الاثنين، 26 يوليو، 2010

الى لقاء .....ام الـــــــــــى وداع

احبائى...وابنائى

مش هاقول اعزرونى
مش هاقول سامحونى
لكن هاقول............
هاتوحشونى

الموضوع:
هو انى معدتش زى الاول...ودى قلتها اكتر من مره
بجد...انا المره دى خدت قرار بالمعاش المبكر....
لانى فعلا انا تعبانه...حاسه
بالعجز يهزمنى
يمكن يكون احساس بانى خلصت رسالتى فى الحياه
ومعدش عندى حاجه ااقدمها اكتر
يمكن يكون عندى احساس انى محتاجه ارتاح
ودا احساس من جويا فعلا
فعلا حاسه انى محتاجه راحه بعد طول سهر وانتظار
محتاجه حنان بعد طول جهد واعباء
الحمد لله ...الف حمد وشكر ليك يا رب
فضلك عليا كتير يارب
الحمد لله اديت الرساله ووصلت الامانه ....
ودلوقتى جه الوقت انى ااقول كفايه كدا
معدش عندى رغبه فى مواصلة الكفاح ولا رغبه فى المزيد من الاعباء
بقول لنفسى :....
عيشى بقى زى مانتى عايزه
اصحى وقت ماحب وانام وقت ما احب

معلش انا اسفه....مش لازم اكمل الكلام لاخره
مش لازم اوجع دماغكم...وانا ماشيه خلاص

حا
سه انى هاريحكم من مشاكلى واعبائى
لانى هاكون هنا...ومش هنا
هاكون هنا معاكم ...بتابع كتابتكم...ومواضيعكم
وبنفس اسمى مش هاغيره
ومش هاقفل المدونه...
هاسيبها مفتوحه...لانى مش عيزاكم تنسونى وانا مش عايزه انساكم
ولا عايزه انسى الحب الجميل اللى جمع بينا
مش ممكن انسى كل اللى حبونى وحبيتهم
مش ممكن انسى ايناس .. ثندر.. ميمايا ..ورده ..جيجى(صاحبة القصص الرائعه )..احمد (صاحب اجمل شعر ونثر )
ازاى انسى... فكره ..حماده عفشه ... جارة القمر ...ام البنين...
ماقدرش انسى ولا ابعد عن مدونة ( مجداويه )رغم قصر معرفتى بيها لكنى اشعر بالقرب من منهجها وكتاباتها..
وربنا يعينا وتكمل رسالتها معانا لطول العمر
ابو همس الجميل صاحب رسالة الحب والتبرع بالدم واول من عرفنى بفرقة الضاحكون (لهم منى الف تحيه...وارجوا لهم العوده والاستمرار )
الدكتور على خميس ...الجميل بمدونته اللى كلها فوائد......
كلمات من نور..اللى حقيقى كلمها بينور القلب والطريق للتائه...ام البنات( ربنا يسعد ويقويك لسعادة بناتك )
بجد والله هاتوحشونى...ولولا شعورى بالاجهاد ماكنت مشيت ولا بطلت كتابه
ولذلك اقـــــــــــــــــــــــــول
االى لقاء..................ام الى
وداع
حبايبى
اجمل وقت انا خترته علشان اسلم عليكم
هو قرب شهر رمضان
كل سنه وانتم طيبين
ودايما بخير وتوفيق وسعاده وراحة بال

واخيرا
اقول لكل ابنائى وحبايبى
انا معاكم بقلبى وعقلى
والاميل بتاعى موجود........لو لقيت اى ابن واخ واخت سايبلى رساله عليه...
ان شاء الله هارد عليه واتواصل معاكم
لانى مقدرش اتنازل عن دور الام اللى جوايا بسهوله...ولانى بتمنى من كل قلبى السعاده للجميع
ويارب ..يا رب...يارب اكون مش مزعله حد منى
واكون عند حسن ظنكم بيا

وفى النهايه اقول :
اللهم اغفرلى ..ماقدمت وما اخرت...... وما اسررت وما اعلنت............ وما انت اعلم به منى

والى الملتقى..بمشيئة الله

لانى لا احب الوداع

الجمعة، 9 يوليو، 2010

الوقت كالسيف ان لم تقطعه .......قطعك

بجد مش عارفه اعمل ايه
الوقت بيضيع من بين ايديا
بفكر كتير ................لكن التنفيذ صعب
عايزه اعمل واعمل واعمل
لكن فين الوقت لكل دا
عايزه اقرا الجرايد ....مافيش وقت
عندى كتب كتيرنفسى أقرئها....لكن مافيش وقت
عايزه اكمل خياطة عبايات مركونه بقالها سنتين واكتر ....بس مافيش حيل ولا عين ولاوقت
عايزه اصوم.........ههههههههههههههههه
انا بعتبرها نكته
لانى السنه اللى فاتت كنت بشجع على الصيام
لكن السنه دى....مافيش قدره خالص ولا تحمل........امال هعمل ايه فى رمضان؟؟؟؟!!!!!
ساعدنى يا رب
ياترى كل اللى نفسى فيه ومش قادره اعمله....
دا من ايه
اكيد الشيطان بيضحك عليا
ومضيع وقتى ...فى ؟؟؟....مش عارفه
فى كلام فاضى
شويه تلفزيون......لا مش شويه ...دا كتيييييييييييييييييير
ومع التلفزيون بتضيع بركة اليوم
ومع الحر وزهقه بتضيع البقيه الباقيه...
طيب اعمل ايه؟؟؟؟؟؟؟؟؟؟؟
ماهو مافيش نفس ولا قوه
زهق وبس
ولا حول ولا قوة الا بالله

سلام عليكم


السبت، 3 يوليو، 2010

بحلم وانا صاحى

انا بحلم
انا انتظر تحقيق الحلم
انه حلم الالتقاء بزوجى الميت
ولكنى اعيش فى حلم دائم باللقاء
اذا انا عايشه احلم
ياترى انا عايشه ولا ميته
انا اشعر بالحياه انها تاخذنى للذكريات الجميله
انها تاخذنى لتحقيق كل ماكان زوجى يريد تحقيقه انا احقق اماله فى اولاده....... انا احبه وقلبى يدق باسمه
متى القاه.... انه حلم العمر
اجمل شيء انى مازلت احلم...وان من حقى ان احلم بهذا الرجل
انى املك حلما ....
صحيح مش بايدى انىاحققه...ولكنى متمسكه به لاخر لحظه فى حياتى
فلقد وجدت رسالة منه تقول:
تذكرينى...فالذكرى ناقوص يدق فى عالم النسيان
انى احبك ياحبيب العمر
احبك