اعـــــــــــــــــز الو لـد ....ولـد الـولـــــــــــد

السلام عليكم ورحمة الله وبركاته


انا جيت
عقبال عندكم كلكم
اللى ماتجوزش يتجوز
واللى ماخلفش يخلف
واللى معاه واحد ربنا يكرمه بالتانى

بجد يا ولاد اعز الولد ..ولد الولد
اكيد انتوا كنتوا اعز الناس عند جدودكم
ومانساش حب احمد عفشه لجده وحزنه الشديد عليه لما توفاه الله

انا بقى عايزه حفيدى يزعل عليا كدا
بس قبل مايزعل عليا اكون حبيته وحبنى
عايوه استرجع حبى لبناتى فيه
سبحان الله وامه بترضعه ..مر عليا شريط ذكريات جميل
وانا باخد ايدهم الصغيره وابوسها
وانا بطبطب وادادى واناغى معاهم

ياااااااااااااااااااااااااه على الحب اللى اللى من غير مسؤليه
الحب اللى ماحدش يقولك ...مش كدا ها تبوزى الواد
مش كدا مش هايطلع راجل
مش كدا هاتتلفى اخلاقه

انا مالى وكل دا
انا بس عايزه احبه وادلعه واجيبله شكولاته....وابوه يوديه لدكتور السنان
ربنا مايحرمش حد يارب
ياترب نعمتك غاليه قوى يارب
خليهولنا وخلينا ليه
واسعده وهنيه
وباركلنا فيه

ملحوظه
اشكر ايناس ...ورده...احمد (اسماء واحلام )
على سؤالهم عليا
واشكر كل حبايبى اللى شرفونى بالمباركه الغاليه على اول حفيد ليا
ويارب يارب اباركلهم على كل مايسعدهم ويفرحهم ويهنيهم
وكمان اشكر كل اللى ماجاش لانى عارفه ظروف الامتحانات اللى فى الكليات
ربنا معـــــــــــــــاهم

عاشـــــــــــــــــــــــــــــــــــــــــــــــــــــــــــــــــــــــــــوراء

كل عــــــام وانتـــــــم بخيــــــــر

احبائى بجد انتم بتدوا للحب معنى جميل

لانه مش اساسى ان يكون الحب بين اتنين بس
الحب اللى حسيته بالامس معاكم...عندما طلبت مساعدتكم لانسانه انا اصلا معرفهاش
واستجابتكم السريعه
بجد خلتونى اشعر بالفرحه والسعاده
وحاسه كدا ان دا احلى عاشورا هاعيشها معاكم

بجد اشكركم جداجدا
اشكركم على ردكم عليها
واشكركم على انكم حسستونى بقيمتى عندكم
واشكركم لانكم خلتونى احس قد ايه الصداقه اللى بينا ليه معنى ووجود
واشكركم لانى حبيتكم اكتر واكتر

وان شاء الله لما ساره تكلمنى تانى هاعرف هى عملت ايه ....واطمنكم

واحب ااقولكم
معلش
انا يمكن اغيب اسبوع مش اكتر
لان بنتى ولدت وهاروح اعمل السبوع وارجع جرى ليكم ان شاء الله
لانكم هاتوحشونى قوى قوى

الى الـلـــقــــــــــــــــــــــــــــــــــــــــــــــــــــــــــــــاء

واوعوا تنسوا صيام السبت والاحد
ربنا يقويكم

انهــــــــــا تـنـتظــــــــــــــــــــــــــــــــــــــــــركـم

السلام عليكم ورحمة الله وبركاته


هذا موضوع خاص جدا
وخصوصيته تأتى من حيث انه ليس موضوعى انا
وانما هو عباره عن استشاره من احدى المدونات
جائتنى تطلب رايى الشخصى

وقد فعلت ذلك....وقدمت لها رايى
ولكن يبقى عندى من الاسئله الكثير

ولكنها عادت وكلمتنى على الاميل الخاص بمدونتى
وتحدثنا كثيرا...
ووجدتها شخصيه ذكيه محترمه
وسئلتها واجابتنى....
انه شخص لطيف ... محترم ...مؤمن..
ولكنها لاترى الا العيوب
فهل يوجد من هو خاليا من العيوب

واقنعتها بان تستشير قبل ان تقدم على ماهى مقدمة عليه
فلى ابنه مثلها ...اخاف عليها....واحب ان اراعى الله فى بنات الناس

فهل يمكن ان تساعدوها.................

فلى من الابناء والاخوه هنا من هو اقدر منى على ابداء الرأى
وتحليل المعطيات ليخرج باجابه نافعه وصالحه فى نفس الوقت

وكان الله فى عون العبد ماكان العبد فى عون اخيه
صدق رسول الله
صلى الله عليه وسلم

اشكركم....وهذا هو العنوان
http://3aady . blogspot . com

الهــــــــــــــــــــــــــــجره الى اللـــــــــــــــــــــــــه

السلام عليكم ورحمة الله وبركاته

تحديث صغير

من موضوعى السابق والتعليقات التى وصلتنى
توصلت الى ان الجميع تقريبا متفقون على ان الكلمه لها معنى واراده
ان لم يكن لها وقع الان فى لحظتها... فانها تبقى ويمكن ان تنفع فى يوم اخر ويمكن فى زمن اخر

وانا اعترف لابنائى واخوتى انكم فعلا استطعتم ان تغيروا فى تفكيرى ومعتقداتى
وارجوا من الله ان يعنينى على ان تكون موضوعاتى وكلامى لوجه الله وان يكون الله ورسوله راضيا عنى
وان اكون منبرا وداعية لكل ما يرضى الله ورسوله..ويرفع من قدرنا كامة الاسلام
والله على ما اقول شهيد



ثانيا...................
كل عام والجميع بخيربمناسبة العام الهجرى الجديد

وبهذه المناسبه....وعن اخى الاستاذ/احمد عبد المنعم
ادعوا نفسى وابنائى وجميع اخوتى واصدقائى
الى عمل واحد فقط.....يعدوا به الله ورسوله...((وكما تعلمون وعد الحر ..دينا عليه ))
عمل واحد فقط بسيط ولكنه كبير باذن الله فى ميزان حسناتكم

انه ذكرى الهجره
فلنكن على خطى الحبيب صلى الله عليه وسلم
فلنكن معه ونتخيل مكاننا بجواره
فلنحى سنته...
بان نبحث فى انفسنا ونعاهد الله وحبيبه على هجرة فعل واحد فقط مما لا يرضاه الله ورسوله ...وذلك حتى نكون شاركنا فى الاحتفال بهجرة الرسول عليه الف صلى وسلام ...بالفعل لا بالقول

ولكى نسعد حبيبنا ونبينا نقدم له عليه افضل الصلاه والتسليم
نقدم له ولنا فى هذه الليله 1000 صلاه على محمد خير البشر
وبهذ احبائى نكون قد خلدنا الذكرى بالقول والعمل

ولا يكلف الله نفسا الا وسعها...صدق الله العظيم

وكل عـــــــــــــام والجميـــــــــــــــــــع بخيـــــــــــر

مش غايبه ولا مستخبيه

السلام عليكم ورحمة الله وبركاته


حقيقى انا عايشه
ومش غايبه ولا مستخبيه
فانا اتابع كل جديد يكتب عند ولادى وعند اخواتى
وتقريبا كمان كل يوم
بل اترك تعليق هنا وتعليق هناك

واشكر كل اللى بيسئل عليا
وبعتلى تهنئة العيد وبعد العيد كمان

بس انا حاسه ان عندى مشكله ...ولكن لا ادرى ماهى؟؟؟؟؟؟؟؟؟
حاسه انى زهقت من كتر الكلام
كلام كلام كلام كلام
ولا شيئ يتغير فى حياتنا
ننتقد تصرفات العرب
ننتقد عدم التوحد
ننتقد بلدنا والا سعار
ننتقد التزوير والانحلال والفوضى
ننتقد وزير التعليم ورئيس الوزراء
ننتقد البطاله والسبب فيها
وحاجات كتير مش عجبانا

ولغاية امتى هنفضل ننتقد وخلاص
لغاية امتى هنكتب ونكتب وكتب
ولا احد يسمع او يتعظ
ولا احد يخاف من الاخره
ولا من العقاب

بجد انا تعبت
ولكنى
احمد الله...فانا بخير وولادى بخير
امال مابنبطلش شكوى ليه؟؟؟؟؟؟؟؟؟؟؟؟؟؟؟؟؟
بلاقى الناس راضيه والحمد لله
المريض راضى وبيحمد ربنا
والفقير مبسوط باللى بيجيله من باب الله وراضى وبيحمد ربه
والاهالى راضيين ....لأ وايه ماشاء الله ولادهم مش لاقيين شغل صحيح.........بس الموبايل مشحون وكله تمام

جمال هيمسك الحكم
البرادعى عايز يرشح نفسه
والشعب بيسمع ويهز دماغه
ويقول محروقه محروقه ....هيعملوا فينا ايه اكتر من كدا!!!!!!!!!!!!!!!!!!!1

نقوم ونصرخ ونهيص ونتظاهر
ونتكلم ونتكلم ونتكلم


عارفين الشعب عايش ومبسوط وبيحمد ربنا ليه؟؟؟؟؟؟؟؟؟؟؟؟؟؟؟؟

لسبب بسيط ::
لانى منهم ...اعمل بحديث رسول الله صلى الله عليه وسلم
من اصبح : امنا فى سربه....معافا فى بدنه ....يملك قوت يومه
فقد حاز الدنيا ومافيها

وحديث اخر يقول:::
يابن ادم عندك مايكفيك وتطلب ما يطغيك

احنا هذا الشعب الطيب..
اللى مش طالب الكتير...
بس بيطلب هدمه تستره...ولقمه تشبعه...وشغله تشغله
وحيطه تضلله

وصدقونى ...
ربنا مابينساش حد


يبقى ليه بنتكلم ونصرخ ونهيص ونتظاهر
ونفضل نتكلم ونتكلم ونتكلم ونتكلم


سيبوا اللى عايزها ياخدها
سيبوا اللى فاكرها حلوه ياكلها
والله انها نتنه...ولاتساوى عند الله جناح بعوضه

حد فهم حاجه؟؟؟؟؟؟؟؟؟
اهو كلام فى كلام....ابن عم حديت

الى اللقاء

افرحـــــــــــــــــــــــــــــــــــــــــــــــــــــــــــــــــــــــــــــــــــــوا

السلام عليكم ورحمة الله وبركاته

اخوتى واحبائى

جميعا لكم منى السلام
واهنئكم با لعيد واهنى كل احبابكم

اهنى كل حزين...واترجاه يفرح ..وان ينسى اليوم الحزن... حاول ..و ربنا هايساعدك ويفرح قلبك

اهنى كل فقير لان اليوم الناس لبعضها ...ودا اهم سمه فى عيدنا السعيد

اهنى كل غنى واقوله الغنى غنى النفس وافتكر انك تضحك فى وش كل من تتصدق عليه
لان المثل بيقول لاقينى ولا تغدينى

اهنى كل حبيب وحبيبه...ويارب تفضل ايامكم كلها حب

اهنى كل مريض....واتمناله من كل قلبى الشفاء وربنا معاك ويعطيك جزاء الصابرين

اهنى كل متغرب وربنا يعيدك سالما لاهلك وحبايبك

اهنى كل اب و ام بولادهم...وكل اخ باخواته ....وكل جار بجيرانه....
وكل صاحب باصحابه..كل زوج وزوجه بشريك حياته...
وكل ابن باسرته اللى ربته واحتضنته
وكل يتيم بمن تولى امره ورعى ربنا فيه


كل المسلمين النهارده ...
ربنا يسعدكم ويهنيكم ويحقق امانيكم ويرضيكم

كل الحجاج النهارده....ترجعولنا بالسلامه بعد مغفرة الذنوب بالحج المبرور

اخواتى اللى ربنا انعم عليهم بالصحه والمال : ........
....ابحثوا عن كل وحيد وهنوه على العيد... بل ادعوه للغداء معك فى بيتك او بيته
صدقونى هما ساعتين... بس هاتاخدوا ثواب سنتين

...ابحثوا عن كل مسن انقطع عمره واصبح وحيدا مجهدا
واطعموه بفمه... وتاكد ان الله لن يضيع اجرك... وسيطعمك الشهد بالجنه باذن الله

