الثلاثاء، 6 أكتوبر، 2009

بحبـــــــــــــــــــــــــــــــــــــــــــــــــك يا مصر


السلام عليكم ورحمة الله وبركاته

حبايبى واخواتى
انا ماكنتش جايه النهارده
لكن الحب اللى قرأته عند جيجى وورلد....فجر الحب الكامن فى القلب لمصر
جيجى قالت كلام فى عشق مصر
معتقدش انى اعرف اقول زيها
لكن انا عندى زيها وحاسه بحبها...ايوه بحبها ...بحب بلدى
بحبك يا مصر
بحبك يابلدى وانتى فعلا امى
بحبك يابلدى وانا ماشيه تحت شمسك...بحبك يابلدى وانا عايشه جوا ضلك
بحبك بلدى وراكبه المترو بتاعك
بحبك يابلدى وانا بشم هواك على ضفة نهرك ونيلك
بحبك يابلدى
بحبك وبحى كل عسكرى استشهد على ارضك وارتوت الرمله بدمه
بحى رجاله دفعوا دمهم علشان احنا نعيش
رجاله كان ليهم تمنهم ساعاتها
رجاله فيهم اللى عايش...اقل واحد فيهم عنده يجى 50 سنه دلوقتى
بجد ببوس ايده ورجله

وفينا اكيد من ابنائهم اللى عايشين بيناوبيقرأوا مدوناتنا
بقولهم فعلا ابوكم بطل فعلا انتوا ابطال
انتوا تستحقوا تتشالوا على الراس..... ودى اقل كلمه نقولها لولادكم واحفادكم عليكم ... ونعترف بفضلكم علينا بعد فضل ربنا
انتوا دخلتوا على الموت برجلكم علشان تجيبولنا نصر نعيش على ذكراه ....بقالنا 36 سنه بنحكى عنه ونتمناها تانى وتالت

بحى كل ظابط ساب ولاده... واللى ساب خطيبته واللى ساب عروسته ....واللى مشافش ابنه... والى اثكلت امه وابوه باستشهاده واللى اترملت زوجته
من بعده

حواديت قراناها ..وقصص عيشناها فى ايام الحرب وبعدها ...قطعت قلبنا على ناس كان ابنهم ده هو الهوا اللى مخليهم عايشين فى الدنيا
وراح الهوا وانطفت شمعة عينهم من البكاء عليهم

ياه ياه ياه يامصـــــــــــــــــــــــــــــــــــــــــــــــــــــــر
كنا ايام الحرب نفرح مع كل بيان يتقال ...وناس تقول يابنى ترجع بالسلامه ...وناس استشهدت واحنا ولا فاكرينهم
ونقول دول فى الجنه يابختهم....
كلمه سهله كنا بنقولها واحنا قاعدين جنب الراديو نسمع البينات الحربيه
مع ان كل بيان كان معناه دم شهيد كان بيروى فرحنا بالانتصار
وكان يعلى صوتنا بالغنا ليل ونهار.....دلوقتى بنفتكرهم ونقول دول فعلا الابطال
ابطال دلوقتى وامبارح وبكره كمان
لاولاهم مكناش نقول مصر دلوقتى فى العالم ...والمونديال ...وكاس الشباب ...وتعمير الصحراء... وغيرها كمان وكمان

ياه ياه ياه يامصر
دانت ادفع فيك كتير علشان تعيشى بعزه وشرف

بس ليا كلمه لرئيسنا وحبيبنا صاحب اول ضربه جويه
يارئيسنا مصر عيزاك توقف الحراميه
مصر عيزاك تحاسب البلطجيه
مصر عيزاك تدور على الغلابه واللى عايشين يادوبك من الجنيهات ب 100
مصر عيزاك تكسى العريان بجلابيه
مصر عيزاك ترحم ولادها من الناهبين خيرها ومخبينها فى البنوك الاوربيه
مصر بتقولك كبرنا سوى وخبرة حياتنا لازم نعلمها لذرية ذريتنا اللى جايه
مصر ماينفعش يحكمها رجال اعمال كل همهم يجمعوا الثروه والمال
مصر عايزه شاب جدع وبنت جامعيه
عرفوا العرق وكلوا الفول والطعميه
ونفسهم ياكلوا الكفيار والديك الرومى مع الملوخيه
ودا مش هايجى الا من جوا ارضنا بشغل الصنايعيه
ياريس عين وزراء من ارض الحوارجيه
دول عارفين من الجعان مين العريان ومين محتاج سكن وبطانيه
ياريس انت المسئول وانت اللى ربنا اللى هايحاسبك على مصطفى وحسين وهنيه
ياريس انت الراعى وكلنا عندك رعيه
اامر تلاقى بدل الوزير 100
وكل سنه وانت طيب ياريس
يا صاحب اول طلعه جويه


