم على عزيز غالى
وزى ماريحيين يصرفوا اللى نهبوه على محاميين بريطانيين
برضه يصرفوه على مرض مش بأيدهم ...ولقمة توجعهم...ونومة تقلقهم....وامان يقرفهم

هاعمل ايه ...خلاص تعبت من الاستهبال
قال ايه ....اول ماسمع كلمه اتغاظ وقال :هاتوه نحاسبه

فكرها خالت علينا
ودا برضه من ذنوب عصام شرف
انه مغيرش النائب العام

حسبى الله ونعم الوكيل


الاثنين، 4 أبريل 2011

عليه العوض ومنه العوض

بسم الله الرحمن الرحيم

لا عمرى كنت تبع حزب ولا هاكون
انا مع ربنا ثم مع قلبى

وقلبى بيقولى خلاص الثورة انتهت
والجيش عمل اللى عليه
وقف جنبنا وخلصنا من الظالم وابنه.........بس قصاد ايه؟؟؟؟؟؟؟؟؟؟
قصاد انه يسيبه يمشى فى امان ومن غير حساب

وكمان عصام الشريف الله يرحمه ويقويه..............معرفش ليه استسلم للمؤسسه العسكريه
او على الاكثر هما اطمنوله وسابوه على غماه
يعنى هو مابيفكرش...يعنى ماسألش نفسه
طيب هو ليه لم يعلن علينا الحقيقه

يا خلق هوووووووووووو..............هما اعتبروا انهم طلعوا طبيعى وانفض المولد
بيقولولنا وهما بيطلعوا لسانهم ..........هما انتوا عايزيين ترتاحوا منا وتاخدوا اللى سرقناه كمان!!!!!!!!!!!!
صحيح داحنا اعبط منا مافيش
ياخلق ......يا شعب.......يا ولاد بلدى...........
مافيش قدامكم غير انكم تشتغلوا وتبتدوا من جديد
ماضاع قد ضاع وذهب مع الريح
الريس لو عايز يدينا حاجه كان ادهلنا.....ولو عايز كان يمشى كان مشى من اول يوم

الريس بيسلم السلطه بطريقه سلميه.......واللى مش عاجبه يخبط دماغه فى الحيط
بس ربنا يستر واللى يجى يجى عدل
الريس واقف لغاية دلوقتى بيتحامى فى المشير ......لسبب بسيط
ان المشير وعده بكدا......وكل المشير بيعمله سواء كويس للشعب او وحش....بيعمله من باب الوفاء بالعهد لمبارك وفى نفس الوقت للشعب
اهو شوية لعب على الحبلين
ولو كانوا محترمين الشهداء كانوا زمانهم من اول لحظه اتلموا المفسدين كلهم فى قفص واحد
مش يقعدوه فى قصر فى شرم الشيخ!!!!!!!!!!!!!!!!!!!!!
حسبى الله ونعم الوكيل.....يسرق وينهب ويبيع البلد ويخربها هو واللى حواليه
وفى الاخر اتفضل ياريس ااقعد فى شرم على مالشتا يخلص ...وشويه وينقلوه على المعموره اصل الصيف هناك اجمل والذ
يااااااااااااه دانا عقلى هاينفجر من القهر
لاوتطلع علينا سيده معرفش دى نوعها ايه!!!!!!!!!
وتطلع تقولنا مبارك دا بطل !!!!!دا اتنازل ومعملش فيكم زى القذافى
سبحان الله............بقا اللى اللى كان عايز يقتل المتظاهرين بالرصاص الحى وراح يامر الجيش بكدا..........ولولا ستر ربنا ورفض الجيش ......يبقا دا بطل ازاى....اللى سرقك وسرق شباب البلد يبقا بطل!!!!!!!!!!!!

