السبت، 7 نوفمبر، 2009

تـــــــــــــــــــــــــــــــــــــــــــاج المحبــــــــــــــــــــــــــــــــــة


السلام عليكم ورحمة الله وبركاته

مش عارفه اكتب ايه
وخصوصا انى زعلانه قوى
وانا طبعى وحش قوى قوى
لما بحس حد بيبعد ببعد انا كمان
ولما احس حد بينسى... بتناسى كمان وكمان

اوعوا تفتكروا ان دا طبع وحش
ابدا....
كل قصدى من كدا ..انى اكون خفيفه على اللى اعرفهم ويعرفونى
انى ماكنش زنانه...
اعرف ان كل الناس عندها مشغوليات .....بتلهيها حتى عن نفسها
اعرف الدنيا مابتسبش حد فى حاله

ورغم انى كنت ...والحمد لله...مريضه جدا
بس برضه كنت ببقى فى السرير... واقعد افكر فيكم

وسئلت نفسى كتير:
هو انا اعرف ايه؟ ..عن اى حد من ولادى واصحابى هنا؟؟؟؟؟؟؟؟؟؟
ولقيت نفسى بجاوب:
مابعرفش حاجه غير اسمهم...ويمكن يكون اسم المدونه كمان ..مش الاسم الحقيقى

طيب ايه بيشغلهم ؟.....وبيعملوا ايه فى حياتهم
ولا اعرف
طيب ايه مبادؤهم او تفكيرهم او...او....او....او...
وهكذا لقيت نفسى بعيده عنهم بقدر ماهما بعيد عنى

ياترى هما كمان بعيد عن بعض كدا؟؟؟؟؟؟؟؟؟؟

ولقيت نفسى رحت بخيالى الى لقاء مفتوح مع اصدقائى هنا وقعدت اتعرف عليهم
واتكلم فى كل حاجه وكنت سعيده جدا باللقاء الخيالى دا

ووجدت ان اهديكم خيالى لتشاركونى حبكم
فما فكرت فيكم الا من احساسى بقربكم
فقلبى يتذكركم ... فهل انا فى ذاكرتكم؟؟؟؟؟؟؟؟؟؟

هل ممكن ؟ ان تعتبروا ما اهديكم هو تاج المحبه منى اليكم ...والى كل من تهدوه اليه

واتمنى ان كل من يعرفنى او يحبنى او ليا عنده اى قدر من المعزّه ان يجيب عليه
وخصوصا اللى عارفين نفسهم كويس قوى هما بالنسبالى ايه....

بس ممكن ااقول بعض احرف من اول الاسامى
زى مثلا: أ ..ث..ح...خ..ر..م..ط..ف..ب..ص..ي..ف..ل................والله متهيئلى كل حروف الابجديه

وطبعا الكلام للبنات والستات والشباب.....مين يقول هات
ولكنه طبعا بصيغة المذكر لان دا طبعا لغة القرءان
وكمان مش بطلب اى اسماء صريحه...الا لمن يريد...ولكن كل شخصيه ليها حرية التعرف عن نفسها
لان اللى بيهمنى الشخصيه الجوانيه المستخبيه..... وليس اسم او عنوان



انت مين بقى؟

عندك كام سنه؟

هل انت متزوج ؟ وهل عندك اولاد؟

دراستك ايه؟

كم طولك...وما لونك...

هل تمارس عملا بشهادتك ام عمل حر وماهو

ماهى مدة عملك اليوميه

ماذا تفعل بوقت فراغك

هل لديك هوايات....وهل تمارسها

هل تشعر برضا ربنا عنك ؟

هل تحب؟...ومن بقلبك الان؟

لو لم تجد من تحب ....فماذا ستفعل؟

عندما تكون فى موقف اتخاذ القرار..تخالف الجماعه.. ام تشرك معك الاخرين ؟

هل تتعامل بواقعيه؟

ماهو الشيء الذى فعلته وندمت عليه طول عمرك ؟

هل تصارح غيرك بالحقيقه ؟ ام ام تقول له مايريد سماعه؟

صف انسان يمكن ان تحبه عمرك كله

متى يقسوقلبك ؟
ومتى يقسو لسانك؟

من هو اول من قلت له احبك؟

هل يمكن ان تحب احد من المدونين؟
وهل يمكن ان يكون شريك حياتك؟

ماذا تعنى لك المرأة او الرجل؟

فى زمن البحث عن الماده ..عن ماذا تبحث انت ؟

متى تعرف انك تحب ؟

ماهى الشخصيه التى اثرت بحياتك ؟

هل يوجد من تراه سعيدا فى الدنيا ولماذا ؟

سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا

ماهى درجة صراحتك ؟
وماهى المواقف التى يمكن ان تكذب فيها ؟

هل يتغير الحب بعد الزواج؟

فيما تفكر الان ؟

لو لم تعيش بمدينتك؟؟؟فاى مدينه اخرى تفضلها

من اول من ياتى ببالك لتحكى له اسرارك؟

من تريد ان يكون دائما بجوارك ؟

من هو الد اعدائك؟

ومن هو صديقك

ماهى صفات شريك العمر؟

لو الدنيا كلها زيك....لمن تقول هذه العباره ؟

ماذا تكره فى الدنيا ؟
وماذا تحب

كيف تواجه مايضايقك
وماذا تفعل عند المفاجآت

لو معاك فلوس اكثر مما تتخيل...فماذا ستفعل بها

هل الفقر يصنع حبا؟؟
وماذا لو وجد الحب فى زمن الفقر المادى؟

ماهى اقسى صدمه تعرضت لها حتى وقتنا هذا
وماذا كان رد فعلك
وهل تعلمت منها شيء
هل انت على استعداد لتلقى صدمات اخرى؟؟

هل تصدق كل ماتقرا عن الاخرين
كيف ترد على من لاتصدقه

اذا احببت انسان ما ...هل تصرح له بحبك ؟
وماذا تفعل لو لم يتجاوب معك؟
هل تؤمن بالمثل القائل:انا احب فانا اعيش

ماهى القضايا التى تشغل بالك؟

هل تستطيع تحقيق كل احلامك
هل تمتلك طموحا...وماهو؟
كيف ستحقق طموحك...ام سيبقى حلما فقط!!!!!!!!!!

ماهى علاقتك بالدنيا
ماهى علاقتك بالموت

لو لك اختيار زمن تعيش به....فماهوذلك الزمن ؟ ولماذا ؟


هل يمكن ان ارا ك وانت غائب؟؟؟؟؟؟؟

ماذا ترى فى نفسك مميزا عن الاخرين؟

من اذا اقترب منك ...هربت منه بعيدا؟

من تقول له : قرب منى قرب ...ياقلبى يا متغرب

ماذا تريد ان تقوم به قبل ان تموت




مارايك فى اسئلتى؟؟؟ وبدون مجامله

هل نسيت سؤال كان هاما بالنسبة لك؟

هل استطعت تغطية شخصيتك
مع ملاحظة انى ماليش فى الكوره..........هههههههههه

من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟


ملحوظه مهمه جدا
كل اللى عارف انى بحبه....ومش هايجاوب على التاج ...هو حر
المره الجايه الاجابه اجباريه وبالاسم ...وفى احراج كمان

وقد اعذر من سئل واترجى


هناك 53 تعليقًا:

مدحت محمد يقول...

على فكرة شكلك طيبة اوى

بس حلو التاج

فكرة من الزمن ده يقول...

ايه الجمال ده كله قلب اطيب من الطيبة
واخضر من لون مدونتك
ولاحد فينا يقدرعلى زعلك
وانا قبلت التاج عارفة مكاني في قلبك واسمي اللي مكتوب
واكيد حضرتك عارفة مكانك في قلوبنا وقلبي انا بالذات
تحياتي يااجمل حاجة هنا

وبردو نفسي حد يطمنني على تندر

فكرة من الزمن ده يقول...

بس ايه ده انت تنفع دكتورن فاني ياجميل ولا الدكتور احمد عكاشة
هههه
ربنا يبارك فيكي

همس الاحباب يقول...

هههههههههه
ههههههههه
مش ممكن يكون ده تاج ابدا
ده تاج مشكلة بجد
اولا الف سلامة على حضرتك
وحشتينا موووووووووت
بس التاج ده هيخسرنا بعض يا جماعة
وكل المستخبى هيظهر ويبان
انا هجيب الشيزلونج وهنام واعترف بكل حاجة يا دكتور
هههههههههه

موناليزا يقول...

أنتى غلبتينى على فكرة فى وضع الأسئلة:)
يارب دايما تكونى بخير

الفراغ يقول...

مدحت
اشكرك ..اخجلتم تواضعنا
ويلا طالما عجبك التاج
ورينا الاجابات الحلوه

اسماء واحلام فى وجدانى يقول...

طب ممكن تِـبنجونى الاول

الفراغ يقول...

فكره حبيبتى

انت اللى قلب جميل
وعارفه غلاوتى عندك وهى من غلاوتك عليا والله


بالنسبه لثندر
هو بخير
لانه لسه كاتب تعليق عندى النهارده فى البوست السابق

الفراغ يقول...

همس الاحباب يابو خالد

مبروك لقاء المدونين
وصورتك منوره وانت بتعد فلوس المركب
ويلا اهو انت كدا اتفسحت وغيرت جو
جاوب بقى بتأنى
واوعى تزوغ من اى سؤال

الفراغ يقول...

مونليزا العزيزه
لا يمكن طبعا اغلبك
دابس نفسى اعرف عنك كتير
واشكرك على السؤال

rovy يقول...

هههههههههه
بجد انتى طيبه جداا و انا حبيتك قوى ..و طبعا الف سلامه عليكى من اى تعب ربنا يديكى كل الصحة و العافيه دايما ياارب ..
الاسئله بصراحة كثير جداا و صعبه ..بس بأختصار شديد انا كنت جاوبت على اكثر من تاج عندى وضحوا كثير عنى بجد و بمنتهى الامانه لو سمحتى لى اترك لكى لينك تاجين منهم لو عندك وقت و قدرتى تقرأيهم يمكن تبقى عرفتينى
http://rovy-mylife.blogspot.com/2008/06/blog-post_11.html
و ايضا http://rovy-mylife.blogspot.com/2008/05/blog-post_05.html

ادعوا الله ان يحفظكى يوفقكى دائما

ارق تحياتى

الفراغ يقول...
أزال المؤلف هذا التعليق.
الفراغ يقول...

حبيبتى روفى
خلاص علشان خاطر عيونك
هاروح واقرأ طبعا
لان اللى بحبهم يهمنى اعرف هما مين
واشكرك على اهتمامك بالرد وانك اعتزرتى بشياكه ولباقه
مع حبى

عابرة السبيل = ام بقلظ باشا يقول...

انا رايحة اجاوب على التاج
جريييييييييييييييييييييييييي

الفراغ يقول...

اسماء واحلام
احمد باشا

ولا فى بنج ولا مسكن
فى صهلله
وفى بحلقه
والا !!!!!!!!!!!!!1
هات الفلكه يا جابر

الفراغ يقول...

عزيزتى ام بقلظ
اكرمك الله واسعدك
بجد انا مبسوطه قوى انك هاتدينى من وقتك وتجاوبى على التاج

قبلاتى لبقلظ

جارة القمر يقول...

عفكرة انا جاوبت عالبوست بصفحة تانية لحضرتك

جارة القمر يقول...

https://www.blogger.com/comment.g?blogID=8455453971123660438&postID=6304044358294616365

ودة الرابط

جارة القمر يقول...

انا اسفة على اللخبطة دي

جارة القمر يقول...

ماما ماتزعليش مني بس بجد انا مش عارفة ليه حصل كدة معلش اعذرين انا جاوبت على كل التاج وكنت مبسوطة جدا

بس مش عالصفحة دي على الرابط اللي بعته

الفراغ يقول...

جارة القمر
ولايهمك يا قمر
محلوله ان شاء الله
وشكرا على الاهتمام

rovy يقول...

انا اللى بجد بأشكرك جدا و فرحانه جدا انى من احبابك ربنا يكرمك ياارب
بس حقيقى انا اليومين دول وقتى ضيق جداا و لو ربنا شاء و امورى اتظبطت اكيد يسعدنى انى اجاوبه
اشكرك جداا لاحساسك الراقى و تفهمك للامر ..
جزاكى الله كل الخير غاليتى

طارق سليم يقول...

السلام عليكم ورحمة الله وبركاته:
حقيقى دى اول مرة ازور المدونة الظريفة دى بس من اولها كده تاج ربنا يستر بس مفيش اسئلة اختيارى كله اجبارى كده ، طيب مفيش استعن بصديق او خد راى الجمهور.
عموما الف سلامة على حضرتك ربنا يشفيكى وتقومى بالف سلامه وبلاش تعمليها تانى احسن المرة الجاية التاج يبقى اجمد من كده.
التاج نفسه كويس ومش زى التاجات التانية اللى مليانه اسئلة سطحية وغير مفيده.
عموما ربنا يبارك فيكى.

thunder يقول...

انا جيت اية الكمين دااااااااااااا

دا صعب اوى يا ماما والله وعلى فكرة وربنا كنت حاسس وحياة لااله لاا الله انك حضريتك تعبانة بس الحمد لله يارب انك بالف خير ولله الحمد رجعتلنا بى السلامة
ام بقى بالنسبة لمحتوى البوست فهو جامد اووووووووى اوووووووووووووى وعلى راى همس الاحباب دا محتاج شوزلونج وموسيقة هادية جدا واعترفات مسجله ههههههههههههههههههه
لا والله فعلا ممكن دا يقرب اكتر الناس كله من بعض واتمنى انى اكون اول من هيجاوب عليه ان شاء الله
امى العزيزة دمتِ يارب بكل حب و ود وفى رعاية وحفظ الله دائما يارب

جارة القمر يقول...

انت مين بقى؟
أنا علياء فتاة فلسطينية أعيش بغزة
/
/
عندك كام سنه؟
عندي 25 سنة
/
/

هل انت متزوج ؟ وهل عندك اولاد؟
لا انا لسة لا خطبت ولا تجوزت :)
/
/


دراستك ايه؟
درست شريعة وقانون جامعة الأزهي بمصر وحاليا أنا محامية ببلدي
/
/


كم طولك...وما لونك...
طولي 175 سم أنا طويلة ولوني حنطي
/
/

هل تمارس عملا بشهادتك ام عمل حر وماهو

ماهى مدة عملك اليوميه
انا بشتغل محامية بمركز حقوق الانسان يعني بنتبنى قضايا انسانية زي انتهاكات الاسرائيليين وحاجات زي كدة بشتغل من 8 الصبح لغاية 3 العصر وبروح تعبانة أوي
/
/

ماذا تفعل بوقت فراغك
أنا بحب القراءة جدا ودي هوايتيبقرأ بوقت الفراغ أو بخرج مع صحباتي
/
/

هل لديك هوايات....وهل تمارسها
نعم هوايتي القراءة
/
/

هل تشعر برضا ربنا عنك ؟
الحمدلله بحاول على اد ما أقدر ان ربنا يرضى عني وأشعر برضصاءه متوفقة بشغلى وببيتي الحمدلله فضله عليا كبير جدا
/
/

هل تحب؟...ومن بقلبك الان؟
لاااااااااا :(
/
/
لو لم تجد من تحب ....فماذا ستفعل؟

ححط ايدي على خدي وأستنى :)
/
/
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
بحاول افهم وجهة نظرهم وأفهمهم وجهة نظري المهم مانتصدمش واعرف مين اللى وجهة نظره تستحق التطبيق
/
/


هل تتعامل بواقعيه؟

مش دايما
/
/

ماهو الشيء الذى فعلته وندمت عليه طول عمرك ؟
مكاتعودتش أعمل حاجة واندم عليها الحمدلله بس بصراحة انا تسرعت باني سيبت صاحبتي طلعت بعبرة من الزمن اني اجمد اي علاقة وماأقطعهاش مين عارف بكرة
/

جارة القمر يقول...

