السبت، 14 فبراير، 2009

طيب : احكموا انتوا

سلام عليكوا
لما تلاقى الاكل مالوش طعم.. لما تلاقى كل حاجه فى الدش بايخه ومالهاش معنى.. لما تلاقى اى صفحة جرنال كلام فارغ لا بيودى ولا بيجيب..
لما تيجى تقول صباح الخير تلاقى لسانك تقيل ودمك اتقل..
لما تحاول تصلى ركعتين يمكن ربنا يفتح عليك بالرضا تلاقى الايات راحت من دماغك وعقلك مش معاك.. وتقف نص ساعه بتبحلق فى الفراغ
لما تسئل نفسك امتى الحاله دى هاتنتهى ولا حد يجاوبك
طيب امتى هاموت.. تلاقى عقلك يطلعلك لسانه ويقولك مش بمزاجك
طيب مين ممكن تطلبه وترغى معاه.. ومع اول رقم يقولك اطلب فى وقت لاحق
وتجد نفسك تلف وتلف وتلف فى دوائر لاتنتهى لا انت عارف حدودها ولا انت عارف تخرج منها
عارف حالتك بس علاجها ايه؟ ( الله اعلم ) بزمتكوا مش احسن حاجه انك تنااااااااااااااااااااام
........................
حد عندوا حل تانى
............................
واوعى حد يقولى اخرجى وغيرى جو
لاحسن الروماتيزم ووجع المفاصل يزعلوا منكم
عافاكم الله واعطاكم الصحه

هناك 26 تعليقًا:

s.m يقول...

لا يا امى مش هقولك ان النوم الحل لكن يا امى فى ملاين من اولاد شاورى انتى لوحد بس واحنا هنترم تحت رجلك وبعدين بعد ما امى وقفتنى على رجلك واكسبتنى الثقة مرة تانية فى نفسى هى اللى بتقول الكلام دا لا انا مش مصدق ومش هصدق وهعتبارة لحظة ضعف انما امى اقوى منها وربنا يعطيكى طووووووووووووول العمر ياارب وميحرمنى ابدا منك ولا بعطفك علينا علشان خاطر ابنك عيدى التفكير تانى فى كلامك

الفراغ يقول...

سلام عليكم
ابنى الغالى جدا جدا s.m
عارف انا كتبت البوست وقفلت ورحت اصلىالعشا
وبعدين وانا بصلى قلت ليه ازعل حبايبى
فجريت بعد الصلاه علشان الغى البوست من اول كلمه لاخر كلمه
لكن لقيتك دخلت عندى وكلمتنى
والله ضحكت من قلبى وقلت فى ايه اجمل من الحب ده
بجد ربنا يخليك لياومايحرمنيش من كلامك الحلو
يمكن زى انت مابتقول انها لحظة ضعف
دمت بكل خير وسعاده

همس الاحباب يقول...

هههههههه
ههههههه
انتى عارفة انا بضحك ليه
لانى كتير بيحصل معايا كده وببقى بمووت واناااام لكن ظروف شغلى بتحتم عليا انى اظل صاحى ومش بقدر انااام ويبقى نفسى اسمع كلام المثل اللى بيقول نوم الظالم عبادة
ربنا يديكى الصحة يا ست الكل
ويزيح عنك الهم ويبداهم سعادة وسرور
تحياتى وتقديرى

الفقيرة إلى الله أم البنات يقول...

لا مش هاقولك اخرجى وغيرى جو
دا أنا هاقولك سافرى أحسن

بصى..احسن حاجه فى التوقيت ده...تمسكى سبحتك
وتستغفرى على قد ما تقدرى
وتصلى على سيدنا محمد صلى اله عليه وسلم قد ما تقدرى
وتقولى لا إله إلا الله قد ما تقدرى
وبعدين تحمدى ربنا قد ما تقدرى
هتقولى تصلى ركعتين
وهتلاقى الشيطان غار والموضوع سهل
وبعدها انزلى غيرى جو..انشا الله تروحى تشترى عيش من الفرن..مجلة..قلم
شم الهوا بتاع الشارع فى الشتا
ااقصد فى الصيف مهو مفيش شتا والأكل بيحمض علشان انا فاكرة نفسى فى الشتا والدنيا صيف

ارمى وراك..وتوكلى على الله
كلنا زيك بس كلامنا مع بعض بيريح

دمتى بخير


رديت عليك فى بوست السيده نفسيه
ربنا يبارك فى عمرك يارب رائع رائع

ايوشة يقول...

