الأربعاء، ١٨ نوفمبر ٢٠٠٩

يلا نعــــــــــلى الهـمه ...ونحـــــــاول نوصـل للقــــــــــــــــــــــمه

السلام عليكم ورحمة الله وبركاته

احبا ئى... واخواتى...وابنا ئى

سبقنى الى الخير اخى العزيز طارق (( المهاجر الى الله ))
فقد كنت اتيه بامر الله الى تقديم موضوع عن العشر الاوائل من زى الحجه
ولكن سبقـنى الخير كما قلت الاستاذ طارق
وامرنى ان انقله هـنا فى مدونتى ولست صانعه لهذا الخير
وسبقـنى الى الحب فى الله ولست الا متمنياه بكل قلبى
فهيا نسبح فى بحر المعلومات
ونسبح فى بحر الحب الالهى
ونسبح فى بحرالحب فى الله لاخواتنا واخواننا فى الايمان
وهذا هو موضوع اخى العزيز طارق



ياللا نعللى الهمة عشان نبقى من اصحاب القمة


السلام عليكم ورحمة الله وبركاته:
اقتربت العشرايام من شهر ذى الحجة واصبح يفصلنا عنها سويعات قليلة فهل استعدينا لهم
من فضل الله تعالى على عباده أن جعل لهم مواسم للطاعات، يستكثرون فيها من العمل الصالح، ويتنافسون فيما بقربهم إلى ربهم، والسعيد من اغتنم تلك المواسم، ولم يجعلها تمر عليه مروراً عابراً. ومن هذه المواسم الفاضلة عشر ذي الحجة، وهي أيام شهد لها الرسول بأنها أفضل أيام الدنيا، وحث على العمل الصالح فيها؛ بل إن الله تعالى أقسم بها، وهذا وحده يكفيها شرفاً وفضلاً، إذ العظيم لا يقسم إلا بعظيم.



قال الله تعالى :


{وَالْفَجْرِ (1)وَلَيَالٍ عَشْرٍ (2)وَالشَّفْعِ وَالْوَتْرِ (3)وَاللَّيْلِ إِذَا يَسْرِ (4)هَلْ فِي ذَلِكَ قَسَمٌ لِّذِي حِجْرٍ (5)}


[الفجر:1-5]،




عن ابن عباس عن النبي صلى الله عليه وسلم أنه قال «ما العمل في أيام أفضل منها في هذه، قالوا ولا الجهاد؟ قال ولا الجهاد، إلا رجل خرج يخاطر بنفسه وماله فلم يرجع بشيء» البخاري .




وهذا يستدعي من العبد أن يجتهد فيها، ويكثر من الأعمال الصالحة، وأن يحسن استقبالها واغتنامها

......................
يعنى من الاخر كده هما عشر ايام مش بتكرروا غير مرة واحده فى السنه ، وتخيلوا بقى ان اى عمل صالح فى الايام المفترجة دى بيبقى افضل عند الله من انك تخرج تجاهد فى سبيله الا قط عندما تضحى بمالك وبروحك فى سبيله ولا تعود بشىء منهما ، يعنى تروح ومترجعش هو ده بس العمل المفضل على اى عمل اخر فى الايام العشرة دى .
شوفتوا فضل ربنا كبير قوى علينا ازاى ، يعنى انت وانت قاعد فى بيتكم تحت التكييف ممكن قوى تعمل حاجة تكون افضل من بذل الجهد فى سبيل الله .
زى الاستغفار ، زى الحمد والشكر لله، زى الحوقلة او التكبير او التهليل .
حاجات بسيطة لها فوائد عظيمة فى اى وقت كان فمابالنا بقى بالايام العشرة دى .
بس احنا المفروض همتنا تبقى اعلى من كده ، ماهو بردو مهما كانت الاذكار دى لها فوائد عظيمة بس هيه لوحدها مش كفاية
عشان كده لازم نكون اصحاب همة عاليه .
وعشان كده بردو انا بقترح برنامج نتعاهد اننا ان شاء الله ننفذه قدر استطاعتنا فى الايام العشرة الجميلة دى .

البرنامج اسمه
عللى الهمة عشان تكون من اصحاب القمة
شروط البرنامج
الوصول للقمة فى الاسلام امر سهل وبسيط ومش محتاج للتعقيد ، يكفى اخلاص النية وديمومة العمل ومش مهم بعد كده هوه قليل وللا كتير، ليه بقى لان ربنا سبحانه وتعالى يحب العمل الدائم ولو قليل عن العمل المتقطع ولو كثير .
يبقى اول حاجة اخلاص النية وتجديدها
تانى حاجة تنويع النية وتعديدها ، يعنى انوى فى قريرة نسك انك لما بتعمل عمل صالح بتعمله عشان ترضى الله ، عشان تساع مسلم اخ لك فى الله ، عشان تمنع معصية ممكن تحصل وهكذا
تالت حاجة العزيمة ، مهم قوى يكون عندك عزيمة وارادة وتصميم انك تحقق لنفسك منزلة عند الله سبحانه وتعالى ، وفى ذلك فليتنافس المتنافسون .

نييجى بقى للبرنامج نفسه
البرنامج الزمنى للعشرة ايام بسيط وظريف وطعم ولذيذ ومش محتاج لوقت كتير ولا لمجهود كبير

1- الصيام ، انت فى بيتك ومش بتحج ولا بتحارب وللا حاجة يعنى فيها ايه لو صومت العشرة ايام دى
عشر تيام هيعدوا هوا ، ومش هيرجعوا تانى الا فى السنة اللى جاية ويا عالم مين هيبقى عايش ومين هايبقى مات . وياعالم لو عشنا حتى للسنة الى جاية هنبقى بنفس الصحة والحيوية دى وللا هيبقى نفسنا نصوم العشر تيام ومش قادرين ونندم وقتها على اللى فات
طب ليه نعرض نفسنا للندم بقى ما الموضوع فى ايدينا اهو ومش هانموت من الصيا م( محدش بيموت من الصيام ).
......................
2- ختم القرآ الكريم ، كلنا يعرف طبعا ان القرآن الكريم مكون من تلاتين جزء ، يعنى لو كل يوم قرأنا تلات اجزاء يبقى هنختم القرآن ان شاء الله فى العشرة ايام دى . يبقى اول حاجة ختم القرآن الكريم ، ومش كروته بقى خليك حلو عشان احبك ، اقرأ بتدبر وتمعن ، المسالة دى هتاخد منك وقت قد ايه ، بالظبط كده لو قريت تلات اجزاء بتدبر وتمعن هياخد منك ساعه ونصف وبالكتير خالص ساعتين ، من اربع وعشرين ساعة يابلاش ، وطبعا انا مش محتاج ولا بصدد انى اقولكم فضل قرأة القران فى اى يوم تانى فمابال الايام العشرة بقى، وبعدين المفروض ان المسلم يختم القران مرة كل تلات ايام ولو مقدرش يبقى مرة كل عشرة ايام ولو مقدرش يبقى مرة كل تلاتين يوم ولو مقدرش مايفوتش عليك اربعين يوم من غير ماتكون ختمته مرة ، يعنى مسموح لك انك تختمة مرة كل اربعين يوم .
........................
3- الحديث الشريف ، هوة فيه يا جماعة مالنا كده مهملين فى دراسة وتعلم الحديث الشريف ، انتو مش عارفين فضل دارس الحديث ومتعلمه ومكانته عند المولى سبحانه وتعالى عظيمة قد ايه ، ومش عارفين كمان ان الحديث الشريف مهم قوى لحياتنا لانه هوه اللى بينور طريقنا ، لانه شارح للقرآن الكريم وموضح لما فيه من معانى واحكام ودرر وكنوز اعجازية . ومن غير الحديث الشريف مش هانقدر نفهم القرآن خالص .
الحديث الشريف اكتر من مليوووووووون حديث بكتير قوى ، انا طبعا مش باقولك فى خلال العشرة ايام دول احفظ المليون وادرسهم وتبحر فيهم ، لاء كفاية عليك قوى الاربعين النووية ، ليه بالذات اختارت لك الاربعين النووية ، ايوه قلتى ليه
شوف ياسيدى كتاب الاربعين النووية للإمام محيي الدين أبي زكريا يحيى بن شرف النووي رحمه الله نقدمها للقراء ولطلبة العلم في كل مكان لنفاستها وجمعها للكثير من خصال الخير، ففيها من أحاديث الجهاد والزهد والآداب التي يجب أن يتخلق بها المسلم، وكل حديث منها قاعدة عظيمة. عرفت بقى ، كل حديث عبارة عن قاعدة دينية فقهية من قواعد هذا الدين ، والحق يقال فان الامام النووى رحمه الله بذل جهدا خارقا لجمع وتصنيف هذه الدرر النبوية النووية . ليقدمها لنا غضة طرية .