ويارب يارب يا رب
ماتسيئش امة الاسلام
فرّحها ... اجمعها... قوّيها... انصرها ...
ارفع رايتها ....راية لا اله الا الله محمد رسول الله
صلى الله عليه وسلم

يلا نعــــــــــلى الهـمه ...ونحـــــــاول نوصـل للقــــــــــــــــــــــمه

السلام عليكم ورحمة الله وبركاته

احبا ئى... واخواتى...وابنا ئى

سبقنى الى الخير اخى العزيز طارق (( المهاجر الى الله ))
فقد كنت اتيه بامر الله الى تقديم موضوع عن العشر الاوائل من زى الحجه
ولكن سبقـنى الخير كما قلت الاستاذ طارق
وامرنى ان انقله هـنا فى مدونتى ولست صانعه لهذا الخير
وسبقـنى الى الحب فى الله ولست الا متمنياه بكل قلبى
فهيا نسبح فى بحر المعلومات
ونسبح فى بحر الحب الالهى
ونسبح فى بحرالحب فى الله لاخواتنا واخواننا فى الايمان
وهذا هو موضوع اخى العزيز طارق



ياللا نعللى الهمة عشان نبقى من اصحاب القمة

السلام عليكم ورحمة الله وبركاته:

اقتربت العشرايام من شهر ذى الحجة واصبح يفصلنا عنها سويعات قليلة فهل استعدينا لهم

من فضل الله تعالى على عباده أن جعل لهم مواسم للطاعات، يستكثرون فيها من العمل الصالح، ويتنافسون فيما بقربهم إلى ربهم، والسعيد من اغتنم تلك المواسم، ولم يجعلها تمر عليه مروراً عابراً. ومن هذه المواسم الفاضلة عشر ذي الحجة، وهي أيام شهد لها الرسول بأنها أفضل أيام الدنيا، وحث على العمل الصالح فيها؛ بل إن الله تعالى أقسم بها، وهذا وحده يكفيها شرفاً وفضلاً، إذ العظيم لا يقسم إلا بعظيم.

قال الله تعالى :

{وَالْفَجْرِ (1)وَلَيَالٍ عَشْرٍ (2)وَالشَّفْعِ وَالْوَتْرِ (3)وَاللَّيْلِ إِذَا يَسْرِ (4)هَلْ فِي ذَلِكَ قَسَمٌ لِّذِي حِجْرٍ (5)}

[الفجر:1-5]،

عن ابن عباس عن النبي صلى الله عليه وسلم أنه قال «ما العمل في أيام أفضل منها في هذه، قالوا ولا الجهاد؟ قال ولا الجهاد، إلا رجل خرج يخاطر بنفسه وماله فلم يرجع بشيء» البخاري .

وهذا يستدعي من العبد أن يجتهد فيها، ويكثر من الأعمال الصالحة، وأن يحسن استقبالها واغتنامها

......................

يعنى من الاخر كده هما عشر ايام مش بتكرروا غير مرة واحده فى السنه ، وتخيلوا بقى ان اى عمل صالح فى الايام المفترجة دى بيبقى افضل عند الله من انك تخرج تجاهد فى سبيله الا قط عندما تضحى بمالك وبروحك فى سبيله ولا تعود بشىء منهما ، يعنى تروح ومترجعش هو ده بس العمل المفضل على اى عمل اخر فى الايام العشرة دى .

شوفتوا فضل ربنا كبير قوى علينا ازاى ، يعنى انت وانت قاعد فى بيتكم تحت التكييف ممكن قوى تعمل حاجة تكون افضل من بذل الجهد فى سبيل الله .

زى الاستغفار ، زى الحمد والشكر لله، زى الحوقلة او التكبير او التهليل .

حاجات بسيطة لها فوائد عظيمة فى اى وقت كان فمابالنا بقى بالايام العشرة دى .

بس احنا المفروض همتنا تبقى اعلى من كده ، ماهو بردو مهما كانت الاذكار دى لها فوائد عظيمة بس هيه لوحدها مش كفاية

عشان كده لازم نكون اصحاب همة عاليه .

وعشان كده بردو انا بقترح برنامج نتعاهد اننا ان شاء الله ننفذه قدر استطاعتنا فى الايام العشرة الجميلة دى .

البرنامج اسمه

عللى الهمة عشان تكون من اصحاب القمة

شروط البرنامج

الوصول للقمة فى الاسلام امر سهل وبسيط ومش محتاج للتعقيد ، يكفى اخلاص النية وديمومة العمل ومش مهم بعد كده هوه قليل وللا كتير، ليه بقى لان ربنا سبحانه وتعالى يحب العمل الدائم ولو قليل عن العمل المتقطع ولو كثير .

يبقى اول حاجة اخلاص النية وتجديدها

تانى حاجة تنويع النية وتعديدها ، يعنى انوى فى قريرة نسك انك لما بتعمل عمل صالح بتعمله عشان ترضى الله ، عشان تساع مسلم اخ لك فى الله ، عشان تمنع معصية ممكن تحصل وهكذا

تالت حاجة العزيمة ، مهم قوى يكون عندك عزيمة وارادة وتصميم انك تحقق لنفسك منزلة عند الله سبحانه وتعالى ، وفى ذلك فليتنافس المتنافسون .

نييجى بقى للبرنامج نفسه

البرنامج الزمنى للعشرة ايام بسيط وظريف وطعم ولذيذ ومش محتاج لوقت كتير ولا لمجهود كبير

1- الصيام ، انت فى بيتك ومش بتحج ولا بتحارب وللا حاجة يعنى فيها ايه لو صومت العشرة ايام دى

عشر تيام هيعدوا هوا ، ومش هيرجعوا تانى الا فى السنة اللى جاية ويا عالم مين هيبقى عايش ومين هايبقى مات . وياعالم لو عشنا حتى للسنة الى جاية هنبقى بنفس الصحة والحيوية دى وللا هيبقى نفسنا نصوم العشر تيام ومش قادرين ونندم وقتها على اللى فات

طب ليه نعرض نفسنا للندم بقى ما الموضوع فى ايدينا اهو ومش هانموت من الصيا م( محدش بيموت من الصيام ).

......................

2- ختم القرآ الكريم ، كلنا يعرف طبعا ان القرآن الكريم مكون من تلاتين جزء ، يعنى لو كل يوم قرأنا تلات اجزاء يبقى هنختم القرآن ان شاء الله فى العشرة ايام دى . يبقى اول حاجة ختم القرآن الكريم ، ومش كروته بقى خليك حلو عشان احبك ، اقرأ بتدبر وتمعن ، المسالة دى هتاخد منك وقت قد ايه ، بالظبط كده لو قريت تلات اجزاء بتدبر وتمعن هياخد منك ساعه ونصف وبالكتير خالص ساعتين ، من اربع وعشرين ساعة يابلاش ، وطبعا انا مش محتاج ولا بصدد انى اقولكم فضل قرأة القران فى اى يوم تانى فمابال الايام العشرة بقى، وبعدين المفروض ان المسلم يختم القران مرة كل تلات ايام ولو مقدرش يبقى مرة كل عشرة ايام ولو مقدرش يبقى مرة كل تلاتين يوم ولو مقدرش مايفوتش عليك اربعين يوم من غير ماتكون ختمته مرة ، يعنى مسموح لك انك تختمة مرة كل اربعين يوم .

........................

3- الحديث الشريف ، هوة فيه يا جماعة مالنا كده مهملين فى دراسة وتعلم الحديث الشريف ، انتو مش عارفين فضل دارس الحديث ومتعلمه ومكانته عند المولى سبحانه وتعالى عظيمة قد ايه ، ومش عارفين كمان ان الحديث الشريف مهم قوى لحياتنا لانه هوه اللى بينور طريقنا ، لانه شارح للقرآن الكريم وموضح لما فيه من معانى واحكام ودرر وكنوز اعجازية . ومن غير الحديث الشريف مش هانقدر نفهم القرآن خالص .

الحديث الشريف اكتر من مليوووووووون حديث بكتير قوى ، انا طبعا مش باقولك فى خلال العشرة ايام دول احفظ المليون وادرسهم وتبحر فيهم ، لاء كفاية عليك قوى الاربعين النووية ، ليه بالذات اختارت لك الاربعين النووية ، ايوه قلتى ليه

شوف ياسيدى كتاب الاربعين النووية للإمام محيي الدين أبي زكريا يحيى بن شرف النووي رحمه الله نقدمها للقراء ولطلبة العلم في كل مكان لنفاستها وجمعها للكثير من خصال الخير، ففيها من أحاديث الجهاد والزهد والآداب التي يجب أن يتخلق بها المسلم، وكل حديث منها قاعدة عظيمة. عرفت بقى ، كل حديث عبارة عن قاعدة دينية فقهية من قواعد هذا الدين ، والحق يقال فان الامام النووى رحمه الله بذل جهدا خارقا لجمع وتصنيف هذه الدرر النبوية النووية . ليقدمها لنا غضة طرية .

كل يوم احفظ خمس احاديث وادرسهم كويس هياخدوا منك وقت قد ايه هما بالكتير خالص تلات ساعات ولو كترت شوية يبقى تلات ساعات ونص ، مش بيضيعهم دول قدام مبارة لكرة القدم او فيلم او مسلسل او قدام النت وعلى فكرة لو قدرت تعملها وتحفظ الربعين النووية وتبقى طليق فيهم دراسة وعلما يمكن الشيخ ابو اسحق الحوينى يخليك تقول خطبة الجمعة فى مسجد شيخ الاسلام بن تيمية عندنا فى كفر الشيخ وياسلاااااااام بقى تبقى عشرة على عشرة لو قدرت تحفظ عمدة الاحكام بالمرة ، وده عبارة عن تلتمييت حديث بس ، .يبقى تلات ساعات ونص للحديث مع ساعتين للقرآن الكريم يبقوا خمس ساعات ونص وبس يابلاش. بنضيع اكتر منهم قدام النت .

.........................................

4-بعد كده بقى مفيش هاتخد وقت ، انت كل يوم هتطلع صدقة على حسب مقدرتك ،

وبعدين تلزم الاذكار طول الايام العشرة دى ومن اهم الاذكار اللى عايزك تلزمهم اذكار الاستغفار ، ياااااااااااااه ، اسئلو مجرب يا اخونا ، انا عن نفسى والله العظيم حياتى اتحسنت كتيييييييييير قوى بعد مابقيت الزم الاستغفار ، وانا فى القطر او فى الباص او فى العربية او فى التاكسى وانا ماشى فى الشارع او قبل النوم او بعد النوم او فى وقت او على اى هيئة وباى لفظ سواء كنت متوضى وللا لاء ، صدقونى والله بدات احس فعلا برضا ربنا عليا وبحلاوة الحياة بعد ما لزمت الاستغفار .

وخير لفظ للاستغفار هو دعاء سيد الاستغفار

( اللهم انت ربى لا اله الا انت ، خلقتنى وانا عبدك ، وانا على عهدك ووعدك ماستطعت ، اعوذ بك من شر ما صنعت وابوء لك بنعمتك على وابوء بذنبى فاغفر لى فانه لا يغفر الذنوب الا انت )

دعاء بسيط وسهل وممكن تكرره على لسانك وترطب بيه على قلبك كل يوم اكتر من خمسمية مرة (500) يعنى خمسة فى عين العدو وجنبها صفرين على اليمين مش الشمال هاه لو مش هاتقدر يبقى مش شرط بلفظ سيد الاستغفار يكفى( اللهم اغفر لى ) او (استغفر الله) وكده يعنى ، بس انا عارف انك هاتقدر على الاقل تقول ( اللهم لا اله الا انت استغفرك واتوب اليك ) على الاقل خالص 200 مرة فى اليوم ، طب ماتزعلش كفاية 100 مرة ومش اقل من كده بقى امال فين العزيمة .

........................

بس كده خلص البرنامج هنركز فى الاربع نقط دى وبس ومش مهم اى حاجة تانية دلوقت واللى شايف فى نفسة القدرة على انه يعمل اكتر من كده يبقى تمام قوى وربنا يبارك فيه ويعزه لكن ماتعملش اقل من كده .

1- الصيام ، 2- ختم القرآن ، 3- حفظ ودراسة الاربعين النووية ، 4- صدقة سر ميسرة كل يوم مع لزوم الاستغفار .

