الثلاثاء، 31 مارس، 2009

واخيرا فهمت يعنى ايه تاج

بسم الله الرحمن الرحيم
جائنا البيان التالى...قصدى جالى التاج التالى من الابنه الغاليه ايوش
اللى بحب اسميها ايوش الجميل
وانا كنت عايزه ارد عليه يوم الجمعه...بس يمكن يوم الجمعه يكون عندى مشوار
فقلت خير البر عاجله..نبدا بسم الله


اسمك؟
خلينى براحتى..ونقول اسمى ام المدونين(كما اطلقتم عليا هنا)



المشهور بيه وسط اصحابك؟
الحجوجه


سنك؟
50 سنه و7 شهور


مجال دراستك؟
خريجة تربية وافخر بذلك


اسم مدونتك؟
هى مدونه واحده اللى كلكم تعرفوها
الفراغ




صورتك الرمزية فى المدونة بتعبر عن ايه؟

بتعبر عن حبى للورود وانه فرحه وجمال مهدى من ربنا الى النفوس المتعبه

هل فكرت فى اغلاق المدونة ؟ والسبب؟
لا مافكرتش ااقفلها
وان كنت افكر احيانا فى اخذ اجازه لانى ببقى تعبانه او مش محدده حاجه مفيده اتكلم فيها


ايه رد فعلك لو حد قل ادبه فى تعليق ؟
اعتقد انى اكبر من اى حد يفكر يقل ادبه عندى
ولو حصل
هلغى كلامه لان تربيتى ماتسمحليش انزل لمستويات زى دى




اسوأ مدونه؟
بتاعة واحد مش عاجبه العيشه ولا اللى عايشينها
ومابيبطلش شتيمه عمال على بطال..ولما الناس نصحته بالايمان والرضا بقضاء الله
للاسف شتمهم

هيحصل ايه للايميل بعد ماتموت؟
بنتى هاتفتحه تقول للناس ان ماما ارتاحت بين ايادى الله (ان شاء الله)
وبس ..هاتتقفل.. ونشوفكم ان شاء الله فى الجنه

اديت الباسوورد لحد قبل كدة؟
بنتى وبس

السفر بالنسبة لك ايه؟
بحبه جدا..وخصوصا فى القطار..لانه بيدينى احساس بالتغيير
وبتفرج على الدنيا اللى مش قادره اشوفهاوانا ماشيه على رجلى
وبكون فى وسط الناس بجد

الموود بتاعك ايه ؟
هاديء..ولكنى سريعة الحزن
وبرضه سريعة الفرح وبنسى الاساءه..بس باخد وقت


بتعمل ايه فى وقت فراغك ؟
4 حاجات
1 اكتب بوست جديد
2اقرأ قرءان
3اتفرج على التلفزيون
4 ارغى مع بنتى..بس لو كانت فاضيه

الأكلة المفضلة ؟
بحب كل حاجة الحمد لله وافضل الملوخيه الخضراء
والبسله بالجزر والباميه الخضراء
والسمك المشوى


الصفات التى اخذتها من والدك؟
الله يرحمه(كنت بحبه قوى)
اخدت منه الطيبه والحنان اللى مالوش حدود



الصفات التى اخذتها من والدتك ؟
الله يرحمها
انا مختلفه تماما عن امى..فيما عدا قوة الشخصية واتعلمت يعنى ايه اقتصاد


اكتر ست حاجات بتكرههم ؟
قسوة القلب(بمعنى عدم الحنان)
الظلم
التكبر
النفاق
الصيف والحر
الصرصور


اكتر ست حاجات بتحبهم ؟
الحنان
القرءان
الحب
الافلام الرومانسيه بتاعة زماااااااااااااااااااان
الحقول الخضراء وهواها النقى
المدونات



شخصيتك نوعها ايه ؟
(بشهادة الاخرين)
طيبه..ملتزمه..احيانا ديكتاتوريه(لانى احب المثاليه)


لماذا دخلت عالم التدوين من الاساس؟
عرفت ان ممكن الاقى ناس تكلمنى وتناقشنى ونختلف مع بعض بس من غير زعل
وخصوصا بعد زواج احدى بناتى ..والاخرى مشغوله بدراستها
ولانى محتاجه احس انى عايشه لسه(لان الشغل لا يعطينى الاحساس بالحياه..على العكس انا بكون فرحانه جدا وانا خارجه من الشغل)



احلى جملة قيلت فى وصف مدونتك؟
مدونه هادئه وبها معلومات دينيه تدخل القلب بدون ازعاج
ولا تعصب


احلى بوست كتبته؟ ضع اللينك ثم اذكر لماذا؟
بحب كل ماكتبته وان كان "منحه ربانيه" اقرب لنفسى
و"قصة حنان" ..اقرب لقلبى




افضل مدونة قرأتها؟
مدونات كتير..المهم تكون صادقه ومن القلب
زى مدونة :موناليزا..فكره من الزمان ده..همس الحب..واخرين بس مش فاكره الاسم دلوقتى




افضل بوست قرأته؟
اى بوست اطلع منه هادئه نفسيا
او ضاحكه من قلبى
وبلاش تحديد اسماء


الشغل بالنسبة لك ايه؟
عذاب..وان كان يقولون لى :انه ارحم من قعدة البيت(بس نفسى اقعد فى بيتى)

الانترنت بالنسبة لك ايه؟
بيربط حياتى باللى بحبهم
يعنى بيخلى لحياتى طعم




تمرر التاج ده لمين ؟

نفسى كل واحد من ابنائى المدونين يجاوب عليه
بس خايفه يكسفونى ..او مايكونوش فاضيين

الأحد، 29 مارس، 2009

كلام لابد منه..الى: نعكشه ..عاشقة الاحزان..ايوش..وجميع الابناء

بسم الله الرحمن الرحيم
بجد وحشتونى..ووحشنى الكلام معاكم
صحيح انا اللى بكلمكم..لكن ببقى حاسه وانا بكتب انى شايفه ثندر: قاعد جنبى وبيقولى :يلا ياماما نفسى اقرا ماتكتبى
وبسمع مونليزا ..بتدعيلى وتقولى تاعبه نفسك والله
واتخيل بندقه ..مستعجله قوى عايزه تطمن انى كتبت علشان تروح لمذاكراتها ماهى فى طب ..ربنا ينجحها
ومحمد غاليه بقا دا عايزنى اكتب ..كلمتين وبس
واختى وحبيبتى ام البنات وحشتنى قوىبس انا كنت عندك قريب
والمعتصم..فكراك ومش نسياك..مهما الزمان ..قساك
وادم المصرى..اه منك يا واحشنى
ونعكشه..دى بقا قلبى اللى واجعنى..نفسى اكلمها افضفض معاها ..اخد راحتى ..واتكلم بدون خطوط حمراء..بس هى فين؟
نفسى ااقولها عندى كلام كتير معاكى ..نفسى ااقولها افتحى التعليقات واسمعينا..وانا عارفه انك دكتوره ومش فاضيه..ماترديش علينا
بس اسمعينا زى مابنسمعك..
والحبيبه اخت الحبيب ..ايوش الجميل انا تحت امرك يا جميل منتظره مكالمتك على الماسنجر
وفكره من الزمن ده..الله على مشاعرها الرقيقه
والمصريه المسلمه ..اللى كلامها كله ايمان وحب لله وبحس وهى بتكلمنى انى فى روضه من رياض الجنه
وامبارح كان عمرى عشرين..وانا كمان كان عمرى عشرين ..بس مش هاقلك من امتى..هههههههه
وحبيبتى زهرة الامل..والله حبيتك من اول ماشفتك
همس الاحباب..خاصة...ومدونة الضاحكون عامة..ليها مكانه خاصه عندى لانى بحب ادخلها وانا عارفه انهم هايفرحونى بلقائى معهم
ريهام العربى..انتى اللى بتخلى لكلامى دور فى حياتكم واتمنى اكون ليكى صديقه دائمه
عاشقة الاحزان..اتمنى التواصل معاكى علشان ااولك بالدليل القاطع ان الحزن ارخص من ان نعمله ثمن
حروف وكلمات ..الاخت التوأم للثنائى ..ثندر وايوش هاتبقى بنتى ومافيش مفر
عابرة السبيل..بتتاخرى عليا كتير ..بس مش بنساكى وياريت تنضمى لبقية ابنائى
وايمان روحى..وطوبه دهب..وحاجات عيال..
اى ابن او ابنه كلمتنى مره او زارتنى مره ..بحبكم واشكركم..وعمرى ماهنساكم..واتمنى انى اكون ذكرى حلوه فى حياتكم

بجد يا ولادى انتو ادتونى معنى للحياه..تواصل رائع لام محتاجه تملا وقت فراغها بكل مايفيدكم ويفيدنى دنيا وآخره
انا بحسد نفسى عليكم..ماشاء الله لاقوة الا بالله..ربنا يحميكم
عارفين ...الدنيا حلوه بيكم... ولما كنت تعبانه كان اللى مزعلنى انى مش قادره ااقوم اكلمكم ..

حقيقى ربنا يخليكم لاابائكم وامهاتكم..ويجعل حياتكم تواصل مع الله ..وحب فى الله
ويظلكم فى ظله يوم لاظل الا ظله

الجمعة، 27 مارس، 2009

المنحه الربانيه

بسم الله الرحمن الرحيم..
ماحدش بيحب المرض..انا عن نفسى بكرهه جدا..بس هاعمل ايه..هو مصمم يصاحبنى وبيعزنى جدا
احاول اضحك عليه واقوله خد اجازه منى شويه..ابدا...ياعم انا لسه كنت مستضيفاك ..واستحملتك..وعملت معاك واجب ضيافه حلو..خليك بقا زوق..وتعالى بعد سنه ولا حاجه..اطلاقا ..انا معاك وقاعد ..ومش مفارق (له فى ذلك حكم)
بيبنى وبينكم قلت يمكن العد التنازلى بدا..الحق بقى اعملى كام تسبيحه حلوه على كام استغفار..على كام جزء قرءان..يمكن يمكن اعرف اختم صحيفتى بحاجه تنور وجهى عند لقاء الله

وقعدت كدا مع نفسى اشكر ربنا على الابتلاء..وان الابتلاء نعمه..وان الابتلاء بيرفع درجات الانسان..لآما يعنى (ودا مش تبعنا..هههههه)بيكفر زنوب..(هو حد فينا بيعمل ذنوب)..وش بيغمز
المهم يعنى..قعدت افتكر فى اللى راح واللى مش جاى ..واعيط ..واقول ياخسارتك يابت..دانت لسه صغيره ..دانت يادوبك معديه الخمسين
طيب يا حلوه زمان وانتى صغيره قوى قوى(فى العشرينات يعنى)كنتى بتصلى سنن الصلاه..كنتى بتصلى قيام ليل
الاقى نفسى ااقول :ايه الكلام ده..دانا كنت فى الكليه..وكنت بذاكر..واه كنت بقوم ليل ..بس ايام الامتحانات..كنت بقوم الليل بطوله مع كوباية قهوه (ماقولكش)وافضل ادح .وادح...امال يعنى بقيت ..رئيس قسم من فراغ(ودا موضوع تانى ..ابقى احكى عليه وقت تانى)
اهو كنت بعمل اللى عليا..مذاكره وسهرللصبح
شفتوا بقا..انا لم اقصر والله على ذلك شهيد
بس ياخساره للدنيا الفانيه

باين عليا خرجت عن الموضوع
موضوع ايه... موضوع ايه
اه..قعدت احاسب نفسى..وطبعا بين كل وقت والتانى ..أقرا جزء قرءان..وكمان اسبح ربنا (سبحان الله وبحمده ..سبحان الله العظيم)..
وبعدين يغلبنى النوم من التعب..بس والله الاقى لسانى وانا نايمه بيوحد ربنا (لا اله الا الله ..وحده لاشريك له ..له الحمد وله الملك وهو على كل شيء قدير).
.

