الخميس، ١٧ سبتمبر ٢٠٠٩

بعوده الايام..وعيد سعيد عليكم

السلام عليكم ورحمة الله وبركاته

كل عام وانتم بخير....عيـــــــــــــــــــــــــــــــــــــــــــــــد سعيد عليكم
وعلى حبايبكم .. وقرايبكم .. واصحابكم .. وجيرانكم وعلى كل اللى تحبوهم ان شالله تكون قطط احمد حتى!
حبايبى ..جاء رمضان ...وانقضى رمضان
ونرجوا ان يتقبل الله منا صيامنا وصلاتنا ودعائنا..اللهم امين
عدى رمضان..مش عارفه ااقول ايه
عدى وكأنه حلم
بدعى ربنا انى اكون صمته حقيقى...وانى اكون قمته حقيقى..وانى اكون فزت بيه حقيقى
بدعى ربنا يسامحنى على زلاتى فيه..
انا فعلا انسان ضعيف..حاولت على قد ماقدرت انى ماغلطش..وانى ماتخاصمش مع حد...وانى ماتفرجش على التلفزيون
لكن برضه اغلقت التليفون فى وش حد من قاريبى استفزنى وحاول يغلط فيا...ماستحملتش...وبدل ما اقول انا صايمه...للاسف ثأرت لكرامتى بغلق التليفون فى وشه وحتى الان لم نتقابل سويا لا بالتليفون ولا وجها لوجه
ربنا يسامحنى
لكن الحمد لله مقابل ذلك...كلمت ناس تانيه مخصمانى ..وسلمت عليهم ودعتهم للافطار ببيتى...لكن اعتذروا...وانا مالى ...الحمد لله عملت اللى عليا
والحمد لله والله كان لوجه الله تعالى

اما التلفزيون فربنا يرحمنى ويرحم جميع الصائمين
حاولت .. بجد حاولت بس لم يسلم الموضوع من مسلسل على الفطار بتاع عصابة بابا وماما
وبعدين مسلسل ونيس واحفاده ودا علشان الفايده والعايده اللى منه(((كلام بنضحك بيه على نفسنا)))
ومايمنعش من مسلسل كريمه كريمه بعد التراويح ...علشان بقى نضحك شويه قبل النوم...
ماهى ساعه لقلبك وساعه لربك....استغفر الله العظيم...
وكمان مره نعدى على لعبة الحياه...ومره على فيش وتشبيه...ومره على حيلهم بينهم كمان وكمان
يعنى محرمتش نفسى يعنى مع انى كان نفسى احرمها جامد من اى مظاهر دنيويه...
بس هاقول ايه حاولت والله
وتصدقوا ماحصليش حاجه والحمد لله وقدرت اصوم وماجليش فقـــــــــــــــــــــر مسلسلات والحمد لله ولا جالى انيميـــــــــــــــــا برامج اعوذ بالله

على العكس تماما والحمد لله.. اصبت براحة البال وهدوؤ الاعصاب..وشعرت بسعادة القرب من الله
الحمد لله قمت بقيام الليل اكثر الاوقات ...وادعوا الله ان يتقبله منى ويتقبل دعائى لى ولغيرى
واجمل شيء كمان كان قراءة القرءان يوميا فى الشغل وفى البيت وفى التراويح وفى القيام
بجد احساس رائع وجميل بلقرب من الله وانى فى معية الله فى كل لحظه
بدعى ربنا انى افضل كدا لبقية عمرى
بجد احساس رائع مش قادره اوصفه بس كنت حاسه انى مش عايزه حاجه من الدنيا دى خالص الا انى اشوف ربنا واقبله
ياه ياه .. بجد الصيام والقيام وقراءة القرءان دى نعمه كبيره كبيره كبيره من ربنا علينا ...ربنا مايحرمناش منها ابدا

بس كنت زعلانه برضه...لانى مش بقدر اسجد على الارض...من تقل جسمى ووجع ركبى..ودعيت ربنا يشفينى وكل سنه بدعى ربنا..بس نصيبى كدا......... الحمد لله على كل حال.....

وكمان زعلانه من اللى بيحصل بينا وبين بعض...هو يعنى مايحلاش الخناق الا فى رمضان...ليه مش كل انسان يقول :: نتسامح احسن..ليه مش كل واحد يخاف على صيامه..ليه مش كل واحد يحب الخير لغيره
بدعى ربنا يصلح حالنا ويبعد عننا الشيطان ويهدى نفوسنا ويملا قلوبنا بالايمان .....اللهم امين

انا بجد هاحاول فى اليومين اللى باقيين دول اتصل بقريبى اللى غلط فيا وادعوه على الفطار عندى وبقلب والله... وربنا يقدرنى ويقوينى ومافيش حاجه تمنعنى (((يعنى اتلكك بيها ))) يارب قدرنى على قهر غضبى... وعلى ارضائك بكل روحى وجوارحى يارب ...يارب يارب
اعمل ايه بس نفسى ربنا يتقبل صيامى كله وعملى كله ...يارب اعنى على حسن عبادتك واعتق رقبتى من النار ووفقنى لرضاك