علشان نفسى اقول شكرا لكل بطل
بارجوا لو كان مابينا ابن بطل او حفيد بطل ياريت يعرفنا بنفسه علشان نحيه ونقول شكرا من قلبنا
ودا اقل واجب علينا نقدمه فى يوم فاكرينه كلنا
وشكرا
والى اللقاء



هناك 37 تعليقًا:

الفراغ يقول...

لانى بحب بلدى ونفسى اشوفها من نصر الى نصر
هاكون اول تعليق
واول يامصر نفسى اشوفك انت وبلادى العربيه ماسكين ايد بعضكم جوا المسجد الاقصى
دا امل ا
ان شاء الله هايعيشه احفادى
لانهم هما اللى هايحرروه باذن الله
وان غدا لناظره قريب

حياه بلا عنوان يقول...

السلام عليكم ورحمه الله وبركاته
البوست جميل بحبك يامصر
الحمدلله الكل بيحب مصر والاحسن الحمدلله اننا احسن من غرنا بكتير قوى
فالحمدلله بنحب مصر قوى
تحياتى

اسماء واحلام فى وجدانى يقول...
أزال المؤلف هذا التعليق.
اسماء واحلام فى وجدانى يقول...

بسم الله الرحمن الرحيم

وَإِذْ قُلْتُمْ يَا مُوسَى لَن نَّصْبِرَ عَلَىَ طَعَامٍ وَاحِدٍ فَادْعُ لَنَا رَبَّكَ يُخْرِجْ لَنَا مِمَّا تُنبِتُ الأَرْضُ مِن بَقْلِهَا وَقِثَّآئِهَا وَفُومِهَا وَعَدَسِهَا وَبَصَلِهَا قَالَ أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ اهْبِطُواْ مِصْراً فَإِنَّ لَكُم مَّا سَأَلْتُمْ وَضُرِبَتْ عَلَيْهِمُ الذِّلَّةُ وَالْمَسْكَنَةُ وَبَآؤُوْاْ بِغَضَبٍ مِّنَ اللَّهِ ذَلِكَ بِأَنَّهُمْ كَانُواْ يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ذَلِكَ بِمَا عَصَواْ وَّكَانُواْ يَعْتَدُونَ61البقرة)


قال صلى الله عليه و سلم (ستفتح عليكم بعدى مصر فاستوصوا بقبطها خيرا فإن لكم منهم ذمه و رحما ) رواه مسلم.



و قوله صلى الله عليه و سلم (إذا فتح الله عليكم مصر فاتخذوا بها جندا كثيفا فذلك الجند خير اجناد الأرض ، قال أبو بكر لم يا رسول الله؟ قال لأنهم و أزواجهم فى رباط إلى يوم القيامة ).

اسماء واحلام فى وجدانى يقول...

بحبك يا مصر

وبيتى فيكى رغم حجمه

الا انه فى عينى قصر

وبنتك حبيبتك

عروستك انيستك

دى حتة منى ومنك يا مصر

فى صلاتى دايما باقولك يا رب

وصوتى اعلى من اى صب

يزلزل عدوك فى كل درب

ودرب ليه

د انا اروحله بيته

واعمله فيها

مجنون بضب

آيوشة يقول...

السلام عليكم ياماما وانا كمان بحب مصر والبوست اللى عملته مكنش تسفيه ولا محاولة منى تقليل انتصارنا فى اكتوبر لكن انا واحدة من الجيل الجديد زهقت انى كل سنة نفتكر العزة والنصر فى يوم واحد صدقينى ياماما الشباب دلوقتى مش بيحب مصر زى الاول والخوف انه يجى يوم ويبعوها واللى خلى اللى عاصروا الفترة دى وحاربوا بنفسهم بعوها
انا بابا حابر فى 73 وجاتله حالة نفسية كمان من المناظر اللى شافها وصديقه استشهد فى الحرب انا عمرى ما هقلل من شرف الابطال واللى عملوه فى الحرب بس نفسى نبطل نبكى على الماضى ونفكر فى الحاضر احنا لسه محتلين ومش اى احتلال فى اشد من احتلال الكرامة والروح

آه وكفى يقول...

