الخميس، ١٢ نوفمبر ٢٠٠٩

شكر وامتنـــــــــــــــــــــــــــــــــــــــــــــــــــــــــان

السلام عليكم ورحمة الله وبركاته

اخواتى وحبايبى والمجتمع والناس
طبعا ببدأ بالشكر لكل من اقدم وتشجع وجاوب على التاج بسرعه
ولم يتخازل ولم يتقاعس ولم يهرب ولم ..ولم ..ولم ..ولم

اشكر والله فى المقدمه...ودى كانت المفاجأه((الست ام بقلـــــــــظ ))
لان الست ام بقلظ دى ستوته صغننه وعندها بيبى صغير صغير قد النونو..ومابيخليهاش ياعينى تنام
ورغم ذلك جريت بسرعه وجاوبت على التاج وكانت اول من جاوبه وبكل صدق


واشكر ابنتى جارة القمر
اللى جاوبت ياعينى فى مكان تانى
وكانت زعلانه خالص ورغم انى طمنتها ...برضه رجعت نقلته هنا تانى
وبرضه جاوبت بسرعه جدا....اشكرها قوى قوى


واشكر احمد صاحب مدونة اسماء واحلام
ولو انى زعلانه منه لانه اعتذر عن اسئله كتير وبالتالى لم يحقق التاج هدفه معاه
ولكنى اشكره ...لانه كدا بيوضح انه عايش فى عالم القطط والشعر بس
ولا يعرف ان يتحدث عن نفسه الا بطريقته الخاصه
وعلى هذا الاساس
انا كنت بفكر ..بفكر يعنى انى اجوزه واحده قريبتى
بس خلاص بقى شكله كدا وجد من تتحادث معه بلغته هو
اما انا فا هاخلع..هههههههههههههههههههههههه


اما من اشكرها واقبلها واحييها واضرب لها تعظيم سلام
فهى الحبيبه والقريبه ((فكرتى من الزمان ده ))
انها مثال على الايجابيه والصراحه والصدق مع النفس
لم تعتذر عن سؤال
ولم تخشى من اى اجابه ولم تتجمل مع اى اجابه
انها صادقه مع نفسها ومع الاخرين
بشكرها واشد على يدها
واتمنى لها التوفيق والسعاده


ومن ناحية الناس اللى لسه ماجاوبوش او مش هايجاوبوا
فانا مش زعلانه ولا هاقول اسمهم زى ماكنت بهدد ولا حاجه
لان انا اكتشفت
ان اللى مش عايز يقول عن نفسه حاجه ..مابيقولش
ويبقى كدا التاج مالوش لازمه
لكن الناس الرغايه اللى زى حالاتى مابيخبوش حاجه
بيبقوا واضحين حتى من غير تاج ولا كسروله حتى
مثلا مثلا...انا شفت اسم بوست جديد عند (( بــــــــــــــــــدراوى))اسمه اعترافات ربع قرن
والله الراجل ده ما محتاج لا تاج ولا محتاج صولجان
الراجل ده محتاج صقـفه كبيره جدا جدا
لانه راجل واضح ومميز وبالبلدى كدا جدع
وانا من هنا ببعتله كل الشكر والتقدير
ودى تانى مره يحصل منى اعجاب لحضرته
المره الاولى ...لما كان بيكلم عن الدعوه للاخرين بظهر الغيب
وانا نوهت عن فكرته فى مدونتى
وجه وشكرنى ودلوقتى رغم انه واضح
برضه جه وجاوب على التاج بكل صدق
مش عارفه اودى اعجابى بيه فين
ولا هانوصل مع بعض لاايه
هههههههههههههههههههههههههههههههههههه


كمان ابنى المحترم جدا جدا
حماده عفشه
والله هو غايب بقاله فتره
بس بعد ماجاوب على التاج انا عرفت هو مختفى ليه !!!!!!!!!!!!!!
عموما اشكره واتمنى له السعاده من كل قلبى وعقلى وتفكيرى


كمان اشكر اختى الحبيبه روفى
اول من تكلمت
بجد انسانه مهذبه الى ابعد الحدود
لم تعتذر ولكنها سيده فاضله واقعيه اهدتنى كل ما اريد ان اعرفه عنها فى صورة (هديه) منها
وقد تقبلت الهديه وانا سعيده بيها قوى


واشكر الانسان ((الغير معرف ))اللى جه وزارنى لاول مره
ورغم ذلك جاوب على التاج...ليه؟؟؟؟؟؟؟؟؟؟؟؟؟؟؟؟؟
لانه ودى اجابه فرحتنى قوى قوى
لانه قال عن التاج اسئلته مميزه ومريحه
بصراحه انا فرحت بالكلمه دى وهو بيوصف التاج
لانى فعلا كنت بحط الاسئله وكأ نى قاعده مع اى حد اعرفه فى انتريه بيتنا ...يعنى قعده ظريفه لطيفه معانا كوبيتين شاى وبنرغى مع بعض اصحاب احباب وممكن نروح نقـف فى البلكونه ونتفرج على الرايح والجاى
ماحستش ابدا ان الاسئله صعبه او فيها احراج لحد


كمان اشكر اليس فى بلاد العجائب
ومش عارفه انا فهمتها ولا لآ
بس فهمت انها مش هاتجاوب لانها بتحس بانها حره طالما لا احد يعرف عنها اى حاجه
ولانها بتتكلم براحتها طول ماهى غريبه فى وسط غرباء
يعنى هى لغاية دلوقتى بتشعر بالغربه بينا وبينها
وطبعا دى حاجه اشكرها عليها لانها وضحت موقفها
وكان ممكن بسهولها ماتردش عليا لكنى من الان اعلن انها زى بنتى برضه وهانبقى اصحاب برضه
لانى احترمت فيها رايها الجاد واللى بتقوله عن اقتناع
وليحيا الحب بين الغرباء
دا كله ..دا لو كنت فهمت قصدها صح يعنى



اختى وبنتى ....أ ينـــــــاس
منتظره منك كلام كتير بينى وبينك
لانى قلقانه عليكى ...وكونك ماتقدريش تكملى التاج دا معناه انك فعلا تعبانه
بس مش تعب جسدى ..دا تعب من نوع تانى
ياريت افهم
لانى مش فاهمه اى حاجه

اخى المهاجر الى الله
منتظره اجابتك
لانى زرتك ولم اجد الاجابه

اختى الحبيبه مونليزا
انا بفرح بمجيك عندى
بس هافرح اكتر لو قدرت نقرب لبعض اكتر


اخى مدحت مصطفى
نورتنى وياريت تكرر الزياره
واشكرك على كلامك عنى


اخى طارق سليم
نورتنى واشكرك على وصف التاج بانه غير سطحى
يعنى نقدر نقول انه مكتوب والله من الدور التانى ...وعمرى ماطلعت السطح
هههههههههههههههههههههههههههه
بجد اشكرك لان وصفك اسعدنى واعطانى الصفه الحقيقيه فعلا لما اردت ان يكون التاج عليه


همس الاحباب
طب جاوبه علشان همس واختها



ابنى ثنــــــــــــــــــــــــدر
غيرك قال انه سهل وممتع كمان
عموما منتظره الاجابه...
ودا تانى تاج اهديهولك ...ولا تجاوبه



وبكدا
اكون عملت اللى عليا
وننتقل الى موضوع اخر
وشكرا


هناك ٢٤ تعليقًا:

أميرة يقول...

السلام عليكم ورحمة الله وبركاته

انا مقصدش المعني دا خالص

انا كنت بتكلم عموما عن العالم دا ومافيه
ومنكرش اني حاولت اطبق قواعده وفشلت
و منكرش ان اسئلة حضرتك فيها اجابات صعب الواحد يقولها قدام حد
بس انا اعتبرتني هنا عابر سبيل
ميفرقش مع حد يعرف عنه حاجة اكتر من الاطمئنان انه معاه زاده لاستكمال الرحلة

حضرتك بسم الله ما شاء الله الله اكبر احبائك من كل الاعمار والاتجاهات :)

وبعدين انا باخد وقت كتير حبتين علي ما اعرف اخد علي الناس اللي قاعدين معايا :) و لو حتي كان في بيت حضرتك فانا ممكن اتفرج لحد ما الاقي حاجة ينفع اشارك بيها

سلبية ؟
يمكن

بس مش غموض ابدا
المشكلة اني مبعرفش اخبي
فلما فكرت اجاوب حتي بيني وبين نفسي
لقيت اجاباتي مش هتهم حد خالص يعرفها و هبقي مش طايقاني :)


انا لما قلت المدون غريب في عالم غرباء ، قصدت ان الحاجز اللي بينه وبينهم بيخليه اما يحافظ علي وجود جدار عازل بينهم بالغموض او انه يكسر كل الحواجز و يتكلم زي ما بيتكلم في حياته او انه يبقي صورة مبالغ فيها مما هو عليه في حياته
انا الوسطاني دا اللي بيتكلم زي مهو عايش بس مع مراعاة حاجات كتيرة في الكلام
و من شوية تجاربي في الدنيا
مش كل الناس بتقدر تستوعبه

انا سعدت برد حضرتك حتي لو معرفتش اوصل اللي عايزة اقوله يمكن اما تزول الازمة اللي انا فيها دي اعرف اتكلم بشكل افضل

ربنا يحفظكِ

اسماء واحلام فى وجدانى يقول...

الام الطيبة ماما الفراغ
مين قال انى عايش فى عالم الشعر والقطط بس انا اتكلمت عن نفسى بجد ويمكن تكون اجاباتى غير واقعية لبعض الناس بس حضرتك اكيد حسيتى ان ده هو اللى جوايا لانه فعلا ه اللى جوايا حضرتك طلبتى نتكلم بصراحة وانا عملت كده اما عن الاسئلة اللى انا كنت رافض اجاوب عليها فطبعا كان من الصعب جدا انى اجاوبها لاسباب كتير اوى بس اهم سبب انى لو كنت اتكلمت كنت لازم اكون واضح وبكده يبقى كنت هاذكر ناس تانية وانا طبعا مش كنت هاقدر اتكلم عن حد مهما كان وبعدين دول هما تلاتة بس ، الحقيقة بقى انهم كانوا اصعب تلاتة عارفة ليه لان الاجابة عليهم هى ملخص بسيط لحياتى وعدم اجابتى عليهم مش هروب بس هو احترام لناس ، ياريت مش تززعلى منى انا كان نفسى اعمل اللى حضرتك طلبتيه بالظبط بس اعتقد انى حتى قدرت اوصل لنسبة كويسة من درجة التاج ده وبعدين ده مش تاج ده شبه برنامج اعترفات ليلية

blue-wave يقول...

وانا اسمى مش مكتوب؟:((
عااااااااااااااااا

------ يقول...

تصدقى انا كنت لسه بجاوب عليه

علشان خنشره عندى فى المدونة

اكيد تشوفيه

thunder يقول...

??
انا والله ما متعمد انى مجاوبش ولا شايفة انه صعب انا بهرج لكن المشكلة فى بعض الحاجات ياامى بتحسس فى توقيتات معينه انك محتاجة انك تكون مع نفسك محدش يشاركك فى الوقت دا بعينة اللى جواكى
سواء حلو او وحش يمكن بقالى فترة عايش متربكك عايش ومش عايش زى عمرو دياب ما بيقول
كل شئ معايا او حواليا واخد منحنى واتجاه عكسى عن اللى انا عاوزه او بفكر فيه بقيت ديما حتى ابسط الاشياء مبقتش عارف اعملها
بالله عليكى ياامى ما تزعلى انا مش متعمد ورحمة بابا وحياة لااله لاا الله انى مردش دا شوية نت وشوية شغل شوية مشاكل وخنقة
على العموم يمكن ابان مهمل بعض الشئ لكن ربنا يعلم انى ديما ملهفو على دخول المدونة حتى وحضريتك مش موجودة على الاقل احس بى الامان
و وعد والله وباذن الله هجاوب عليه ان شاء الله يارب
امى العزيزة دمتِ يارب بكل حب و ود وفى رعاية وحفظ الله دائما يارب

(المهاجر الى الله) يقول...

انا لسه بحل فى التاج اصله صعب قوى وشخصى جدا وربنا يستر بقى .
على فكرة انا بردو طارق سليم ، يعنى انا المهاجر وفى نفس الوقت طارق سليم.

(المهاجر الى الله) يقول...

ان شاء الله التاج يكون منشور فى خلال ساعة من دلوقتى

فكرة من الزمن ده يقول...

كلامك عني هناك في بوست رجل وامرأتان
خلى دموعي تنهمر بشكل مفاجئ
انت فعلا صديقتنا
وعمرنا محسينا انك حد اكبر مننا والله بس هو حفظ للالقاب مش اكتر حتى كلمة حضرتك سعات بكون مش عايزة اقولها
اتمنى اكون قد الكلام اللي قلتيه عني لانه بجد كتير عليا اوي

وانا اللي باشكرك لاني اللي خلاني اجاوب اني حسيت بصدق بجد من جواكي وحب انك تتعرفي علينا

وانا حاسة ان احمد وتندر ابناءك الللي بيتدلعو عليكي فمتزعليش منهم وخليهم على راحتهم يمكن يبقو يعترفوا ليكي بعدين لكن انا بحيي صدقهم كمان في الرد
والمود بتاع كل واحد هو اللي بيحدد تصرفاته ربنا يكرمهم يارب
وميحرمناش من بعض
ويحسن ختامنا كلنا ويرزقنا الجنة ويحرم اجسامنا على النار
وويبعد عننا شبح الفراق عن بعض

همس الاحباب يقول...

اممممممممم
حاضر طلباتك اوامر يا ست الكل
بس ظروف الشغل بس وعد منى انه هبكون البوست القادم وفى اسرع وقت كمان
يعنى ممكن اخد الاسئلة كوبى بست
وانتوا تكملوا الاجابات براحتكم
حلوة الفكرة دى مش كده
هههههههههه
ربنا يكرمك ويسعدك دائما وما يحرمناش من تاجاتك يا ست الكل

شاب فقرى يقول...

