السبت، 3 أكتوبر، 2009

زهـــــــــــــــــــــــــــــــــــــــــــــــــــــــــق

سلام عليكم ورحمة الله وبركاته

ازيكم
اكيد انا صدعت دماغكم بحكاية الصوم دى
وانتوا اصلا لسه خارجين من صيام
وانا اصلا وانا قدكم كنت مابصدق اخلص رمضان واجرى بقا العب واشترى قصص ااقضى فيها احلى ايام حياتى ...اقرا واقرا واقرا
ماهو ماكنش على ايامنا حاجه غير قناتين تليفزيون بس
وكانوا بينيمونا من الساعه 9 ...بعد مسلسل الساعه 7
وتيجى النشره بابا وماما يقعدوا يتفرجوا واحنا بقا اللى يحضر شنطته وواللى بيعمل الوجب فى اخر 10 دقايق قبل النور مايطفى بالامر وكله ينام يعنى ينام

جايه دلوقتى فى عصر النت والموبيلات......الا ايه ااقولكم صوموا تانى
طيب والافلام اللى للصبح.... والكوره وكاس الشباب
والنت كافيه وصلات الديسكو
وغيرها وغيرها كتير


ليكم حق اللى يضحك على كلامى ويقولى يماما فوقى احنا فى القرن 21

بس اقولكم والله انتوا صعبانين عليا
انتوا فعلا عايشين ازهى عصور التكنولوجيا وكل حاجه بتيجى لغاية رجلكم وايدكم وانتوا مرتاحين
بس ياخساره....برضه الامراض جايه لغاية رجلكم برضه وانتوا مرتاحين

على ايامنا مكناش بنسمع عن كل الامراض دى ولاالفيضانات دى
ولا الاعاصير المدمره...ولا الاوبئه الحاصده لحياة البشر
ممكن حد يرد ويقولى طبعا دا كان بيحصل بس محدش كان بيعرف علشان ماكنش فى ثورة الاتصالات اللى موجوده دلوقتى
بس برده هارد واقوله لا كنا بنعرف برضه لان الجرائد كانت بتنقل الاخبار من كل مكان
وكان اعتمادنا الوحيد على المعرفه من الكتب والقصص والمجلات
وكنا بنحوش من مصروفنا علشان نجيب قصه لاارسين لوبين
ولا مجله ميكى وسمير

عارفين ياولاد كنت لما اجى اعمل حفلة عيد ميلادى مره كل كام سنه من نفسى
كانت بتكلف كام
تصدقوا دستين جاتوه ب50 قرش
ودستين كوكا كولا اضربوا معايا 15 مليم ×24 احسبوهم انتوا يطلعوا كام
وكيس لبن ب5 قروش وشوية شاى لزوم الشاى بالبن ............ وشوية طراطير وشوية اقنعه ورق
يعنى الحسبه على بعضها مش هاتكمل 5 جنيهات مصريه لاغير

اوعى حد يقول يااااااااااااااااااه دانتى كبيره قوى يا ماما
ااولكم ابدا
بس هو كل شيء بيجى على حساب عمرنا
انا حاسه ان زمان كان مليان احساس وعذوبه وحنيه فى التعامل مع بعضنا
وعلشان كدا كان ربنا محللنا عيشتنا...
كنت لما تعوز حاجه تسئل زميلك او مدرسك....وكانوا والله بيحبونا جدا وبيردوا علينا بكل الحب والابوه الطيبه
وزميلك كان يجاوبك باخلاص وموده

لكن تعالوا دلوقتى واسئل اى حد على اى حاجه
الجواب هو::
ادخل النت وانت تعرف
الاب يسئل ابنه على حاجه ...يرد ويقوله هاشوفهالك على النت واقولك
الام تيجى تقول لبنتها على اى تجربه فى حياتها او اى نصيحه
ترد البنت وتقول دا كان زماااااااااااااااااااااااان....دلوقتى فى نت وبنعرف منه كل حديث وجديد

يعنى لا الاب ولا الام ليهم عوزه....خلاص الكمبيوتر والنت هما بقوا كل حاجه
لا عاد علاقات انسانيه ولا اجتماعيه
راحت الموده والرحمه من القلوب
بقينا بندور على العلاقات من خلال النت برضه
وعلشان كدا ربنا بالينا بالامراض والاوبئه المميته رغم انك تلاقى كل واحد فى حاله ومابيكلمش حد
لكن لااسف الامراض جايه من مجرد تواجدنا فى مكان واحد((سبحان الله)))يارب سلم .. يارب سلم

يعنى انا كامثال حى لهذا الوضع
بنتى متجوزه بعيد عنى بشوفها كل شهر ولا شهرين ...ليه
لان ياماما المواصلات بقى والحمل تاعبنى
خلاص ياماما هاكلمك على النت واخليكى تشوفينى وتشبعى منى..............بالذمه دا اسمه كلام!!!!!!!!!!!!!!!!

