الاثنين، ٢٦ يوليو ٢٠١٠

الى لقاء .....ام الـــــــــــى وداع

احبائى...وابنائى

مش هاقول اعزرونى
مش هاقول سامحونى
لكن هاقول............
هاتوحشونى

الموضوع:
هو انى معدتش زى الاول...ودى قلتها اكتر من مره
بجد...انا المره دى خدت قرار بالمعاش المبكر....
لانى فعلا انا تعبانه...حاسه
بالعجز يهزمنى
يمكن يكون احساس بانى خلصت رسالتى فى الحياه
ومعدش عندى حاجه ااقدمها اكتر
يمكن يكون عندى احساس انى محتاجه ارتاح
ودا احساس من جويا فعلا
فعلا حاسه انى محتاجه راحه بعد طول سهر وانتظار
محتاجه حنان بعد طول جهد واعباء
الحمد لله ...الف حمد وشكر ليك يا رب
فضلك عليا كتير يارب
الحمد لله اديت الرساله ووصلت الامانه ....
ودلوقتى جه الوقت انى ااقول كفايه كدا
معدش عندى رغبه فى مواصلة الكفاح ولا رغبه فى المزيد من الاعباء
بقول لنفسى :....
عيشى بقى زى مانتى عايزه
اصحى وقت ماحب وانام وقت ما احب

معلش انا اسفه....مش لازم اكمل الكلام لاخره
مش لازم اوجع دماغكم...وانا ماشيه خلاص

حا
سه انى هاريحكم من مشاكلى واعبائى
لانى هاكون هنا...ومش هنا
هاكون هنا معاكم ...بتابع كتابتكم...ومواضيعكم
وبنفس اسمى مش هاغيره
ومش هاقفل المدونه...
هاسيبها مفتوحه...لانى مش عيزاكم تنسونى وانا مش عايزه انساكم
ولا عايزه انسى الحب الجميل اللى جمع بينا
مش ممكن انسى كل اللى حبونى وحبيتهم
مش ممكن انسى ايناس .. ثندر.. ميمايا ..ورده ..جيجى(صاحبة القصص الرائعه )..احمد (صاحب اجمل شعر ونثر )
ازاى انسى... فكره ..حماده عفشه ... جارة القمر ...ام البنين...
ماقدرش انسى ولا ابعد عن مدونة ( مجداويه )رغم قصر معرفتى بيها لكنى اشعر بالقرب من منهجها وكتاباتها..
وربنا يعينا وتكمل رسالتها معانا لطول العمر
ابو همس الجميل صاحب رسالة الحب والتبرع بالدم واول من عرفنى بفرقة الضاحكون (لهم منى الف تحيه...وارجوا لهم العوده والاستمرار )
الدكتور على خميس ...الجميل بمدونته اللى كلها فوائد......
كلمات من نور..اللى حقيقى كلمها بينور القلب والطريق للتائه...ام البنات( ربنا يسعد ويقويك لسعادة بناتك )
بجد والله هاتوحشونى...ولولا شعورى بالاجهاد ماكنت مشيت ولا بطلت كتابه
ولذلك اقـــــــــــــــــــــــــول
االى لقاء..................ام الى
وداع
حبايبى
اجمل وقت انا خترته علشان اسلم عليكم
هو قرب شهر رمضان
كل سنه وانتم طيبين
ودايما بخير وتوفيق وسعاده وراحة بال

واخيرا
اقول لكل ابنائى وحبايبى
انا معاكم بقلبى وعقلى
والاميل بتاعى موجود........لو لقيت اى ابن واخ واخت سايبلى رساله عليه...
ان شاء الله هارد عليه واتواصل معاكم
لانى مقدرش اتنازل عن دور الام اللى جوايا بسهوله...ولانى بتمنى من كل قلبى السعاده للجميع
ويارب ..يا رب...يارب اكون مش مزعله حد منى
واكون عند حسن ظنكم بيا

وفى النهايه اقول :
اللهم اغفرلى ..ماقدمت وما اخرت...... وما اسررت وما اعلنت............ وما انت اعلم به منى

والى الملتقى..بمشيئة الله

لانى لا احب الوداع

هناك ١٠ تعليقات:

مجداوية يقول...