وعلى فكرة الاربعين النووية متوفر بسعر زهيد جدا فى المكتبات الاسلامية المنتشرة فى كل مكان مع الشروح الخاصة به ،وانصح ان تقتنوه بشرح الشيخ العلامة بن عثيمين رحمه الله.

نتواعد ونتعاهد ان ان شاء الله نكون على قلب رجل واحد فى تنفيذ البرنامج السهل ده على قدر المستطاع ، واننا نتنافس فى تنفيذه على قدر المستطاع ، وان شاء الله ربنا يلمس بقلوبنا الاخلاص فهيكرمنا ان شاء الله واللى شايفنه انه ممكن يكون صعب دلوقتى بمجرد ما نبدأ فيه ونسأل الله المعونة هنلاقيه سهل قوى وهنبقى مش عايزيين نبطله .
واتفرج على نفسك بقى بعد العشر ايام دول لما يخلصوا وتكون نفذت البرناج البسيط ده ، هتلاقى نفسك باذن الله انسان تانى خالص ومقبل على الحياه بايجابية وفاعلية المسلم .

وفى النهاية ياريت لو تعيدوا نشر هذا البوست فى مدوناتكم لينتشر الهدف منه و لتعم الفائدة وكمان هتبقى فى ميزان حسناتك ا ن شاء الله.

اراكم بعد العشرة ايام ان شاء الله .

تحياتى
اخيكم: طارق

شكر وامتنـــــــــــــــــــــــــــــــــــــــــــــــــــــــــان

السلام عليكم ورحمة الله وبركاته

اخواتى وحبايبى والمجتمع والناس
طبعا ببدأ بالشكر لكل من اقدم وتشجع وجاوب على التاج بسرعه
ولم يتخازل ولم يتقاعس ولم يهرب ولم ..ولم ..ولم ..ولم

اشكر والله فى المقدمه...ودى كانت المفاجأه((الست ام بقلـــــــــظ ))
لان الست ام بقلظ دى ستوته صغننه وعندها بيبى صغير صغير قد النونو..ومابيخليهاش ياعينى تنام
ورغم ذلك جريت بسرعه وجاوبت على التاج وكانت اول من جاوبه وبكل صدق


واشكر ابنتى جارة القمر
اللى جاوبت ياعينى فى مكان تانى
وكانت زعلانه خالص ورغم انى طمنتها ...برضه رجعت نقلته هنا تانى
وبرضه جاوبت بسرعه جدا....اشكرها قوى قوى


واشكر احمد صاحب مدونة اسماء واحلام
ولو انى زعلانه منه لانه اعتذر عن اسئله كتير وبالتالى لم يحقق التاج هدفه معاه
ولكنى اشكره ...لانه كدا بيوضح انه عايش فى عالم القطط والشعر بس
ولا يعرف ان يتحدث عن نفسه الا بطريقته الخاصه
وعلى هذا الاساس
انا كنت بفكر ..بفكر يعنى انى اجوزه واحده قريبتى
بس خلاص بقى شكله كدا وجد من تتحادث معه بلغته هو
اما انا فا هاخلع..هههههههههههههههههههههههه


اما من اشكرها واقبلها واحييها واضرب لها تعظيم سلام
فهى الحبيبه والقريبه ((فكرتى من الزمان ده ))
انها مثال على الايجابيه والصراحه والصدق مع النفس
لم تعتذر عن سؤال
ولم تخشى من اى اجابه ولم تتجمل مع اى اجابه
انها صادقه مع نفسها ومع الاخرين
بشكرها واشد على يدها
واتمنى لها التوفيق والسعاده


ومن ناحية الناس اللى لسه ماجاوبوش او مش هايجاوبوا
فانا مش زعلانه ولا هاقول اسمهم زى ماكنت بهدد ولا حاجه
لان انا اكتشفت
ان اللى مش عايز يقول عن نفسه حاجه ..مابيقولش
ويبقى كدا التاج مالوش لازمه
لكن الناس الرغايه اللى زى حالاتى مابيخبوش حاجه
بيبقوا واضحين حتى من غير تاج ولا كسروله حتى
مثلا مثلا...انا شفت اسم بوست جديد عند (( بــــــــــــــــــدراوى))اسمه اعترافات ربع قرن
والله الراجل ده ما محتاج لا تاج ولا محتاج صولجان
الراجل ده محتاج صقـفه كبيره جدا جدا
لانه راجل واضح ومميز وبالبلدى كدا جدع
وانا من هنا ببعتله كل الشكر والتقدير
ودى تانى مره يحصل منى اعجاب لحضرته
المره الاولى ...لما كان بيكلم عن الدعوه للاخرين بظهر الغيب
وانا نوهت عن فكرته فى مدونتى
وجه وشكرنى ودلوقتى رغم انه واضح
برضه جه وجاوب على التاج بكل صدق
مش عارفه اودى اعجابى بيه فين
ولا هانوصل مع بعض لاايه
هههههههههههههههههههههههههههههههههههه


كمان ابنى المحترم جدا جدا
حماده عفشه
والله هو غايب بقاله فتره
بس بعد ماجاوب على التاج انا عرفت هو مختفى ليه !!!!!!!!!!!!!!
عموما اشكره واتمنى له السعاده من كل قلبى وعقلى وتفكيرى


كمان اشكر اختى الحبيبه روفى
اول من تكلمت
بجد انسانه مهذبه الى ابعد الحدود
لم تعتذر ولكنها سيده فاضله واقعيه اهدتنى كل ما اريد ان اعرفه عنها فى صورة (هديه) منها
وقد تقبلت الهديه وانا سعيده بيها قوى


واشكر الانسان ((الغير معرف ))اللى جه وزارنى لاول مره
ورغم ذلك جاوب على التاج...ليه؟؟؟؟؟؟؟؟؟؟؟؟؟؟؟؟؟
لانه ودى اجابه فرحتنى قوى قوى
لانه قال عن التاج اسئلته مميزه ومريحه
بصراحه انا فرحت بالكلمه دى وهو بيوصف التاج
لانى فعلا كنت بحط الاسئله وكأ نى قاعده مع اى حد اعرفه فى انتريه بيتنا ...يعنى قعده ظريفه لطيفه معانا كوبيتين شاى وبنرغى مع بعض اصحاب احباب وممكن نروح نقـف فى البلكونه ونتفرج على الرايح والجاى
ماحستش ابدا ان الاسئله صعبه او فيها احراج لحد


كمان اشكر اليس فى بلاد العجائب
ومش عارفه انا فهمتها ولا لآ
بس فهمت انها مش هاتجاوب لانها بتحس بانها حره طالما لا احد يعرف عنها اى حاجه
ولانها بتتكلم براحتها طول ماهى غريبه فى وسط غرباء
يعنى هى لغاية دلوقتى بتشعر بالغربه بينا وبينها
وطبعا دى حاجه اشكرها عليها لانها وضحت موقفها
وكان ممكن بسهولها ماتردش عليا لكنى من الان اعلن انها زى بنتى برضه وهانبقى اصحاب برضه
لانى احترمت فيها رايها الجاد واللى بتقوله عن اقتناع
وليحيا الحب بين الغرباء
دا كله ..دا لو كنت فهمت قصدها صح يعنى



اختى وبنتى ....أ ينـــــــاس
منتظره منك كلام كتير بينى وبينك
لانى قلقانه عليكى ...وكونك ماتقدريش تكملى التاج دا معناه انك فعلا تعبانه
بس مش تعب جسدى ..دا تعب من نوع تانى
ياريت افهم
لانى مش فاهمه اى حاجه

اخى المهاجر الى الله
منتظره اجابتك
لانى زرتك ولم اجد الاجابه

اختى الحبيبه مونليزا
انا بفرح بمجيك عندى
بس هافرح اكتر لو قدرت نقرب لبعض اكتر


اخى مدحت مصطفى
نورتنى وياريت تكرر الزياره
واشكرك على كلامك عنى


اخى طارق سليم
نورتنى واشكرك على وصف التاج بانه غير سطحى
يعنى نقدر نقول انه مكتوب والله من الدور التانى ...وعمرى ماطلعت السطح
هههههههههههههههههههههههههههه
بجد اشكرك لان وصفك اسعدنى واعطانى الصفه الحقيقيه فعلا لما اردت ان يكون التاج عليه


همس الاحباب
طب جاوبه علشان همس واختها



ابنى ثنــــــــــــــــــــــــدر
غيرك قال انه سهل وممتع كمان
عموما منتظره الاجابه...
ودا تانى تاج اهديهولك ...ولا تجاوبه



وبكدا
اكون عملت اللى عليا
وننتقل الى موضوع اخر
وشكرا

تـــــــــــــــــــــــــــــــــــــــــــاج المحبــــــــــــــــــــــــــــــــــة

السلام عليكم ورحمة الله وبركاته

مش عارفه اكتب ايه
وخصوصا انى زعلانه قوى
وانا طبعى وحش قوى قوى
لما بحس حد بيبعد ببعد انا كمان
ولما احس حد بينسى... بتناسى كمان وكمان

اوعوا تفتكروا ان دا طبع وحش
ابدا....
كل قصدى من كدا ..انى اكون خفيفه على اللى اعرفهم ويعرفونى
انى ماكنش زنانه...
اعرف ان كل الناس عندها مشغوليات .....بتلهيها حتى عن نفسها
اعرف الدنيا مابتسبش حد فى حاله

ورغم انى كنت ...والحمد لله...مريضه جدا
بس برضه كنت ببقى فى السرير... واقعد افكر فيكم

وسئلت نفسى كتير:
هو انا اعرف ايه؟ ..عن اى حد من ولادى واصحابى هنا؟؟؟؟؟؟؟؟؟؟
ولقيت نفسى بجاوب:
مابعرفش حاجه غير اسمهم...ويمكن يكون اسم المدونه كمان ..مش الاسم الحقيقى

طيب ايه بيشغلهم ؟.....وبيعملوا ايه فى حياتهم
ولا اعرف
طيب ايه مبادؤهم او تفكيرهم او...او....او....او...
وهكذا لقيت نفسى بعيده عنهم بقدر ماهما بعيد عنى

ياترى هما كمان بعيد عن بعض كدا؟؟؟؟؟؟؟؟؟؟

ولقيت نفسى رحت بخيالى الى لقاء مفتوح مع اصدقائى هنا وقعدت اتعرف عليهم
واتكلم فى كل حاجه وكنت سعيده جدا باللقاء الخيالى دا

ووجدت ان اهديكم خيالى لتشاركونى حبكم
فما فكرت فيكم الا من احساسى بقربكم
فقلبى يتذكركم ... فهل انا فى ذاكرتكم؟؟؟؟؟؟؟؟؟؟

هل ممكن ؟ ان تعتبروا ما اهديكم هو تاج المحبه منى اليكم ...والى كل من تهدوه اليه

واتمنى ان كل من يعرفنى او يحبنى او ليا عنده اى قدر من المعزّه ان يجيب عليه
وخصوصا اللى عارفين نفسهم كويس قوى هما بالنسبالى ايه....

بس ممكن ااقول بعض احرف من اول الاسامى
زى مثلا: أ ..ث..ح...خ..ر..م..ط..ف..ب..ص..ي..ف..ل................والله متهيئلى كل حروف الابجديه

وطبعا الكلام للبنات والستات والشباب.....مين يقول هات
ولكنه طبعا بصيغة المذكر لان دا طبعا لغة القرءان
وكمان مش بطلب اى اسماء صريحه...الا لمن يريد...ولكن كل شخصيه ليها حرية التعرف عن نفسها
لان اللى بيهمنى الشخصيه الجوانيه المستخبيه..... وليس اسم او عنوان



انت مين بقى؟

عندك كام سنه؟

هل انت متزوج ؟ وهل عندك اولاد؟

دراستك ايه؟

كم طولك...وما لونك...