مش هقولك تعملى حاجة لان للاسف الاحساس ده صعب جدا والله ومش من الساهل ينتهى بس انا هقول انى دايما بحب استغل الاحساس ده بانى افكر فى حياتى بشكل اوضح وانقى
احسن حل ان حضرتك تنشغلى بمشاكل غيرك هتلاقى نفسك نسيتى كل المشاكل دورى على اى انسان محتاج تكونى جنبه وقوفى جنبه هتلاقى نفسك خرجتى من اللى انتى فيه

ايوشة يقول...

ربنا يااااااااااااااارب يفك كرب حضرتك ونرجع تانى نشوف دايما التفاؤل والامل فى المدونة

romansy يقول...

صدقينى الحالات دى بتحصل لينا كلنا
بس نسيبها لله
وهو هيفرجها
ويبقى كله تمام

mohamed ghalia يقول...

متهيألى ياماماإنى الحل
إننا يكون لينا أهداف متععدة ودايما بنسعى لتحقيقها
دمتى بكل الود

ادم المصرى يقول...

انا بقه شغل مش شغل بجد بنام مش بعرف اقاوم

لئما انام لئما اقوم اقف فى الفراندا شويه وارجع انام بردو تانى

ههههههههههههههههههه

Bondoka يقول...

هو فعلا الحاله دى احلى حاجه فيها النوم

بس لو طولت بقى يبقى لازم ندور على حاجه تصحينا وتشغلنا
حتى غصب عننا عشان مانستسلمش

الفراغ يقول...

همس الاحباب
اشكرك جدا وفعلا مع الشغل بيهون كل حاجه
.........
الفقيره الى الله
بفضل الله كان اهم مكسب فى الوقت ده هو ذكر الله.........لكن هاتعملى ايه لما تأبى النفس الا العناد
اشكرك على التشجيعفى كتابة سيرة آل البيت
...........
ايوشه
انت فعلا اديتنى حل كويس اشكرك من كل قلبى
بجد انا هاسجله عندى لوقت اللزوم
...........
رومانسى............محمد غاليه
كله بامر الله ياجماعه
والله عندى اهداف نفسى احققها
بس هانقول ايه
ربنا معانا برحمته
............
ادم المصرى
بجد انت كلامك جه على مزاجى
هو كدا
قلنا اديها نوم ماحدش صدقنى ههههههه
............
بندقه
انت كمان شجعتى النوم
بصى بقى نوم هو النوم لا تراجع ولا استسلام
دمتى بكل خير
..............واشكركم جميعا
وعلى فكره انا بقيت تمام الحمد لله
وقريبا مع بوست جديد

قيس بن الملووووح يقول...

دقات قلب بعد الخمسين
"عندما يمضي بنا قطار العمر تسقط منا الكثير من التفاصيل الصغيرة التي قد تحول حياتنا الي براكين في الوقت التي لا تتحمل فيه الهزات البسيطة

فكرة من الزمن ده يقول...

والله حضرتك باين كنتي معايا من كام يوم وبتوصفي الحالة اللي انا كنت فيها بس والله الحل جيه من عند ربنا الحمد لله
ربنا يفرج همك ويسعدك بس والله القران بيبقى ليه مفعول السحر مش انك تقريه بس لا اسمعيه بصوت مؤثر هايغير حالتك

المعتصم يقول...