وبنتى التانيه مشغوله مع خطيبها اللى انا متأكده انهم بعد جوازهم كل واحد فيهم هايكون معاه لاب توب....وهايكلموا بعض من خلال النت لان كل واحد فى شغله ومش فاضى انهم يقابلوا بعض
يبقى هاتشوف امها امتى ولا هاتقعد تسامرها امتى؟؟؟؟؟؟؟؟؟؟
واهو زى مانتوا شايفين اتعلمت كومبيوتر علشان اتواصل مع اولاد تانين واصدقاء وعلشان اعمل لنفسى حياه جديده
وهى عارفه كدا وبتشجعنى .......لا وايه بتقولى انت احلى ام فى الدنيا ...ليه؟؟؟؟؟؟؟؟
علشان عرفت اعيش فى عصر التكنولوجيا..............بالذمه مش دى خيبه

يا ولاد فوقوا
دى تكنولوجيا كاذبه
دى تكنولوجيا بتضيع احلى سنين عمركم
الحقوا اشبعوا من اهاليكم
اخرجوا وشموا هوا.....اخرجوا واجروا فى الشوارع...
امسكوا القلم بايدكم واكتبوا شعر...قصه...
امسكوا القرءان واقروه...واكتبوه...والله ايدكم هاتشهد عليكم وليكم
اتعلموا حاجه كهوايه....
تخيلوا لو النور قطع....اصبحت انت وهى عاطلين
لا فى بنت فى ايدها خيط تريكوا ولا كروشيه(((عارفه هاتقولوا (يع) ايه الموضه القديمه دى)))
بس احنا كنا كدا وبيوتنا مليانه منها
لكن دلوقتى تلاقى البنت مافيش فى ايدها غير دبدوب او بالكتير مبرد الضوافر
والولد ماسك الموبايل وهاتك يارغى

ياولاد الحقوا اقرءوا القرءان
ياولاد الحقوا احفظوا اللى تقدرواا عليه من القرءان دانتوا هاتدخولوا الجنه وتطلعوا درجه بكل ايه ان شاء الله

ياولاد انتوا مش عارفين ان 7 يظلهم الله فى ظله يوم لا ظل الا ظله
منهم شاب نشا فى طاعة الله
منهم رجل تعلق قلبه بالمساجد

ياولاد نفسى اشوفكم احسن من اى حد فى الدنيا
قولولى مين فيكم بيعرف يمسك مسمار وشاكوش
مين فيكم بيعرف يكتب بالخط العربى ...ولا يعرف يعمل لوحة حائط لاخوه الصغير((وسيله تعليميه يعنى ))
مين فيكم بيعرف يبيض شقته ولا شقة اهله واهو بيتسلى بدل القعده الممله قدام الكمبيوتر
مين فيكم بيعرف يصلح حنفيه ولا ولا ولا ولا

كله طالع قاعد قدام الكمبيوتر
وعلشان كدا انا زهقت
وهاخد اجازه....ومش رايحه لبنتى ولا هاعمل حاجه غير انى اشوف مكتبتى حبيبتى اللى عليها تراب قد كدا
وهانضفها واشوف الكتب اللى عندى
ممكن الاقى كتاب ((قيم)) مقرتوش ايام تربية ولادى وماكنتش فاضيه
واوعى حد يقولى مانتى ممكن تلاقيه على النت وتقريه
هاقولكم اه ممكن
بس ما احلى الاستمتاع بالقراءه وانتى مدد على الكنبه ومعاك كوب شاى
وموسيقى لام كلثوم...وهدوووووووووووووووووووووووووؤ تام
دانتوا ضايع منك اجمل سنين عمركم
ال نت ال

وجعت دماغكم !!!!!!!!!!!!!!!!!
معلش شوية زهق
وارجعلكم بعد شويه
الى اللقاء


هناك 34 تعليقًا:

عاشقة الأحزان يقول...