هل تمارس عملا بشهادتك ام عمل حر وماهو

ماهى مدة عملك اليوميه

ماذا تفعل بوقت فراغك

هل لديك هوايات....وهل تمارسها

هل تشعر برضا ربنا عنك ؟

هل تحب؟...ومن بقلبك الان؟

لو لم تجد من تحب ....فماذا ستفعل؟

عندما تكون فى موقف اتخاذ القرار..تخالف الجماعه.. ام تشرك معك الاخرين ؟

هل تتعامل بواقعيه؟

ماهو الشيء الذى فعلته وندمت عليه طول عمرك ؟

هل تصارح غيرك بالحقيقه ؟ ام ام تقول له مايريد سماعه؟

صف انسان يمكن ان تحبه عمرك كله

متى يقسوقلبك ؟
ومتى يقسو لسانك؟

من هو اول من قلت له احبك؟

هل يمكن ان تحب احد من المدونين؟
وهل يمكن ان يكون شريك حياتك؟

ماذا تعنى لك المرأة او الرجل؟

فى زمن البحث عن الماده ..عن ماذا تبحث انت ؟

متى تعرف انك تحب ؟

ماهى الشخصيه التى اثرت بحياتك ؟

هل يوجد من تراه سعيدا فى الدنيا ولماذا ؟

سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا

ماهى درجة صراحتك ؟
وماهى المواقف التى يمكن ان تكذب فيها ؟

هل يتغير الحب بعد الزواج؟

فيما تفكر الان ؟

لو لم تعيش بمدينتك؟؟؟فاى مدينه اخرى تفضلها

من اول من ياتى ببالك لتحكى له اسرارك؟

من تريد ان يكون دائما بجوارك ؟

من هو الد اعدائك؟

ومن هو صديقك

ماهى صفات شريك العمر؟

لو الدنيا كلها زيك....لمن تقول هذه العباره ؟

ماذا تكره فى الدنيا ؟
وماذا تحب

كيف تواجه مايضايقك
وماذا تفعل عند المفاجآت

لو معاك فلوس اكثر مما تتخيل...فماذا ستفعل بها

هل الفقر يصنع حبا؟؟
وماذا لو وجد الحب فى زمن الفقر المادى؟

ماهى اقسى صدمه تعرضت لها حتى وقتنا هذا
وماذا كان رد فعلك
وهل تعلمت منها شيء
هل انت على استعداد لتلقى صدمات اخرى؟؟

هل تصدق كل ماتقرا عن الاخرين
كيف ترد على من لاتصدقه

اذا احببت انسان ما ...هل تصرح له بحبك ؟
وماذا تفعل لو لم يتجاوب معك؟
هل تؤمن بالمثل القائل:انا احب فانا اعيش

ماهى القضايا التى تشغل بالك؟

هل تستطيع تحقيق كل احلامك
هل تمتلك طموحا...وماهو؟
كيف ستحقق طموحك...ام سيبقى حلما فقط!!!!!!!!!!

ماهى علاقتك بالدنيا
ماهى علاقتك بالموت

لو لك اختيار زمن تعيش به....فماهوذلك الزمن ؟ ولماذا ؟


هل يمكن ان ارا ك وانت غائب؟؟؟؟؟؟؟

ماذا ترى فى نفسك مميزا عن الاخرين؟

من اذا اقترب منك ...هربت منه بعيدا؟

من تقول له : قرب منى قرب ...ياقلبى يا متغرب

ماذا تريد ان تقوم به قبل ان تموت




مارايك فى اسئلتى؟؟؟ وبدون مجامله
هل نسيت سؤال كان هاما بالنسبة لك؟

هل استطعت تغطية شخصيتك
مع ملاحظة انى ماليش فى الكوره..........هههههههههه

من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟


ملحوظه مهمه جدا
كل اللى عارف انى بحبه....ومش هايجاوب على التاج ...هو حر
المره الجايه الاجابه اجباريه وبالاسم ...وفى احراج كمان

وقد اعذر من سئل واترجى

زمن الفتن

السلام عليكم ورحمة الله وبركاته

نحديث ..تحديث

كنت قلت فى البوست السابق ان اى حد عنده اضافه فليتفضل بها...
ونحن مستمعون
ولقد وجدت ان الاخت: ام انس.....قد اضافت جديدا مفيداعند التعليق على الموضوع
جزاها الله كل خير

ولقد استأذنت منها ان انقله هنا كتحديث للموضوع ....
عسى الله ان ينفعنا به جميعا
ولنبدأ:..............................
بداية كلام ام انس:وهانقله كوبى بست

نبدء بانفسنا لندعو غيرنا

قال الله تعالى" هَاأَنْتُمْ هَؤُلاءِ تُدْعَوْنَ لِتُنفِقُوا فِي سَبِيلِ اللَّهِ فَمِنْكُمْ مَنْ يَبْخَلُ وَمَنْ يَبْخَلْ فَإِنَّمَا يَبْخَلُ عَنْ نَفْسِهِ وَاللَّهُ الْغَنِيُّ وَأَنْتُمُ الْفُقَرَاءُ وَإِنْ تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لا يَكُونُوا أَمْثَالَكُمْ"


(اقيموا دوله الاسلام فى قلوبكم تقم دوله الاسلام على ارضكم)

وقال الله تعالى "وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًاوقال اننى من المسلمين "

وعلينا ان نعلم ان الاصلاح المرجو لا يحدث فى يسر ولكن نتيجه صراع شديدبين الحق والباطل

قال الله تعالى " كذلك يضرب الله الحق والباطل فأما الزبد فيذهب جفاء وأما ما ينفع الناس فيمكث فى الارض كذلك يضرب الله الامثال"

فلنثق فى الله وتأيده ولنثق فى ديننا وأنه الدين الحق ولنثق فى طريق الدعوه وانه طريق رسول الله ولنثق فى المستقبل ولنثق فى انفسنا ولنعمل حتى يتحقق وعد الله " وكان حقا علينا نصر المؤمنين"

وفقك الله لما يحبه ويرضاه
ويبقى التواصل
ام انس

29 أكتوبر, 2009 09:15 م

زمــــــــــــــن الفــــــــــــــتن

اتى ابو اميه الشعبانى ابا ثعلبه الخشنى فقال له كيف تصنع فى قول الله تعالى :

(( يا ايها الذين آمنوا عليكم انفسكم لا يضركم من ضل اذا اهتديتم الى الله مرجعكم جميعا فينبئكم بما كنتم تعملون )) المائده 105

فقال ابو ثعلبه : لقد علمت ان رسول الله قال ::

ائتمروا بالمعروف وتناهوا عن المنكر... حتى اذا رايت شحاً مطاعاً .... وهوى متبعاً ....ودنيا مؤثَره...واعجاب كل ذى رأى برأيه،
فعليك بنفسك ودع عنك العوام....
فإن من ورائكم اياماً ((الصابر فيهن)) مثل القابض على الجمر ..للعامل فيهن اجر خمسين رجلا يعملون كعملكم

قيل يا رسول الله اجر خمسين منا او منهم
قال بل اجر خمسين منكم

ونجد هنا اننا يمكن ان ناخذ من هذا الامر مواعظ وعبر مثل::

ان فى هذا اسوة لنا ان تكون عقولنا مشغوله بالقرآن.... وفى هذا صلاح لاحوالنا ومرضاة لربنا

وايضا ان المؤمن لا يترك نفسه لتيار المعاصى فى زمن الفتن...
وهذه حقيقه يؤكدها هدى رسول الله صلى الله عليه وسلم كما قال::
لا يكن احدكم إمعه ، يقول : ان احسن الناس احسنت ، وان اساء الناس اسأت ، ولكن وطنوا انفسكم على تقوى الله وطاعته

وايضا...ان ثواب العمل الصالح يضاعف فى زمن الفتن
وفى ذلك اشاره الى المشقه التى تصادف الصالحين والشرفاء والامناء فى هذا الزمن
وان السبيل للتغلب على هذه المشقه لا يكون الا بالصبر والاستعانه بالله

فالثواب على قدر العمل
واذا طاب الغرس طاب الثمر

ملحوظه
يمكن يكون هناك عبر وحكمه اكتر من كدا
فمن يستطيع ان يدلنا عليها فنحن مستمعون

وما خلقت الجن والانس الا ليعبـــــــــــــــــــــــــــدون

السلام عليكم ورحمة الله وبركاته

تتزاحم الافكار بعقلى
واتوه مابين نفسى وافكارى... استيقظ من نومى فى الساعه الثانية صباحا
يجرنى كتاب ان القى نفسى بين بابيه...واقرأبعض مابه من سطور...ثم اغلقه...فقد طاقت نفسى الى الحريه

انى سجينه...اشعر بفراغ قلبى فظيع...اشعر بضياع روحى قاتل
ابحث عن مخرج لعذابى
ابحث عن ماوى لقلبى
ابحث عن سلوى لجراحى
ابحث.. اذهب يمينا ويسارا

اخرج عن صمتى واتحدث الى بشر ليس لهم وجوه
اجد التوهان والفراغ

امد يدى فى صحراء العقل ..
انادى يــــــــــــــــــــــــــــــــــــــــــــــــــــــــــارب

حبيبى يارب ...اجبنى... اغثنى... اناديك الهى
ليس لى سواك يارب

كنت معك....ولكن تاه منى الطريق
خذ بيدى يا الهى

اخرج من عقلى
ادخل عالم الحب والنقاء
ادخل عالم البقاء
ادخل عالم السعادة والبهاء
انى اخرج من نفسى
ولا اتمنى ان اعود مرة اخرى الى عالم الدنيا والدنايا


اخرج الى ضفاف الدين
بل ادخل عالم الجمال والراحه النفسيه
ادخل عالم الحريه الابديه....عالم ابيض نقى....عالم لا اجد فيه الا نفسا تسبح وتْسبح فى ملكوت الله الرحيم

انى احبك يا الله
اتمنى رضاك
واجد العين تدمع والقلب يبكى
((ماذا قدمت لحياتى))

ان لى رب غفور
سامحنى يارب
واستمع الى ايات الذكر الحكيم
(((وماخلقت الجن والانس الا ليعبدون...ما اريد منهم من رزق وما اريد ان يطعمون)))
صدق الله العظيم

الله يا الله
ساعدنى.... انقذنى
انى غارقة فى الايام
انى غارقة فى الاحلام
انى غارقة فى الامانى

يارب
خذ بيدى...ارحمنى من الدنيا .. ارحمنى من نفسى ...ارحمنى من الاهواء المضلله
ارحمنى من الرغبات الكاذبه...
ارحمنى من الامانى الفانيه

((وماخلقت الجن والانس الا ليعبدون))
يارب
عدى رمضان...فات رمضان
يارب اسئلك الثبات فى الامر والعزيمة على الرشد
يارب اسئلك حبك وحب من يحبك وحب عمل يقربنى لحبك

يارب محتجالك تنور طريقى
محتجالك تؤيدنى بمدد من عندك
يارب قلت وقولك الحق(((ولاتذر وازرة وزر اخرى )))

يارب ان قصرت فى صلاتى
فاعنى على ذكرك وشكرك وحسن عبادتك

((وماخلقت االجن والانس الا ليعبدون))

يارب ان قصرت فى صدقاتى ...
فارزقنى الهدى والتقى والعفاف والغنى

يارب ان قصرت فى قراءة القرءان
فجعل القرءان حجة لى لا على

((وماخلقت الجن والانس الا ليعبدون))
يارب ان ضيعت وقتى فى ما لا يفيد
فجعل الحياة زيادة لى فى كل خير واجعل الموت راحة لى من كل شر

يارب ان ادركت انك خلقتنى لعبادتك
فجعل خير عمرى اخره.. وخير عملى خواتمه... وخير ايامى واسعدها يوم لقائك

يارب هذه رسالتك الينا((وماخلقت الجن والانس الا ليعبدون ))
اجعلنى من العاملين بها
اجعلنى من القائمين بها
يارب ااشغلنى بعبادتك واملا فراغ قلبى بحبك
يارب لاتجعلنى من المغبونين فى اوقات فراغى
يارب ارزقنى:: لسانا ذاكرا وقلبى خاشعا
يارب
تقبل منى الدعاء
واجعلنى من عبادك الصالحين
امين امين امين يارب العالمين

اجازه مرضيه

سلام عليكم

انا اختكم
ولست ماما الفراغ
ماما فى اجازه مرضى

ماما بتسلم عليكم وبتقلكم ماتتخضوش عليها
وعلشان راحتكم قفلنا التعليقات
وان شاء الله اول ماتسترد صحتها
هاترجعلكم