هل تصارح غيرك بالحقيقه ؟ ام ام تقول له مايريد سماعه؟
لا انا صريحة
/
/
صف انسان يمكن ان تحبه عمرك كله

متى يقسوقلبك ؟
ومتى يقسو لسانك؟

انا مش مهم عندي الشكل المهم عندي ان يكون جنون ويفهمني واذا فهمني مش حتكون بينا خلافات انشاءالله ..
يقسو قلبي عندما يجرحني اي شخص
يقسو لساني عندما يستفزني من اخاطبه بلغة الاحترام
/
/

من هو اول من قلت له احبك؟
شخص لا يستحق
/
/

هل يمكن ان تحب احد من المدونين؟
وهل يمكن ان يكون شريك حياتك؟
تصدقي ياماما انا سرحت بكلامك ومش عارفة اقولك ايه بس ممكن ليه لا
/
/

ماذا تعنى لك المرأة او الرجل؟
المراة هي النصف الحلو من الرجل
/
/

فى زمن البحث عن الماده ..عن ماذا تبحث انت ؟
أبحث عن الدفئ والحنان أبحث عن نفسي
/
/

متى تعرف انك تحب ؟
حينما تعلو دقات قلبي وأتفتت عندما ينطق غيري حروف اسمه ولكني لم امر بعد بتلك الحالة
/
/

ماهى الشخصيه التى اثرت بحياتك ؟
بعد رسول الله صلى الله عليه وسلم جدتي الله يرحمها
/
/


هل يوجد من تراه سعيدا فى الدنيا ولماذا ؟
مش عارفة مش حاسة حد سعيد كله بيشكي وهموم الدنيا فوق دماغه ماحدش مرتاح
/
/

سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا
لا انا عايزة اروح لصحابي بمصر والسكن وحشوني اوي بهد كدة حروح اشوف خواتي بالاردن وبعدها اخلي السواق يرجعني تاني
/
/

جارة القمر يقول...

ماهى درجة صراحتك ؟
70%
/
/

وماهى المواقف التى يمكن ان تكذب فيها ؟
حينما اشعر ان كذبي سينجي غيري ولكن بشرط الا يضر به او لا يساعده في الخطأ
/
/

هل يتغير الحب بعد الزواج؟
احياناً كثيرا نعم
/
/

فيما تفكر الان ؟
بصديقاتي في مصر
/
/


لو لم تعيش بمدينتك؟؟؟فاى مدينه اخرى تفضلها
مصر
/
/

من اول من ياتى ببالك لتحكى له اسرارك؟
لا احد احب ان احتفظ بأسراري لنفسي
تعلمت ان يظل شئ لي احتفظ به
/
/


من تريد ان يكون دائما بجوارك ؟
أمي
/
/

من هو الد اعدائك؟
لا يوجد لي اعداء الحمدلله
ولكني اكره المتملقين والذين يسعون الينا بهدف المصلحة
/
/
ومن هو صديقك
قلمي
/
/

ماهى صفات شريك العمر؟
الحنان والتفهم
/
/


لو الدنيا كلها زيك....لمن تقول هذه العباره ؟
لأمي
/
/

ماذا تكره فى الدنيا ؟
الخداع والنفاق والخيانة
/
/
وماذا تحب
احب الهدووووووووء
/
/

كيف تواجه مايضايقك
وماذا تفعل عند المفاجآت
أواجه مايضايقني بالصمت احيانا وبالخربشة وجنون
/
/


لو معاك فلوس اكثر مما تتخيل...فماذا ستفعل بها
أول حاجة حخلي امي تروح تحج وابني بيت كبير نسكن فيه كلنا انا واخوتي ونتلم من تاني وحودي الباقي للي محتاجينه
/
/


هل الفقر يصنع حبا؟؟
نعم
/
/

وماذا لو وجد الحب فى زمن الفقر المادى؟
سيستمر ان كان حب حقيقي
/
/

ماهى اقسى صدمه تعرضت لها حتى وقتنا هذا
خيانة صديقتي
/
/

وماذا كان رد فعلك
طلبت منها ان لاتعرفني مرة اخرى
/
/
وهل تعلمت منها شيء
نعم انه لا يوجد ملائكة على الأرض
/
/

هل انت على استعداد لتلقى صدمات اخرى؟؟
لاااااا
/
/


هل تصدق كل ماتقرا عن الاخرين
كيف ترد على من لاتصدقه
لا أصدق بل اسعى الى المعرفة او التقصي وارد عليه ان كل منا معرض الى ان تنتهك سيرته
/
/


اذا احببت انسان ما ...هل تصرح له بحبك ؟
نعم
/
/
وماذا تفعل لو لم يتجاوب معك؟
لن اجبره بل سأبقى احبه
/
/

هل تؤمن بالمثل القائل:انا احب فانا اعيش
نعم فبدون الحب لا تستمر الحيساة فالحب انواع ودرجات
/
/


ماهى القضايا التى تشغل بالك؟
كثييييرة جدا
/
/

هل تستطيع تحقيق كل احلامك
هل تمتلك طموحا...وماهو؟
اطمح الى ان احقق احلامي واكون انا
/
/

كيف ستحقق طموحك...ام سيبقى حلما فقط!!!!!!!!!!
ححاول احققه بالسعي والجد
/
/


ماهى علاقتك بالدنيا
مجرد زيارة قصيرة
/
/
ماهى علاقتك بالموت
ضيف قريب اتوقع وصوله باي وقت ولذلك احب ان اكون دوما مستعدة لاستقباله
/
/


لو لك اختيار زمن تعيش به....فماهوذلك الزمن ؟ ولماذا ؟
احب زمني فالعيب فينا ا فيه
المهم ان نقنع بذلك
/
/



هل يمكن ان ارا ك وانت غائب؟؟؟؟؟؟؟
نعم فقط اغمضي عينيكي وناديني
/
/

ماذا ترى فى نفسك مميزا عن الاخرين؟
لا اتعامل بأقنعة
/
/


من اذا اقترب منك ...هربت منه بعيدا؟

المنافقين
/
/

من تقول له : قرب منى قرب ...ياقلبى يا متغرب
كل اللي بحبهم ومفتقداهم
/
/


ماذا تريد ان تقوم به قبل ان تموت


ان اسجد في المسجد الاقصى
/
/


مارايك فى اسئلتى؟؟؟ وبدون مجامله
هل نسيت سؤال كان هاما بالنسبة لك؟
بصراحة اسئلتك تعري مابداخلنا بس حبيتها اوي
تسلم ايدك
:)
/
/


هل استطعت تغطية شخصيتك
مع ملاحظة انى ماليش فى الكوره..........هههههههههه

من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
بصراحة ايوة واي حد حابب يجاوب يتفضل

جارة القمر يقول...