اليوم ده بجد جميل اوي وبتمنى كل الشباب يبئو ولو ربع رجالة اليوم ده

GiGi world يقول...

الله عليكى
انا بجد حاسه برعشه غريبه فى كيانى كله من الكلام اللى قراته
روعه الكلمات مش ممكن وطبعا لانها فى حب مصر
بجد فى ناس بيحبوا بلدهم زي المصريين
اشك
انا بحبها قوى وبعشق كل كلمه اتقالت فيها لانها من جوا قلبنا
بحبك يااغلى المدونين

غير معرف يقول...

ثقافة الهزيمة .. ألوان‏-

وهنا أود أن ألفت نظر السادة القراء والمسئولين أيضا أن الزبالة فى حقيقة الأمر ثروة كبيرة لو أحسن أستغلالها كما تفعل الكثير من الدول المتحضرة و أنتهزهذة الفرصة لأقدم نموذج من أوروبا يجب على مصر أن تحتذى به و هو من العاصمة النمساوية فيينا التى تقدم صورة نموذجية لنظام صديق للبيئة فى مجال جمع وأعادة تدوير النفايات بالأضافة إلى أستغلال النفايات كمصدر رئيسى من مصادر أنتاج الطاقة البديلة النظيفة...

باقى المقال يوجد ضمن مجموعة مقالات ثقافة الهزيمة فى الرابط التالى:

www.ouregypt.us

الفراغ يقول...

حياة بلا عنوان
اشكرك
على ردك الجميل بالحب لمصر
ويارب نفضل دايما نحبها وتحبنا

الفراغ يقول...

اسماء واحلام
طول عمر مصر بتاعتنا كلنا وعمر ولادها مافرقوا بين مسلم ومسيحى
متربين على ارضها وبنلعب مع بعض وبنعزم بعض فى المناسبات
حتى انى عمرى مانسيت اصحابى بتوع الابتدائى لغاية دلوقتى
وفى الحرب كان دم المسلم والمسيحى واحد
وربنا يحفظ مصرنا يارب لينا كلنا



كلامك دايما يا احمد بيدخل القلب
وفعلا احنا بيتنا رغم صغره بيسعنا لانه جوه مصر
هو احنا لينا غيرها
يسلم قلمك وفكرك ومشاعرك

الفراغ يقول...

ايوش
مين قال انك مش بتحبيها
بس انت عايشه باحباط كبير قوى قوى
ومين دول اللى هايبيعوا مصر
ولما يبيعوها هايشتروا ايه
محدش بيشترى وطن يابنتى وبفرض باعوا وطنهم
يبقى احنا مخسرناش كتير
عارفه الوطن دا زى العيله والعشيره
يعنى لو جرالهم حاجه او جالهم مرض خبيث
هانبيعهم ولا نتبرى منهم
ابدا ...هانصبر عليهم وندعيلهم ربنا ياخد بايدهم
هو كدا يا ايوش يا جميل
مصر فى محنه...مصر صحيح تعبانه واحنا صابرين وبوسى ومنه ومعالى زايد كمان...هى مالهاش نفس ولا ايه
ياشيخه اضحكى
دانتى طلعتى بنت بطل
اضربلك تعظيم سلام
بكره تتجوزى وتخلفيلنا صلاح الدين
هو دا اللى هايرد اعتبار مصر لااهلها
قولى يارب
وادعى لمصر يفك كربها

الفراغ يقول...

اه وكفى

هو فعلا يوم جميل وذكرى حلوه
بس فعلا انتو اللى هاتصنعوا الرجاله
شدوا حيلكم يا شباب

الفراغ يقول...

وانا كمان بحبك يا اغلى البنات
ويارب يارب نشوف مصر فى اعلى مكان بس مش فى الكوره ولا فى التمثيل والمهرجانات
عايزين مصر تبقى ملكه على عرش الصناعه
والزراعه والتكنولوجيا
دا حلم امتى يتحقق؟؟؟؟؟؟
يارب خد بايد مصر واشفيها وولى امرها للى يحبها ويحميها
امين يارب العالمين

وخد برضه اللى نهبينها
ولانه مش هاينفعهم يوم العرض عليك
قولى يارب يتعالجوا بيه هما وزراريهم

الفراغ يقول...