وبعدين وعلى طريقة افلام زمان..الاقى موجه جايه من بعيد(افلام على بدرخان...لما كان الحبيب يجى يقرب من حبيبته..ويحصل مالا يحمد عقباه)احنا اتربينا على كده..ماليش دعوه ببتوع اليومين دول
المهم بقا الاقى نفسى ..مع حبيبى وجوزى وابو بناتى ..الله ايه الحلم الجميل ده..ونقعد مع بعض قعده رومانسيه.. ترد الروح .(الحلم بتاعى وانا وجوزى ..حد ليه عندنا حاجه) ..بس برضه التعب ..مافيش فايده منه...يصحينى من احلاها حلم..الاقين بصرخ واقول يااااااااااااااااااااارب..رحمتك
ماليش غيرك..انت الرحمه.. انت الحنان..انت الشافى..انت الحبيب..انت السميع الرحيم
اه..هو الحبيب..انت حبيبى يا رب..انت اللى بتسمعنى :لا اله الا انت سبحانك..انى كنت من الظالمين(وكذلك ننجى المؤمنين) صدق الله العظيم
الاقى سكينة روح..ورضا بقضاء الله..الاقى هدوء.. وشفاء يغلفان جسدى
الاقى حاجه حلوه فى ريقى ـتستعذب نداء الله..يا اللــــــــــــــــــــــــــــــــــــــــــــــــه..جميل نداء الله والواحد مريض..ليها طعم جميل
الاقى انى وجدت الحبيب الابدى ..السرمدى..اللى بيبقربنى منه ..غصب عنى.. بيقولى انا وبس..ماينفعش يبقى جوانا حبيبيبن..هو الله هو الله هو الله وبس
وافوق من التعب..افتكر انى كنت بحلم بزوجى الغالى وافرح انى شفته..بس ياخساره لسه ماجاش اوان اللقاء
والاقى نفسى بقول لبنتى ..مافيش عندك حاجه حرشه..جعانه
وبنتى تهلل..ماما خفت ..ماما خفت..ماما عايزه تاكل...
اتفضلوا معايا..بقالى يومين بدلع وباكل فراخ (مسلوقه..بامر الطبيب)..بس حلوه ونعمه والحمد لله على الصحه

وهكذا عدت من الرحله القصيره مع المرض..بس خدت شوية مواعظ
الموت مش بالمرض..الصبر جميل والالتجاء الى الله اجمل واجمل
الصحه نعمه وفرصه من ربنا ..لنتذكره(بالتسبيح والتوحيد والحمد والتكبير)
المرض دا نعمه فى صورة ابتلاء..(وعسى ان تكرهوا شيء وهو خير لكم)
المرض تذكره علشان نقرب لربنا ونناديه ونعترف له بالقدره..فهو القادر على كل شيء..وهو الواحد..الذى لابد ان يكون الواحد فى القلب ..وفى العقل..وفى الروح.(.فليس كمثله شيء)..وهو النافع..ومافيش لى حاجه هتنفعنى عند ربنا غير حبه واقترابى منه ورضاه عنى
لازم افتكر ربنا علطول..مش لازم مع المرض ممكن يكون مع الفرح ..لكن المهم: انى الحق نفسى باستمرار ..غيرى راح ومالحقش يصلح حاله مع ربنا ..ربنا يعافينا جميعا

المهم
اتمنى للجميع الصحه
وتعالو نذكر ربنا شويه(الا بذكر الله تطمئن القلوب)

وعمر الشقى بقى...لسه فى العمر بقيه..مش قلتلكم منحه ربانيه..(واذا مرضت فهو يشفينِِِ)

وكمان خدت فرصه تانيه..يمكن اقدر اعوض اللى ضيعته من حياتىللهم لك الحمد والشكر ..كما ينبغى لجلال وجهك ..وعظيم سلطانك)
وجوزى يستنى شويه عليا...انت مستعجل على ايه.. صحيح وحشتنى ..بس(والباقيات الصالحات خير عند ربك ثوابا..وخير املا))

الحق بقا أقرأ: سورة الكهف..ماحدش ضامن عمره...ههههههههه
وحشتونى واشوفكم على خير

الخميس، 19 مارس، 2009

اذا سئلت فاسئل الله

بسم الله الرحمن الرحيم
تصدقوا النهارده الخميس وبكره الجمعه
اه والله...طيب خلاص ماتزقوش..انا عارفه انكم عارفين
طيب ليه اللى مايعرفش مايقلش انا معرفش...ودى بتبقى واضحه جدا..وباين على الشخص ده من تصرفاته وحركات ايده وراسه انه مش فاهم..بس برضه عايز يبين انه فاهم كل حاجه
مع ان رسولنا الحبيب قال من قال لا اعلم فقد افتى
سبحان الله ...هو احنا ايه غير بنى ادميين
يعنى مش ملائكه ولا شياطين
دا حتى الملائكه لا تعلم الا مايقال لها من رب العالمين
وعلم ادم الاسماء كلها ..ثم عرضها على الملائكة..فقال انبئونى ياسماء هؤلاء..ان كنتم صادقين31..قالو سبحانك لاعلم لنا الا ماعلمتنا..انك انت العليم الحكيم32..البقره

نيجى احنا بقا على ضعفنا وقلة حيلنا نقول لا ..دانا احنا بنفهم فى كل حاجه
طيب رسولنا صلى الله عليه وسلم علمنا الاستخاره ليه
ماهو علشان نستعين بالله عز وجل ..نستعين بقدرته على علم الغيب وعلى القدره كيفما شاء
ونسيب الامر لله لو فيه خير هايكمل ولو مافيهوش هايقف ويتعطل
دا غلط ولا هانقاوح فى دى كمان
يلا ...ربنا معاكم معايا وربنا يعمل اللى فيه الخير
سلام عليكم

الثلاثاء، 17 مارس، 2009

عدت يا عيد...

