الاثنين، ١٤ فبراير ٢٠١١

الله اكبر ولله الحمد

بسم الله الرحمن الرحيم

هذه مناسبه لايجدى فيها التحجج بالمرض او الانشغال باى شيء
هذه فرحه وسعادة احسست فيها بانى اصبحت كالطفله التى انتظرت طويلا طويلا مجيء العيد
وهاهو قد اتى بعد طول انتظار
لقد مللت ..ولقد فقدت الامل..ولقد نفذ صبرى..ولكم عشت الاحباط الا ارى هذا اليوم قبل موتى
ولكنه اتى ..اتى الفجر الجديد..يحمل الامل والتفاؤل والبشر لابنائى وابناء بلدى الشباب
كنت انظر للشباب واقول فى نفسى ربنا معاكم ويصبركم ومنه لله اللى خد الامل منكم
البلد اصبحت للاثرياء فقط
الوظائف لابناء الكبار..مصالح الدولة للكبار..
لامكان للدبلومات ولا حتى للبكالوريوس المتواضع من الجامعات الحكوميه...انها شهادة يضحكوا بيها على الفقراء فقط
الان اصبح يوجد امل
باعوا المصانع وباعوا الارض..وبنوا عليها عمارات بالملايين
من يشترى غيرهم
من يشترى الا من تغرب عشرات السنين وضيع عمره وشبابه من اجل شقه
ومن اين ياتى الفقير بثمنها فى بلد تعطى من وجد وظيفه بملاليم...وهم يأخذوا بالمليارات سرقة وعمولات وفساد
ثم يأتوا لينظروا الينا بأحتقار..لاننا اولاد البطه السودا..نحن الخدم للحرامية والمفسدين
انا واحدة من البلدى..انا واحده عاشت ايام الكيلو لحمة من الجزار ب75 قرش اه والله
وعشت لما شفته ب75 جنيه اه يازمن الفلوس اللى اضعفت النفوس
يعنى المدرس المتعاقد يجيب بماهيته اتنين كيلو لحمة ويشحت باقى الشهر
كلام كتير نفسى ااقوله....
اول شيء... ان الشهداء اللى ضحوا علشانى وعلشان ولادى وعلشان كل المصريين دول عمرنا ماهننساهم وان شاء الله فى جنة الخلد وربنا يصبر اهاليهم

تانى شيء...بقول لكل شاب وفتاة وكل رجل وكل سيدة من اللى تواجدوا فى ميدان الثوره ...واللى اتوجدوا فى مكان على ارض مصر ..فى ميادينها وشوارعها من الجنوب حتى الشمال
الف شكر والف تحية ولكم تعظيم سلام.. انا معرفكوش شخصيا لكن شوفت انتوا اد ايه تعبتوا وسهرتوا وجاهدتوا وصبرتوا ونمتوا على الارض واتنبح صوتكوا
تحياتى لوائل غنيم
تحياتى لاسراء محفوظ ...ولكل اسم ساهم وشارك فى صنع ثورة الفيس بوك
تحياتى للسباك اللى عامل دوراة المياه
تحياتى للكهربائى والمهندس اللى عملوا وصلات الكهرباء
تحياتى للى ودا سندوتشات((الهمبورجر والكنتاكى))حسبى الله ونعم الوكيل فى اللى طلعت واللى ساعدوها انها تطلع وتقول دول مأجورين ومتدربين فى ايران وامريكا وبياخدوا فى اليوم 50 يورو
اقسم بالله العظيم ماصدقت منها ولا حرف من اول ماتكلمت..وقلت دى مأجورة وكلبه من كلاب الحزب الواطى