غير معرف
والله يابنى كلنا عارفين ده
وبنشوفه ليل ونهار فى الفضائيات

طيب ليه محدش من رجال الاعمال يتولى الموضوع ده ويشتغل فيه ..معرفش
فالحين يبنوا عمارات ومدن جديده مش لاقيه اللى يسكن فيها
وخلوا الميه بقت شحيحه
واخرتها
الامل فيكم
تعالى انت وغيرك واتبنوا انتوا المشروع يمكن المصريين كلهم يدعولك بالصحه لما يشوفوا مصر نضفت على ايدكم

فكرة من الزمن ده يقول...

روعة بجد تسلم ايديك
واعتقد انه كل الكلام ده هو عارفه لكن يمكن يغير حاجة وبنضم صوتنا ليكي

تسلم ايديك كمان مرة

فكرة من الزمن ده يقول...

والله كان الكلام فيه موسيقى جميلة
حقيقي جميلة

نهر الحب يقول...

السلام عليكم ورحمة الله وبركاته
كل عام وانت بخير ومصر دائما بخير
ودائما يارب متجمعين فى حب مصر وفى ظلها وفى ظل أبنائهاالأقوياء.


خالص تحياتى

نهر الحب

عابرة السبيل يقول...

"لكن انا واحدة من الجيل الجديد زهقت انى كل سنة نفتكر العزة والنصر فى يوم واحد"
"بس نفسى نبطل نبكى على الماضى ونفكر فى الحاضر احنا لسه محتلين ومش اى احتلال فى اشد من احتلال الكرامة والروح"

انا كمان من راى ايوشة
عشان كده مافكرتش حتى اكتب بوست عن اليوم ده

بصراحة الموضوع بقى سمج قوى
احنا بنحتفل وهما بيقتلو فى المسلمين فى كل مكان واهانه وزل

ما قلتش ما بحبش مصر لا بحبها
وعندى كام بيت شعر ليها لكن من كتر اللى بيحصل الواحد مكسوف نحتفل بنصر وفلسطين كل يوم والتانى بتموت

معلش
لكن احييك على الكلام الجميل

اسماء واحلام فى وجدانى يقول...

ازيك يا امى يا رب تكونى بخير دايما

انا اللى كنت عايز اقوله ان اشرف خلق الله ذكر مصر بالخير بارضها واهلها وطبعا هو خطا منى لانى مش وضحت انا اقصد ايه بالظبط من الاول

akeed يقول...

ما اجمل هذه الكلمات فى حب الوطن انها مشاعر اكثر من رائعة

تحياتى

عاشقة الأحزان يقول...

وحشتنى قوووووووووى يا غاليه يارب تكونى بخير وبصحة كويسه
ربنا يطمنا عليكى يارب

عاشقة الأحزان يقول...

وبجد تسلم ايديكى على كلماتك الاكثر من روعه

مهما نتكلم ونحكى ونقول ش هنقدر نديها حقها

كل سنه وانتى طيبه يا ست الكل
وبجد وحشتينى كتيرررررررررررررررررر

المعتصم يقول...

السلام عليكم ورحمة الله وبركاته
ست الكل
تحياتى
يارب تكونى بكل خير
ومين فينا مش بيحب مصر؟؟
مين ممكن مايحبش امه ؟؟
مين ممكن مايحبش امنه وامانه ؟؟
مين ممكن اهله ووطنه وذكرياته؟؟
لو هنتكلم عن مصر ممكن مانبطلش كلام
لان حبها فى قلبنا مهما حاولنا نبين غير كده
مهما قلنا على الفساد اللى فيها وعن الغلا وسوء المعيشه
الا اننا بعد ده كله بنلاقى حبها فى قلبنا موجود ومتربع
ومش لازم نقول الكلام ده فى يوم النصر بس
احنا لازم نفتكر حبها فى كل وقت لانه هيكون حافز لينا اننا نشتغل اكتر واكتر وكل واحد يعمل شغله ويؤدى دوره بضمير علشان نرفع من مكانتها ونحاول نرجعها تانى مصر اللى بنحبها بجد
ست الكل
تقبلى مرورى وتحياتى

mohamed ghalia يقول...