البطل الحقيقى هما قواد الجيش..... ورغم انهم طرمخوا على مبارك ومعاونيه...رغم ذلك بقولهم شكرا
بس اعلنوا الحقيقه على الشعب لييييييييييييه؟؟؟؟؟؟؟؟؟؟؟؟؟؟؟؟؟؟؟؟؟؟
علشان نصحى ونفوق بقا وندور على اللى جاى
وندور عجلة الانتاج وكفاية اللى راح ومش راجع
نبص لقدام ونصحى ومانخليش حد يسرقنا تانى
ولو سنه واحده عدت من غير سرقه............
يا سلام......شوفوا هايبقى معانا كام
يارب مانسرقش تانى
ومايجيش الرئيس الجديد يقول : دول اربع سنين عمى.....ولما الحق اخد اللى اقدر عليه زى غيرى

والله معدش عندى ثقه فى اى حد
لأن زمن عمر ابن الخطاب ولى وراح

ولكن تبقا كلمه لرسول الله صلى الله عليه وسلم :
الخير فى وفى امتى الى يوم الدين
نقول يارب

الخميس، 17 مارس 2011

قولوا نعم....تدخلوا الجنة

بسم الله الرحمن الرحيم
والله المستعان والصلاة والسلام على حبيبى المصطفى الف صلاة وسلام

كان يامكان فى مدينة كمنستان... جاء احد الشيوخ وقال كل من قال: نعم دخل الجنة بسلام
وانا اتبعه واقول : قل( لا ) تفلحوا والسلام ختام

حقيقى احترنا واحتار دليلنا
العسكر بيقول مش فارق معانا تقولوا اه ...تقولوا لا
طيب هما مش فارق معاهم ........ طيب احنا هانخاف عليهم اكتر منهم؟؟؟؟؟؟؟؟؟

ياللى بتقولوا الجيش تعب مننا وعلشان كدا عايزيين تقولوا نعم وعلشان تستلموا انتوا القياده وتريحوه
حرام عليكم...والله انتوا اللى حرام عليكم
الحزب الواطى واذنابه...مستعجلين قوى علشان طبعا يرجعلهم السلطان باى صورة وخلاص
وحزب الاخوان....فرصه وجاتلهم ....ليه مايستغلوش الفرصه قبل ماتضبع تانى
والاتنين حجتهم ان الجيش زمزيء مننا وعايز يرجع لعرينه

طيب هو الجيش ده مش برضه من الوطن ولا هو محسوب علينا فوق الراس
طيب اذا كان الجيش قال انا مستعد اواجه الرأيين ( نعم ولا )
يبقى ماحدش بقا يتعلق برقبة الجيش ويغنى علينا

الثورة قامت للتغيير
والشباب ياولداه ضحوا بحياتهم علشان التغيير
وكل اب وكل ام منتظريين التغيير اللى ولادهم ضحوا بحياتهم علشانه

نيجى احنا بقا وبكل سذاجه (اعذرونى لانى ممكن كنت اقول وبكل ندالة )نقول نعم علشان نريح الجيش ...اسفة تانى: قصدى نريح الحزب الواطى اللى قتل شبابنا اللى زى الورد... وندى الفرصه لحزب الاخوان اللى فضل طول عمرة مايعملش حاجه غير انه يبكى على اعضائه المعتقلين
سبحان الله كله دلوقتى نسى شباب الثورة اللى انا مابنساش الشاب الجميل الله يرحمه اللى بيضحك مع اصحابه على البحر
ولا اللى كان بيصور لحظة ولادة بلده من جديد
ولا اللى كانت بتتحايل على امها تسيبها تخرج الى الميدان مع اصحابها الثوار
ولا ولا
حد فكر يسئل ام شهيد ولا ابو شهيد ...انتوا ناويين تقولوا اه.. ولا لأ
هما دول اللى يتسئلوا...هما دول اللى دفعوا تمن حريتنا
مش جايين تقولوا الجيش تعب مننا ومش هايقدر يستحملنا 6 شهور كمان
ليه مايستحملناش؟؟ وهو اللى ضرب للشهداء تعظيم سلام
امال اهالى الشهداء دول هايستحملوا فراق ولادهم لنهاية العمر ازاى

