الأربعاء، 17 يونيو، 2009

زهق ...ملل....اه من الصيف والحر

سلام عليكم

مش عارفه ااقول ايه
انا جايه اكلمكم....بس اتكلم فى ايه
الحر مسيح دماغى...والشغل فظيع فى الصيف
يادوبك اجى من شغلى...اغرق نفسى ميه...واصلى الظهر ...والاقى نفسى تانى عايزه ااقعد تحت الميه تانى
طيب ليه بتوع التكنولوجيا فى اليابان مافكروش فى المشكله دى....مهما عندهم شرق اقصى واحنا شرق اوسط....وهما عندهم حر زينا

كان لازم يعملوا كمبيوتر يشتغل تحت الماء
مش احنا اللى نطلع ميه واحنا قاعدين امام شاشة الكمبيوتر

بجد انا بعتذر لكل ابنائى واخواتى الاعزاء عن عدم كتابة مواضيع لها قيمه
لانى بجد الحر ده عاملى زهق وملل
واجمل احلامى دلوقتى..انى اتمنى ان اغرق ..اغرق ..اغرق ..فى مياه الاسكندريه...او مياه خرطوم عربية المطافى اللى مسرسب الميه عمال على بطال بدون هدف ولا فايده...
ولا حتى اغرق حتى فى طشت زى البط والوز وانا بحسده وهو نازل بلبطه واخر سعاده بنفسه

حقيقى ما أجمل الاحلام..
وانا كدا ماشيه فى الشارع وغرقانه فى مية المطر فى الشتا
والجو ساقع ولذيذ
بس هاعمل ايه
احلام الصيف تطلع الشمس عليها تسيحها
معلش بقا هاقلوقوا باى باى

انا رايحه اغرق نفسى ميه...فين؟؟؟
تحت الحنفيه طبعا....هو انا ليا غيرها فى الصيف
ابقوا سلمولى على اى ترعه ولا قنايه تقابلوها فى طريقم
اه من الصيف والحر
سلام بقا لحسن المدونه هاتغرق منى

هناك 55 تعليقًا:

حتى تشرق الشمس يقول...

السلا عليكم ورحمة الله وبركاتة
احجز التعليق الاول وارجع

حتى تشرق الشمس يقول...

السلام عليكم ورحمة الله وبركاتة
ههههههههههههههههههههههه
البوست الكوميدى دا
يا عينى دا حالنا جميعا
متزعليش نفسك
خلى المروحة صديقتك مع الدش
دمت بالف خير

همس الاحباب يقول...

هههههههههههه
انى اغرق اغرق
ايه يا ماما ده
يعنى انتى سيبانا
وقاعدة تحت الحنفية
لو على الترعة تعالى عندنا ترعة تجنن
يدوب نص متر فى نص متر

الحمد لله انك بخير

thunder يقول...

هههههههههههههههه
احنا بتوع التكنولوجيا يا ماما

thunder يقول...

يعنى كفاية عليهم انهم اخترعوا الجهاز احنا بقة نحاول نعمل وحد بتنفس تحت الماء هههههههههههههه
لا بجد يا امام والله معاكى كل حق الصيف رغم صعوبت حرة الا انه احب الفصول كلها عندى اخره شوية ماية
بالنسبة ليا انا على الاقل
المهم انا فرحان انك ولله الحمد بخير رغم مش عارف لية الاوف مش بيوصل لحضريتك بس ومش بتردى عليا وربنا كتير اووووى
لما كنت خلاص ياست فى الياهو عندى من الاساس

thunder يقول...