مممممممممممممممم

امى الحبيبه

هو داااا بوست ولا ايه

عاشقة الأحزان يقول...

عامة
اأنا بحجززززززززززززززززز
اول تعليق

لحين ظهور البوست

أحمـــــــــــــد أبو العلا يقول...

ربنا يبعد الهم والحزن عنك وعن كل الناس
بس لو فيه زهق, يعني مفيش أي فرصه نبص ولو لحاجه واحده بس ننكش عليها في حياتنا عشان تفرحنا؟

ان شالله حتى ذكرى حلوه

هوا الفرح بقى غالي قوي كده؟

عاشقة الأحزان يقول...

تمام

انا حجزت وفعلا انا اول تعليق

هييييييييييييييييييه

عاشقة الأحزان يقول...

ثندر
الرعد الزئبقى

داااااااااااااا مكانك يا سباعى

منتظرينك

عاشقة الأحزان يقول...

اسماء واحلام فى وجدانى


مطلوب هنا فورآ للاهمية

الفراغ يقول...

حبيبتى عاشقة الاحزان
حقك عليا انا كنت بجرب بس شكل الالوان فى الكلام قبل مااعرضه
الموضوع تحت امرك بس يارب يعجبك

عاشقة الأحزان يقول...

ميمايا

وحشتنى قووووووووووووووى
منتظراكى هنا عند ماما

عاشقة الأحزان يقول...

يويو


ملاكى الغائب وحشتينى يا ارق من النسمة

حجزت ليكى اهو
عدى الجمايل بقا
هههههههههههه
بحبك

الفراغ يقول...

الباشمهندس الغالى احمد ابو العلا
الدنيا مليانه حاجات تفرح
بس كلها عن طريق النت
بحلم بزيارات زى ايام بابا وماما
بحلم بالدفيء الاسرى
بحلم بالحميميه مع اهالينا واقريبنا
بس خلاص كله راح
ياخساره

عاشقة الأحزان يقول...

أيوشه


رغم انى مخنوقه منك

بس برده بحبك وحجزت ليكى
يلا تعالى بقا

الفراغ يقول...

رجــــــــــــــــــاء خاص ياولاد
ارجوكم بلاش الاحتلال اللى اكتر من ((5)) احتلاالاات بس
لانى لاحظت ان فى ناس زهقت من الموضوع ده
معلش محدش يزعل منى
احنا لازم نريح الزبون
هههههههههههههههههههههههههه
مش كدا ولا ايه
لكم حبى واخلاصى
وكلكم على عينى وراسى

عاشقة الأحزان يقول...

تعرفى بجد

والله العظيم انا زيك كده بالظبط

طبعآ حضرتك عارفه انى بنت وحيده وماما ست كبيرة وتعبانه وانا بخدمها

والحمدلله ربنا ما يحرمنيش منها ولا منك ويعطيكو الصحه والعافيه اللهم امين يارب العالمين

بجد انا بحس بزهق وملل رهيب
يا دوب بروح الشغل وبرجع على شغل البيت ولو فضيت بقعد شويه على الكمبيوتر وهكذا
مافيش غير صاحبات النت اللى تعرفت عليهم واتعودت قوووووووووى انى اكون وحيدة واكتر الاوقات بفضل اكلم نفسى بصوت عالى وامى تزعل عشانى

وساعات تانيه اضحك واعيط وعايشه الحمد لله
واتعودت على الوحدة حاسه انها جزء منى
ربنا يعوض صبرى خير ويكرمنى امين يارب العالمين احنا وبنات المسلمين

عاشقة الأحزان يقول...

ماما حبيبتى

انا طالما مبسوطه هنا
اعمل اى حاجه كفايه بجد بفرح لما بلاقى بوست لحضرتك وما بصدق هى دى الحاجه الوحيدة اللى بطمنى عليكى والله
وبكون قلقانه قوووووووووى لما بتغيبى بحس انى مخنوقه وهموت من القلق وبحس ان ناقصنى حاجه كبيرررررررررررة قوووووووووووووى
ياريت بجد مش تغيبى عننا
لانك حاجه جوايا وبحبها وبقدرها قوووووووووووووى
وربنا شاهد على صدق كلامى
انتى كل شىء جميل بحياتى انتى وامى حبيبتى ربنا يحفظكم ليا يارب ويشفيكم
اللهم امين يارب العالمين

عاشقة الأحزان يقول...