هقولك الحق

والله انا جالى اكتر من اربع تيجان الفترة اللى فاتت

وتاج من شهر ونص

ومردتش على ولا واحد

خلينى فى الآخر

وكمان مش بعرف والله

بلاش أتكلم عن نفسى

انا ممكن اعمل بوست لو حد قدر يجاوب عالتاج من بين سطور مدونتى وهكون فى منتهى السعادة

تحياتى :)

وآسف على عدم الرد عالتاج

شاب فقرى :)

ميمى واحمد يقول...

ازيك يا امى

اللى فهمته من كلام فكرة ان حضرتك زعلانة منى ياترا ده صحيح
انا بجد مش فاهم حاجة خالص ممكن توضيح من حضرتك
ابنك احمد


فى عيد ميلاد زواج نوارة عايزنكم تحتفلوا معانا

حياه بلا عنوان يقول...
أزال المؤلف هذا التعليق.
حياه بلا عنوان يقول...

السلام عليكم ورحمه الله وبركاته
معلشى سورى انا فعلا مش بقيت بدخل كتير ومن عنيه هجاوب على اسئالتك طبعا واسفه على التاخير طبعا بس صدقينى ظروف وان شاءالله الاجابه هتكون فى المدونه عندى
تحياتى

موناليزا يقول...

أختى الحبيبة:ادام الله علينا نعمة الحب فيه وجعلكِ دائما رمز للحب والود بيننا جميعا
بس معقول بعد متابعتك ليا فى مدونتى ولسه متعرفيش كل الاجابات دى:)
بحبك جدا فى الله

طوبه فضه وطوبه دهب يقول...

عايزه احييكى على بساطتك وجمال روحك بجد انتى جميله اوى اوى ونفسك شفافه فعلا ربنا يخلى لنا قلبك الجميل يا اجمل ام

♥نبع الغرام♥♪≈ يقول...

السلام عليكم

ازيك ياغاليه

معلهش انا عارفه انك حاسة بيا قوووووووووووووووى

بس ازمة وهتعدى ان شاء الله تعالى فى خلال يومين هيكون منشور التاج عندى بالمدونه
وبكل صدق لانى من طبعى الصدق
وان شاء الله نتكلم على الخاص فى اقرب وقت وانا عارفه انى مقصرة معاكى كتير
بس محتاجه داعواتك بس حبيبتى
لا اله الا الله

------ يقول...

صباح الخير ياماما

انا جاوبت على التاج اهه

مستنية زيارتك
لانها هتسعدنى كتيييير

اسماء واحلام فى وجدانى يقول...

ازيك يا امى









قصة فى قصيدة

------ يقول...

ازيك ياماما

انا جاية اقووولك مبرووووووووووووك لمصر وعقبااال يوم الاربع

TWEETY يقول...

وبابا هيطلع

وهيحضر معانا العييييد

انا مبسوووووووطة

(المهاجر الى الله) يقول...

ممكن بعد اذنك تعيدى نشرى الموضوع ده فى مدونتك لتعم الفائدةويكون فى ميزان حسناتك ،وتشاركى احبابك فى حصد الحسنات .
الرابط
http://eyuon.blogspot.com/2009/11/blog-post_16.html

MaNoO يقول...

بسم الله النهاردة انا داخل من مدونتى
اانا الغير معرف اللى قلتلك افتكرينى بعازب وافتخر
انا كنت داخل المدونة للأو مرة ولقيت فيها التاج وبجد انبسطت جدا جدا لان تانى هقول فعلا اسئلته مميزة ومريحة بطريقة غريبة تحسى انه قريب من القلب
تقبلى زيارتى الثانية للمدونة وان شاء الله نتواصل فى اللى جاى
تحياتى
مانووووو

thunder يقول...

السلام عليكم ازايك ياامى اخبارك اية وفين حضريتك من فترة رغم انى شايف تعليقات عند ناس كتير واخرهم ايوش وحاسس بحاجات ورا الكلام اتمنى تكونى بخير ياااااااارب
وبعدين ياامى هو البوست عندى مش عاجب حضريتك ولا اية على العموم هو مش بتاع دا بتاع نياد واهو جه فيها هههههههههههههههههه احسن يعنى امى العزيزة يارب تكونى بخير يارب ديما
دمتِ فى رعاية وحفظ الله دائما يارب

جارة القمر يقول...

واشكر ابنتى جارة القمر
اللى جاوبت ياعينى فى مكان تانى
وكانت زعلانه خالص ورغم انى طمنتها ...برضه رجعت نقلته هنا تانى
وبرضه جاوبت بسرعه جدا....اشكرها قوى قوى

/
/
/

جئت لأقبل يمناكي

شكرا

كوني بخير لأجلنا

أحبك في الله