تالت حاجه...اشكر ولادى الثوار انهم خلونا نتكلم بعد الخوف اللى كان معششفى قلوبنا واعترف انى واحده من اللى كانوا خايفين على لقمة العيش وخايفة لايؤذوا ولادى كنت خايفة من البهدلة
ولكن الثوار ماخافوش ولا انحنوا..الله اكبر على شبابك يامصر
ربنا يحميكم ويعزكم وينور طريقكم ويحفظكم من كل سوء
ويارب تكون مصر ليكم احسن من مصر اللى شفنها على قبل كدا
يارب يجيلنا رئيس دوله تحبوه زى ماحبانا عبد الناصر
انا بحبه لغاية دلوقتى رغم انى كنت صغيره لما مات.. بس فاكره بكاء امى وابويا عليه.. فاكره السواد اللى كانت مصر متلفحه بيه يوم جنازته
عبد الناصر اللى بنى المصانع والمدارس عبد الناصر اللى بنى السد العالى ونور مصر
مش اللى باع المصانع وحط فلوسها فى جيبه وجيب المنتفعين
مش اللى بنى الجامعات الامريكيه والالمانيه واللى واللى
مش اللى باع ارض مصر للمنتفعين بتراب الفلوس وقبضوا الملايين من تسقيعها
كلنا عارفين الكلام ده بس كنا ساكتين من ضعفنا وخوفنا
وفى غيرنا قال واتكلم ولكن لاحياة لمن تنادى
وجه شباب زى الورد ورافع راسنا وقال كفايه ظلم وفساد وربنا قواهم ونصرهم بدعوات الامهات المقهورات غما وحزنا على دماء ابنائهم الشهداء
ياقلبى على كل ابن
والله حاسه بقلب كل ام وكل اخ وكل اب..لانى جربت فقد الاحبه
ربنا معاكم ويعوضكم عنهم كل خيروعزائنا فيهم انهم فى جنة الخلد بأذن الله
اخر حاجة نفسى فيها
انى اشوف بلدى بلد علمى صناعى متقدم
نفسى اشوف بلدى زراعيه غنية
نفسى اشوف بلدى دين وايمان وضمير
نفسى اشوف زويل فى مكانه الصح
واشوف عمرو خالد فى المقدمة
واشوف كمال الجنزورى واخد حقه ومكانته
واشوف اسامه الباز رافع رايتنا
اشوف اسامه يعقوب على قمة طب بلدنا (الرجل الذى يرسم قلوبنا بيديه مجانا)
اشوف بلال فضل وابراهيم عيسى فى الثقافه والفنون
اشوف عمر موسى على قمة البرلمان
اشوف واشوف واشوف ياااااااااااه دى مصر ماليانه ضمائر حيه وقلوب صاحيه وعقول منوره بالايمان
واشوف شبابنا مالي برلمنا((حزب الشباب الثورىالصاعد ))
وغيرهم كتير وكتير
لان مصر ماليانه كفائات ..مش زى العهد الغابر كل مافتح اتفرج على البرلمان الاقى فى وشى فتحى سرور وزكريا عزمى وغيرهم من فى سن الستين فما فوق
ايه ؟؟؟؟؟؟؟؟؟؟؟؟؟
احنا خلاص رايحين..لازم يجى لمصر دم جديد ..دم فتيى لازم الشباب دول اللى يبنوا مصر ليهم ولولادهم
جمال عبد الناصر لما بنى مصر كان فى الثلاثينات
....مايجوش دلوقتى ويقولوا عايزين خبرة
خلى الخبرة القديمة على جنب شويه...لازم نقول الكلام ده لاحمد شفيق...عين(بفتح العين وتشديد الياء )شباب فى الوزاره
عايزين الفكر الجديد ..عايزين الروح الوثابه ...عايزين دماء نقيه...
لازم تفكر يارئيس الوزارة تفكير جديد معاصر لمصر الجديدة