انا نقلت الاجابة هنا

:)

غير معرف يقول...

مش عارف انتى عارفانى و لا لأ
بس اللى اقدر اقولهولك ان ليلة القدر ربنا بيقبل الدعاء
كدة عرفتينى اظن
------------
- لا تعليق
- 25
- الحمد لله مش متزوج و بالتأكيد معنديش اولاد .
- اعلام
- لا تعليق
- عمل بشهادتى
- غير معروفة
- القراءة النوم تصفح الصحف
- لا امارسها
- لا اشعر برضا الله عنى
- لا احب و ليس احد بقلبى .
- يبقى قشطة اوووى بلا حب ووجع قلب
- اشرك الأخرين
- ليس احياناً
- انى دخلت كلية انا مش قدها
- احياناً اقول الحقيقة اذا سمحت العلاقة بينى و بين الصديق ان اقول الكلام و احياناً اضطر للمجاملة .
- لا تعليق
- يقسو قلبى حين اغضب من الحياة
و يقسو لسانى حين اغضب من البشر
- لا تعليق
- بالطبع لا يمكن ان يكون احدهم شريك حياتى ، و هذا لأنى مش ناوى و الحمد لله
- المرأة شى جميل فى الحياة ينير الطريق لنا
- عن الإحترام و عن الصدق و عن تقدير الأخرين
- لا تعليق
----
يتبع

غير معرف يقول...

- مش عارف مين اثر فيا
- بالطبع هؤلاء الذين يمارسون حياتهم بشكل طبيعى
- اذهب الى بلد غير مصر .
- درجة صراحتى : صريح للغاية و بشده
و ده للأسف بيعملى مشاكل ، و انا صريح فى الكلام عن نفسى اكثر ،
المواقف اللى اكذب فيها مش عارف الصراحة او مش فاكر .
- بالطبع يتغير الحب بعد الزواج
- افكر فى محاولة ترتيب حياتى و تحويلها للافضل
- اى مدينة و السلام المهم اعرف اعيش
- اى شخص سوى اهلى .
- الله فقط اتمنى ان يكون بجوارى دوماً
- مش عارف
- مش عارف
- مش فارقة معايا لأنى مكبر من فكرة شريك العمر ديه
- لو الدنيا كلها زيك - كانت خربت
بقولها لنفسى
- مش عارف
- اواجه ما يضايقنى بمحاولة التخلص منه
و عند المفأجات مش عارف
- ههاجر من البلد ديه
- الحب و الفقر لا يجتمعان
- اقصى صدمة فى حياتى مش عارف
انا صدماتى كثيرة
- غالباً اه بصدق ، و ارد بالعقل و المنطق على ما لا اصدقه .
- اه طبعاً ، عادى مفيش نصيب
- قضايا حياتى و مستقبلى
- للأسف مش عارف احقق كل احلامى ، حيتحقق ان شاء الله يارب اكرمنا
- زى الزفت ، و بالموت زى الفل
- مش عارف مش فارقة انهى زمن المهم اقدر اعيش فيه
- مش فاهم يعنى ايه اراك و انت غائب
!!!
- يعنى مخه صاحى شغال على طووول متابع قضايا مجتمعى بشكل كويس .
- اى شخص مش بحبه
- مش عارف مين اقوله كدة
- حسن الخاتمة .
-
اسئلة جميلة بس صعبة
ده المجاملة

الصراحة بقى
اسئلة صعبة و حطت الواحد فى اختبار ممل

- و انا ماليش فى الكورة ههههه

HaMaDa 3aFshA يقول...

السلام عليكم
امى الغالية حمدا لله على سلامتك وارجو على الله ان يديم عليكى الصحة والعافية تاج جميل جدا من ام اجمل عاوزة تقرب من اولادها وتعرفهم بس طويييل يا ماما ينفع نجاوب شوية ونسيب الاسئلة المحرجة ههههههههههه ان شاء الله افضى نفسى قريب قوى وارد عليه بس عاوزة الرد هنا ولا فى مدوناتنا
ادعيلى كتير الايام دى مخنوق شوية ومتضايق نسمة اختى هتسافر لجوزها الامارات ودى اللعبة بتاعتى مش هاين عليا بعدها
تحياتى

HaMaDa 3aFshA يقول...

ماما انا كنت فاضى دلوقت فرديت علطول عندى فى بوست اسمه تاج المحبة اقرى الردود بقا واى تعليق او تحسينات نضيفها للشخصية على اتم استعداد ههههههههه دعواتك امى

غير معرف يقول...

أول مرة ادخل المدونة دى اللى بجد قلبى انفتحلها بطريقة غريبة والميزة انى بقلب بالصدفة حتى من غير ما ادخل باسم مدونتى قلت اعملها فيهااثارة واعمل نيك نيم وان شاء الله اما ادخل من مدونتى هزورك تانى انا رغاى اوى ايه دا بس اسمحيلى أجاوب على التاج لأن اسئلته فعلا مميزة ومريحة جدا .........

**انا انسان عادى بحلم بتغيير الواقع للأحسن وبحلم ان كل الناس تعيش من اجل الحرية فىا لتفكير وان كل حد ياخد حقه فى الحياة واننا نصنع الحضارة لبلدنا بجد .

**انا 21 سنة

**مش متزوج الحمد لله ولا عندى أولاد
انا عاااااازب وأفتخر

** بدرس حاسبات ومعلومات
**انا طولى 165 لونى ابيض وحليوة

** لسة مفيش عمل لانى لسة بدرس بس فى نشاطات وعادى بتبقى بعيد عن مجال دراستى

** مدة عملى او مدة انشغالى فى اليوم 10 ساعات تقريبا

**وقت فراغ تقريبا معنديش بس لو فى بقرأ بسمع مزيكا اشوف فيدويهات تنمية بشرية اخرج اقعد فى اى مكان

** هوايات فى كتير بس مش بمارسها باستمرار اقرب حاجةا لقراءة واحيانا السباحة

** لا اشعر برضا ربنا عنى

** حب عاطفى من نوع خاص وانسانة اتمنى ان يجعلنى اراعيه فى كل خطوة معاها

** لو لم أجد من أحب عاااااادى دا بالنسبة للحب العاطفى لانى جربت المرحلة دى ومدة سنين كبيرة وتأقلمت والحياة كانت طبيعية

** عندما اكون فى موقف اتخاذ القرار
استمع لكل الناس وفى الأخر نفذ قرارى اللى انا مقتنع بيه

** الحمد لله أتعامل بواقعية جدا

** ندمت على مواجهتى لأهلى فى وقت معين من حياتى
على حالة اللامبالاة اللتى عشتها فى فترة من حياتى
على قرارت خاطئة اخذتها بطريقة التسرع

** اصارح غيرى بالحقيقة دائما ولكن فى وقتها وهذا يدل على انه احيانا اقول له ما يريد سماعه فى الحياة حتى ياتى الوقت المناسب لقول الحقيقة

** الانسان الذى يمكن ان احبه عمرى كله
الصادق..الذكى..الاجتماعى..المتميز..المنطلق..الحر فى التفكير وفى كل شىء ...الذى يحب الأخرين بدون اى مقابل

** يقسو قلبى عندما أشعر بالاهانة او الظلم
** يقسو لسانى عندنا أشعر بنفس السببين

** أول حب فى حياتى كانت انسانة غالية جدا

** ممكن انا احب احد من المدونين عادى ايه المشكلة
وممكن ان يكون شريك حياتى مفيش مشاكل برده

** المرأة دافع الحياة فى كل وقت وكل زمان ولكل انسان وتملك القدرة على تغيير اشياء كثيرة بواسطة الرجل

** انا ابحث عن احساسى بذاتى
مسلم مصرى عربى ينجح فى مجاله وينشر علمه واسلوبه فى كل انحاء العالم وتنظر الينا الامم والى حضارتنا من جديد لانى بحب البلد دى اكتر من اى شىء