الحمد لله... ربنا يعيد علينا رمضان المقبل بالخير ويتقبل منا رمضان هذا خير تقبل ...واكون رزقت بليلة الـــــــــقدروانا والمسلمين جميعا يارب..لانى نفسى فيها قوى قوى
ولانى معرفتش ليها اى امارات بصراحه ...لان العمارات حواليا تغلق علينا ابواب السماء ولان امكم ساكنه فى الدور التانى..مبعرفش اشوف لا سماء ولا حتى سحابه معديه
وكما مابخرجش الصبح بدرى...يبقى هاشوف الشمس ازاى وهى بيضاء بدون شعاع
لا واللى زاد وغطى بقى عندنا كلبين ..واحد فى عمارتنا وواحد فى العماره اللى قدامنا
وطول الليل والنهار هاتك يا هو ..هو ..هو ..هوا

بس سبحان الله امبارح كانوا عاملين زى اللى يكونوا مخنوقين ومش قادرين يطلعوا صوت...ووالله بعد اذان الفجر لقيتهم وكأنهم اتفكوا من عقالهم ..وهاتك يا نباح بصوت فظيع وصريخ ..حسيت كأن حد كان مهددهم وبعدين اطلق صراحهم...الغريبه فى الامر انهم من عمارتين مختلفتين ... عموما مش بقول غير سبحان الله
والحمد لله كمان النهارده الجو جميل والشمس مش حاره قوى
بس دا مايمنعش انى سمعت انها خلاص عدت من ليلة 21 واللى يقول لا دى كانت ليلة 23
وهكذا....بس سمعت الشيخ مبروك عطيه بالامس وهو بيقول ان لكل انسان ليلة قدره
ادعو الله ان نولها جميعا ويتقبل دعائنا جميعا بامر الله
فلله فى كل ليلة عتقاء من النار.... اللهم اجعلنى منهم انا وزريتى وجميع ابنائى هنا وهناك وجميع المسلمين يارب
اللهم ربنا تقبل صالح اعمالنا وارزقنا العتق من النار
وكما كنا نقول فى اول رمضان ..نقول دلوقتى
صوم مقبول باذن الله
وعيد سعيد على الجميع يارب
وبعوده الايام


هناك ١٧ تعليقًا:

♥نبع الغرام♥♪≈ يقول...

بسم الله ماشاء الله

انا اول تعليق عند امى حبيبتى انا

♥نبع الغرام♥♪≈ يقول...

وكمان التانى

وحشتنى قوووووووووى يا ست الكل ربنا ما يحرمنيش منك يارب ويطمنى عليكى

وليكى وحشه كبيرررررررررررررررررررة
قووووووووووووووووووووى

♥نبع الغرام♥♪≈ يقول...

بفرح قوووى من كل قلبى لما بلاقى حضرتك منورانى بتعليقاتك بكون اسعد الناس وبطمن اكثر عليكى
يارب يعطيك العافيه والصحة وطولت العمر
ويتقبل منا ومنكم صالح الاعمال حبيبتى

♥نبع الغرام♥♪≈ يقول...

التعليق ده

محجوز

اسماء واحلام فى وجدانى

ثندر

ايوشه

فكرة من الزمن ده

ورده

ميمايا
انا حجزت ليكو اهو
وحشتونى قووى كلكو
ومنهنا ببعت برقية تهنئة ليكو بمناسبة قدوم عيد الفطر المبارك اعاده الله علينا وعلى الامه الاسلاميه بالخير واليمن والبركات
ومنتظراكو كلكو هنا عند امنا الغاليه

♥نبع الغرام♥♪≈ يقول...

البوست جميل قووى يا حبيبتى

وبجد حضرتك إنسانه جميله قووى وفيكى كتير منى والله لما بقرء كلامك بحس حضرتك بتتكلمى بلسانى انا

وبفرح قووى انى طالعه ليكى ههههههههه
وده بجد يشرفنى ويسعدنى

وحضرتك بجد عملتى اللى تقدرى عليه وإياكى تندمى لأنك من جواك جميل قووى
ربنا يبارك فى حضرتك يارب ويشفيكى ويعطيكى الصحه والعافيه وان شاءالله يتقبل منك صالح الاعمال
وياريت تدعلينا يا امى دعوة حلوة قووى من قلبك الجميل اللى زى السكر ده اللى بجد بموت فيه
وحشتينى قوووووووووووووووووووووووى
بحبك فى الله
دمتى بالف خير وصحة وعافيه
وعيد فطر سعيد عليكى وربنا يجعل ايامنا كلها اعياد يارب امين

وخلى بالك من نفسك ومن صحتك

اموووووووووووووووووواة
بنتك انوسه

Bondoka يقول...