بحبـــــــــــــــــــــــــــــــــــــــــــــــــك يا مصر

السلام عليكم ورحمة الله وبركاته

حبايبى واخواتى
انا ماكنتش جايه النهارده
لكن الحب اللى قرأته عند جيجى وورلد....فجر الحب الكامن فى القلب لمصر
جيجى قالت كلام فى عشق مصر
معتقدش انى اعرف اقول زيها
لكن انا عندى زيها وحاسه بحبها...ايوه بحبها ...بحب بلدى
بحبك يا مصر
بحبك يابلدى وانتى فعلا امى
بحبك يابلدى وانا ماشيه تحت شمسك...بحبك يابلدى وانا عايشه جوا ضلك
بحبك بلدى وراكبه المترو بتاعك
بحبك يابلدى وانا بشم هواك على ضفة نهرك ونيلك
بحبك يابلدى
بحبك وبحى كل عسكرى استشهد على ارضك وارتوت الرمله بدمه
بحى رجاله دفعوا دمهم علشان احنا نعيش
رجاله كان ليهم تمنهم ساعاتها
رجاله فيهم اللى عايش...اقل واحد فيهم عنده يجى 50 سنه دلوقتى
بجد ببوس ايده ورجله

وفينا اكيد من ابنائهم اللى عايشين بيناوبيقرأوا مدوناتنا
بقولهم فعلا ابوكم بطل فعلا انتوا ابطال
انتوا تستحقوا تتشالوا على الراس..... ودى اقل كلمه نقولها لولادكم واحفادكم عليكم ... ونعترف بفضلكم علينا بعد فضل ربنا
انتوا دخلتوا على الموت برجلكم علشان تجيبولنا نصر نعيش على ذكراه ....بقالنا 36 سنه بنحكى عنه ونتمناها تانى وتالت

بحى كل ظابط ساب ولاده... واللى ساب خطيبته واللى ساب عروسته ....واللى مشافش ابنه... والى اثكلت امه وابوه باستشهاده واللى اترملت زوجته
من بعده

حواديت قراناها ..وقصص عيشناها فى ايام الحرب وبعدها ...قطعت قلبنا على ناس كان ابنهم ده هو الهوا اللى مخليهم عايشين فى الدنيا
وراح الهوا وانطفت شمعة عينهم من البكاء عليهم

ياه ياه ياه يامصـــــــــــــــــــــــــــــــــــــــــــــــــــــــر
كنا ايام الحرب نفرح مع كل بيان يتقال ...وناس تقول يابنى ترجع بالسلامه ...وناس استشهدت واحنا ولا فاكرينهم
ونقول دول فى الجنه يابختهم....
كلمه سهله كنا بنقولها واحنا قاعدين جنب الراديو نسمع البينات الحربيه
مع ان كل بيان كان معناه دم شهيد كان بيروى فرحنا بالانتصار
وكان يعلى صوتنا بالغنا ليل ونهار.....دلوقتى بنفتكرهم ونقول دول فعلا الابطال
ابطال دلوقتى وامبارح وبكره كمان
لاولاهم مكناش نقول مصر دلوقتى فى العالم ...والمونديال ...وكاس الشباب ...وتعمير الصحراء... وغيرها كمان وكمان

ياه ياه ياه يامصر
دانت ادفع فيك كتير علشان تعيشى بعزه وشرف

بس ليا كلمه لرئيسنا وحبيبنا صاحب اول ضربه جويه
يارئيسنا مصر عيزاك توقف الحراميه
مصر عيزاك تحاسب البلطجيه
مصر عيزاك تدور على الغلابه واللى عايشين يادوبك من الجنيهات ب 100
مصر عيزاك تكسى العريان بجلابيه
مصر عيزاك ترحم ولادها من الناهبين خيرها ومخبينها فى البنوك الاوربيه
مصر بتقولك كبرنا سوى وخبرة حياتنا لازم نعلمها لذرية ذريتنا اللى جايه
مصر ماينفعش يحكمها رجال اعمال كل همهم يجمعوا الثروه والمال
مصر عايزه شاب جدع وبنت جامعيه
عرفوا العرق وكلوا الفول والطعميه
ونفسهم ياكلوا الكفيار والديك الرومى مع الملوخيه
ودا مش هايجى الا من جوا ارضنا بشغل الصنايعيه
ياريس عين وزراء من ارض الحوارجيه
دول عارفين من الجعان مين العريان ومين محتاج سكن وبطانيه
ياريس انت المسئول وانت اللى ربنا اللى هايحاسبك على مصطفى وحسين وهنيه
ياريس انت الراعى وكلنا عندك رعيه
اامر تلاقى بدل الوزير 100
وكل سنه وانت طيب ياريس
يا صاحب اول طلعه جويه


علشان نفسى اقول شكرا لكل بطل
بارجوا لو كان مابينا ابن بطل او حفيد بطل ياريت يعرفنا بنفسه علشان نحيه ونقول شكرا من قلبنا
ودا اقل واجب علينا نقدمه فى يوم فاكرينه كلنا
وشكرا
والى اللقاء

زهـــــــــــــــــــــــــــــــــــــــــــــــــــــــــق

سلام عليكم ورحمة الله وبركاته

ازيكم
اكيد انا صدعت دماغكم بحكاية الصوم دى
وانتوا اصلا لسه خارجين من صيام
وانا اصلا وانا قدكم كنت مابصدق اخلص رمضان واجرى بقا العب واشترى قصص ااقضى فيها احلى ايام حياتى ...اقرا واقرا واقرا
ماهو ماكنش على ايامنا حاجه غير قناتين تليفزيون بس
وكانوا بينيمونا من الساعه 9 ...بعد مسلسل الساعه 7
وتيجى النشره بابا وماما يقعدوا يتفرجوا واحنا بقا اللى يحضر شنطته وواللى بيعمل الوجب فى اخر 10 دقايق قبل النور مايطفى بالامر وكله ينام يعنى ينام

جايه دلوقتى فى عصر النت والموبيلات......الا ايه ااقولكم صوموا تانى
طيب والافلام اللى للصبح.... والكوره وكاس الشباب
والنت كافيه وصلات الديسكو
وغيرها وغيرها كتير


ليكم حق اللى يضحك على كلامى ويقولى يماما فوقى احنا فى القرن 21

بس اقولكم والله انتوا صعبانين عليا
انتوا فعلا عايشين ازهى عصور التكنولوجيا وكل حاجه بتيجى لغاية رجلكم وايدكم وانتوا مرتاحين
بس ياخساره....برضه الامراض جايه لغاية رجلكم برضه وانتوا مرتاحين

على ايامنا مكناش بنسمع عن كل الامراض دى ولاالفيضانات دى
ولا الاعاصير المدمره...ولا الاوبئه الحاصده لحياة البشر
ممكن حد يرد ويقولى طبعا دا كان بيحصل بس محدش كان بيعرف علشان ماكنش فى ثورة الاتصالات اللى موجوده دلوقتى
بس برده هارد واقوله لا كنا بنعرف برضه لان الجرائد كانت بتنقل الاخبار من كل مكان
وكان اعتمادنا الوحيد على المعرفه من الكتب والقصص والمجلات
وكنا بنحوش من مصروفنا علشان نجيب قصه لاارسين لوبين
ولا مجله ميكى وسمير

عارفين ياولاد كنت لما اجى اعمل حفلة عيد ميلادى مره كل كام سنه من نفسى
كانت بتكلف كام
تصدقوا دستين جاتوه ب50 قرش
ودستين كوكا كولا اضربوا معايا 15 مليم ×24 احسبوهم انتوا يطلعوا كام
وكيس لبن ب5 قروش وشوية شاى لزوم الشاى بالبن ............ وشوية طراطير وشوية اقنعه ورق
يعنى الحسبه على بعضها مش هاتكمل 5 جنيهات مصريه لاغير

اوعى حد يقول يااااااااااااااااااه دانتى كبيره قوى يا ماما
ااولكم ابدا
بس هو كل شيء بيجى على حساب عمرنا
انا حاسه ان زمان كان مليان احساس وعذوبه وحنيه فى التعامل مع بعضنا
وعلشان كدا كان ربنا محللنا عيشتنا...
كنت لما تعوز حاجه تسئل زميلك او مدرسك....وكانوا والله بيحبونا جدا وبيردوا علينا بكل الحب والابوه الطيبه
وزميلك كان يجاوبك باخلاص وموده

لكن تعالوا دلوقتى واسئل اى حد على اى حاجه
الجواب هو::
ادخل النت وانت تعرف
الاب يسئل ابنه على حاجه ...يرد ويقوله هاشوفهالك على النت واقولك
الام تيجى تقول لبنتها على اى تجربه فى حياتها او اى نصيحه
ترد البنت وتقول دا كان زماااااااااااااااااااااااان....دلوقتى فى نت وبنعرف منه كل حديث وجديد

يعنى لا الاب ولا الام ليهم عوزه....خلاص الكمبيوتر والنت هما بقوا كل حاجه
لا عاد علاقات انسانيه ولا اجتماعيه
راحت الموده والرحمه من القلوب
بقينا بندور على العلاقات من خلال النت برضه
وعلشان كدا ربنا بالينا بالامراض والاوبئه المميته رغم انك تلاقى كل واحد فى حاله ومابيكلمش حد
لكن لااسف الامراض جايه من مجرد تواجدنا فى مكان واحد((سبحان الله)))يارب سلم .. يارب سلم

يعنى انا كامثال حى لهذا الوضع
بنتى متجوزه بعيد عنى بشوفها كل شهر ولا شهرين ...ليه
لان ياماما المواصلات بقى والحمل تاعبنى
خلاص ياماما هاكلمك على النت واخليكى تشوفينى وتشبعى منى..............بالذمه دا اسمه كلام!!!!!!!!!!!!!!!!

وبنتى التانيه مشغوله مع خطيبها اللى انا متأكده انهم بعد جوازهم كل واحد فيهم هايكون معاه لاب توب....وهايكلموا بعض من خلال النت لان كل واحد فى شغله ومش فاضى انهم يقابلوا بعض
يبقى هاتشوف امها امتى ولا هاتقعد تسامرها امتى؟؟؟؟؟؟؟؟؟؟
واهو زى مانتوا شايفين اتعلمت كومبيوتر علشان اتواصل مع اولاد تانين واصدقاء وعلشان اعمل لنفسى حياه جديده
وهى عارفه كدا وبتشجعنى .......لا وايه بتقولى انت احلى ام فى الدنيا ...ليه؟؟؟؟؟؟؟؟
علشان عرفت اعيش فى عصر التكنولوجيا..............بالذمه مش دى خيبه

يا ولاد فوقوا
دى تكنولوجيا كاذبه
دى تكنولوجيا بتضيع احلى سنين عمركم
الحقوا اشبعوا من اهاليكم
اخرجوا وشموا هوا.....اخرجوا واجروا فى الشوارع...
امسكوا القلم بايدكم واكتبوا شعر...قصه...
امسكوا القرءان واقروه...واكتبوه...والله ايدكم هاتشهد عليكم وليكم
اتعلموا حاجه كهوايه....
تخيلوا لو النور قطع....اصبحت انت وهى عاطلين
لا فى بنت فى ايدها خيط تريكوا ولا كروشيه(((عارفه هاتقولوا (يع) ايه الموضه القديمه دى)))
بس احنا كنا كدا وبيوتنا مليانه منها
لكن دلوقتى تلاقى البنت مافيش فى ايدها غير دبدوب او بالكتير مبرد الضوافر
والولد ماسك الموبايل وهاتك يارغى

ياولاد الحقوا اقرءوا القرءان
ياولاد الحقوا احفظوا اللى تقدرواا عليه من القرءان دانتوا هاتدخولوا الجنه وتطلعوا درجه بكل ايه ان شاء الله

ياولاد انتوا مش عارفين ان 7 يظلهم الله فى ظله يوم لا ظل الا ظله
منهم شاب نشا فى طاعة الله
منهم رجل تعلق قلبه بالمساجد

ياولاد نفسى اشوفكم احسن من اى حد فى الدنيا
قولولى مين فيكم بيعرف يمسك مسمار وشاكوش
مين فيكم بيعرف يكتب بالخط العربى ...ولا يعرف يعمل لوحة حائط لاخوه الصغير((وسيله تعليميه يعنى ))
مين فيكم بيعرف يبيض شقته ولا شقة اهله واهو بيتسلى بدل القعده الممله قدام الكمبيوتر
مين فيكم بيعرف يصلح حنفيه ولا ولا ولا ولا