لازم ياشباب تطلبوا حقوا فى حكم مصر ومستقبل مصر اللى اتولدت من جديد على ايديكم

دول شباب الفيس بوك اللى انا معرفش عنه حاجه
دول شباب الاختراعات اللى مقفلة الادراج عليها
دول الشباب اللى نور مصر بعد الضلمة اللى كانت فيها بعواجيز البرلمان وشيوخ الشورى وذئاب الاعمال
مصر ولاااااااااااااااااااااااااااااادة

ولا بس شاطر يقول انتوا بتزيدوا كل سنة مليون ومش عارف ااكلكوا منين..كانوا بيأكلنا من بيت ابوه
جه زويل وقال انتوا ثروة بشريه جبارة وهو دا الكلام
هو دا اللى منتظرينه مشاريع ونشتغل
مش سرقه وهبل
والف الف الف مبروك ياشباب مصر

هناك ١١ تعليقًا:

كلمات من نور يقول...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر

♥نبع الغرام♥♪≈ يقول...

حبيبتى

وحشتينى وحشتينى وحشتينى يا اغلى واحن واطيب قلب بالوجود

يارب تكونى بخير يا غاليه
كل سنه وحضرتك طيبه بمناسبة المولد النبوى الشريف
اعاده الله عليكى وعلى الامة الاسلاميه بالخير واليمن والبركات

♥نبع الغرام♥♪≈ يقول...

والف مبروك علينا كلنا الحريه

الف مبروك لكل شاب مصرى

ربنا يرحم الشهداء فى جنة الخلد خالدين فيها

الف مليوووووووووووون مبرووووووووك لشعب مصر الحبيب

ويارب يارب اللى جاى يكون احسن من اللى راح

♥نبع الغرام♥♪≈ يقول...

ربنا يشفيكى ويشفى كل مريض


اينااااااااااااااس

الفراغ يقول...

كلمات من نور
اشكر تشريفك لى
وكل عام وانتى بالف خير
ومصرنا بالف سلامة وعزة ونصر وتقدم دائم للامام

الفراغ يقول...

ايناس حبيبتى
وحشتينى قوى يا ايناس
ولولا المرض لكنتى وجدتينى دائما معك
تحياتى لكل ثوار المنصورة وتحياتى ليكى وكل عام وانتى بالف خير انتى وماما واخوك
وربنا يسمعنى عنك كل خير

أبو فارس يقول...

تحيه الى ارواح الف الشهدا الذي قضى عليهم النظم


وربي يحفظك يامصر


وتحياتي

simply me يقول...

اولا حمد لله على السلامه ووحشتينا جدا
ووحشنا صوتك وكلامك اللى بنحس فيه فعلا بدفأ الامومه

ربنا يفرح قلبك كمان وكمان وتعيشى تشوفى مصر بتكبر بولادها

كلامك فعلا بيوصف حاجات كتير بنحسها وفرحه كبيره يمكن مش قادرين نعبر عنها

يارب مصر تبقى احسن واحسن

♥نبع الغرام♥♪≈ يقول...

ربنا يبارك فى حضرتك بجد نفسى اكلمك واطمن عليكى بس للاسف تليفونى اتسرق منى من فتره وجميع ارقام راحت
واشتريت جهاز جديد

ياريت حضرتك ضرورى تسيبلى رقمك عشان اطمن عليكى

انا عندى حفظ التعليقات ياحبيبتى

ومتشكره لسؤالك عن ماما واخويا
ويارب يكون البنات بخير
بحبك كتيرررررررررررررررررررررررر

ثـــوره الــغضب يقول...

تحيه الى كل الامهات والاباء

وتحيه الى اخوات الشهدا وتحيه الى زواجاتهم

تحيه الى كل من عايش هؤلاء الرجال الشرفاء

وتعيش الحريه والعزه والكرامه والشرف

(((((((وتعيييييييش مـــــــصر حـــــــره)))))))))

وردة الجنة يقول...

كلامك جميييييل جداااااا وكله من القلب للقلب

الف مبرووووووووووك لينا الحرية والانتصار

لكى مودتى .....