**اعرف اننى احب عندما اشعر باننى التفت لكلام شخص ما او اشعر انه يتعمق فى حياتى وتفكيرى ويجعلنى افكر ماذا بعد او ماذا قبل ا تتغير حياتى لطريق لا اريده لو اقتنع بفكر لم اكون فى حاجة اليه

** الشخصيات اللتى اثرت فى حياتى
كتير منها العام عمرو خالد وابراهيم الفقى وعمرو دياب وصلاح جاهين وفيروز وفاروق جويدة وناس حواليا كتير بدون ذكر ساميهم بقى

** دائما الاحظ اننا نجعل السعادة طريق لو احتجنا لها ولكن معظم الناس يبحث عن المتاعب ويشعر دائما بالنقص اذا السعيد فى الدنيا هو من يشعر بالرضا والقناعة

** سيارة وسائق حاليا أذهب لمكان معين فيه حد معين واقضى معاه وقت اسعده فيه بجد لغاية اما احس انه فى قمة سعادنه ارجع بقى

** درجة صراحتى اظن انها اعلى الدرجات لانى بشوف ان مفيش حاجة فى الدنيا تستاهل الكدب

** يتغير الحب بعد الزواج لأن الازواج لا يهتموا به انما الحب يظل الحب ولكن مع كتر المسئولية يتحول نفسه الى مسئولية

** بفكر ان ربنا يفك عنى ويكرمنى ويوفقنى فى الوقت الجاى ويحققلى راحة البال ويدينى على قد صدق نيتى فى اى حاجة بعملها

اسماء واحلام فى وجدانى يقول...

انت مين بقى؟
احمد

عندك كام سنه؟
31

هل انت متزوج ؟ وهل عندك اولاد؟
الحمدلله لسة

دراستك ايه؟
الكترونيات

كم طولك...وما لونك...
طيب ليه الكثوف ده
لونى فى الصيف يعنى
وفى الشتا ابيض


هل تمارس عملا بشهادتك ام عمل حر وماهو
لو اشتغلت زى ما اتعلمت كنت هابقى حرامى


ماهى مدة عملك اليوميه
اليومين دول مانتخ شوية

ماذا تفعل بوقت فراغك
باكتب

هل لديك هوايات....وهل تمارسها
الكتابة ثم الكتابة ثم الكتابة

هل تشعر برضا ربنا عنك ؟
باتمنا ان اشعر بــ ده طبعا
حاستها قبل كده كتير الحمد لله

هل تحب؟...ومن بقلبك الان؟
نعم احب
كل الناس اللى حواليا

لو لم تجد من تحب ....فماذا ستفعل؟
هانتحر طبعا

عندما تكون فى موقف اتخاذ القرار..تخالف الجماعه.. ام تشرك معك الاخرين ؟
لو لاقيت نفسى لوحدى بادور على حد اخد رايه


هل تتعامل بواقعيه؟
لامة كنت باتعامل بواقعية فى بعض الامور باحس باحساس صعب


ماهو الشيء الذى فعلته وندمت عليه طول عمرك ؟
مدونتى عى اكتر حاجة عملتها وندمت عليها


هل تصارح غيرك بالحقيقه ؟ ام ام تقول له مايريد سماعه؟
الاجابة على السؤال ده عند اللى يعرفنى مش عندى

صف انسان يمكن ان تحبه عمرك كله
الرسول صلى الله عليه وسلم


متى يقسوقلبك ؟
ياريتنى اقدر
ومتى يقسو لسانك؟
مش فاهم السؤال


من هو اول من قلت له احبك؟
هو اول من جعلنى اشعر بانى انسان وله قلب


هل يمكن ان تحب احد من المدونين؟
ممكن طبعا ليه لآ
وهل يمكن ان يكون شريك حياتك؟
كل شىء قسمة ونصيب


ماذا تعنى لك المرأة ؟
راحة بعد عناء وشقاء طويل جدا


فى زمن البحث عن الماده ..عن ماذا تبحث انت ؟
ابحث عن انسانة يقال وصفها انها قلب داخل قلب
متى تعرف انك تحب ؟
عندما تكتمل نبضات قلبى


ماهى الشخصيه التى اثرت بحياتك ؟
الهام مدرستى اللى باحبها اوى
وسميت مدونتى على اسمها


هل يوجد من تراه سعيدا فى الدنيا ولماذا ؟
أنا
لاننى اقتربت من هدفين تمنيتهم فى حياتى


سياره وسائق ووقت متاح ....تذهب الى اين ؟ ولمن ؟ بالترتيب
لا احتاج الا الى الوقت فقط
ام تفضل ان تكون وحيدا
الوحدة اعشقها وانميها دوما فى حياتى


ماهى درجة صراحتك ؟
الحمدلله
بس صراحتى خسرتنى كل شغل امسه
وماهى المواقف التى يمكن ان تكذب فيها ؟
انا مش هاتجمل ولا حاجة بس اى غلطة كنت باعملها
بالاقينى مش مظبوط غير لامة اعترف بيها
بس للاسف فى نوادر اجبرتنى انى اخفيها
ربنا يسامحنى عليها


هل يتغير الحب بعد الزواج؟
لو كان الحب قبل الزواج كامل الاركان صعب يقل
بس انا مقتنع بحاجة واحدة ممكن تحافظ على الحياة الاسرية كحب وكله
ان اى مشكلة مهما كانت تافهة لو خرجت برة باب البيت
يبقى انسا المشكلة هتكبر ومش هتخلص وعلى اساسها
هتحصل اى مشكلة بعد كده هتبدا كبيرة


فيما تفكر الان ؟
دلوقتى بافكر فى انسانة غالية عندى اوى كانت تعبانة فى اول الاسبوع ده
بس النهاردة ماشاء الله يارب دايما اشوفها كده يارب


لو لم تعيش بمدينتك؟؟؟فاى مدينه اخرى تفضلها
اولا انا مش متخيل نفسى برة اسكندرية نهائى
بس بلد زوجتى لان زوجتى هى كل سكنى ومامنى


من اول من ياتى ببالك لتحكى له اسرارك؟
قلب قلبى

اسماء واحلام فى وجدانى يقول...

من تريد ان يكون دائما بجوارك ؟
كل الناس اللى اعرفها


من هو الد اعدائك؟
هو فى غيره اللى مدوخ الناس الزمن
ومن هو صديقك
قلمى


ماهى صفات شريكة العمر؟
ان تتقى الله فى معاملتى


لو الدنيا كلها زيك....لمن تقول هذه العباره ؟
معلشى يا امى مش فاهم السؤال
فين اللى هاقوله


ماذا تكره فى الدنيا ؟
حاجات كتير اوى وتقريبا ده الطبيعى
وماذا تحب
الكتابة اوى

كيف تواجه مايضايقك
لو حسيت انه هاجرحه بكلامى باسكت وباسلم امرى لله
وبردوا باقعد اكتب لانها بتنسينى بسرعة اوى


وماذا تفعل عند المفاجآت
الحلوة بافرح اوى


لو معاك فلوس اكثر مما تتخيل...فماذا ستفعل بها
هابنى بيت كبير اوى اوى اوى اوى
نصفه للقطط والنص التانى للكلاب اللى البلد فاكراها وباء

هل الفقر يصنع حبا؟؟
ما اعرفه ان الحب يقتل فقرا
يمكن تكون اجابتى غير واقعية لبعض الناس
بس انا عن نفسى مقتنع بيها جدا
بلغة العقل ولغة القلب كمان