بس تعرفى انا حبيت النت عشان عرفنى بيكى يا غاليه
يعنى لو ماكنش فيه نت كنتى عرفيتنى اهو برده له الفضل بمعرفتى بيكى

وانا مش هسمح انك تبعدى عنى ولا عن الناس اللى بتحبك ونفسهم يطمنو عليكى من وقت للتانى


ربنا لا يحرمنا من وجودك الغالى علينا يا غاليه
وبجد بوست جميل قوووووى وعجبنى كتير والله
وحسيت انا بينا حاجات كتير مشتركة فيه
ربنا يديم بينا الود والتواصل
تحياتى
بنتك
انوسه

الفراغ يقول...

يارب يا ايناس يعوض صبرك خير انت وبنات الناس كلهم
انا عارفه ان الحياه ممله
بس هانعمل ايه
هو دا اللى مكتوب علينا
بس مانسكتش بقى
لا
لازم ندور نملاها بايه مفيد
وصدقينى الجواز برضه مش هو الحل النهائى
بكره تتجوزا وتقولا يااااااااااااااااااه ايه الزهق ده
بس على فكره هو الجواز حلو فى حاجه واحده بس
عارفه هو ايه
انك تلاقى حد تطلعى عليه زهقك
هههههههههههههههههههههه

اسماء واحلام فى وجدانى يقول...

معاكى حق فى كل كلمة

بس تفتكرى هنقدر




ان شاء الله مفيش احتلالات تانى

thunder يقول...

على فكرررة انا بعمل والله معظم دا وربنا شاهدنعاد كتابة القراءن الحقيقة هنا المصحف الالكترونى نقله على الجهاز وام بى فور بقراء وبسمع منهانا مش هقول ياامى انى التكنولوجيا متغطش على كل نواحى حياتنا لكن لية فوايدة الكبيرة وكل عصر ولية مميزة وكل وقت وليه جماله
والله زمان فعلا كنت برسم لوحات الارشادية بتع زمايلى واطفال فى المدرسة
وبصلح معظم الحاجات فى بيت لكن هل معنى دا انى معش فى العصر بتعى وانه يحتل الجزء الاكبر منى
وبعدين يامى امراض العصر دى معلش مقارنة بزمان ولا بتساوى يعنى زمان تيفود وطعون قضوا على نص سكان مصر تقريبا انما العصر اللى احنا فيه المعلومة بتنتشر فى لحظة وكل العلماء بتتكاتف فى زمن قياس وبيلقوا ليه حل والامراض اللى موجودة دلوقتى لاتقارن يعنى فى الاعداد اللى ماتت بى زمان
ومش معنى ان النور مثالا هيقطع انه هعيش فى ملل مين قال كدا لو كل واحد هحطط لنفس بدايل وافتراضات للى هيحصل
هيلاقى انه فرصة لو النور مثالا او النت فاصل هيطرح بديل انا عن نفسى بكتب فى ورق خارجى حاجات مش بنشرها دا بديل

لكن الفيضانا وتسونامى والحاجات دى والامراض قبلها حاجة بايد ربنا ومش معنى انتشارة انها مكنتش موجودة قبل كدا لكن حكمة ربنا فى ظهورها دلوقتى هو الوحيد اللى اعلم بيها
لكن بقى اللى فعلا زعلان انى سورى فى التعبير حاسس فى الكلام بحجة ما ان حضريتك مش عاوزة تشوفينا وانا متعودتش اكدب على حضريتك حاسس ان دا بجد حجة للهروب مع النفس اكتر منه فعلا حنين للماضى واللى زعلانى اكتر والمنى انه مبرره بسبب انى ااختينى الكبيرة مهتمة انها تكلم عن طريق النت لان الحمل تعباة فهحاول اعزرها واقول ممكن دا صحيح وربنا يااااااااااارب بفضل الحبيب يقومها بى السلامة لكن اختى الصغيرة هى اللى زعلتنى لانها لو خمس دقايق من اللى بتعطيهم لخاطبها قعدة مع حضريتك معتقدتش ان كان فكرة او الاحساس اللى انا حاسة انه هروب مؤقت دا
يارب ياامى مضمون كلامى يكون وصل لانى حاسة ملعبك باختصار 24ساعة لو نظمتها هقعد نت واشوف الناس وهقراء كتب وهصلى وهقراء قراءن واشوف ناس
لكن العيب مش فى الوقت العيب فينا احنا واسلوب تنظيمنا لية
امى الحبيبى وحشانى اوووووى وربنا ومعرفش ليه مش بتردى على اميلاتى وبجد وربنا مفتقدك اوووووووووى يامى الفترة دى ودى بالذات اتمنى يارب متغبيش عنى ابدااااااااااا يااااارب
امى الحبيبة دمتِ يارب بكل حب و ود وفى رعاية وحفظ الله دائماااا