كل يوم احفظ خمس احاديث وادرسهم كويس هياخدوا منك وقت قد ايه هما بالكتير خالص تلات ساعات ولو كترت شوية يبقى تلات ساعات ونص ، مش بيضيعهم دول قدام مبارة لكرة القدم او فيلم او مسلسل او قدام النت وعلى فكرة لو قدرت تعملها وتحفظ الربعين النووية وتبقى طليق فيهم دراسة وعلما يمكن الشيخ ابو اسحق الحوينى يخليك تقول خطبة الجمعة فى مسجد شيخ الاسلام بن تيمية عندنا فى كفر الشيخ وياسلاااااااام بقى تبقى عشرة على عشرة لو قدرت تحفظ عمدة الاحكام بالمرة ، وده عبارة عن تلتمييت حديث بس ، .يبقى تلات ساعات ونص للحديث مع ساعتين للقرآن الكريم يبقوا خمس ساعات ونص وبس يابلاش. بنضيع اكتر منهم قدام النت .
.........................................
4-بعد كده بقى مفيش هاتخد وقت ، انت كل يوم هتطلع صدقة على حسب مقدرتك ،
وبعدين تلزم الاذكار طول الايام العشرة دى ومن اهم الاذكار اللى عايزك تلزمهم اذكار الاستغفار ، ياااااااااااااه ، اسئلو مجرب يا اخونا ، انا عن نفسى والله العظيم حياتى اتحسنت كتيييييييييير قوى بعد مابقيت الزم الاستغفار ، وانا فى القطر او فى الباص او فى العربية او فى التاكسى وانا ماشى فى الشارع او قبل النوم او بعد النوم او فى وقت او على اى هيئة وباى لفظ سواء كنت متوضى وللا لاء ، صدقونى والله بدات احس فعلا برضا ربنا عليا وبحلاوة الحياة بعد ما لزمت الاستغفار .
وخير لفظ للاستغفار هو دعاء سيد الاستغفار
( اللهم انت ربى لا اله الا انت ، خلقتنى وانا عبدك ، وانا على عهدك ووعدك ماستطعت ، اعوذ بك من شر ما صنعت وابوء لك بنعمتك على وابوء بذنبى فاغفر لى فانه لا يغفر الذنوب الا انت )
دعاء بسيط وسهل وممكن تكرره على لسانك وترطب بيه على قلبك كل يوم اكتر من خمسمية مرة (500) يعنى خمسة فى عين العدو وجنبها صفرين على اليمين مش الشمال هاه لو مش هاتقدر يبقى مش شرط بلفظ سيد الاستغفار يكفى( اللهم اغفر لى ) او (استغفر الله) وكده يعنى ، بس انا عارف انك هاتقدر على الاقل تقول ( اللهم لا اله الا انت استغفرك واتوب اليك ) على الاقل خالص 200 مرة فى اليوم ، طب ماتزعلش كفاية 100 مرة ومش اقل من كده بقى امال فين العزيمة .
........................
بس كده خلص البرنامج هنركز فى الاربع نقط دى وبس ومش مهم اى حاجة تانية دلوقت واللى شايف فى نفسة القدرة على انه يعمل اكتر من كده يبقى تمام قوى وربنا يبارك فيه ويعزه لكن ماتعملش اقل من كده .
1- الصيام ، 2- ختم القرآن ، 3- حفظ ودراسة الاربعين النووية ، 4- صدقة سر ميسرة كل يوم مع لزوم الاستغفار .
وعلى فكرة الاربعين النووية متوفر بسعر زهيد جدا فى المكتبات الاسلامية المنتشرة فى كل مكان مع الشروح الخاصة به ،وانصح ان تقتنوه بشرح الشيخ العلامة بن عثيمين رحمه الله.
نتواعد ونتعاهد ان ان شاء الله نكون على قلب رجل واحد فى تنفيذ البرنامج السهل ده على قدر المستطاع ، واننا نتنافس فى تنفيذه على قدر المستطاع ، وان شاء الله ربنا يلمس بقلوبنا الاخلاص فهيكرمنا ان شاء الله واللى شايفنه انه ممكن يكون صعب دلوقتى بمجرد ما نبدأ فيه ونسأل الله المعونة هنلاقيه سهل قوى وهنبقى مش عايزيين نبطله .
واتفرج على نفسك بقى بعد العشر ايام دول لما يخلصوا وتكون نفذت البرناج البسيط ده ، هتلاقى نفسك باذن الله انسان تانى خالص ومقبل على الحياه بايجابية وفاعلية المسلم .
وفى النهاية ياريت لو تعيدوا نشر هذا البوست فى مدوناتكم لينتشر الهدف منه و لتعم الفائدة وكمان هتبقى فى ميزان حسناتك ا ن شاء الله.
اراكم بعد العشرة ايام ان شاء الله .
تحياتى
اخيكم: طارق