انا بكتب التعليقات على مراحل اصل النت بيرخم وخايف يعملها قولت يا ثاندر احسن حاجة تحتل المدونة بشكل كويس ومنها كمان النت لو غلس تلاقى فرصة ان بعض اللى انت عاوز تقوله يكون وصل

...
اولا بقى وحشتنى وحياة كتاب ربنا اوووووووووووووووووووووووى اووووووووووووووووووووووووووى
يارب توصل زى ما خرجة من قلبى
يارب
ثانيا ياست الكل شاورملى انتى بس وانا اجبلك اسكندرية لغايط الشقة وارجعها تانى اكتبها على ورقة اسكندرية ههههههههههههههههه
شوفت بخل احسن من كدا نياهاااااا
لا طبعا والله بهرج حضريتك بس تشاورى وانا انفذ وربنا

thunder يقول...

نيجى بقى لببوست انا اوبجيكشت وفيتو لان الصيف عندى انطلق وحرية والشتاء قيود والمطرة بتحجمنى اوى والبرد فى الليل بيكون رخم على قلبى ولما بفكر فى ناس ممكن تكون بيته فى الشارع ياااه وربنا بكون هتجنن انما الصيف اى شوية ظل فى جنينة وماية خلاص انتهى وبعدين فى حديث فى معنى كان عن الرسول صلى الله عليه وسلم
بيقول اجتنبوا البرد فانه قتل اخكم ابى الدرداء (( والله اعلم )) يعنى وعلى كدا الصيف يعتبر بالنسبة ليا من اجمل فصول السنة
وبعدين يا ماما العصير وكدا ماله بس الصيف اية دا شكلك ياماما بترمى على عزومة فى مارينا فاكرة حضريتك بوست العريس اللى عنده عربية وبيصيف فى مارينا شكل الفكرة رجعت تانى ولا اية
عااااااااااااااااا

thunder يقول...

بما انى هربان من الشغل حابة
قولت اعلق كتير لان حضريتك وحشتنى جدا اقسم بالله
ربنا يخاليكى لينا يارب ومايحرمنى ابدا من حضريتك ابدا يارب
امى العزيزة دمتِ بكل حب و ود وفى رعاية وحفظ الله دائما يااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااارب

thunder يقول...

كنت هكتب كمان حاجة عن شوية العيال واختى اللدود لكن قولت انا قلبى طيب ويارب يسحوا فى الحر دا من اول اختى اللدود ايوشة
والميس وفكرة وكوكيتا وايناس واحمد
وميمى والبيت حروف كمان وجارة القمر وكله كله ياله وبلاش دهب علشان بتقوم بدور قومى فى مواجهة الانفلونزا
ايوا ملاحظة امى العزيزة لو فى ميل تانى قولى لى عليه ممكن لان دا معرفش فى عداء ولا اية مش بيوصل والله الاوف اللى بسيبة ليه مشعارف بس

GiGi worled يقول...

سلام عليكم
فعلا فين اسكندريه
ماينفعش نزلها داون لود
الواحد بجد تعب منا لحر
تحياتى وبعد الشر عند من الملل والزهق
تحياتى

mohamed ghalia يقول...

ماما
خلصت إمتحانات ورجعت
دعواتك للنتيجة
بجد وحشتنى كلماتك الرقيقة
دمتِ فى سعادة

اسماء واحلام فى وجدانى يقول...

امى الحبيبة

اسكندرية باللى فيها تحت امرك

احنا ممكن نشق طريق لحد عندك

بس الجهات المختصة توافق

او فى حل اجمل يا سلام لو تشرفى ابنك احمد

وتيجى فى بيتك تنورى اختك وولادها

والله هتبقى فكرة انما ايه

وممكن نفكر نجيب الواد ثندر كمان

يلا ان شالله ما حد حوش

اسماء واحلام فى وجدانى يقول...

التعليق ده لميمى ربنا يشفيها يارب


ويرجعها بالسلامة وتنورنا من تانى


لان غيابها طال اوى اوى


يارب يا ميمى ترجعى بسرعة

اسماء واحلام فى وجدانى يقول...