وماذا لو وجد الحب فى زمن الفقر المادى؟
للاسف اكتر الناس بتحكم بعقلها دلوقتى

ماهى اقسى صدمه تعرضت لها حتى وقتنا هذا
لا تعليق
وماذا كان رد فعلك
لا تعليق
وهل تعلمت منها شيء
لا تعليق
هل انت على استعداد لتلقى صدمات اخرى؟؟
كده كفاية اوى الحمدلله على كل حاجة


هل تصدق كل ماتقرا عن الاخرين
احيانا
كيف ترد على من لاتصدقه
لا اضع اى حرف من قلمى
لانى اكتب بقلبى


اذا احببت انسان ما ...هل تصرح له بحبك ؟
لو كانت ظروفى تسمح بذلك


وماذا تفعل لو لم يتجاوب معك؟
متهيلى انى هاحس قبل ما اصارحه


هل تؤمن بالمثل القائل:انا احب فانا اعيش
بكل تاكيد على الاقل لواحد زيى


ماهى القضايا التى تشغل بالك؟
مع انى حزين على فلسطين اوى بس مش باحب اتكلم فى اى شىء يخص القضايا دى


هل تستطيع تحقيق كل احلامك
الدنيا مش بتدى الواحد كل اللى هو عايزه
ودى سنة الحياة


هل تمتلك طموحا...وماهو؟
طبعا امتلك طموحا
اسعد الانسانة اللى هارتبط بيها
واعمل كتاب


كيف ستحقق طموحك...ام سيبقى حلما فقط!!!!!!!!!!
باذن الله باحاول


وكمان ربنا رزقنى بناس مهما قلت عنهم مش هاقدر اوفيهم حقهم عليا
ونفسى فى كل حاجة جميلة ربنا يكرمهم بيها يارب

ماهى علاقتك بالدنيا
مش عارف
ماهى علاقتك بالموت
بردوا مش عارف


لو لك اختيار زمن تعيش به....فماهوذلك الزمن ؟ ولماذا ؟
كل واحد بيعيش زمنه الحمد لله


هل يمكن ان ارا ك وانت غائب؟؟؟؟؟؟؟
لو القلب صادق فى حب انسان لازم هيشوفه فى كل وقت وفى اى مكان

ماذا ترى فى نفسك مميزا عن الاخرين؟
لا ارى اى شىء


من اذا اقترب منك ...هربت منه بعيدا؟
حاجة جوايا


من تقول له : قرب منى قرب ...ياقلبى يا متغرب
والله انا حاسس انك حاسة بيا اوى

ماذا تريد ان تقوم به قبل ان تموت
ربنا يغفرلى ذنوبى




مارايك فى اسئلتى؟؟؟ وبدون مجامله
دى مش اسئلة
دى برنامج غسيل


هل نسيت سؤال كان هاما بالنسبة لك؟
الحمدلله لو كنتى نسيتى حاجة
هل استطعت تغطية شخصيتك
مش عارف بس تقريبا لآ
مع ملاحظة انى ماليش فى الكوره..........هههههههههه

من يهمك ان يجاوب على هذه
الاسئله؟؟؟؟؟؟؟؟؟؟؟؟؟؟؟؟؟
كل ولادك بلا استثناء
وياريت تضيفى سؤال ليويو
عايز اعرف بتحس بايه باللى بتعمله فى الناس
بس اعتراف بسيط كده على الماشى انا باحب حضرتك اوى من قلبى يا امى

اسماء واحلام فى وجدانى يقول...

بالنسبة لموضوع القرار ده لو مش لاقيت حد قصادى بادعى ربنا انه يهدينى للصح والحمد لله دايما ربنا موفقنى الحمد لله
لانى من جوايا باعشق المسئولية اوى
وباحب ان الاقى حد مسئول منى

الأحــــــ إيناس ــــــزان يقول...

انا مأقدرش انساكى لانك جوايا

بس والله غصب عنى
وياريتنى ما روحت انا مبسوطه انى اتبرعت بالدم بس بس قلبت بكلام ما كانش له لذمة كرهنى فى الحياة وفى نفسى

ياريت متزعليش منى
واسفه انى متأخرة عليكى

برجع من شغلى متأخرة ومعتش بقعد نت كتير والله

ادعيلى الازمة دى تعدى على خير
بحبك قووووووووووى

الأحــــــ إيناس ــــــزان يقول...

انت مين بقى؟

عندك كام سنه؟


انا ايناس مصطفى
بنت بتتمنا رضا ربنا وتعيش سعيده

عندى 30 سنه


ومش متزوجه ربنا يكرمنا جمعيآ يارب

دراستى معهد فنى صناعى هندسة ميكانيكية

طولى 162
لونى بيضه وبنوته امورة ووثقه من نفسى قووى


عملى بعيد عن نوع دراستى وعايشة الحمد لله


طول اليوم مشغوله فى عملى وبرجع متاخر اشوف شغل البيت وبليل بقعد نت شوية وخلاص
ساعات بحس كتير ان ربنا راضى عنى كتير قووى
والحمد لله على كل

معلهش
انا مش هقدر اجاواب على باقى الاسئلة لانى بجد تعبانه قووووووووووى
ادعيلى يا غالية
لا اله الا الله
بحبك قووووووووووى

TWEETY يقول...

ازيك ياطانت

يارب تكونى بخير

بدراوى يقول...

انا غير المعرف
اللى كتب ليلة القدر فى الكلام
شوفتى ادينى جاوبت على التاج ازاى
بس محبتش اظهر

أليس في بلاد العجائب يقول...

السلام عليكم ورحمة الله وبركاته

يا رب تكوني حضرتك بخير
شفاكِ الله وعافاكِ ان شاء الله يجعله اجر و عافيه وطهورة ان شاء الله

أبكتني الاسئلة بصراحة بس اشكرك لانك فكرتيني بكام حاجة لو كنت المفروض اجاوب علي الاسئلة كان المفروض افتكرها و افكر نفسي بيها ..
تاهت مني وتهت عنها

شايفة ليكي حق تسألي عن كل الحاجات دي خصوصا عن الناس اللي بتحبيها لانك اكيد عايزة تعرفي الناس الي بتكتبيلهم وبيكتبولهم هما مين في الحقيقة
يمكن اللقاءات اللي حصلت تكون عرفت حبة بحبة ناس ببعضها او اللي بيقرأ الكتابات عنها بعدها .. بردة بتعرف حاجات شوية عن الشخصيات


بس تفضل داخل كل واحد شخصية ميعرفهاش الا هو
ويمكن يكون جزء كبير من الشخصية دي بتبان في التدوين
لانه كسر حاجز الخوف لانه غريب وسط غرباء و ان قربوا من بعض بردة طالما علاقتهم كلام وبس

اما لو تحولت لمشاركة حقيقية في الحياة .. هتفرق كتير طبعا وهيبقي عارف عن الاخر اللي غيره من اهل الواقع ميعرفهوش .. فبالتاني بيتهيالي تزيد صعوبة الشخص انه يقدر يحس بنفس قدر الحرية الممنوحة له عن طريق التدوين كغريب بين غرباء .. مش عارفة انا غلط ولا صح

بس عموما بردة اشكرك علي الاسئلة اللي تحولت عندي لتنبيهات لحاجات كتيرة كنت نسيتها :)
ومعذرة علي الاطالة و اتركك في حفظ الله :)

(المهاجر الى الله) يقول...