والله دى وجهة نظرى ومؤمنة بيها
وروحى تهيم مع ارواح الشهداء تستمد منهم العون وتسترضيهم اذا نسيهم الشعب وقالوا نعم للدستور
وقلبى مع كل اب وكل ام ادعوا لهم بالصبر والتجلد اذا نسيهم قلوب رجال الاحزاب فى عنفوان طموحهم وقالوا نعم للدستور

اما انا...فاقول لأ ...والف لأ
ويجب ان يتحملنا الجيش فنحن احق به من حسنى مبارك الخائن...ومن جمال مبارك الوريث
ويجب ان نفى ونخلص لارواح الشهداءودمائهم النقية التى سالت على ارض التحريرالطاهرة
ويجب ان نكمل المسيرة الى التغيير الجذرى فى الدستور

ولى سؤال اخير

هل لو منعت الحصانة البرلمانية عن اعضاء مجلسى الشعب والشورى.....
هل سيترشح اعضاء الحزب الواطى ليخدم الشعب مجانا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اشك..... الف مرة
هل لو منع عنهم الاف الجنيهات التى يقبلونها ظلما وعدوانا من جيوبنا فى كل مرة يحضرون الجلسات فى المجلس الموقر
هل سيأتون ويقولون موافقون برضه مجانا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اشك.... مئة مره...

سيداتى سادتى الاعزاء
قولوا: لأ... تفلحوا وتفلح امتكم .... امة الشهداء الذين ضحوا بدمائهم وارواحهم وشبابهم من اجل ان نقف على باب التاريخ احرارا...لكى نختار تاريخا مجيدا لأبنائنا واحفادنا

قولوا: لأ.... لكى نحترم حاضرنا الذى نصنعه بايدينا
قولوا: لأ وماتحتاروش... احنا نتحمل والجيش يتحمل ...والوزراء تتحمل
ماهوا لو كان ماتلهم شهيد كانوا اتحملوا

اما من قال : نعم
فانا منه بريئه
والله مع الجميع لنصرة الحق والوطن
والأخذ بثأر الشهداء اللى زى الورد ماتوا
اللى ضحوا وتركوا ابوهم وامهم وزوجاتهم واولادهم الايتام فى رقبة كل مصرى
اللى راحوا وهما رافعين العلم بيقول بلادى
بلادى بلادى لك حبى وعمرى وفؤادى
اه يابلدى .... والف اه يابلدى....

الجمعة، 25 فبراير 2011

نقل من مدونة.... البلدى فيها حكومة

كلامي اللي جاي لكل شخص بيقول انا اسف ياريس وارحموا عزيز قوم ذل ورد الجميل للرئيس القائد

انا ياريس اسمي عادل صليب ؛ مصر ؛ مسيحي (حسب بطاقة البلد) ؛ من اللي راحوا ولسه بيروحوا التحرير من اللي نزلوا يوم 25 و28 ياريس عندي يدوب كلمتين وعاوز ااقولك اسف فيهم بجد .

انا اسف ياريس : ان اهلي علموني زي ما اهلهم ربومهم ان المشي جنب الحيط امان وان المشي جوة الحيط استقرار ...
انا اهلي قلولي من خاف سلم ونسيوا ياريس ان الموت مش هيفرق من ظابط او من سكتة قلبية او بلفافة بانجو
انا اسف ياريس لان عمري 24 سنة وقضيتهم في سكوت وخوف وضعف واستستلام
اسف ياريس لاني مكنتش اعرف في مصر غير رسمة اكتوبر في المدرسة كل سنة واللي كانوا بيقوله في التلفزيون عن دورك السياسي والاجتماعي