اما بقى التعليق ده للناس المتاخرة

مش عارف الواحد لحد امتى هيفضل يحجز

نفسى يا امى اجىء فى مرة الاقى

مكانى فى انتظارى

ربنا يهديم ويرزقهم بكل خير

اسماء واحلام فى وجدانى يقول...

التعليق ده

لاخر العنقود هنااااااااااااء

ربنا يشفيها يارب وتخف بسرعة

وبعد ما تخف تنجح لان صحتها اهم

يلا بقى يا هناء ربنا معاكى

اسماء واحلام فى وجدانى يقول...

معلشى بقى يا امى الواحد غايب من فترة

وعايز يعوض شوية

فكرة من الزمن ده

ربنا معاكى وترجعى بسرعة

وتطمنينا بنفسك على نفسك

يارب

اسماء واحلام فى وجدانى يقول...

التعليق ده بقى ليكى انتى يا امى

ماهو احتلال البركة فى يويو

هى اللى علمتنى ازاى احتل الناس

ربنا يرزقها بمحتل ازالى

انتى بجد وحشتينى اوى اوى اوى ونفسى كل

ساعة تنزلى بوست جديد او من غير بوست

عايزينك نشوفك كل يوم موجودة انا

عارف ان الدنيا مشاغل بس احنا ولادك وعايزينك دايما معانا

عاشقة الأحزان يقول...

السلام عليكم


حبيبتى الغاليه ربنا يبارك فيك ويعطيكى الصحه والعافيه يارب

والله يقطع الحر وسنينه

انا زيك برده بجى يادوب ادخل من الباب اجرى تحت الدوش

يالهوى على الحر وسنينه

بس بجد انتى عسل قووى وانا بحبك قوووى

ربنا يروق بالك يارب

تحياتى ليكى

ايناس

yoyo يقول...

صباحك سكر يا ماما

اخبار حضرتك ايه ؟!
يارب دايما بالف خير صحة يارب

yoyo يقول...

ايه الناس اللى محتلة التعليقات دى
كل دا يا ثندر
ماشى يا احمد انت بتدعى عليا
ماشى ماشى
انا برده اد اى احتلال هو احنا بنلعب ولا ايه

yoyo يقول...

والله يا ماما فعلا الحر فظيع جدا جدا
انا عن نفسى عاوزة افضل تحت المية ليل نهار و الله
يا بخت اهل اسكندرية و الله انا بحسد الناس دى
وانت اولهم يا احمد
يالا بقى

طبعا من غير كلام اسكندرية هتنور بيكى يا ماما
وانا كمان هاروح اسكندرية ان شاء الله
انا بموت فىها وفى جوها
ربنا يبارك لنا فى حضرتك يارب
تحياتى
يويو

yoyo يقول...

صحيح يا ماما ممكن نستعين بالمروحة شوية اهى ممكن تخفف حبة من الحر
اصل صعب الواحد يبقى طول النهار و الليل كدا تحت المية
احنا كدا هنبوش من المية
ههههههههههه
ربنا يخفف عنا بقى
المية دى نعمة سبحان الله
فعلا سر الحياة
تحياتى
يويو

yoyo يقول...

معليش بقى يا ماما التعليق دا
عشان اطمن بيه على هناء يارب ترجع بالف سلامة يارب
وتخلص الامتحانات على الف خير يارب

yoyo يقول...

يالا بقى بسرعة يا ميمى ارجعى نورى من تانى
مش قولنا اننا مش هنحرم
ربنا يرجعكم بالف سلامة يارب

yoyo يقول...

ماما
مش تغيب علينا كتير بقى
احنا مش نقدر على غيابك
ربنا يعينك يارب

دمتى بالف خير وصحة
تحياتى
ابنتك / يويو

عمرو وجيه يقول...

هههههههههههههههه



فعلا بجد الحر وحش

بس الايام دي الجو اتعدل شوية

ربنا يخفف عنا الحر


أمال الخليج يعملوا ايه


انا عشت 11 سنة في الخليج



مرة نسيت سي دي روم في العربية

رجعت لقيته سايح


احيان درجة الحرارة بتوصل 49 وخمسين

ده غير الرطوبة


بصراحة مصر نعمة كبيرة

وردة يقول...