بسم الله الرحمن الرحيم
السلام عليكم ورحمة الله وبركاته
ازيك ياست الكل
ايه ده ؟ هى الحاله دى حاله غريبه ؟؟؟
طب دا ده الوضع الطبيعى بتاعى
بس عارفه ياست الكل انتى جيبتى الخلاصه هو النوم احسن واجمل حل
بس مين يسيبنى انااااااام ؟؟؟؟؟؟؟؟؟؟؟؟
لأ بقولك ايه سيبك من الحاله والضيق واللى مش عارف ايه ده
فين حلاوة المولد ؟؟؟؟؟؟؟؟؟؟؟؟؟؟؟
يعنى ينفع كده ؟ ارجع المدونة ماالاقيش الحلاوة ماينفعش
كل سنة وانتى طيبه ياست الكل
وربنا يعيد عليكى وعلينا الايام بكل خير يارب
وفكيها مافيش حاجه تستاهل والله
تقبلى مرورى وتحياتى
ودمتى بكل الخير والود
والسلام عليكم ورحمة الله وبركاته

الطائر الحزين يقول...

فعلا الشغل نعمة
لكن حاولى ان تجدى رفاق جديد ليس شرط بشر ولكن ممكن يكون كتاب ترتاحى له او وهم تحديثة او ايه فى القرآن تتليها

الضاحكون يقول...

السيده الفاضله
الفراغ
طبعا مش هنقولك اخرجى وغيرى جو
ولكن عندنا حل تانى
وهو
انكى تخرجى وتغيرى جو
اظن بقى جبنا الحل الاكيد وياستى لاشكر على واجب
احنا دائما فى خدمتك وعندنا الحلول العبقرانيه

الف مليون سلامه ليكى من الارق

s.m يقول...

انا جيت تانى يا امى معلش والله مش عارف النت مش عاوز يكون كويس معايا لية على فكرة انا جيت اعدل على المدونة بنصيح الكارثة ايوش روحت حذفها ودلوقتى بعمل واحد تانية وسعيد اووووووووووووووووووووووووووووووووووى وحياة ربنا اووووووووووووووووووووووووووووووووووووووى مش علشان عيد ميلادى النهاردا لا لكن علشان وحياة ربنا ان حضريتك ضحكتى من قلبك ربنا يخاليكى ليا وميحرمنى ابدا منك ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااارب

s.m يقول...

كان فى وعد من حضريتك ان فى بوست جديد هينزززززززل اعتقد دلوقتى وقته علشان انا اصلا مصدقت ان النت اشتغل والله (( وش فرحااااااااااااااااااااااااااااااااااااااااااااااااااااااان اووووووووووووووووووووووووووووووووووووووووووووووووووووووووى))

حاجات جوايا يقول...

يااااااربى كأنك بتتكلمى عنى
بس حتى النوم بيضن علينا ومش بييجى بالساهل وممكن كمان ميجيش خالص
ربنا يروق بالك وبالى وبال المسلمين

سالى

نوري يقول...

ياااااااااااه
دي تبقي حاله ملل مستعصيه
ده انا لو مكانك مش هعرف انام اصلا
لا بجد ربنا يقويكي ع الي انتي فيه

بست وشز فور يو

thunder يقول...

s.m ...
امى دا انا http://blackstar-thunder.blogspot.com/,
ومستنى هديتى وان كانت وصلت والله برجوعك مابينا

thunder يقول...

اية يامى انا كدا هقلق هو دا الوعد ولا اية انا وربنا بدائت اقلق اوى ان شاء الله هتكونى بخير طب انا مش عاوز هدية عيد ميلاد بس طمنينى على حضريتك ودى احسن هدية

نعكشة يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

هموت من الضحك و حاسة ان فيه دموع كتير في عنيا بس مش هتنزل لإنها مش موجودة

طيب تقولي إيه لو كانت حالتك دية عند واحدة عندها 21 سنة
و بتخرج تهوي عن نفسها و مبينفعش برضو
ممكن اقول حاجة

انا كنت جاية بس ابصبصة على مدونتك و امشي و خلاص

من اول 3 كلمات بالظبطلاقيتني بكمل الموضوع
انا حاسة كدة
بشكل بشع
عارفة لما تحسي انك عايزة تغيري حاجة اية هيا مش عارفاها
لما تحسي ان فيه حاجة غلط بس انتي مش شايفاها
كل الناس بتقول
بصوا جوه نفسكوا وانتو هتعرفوا
انا لما ببص جوة نفسي بحس اني دحلت اوضة ضلمة معرفش فين مفتاح النور بتاعها
ومش قادرة ادور عليه