بسم الله الرحمن الرحيم
مش عارفه ليه كل مايقرب عيد الام اصاب بالحزن والخوف
بناتى بيجبولى هديه ..هدايا وببقى فرحانه بيها..او يمكن ببين فرحتى بيها..علشان مايزعلوش انى مش فرحانه..او يفتكروا انهم مش عارفين يفرحونى..
انا اول مره ااقول الكلام ده...وهما اول مره هايقروه.. ومش عارفه هايحسوا بأيه..

بس انا قلت ايه فايدة المدونه ولو ماكنتش ااقول بحريتى كل اللى بحس بيه

هى المدونه دى بنكتب فيها علشان مين؟
اكيد علشانى
انا مش صحفيه ولا كاتبه قصصيه
انا انسان
انا احساس وقلب وروح
صدقونى نفسى افرح
روحت مدونه لبنتى علياء اسمها خواطر علياء
لقيت وردتين... بس وردتين حلوين..صحوا فيا عشق السنين
سنين ومرت ..زى الثوانى
حسيت وانا بتفرج عليهم ..كانى بشم ريحتهم...حسيت وكأنهم هما انا وزوجى
كنا وردتين حلوين
لكن الزمن ..القدر..مابيسبش حد على حاله
بس انا حسيت ان لسه انا وزوجى وردتين..بس فى خيالى
خيالى انا ..مش خيال حد تانى ..
حتى لو كان الخيال ده خيال ولادى
معلش يا ولادى..سامحونى ..غصب عنى..فى يوم عيدى ..بفتكر الورده اللى كانت تملآ حياتى بعبير الشوق

سامحونى
وكل عام وانتم بخير..

بس خلاص ...بلاش نكد
ايه الستات المصريه دى ...الولاد يعملوا كل اللى يقدروا عليه ويحوشوا طول السنه..وانا اجى على اخر لحظه ااقلبها غم
دا اسمه كلام
طبعا مايصحش
يلا اللى عنده نكته يضحك..اللى مش هايضحك هانزغزغه
فين الهديه..ولا انتوا ماهتصدقوا...انا فاتحه ايديا الاتنين..ايه مش هاتقضى...
طيب خلاص ..آدى حجرى..املوه بقى
ربنا مايحرمنيش منكم... وقابلونى السنه الجايه
بس تكون الهديه اكبر من كدا...هههههههههههه

الأحد، 15 مارس، 2009

ماما وثندر

بسم الله الرحمن الرحيم
عودة الغائب
ايه الحكايه بقى...دا حب دا ولا ايه
يظهر عليا هاسمى المدونه ماما وثتدر
كدا تغيب على امك يا ثندر كل دا
والله فرحت لما رحت عندك( زى كل يوم)بس لقيت النهارده انك رديت على التعليقات
ربنا يتمم شفائك ويديك الصحه ونشوفك قريبا فى اجمل بوست منور وفرحان
ادعوا لثندر يا كل حبايبنابالشفاء العاجل

وربنا يبارك فى محمد غالى ..الابن الثانى ليا...اللى بقاله كتير قوى مازارنيش...ولكنى ازوره دائما
بارك الله فيكم يا شباب
وربنا يجعلكم قدوه ومنبر للخير والعمل والايمان

المدونات ماليانه شباب زى الفل...ويجوا يقولوا فين هما الشباب!!!
ازاى يعنى مايجوا يشوفوا

هما فاكرين الشباب هما دول اللى بيجروا ورا تامر حسنى
دول اطفال لسه بيتعلموا الجرى....الشباب الحقيقى هنا...هما اللى لسه بيدرسوا...واللى بيرجعوا من شغلهم يقعدوا هنا ويتكلموا ..ويدوا القدوه والمثل فى العمل والعباده والايمان

مانكرش ان تامر حسنى صوته حلو واحساسه حلو...بس ياخساره بيغنى وخلاص سواء علينا او على نفسه
انا من هنا ويا ريت كل الشباب الجميل اللى معانا فى المدونات يقولوله ويوجهوا ليه رساله...ياتامر ارتفع بالشباب الى مستوى العمل والكفاح والنشاط والبحث عن لقمة العيش بامل ..باصرار ..
يا تامر انت ممكن تقود امه بصوتك ورحم الله عبد الحليم حافظ لما غنى للمئذنه والجامع ... للمصنع والفلاح
انت مش اقل منه موهبه ولا صوت
صوتك نعمه من ربنا...ادفع زكاة صوتكلله الذى انعم عليك به
اجعل صوتك ازان ...خليه يوصل لوجدان الشباب..اجعله امر ...اجعله رجاء
استغل حب الشباب ليك بانك تؤثر فيهم لان صوتك بيوصل اليهم فى كل مكان ...