السلام عليكم ورحمة الله وبركاته
ازي حضرتك يارب تكوني بخير
اه من الحر وسنينه طبعا بيزهق جدا ربنا يستر احنا لسه في شهر 6 واتخناقنا
امال حنعمل ايه في رمضان بقي والصيام
هههههههه
اسكندرية تتشرف وتنور بحضرتك
وسيبك بقي من كل العزومات ديه حضرتك تشرفينا وتقعدي معانا لغاية ما تزهقي
سيبك من عزومة احمد مش حيعرف يفسح حضرتك
خليكي معايا انا
ولا اقول لحضرتك احنا ممكن نستغله بردو
ههههههههههه
نقسم نفسنا جزئين يعزم هو المدونين الشباب واحنا نختص بالجزء الحريمي
اظن كده قسمة الحق
ولو ان وجود حضرتك معايا بيرجح كفتي طبعا
حضرتك قيمة كبييييرة جدا عندنا كلنا
وكده بقي الدعوة عامة والعزومة كلها علي شرف حضرتك
باقي تحديد المعاد وده حنسيبه لظروف حضرتك
علي فكرة مش عزومة مركبية والله انا بتكلم بجد
بتمنالك الخير والصحة والسعادة دايما
ربنا يكرمك
وشكرا يا احمد علي الحجوزات المسبقه لمتأخرين
انا بعتبر نفسي منهم بعد اذنك يعني
وربنا يهدينا جميعا
سلام

akeed يقول...

السلام عليكم

هههههههههههههههههههههههههههههه

بوست مبلول جداً و منعش فى الصيف مش ناقص غير قالب ثلج على المدونة الواحد مش عارف يعمل اية فى الحر دة الحر مالوش حل لاكن الشتاء لذيذ ملابس ثقيلة و اتحلت المشكلة


تحياتى

همس الاحباب يقول...

يلا ياض منك ليها
العبوا بعيد حنرش ميه
كل واحد يروح يلعب قدام مدونته
هى سايبة ولا ايه
كل واحد وواحدة يجيب تمن التعليقات
ومعاهم العشرة جنيه تمن التوصيلة
اى خدمة يا ماما
انتى خليكى وسط الميه
وانا هظبطلك المدونة
ده انا هعملك فيهم عمايل استنى عليه
العبوا بعض يا ولاد بلاش تخطفوا التعليقات من بعض عيب

الفراغ يقول...

حتى تشرق الشمس
منوره قوى
طيب اروح اشترى مروحه
تحياتى من تحت الماء



همس الاحباب.... ازيك يا خالد
موتنى من الضحك يا خالد
خلاص انا هاسيبك هنا واروح انا العب فى الميه
ولو عرفت تاجر المدونه فى الصيف مفروشه...وتجيبلى قرشين كويسين
معنديش مانع
ههههههههههههه



ابنى الغالى ثندر
وحشتنى ووحشنى الكلام معاك
يظهر عليك عندك اجازه..
وعلشان كدا راجع فارش الحب فى المدونه

يلا ايدى على كتفك
منتظره التعديل فى الكمبيوتر على يد العبقرى المصرى ثندر
واسكندريه بقا..انا عندى فكره احسن
وهى اننا نكتبعلى ورقه اسكندريه رايح جاى ونريح نفسنا
وماله العريس بتاع مارينا ..اهى دى اجمل ايامه..لايمنى عليه
والرسول برضه قال الشتاء جنة المؤمن..صلى الله عليه وسلم
انت مش خايف يا ثندر يدعوا عليك وخصوصا اختك اللدود
الا على فكره فين ايوش
لغاية دلوقتى مش باينه...الخينه باين عليها راحت تصيف وتبلبط فى الميه من ورانا..
طمنينا عليكى يا ايوش
معنديش ميل تانى غيره يا ثندر
بس ممكن اخلى بنتى تعملى واحد تانى..بس دا تبع هيئة مياه القاهره الكبرى ههههههههههههه
تمنياتى بالسعاده

الفراغ يقول...