يلا خير
اقولك حل

ادعي ربنا
بصي انا بدعي ربنا و اينعم متغيرتش بس انا واثقة ان ربنا سامعني
وان لو محققليش امنيتي في ادنيا هيديني ثوابها في الاخرة
هوه فيه ارحم من ربنا بينا

مفيش
معلومة صغيرة
الدموع اللي كنت حاسة بيها و هيا مش موجودة فجأة ظهرت مش عارفة ليه

سلام يا جميلة

ربنا يعزك يا رب
و يهديكي
و يريح بالك
و يصلح حالك
آمين

سلام عليكم

الفراغ يقول...

السلام عليكم يا اعزائى
s.m تانى وتالت ورابع
لو ليا ابن بيسئل عليا زيك كنت زمانى طايره بيه
على فكره انا كويسه ماتقلقش
........
قيس....مبروك فكرة المدونه وحب الناس دى اجمل حاجه عملتها فى حياتك
نسمع عنك كل خير ان شاء الله
........
فكره.....ربنا معانا جميعا
......
المعتصم.....اشكرك انا راجعه تانى قريباووجيبالك حلاوة المولد
.....
الطائر.. الضاحكون....
بحبكم والله فى الله ولله هاسمع الكلام بس كدا... حااااااااااااضر
.......
حاجات جوايا.......اتمنى تكونى بخير
............
نورى وتمنياتى لك بكل الامانى الحلوه
........
نعكشه يا اجمل نعكشه
ااقولك سر....انا رديت على كل اصحابى علشان خاطرك انتى
بجد كنت نفسى اكون معاكى انا طبعا خلاص خرجت من اللى انا كنت فيه
لكن اول ماقرات كلامك حسيت بيكى وقلت يمكن لما اكلمك ااقدر اساعدك شويه.....هى كل المشكله انى مابلاقيش حد ارغى معاه... اى رغى
لكن انتى يا حبيبتى لسه صغيره على الاحساس الفظيع ده....عارفه انا لما كنت قدك كنت بكتب شعر حاولى تكتبى اى احساس بتمرى بيه واحنا هنقراه هههههههههههههه وامرنا لله
انا بضحك معاكى اصل اكيد الشعر اللى هاتكتبيه هيكون نعكشه برده
يبقى امرنا لله.... صح
يا رب تطمنينى عليكى النهارده قبل بكره

thunder يقول...

ماشى ماشى ولا يهمنى يعنى امى رجعت علشان خاطر نعكشة ماهى لو مش نعكشة هههههههههههههههههه كنت عملت خناقة ماشى المهم ولله الحمد انك بخير يااااااااااااااااارب وربنا فرحات لما لاقيت العليق بتاع حضريتك وياااارب يا امى يفرحك ديما ويبعد عنك كل الم وحزن ياااااااااااااااااااااااارب وبعدين برضوا الوعد فين فى البوست الجديد دا تاخير وعليه غرمات طبعا محدش يقدر يغرم ماماته لكن احنا هنغرمك ونبوس ايدك وياااااااااااااارب تكونى بافضل صحة يااااااااااارب ومستنى البوست الجديد ان شاء الله قريب

نعكشة يقول...

احم

ربنا يعزك

بصي هيا الحالة اللي عندي دايماًموجودة
تقدري تقولي اتألفت معاها
عشان كدة دموعي مكانتش موجودة
بس لما بنخور جوايا بطلعها
و ساعات بتطلع لوحدها
والله جربت الرغي
و الخروج
و الشعر
و الدقن
قصدي النثر
منفعش
خلاص هعمل اية بقة
بعمل نفسي مش واخدة بالي
بس لما حد بيجيب سيرتها مبعرفش امسك نفسي
دة بس كل ما في الموضوع

و ربنا يكرمك يا رب و يعزك

آمين

سلام عليكِ