انا هاحل التاج فى مدونتى

فكرة من الزمن ده يقول...
أزال المؤلف هذا التعليق.
فكرة من الزمن ده يقول...
أزال المؤلف هذا التعليق.
فكرة من الزمن ده يقول...
أزال المؤلف هذا التعليق.
فكرة من الزمن ده يقول...
أزال المؤلف هذا التعليق.
غير معرف يقول...

انت مين بقى؟
منى
بس بحب منوش
وحبيت فكرة
عندك كام سنه؟
قربت اقول اني في التلاتينات يعني تقدري تقولي فاضل سنتين الا حتة؟
حد خد باله؟
هل انت متزوج ؟ وهل عندك اولاد؟
لا لا
دراستك ايه؟
محاسبة
كم طولك...وما لونك...
170 سم....ومن غير كعب 166 165 مش عارفة ليه
هل تمارس عملا بشهادتك ام عمل حر وماهو
نعم
ماهى مدة عملك اليوميه
6 ساعات وممكن تزيد
ماذا تفعل بوقت فراغك
كل حاجة واي حاجة بحب حاجات كتيرة جدا
والحمدلله عندي هوايات كتير وبعرف اعملها
يعني باعرف اخيط واطرز واصلح اي حاجة وممكن تتصلح واحيانا تفرقع او تتحرق
ساعاتها بقى اقول لابويا وديها لحد مختص يصلحها او ارميها احسن
هل لديك هوايات....وهل تمارسها
باسمع موسيقى واغني لوحدي من غير محد يسمع (مكرهتش حد للدرجة دي)ههههه
اقرا القران
واسمعه
اتصل بكل اللي اعرفهم
اخترع في المطبخ اي حاجة وارميها بسرعة

اطفي النور واقفل عليا وانام صاحية مدة طويلة
اسرح في لاشيء واستمتع اني ما اردش على حد الا لما ابطل وصلة السرحان بتاعتي
وحجات تانية كتير
خليها في سرك بقى اكيد عندك في البيت منها بنسميها جنونات
طبعا مش باعمل كل ده مرة واحدة مع بعض
لكن على حسب مودي وقت الفراغ
هل تشعر برضا ربنا عنك ؟
اتمنى اني اوصل لكده
وكتير حسيت بكده في فترات عدت وكنت من فرحتي مش مصدقة

هل تحب؟...ومن بقلبك الان؟
بحب ناس كتير اوي بجد بجد لو قلت مش هلاقي ورق يكفي
لو لم تجد من تحب ....فماذا ستفعل؟
لو الحب الرومانسي بين امراة ورجل عادي اعيش حياتي سعيدة وراضية ومريحة دماغي اما الحب الاجتماعي اللي بين الناس كلها مقدرش اعيش من غيره مش يوم واحد لا لحظة واحدة الدنيا تسود
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
على حسب نوعية القرار
ممكن في قرارات لازم اخدها انا لوحدي ولو وقف الجميع شقلباز
وفي قرارات لازم ناخد راي الناس فيها على حسب صلاتهم بالموضوع
هل تتعامل بواقعيه؟
جداااااااا
ماهو الشيء الذى فعلته وندمت عليه طول عمرك ؟
الحمدلله مافيش ندم لاكن في مراجعة للنفس على طول
هل تصارح غيرك بالحقيقه ؟ ام ام تقول له مايريد سماعه؟
اصارح بالحقيقة معظم الاوقات الا في اوقات معينة تجبرك الحياة العملية على تقمصها
صف انسان يمكن ان تحبه عمرك كله
انسان بحبه
ده الوصف
لاني لما احب شخص بحبه زي ماهو
مراية الحب بايظة
متى يقسوقلبك ؟
مش باعرف
لكن ممكن في حالات خاصة على شخص معين
عندما اشعر بتعمد استغضابي مهما كانت اسبابه

غير معرف يقول...

ومتى يقسو لسانك؟
عندما يستفز قلبي
من هو اول من قلت له احبك؟
قلتها مرة واحدة فقط
هل يمكن ان تحب احد من المدونين؟
مممممم ممكن اوي
وهل يمكن ان يكون شريك حياتك؟
ممممم برضو ممكن اوي كل شيء بيد الله والقلوب بين اصبعين من اصابع الرحمن
ماذا تعنى لك المرأة او الرجل؟
المراة هي نصل الرجل الحلو والرجل هو كل حياة المراة ودنيتها وامانها
فى زمن البحث عن الماده ..عن ماذا تبحث انت ؟
الهدوء والاستقرار
متى تعرف انك تحب ؟
عندما تلح بداخلي كلمة احبك واتمنى ان اقولها
ماهى الشخصيه التى اثرت بحياتك ؟
سيدنا محمد عليه الصلاة والسلام ومدرستي في ابتدائي
وابويا وامي وجدتي
هل يوجد من تراه سعيدا فى الدنيا ولماذا ؟
اعتقد ان كل انسان يفتقد لشيء قد يظن ان من يملك هذا الشيء سعيد
وهذه النظرة دائما تكون متبادلة بين شخصين متضادين
سياره وسائق ووقت متاح ....تذهب الى اين ؟ ولمن ؟ بالترتيب
امشي على البحر لوحدي من غير اي حد من اول سور المنتزة قدام شيراتون لحد القلعة وارجع ادخل الانفوشي والف وارجع من اول وجديد وكل ما يخلص بنزين املى تاني بشرط يكون بالليل ومفيش ناس ولما ازهق انزل اعمل اللفة دي برجليا لغاية ما اتعب

ام تفضل ان تكون وحيدا

ماهى درجة صراحتك ؟
80%
وماهى المواقف التى يمكن
ان تكذب فيها ؟
عندما اجد من امامي يتذاكي ويكدب عليا فيكون انسب عقاب ليه اني اوهمه اني صدقته واكدب عليه ايضا
هل يتغير الحب بعد الزواج؟
اكييييد
لكن بيختلف
في حب بيقوى وبيشتد
وفي حب بيقوى لكن بيبقى عادي وشيء نفروع منه
وفي حب بيتحول الي شيء بغيض وانتهاء الحياة افضل من وجودها
فيما تفكر الان ؟
فيكي حضرتك وانتي بتقري اجاباتي وبتفكري في ايه
لو لم تعيش بمدينتك؟؟؟فاى مدينه اخرى تفضلها
بحبها جدا لكن اتمنى اعيش في جزيرة خيالية
من اول من ياتى ببالك لتحكى له اسرارك؟
البحرررررر ودايما باعمل ده لما اكون هناك
من تريد ان يكون دائما بجوارك ؟
اي شخص انا بحبه
من هو الد اعدائك؟
من يكرهني للا سبب
ومن هو صديقك
صديقاتاي المقربتان حلوة المقربتان دي
عربي اهو لغة مش اي كلام
احنا عكس بعض في كل حاجة في التفكير في اللبس وفي الدماغ
لكن دايما بنكمل بعض ونشتم بعض ونتخانق واحنا بنودع بعض نقول اوعي تتاخري
ماهى صفات شريك العمر؟
اني يكون حبيبي
يعني لما حبه زي ماهو ولو كان كوم عضم في قفه
تعبير سمعته زمان وعجبني
وفعلا
لو اسود اقرع بدقن بشنب طويل قصير
تخين رفيع بكرش من غير
مش مهم اللي بيحب بيشوف حبيبه اجمل انسان في الدنيا
لكن طبعا اكيد الزم يكون مهندم يعني مش لبسه من عند ارماني ولا لابس بالشيء الفلاني لكن المظهر اللي يكون مريح
والجزمة اول ما يلفت نظري في الرجل
سوري يعني ليه مش عارفة

ان يكون عطوف حنين
متفهم يحس بيا من كلمة واحدة ومن غير شرح كتير لان الحكاية دي بتنرفزني مووووت
ذكي عقلي اكبر مني يبهرني بعقله وتفكيره
اهتمامتنا واحدة اتنماءتنا واحدة
كل الحاجات اللي عايزة اكون موجودة يحب يكون فيها
لايغير نفسه علشاني ولا اغير نفسي علشانه
كل واحد يحب التاني زي ماهو
لو الدنيا كلها زيك....لمن تقول هذه العباره ؟
محمد عليه الصلاة والسلام
ماذا تكره فى الدنيا ؟
الفراق
سواء بسفر ببعد بموت
وماذا تحب
كل جميل في الدنيا يتحب
كيف تواجه مايضايقك
مافيش قاعدة لكل مقام مقال

غير معرف يقول...