جيجى
اجمل فكره حكاية نحملها دوان لووددى
طيب والله فكره بمليون جنيه
ابدأى انتِ الاول وانا وراكى اصلى مبعرفش اعوم
ههههههههههههه



ابنى محمد غاليه
انا عرفت انك رجعت لما شفت على الريدر عنوان جديد فى مدونتك
هاروح اقراه
وعقبال مانفرح بالنجاح زى فرحتنا بانتهاء الامتحانات

الفراغ يقول...

ابنى الغالى احمد
بجد مقدرش ااقدرك واقدر عرضك الجميل ده وتحياتى لاختك وولادها..ربنا يخليكوا لبعض

مكانك محفوظ فى القلب يا احمدوعنيا الاتنين هاحجزلك مكانك المره اللى جايه
وميمى ربنا يرجعهلنا بالسلامه قريبا يا رب هى وورده وفكره كمان
والله وحشونى جدا جدا

وانا مش هاشكرك على كلامك الحلو ده لانك
كلك على بعضك حلو يا احمد
ربنا يديك على قد نيتك ويرزقك الزوجه اللى تقدر تسعدك انت وقططك يارب

الفراغ يقول...

اهلا ايناس
والله انا بحبك انا كمان
ربنا يعنا على الحر وايامه
بس تعالى ننضم مع جيجى وحمل اسكندريه داون لود على المدونه ونخليها ميه فميه
بس اوعى تقفلى الباب قبل ماتنامى اصل الشقه ممكن تغرق
هههههههههههههههههههه



يويو ازيك واخبارك ايه
مساؤوك زى الفل
ياستى اهلا بالاحتلال اذا كان من حبايبنا واهل بلدنا وبلدياتنا كمان
منورين مصر والله
والحمد لله اهى ورده منوره عندى اه واطمنا عليها عقبال ميمى وهناء وايوش
مش عارفه ايه اللى بيحصل دا
(هو لازم حد يغيب ولا ايه)دا حسد بقا
عين الحسود فيها عود
وعنيا يا يويو انا مقدرش اتاخر عليكم
دا كفاية مظاهر الحب دى
ربنا مايحرمنيش منكم كلكم

الفراغ يقول...

اهلا اخويا عمرو
فعلا مصر ارحم بكتير
بس برضه هناك كل شيء مكيف الشقه والشغل والعربيه
لكن احنا بدرى علينا قوى لما نعيش زيهم
بس على فكره دا كان بوست خفيف بس يعبر عن الحاله اللى انا فيها علشان ولادى مايقلقوش عليا
ربنا مايحرمنيش منهم
وانت اول زياره جيت لقيت الدنيا غرقانه معلش بقا
هانشف المدونه بسرعه اهو
ههههههههههههه
نورت عندى ويارب تتواصل معانا دايما




هلا بالورده المنوره
وبأهل الكرم والجود..انتِ قدها وقدودواشكرك على هذه الدعوه الكريمه
عارفه انا فعلا بفكر فى رمضان من دلوقتى...وخايفه اخد اجازتى قبل رمضان..ومستحمله الشغل والحرعشان كدا
كل سنه وانتِ طيبه
ورمضان كريم ان شاء الله



اكيد
اهلا منور
وانا موافقه انا هاغرقها ميه وانت عليك التلج
ونشوف حد تانى يجبلنا عصير ولب
دى هاتبقى مدونه من مارينا
وزى همس مابيقول هانأجرها مفروش
بس خد بالك احنا هانحتفظ بحق الاختراع
لحسن جوجل يقول دى فكرته
ابدا دى فكره عبقريه مصريه 100 %
دمت لنا زائرا

mimi يقول...