آه وكفى يقول...

ماما حبيبتي
ازي حضرتك
ااااااااه ساعات انا بكون قاعدة في اوضتي واختي عندها 8 سنين بتكون قاعدة بعيييييييد عند الكمبيوتر بتاعها واكسل انادي عليها
مش 8 سنين بس عندها ايميل ميغركيش ,, فادخل اقولها اللي انا عيزاه وكذلك جيراني مع اني لو وقفت في البلكونة و عطست جارتي هتقولي يرحمكم الله بس الكسل وحش
تصدثي انا وصحابي بنقعد بالشهور مش بنشوف بعض اعتمادا على اننا بنشوف بعض ونعرف اخبار بعض من الفيس بوك
طب انتي عارفة برضو ان كا ما ماما تسالني على حاجة اقولها معرفش اجري اسألي الويكيبيديا

لول

والله معاكي حق

آيوشة يقول...

عاااااااااااااااا ايه الاحتلال ده بقى

آيوشة يقول...

والله كلام حضرتك صح جدا انا كانت ليا هوايات كتير قبل النت وكنت مستمتعة جدااا بيها وكل وقتى برسم بعمل حاجات بايدي اصلح حاجات وكنت مبسوطة ومش حاسه باى ملل ولا فراغ لكن دلوقتى مش عارفة لما احس بملل اقول مفيش غير الكمبيوتر اقعد عليه اقرا موضوع العب لعبة وهكذا لغاية ما اليوم يضيع
حتى الكتب الالكترونية اللى على النت ملهاش طعم وغلسه ومش بقدر اكملها للاخر اتمنى حضرتك مش تغيبى عننا كتير علشان احنا بجد اتعودنا على زوجودك فى وسطنا دايما المهم تكونى بخير وبسلامة اللهم امين يارب العالمين بس هطلب من حضرتك طلب علشان اقدر اطمن على حضرتك بجد ومش تكون موضوع نت وبس هو اللى بيربطنا بعض لانى بجد بحب جداااااااا ويمكن فعلا انا بتكلم مع حضرتك وبتفاهم معاكى اكتر من ماما فى البيت مش علشان هى مش بتقعد معايا لا علشان انا اللى بقيت مش بقعد معاها وهى بقيت بشتكى من انها دايما لواحدها واحنا كل واحد فى وادى لواحده بس الحمد لله احنا بردو جنبها كل يوم ومش بنقدر يعدى يوم غير اخواتى المتجوزين واولادهم يكونوا عندنا علشان كده انا قدرت ابعد عنها وانا مطمنئة ان فى غيرى معاها وبقيت وقتى كله بقضيه لواحدى على الرغم انها ساعات كتير تفضل تقولى كلام ممكن يضايق بس علشان تحس انى زى زمان بناكف وبهزر وبضحك معاها
انا عايزة رقم تليفون حضرتك ممكن بقى تسيبهولى على الايميل علشان اطمن على حضرتك كل شوية

اسماء واحلام فى وجدانى يقول...

حضرتك مش عارفة انى مجنون وبحالات انا فعلا نشرت واحة الكلمات وبعدين حذفته لانى اضايقت فجاءة ومش لاقيت قصادى غير البوست ده اطلع فيه همى قمت حذفه ان شاء الله هاحاول اعمله النهاردة

mohamed ghalia يقول...

متهيألى يا أمى العيب مش فى التقدم
هى طباع الناس نفسها بدأت تتغير
دمتِ فى سعاده

همس الاحباب يقول...