كله طالع قاعد قدام الكمبيوتر
وعلشان كدا انا زهقت
وهاخد اجازه....ومش رايحه لبنتى ولا هاعمل حاجه غير انى اشوف مكتبتى حبيبتى اللى عليها تراب قد كدا
وهانضفها واشوف الكتب اللى عندى
ممكن الاقى كتاب ((قيم)) مقرتوش ايام تربية ولادى وماكنتش فاضيه
واوعى حد يقولى مانتى ممكن تلاقيه على النت وتقريه
هاقولكم اه ممكن
بس ما احلى الاستمتاع بالقراءه وانتى مدد على الكنبه ومعاك كوب شاى
وموسيقى لام كلثوم...وهدوووووووووووووووووووووووووؤ تام
دانتوا ضايع منك اجمل سنين عمركم
ال نت ال

وجعت دماغكم !!!!!!!!!!!!!!!!!
معلش شوية زهق
وارجعلكم بعد شويه
الى اللقاء

ردا على التعــلــيـــــــــــــــــــــــــــــــقات

سلام عليكم ورحمة الله وبركاته


احب انوه هنا...انى هارد هنا على التعليقات
ودا لانى قبل كدا اتكلمت فى الوضوع ده ومحدش شجعنى على انى ماردش على التعليقات..لان الموضوع بيتعبنى وبياخد وقت..وبعدين ارجع تانى اكتب بوست جديد
وانا كدا بتعب قوى
ولانى عارفه انى حبايبى بيبقوا منتظرين الرد على تعليقاتهم..فانا فكرت فى حل وسط..وهو
انى ارد على التعليقات فى بوست جديد..وفى نفس الوقت اكتب ما اريد من خلال الرد بتاعى ...........هنبدأ بسم الله

ابنى الغالى ...احمد
اشكرك على كل ماتبذله لااخواتك وطبعا كل سنه وانتى طيبه يا ميمى ...بس انا قلتها قبل كدا

نوستور ازورو..
بصراحه انا بشكرك على تشريفى فى مدونتى وربنا يعينك على صيام الايام السته...وحاول وصمهم متفرقين بس اهم حاجه انك متنساش ولا تكسل
وليا سؤال بعد اذنك
انت مصرى ولا منين...ودا اسمك حقيقى ولا اسم مستعار
عموما انا بحب اعرف شويه عن اللى بيكلمونى ...ودا ياريت مايزعلكش
دا بس بيقرب الناس لبعضها



اختى الغاليه مونليزا
ربنا ينصرك على من ظلمك....وحسبك الله ونعم الوكيل
وادعى ربنا بقولك:
افوض امرى لله..ان الله بصير بالعباد
وبالنسبه لصيام الايام السته ...الحمد لله صمتهم...وادعوا الله ان يتقبلهم منى
والحمد لله صمتهم يوم ويوم...وربنا يقدر الجميع على صيامهم



يويو
والله بتضحكينى انتى واحمد على اللى بتعملوه مع بعض هنا...وضحكت على ابن لادن اللى مش هايسكت الا بكيلو حب العزيز
بجد مت من الضحك...وفعلا اعملى كل اللى انتى عيزاه يا يويو
وشكرا على انك قلتلينا ان عيد ميلاد احمد كان الشهر ده
ومن خلالك بقوله كل سنه وانت طيب يا احمد
ومارضتش ااقولهالك الا من خلال يويو ...لانك ماقلتش


اقصوصه
وانت كمان كل سنه وانت طيب
بس برضه هاقلك ..حاول تصوم الايام السته
وربنا يعينك ويتقبل منك



ذكرى رحيل قلم
اشكرك على زوقك
وان شاء الله نداوم على التواصل وونداوم على صيام ايام الله المباركه
وانت كدا فتحتلى طريق انى اتكلم عن صيام الاتنين والخميس....واللى بدعى ربنا واقول:: يارب يارب يقدرنى على صيامهم..لان الرسول صلى الله عليه وسلم قال فيهم ....هذه ايام تعرض اعمالنا على الله فيها ...واحب ان يعرض عملى وانا صائم....ودا كفايه اننا نتبع سنةالحبيب لمن يستطيع طبعا




ابنتى عابرة السبيل
ربنا يخليلك بقلظ...وعقبال مما تشوفيه صايم رمضان هو كمان ان شاء الله
وربنا يقدرك علىصيام الست ايام
وكمان برضه صيام ايام 13 و14 و15
ودى الايام القمريه
نفسى اصومهم من زمان
وبدعى ربنا يقدرنى واصومهم....وبجد ان سمعت من طبيب مسلم مؤمن باذن الله: ان الصيام بيجدد الخلايا فى الانسان وبالتالى بيجدد شباب الانسان وبالتالى هايحسن الصحه
واعتقد ان دا طلب اى انسان....وربنا يرزقنا الصحه جميعا



اخى همس الاحباب
وانت طيب ومنتظرينك انت وبقية الاخوه الاعزاء...
وعلى فكره انا كل يوم ببحث فى الريدر عنكم
ربنا يبارك فيكم



الرخمه والرخامه
انا فعلا زورتكم....واتمنى اننا ان شاء الله نستفيد من بعض
بس ياترى بتصوموا ولا لسه مابتدتوش؟؟؟؟؟؟؟؟؟؟؟؟؟


اختى الفقيره ام البنات
وحشتينى...واشكرك على دعائك


ابنى الغالى ثندر
اول واحد ااقوله :برافو .....ويارب يقدرك على اتباع هدى المصطفى صلى الله عليه وسلم
وبعدين كلنا عارفين الحكمه القائله ...:ان ما لايدرك كله..لايترك كله

وبعدين انا والله ماكنتش بصوم الا شهر رمضان...بس لما حسيت بان صيام الاتنين والخميس جميل جدا..وخصوصا واحنا لسه طالعين من رمضان وملحقناش ننسى الصيام...حبيت انى اشرك حبايبى فى الصيام معايا...رغم البعد عن بعضنا فى المكان ..بس ربنا يجمعنا فى الزمان والنيه الطيبه
قولوا امين


روفى
وانتى طيبه
وزمانك بتصومى ان شاء الله
ربنا يتقبل منك ومنا
ونقدر نكمل لغاية رمضان الجاى وربنا يوعدنا بدخول الجنه من باب الصائمين
ويروينا يوم العطش ولا نظمأ يومها ابدا
قولى يارب


فكره حبيبتى
انا مسمحاكى علطول...بس طمنينا بسلام عليكم حتى



نورهاتى
ربنا يتقبل منك....وانا كمان لسه مخلصاهم قريب
وبدات والحمد لله فى صيام الاتنين والخميس....وبدعى ربنا يقوينى ويبعد عنى الشيطان..لانه عمال يوسوسلى بانه كفايه كدا صيام...ودا اللى مخوفنى من نفسى ...خايفه اضعف ..خايفه قوى..مع انى مقتنعه بان الصيام كويس ليا جدا...لانه بيظبط ضغطى ووكمان السكر...بس اعمل ايه ..اهو بدعى ربنا يعنى ويقدرنى انا وابنائى واخواتى هنا كلهم........ اللهم امين



ابنى الغالى اكيد
والله يابنى كلامك بيسعدنى جدا...وياريت فعلا اكون قدرت اساعد اى حد هنا على طاعة ربنا والتقرب اليه
دانا يا اكيد بحاول اساعد نفسى...بس نفسى نكون كلنا فى حب الله عايشين وعلى طاعته ملتزمين
ربنا يبارك فيك ويتقبل منك صالح الاعمال



ابنى الغالى المعتصم ..والزميل التعليمى
طبعا انا مسمحاك ..دا اكيد بس بتوحشنى
وبالنسبه للصيام ..ربنا يوفقك ويتقبل منك....وطبعا ينفع صيامهم باى طريقه ممكنه وعلى حسب استعدادك وتحملك...
بس المهم مايكونش الصيام يوم الجمعه وبس
لازم مع الجمعه يوم قبله او يوم بعده ...وبقية الايام انت حر فيها...وربنا يقدرنا بقا على صيام الاتنين والخميس كل اسبوع
قول يارب



ابنتى :...بيطريه ومش بايدى
انا يشرفنى انك تكونى مع بناتى الغاليين هنا
واشكرك على ثنائك على المدونه...واحب ااقول هنا ليكى ولكل ابنائى الغاليين عليا جدا واخواتى واصدقائى
انا مدونتى مابقتش ليها قيمه الا بحبهم وتواصلهم معايا...لان لولاهم مكنتش لقيت حد يقرأولا يسمعنى...ولا كنت كتبت اساسا
اشكرك على كلامك الجميل ...وان شاء الله نكون سوى علطول



كلمات من نور
ربنا يعينا ويعينك على الصيام...وفعلا اهو المغرب بقى 6 الا ربع ولسه كمان كل مالشتاء يدخل.... يعنى لو فضلنا مواظبين على الصيام ان شاء الله هايدخل علينا الصيف واحنا مرتاحين خالص ...وهانبقى اسعد مخلوقات الله بالصيام ..وهاتبقى عاده عندنا اننا نتقرب الى الله بما يرضيه عننا
ودى طبعا امنيه بتمناها من ربنا يحققهالى ويحققها لكل اللى يتمناها


اختى الغاليه :الدكتوره العظيمه..مها
كلامك اثر فيا جامد...
وسعدت جدا بان هناك اخوه بيفكروا فيا بالطريقه دى
ورحم الله عمر ابن الخطاب ..رضى الله عنه الذى قال:...رحم الله عبد اهدانى عيوبى..
وانا متقبله كلامك بصدر رحب جدا ومش زعلانه خالص...لانى عارفه ان كلامك صح 100 فى 100
بس انا حبيت اعترف بضعفى الانسانى...لانى لو ماكنتش كتبت كدا كان زمان اى حد هايقرأ كلامى هايعتقدنى من الملائكه....وطبعا كلنا عارفين انه لايوجد ملائكه يمشون على الارض
فانا يا دكتوره مها:انسانه عاديه جدا ليا لحظات ضعف ولكنها ارجوا الا تغضب الله ....فموسيقى اغانى ام كلثوم تذكرنى بزوجى الله يرحمه
وتسعدنى ولو لدقائق ...وطبعا بستغفر الله العظيم قبل سماعها وبعد سماعها
بس اعمل ايه...ربنا يرحم ضعفى...
واشكرك على كل كلامك الجميل وارجوا ان لاتزعلى منى....


بنتى الغاليه ميمى
والله مش بنسى اى حد من اولادى الغاليين
ودا بيرد على سؤالك
لان انتوا غاليين عندى قوى قوى...واجمل شيء انى افتح المدونه الاقى حبايبى بيسئلوا عليا
ولما اكلمهم الاقيهم يردوا بكل حب وحنيه
واصبح وقتى مليان مابين العمل وقراءة القرءان والحديث اليكم ....وبتمنى انى انفعكم كأم طبعا واكون ليكم نور على الطريق
واكون مؤثره فى حياتكم بالحب والحنان والتوجيه دائما للافضل فى كل شيء

وادينا اهو بنتكلم اليومين دول عن الصيام وانى بتمنى اننا نفضل على طريق محبة الله بالصيام ايا كان وقته حتى رمضان المقيل باذن الله
ويارب نكمل مع بعض على قد مانقدر ويعيننا ربنا.... قولى امين




حياة بلا عنوان
معلش اتاخرت فى الرد ...بس معلش ياريت تعزرونى لانى كنت بس بخلص ختمة قرءان للاسف انى مالحقتش اختمها فى اخر رمضان
وكمان رجعنا للشغل وكنت باجى تعبانه لانى كنت بصوم من غير سحور
كسل بقا نعمل ايه
وربنا يتقبل منا ومنك صالح الاعمال




ايوش الجميله والحبيبه والغاليه...واللى متعرفش انا بحبها قد ايه وهى غاليه عليا قد ايه
وهى لو تعرف ماكنتش يجيها لا زهق ولا اكتئاب ولا نرفزه
يابنتى يا ايوش..... انا قرات اخر موضوعاتك ووجعتنى جدا... لدرجة مقدرتش ارد عليها لانى انفعلت جدا منها ومنك
ولانى حسيت ان ايمانك مازال فى بداية الطريق
وكنت هارد عليك رد قوى....بس خفت تزعلى منى وتبعدى عن مدونتى
وانتى متعرفيش انتى قد ايه غاليه عليا... لانك من اول البنات الجميله اللى كلمتها واللى عرفنى عليها ثندر ابنى البكرى
ومش هاقولك حاجه غير حاولى تقرأى سورة نوح
واعملى بما فيها....وان شاء الله ربنا يفرج همك ويرزقك بكل خير ...اللهم امين