كل سنه وانتى طيبه يا امى
وعيد سعيد عليكى

وربنا يجازيكى خير على تحريك للعمل الصالح ويتقبل منك

أميرة يقول...

ربنا يتقبل من حضرتك ومنا ومن المسلمين اجمعين صالح الاعمال و يرزقنا جميعا تمام العافية

كل عيد وحضرتك واسرتك والمسلمين جميعا بخير

وجعني اوي كلامك انك نفسك تسجدي لله علي الارض و علشان جربته السنة دي بقالي شهور حاسة بيها نعمة راحت مني فعارفة اد ايه مؤلمة
انا حاولت ليلة رمضان بعد مرور 5 شهور علي اخر مرة سجدت فيها علي الارض .. عدي يومها وضغطت اد ما قدرت علشان اصلي زي ما كنت بصلي بس قدر الله وما شاء فعل ومقدرتش اكررها
بس ان شاء الله ربنا قادر يعافينا جميعا و ميحرمناش من نعمة السجود
ربنا يتقبل طاعاتك و يزيدك من فضله وكرمه

عيد طيب مبارك ان شاء الله علي المسلمين اجمعين

Unknown يقول...

عيد سعيد
و كله فرحة ان شاء الله لحضرتك
و سلامتك الف سلامة

عابرة السبيل يقول...

كل سنة وانت طيبة وبعودة الايام

انا بقى رمضان عدى عليا تقريبا زى كل الشهور
البركة فى بقلظ
بس برضه انا قصرت شوية
ربنا يسامحنى

فكرتينى بصلة الرحم

هقوم انا كمان اتكلم فى التليفون ونخسر كام جنيه بس ما نخسرش الجنة

thunder يقول...

كل سنة وحضريتك طيبة يااااااااااارب ويابخت احمد وقططة البركة فى عاشقة الاحزان احتلالت بدلنا بقى وذكرتنا بالخير جميعا
انى العزيزة دمتِ ياارب بكل حب و ود وفى رعاية وحفظ الله دائما يااااااااااارب
وبجد تقريبا ولا كلمة ليا على الاميل كنت بسبها لحضريتك طول الشهر تقريبا موصليتش اتمنى يارب تكونى بخير ودا انا عرفت دلوقتى من البوست دا وكل سنة وحضريتك يارب بخير وصحة وسعادة

Beram ElMasry يقول...

الهم تقبل صيامكم وقيامكم وأجعله في ميزان حسناتكم وعيد سعيد أعاده الله عليكم باليمن والخير والبركة أنتم وجميع الأهل

** بيرم المصري

Unknown يقول...

السلام عليكم ورحمة
الله تعالى وبركاته
حاقولك على حاجة
حصلتلى :نمت متأخرة
غصب عنى وتوقعت صلاة
الفجر حاضر حتفوت منى
لكن سبحان الله لقيت نفسى
لوحدى صاحية بعد تلت ساعة
فى قمة النشاط اتوضيت وصليت
ركعتين لله ودعيت وابتهلت وبعد
كده أذن الفجر ياسبحان الله !!
معرفش حسيت ليلتها ان دى فعلاً
ليلة القدر ومش حأقول امتى خليها
فى قلبى بينى وبين ربى سبحانه وتعالى.

ايوشة يقول...

كل سنة وانتى طيبة ياماما وعيد سعيد عليكى ياااااااارب وعلى الامة الاسلامية كلها ربنا يتقبل صيامك وقيامك اللهم امين يارب العالمين معلش انا كمان حسيت انى قصرت جدا فى رمضان وزعلان من نفسى جدا :((
يلا ربنا يسامحنى بقى ربنا يكرمك ياماما ويخليكى يارب بحس بسلام نفسى وانا بقرا كلامك والله وانتى قلبك كبير وهتسامحى على طول وان شاء الله الخلاف اللى بين حضرتك وقريبك يتنتهى باذن الله كل سنة وحضرتك طيبة مرة تانية

انوسة تسلمى ياقمر ياللى قايم بالواجب فى كل مكان وكمان مش ناسية حد وبحجزى لنا التعليقات ربنا يخليكى ياجميل

mohamed ghalia يقول...

كل سنة وانتى طيبة يا أمى
تقبل الله منا ومنكم

موناليزا يقول...

كل سنة وانتى طيبة ياحبيبتى
ويارب يكون عيد سعيد علينا جميعا

♥نبع الغرام♥♪≈ يقول...

ماما

كل سنه وانتى بالف خير يا احن قلب بالدنيا كلها
ربنا يطمنى عليكى

عيد فطر سعيد علينا وعلى الامة الاسلاميه جمعاء

مودتى

طوبه فضه وطوبه دهب يقول...

كل سنه وانتى فى احسن حال واتم صحه وربنا يشفيكى ويعافيكى ويعتقك من النار ونحن معك اللهم امين كل سنه وانتى طيبه يا اجمل ماما وعيد سعيد