هناك ١٨ تعليقًا:

أميرة يقول...

بارك الله في الكاتب والناقل والفاعل والدال علي الخير بأي وسيلة

تقبل الله طاعاتنا واياكم والمسلمين ان شاء الله

كل سنة وحضرتك طيبة

♥نبع الغرام♥♪≈ يقول...

وحشتينى


قوووووووووووووووووووووووووى

♥نبع الغرام♥♪≈ يقول...

عاملة وفينك كده ربنا يطمنى عليك يارب ويكرمك خير ويشفيكى ويبارك فيكى

♥نبع الغرام♥♪≈ يقول...

كل سنه وحضرتك طيبه
ويعود عليكى الايام بالف خير يارب

♥نبع الغرام♥♪≈ يقول...

جزاكى الله عنا كل الخير وجعل كل ما كتبتى بميزان حسانتك
وربنا يقدرنا على طاعة الله
وربنا يغفر لنا ويسمحنا

امين
امين
امين
امين
ياااااااااااااارب العالمين

thunder يقول...

الحمد لله سبقت وبدائت فى الصيام سبقت فى تذكير البيت هنا الحمد لله
وربنا يتقبل منا جميعا ياااااااااااااارب صيام العشر ايام دول وكل سنة وحضريتك طيبة ياامى عيد سعيد عليكى يااااااااااااااارب

شاب فقرى يقول...

جزاكم الله كل خير

وذكر فإن الذكرى تنفع المؤمنين

خالص تحياتى لكم

شاب فقرى

Abd Al-Rahman يقول...

ماشاء الله
قراءتى لهذا النوع من المواضيع تعيد فى قلبى كثيرا من الأمل المفقود فى صلاح أمتنا ...
سأحاول أن أطبق هذا البرنامج قدر المستطاع ...
وأسأل الله لى ولك أن يتقبل منا صالح الأعمال ، وأن يجعلها خالصة لوجهه الكريم ...
بوركتى أستاذتى

عابرة السبيل يقول...