وبعدين انا اول مره اعرف ان ليكى مدونه اخرى...فشكرا على التنويه



مستر حازم
اشكرك...مش عارفه قد ايه
بس الكلام ده كتير قوى قوى عليا
وكل اللى اتمناه انى اتقدم بما يرضى الله
فكل انسان على نفسه بصيره...والكلمه امانه
فارجوا الله ان اكون ممن يأدوا الامانه على خير...
ويسعدنى ان اكون من زوارك واشكرك جدا



جيجى وورلد
زورونا تجدوا مايسركم....هههههههههههههههه
دا اقل واجب انى اشكرك على زيارتك لى
وربنا يعينا على الصيام والتقرب الى الله بكل مايرضيه عنا




احمد((الهامى)))
لا ماينفعش الغياب ده طبعا....هههههههههههههه
بس بفرح بسؤالك عنى وبفرح بالقرب اللى بينا....وجميل قوى انك رديت عليا اول ماكتبت ليك تعليق عندك
بجد التواصل ده بيذدنى حبا لكم
بس سامحنى شويه يا احمد انا مش قدكم ...انتوا شباب ..ربنا يديكم الصحه
لكن انا على قد حالى ...وكمان يا احمد ومش هاخبى عليك ...ودا لانى بحبك قوى وبعزك جدا جدا
انا بوصى نفسى وبوصيك بان تصلى النوافل وتقرا من القرءان ماتستطيع كل يوم
صحيح انا بصلى وانا قاعده ..لكن دا بياخد وقت وجهد منى .. بعدها بلاقينى مش قادره اقعد على الجهاز علشان اكتب حاجه فمعلش اعذرنى يا احمد وسامحنى ...ووالله بحاول ماتاخرش عليكم
وعلشان كدا انا كتبت اول الموضوع.....وياريت ماحدش يزعل من طريقتى الجديده فى الرد على التعليقات



عاشقة الاحزان
منوره دايما وفى اى وقت يا ايناس



طالبة الفردوس
اشكرك جدا وربنا يتقبل منا ومنك صيام الايام السته والاتنين والخميس والايام القمريه كمان
وياريت تنورى عندى دائما باذن الله



لو عرفوه هايحبوه
يشرفنى ان اقرأ عن سيدى وحبيبى ورسولى واعظم من خلق الله صلى الله عليه وسلم
واشكرك لدعوتى لااجمل المدونات

والى لقاء وموضوع جديد ان شاء الله

ماحدش ينسى صيام الست الايام البيضاء

سلام الله عليكم ورحمة الله وبركاته

بداية كل عام والجميع بخير

واسمحولى انى ارد على تعليقاتكم هنا ......واشكر جميع من هنأنى بالعيد
وخصوصا صاحب التهنئه السريعه جدا..... حياة بلا عنوان
وطبعا بنتى وحبيبتى.... ايناس
واختى الغاليه ...مونليزا اللى وحشتنا شهر بحاله واللى صبرنا على بعادها انه شهر رمضان بس
وابنى البكرى ...ثندر اكبر الابناء ....وبشكر ابنى الغالى احمد....بشكره جدا جدا وكمان جدا لانه كتبلى ر تعليق ثندر بالعربى...بجد كتر خيره لانى ريحنى من تمقيق عينى علشان اقرا ماكتبه ثندر
وبدعوا لثندر ياخد اجازه ويرجعلنا يالسلامه وعموما كتر خير كمبيوتر الشغل اللى بيكتب بالانجليش
وربنا مايحرمناش من تواجدك معانا بكل اللغات هههههههههههههه
وبعدين يا احمد هو انا كل مره انسى اسم من اسماء حبايبى تفضحنى كدا على الملأ
ياعم انا مش ناسيه يويو ولا ااقدر انساها
كل الحكايه انى تداخل اسمها عندى مع اسم ميمى واعتقدت انهم اسم واحد
ولكيويوو فى قلبى وماقدرش انساها
وطبعا بشكر بلو ويف .....وجيجى وررلد
ومنساش محمد غاليه المتواجد صاحب الواجب الدائم
وكدا كنت هانسى ميمى المره دى بس مش هاديك فرصه يا احمد
طبعا بشكرك جدا يا ميمىوعقبال كل سنه نيجى ونروح عند بعض نهنى ونعيد وخصوصا عند احمد ويويو
واشكر اكيد ويارب مايغبش علينا
وهمس الاحباب منتظرينك فى عيلة الرايق لانهم وحشونى قوى
وسلام ضرورى لهمس جدا
وطبعا انا مش ناسيه الناس اللى بحبهم وماجوش لغاية دلوقتى وهما(((( فكره من الزمان ده )))
وايوش ....رجعت تانى وقفلت التعليقات لناس بذاتها .....وانا مش زعلانه لانى هاكتب لها هنا كل اللى نفسى ااقوله ولانى بحبها ..بدعيلها ربنا يحققلها كل اللى تتمناه وبقولها والله دعتلها وربنا بقا عليه الباقى
وكمان ابنى حماده عفشه....ربنا يرجعهولنا بالسلامه ونلاقيه عندنا فى كل المدونات


وبعد كل الكلام ده
دعوه لصيام الست البيض
واحنا لسه سخنين ولسه بخير رمضان وتقواه
وربنا يجمعنا دايما على الخير

والى اللقاء

كل سنه وكــــــــــــــــــــــــــــــــــــل الحبايب بخير

سلام عليكم

مش عارفه ااقول ايه
بجد العيد فرحه...وخصوصا لما نلتقى بعد غياب
وانادى كل واحد من حبايبى باسمه
واقوله كل عيد وانت طيب

وبقول من هنا انى هارد على تعليقات حبايبى هنا علشان كلكم وحشتونى ..وحشتونى وحشتونى
واول حاجه نقولها
سلام مربع كبير قوى قوى قوى لاول10 متصلين....قصدى معلقين....وممكن نديهم تعليقين هديه بمناسبة سرعة الاشتراك فى التعليق

والله بعوده الايام يا ولاد
بجد ...هانرجع بقى لمين هايمشى ومين زعلان ومين زهقان ومين اتجوز ومين غضبان
ومين غايب ومين فرحان
ومين مش سامعين صوته ومين هربان

بجد وحشتونا وعايزين نقرا من جديد كل جديد
وعايزين نكتب عن تجربتنا وفايدتنا من رمضان
عايزين نكتب عن اصلاح عيوبنا ...ونشجع بعضنا اننا نستمر طول العام كدا لغاية رمضان اللى جاى
ونقابله واحنا احسن من السنه دى

يلا بقى كفايه كدا ...هو هانبدأ مواعظ من اولها
رمضان خلص والعيد جه...........والعيد ايــــــــــــــــــــــــــــه؟؟؟؟؟؟؟؟؟؟؟
العيـــــــــــــــــــــــــــــــــــــد فرحـــــــــــــــــــــــــــــــــــــــــــه
العيد على فرحه على كل حبايبى
ثندر..واحمد.. وايوش .. وامة الله .. وايناس .. وطوبه دهب وفضه ..و الطائر الحزين .. وحنين ..والرايق... واليس فى بلاد العجائب...
واسير الغربه..
وميمى... وورده ....وفكره من الزمان ده ..وجيجىورلد..ونوارة..وبلوويف...وحماده عفشه...وجارة القمر..واحمد الصعيدى..واحلام حقيقيه..وهناء...وبدراوى...وبستان الحب...ونعكشه...واكيد...وشجرة الدر ...واه وكفى..ومحمد غاليه...وهمس الاحباب..ونهر الحب...ولينكادا...وقلم رصاص...وعابرة السبيل...وروفى...والفقيره الى الله ام البنات...وكلمات من نور..والقدر وانا...وبندقه.... شجرة الدر..ونهر الحب .. والمعتصم...وبيرم التونسى ...ودكتور على خميس...وكاتب مصرى...وحياه بلا عنوان...وبسمه صلاح...وكوكى...ونورهاتى..وعلياء...ومدونة طعم البيوت... وادهم... وادم...

بصراحه يعنى كل كل كل اللى دخلوا مدونتى وكتبولى ولو كلمة واحده
واسفه لو كنت نسيت اى اسم لانى برضه بسلم عليه

بجد انا طالعه من رمضان وانا نفسى اخد كل العالم فى حضنى ...........فعلا الحمد لله حاسه ببرد وسلام مع نفسى وقلبى والعالم
احساس براحه مريحه سعيده..
اللهم لك الحمد والشكر

وبعدين بصراحه بقى ومن غير زعل
انا هاسيبكم يومين تلاته...اروح اعيد على بنتى لانى مرحتلهاش طول رمضان
يلا بقا انا مارضتش اروح الا بعد ماعيد عليكم الاول
وافرحوا وزأططواعلى مارجعلكم
يلا اشوفكم بخير
وكلوا واشربوا ولا تسرفوا
وبالهنا والشفا
وهاتوا حته
طيب سندوتش
طيب كحكه واحده
بجد مش قادره اشبع من الكلام معاكم...
بس علشان الحق اكلة الرنجا مع بنتى
اتفضلوا معانا
سلام عليكم...اصلى رغاية قوى
باى بـــــــــــــــــــــــــــــــــــــــــــــــــــــــــــــــــــــــــــاى

بعوده الايام..وعيد سعيد عليكم

السلام عليكم ورحمة الله وبركاته

كل عام وانتم بخير....عيـــــــــــــــــــــــــــــــــــــــــــــــد سعيد عليكم
وعلى حبايبكم .. وقرايبكم .. واصحابكم .. وجيرانكم وعلى كل اللى تحبوهم ان شالله تكون قطط احمد حتى!
حبايبى ..جاء رمضان ...وانقضى رمضان
ونرجوا ان يتقبل الله منا صيامنا وصلاتنا ودعائنا..اللهم امين
عدى رمضان..مش عارفه ااقول ايه
عدى وكأنه حلم
بدعى ربنا انى اكون صمته حقيقى...وانى اكون قمته حقيقى..وانى اكون فزت بيه حقيقى
بدعى ربنا يسامحنى على زلاتى فيه..
انا فعلا انسان ضعيف..حاولت على قد ماقدرت انى ماغلطش..وانى ماتخاصمش مع حد...وانى ماتفرجش على التلفزيون
لكن برضه اغلقت التليفون فى وش حد من قاريبى استفزنى وحاول يغلط فيا...ماستحملتش...وبدل ما اقول انا صايمه...للاسف ثأرت لكرامتى بغلق التليفون فى وشه وحتى الان لم نتقابل سويا لا بالتليفون ولا وجها لوجه
ربنا يسامحنى
لكن الحمد لله مقابل ذلك...كلمت ناس تانيه مخصمانى ..وسلمت عليهم ودعتهم للافطار ببيتى...لكن اعتذروا...وانا مالى ...الحمد لله عملت اللى عليا
والحمد لله والله كان لوجه الله تعالى

اما التلفزيون فربنا يرحمنى ويرحم جميع الصائمين
حاولت .. بجد حاولت بس لم يسلم الموضوع من مسلسل على الفطار بتاع عصابة بابا وماما
وبعدين مسلسل ونيس واحفاده ودا علشان الفايده والعايده اللى منه(((كلام بنضحك بيه على نفسنا)))
ومايمنعش من مسلسل كريمه كريمه بعد التراويح ...علشان بقى نضحك شويه قبل النوم...
ماهى ساعه لقلبك وساعه لربك....استغفر الله العظيم...
وكمان مره نعدى على لعبة الحياه...ومره على فيش وتشبيه...ومره على حيلهم بينهم كمان وكمان
يعنى محرمتش نفسى يعنى مع انى كان نفسى احرمها جامد من اى مظاهر دنيويه...
بس هاقول ايه حاولت والله
وتصدقوا ماحصليش حاجه والحمد لله وقدرت اصوم وماجليش فقـــــــــــــــــــــر مسلسلات والحمد لله ولا جالى انيميـــــــــــــــــا برامج اعوذ بالله

على العكس تماما والحمد لله.. اصبت براحة البال وهدوؤ الاعصاب..وشعرت بسعادة القرب من الله
الحمد لله قمت بقيام الليل اكثر الاوقات ...وادعوا الله ان يتقبله منى ويتقبل دعائى لى ولغيرى
واجمل شيء كمان كان قراءة القرءان يوميا فى الشغل وفى البيت وفى التراويح وفى القيام
بجد احساس رائع وجميل بلقرب من الله وانى فى معية الله فى كل لحظه
بدعى ربنا انى افضل كدا لبقية عمرى
بجد احساس رائع مش قادره اوصفه بس كنت حاسه انى مش عايزه حاجه من الدنيا دى خالص الا انى اشوف ربنا واقبله
ياه ياه .. بجد الصيام والقيام وقراءة القرءان دى نعمه كبيره كبيره كبيره من ربنا علينا ...ربنا مايحرمناش منها ابدا

بس كنت زعلانه برضه...لانى مش بقدر اسجد على الارض...من تقل جسمى ووجع ركبى..ودعيت ربنا يشفينى وكل سنه بدعى ربنا..بس نصيبى كدا......... الحمد لله على كل حال.....