حضرتك بتذكرينا بالزمن الجميل
والدفء الاسرى ولمة افراد الاسرة حول الطعام فى وقت واحد ناهيك عن التواصل بين الابناء والاباء
لكن فى وقتنا الحاضر انقطعت كل سبل التواصل الايجابى
بالرغم من ان لكل شىءمميزات وعيوب الا اننا تمسكنا بالعيب فى النت اكثر من الايجابيات واصبح يستنزف الوقت والجهد منا
فانا مدرك معنى كلماتك وانكى محقة فيه
انا اخشى على الشباب والفتيات والاجبال القادمة ان يحل النت محل كل شىء فى حياتهم من مشاعر واحاسيس نحو الاسرة حتى الزواج سيصبح الكترونى وتربية الاولاد كمان
الحمد لله اننا لحقنا جزء من الزمن الجميل قبل التكنولوجيا والعولمة الحديثة
تحياتى

موناليزا يقول...

عندك حق
فما اجمل لمة العيلة والدفء الاسرى
ما اجمل القراءة من الكتاب مباشرة وفى هدوء تام
ما اجمل ان نتعلم ماهو جديد(على فكرة انا بعرف اعمل حاجات كتير ومع ذلك برضه عايزة اتعلم)
وما اجمل نصايحك لينا
مانتحرمش منك ابدا

HaMaDa 3aFshA يقول...

السلام عليكم
ايه يا ماما هو عشان خايفة على ولادك تضيعى ولادك التانيين
يبطلو نت وبرامج ومهندسين الكمبيوتر اللى زى حالاتى يقعدو فى البيت بقا هههههههه
موضوع جميل جدا يا امى وبجد بحس بخوف حضرتك علينا بس اطمنى من نحيتى ما بدخلش البيت ولا بقعد نت الشغل وتلت دورات تدريبية فى مجال الدراسة مبهدلنى محطوط بين كفى الرحى تقريبا
دعواتك معايا بقا الفترة الجاية
دمتى بالخير والصحة والسعادة

المعتصم يقول...

السلام عليكم ورحمة الله وبركاته
ست الكل
تحياتى
ويارب تكونى بكل خير وفى احسن حال
معاكى حق فى حاجات كتير قلتيها
بس مش معنى كده اننا كلنا بنعمل كده وان كل حياتنا على النت والكمبيوتر
النت حاجه مهمه اه انما انا شايف انه ممكن الاستغناء عنها عادى جدا
صحيح هى بنعرف منها حاجات كتير
انما متعة القرايه من الكتاب وهو فى الايد كده والواحد ممدد على السرير دى برقبتها
بس انا شايف انه مش ده هو سبب الزهق اسمحيلى ياست الكل اقولك انك زعلانه من حد وهو ده السبب ويمكن انتِ مرجعه ده للنت
بس هى الدنيا كده
وبعدين النت ده اللى عرفنا على حضرتك وعرفك علينا وخلى ليكى ولاد تانيين بيحبوكى وبيفرحوا قوى بفرحك وبيزعلوا قوى لما تبقى زعلانه او متضايقه
فياريت ماتطوليش الاجازة بتاعة الزهق دى وتطمنينا عليكى بسرعه
تقبلى مرورى وتحياتى
ودمتِ لنا بكل خير وود
على فكرة انا ماليش دعوة بموضوع الاحتلالات
اللى عاوز يحتل يحتل انا ماقولتش حاجه
لاحسن يفكرونى انا اللى زعلان من الحكاية دى (وانا مسكين وغلبان ومش قد الجماعه دول)ههههههههههههه
والسلام عليكم ورحمة الله وبركاته

رحيق يقول...

السلام عليكم
هذه اول مدونة اشاهدها منذ ستة شهور واعلق عليها انا حقا استمتعت بكلامك البسيط العميق وان شاء الله ساتابعك باستمرار واهديك هذه الكلمات

أحن إلى خبز أمي..
وقهوة أمي..
ولمسة أمي..
وتكبر في الطفولة..
يوما على صدر يوم..
وأعشق عمري لأني..
إذا مت..
أخجل من دمعي أمي!!

(محمود درويش)

خالص اشواقى وابتساماتى

enjy يقول...