ماما الفراغ

معلش بقي اهو فصل في السنة مكتوب علينا نعيشه .... ههههههه


تحياتي ليكي يا جميلة ... وبعد اذنك انا بشكر أحمد جدااااااا ويارب يشفيك يا أحمد يارب وترجع زي الأول وأحسن يارب

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
ربنا يرحمنا برحمته الواسعه فى الايام المولعه دى
الواحد مش عارف يعمل ايه
لا الدوش نافع
ولا المراوح نافعه
والظروف ماتسمحش ان الواحد يسيب الدنيا هنا ويروح يصيف
بجد موضوع كبييييييييييير خالص بتاع الحر
وربنا يعديه على خير
انا بس كنت معدى قلت اسلم
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

حلـم،، يقول...

اول مرور بالرغم من ان المدونة فراغ قلت بلاقي كل الظل والنسيم فيها الا انني وجدتها حر جامد لكن يا سلام احلي من النسيم والمي..اتمني التواصل

حبارير يقول...

أول مرة أدخل عند حضرتك وأضحكتني التدوينة جدا

عرفت المدونة عن طريق آيوشة

ما شاء الله قلم ساحر ساخر جذاب

دمت بخير

غير معرف يقول...

مــــــــــــــــاما الفراغ
وحشتينى ياست الكل
انا دلوقتى بخير والحمد لله
وبروح امتحانتى وبزاكر احسن
وان شاء الله هخلص يوم 1-7 وهبقى معاكى دايما ياست الكل ومش هفوت ولا موضوع الا لما اعلق عليه
بجد وحشتينى
ابنتك هناء
أحمـــــــــــــــــد
انما متشكرة جدا جدا جدا جدا على سؤالك
ربنا يكرمك ويخليك يا احمد والله مش عارفة اشكرك ازاى
اختك هناء

ايوشة يقول...

السلام عليكم ياماما اخبارك ايه معلش انا عارفة انى مقصرة مع حضرتك فى السؤال بس فعلا الحر حاجة مقرفة جدا
وبكرهه الحر جدا لانى بيكون عندى اكتئاب طول فترة الحر واغلب الوقت نايمة بس هنعمل ايه ربنا يرحمنا من الحر ده بجد
متزعليش منى انى كنت قافلة المدونة كنت بظبط فيها شوية حاجات علشان اقدر ارجع اكتب فيها بمهمة ونشاط :)
ربنا يخليكى ياااااااارب ولا يحرمنى منك اللهم امين

سقراط مصر يقول...

الصيف ده فصل من الفصول البايخه
الي بيصبرنا عليه حاجتين

السهر بالليل ومتعته
والحاجه التانيه انه غصب عننا هييجي الصيف هههههه يعني مفيش حل تاني

وعشان كده انا بفضل الشتاء بس عيب الشتا انك كل ما تشوف اي حرف من حروف كلمة نوم ن - و - م
بتجري تحت اللحاف واليوم بيضيع

يالا بقى ماهو ده الانسان مش بيعجبه العجب
سلام

اسماء واحلام فى وجدانى يقول...

امى الحبيبة يارب تكونى بخير دايما يارب

والله وحشتينى اوى وواحشنى وجودك عندى

انا جاى النهاردة علشان اقولك انى

مستنى حضرتك

اسماء واحلام فى وجدانى يقول...

هنااااااااااااااااااااااااء

حمدلله على سلامتك

يارب كده دايما منورانا

والزيارة اللى جاية تقولى

انك الحمد لله نجحتى

ربنا يوفقك دايما يا رب

اسماء واحلام فى وجدانى يقول...

اما بقى بالنسبة ليويو فالحمد لله

ربنا رزقها بالمحتل ومدونتها

تحت السيطرة

امى انا حاسس ان مدونتك هى كمان

بقت مستعمرة

اسماء واحلام فى وجدانى يقول...