كل عام وانتى بالف خير

وجزاكى الله خيرا

Tamer Nabil Moussa يقول...

السلام عليكم


بوست رائع


جزاك الله خيرا


مع خالص تحياتى

اقصوصه يقول...

جزين خير على الطرح الهادف والمفيد

rovy يقول...

كل سنه و انتى طيبه اختى الحبيبه و بارك الرحمن بكى و جعل البوست فى ميزان حسناتك ..الدال على الشىء كفاعله ..
ربنا يكرمك ياارب و يتقبل منا جميعا

ارق تحياتى لكى

اسماء واحلام فى وجدانى يقول...

ازيك يا امى
كل سنة وحضرتك طيبة وبخير يارب
اتاخرت كتير لكن مش بايدى انى ابعد والله وادينى جيت اهو اسلم عليكى وياريت مفيش حد من اخواتى يزعل منى لو شافنى هنا لانى مش سلمت ولا روحت عند حد غير حضرتك لكن باقولهم كلهم من هنا كل وكلم طيبين

وردة زهرة المدونة
يويو المحتلة سابقا
ميمى بدون القاب مؤقتا
فكرة الشريرة
آيوشة عدوة القطط
ثندر اللى مجننى وراه
ايناس ربنا يبعد عنها الاحزان
علياء الطيبة اوى
نهر الحب الصامتة احيانا
هناء اللى اختفت خالص
محمد غالى صاحب السعادة
خالد همس الاحباب
مش عارف نسيت حد ولا لآ
ربنا يبارك فيكى يا امى ونفضل متجمعين حواليكى كده دايما
يااااااااااااااااااااااااااااااااااااارب

HaMaDa 3aFshA يقول...

السلام عليكم
امى الغالية ارجو على الله ان تكونى فى كامل الصحة والسعادة
جئت اطمئن عليكى واسألك الدعاء لى حاسس بضيق شديد فى صدرى ومخنوق جدا مش فيه مشاكل شخصية ولا عائلية قدامى بس مخنوق ومتضايق وشايل حمل تقيل واجع قلبى حاسس انى مذنب ومقصر قوى فى حق ربنا اعمال خير بقيت متوانى فى تقديمها مقالاات بقيت بغيب على ما اكتبها ليه مش عارف؟؟ اذنبت فى ايه مش فاكر؟؟بس مخنوق وعاوز اخرج من دا
ادعيلى قوى واطلبيلى الهداية وتفريج الكربة امى

♥نبع الغرام♥♪≈ يقول...

وحشتنى

كل سنة وحضرتك طيبه وينعاد عليكى الايام بالخير يارب ويشفيكى ويديكى الصحه

بحبك قوووووووووى
يارب السنه جايا تكونى على جبل عرفات

امين يارب

حـــــدوتـــــة يقول...

السلام عليكم

كل عام وانتم الى الله اقرب

وعيد اضحى مبارك

اسماء واحلام فى وجدانى يقول...

امى الحبيبة
كل سنة وانتى طيبة وبخير دايما يارب

فكرة من الزمن ده يقول...

كلللللل سنة وانت طيبة وبالف خير
والله ما اتغيرت ولا اي حاجة
انا كتبت في البوست اللي فات رد عليه وتهنئة بالعيد
لكن مش عارفة ايه حصل
نفس الشيء حصل مع نعكشة كتبت رد ومش موجود
ومرة حصلت مع احمد

يمكن انا باستعجل واقفل قبل ما يتبعت الرد
او مشاكل في النت
لكن والله ما اتغيرت
ويعز عليا تفتكري كده
لا
صحيح انا كنت مكتئرة من اللي حصل
لكن مافي حاجة تغيرني من الناس اللي بحبها