بصى انا هقولك يا طنط...اصلى بصراحة مبعرفش اقول ماما غير لماما بس

ممكن تقبلى انى اقولك طنط؟؟؟

بصى يا طنط والله كلامك دة صح مليون ف المية...انا بقالى يومين بقول نفس اللى حضرتك قلتيه دة...عارفة حضرتك..لما بركز اوى مع الكمبيوتر والموبايل والحاجات دى بحس انى من غير روح وان حياتى مالهاش اى معنى..

بس اللى بيندمج اوى فى العالم دة معذور..دة من كتر الفراغ..لو فى حاجة تشغلك عمرك ما هتركز اوى كدة مع الحاجات دى..بجد والله

لما بكون مشغولة بكورسات او عندى شغل وكدة بكون سعيدة وطايرة ومش هاممنى النت ولا الكمبيوتر..

الجانب الروحانى بقى اللى حضرتك اتكلمتى عنه مهم جداااااااااا...لما الواحد بيقرا قران او بيصوم يوم تطوع بيبقى مطمن من جواه وحاسس انه فى معية ربنا وانه مش لوحده...

الكلام اللى حضرتك قلتيه النهاردة مهم اوى اوى بس المشكلة ان كل واحد مبيبقاش متخيل حياته بشكل تانى فمش بيحاول يغيرها

جارة القمر يقول...

امنا الغالية..

أدرك جيدا ماتقصدينه في كل كلمة
أحن كثيرا الى زمن البساطة الخالي من تعقيداتهم

كثيرا ما اتجرد ممن حضاراتهم واعزل نفسي واشعل شمعة وانسى كل شئ حولى
زكثيرا ما الجا الى وحدتي
يخنقني زحامهم وعنجهيتهم

أمنا الغالية

الله يديم عليكي الصحة يارب

كل الاحترام والتقدير

اسماء واحلام فى وجدانى يقول...

اسبقنى وقول لحبيبى انا جاى على طول يا حبيبى
الحقنى اوام الحقنى ع الجنة الحلوة اسبقنى
على اد ما شوفت هوان واحترت يا قلبى زمان
اهو جالك يوم ترتاح على اجمل بر امان

وعيون زى الافراح تسيقك الشهد حنان

نصبح غنوة للعاشقين ما نخليش ولا قلب حزين
يلا اتعذبت كتيراسبقنى يا قلبى وطير اسبقنى وقول لحبيبى انا جاى على طول يا حبيبى
الحقنى اوام الحقنى ع الجنة الحلوة اسبقنى

يالا يا قلبى يا اسعد قلب نملا الدنيا حب فى حب
يالا نقوم وننام فى غرام ونفسر كل الاحلام
نصبح غنوة للعاشقين ما نخليش ولا قلب حزين
يلا اتعذبت كتيراسبقنى يا قلبى وطير اسبقنى وقول لحبيبى انا جاى على طول يا حبيبى
الحقنى اوام الحقنى ع الجنة الحلوة اسبقنى

عاشقة الأحزان يقول...

السلام عليكم ورحمة الله وبركاته
ازيك يا غاليه اخبارك ايه يارب تكونى بخير وبألف صحه بجد وحشتينى قووووووووووى
ربنا يطمنى عليكى

ياريت تحددى ميعاد نتكلم فيه انا ضيفت حضرتك عندى على الميل
وياريت تسيبى ليا رقم تليفونك
انا حاجبة التعليقات
منتظرة منك الرد
احبك جدآ

فكرة من الزمن ده يقول...

انا دايما متأخرة
لكن باكون سعيدة جدااااااا
لما باكون هنا
وانا باضم صوتي ليكي
لو التلعيقات الردود عليها بتتعبك
بلاها نادية وناخد سوسو
ونعلق احنا وحضرتك تردي في البوست الجديد واكيدكله يهمه انه يطمئن عليكي وانك تكوني بخير بس تزورينا كمان برضو
اما عن البوست اللي ابيض واسود ده فهو زعلنا من واقعنا المر اكتر واكتر
مش هاقول غير كلمة واحدة بجددددددددددد يابختكم ودي مش اول مرة اقولها على فكرة
تحياتي يا اجمل حاجة هنا

الطائر الحزين يقول...

اسمحى لى اضع تدوينتك عندى
بارك اله فيكم

فعلا افتقدنا الالفة