اسف ياريس لاني اتمردت عليك وكنت ابن عاق لاب وحضن كبير زيك ... كنت ناكر للجميل ياريس لبطل اكتوبر اللي خطط للضربات الجوية (اللي اشك ان حد من مؤيديك قرأ اي كتاب عن حرب اكتوبر وليه الفريق الشاذلي لانهم حتي ميعرفوش مين هو الشاذلي)
اسف ياريس بس مكنش ينفع ان اشوف بطل اكتوبر وهو بيدخلي اكل مسرطن وقتل من الشرطة وهواء ملوث وسرقة اعضاء وتشريد و35% من اهل بلدي تحت خط الفقر ...ياريس مكنش ينفع صدقني
انا اسف ياريس اني كنت مقتنع بان كل قتل المسيحين كان منك وبايدك رجلاتك واشوف بتضيع مني بلدي وحقي كمواطن فيه دون النظر عن ديانتي واشوف ناس بتاخد جنب وكذلك الناس التانية وانا واقف في النص لاني رافض اسمع كلام حد غير عقلي وعقلي قالي العيب في النظام مش في الدين

اسف ياريس اني مقدرتش اصدق رجالتك وهما بيقولوا ان خالد سعيد بلع لفافة بانجو رغم اني معرفوش بس صوره وهو مشوهة خلتني افتكرت اني درست في مدرستي بنظام تعليمك ان البانجو مش بيشوه الوش بس هو ممكن يشوه المخ وينيمه 24 سنة ويسكته علي الظلم والعنف ده كله

انا اسف ياريس عليك انت انك تكون ضحيت عشان تحرر بلدك وتسرقها وتنهبها وتقتل شبابها اللي في يوم كانوا تحت قيادتك ومنهم استشهدوا عشان حضرتك تركب كرسي الرئاسة ياريس وكل مرة تترشح لوحدك وتقتل اكتر وتسرق اكتر وتبوظ تعليمنا وصحتنا وحياتنا
انا اسف ياريس انا صحيح اتعلمت في مدرسة خاصة ومتعلجتش في مستشفي حكومي بس لما اشوف ناس بتموت ياريس وانت سايب ولادك يسرقوني وبتعالج الحرامية اصحابك علي حساب الدولة والاطفال بتموت في مصر عشان مستنين دور الكشف في المستشفي الحكومي
انا اسف ياريس اني خرجت عن طوعك واتظاهرت ماهو يمنفعش اعرف ان 45% من سكان بلدي في العشوائيات وانت وابنك واصحابه بتعملوا مدن وهمية بالملاين وانتم بايعين المتر بنص جنية وب5 قروش (زي ما اصحابك و مواظفينك عملين يطلعوا كل بلاويك دلوقتي بعد تنحيك الاجباري بـ 24 ساعة)

انا اسف ياريس اني والعيال بتوع التحرير واحنا عارفين انك عضمة كبيرة ومش حمل هزة طلعنا نقولك ارحل وامشي ومرعناش عشرة عمرك معانا 30 سنة ومرعتش شيبتك ولا استنيت تخرج بكرامة مع ان ياريس(كرامة مصر من كرامة المواطن ...ولا مساس بكرامة المواطن)
فاكر كلامك ده ياريس ؟ قد ايه كان مبهر وانا بشوف مروة الشربيني والمصري اللي اتقتل في لبنان ولا اعتقالات المصريين في السعودية والكويت واهو بنجامل بعض كاصحاب كراسي ... ياريس لو المصري الصغير ده ملوش كرامة انا اسف اني مرعتش كرامة حضرتك
ياريس مكنش ينفع اشوف ميتين تاني مكنش ينفع حتي اسيب اصحابي يوم 25 يناير ولا 28 يناير ... مكنش ينفع صدقني
انا اسف ياريس لان معيطيتش لما حضرتك القيت الخطاب اللي كان بعد جمعة الغضب ومكلفتش خاطرم تعزي امهات الشهداء بكلمة ...عيني مدمعتش ياريس بل الاكثر انها مرمشتش ... انا فاكر اني ساعتها عيني احمرت قوي وحسيت قد ايه انت لا تصلح ان يطلق عليك انسان ...انت رجل بلا انسانية
انا اسف ياريس اني مصدقتش وعودك الكدابة لاني جربتها انا واهلي 30 سنة ومكنش عندي استعداد الاقي ناس تانية بيتداس عليها عشان حضرتك تزود رصيدك في البنك او عقارات ولادك واحفادك ورجالاتك
اسف ياريس لاني لما سمعت انك عيان بالمرض البطال (لو كان بجد) متعطفتش معاك ..مش عشان قلبي حجر ..بس عشان قلت ده مصري ولازم يتعالج كمصري بس افتكرت ياريس ان الانتظار في معهد الاورام طويل ياريس ..معرفش وصلك مع شيكات تحويل فلوس مصر ان مصر فيها اعلي نسبة سرطان ولا لا بس دي الحقيقة ...وحضرتك قلت ان المواطن اهم ياريس ...وفيه الاف المواطنين من شعبك واقفين طوابير عاوزين علاج ومش بيلاقوا وبيموتوا في الانتظار

انا اسف ياريس اني مش قادر اسامحك ...مش قادر اشوف بلدي بتضيع بايديك واسكت وحتي لما خلاص ..مش مسامحك لاني كل مابحاول واغمض عيني بشوف صورة سالي واحمد ايهاب وشهداء ثورة 25 يناير وشهداء العبارة(عبارة من اللي بيغرقوا دول) وشهداء الدويقة(اللي ماتوا من عشوائيات جنابك) وشهداء نجع حمادي وكنيسة القديسين وغيرها كنايس كتير

انا اسف ياريس اني ضيعت من وقتي ومجهودي اني اكتب كل الكلام ده وانا ورايا حاجات اهم اعملها ..ادور علي المعتقلين اللي وانت في اخر ايامك سحبتهم علي سجونك و اشوف الناس اللي اتصابت بسبب انك رافض تخرج خروج مشرف وفضلت تقتل شعبك علي انك تسيب السلطة والكرسي (مع اننا مكناش هنزعل لو خدت الكرسي معاك وكنا هنجيب كرسي من الهلال والنجمة)

انا اسف ياريس اني بصلي كل يوم ويتمني امنية واحدة ان ربنا يمد في عمرك ويحفظك وتعيش عشان تتحاكم في بلدك وتتسجن وتشوفنا واحنا بنعيد كل اللي بوظته في الـ 30 سنة دول
اسف انك سرقت وقتلت ونهبت واشتريت بيوت وقصور بس نسيت تسال اهم سؤال لو جه يوم زي 11-2-2011 ولو فعلا تعبان ..هتعمل ايه بكل فلوس العالم وكل العز ده ... هتعرف لما تقف قدام ربنا ويفكرك بحرقة قلب كل اب وام من الشهداء وكل حد مات من الاهمال في المستشفيات واللي سابوا تعليمك البايظ واعلامك الكداب وثقافتنا الضحلة واثارنا المهربة واكلنا المسرطن وهوانا الملوث وصحتنا اللي بايظة ...

انا اسف ياريس حتي بعد ماتنيحت بالاجبار من العيال (سابهم يلعبوا...لحد ما لعبوا في كل تاريخك) .... العيال دي نزلت ولسه بتنزل التحرير ... بتعمر وبتطالب بباقي حقوقها الشرعية كبني ادمين .... كمصريين ... كناس اخرين بطلت تخاف وعرفت ان بعد القنابل المسيلة للدموع والرصاص المطاطي والحي والبلطجية والنومة علي الرصيف في عز التلج ...ان محدش بيموت ناقص عمر
بس كلمة حق وموته افضل من عيشة في ذل ومهانة

اهداء اللي : شهداء 25 يناير وكل شهداء الاهمال والعنف التي تسبب فيها الريس (المخلوع والسابق) محمد حسني مبارك