وكمان زعلانه من اللى بيحصل بينا وبين بعض...هو يعنى مايحلاش الخناق الا فى رمضان...ليه مش كل انسان يقول :: نتسامح احسن..ليه مش كل واحد يخاف على صيامه..ليه مش كل واحد يحب الخير لغيره
بدعى ربنا يصلح حالنا ويبعد عننا الشيطان ويهدى نفوسنا ويملا قلوبنا بالايمان .....اللهم امين

انا بجد هاحاول فى اليومين اللى باقيين دول اتصل بقريبى اللى غلط فيا وادعوه على الفطار عندى وبقلب والله... وربنا يقدرنى ويقوينى ومافيش حاجه تمنعنى (((يعنى اتلكك بيها ))) يارب قدرنى على قهر غضبى... وعلى ارضائك بكل روحى وجوارحى يارب ...يارب يارب
اعمل ايه بس نفسى ربنا يتقبل صيامى كله وعملى كله ...يارب اعنى على حسن عبادتك واعتق رقبتى من النار ووفقنى لرضاك

الحمد لله... ربنا يعيد علينا رمضان المقبل بالخير ويتقبل منا رمضان هذا خير تقبل ...واكون رزقت بليلة الـــــــــقدروانا والمسلمين جميعا يارب..لانى نفسى فيها قوى قوى
ولانى معرفتش ليها اى امارات بصراحه ...لان العمارات حواليا تغلق علينا ابواب السماء ولان امكم ساكنه فى الدور التانى..مبعرفش اشوف لا سماء ولا حتى سحابه معديه
وكما مابخرجش الصبح بدرى...يبقى هاشوف الشمس ازاى وهى بيضاء بدون شعاع
لا واللى زاد وغطى بقى عندنا كلبين ..واحد فى عمارتنا وواحد فى العماره اللى قدامنا
وطول الليل والنهار هاتك يا هو ..هو ..هو ..هوا

بس سبحان الله امبارح كانوا عاملين زى اللى يكونوا مخنوقين ومش قادرين يطلعوا صوت...ووالله بعد اذان الفجر لقيتهم وكأنهم اتفكوا من عقالهم ..وهاتك يا نباح بصوت فظيع وصريخ ..حسيت كأن حد كان مهددهم وبعدين اطلق صراحهم...الغريبه فى الامر انهم من عمارتين مختلفتين ... عموما مش بقول غير سبحان الله
والحمد لله كمان النهارده الجو جميل والشمس مش حاره قوى
بس دا مايمنعش انى سمعت انها خلاص عدت من ليلة 21 واللى يقول لا دى كانت ليلة 23
وهكذا....بس سمعت الشيخ مبروك عطيه بالامس وهو بيقول ان لكل انسان ليلة قدره
ادعو الله ان نولها جميعا ويتقبل دعائنا جميعا بامر الله
فلله فى كل ليلة عتقاء من النار.... اللهم اجعلنى منهم انا وزريتى وجميع ابنائى هنا وهناك وجميع المسلمين يارب
اللهم ربنا تقبل صالح اعمالنا وارزقنا العتق من النار
وكما كنا نقول فى اول رمضان ..نقول دلوقتى
صوم مقبول باذن الله
وعيد سعيد على الجميع يارب
وبعوده الايام

دعوه بظهر الغيب

الســــــــــــــــــــــــــــــــلام عليكم


وبعودة الايام
اهلا بيكم
وحشتونى والله
ولانكم وحشتونى قلت ارغى معاكم شويه النهارده لانى كان عندى عزومه ...ويتبع العزومه اكل كتير ماتكلش طبعا
وبما انى عندى الاكل اللى يكفينى اسبوع فقلت استغل شوية فراغ فيما هو مفيد
وبعدين ايه
دخلت ابحث عن اصحابى واخواتى وابنائى الاعزاء
من هنا لهنا لقيت مدونة طعم البيوت
اول مره ادخلها بس شدنى العنوان ((ليلة القدر ))

بجد جزاه الله كل خير البدراوى ...وهذا اسمه
اما قلبه فاعتقد انه من ذهب
ليه؟
لانه لم يفكر فى نفسه فقط
بل انه عندما فكر فى ليلة القدر ومافيها من اجابة الدعاء باذن الله
فكر فى الناس كلها
فكر وقال ليه تدعى لنفسك وبس....ليه ماتدعيش لغيرك باللى نفسه فيه

ياسلام على القلوب الطيبه البيضاء النقيه
وعجبتنى الفكره قوى
بجد انا طول عمرى يجى ليلة القدر ادعى لنفسى ولولادى واستغفر لاابى وامى وادعى بصلاح الامه .........وخلاص
لكن فكرة بدراوى جميله جدا
وهى ايه؟؟؟؟
ان كل واحد يكتب فى مدونته هو نفسه فى ايه يتحققله ......وكل اللى يدخل عنده هايعرفها طبعا
يقوم بقى يتذكرها او يحتفظ بيها فى(( نوتة الدعاء))....ودى تضم كل الدعاء لجميع الاصدقاء...ومن ثم يدعوا بها ان شاء الله فى ليلة القدر

وبذلك يكون دعوتك بظهر الغيب لاخيك مستجابه باذن الله

ودا مايمنعش انك طبعا تدعى لنفسك وتجتهد فى الصلاة والدعاء فى العشر الاوخر كلهم
لان ربنا معانا فى كل وقت

مش نلاقى حد بقا رص يجى 100 دعاء هههههههههههههه...............ونام هو وسابنا احنا بقى نقوم بالواجب
طبعا انا بضحك معاكم....وعارفه ان مافيش حد هايعمل كدا....لاننا بنستنى الايام دى من السنه للسنه
لانها هديه من ربنا ...والهديه غاليه جدا...وواهب الهديه سبحانه ليس كمثله شيء
فلازم اننا نكون على قد مانقدر وربنا يوفقنا نعمل على استحقاق هذه الهديه الغاليه ونحافظ عليها ومنضيعهاش فى السوق...ولا عزومه...ولا مسلسل....

وكمان ماننساش اننا ندعى لااخواتنا المرضى وخصوصا اللى فى العنايه المركزه او اللى فى غيبوبه ....قصدى يعنى اللى هما غير مدركين لمرور الايام ولا نوعية هذه الايام الجميله المباركه
شفاهم الله وعافاهم

طبعا انا مش منتظره اى دعوات لابنائى الاحباب علشان ادعيلهم بيها
لانى من الاول قلت انا متعوده ادعى لبناتى وانتوا كمان دخلتوا تحت مسمى الابناء
وبقى عندى بنات وولاد اعزاء غاليين مش بنساهم ومن غير ذكر اسمائهم ....هما عارفين نفسهم وفى القلب حبهم
وان شاء الله لو الفكره عجبتكم او اللى عجبته هاينفذها باذن الله ربنا هايوفقتى انى اروح عنده واعرف مايتمناه وادعيله بيها دا زياده على اللى فى قلبى ليه
بس برضه يرجع الفضل لبدراوى ...وان شاء الله جميع دعائنا هايكون فى ميزان حسناته

ودعائى لااحبابى
بان يكون العتق من النار جزائكم
والجنة مثواكم

وما أحسن وافضل من دعاء امنا خديجه رضى الله عنها وارضاها
اللهم انك عفــــــــــو تحب العفـو فاعفـــــــــو عنى
اللهم امين


ملحوظه
بحبكم كلكم فى الله
اللهم بلغنا جميعا ليلة القدر واعنا على ذكرك وشكرك وحسن عبادتك
ورمضان كريم

الشهر بيجرى....نلحق نفسنا

السلام عليكم ورحمة الله وبركاته

رمضان كريم........الله اكرم

كل عام وانتم بخير

حاولت ان أقرا موضوعات فلم استطع
حاولت ان ابعد فلم استطع
أخذنى الشوق اليكم
فجئت اهديكم سلامى وتحياتى
جئت اتلمس اخباركم وماذا تفعلون
ولانى اليوم اجازه ...قلت اكتب اليكم

اليوم بيعدى بسرعة البرق
لوانا فى الشغل بيعدى من غير ماحس ...يادوبك ارجع من الشغل على صلاة الظهر للعصر
ومن حجرة النوم للمطبخ
ومن الافطار لصلاة المغرب ثم العشاء والتراويح فى البيت طبعا
ثم النوم والاستيقاظ للسحور
ثم صلاة ركعتين تهجد ...ثم الشفع والوتر
ثم النوم للاستيقاظ للذهاب للعمل
وهكذا
واصبحنا فى اليوم السادس من رمضان
الله اكبر ...عدى اسبوع تقريبا...
ماذا فعلنا لاانفسنا
ماذا استفدنا...كم اقتربنا من الجنه
انها تقول الا من مشمر
يـــــــــــــــــــــــــــــــــــــــــــــا ه كم انا حزينه
انه العمل الذى ياخذ منا الوقت والجهد بلا عائد
نحن فى وزارة التربيه والتعليم...لا يوجد طلاب ..لايوجد عمل بالمعنى الحرفى للكلمه
اننا بطاله مقنعه
الناس فى اجازات....ولكن يصر رئيس العمل على االذهاب للعمل
نذهب.... والحمد لله اقضى الوقت فى قراءة القرءان
ولكن بلا خشوع ....احاول التركيز مابين الحديث عن المسلسلات والبرامج الست كوم
احاول الفهم مابين صينية الرقاق وبين الخشاف والارز بالمكسرات

وان تحدثت او طالبت بالخشوع
فانا المستشيخه او اللى مزوداها حبتين
ياختى دا شهر واحد فى السنه
ياختى مانتى بتقرى القرأن كل يوم
ياختى دول هما ساعتين وهانروح للشقى فى بيوتنا

سبحان الله ....فى وجهات النظر

انه شهر واحد صحيح...بس مش زى اى شهر
شهر واحد ...بس الجزاء فيه باضعاف مافى الشهور الاخرى
شهر واحد لازم ولا بد وحتما نحاول فيه نقترب من الله
لماذا لاناخذ اجازه للعباده...لماذا لا نعطى انفسنا فرصه للتركيز فى التقرب لله
لماذا هذه العقول البروقراطيه....نحن نعمل والحمد لله...ولكن فى افضليه للوقت...رمضان لايعوض...اللهم تقبل منا واعنا على حسن عبادتك
وبارك لنا فى وقتنا
انا بكلم ربنا ...والله بكلم ربنا لانى ماليش غيره....وهو وحده اللى قادر يساعدنى
يابخت اللى ربنا يوفقه فيه للعباده

اللهم اجعل لسانى رطبا بذكرك
اللهم بلغنا ليلة القـــــــــــــــــــــــــــــــــــــــــــــــدر وانت راض عنا
اللهم وفقنا لقيامها
اللهم وفقنا لحسن عبادتك
اللهم ارحمنا فى هذا الشهر الكريم من القيل والقال وكثرة السؤال
اللهم اجعل كل ابنائى هنا وفى بيتى منك قريبين ...وفى العباده رائعين
وبصلة الارحام موصولين...
ومن عليهم برضاك وارزقهم وايايى حسن العباده وحسن الدعاء وحسن الصيام والصلاة

اللهم اجعل القرءان حجة لنا لا علينا واجعله شفيعا لنا يوم العرض عليك
واكرمنا بالقرءان والبسنا حلل القرءان وعلمنا ماينفعنا وانفعنا بما علمتنا وذدنا علما

احبائى ابنائى
انه شهر القرءان
انه شهر ليلة القدر
اللهم وفقنا وارزقنا وبلغنا ليلة القدر
واعنا على قيامها والدعاء فيها
وارزقنا الرحمه والمغفره والعتق من النار
اللهم اعطنا ماانت اهلا له وليس مانحن اهلا له

والى لقاء
ورمضان كريم