أكيد مصر هتفضل كبيرة وغالية ياماما
تحية للرجالة الى فدوها
دمتِ فى سعادة

شاب فقرى يقول...

كل سنة وانتى طيبة واضم صوتى لصوتك واقول بحبك يا مصر
تحياتى لكى
شاب فقرى

yoyo يقول...

صباحك سكر ياست الكل
يارب تكونى بالف خير وسحة يارب

هو مين فينا مش بيحبها ؟!
مين فين يقدر على بعدها ؟!
هى بس اللى تقدر تضمنا ؟!
هى اللى فيها كل الخير و الهنا
حتى لو قسيت فى يوم علينا برده بنحبها
بلدنا يا امى جميلة بس اللى بيتحكم فى الامور بيظلمها و يظلمنا معاها
بس هى برده لينا واحنا مش لنا غيرها وطن و ملجأ مهما قسيت علينا الظروف

تسلمى لينا ياماما يارب
وان شاء الله متجمعين عندك هنا على كل الحب و الخير يارب
خلاص و الله ياماما مش هاعمل احتلال كبير تانى
بس احمد هو السبب فى الاحتلال الاخير
مش ليا دعوة بقى هو اللى بدا
وانا مش باسيب حقى
هههههههههههههه

دمتى امى بالف خير وسعادة
تحياتى
يويو

Abd Al-Rahman يقول...

أحيانا أغبط كل من شهد الحرب لأنه أصبح لديه مخزورن إنتماء يعينه على حب مصر
لكن نحن الشباب كان الله فى العون لم نر فى مصر الا كل شر ، ولكنا نتمسك بحبها وسنظل متمسكين ... لكن مجهودنا جبار فى هذا التمسك
أكثر ما يؤلمنى الآن أننا إختزلنا قضية الانتماء الآن فى منتخب كرة القدم
أصبح هو علامة انتمائنا لكننا نخرب فى الملكيات العامة ، نرمى القمامات فى الشوارع ونفعل كل ماهو مضر ثم ننام قريرى الأعين مرتاحين لأننا شجعنا اليوم المنتخب ففاز
عجبى
*******
شكرا لتسليط الضزء على القضية ، كدنا ننساها

زينـه يقول...

على رفا ت الشهداء ترتفع هامه الاوطان

شكرا سيدتي

mimi يقول...

مين اللي قالك إنك
مش علي بالي
ده انتي اللي لامة الشمل
في حضنك الغالي
كلامك كله حنية
وغيّرلي كتير حالي
وخلاني أقول أشعار
مكان تعليق ... وأنا مالي

جارة القمر يقول...

ألف سلامة عليكي ياماما


مستنيين رجوعك
بيروح الشر عنك

فكرة من الزمن ده يقول...

الف الف سلامة علكي ياما ربنا يطمنا عليك يارب وترجعي بالف سلامة
اهم حاجة ارتاحي ويارب نطمن عليكي في اقرب فرصة ياااارب

حياه بلا عنوان يقول...

السلام عليكم ورحمه الله وبركاته
الف الف الف مليون سلامه على حضرتك
وترجعنا بالف سلامه ان شاءالله
تحياتى

thunder يقول...

الففففففففففففففففففففففففففففففففففففففففففففففففففففففففففففففففففففففففففف


سلامة عليكى
ياامى


ربنا يتم ويمنى عليكى بالشفاء ياااااااااااااااااااااااااااااااااااااااااااااااااااااااااااااااارب

thunder يقول...

وحياة ربنا زعلت جداااااا
لانى فعلا مقصر اوووووووووووى
اوووووووووووووووووووووووى
ويارب يمن عليكى بالشفاءيارب
وترجعى تنورى بوجود المدونه
امى العزيزة وحشتينى اوى
والله يارب ترجعى بى السلامة
دمتِ يارب بكل حب و ود وفى رعاية
وحفظ الله دائما يارب

thunder يقول...

اختى العزيزة اتمنى لو تطمنينى على صحة ماما هى عاملة اية دلوقتى وهى عندها اية وفى دكتور متابع ولا لا معه لو سمحتى بالله عليكى وحياة لااله الا الله عندك تحاولى تطمنينى بعد اذنك

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية