الخميس، 21 يناير، 2010

موبايلى ضاااااااااااااااااااااااااع

سلام عليكم

انى اغرق اغرق اغرق
ياكل الماضى والحاضر يا عمر العمر
موبايلى بقاله معايا 3 سنين
حطيت عليه كل صورى وصور بناتى وصور حفيدى
كل ارقام املكها فى حياتى
كل ارقام اخواتى
كل ارقام اصحابى وزمايلى
و3 ارقام غاليين عليا
ايناس وورده واحمد
عليه كل القرءان الكريم بصوت الشيخ عبد الباسط
كان عليه التواشيح بتاعة النقشبندى
كان عليه الاغانى اللى بحبها

كان صاحبى وحبيبى
وكان فيه رنات لكل واحد بذكرى حلوه تجمعنا سوى
وكان بيصحينى فى الفجر للصلاة
وكنت بصحى بيه اللى بيحبوا يصحوا للصلاة قبل الشروق
كان عليه مواعيد الدكتور
ومواعيد التحاليل
كان كل حياتى

ودا كله بعد ماكنت رافضه اشتريه
وجالى هديه من اخواتى وعيالى
هديه بالعافيه...لان انا اخر واحده فى العيله ..والكل عايز يكلمنى وانا اقول ابدا مش عيزاه مش عيزاه

وبعد ماحبيته وخدنا على بعض وبقى بينا عشره وعمر وموده
بعد صباح الخير الصبح
وبعد تصبح على خير باليل
وبعد ماكنت بأكله واشحنه
وبعد ماكنت بنضفه واغيرله هدومه
اااااااه يا موبيلى يا حبيبى
ااهأ اهأ اهأ اهأ
ياللى مالحقتش افرح بيك يا حبيبى
كدا كدا برضه اهون عليك
كدا تضيع منى ومعرفش طريقك فين
دنا كنت لسه بتكلم فيك
كدا الزهايمر يضيعك
كدا تتوه منى ومعرفلكش طريق جره
طيب انا بنسى..
انت قول للى لقاك ..عايز ارجع لصاحبتى
مش المفروض تعيط وترفص وتقول ابدا مش هاشتغل مع اى حد غير صاحبتى

كدا تخلى اللى لقاك يطلعلى لسانه...ويقولى رنى انشاله للصبح ولا هاعبرك

عموما حسبى الله ونعم الوكيل
وعوضى على الله

وارجومن اصحابى ومن ايناس... وورده.... واحمد
الا يطلبونى ولا يكلمونى
وارجوا ان لايعطوا هذا النذل او النذله اللى لقت الموبايل فرصه للفرح فيا والشماته
وادعولى بان يعوضنى الله خيرا عنه ومنه
وانا من هذا المنبر اقول:.........
ماحدش لقى موبايل ماشى لوحده
ولا يمكن نايم فى حته وبيعيط
ولا يمكن ضل الطريق وواحد ابن حلال لقاه وبيلعب بيه شويه وناوى يرجعه وليه الحلاوه

اااااااااااااااااااااااااااااه يا موبيلى يا حبيبى
انى حزينه...........انى ابكى
ولكنى مش عايزه انكد عليكم
ولا اراكم الله مكروه فى عزيز لديكم
والبقاء لله وحده
والسلام عليكم ورحمة الله وبركاته

اهأ..اهاأ........اهأاهأ..............اهااهأاهأ

الجمعة، 1 يناير، 2010

للاطمئنــــــــــــــــــــــــــــــــــــــــــــــــــــــان


السلام عليكم ورحمة الله وبركاته



اولا
حبيت اطمنكم ان ساره بخير هى وخطيبها
وهى كلمتنى وبتشكركم جدا جدا
جميع من كلمها وخاطابها بالعقل والمنطق
وانها فعلا :
كلمت خطيبها بكل صراحه

بس بصراحه انا ماتدخلتش فى الكلام ولا طلبت منها تحكيلى
انما اطمئنيت عليها وبس
وهى قالتلى انها الحمد لله استفادت من اراء الجميع وبدأت تنظر للجزء المليان من الكوب
ودا بسبب كلامكم معاها

واعتقد انها هاتكلمنا تانى لما تدعونا لفرحها ان شاء الله
وعقبال الجميع بالخير
وانا بالنيابه عنكم جميعا بقولها ربنا يتمم بخير ويسعدهم



ثانيـــــــــــــــــــا

فى حاجه انا مش مطمنلها فى المدونه
ملاحظه ان فى ابناء ليا هنا مخصمانى ومش بيكلمونى
ليه ؟؟؟؟؟؟؟؟؟مش عارفه
ورحت مدونتهم لقيتهم بيقولوا للمدعوين فقط
هو للدرجه دى وصل الخصام والزعل
من غير حتى محاكمه ولا فرصه للدفاع عن نفسى

وانا فى الاول كنت فاكره انهم مشغولين ..................
ولكن وجدتهم يملئون الدنيا بالتعليقات فى كل مكان
الا عندى
وطبعا هما عارفين نفسهم بالاسم
ولا يمكن تكون مدونتى مراقبه وهما خايفين يكلمونى لا يروحوا فى الباى باى..........يمكن


وانا من مش هاقول انا زعلانه اد ايه من موقفهم ده
لان اكيد هما عارفين هما اذونى قد ايه
ولان مافيش خصام من غير سبب
فانا ادعوهم لابداء الاسباب


وشكرا