السلام عليكم

أكبر عيب في التدوين هو هذا الفراق الذي يدمي قلبي
وكأن دنيتنا خارجه لم تكفينا فراق
فدخلنا عالم التدوين لنفارق من توسمنا فيهم الصلاح والقرب الجميل
ولا حول ولا قوة إلا بالله

أنا لا أكتب هذا لأثنيكِ عن قرارك بأخذ قسط من الراحة فاللإنسان دائما يحتاج إلى الراحة وأنتِ أدرى الناس بحالك ولكن لا بد من كلمة حق تقال لأننا في مصر نشيخ قبل الأوان!
فيا سيدتي الجميلة الفاضلة
أنت لستِ في الثمانين ولا التسعين وهنا في مصر تلمسي بنفسك من تعدى الثمانين وما زال متمسكا بمقاليد الأمور لا يريد أن يتركها كسنة للحياة فهو وأمثاله لا يعترفون بالعجز ولا المرض ولا الموت !!
وفي المقابل نجد الفضلاء أمثالك من هم في بداية سن الحكمة والخبرة يزهدون ويعلنون الإنسحاب !!!
هوني على نفسك غاليتي وارتاحي ما شئت ولكن أبداً لا تقولي وداعاً فهناك أحباب لك هنا شئتِ أم أبيتِ ينتظرونك ويرغبون في التواصل معك عبر كتاباتك
ولا تقولي أبداً انتهت رسالتي في الحياة ولا تدعي الإرهاق والتعب يغلف بصيرتك بغلالة سوداء أو بيضاء
استريحي ولا تقفلي باب العودة واتركيه موارباً لتعطي الأمل ولو لواحدة فقط مثلي لتترفقي بقلبها المثقل بأحزان الفراق
ولن أقول وداعاً بل سأقول أنتظر عودتك إن شاء الله بعد أن تستريحي وتجددي النية والعزيمة بحول الله

غير معرف يقول...

الى اللقاء ياامى

غير معرف يقول...

كل شىء جميل فى حياتنا بقى عادى انه يروح مننا بكل سهولة وحضرتك اهو مش هاقول انك البداية لان البداية بدات من فترة طويلة اوى لكن هاقدر اقولك انك كنتى الختام للفترة دى واللى متاكد منه انك اخر حد هازعل عشانه ، عشان النقط لازم تسكن فوق الحروف واى حاجة مبهمة او حتى ممكن تحصل المفروض كفاية لحد كده الواقع صحيح كان فيه حاجات بتوجع لكن الوجع اللى هنا اكبر ومهما كان الواقع كده او كده صدقينى انا شايفه انه ارحم من الواقع الافتراضى ده ، مع ان حضرتك مش شخصية افتراضية ولا حاجة حضرتك واقع ملموس هنا وبعيد عن هنا لانك ام والام بتبدا رسالتها ومش بتنتهى عشان الام اللى زيك مش ام لولادها و بس شوفى بقى عندك كام رسالة لازم تفضلى جنبها ومعاها ،انا عارف انك من حقك ترتاحى لكن الفراغ اللى فى قلب الراحة دى اصعب بكتير من وضعك الحالى لان تعبك دلوقتى هو ده طعم الحياه الحقيقى اسف انى باقول الكلام ده لانى واثق ان حضرتك عارفاه انا مش باقولك ارجعى اكتبى تانى لان اللى اتوجد فى قلوبنا ليكى تعدى مراحل انك تكتبى عشان نعرف انك بخير وموجودة معانا بس انا يمكن عايز اقول حاجة مش فاهمها ولا عارفها ولا حتى شايفها حاسسها بس و مش لاقى اى مدخل ليها ابدا بيه
طولت عليكى اعذرينى بس فى الاول و فى الاخر كل اللى باتمناه انك تكونى بخير وطيبة دايما و ده اللى قادر اقوله ولو على اللى فى القلب فهو اكتر من كده بكتير اوى

احمد

الفراغ يقول...

مجداويه
بجد مش عارفه ااقولك ايه
يمكن انا فعلا محتاجه وقت ارتاح فيه
وانا شايفه على الريدر ناس كتير مكتبوش بقالهم شهور طويله وماقالوش انهم هايمشوا ولا حاجه
هل ياترى مفروض ان الواحد يعمل كدا بدون تانيب ضمير؟؟؟؟؟؟؟؟
انا بس مابحبش اتعب الناس معايا
واسيبهم ينتظروا جديد منى.......
فقلت اريحهم من الانتظار الملل
ولكن كما تقولين سا اترك الباب موارب
عل وعسى ان احتاج اليكم فاجد من انتظاره يسعدنى ويحيى القلب المغلق والمثقل بتعب السنين
وربنا مايحرمناش من بعض يا احلى اخت فى الفضاء التدوينى

الفراغ يقول...

غير معرف
انا عارفه انك احمد
وقلبى حس بكلمة يا امى
وانهارده لقيتك كتبت باسمك
وكلامك وجع قلبى
بس نفسى اسئلك يا احمد:
انا قدمت لك ايه؟؟
ولا حاجه
حتى الموضوع اللى انت كلفتنى بيه
فشلت فيه...بس والله انا بذلت اقصى جهدى ولكنى لم انجح فيه برضه
ويمكن دا من الحاجات اللى خلتنى ااقول انى مش قادره على تقديم المذيد
لكن والله يا احمد انا امك برضه ومعاك فى اى وقت نحتاج لبعض فيه
والدنيا لسه بخير
وانت كمان بتقعد وقت كتير مابتكتبش حاجه وبرضه بيجبلى ملل من الانتظار
طيب قلى اعمل ايه؟؟؟؟؟؟؟؟
لما بناتى بعدوابعد جوازهم
وكل اللى ليا هنا هما كمان مشغولين فى حياتهم
يبقى انا ااقعد اتكلم مع مين؟؟
مع نفسى يعنى
واديك شايف
يويو مشيت
ورده مشيت
ايناس زهقانه وزعلانه
ثندر مسافر
فكره الله اعلم بيها
يعنى حبات العقد انفرطت
بس انا سعيده بيك
وكلمنى على الاميل من فضلك

كلمات من نور يقول...

حبات العقد قد ينفرط بعضها أحيانا بس زمان اتعلمنا نلضمه حتى لو ضاع منا حبه او اتنين سيدتي الجميلة ........صدقيني المدونات جمعتنا بحب الله و بيحزنني جدا أشوف انسحاب أخت لينا في الله ...حتى لو انسحابك جاء بدخولك لمدوناتنا ومتابعتنا بس لا تحرمينا طلتك و تواجدك معانا ...عندك أجازة رمضانية حلوة نعلي فيها الروحانيات الإيمانية و ناخد أجازة في العيد زي بعضه وترجعي تنورينا تاني (:

على فكرة أنا عملت لك إضافة عالياهوو عندي ( حتلاقي اسمي ام البنين ) و أتمنى نتكلم في اي وقت بعد العودة من أجازة رمضان الروحانية ...رمضان مبارك عليكي وعلى أمة محمد

غير معرف يقول...

مش هتفرق كتير ياامى انا من احمد المهم اى كان الوضع اللى اختيره فاكيد هو الانسب ليكى على الاقل فى الوقت الحالى

رحلتنا في الحياة يقول...

انا جاية اقول كل سنة وحضرتك طيبة ورمضان كريم عليكى
اما بخصوص الوداع حضرتك معانا دايما
كنت سعيدة جدا بتعليق حضرتك عندى وكنت فاكرة حضرتك خلاص رجعتى تانى
بس للاسف ظنى طلع مش فى محله اتمنى تكون فترة راحة وان شاء الله ترجعى تانى لكل الناس اللى بيحبوكى وفارق معاهم غيابك

عابرة السبيل يقول...

السلام عليكم

بقى انا داخله اسلم واطمن الاقيكى مشيتى؟

طيب طالما لسه متابعانا خلاص كده حلو برضه

كل رمضان وانتى طيبه

د/على خميس يقول...

السلام عليكم و رحمة الله و بركاته
رمضان كريم
كل عام و أنت بخير
بارك الله فيك