وماذا تفعل عند المفاجآت
الصمت والتتنيح
وبعدين بسرعة باقدر استوعب وافكر التصرف اللي اخده
لو معاك فلوس اكثر مما تتخيل...فماذا ستفعل بها
لو اكتر مما تتخيل نفسي ماشوفش حد هدومه مقطعة ولا ناس بتاكل من الزبالة ولا حد ماشي حافي
ولاناس نايمة على الرؤصيف ولا شاب قاعد من غير شغل لو تكفي الفلوس اللي اكتر مما اتخيل ده كله هاعمل
واكيد هاتبقى الفلوس اللي على اد ما اتخيل بقى تكفي احلامي انا لنفسي
هل الفقر يصنع حبا؟؟
مممممممم
بجد مش عارفة
لكن ممكن عن نفسي
لما اعيش مع من احب اكيد هي دي اكبر هدية في الدنيا ومفيش حاجة تانية ممكن تفرحني من مباهج الدنيا لانها كلها بتزول الفرحة بيها بعد شوية ودي مش خيالية لا بالعكس دي واقعية

وماذا لو وجد الحب فى زمن الفقر المادى؟
حيهون كتير من مصايب الدنيا
ماهى اقسى صدمه تعرضت لها حتى وقتنا هذا
الفراق وخصوصا لما يكون بدون اختيار يعني مفروض علينا احنا واللي بنفارقهم
بيبقى زي اللي بيقتل ابنه باديه
وماذا كان رد فعلك
الطبيعي حزن ثم سلوى لان ده حصل كتير اوي وطول حياتنا بنفارق ناس بنحبهم
وهل تعلمت منها شيء
اتعلمت ان الدنيا لا يامنها الا المجانين
لا حاسين ولا فاهمين
هل انت على استعداد لتلقى صدمات اخرى؟؟
اكيد طالما تخطيت واحدة فباذن الله ربي سوف يعنني على تخطي اي شيء وممكن تكون تجهيز ليا لاني اتحمل اشياء اخرى الله اعلم
وادعو ربيس انه لو كان لي نصيب في الابتلاءات يبعت لي ابتلاءات على ادي
يعني اقدر اتحملها اعدي وانحج في الاختبار
هل تصدق كل ماتقرا عن الاخرين
كل مايقوله لي شخص عن نفسه اصدقه فورا حتى ولو شفته كذب فممكن الشخص يكذب لما بيتكلم عن نفسه
وهو مش حاسس انه بيكدب
بيكون بيحاول يكون اللي بيتمناه
ففي الحالة دي لا اغضب منه ولا اعتبره كداب
لكن اللي اقراه في صحف عن شخصية معينة او كده لا طبعا بصدق حسب مننطق عقلي ما يقولي
كيف ترد على من لاتصدقه
لو يهمني هاقول له انا مش مصدقاك
اما لو مايهمنيش هاوهمه اني مصدقاه جدا وده ابسط جزاء ليه في رايي
اذا احببت انسان ما ...هل تصرح له بحبك ؟
طبعا لا ولا المح حتى
ودي مش رجعية لكن طبعي
وماذا تفعل لو لم يتجاوب معك؟
ممكن استمر في الحب الصامت الي ان يقضى الله امرا كان مفعولا
هل تؤمن بالمثل القائل:انا احب فانا اعيش
اكيد الحب ليه اشكال كتير
ماهى القضايا التى تشغل بالك؟
كل حاجة في الدنيا سياسة اقتصاد سنيما ادب محاسبة كمبيوتر معلومات حيوانات جريمة وقانون بحب اقرا في كل واهتم باي حاجة
هل تستطيع تحقيق كل احلامك
لا اعتقد
هل تمتلك طموحا...وماهو؟
اعمل مذيعة
كيف ستحقق طموحك...ام سيبقى حلما فقط!!!!!!!!!!
اعتقد انه سيظل حلم
ماهى علاقتك بالدنيا
عابرة سبيل
ماهى علاقتك بالموت
اخشاه واعرف انه قريب وادعو من الله ان لايميتني الا وهو راض عني
لو لك اختيار زمن تعيش به....فماهوذلك الزمن ؟ ولماذا ؟

زمن روميو وجولييت
او التلاتينات رومانسية الاتنين بحبهم
هل يمكن ان ارا ك وانت غائب؟؟؟؟؟؟؟
اكيد مثلما اراكي وانت متغيبة
ماذا ترى فى نفسك مميزا عن الاخرين؟
انني ارى نفسي كما انا لا اجلدها ولا اراني ملاك اعرف عيوبي ومميزاتي بدون غرور او تواضع وكذلك ارى كل من حولي ولا ارى الشخص وحش لاني باكرهه
ممكن اوي اعجب بصفات في شخص اكره وممكن اكره صفات في شخص احيه وانتقدها

من اذا اقترب منك ...هربت منه بعيدا؟
مفيش حد
لاني الحمدلله لا اخشى مواجهة اي انسان
لكن ممكن اللي اهرب منه شخص ريحته وحشة
ههههههههههه
بجد\

من تقول له : قرب منى قرب ...ياقلبى يا متغرب
كل الناس اللي واحشاني
ماذا تريد ان تقوم به قبل ان تموت
صدقة جارية لي ولكل من احبهم



مارايك فى اسئلتى؟؟؟ وبدون مجامله
روعة وجميلة وتمس القلب وشعرت اني ادردش معاك بجد
لكن مشض هتفلتي منها لااازم تجاوبي كمان عليها
هل نسيت سؤال كان هاما بالنسبة لك؟
ياخبر اكتر من كده مافيش غير لون شرابك ايه هههههههههههههههههههه
هل استطعت تغطية شخصيتك
اكيد حضرتك اللي تحكمي قدرتي تعرفيني وتقربي مني ولا لا
مع ملاحظة انى ماليش فى الكوره..........هههههههههه
ليه دي الكورة اجوان
من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
كل اعضاء مربع الشر والاعضاء الجدد وكل الناس اللي باعلق عندهم باستمرار

فكرة من الزمن ده يقول...
أزال المؤلف هذا التعليق.
غير معرف يقول...

انا رغيت كتير اوي لاني حسيت اني باتكلم معاكي وحسيت كمان ان حضرتك نفسك نتكلم معاكي
لكن لما شفت منظر ردودي اتخضيت مكنت اتخيسل اني رغاية بالشكل المرعب ده
فياريت تشيليهم بقى احسن شكلي وحش والله
محدش عمل اللي انا عملته

فكرة من الزمن ده يقول...
أزال المؤلف هذا التعليق.
غير معرف يقول...

في كلمة نسيتها
لوني
لوني ابيض ساعت اسمر اوقات احمر في الازمات
ههههههههههههه
يبقى اسمر طبعا لامة اقضي يوم في البحر



هههههههههههه

كل ما اجي اكتب تعليق جديد انسى اعمل نفسي انونوميس
ههههههههه