امى الحبيبة تم رصدك اليوم عند يويو
وبصراحة حضرتك خلتينى احس ان يويو ماسكة شوية رز وبتنقيهم ده حلو وده وحش ده حلو وده وحش
الام ام فى كل مكان
ربنا يخليكى لبناتك
وكمان لولادك

جارة القمر يقول...

أعشق الشتاء دوما

فهو يمنحني احساس جميل أحب شعور الدفئ الذي يكتنفني بعد البرد

عزيزتي

هو الصيف والحر والاحساس الخانق هو الذي يدفعنا للهرب من كل شئ

والذهاب الى البانيووووووووووووو

هههههههههههههه

حلو جدا اسلوبك احلى مافي بتتكلمي عن معاناة الكل بيعانيها

رائعة أنتي وأكثر

مودتي

HaMaDa 3aFshA يقول...

السلام عليكم
امى العزيزة ارجو على الله ان تكونى فى تمام الصحة والعافية
اجازة قصيرة وعودة لاستكمال الامتحانات بقى يومان على الاجازة ونعود لخير صحبة مرة اخرى ان شاء الله
ارجو ان تغمرنى دعواتك فى هذه الايام
دمتى بكل الخير والحب والود
ودمتى فى رعاية الله وحفظه
تحياتى

الفراغ يقول...

ابنائى الغاليين
هناء
حماده
ربنا معاكم ويوفقكم..ويسهلكم الصعب يارب
وترجعولنا بكل سعاده
وننتظر النتيجه سوىبالنجاح ان شاء الله

الفراغ يقول...

جارة القمر
منوره..

سقراط مصر
برضه الشتاء اجمل..والنوم اجمل واجمل


اسماء واحلام
منور جدا ...وان شاء الله اكتب قريبا

الفراغ يقول...

حبارير
منور عندى..

ايوش انا مقدرش ازعل منك
انا زعلت انى كنت هاتحرم منك ماتنسيش انك اول حب ليا هنا بعد ثندر
وبزعل جدا لو حد من ابنائى وحبايبى بعد
ربنا يوفقك ويسعدك

الفراغ يقول...

ميمى ربنا يخليكى
كلنا بنشكر احمد
ونتمنى له الصحه..وربنا يطمنا عليه
وميحرمناش من طيبته واخلاقه




المعتصم
الزميل المحترم
مدرس الكمبيوتر
بفرح بانك تعدى وتسلم
دا كفايه عليا قوى
وربنا يرحمنا برحمته
ساعات افلسف الحر ده بان ربنا بيورينا عينه من عذابه
هاعمل ايه من غلبى من الحر بقول ربنا يرحمنا برحمته

الفراغ يقول...

حلم
جيت فى وقتك
يلا ورينا ايام الشتا الجميله المنعشه
نورت


اسماء واحلام
اشكرك على تواجدك الدائم وسئوالك عليا
مع انى حاسه انه شكر دمه تقيل
لانك تستاهل اكتر من الشكر بكتير
ربنا يرزقك حب عباده
اللهم امين

الفراغ يقول...

حلم
جيت فى وقتك
يلا ورينا ايام الشتا الجميله المنعشه
نورت


اسماء واحلام
اشكرك على تواجدك الدائم وسئوالك عليا
مع انى حاسه انه شكر دمه تقيل
لانك تستاهل اكتر من الشكر بكتير
ربنا يرزقك حب عباده
اللهم امين

رابطة هويتي اسلامية يقول...

ربنا يقيكى ويقينا حر جهنم باذن الله

تتشرف اسره رابطه هويتى اسلاميه بزياره حضرتك لنا

نسعد بذلك,,

لو عرفوه هيحبوه يقول...

الا تنصروه فقد نصره الله

انضموا معنا لحمله لو عرفوه هيحبوه لنصره النبى صلى الله عليه وسلم وتعريف المسلمين وغير المسلمين من هو نبينا