عايزينك تستغل حب الشباب ليك بان تقودهم الى عزة الوطن بدل قعدة القهاوى والتحرش بمن هب ودب


مش عارفه ياترى ممكن توصل الرساله دى ليه عن طريقكم ولا لأ
اتمنى انها توصل بصوتكم

الاثنين، 9 مارس، 2009

ِِإنك لن تهدى من احببت

بسم الله الرحمن الرحيم
يقول الله تعالى فى محكم اياته(انك لن تهدى من احببت)صدق الله العظيم
هذا الكلام موجه لسيد الخلق اجمعين صلى الله عليه وسلم

انا ولا حاجه....انا ولا اى شيء....انا كالهواء الذى لا يراه احد.....انا كأى انسان لاتعرفه ممكن يعدى عليك مئات بل الاف لاتعيرهم اى اهتمام ...مش علشان انت متعرفهمش...لا...دا عشان انت مش بتهتم بحد غير نفسك وبس
لقد اتعبتنى هذه الشخصيه
انها انسان ذكرا كان اوانثى فلا يهم جنسه
انسان يحمل معانى كتير جميله....انه جدع بمعنى الكلمه.....فمن الممكن ان يقف معك مواقف جريئه وشجاعه...ممكن ان يضحى براحته من اجل ان يقدم لك اى خدمه تطلبها....ممكن ان يضحى براحته ويتعب من اجل راحتك انت
ولكنه........واه من كلمة ولكنه

انه مزيج من التعاكس الاخلاقى
انه يحبك ويكره الاخرين......انه يحترمك ولكنه لايقوى على ابتلاع مواقفك.......انه يسمعك ولكنه لا يقتنع بكلامك....
انه يصلى ولكنه لا يعرف كيف يحب الله........انه يؤدى زكاة ماله ولكنه لايفتح قلبه لغير نفسه...يصوم ولكنه صيام لان شهر الصيام قد جاء

هذا الانسان تعرفه فتحبه..............وتعرفه اكثر فتخاف عليه
انه جزء منك ومن حياتك
تقترب منه ......فيشدك بزكائه.....تقترب فتحترم قدراته
تقترب فتحيىّ فيه إقدامه
تقترب حتى تجد نفسك تحترق عند الاقتراب اكثر فاكثر

ليس الاحتراق منه ........ولكنه الاحتراق به وعليه
الاحتراق به.............ذلك لكونك ستجد انسان يفعل مايرضيه هو
فكل مايفعله........ناجما عن دعوه عقليه داخليه لارضاء الزات العليه لهذا الانسان ...........
وعند هذا الاقتراب ....تجد نفسك تريد الابتعاد.......انه انسان ..اما مريض ...او انسان مغرور....
وعندما تتحدث اليه بكونه بعيد عن الله بهذا التعالى والغرور
يحدثك بكل قناعه....لماذا
فانا افعل كل مايقوله الله لى .......الست اصلى ........الست افعل الخير لغيرى.....الست اقدم زكاة مالى بكل رضاى......
فما يضايقكم اذن فى كونى ابحث عن رضا نفسى فى غير غضب الله......

وهل البقاء بالايام امام الكمبيوتر والنوم نذرا يسيرا... يرضى الله ولا يغضبه......
هل التعامل مع البشر على انهم اقل منه زكاء.. يرضى الله ولا يغضبه....
هل الرد بعجرفة وبرود على من يعلوه سنا وخبرة.. يرضى الله ولا يغضبه.....
هل قوله بان لاشيء يهمه فى الحياة الا نفسه ...يرضى الله ولا يغضبه
هل التعامل ببرود مع مقدرات الحياه والناس.. يرضى الله ولا يغضبه

يقول الله عز وجل(قل ان كنتم تحبون الله فاتبعونى يحببكم الله ويغفر لكم ذنوبكم والله غفور رحيم)
ويقول رب العزة(ان الشيطان لكم عدوا فاتخذوه عدوا)

اتحدث معه بان الله اعطاه مالم يعطى مثله لغيره......
فيرد بانه يفعل ما يستحق ان يقوم به وبذلك يعطيه ربه مايستحقه من اجر
اليس ذلك هو غضب ربنا بحق
اليس ذلك هو الغرور بحق
اليس الله قادرا على الا يعطيه ويحرمه ...ليس بعقاب له.....ولكنه ابتلاء....سيدفع وقتها ثمنه غاليا

تتحدث معه بان لا يكفى الا نغضب الله.........بل يجب ان نبحث عن كيفية حب الله لذات الله
فتجده بكل المنطق والتجاوز الغير مقبول يحدثك عن كون الله لم يطلب منه اكثر مما يستطيع تقديمه......
وتجد نفسك فى النهايه تبتعد وتريد ان تبعد اكثر فاكثر .....
ان الاقتراب منه خطر....
فالمرأعلى دين خليله.........فلينظر المرأ من يخالل

واعود
لاتذكر مواقفه التى لاتنتهى معى انها مواقف النبل والشهامه.....
انها مواقف عجز ان يقف مثلهارجال ونساء اقوى واشد منه
..واجد نفسى ...ابحث عن بقعة نور بداخله لكى انفذ اليه منها......
اجد نفسى احترق له...من اجله...قلبى يبكى...عقلى يغلى....اصبت بدمار فى فكرى....
ماذا افعل لهذا الانسان......فكثير غيره لا يرقى الى مستوى قيامه بكل هذه الاعمال الفاضله
كل املى ن يقترب بقلبه الى الله....ليس بأمر....وليس بزجر.....وليس بخوف.....
ولكن بحب....حب الله....اتمنى ان يشعر بحب الله ورسوله.....
اتمنى الا يسعد شيطانه اكثر من هذا....

وهكذا وجدت نفسى اردد..........
(انك لن تهدى من احببت..ولكن الله يهدى من يشاء.).....
صدق الله العظيم


ساعدونى ....او ساعدوه .........
فانى احبه فى الله.......

اللهم اهدنا فيمن هديت
وتولنا فيمن توليت
وحبب الينا الايمان وزينه فى قلوبنا
وكره الينا الكفر والفسوق والعصيان
اللهم اخزل عنا شياطين الانس والجن
ونسئلك الهدى والتقى والعفاف والغنى
اللهم اميـــــــــــــــــــــــــــــــــــــــــــــن






بيات شتوى

بسم الله الرحمن الرحيم
ثندر بيقول قلقان عليا.....وانا مش عايزه اكتب وخلاص........بحب اكتب كلام ليه قيمه......بدخل مدونات احيانا الاقيها كاتبه سطرين.......او ممكن حاطين رسمه...او صوره .....هى صحيح معبره وليها معنى عند صاحبها ......بس بالنسبالى بتبقى انطباع خاص بيا انا.......يعنى كأن صاحبها بيقولى اتصرفى مع نفسك ......انتى حره فى تفكيرك....وبصراحه مش برضى اعلق عليها
ليه؟؟؟؟؟
لانى بحب احتفظ بانطباعى لنفسى.........لانى معرفتش هو يقصد ايه بالسطرين اللى كتبهم او بالصوره اللى حاططهالنا
بس انا بقالى اسبوع اهو مش عارفه اكتب عن ايه
وفعلا عزرت اصحاب المدونات الخاليه .......قلت اكيد همابرضه مش عارفين يكتبوا ايه
بس علشان مايقلقوش اصحابهم عليهم
كتبوا كلمه بسيطه ........معناها انا هنا .......
او تركوا صوره جميله تجعلنا نفكر فى معناها حتى يعودوا الينا
وانا بقولك يا ثندر انا هنا
لاتقلق
بس يمكن حبة بيات شتوى
وراجعين ان شاء الله

الأربعاء، 4 مارس، 2009

هديه مقبوله

بسم الله الرحمن الرحيم
القصيده دى هديه من ابنى العزيز ثندر بمناسبة المولد النبوى الشريف
فلنقرأها معا
وكل عام والجميع بخير
حذف
Blogger thunder يقول...


مولاى صلى وسلم دائما ابدا
على حبيبك خير الخلق كلهم
ظلمت سنة من احيا الظلام الى
ان اشكت قدماه الضر من ورم
وشد من سغب احشاءة وطوى
تحت الحجارة كشحا مترف الأدم
وراودتة الجبال الشم من ذهب
عن نفسة فارهم ايما شمم
واكدت زهده فيها ضروته
ان الضرورة لا تعدوا على العصم
وكيف تدعو الى الدنيا ضرورة من
لولاه لم تخرج الدنيا من العدم
محمد سيد الكونين والثقلين
دوالفريقين من عرب ومن عجم
نبينا
الآمر الناهى فلا احد
ابر فى قول لا منه ولا نعم
هو الحبيب الذى ترجى شفاعته
لكل هول من الاهوال مقتحم
دعا الى الله فالمستمسكون به
مستمسكون بحبل غير منفصم
فاق النبيين فى خلق وفى خلق
ولم يدانوه فى علم ولا كرم
وكلهم من رسول الله ملتمس
غرفا من البحر او رشفا من الديم
وواقفون لديه عند حدهم
من نقطة العلم او من شكلة الحكم
فهو الذى تم معناه وصورته
ثم اصطفاه حبيبا بارئ النسم
منزه عم شريك فى محاسنة
فجوهر الحسن فية غير منقسم
دع ما ادعته النصارى فى نبيهم
واحكم بما شئت من شرف
وانسب الى قدره ما شئت من عظم
فإن فضل رسول الله ليس له
حد فيعرب عنه ناطق بفم
لو ناسبت قدرة اياتة عظما
احيا اسمه حين يدعى دارس الرمم
لم يمتحنا بما تعيا العقول به
حرصا علينا فلم نرتب ولم نهم
اعيا الورى فهم معناه فليس يرى
فى القرب ةالبعد فية غير منفحم
كالشمس تظهر للعينين من بعد
صغيرة وتكل الطرف من امم
وكيف يدرك فى الدنيا حقيقته
قوم نيام تسلوا عنه بالحلم
فمبلغ العلم فية انه بشر
وانه خير خلق الله كلهم
وكل آى اتى الرسل الكرام بها
فانما اتصلت من نورة بهم
فانه شمس فضل هم كواكبها
يظهرن انوارها للناس فى الظلم
اكرم بخلق نبى زانه خلق
بالحسن مشتمل بالبشر متسم
كالزهر فى ترف والبدر فى شرف
والبحر فى كرم والدهر فى همم
كانه وهو فرد من جلالته
فى عسكر حين تلقاه وفى حشم
كانما الؤلؤ المكنون فى صدف
من معدنى منطق منه ومبتسم
لاطيب يعدل تربا ضم اعظمه
طوبى لمنتشق منه وملتثم

02 مارس, 2009 05:51 م


الاثنين، 2 مارس، 2009

ولد الهدى فالكائنات ضياء

السلام عليكم ورحمة الله وبركاته
حبايبى الصغيرين والكبار
اولادى واخواتى
كل عام وانتم بخير: بمناسبى مولد الهدى ...مولد سيد بنى ادم... مولد الحبيب :صلى الله عليه وسلم
ولد الهدى فالكائنات ضياء ..... وفم الزمان تبسم وثناء

لما بقعد اقرأ فى سيرة الحبيب صلى الله عليه وسلم الاقى حب يغمرنى له بالبلدى كدا ياخد روحى الاقى انى اااقول واتمنى انى ابقى معاه انى عايزه اكون من اللى هيسقيهم بايده الشريفه يوم الحر الشديد يوم لا ظل الا ظل العزيز الكريم الرحيم
صحيح واكيد كلنا بنتمنى ده لكن هل انا فعلا استحق ده وانا اشعر بانى ضعيفه لم افعل لحبيبى المصطفى اى شيء لنصرته
هو مش محتاج منا نصر ولقد قال الله جل وعلى (صلوا عليه وسلموا تسليما) اللهم صلى وسلم عليك يا حبيبى يارسول الانسانيه والمحبه والهدى........
شهر مولدك يوم مولدك كل ايامنا بقولك يا حبيبى سامحنى لم افعل شيء غير المقاطعه لبضائعهم التى والحمد لله لاتهمنى فى شيء اصلا ولقد كنت اتمنى ان مقاطعتها ستؤثر عليا حتى اشعر بانى قد فعلت شيء فى سبيل رضاك عنى وافتكرتك حبيبى وانت تأكل انت والصحابه اوراق الشجر عند مقاطعة مكه لكم
اه يا حبيبى يا رسول الله اتمنى ان تشعر بحبى لك فبعزة الله انى احبك واتمنى ان القاك على الحوض وانت راضيا عنى فكل ما املكه هو حبى لك
وسامحنى يا حبيبى صلى الله عليك وسلم عند شرائى لحلوى مولدك فانى اشتريها بنية فرحتى بانك قد بعثت الينا خاصة وللعالم عامة فوجودك عندنا هو من اعطانا صفة المسلمين.. المسّلمين لله
انى اتذكرك دائما يا حبيبى صلى الله عليك وسلم فالصلاة عليك رحمة لنا اتذكرك وافرح بانى والحمد لله قد ولدت مسلمه فلله الحمد والمنه

انت يا حبيبى نور بين ايدينا .. انت الرحمة المهداه .. انت الحبيب واصحابك رضوان الله عليهم لاننساهم
فانا بحبك احب الصديق.. واحب عمر .. واحب عثمان. .و احب على رضى الله عنهم وارضاهم
وكنت اتمنى ان ارزق اولادا فاسميهم باسماء الصحابه ولكن الرزق بيد الله
صلى الله عليك يا حبيبى يا رسول الله

لقد اخذت عنوان مدونتى عن حديث لك فارجو ان يكون مقبولا عند الله حبا فيك يا حبيبى يا رسول الحب والسلام الف صلاة وسلام عليك

عن ابن عباس رضى الله عنه قال: قال رسول الله صلى الله عليه وسلم : نعمتان مغبون فيهما كثير من الناس الصحة والفراغ
وقلت يا حبيبى: اغتنم خمسا قبل خمس: شبابك قبل هرمك؛ وصحتك قبل سقمك ؛ وغناك قبل فقرك ؛ وفراغك قبل شغلك ؛ وحياتك قبل موتك . صدقت يا حبيبى يا شفيعى وصلى الله عليك الف صلاة والف سلام

وعن الحسن رضى الله عنه قال: قال رسول الله صلى الله عليه وسلم لاصحابه: اكلكم يحب ان يدخل الجنه ؟ قالو نعم يا رسول الله ... قال الحبيب قصروا الامل ؛ وثبتوا اجالكم بين ابصاركم ؛ واستحيوا من الله حق حيائه

حبيبى يا محمد يا رسول الله لا املك الا الصلاة عليك واتباع سنتك
ولقد كان مقصدى ان انشر وصيتك لنا ولان العمر يتسرب منا فاردت ان اقول لنفسى وغيرى فلنلحق بالاخره فلنلحق ميزان الحسنات
واقول لاحبائى كما قال حبيبى وامير المؤمنين عمر ابن الخطاب رحم الله امرؤ اهدانى عيوبى
وهذه وصية منى الى احبائى واصحابى فى الله
اعينونى على تقوى الله مادمت بينكم فان احسنت فمن الله وان اسأت فمن نفسى
وانى اعتبركم مرآة لى ودمتم لى اخاء وحب فى الله

اللهم ارزقنى حبك وحب نبيك وحب القرآن
واعنى على ذكرك وشكرك وحسن عبادتك
وصلى الله عليك وسلم يا حبيبى يا رسول الله عدد حبات الرمال والحصى
عدد قطرات ماء البحور والندى
عدد من مات ومن كان حيا الى يوم الملتقى من المسلمين والمؤمنين ومن اهتدى
اللهم اميـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــن


الأحد، 1 مارس، 2009

ربنا بيحب مين

بسم الله الرحمن الرحيم
كلنا بنحب ربنا ...بس ربنا بيحب مين.....كلنا بنسئل السؤال ده ..........بس ياترى وصلنا لاجابته
الاجابه بسيطه فى قولها عظيمة فى مضمونها رائعه فى تنفيذها فاضله فى هدفها
عارفين الاجابه ايه.......ان ربنا بيحب من يذكره فمن اراد محبة الله فليلهج بذكره جل وعلا
يقول الله تعالى فى حديثه القدسى: من شغله قراءة القرآن وزكرى عن مسئلتى اعطيته افضل ما اعطى السائلين
وهل هناك اجمل او افضل او اعز من عطاء الله (تخيل لو انك تحب احد ابنائك حبا عظيما لانه دائم السؤال عليك ... كثير المرور ببابك يعمل كل ماتأمره به واخر لا يصلك ولا يبرك ولا يهتم بامرك ) ولله المثل الاعلى طبعا
هل تبخل بشيء على ابنك البار وهل تفكر ان تعطى الاخر شيئا (اجب بنفسك)
وهو سبحانه معنا طالما نحن بذكره منشغلين...ويقول عز من قائل:من ذكرنى فى نفسه ذكرته فى نفسى ومن ذكرنى فى ملا ذكرته فى ملآ خير منه يالله ما أجمل ان يذكرنا الله ..هو خالقنا ..هو رازقنا.. هو المتفضل المنعم _ورغم ذلك هو سبحانه وتعالى جل قدره وعظمة منزلته هو من يذكرنا عنده ويباهى بنا ملائكته....ما أحلاه من حب (اللهم ارزقنا حبك وحب من يحبك وحب عمل يقربنا لحبك) اميييييييييييييين
كلنا بنحب ربنا بس ليه؟؟؟ علشان محتاجينه .. علشان ينجحنا.. علشان يدينا الصحه ..علشان يوفقنا فى عملنا .. علشان يرزقنا .. علشان وعلشان وعلشان.........
طب ربنا بيحبنا ليه وهو سبحانه مش محتاج مننا حاجه!!!!!!!
بيحبنا: لانه خلقنا لتقديسه.. خلقنا لنعبده ..خلقنا لنناديه ..خلقنا وعلمنا ان الفضل والرزق والسعاده وكل ماينفع ابن آدم انما هو من عند الله
ومااحب الى الله من عبد يناديه ويقول يااااااااااااااااااااااااالله
ولكنها بشرط: ان يكون لبسه من حلال .. مطعمه من حلال.. ولده من حلال وهنا ابتلاء الله لمن يحبه من عباده ليمتحنه فى حبه.......هل هو حب صادق, هل هو الصابر المحتسب ..ويقول سبحانه وتعالى (ان من استسلم لقضائى ورضى بحكمى وصبر على بلائى بعثته يوم القيامة مع الصديقيين)...ذلك لانه ينادى الله وهو يعيش الصبر على ابتلائه وسبحانه يسمعه ولكن لا يعطيه مايرجوه منه ليس هوان منه على الله ولكن الحق تبارك وتعالى يحب نداء المؤمنين الصابرين وهو قادر على اعطائه ما يريد ولكنه سبحانه يؤخر له العطاء حتى يزداد تقربا وحبا لله فيرفعه سبحانه درجات ودرجات فى الدنيا او الاخره او الاثنين معا فهو وحده سبحانه العالم بالخير لعباده وما ينفعهم ومايضرهم حتى ان الرسول صلى الله عليه وسلم القائل: رب عبد اشعث اغبر_لا يأبه له_لو اقسم على الله لآبره.صدق رسول الله صلى الله عليه وسلم
............................
واوحى الله الى موسى عليه السلام :( ياموسى ان من عبادى من لو سئلنى الجنة بحذافيرها لاعطيته ولو سئلنى غلاف سوط لم اعطه ليس لهوان له على ولكن اريد ان ادخر له فى فى الاخره من كرامتى واحميه من الدنيا كما يحمى الراعى غنمه من مراعى السوء)
......................
وذلك كله حتى نعلم الايمان على حقيقته فليس كل مؤمن غنى وليس كل كافر فقير .......ولكن هو الايمان بقدرة الله وعدله
وحتى انه لن تزول قدم ابن آدم حتى يسأل عن اربع عن عمره: فيما افناه...وعن ماله: من اين اكتسبه ، وفيم انفقه...وعن علمه: فيم عمل به...وعن شبابه: فيم افناه...
ومن استعمل كل الاربع فى ذكر الله: اى بكل مايستوجب رضا الله عنه ويكتسب عن طريقه محبة الله له
....................................
ومن احباب الله الفقراء الذى قال عنهم جل جلاله _يوم القيامه_ ادنوا منى احبائى ..ويقول لهم انى لم ازوى الدنيا عنكم لهوان كان بكم على ولكن اردت بذلك ان اضعّف لكم كرامتى اليوم ....ويؤمر بهم الى الجنة قبل الاغنياء باربعين خريفا
................................................
ومن احباب الله ماسئل عنه موسى عليه السلام
فقال: ( يا رب وددت انى اعلم من تحب من عبادك فاحبه......قال العلى الكبير: اذا رايت عبدى يكثر ذكرى فانا اذنت له فى ذلك وانا احبه... واذا رأيت عبدى لا يذكرنى فأنا حجبته عن ذلك ..وانا ابغضه) نعوذ بالله من بغض الله وعقابه
وهكذا نجد ان من ألهم الذكر فقد اعطاه الله حبه وانعم عليه بجليل عطاياه
وصدق رسول الله صلى الله عليه وسلم حين قال: خير الذكر : لا اله الا الله ....وخير الدعاء: الحمد لله
وايضا من احباب الله...من خاطب داودعليه السلام ربه وقال : اى عبادك احب اليك ربى فاحبه بحبك له.........قال عز من قائل: يا داود: احب عبادى الى : تقى القلب .. نقى الكفين.. لا ياتى الى احد بسوء...ولا يمشى بالنميمه...احبنى ؛ واحب من يحبنى ؛ وحببنى الى عبادى_قال داود: انك يا رب تعلم انى احبك فكيف احببّك الى عبادك فقال الله ذكرهم بآلائى وبلائى ونقمائى _ يا داود انه ليس من عبد يعين مظلوما او يمشى معه فى مظلمه الا ثبتّّّّّ قدمه يوم تزول الاقدام
فتذكر الاء الله امام الناس حب لله ............ وتذكر بلائه يطمعك فى رحمته فتناديه وهو سبحانه يحب من يناديه ويرجوه ليخفف عنه ....والتذكير بنقمته يزجر العاصى وييقيظ الغافل
.......................................................
احبائى اطلت عليكم الحديث وكنت اتمنى الا انتهى من ذكر الله والتذكير بحب الله
اللهم ارزقنا حسن النظر فيما يرضيك عنا
واجعلنا من اوليائك.......واحبب لقاءنا وحبب الينا لقاءك
اللهم اميــــــــــــــــــــــــــــــــــــــــــــــــــــــــــــن
احبكم فى الله دمتم ذاكرين لله ومذكورين فى الملأ الاعلى