راحت فين؟؟؟؟؟؟؟؟؟؟؟؟

سلام عليكم

جرى ايه يا جماعه؟؟؟؟؟؟؟؟؟؟
احنا بقينا بننسى بعض ليه

فين فكره من الزمان ده؟؟؟؟؟؟؟؟؟؟؟؟؟؟؟
بقالها كتير قوى قوى قوى ماظهرتش

الاجابه
اما هى عيزانا ننساها
او انها فى ظروف مش حلوه

كانت دايما بتقولى ادعيلى يا ماما
وكانت بتقول انا كويسه ومش هابعد تانى
لكن انا قلبى حاسس انها مش كويسه...وانها فى شده...ربنا يفرج كربها


ياجماعه انا معرفش اى طريق للكلام معاها غير المدونه
اللى يعرف حاجه حقيقيه عنها يطمنا
انا بجد نفسى اطمن عليها قوى قوى
قلبى واكلنى عليا ...بجد قلبى زى قلب اى ام
قلقانه جدا
ياريت اللى يعرف عنها اى حاجه يقولى
ارجوكم
طمنونى عليها


وكمان ياريت تسئلوا على ابنى واخويا ( احمد )الهامى 2يعنى اللى يقدر يزوره وياخد معاه 2 كيلو مانجه على حسابى يبقى كتر خيره
الف سلامه عليك يا احمد
ياترى الدكتور يعرف انك عندك قطط
شكرا على انك بتطمنى عليك من خلال الاميل...لانك مش بترد على التعليقات وانا كنت هازعل منك
بس خلاص ..اذا عرف السبب بطل العجب
بس ياريت متحرمناش من كلمة سلام عليكم
وخد بالك من صحتك



وكمان اللى خلانى اكتب دلوقتى موضوع النت ده اللى عايزين يقللوه ويحرمونا منه
انا مش فاهمه حاجه وخايفه انى اتحرم منكم
حد يفهمنى هما هايعملوا ايه وعايزين مننا ايه والوضع هايكون ازاى

وانا طبعا مش راضيه عن اللى بيحصل ده
هما عايزين يخنوقونا حتى من اننا نكلم بعض
حسبى الله ونعم الوكيل


وارجوا ان يكون هناك لقاء دائم

الصدق....ولا غير الصدق

السلام عليكم ورحمة الله وبركاته

بداية اهنىء كل ولادى هنا واخواتى بالنصف من شعبان ....كل عام والجميع بخير...
وربنا يبارك لنا فى شعبان ويبلغنا رمضان ونحن جميعا فى خير وسعه وراحة بال ورضا من ربنا....امين يا رب العالمين
وان غدا تبدا الايام القمريه ...وان ربنا يقوينا لصيامها ان شاء الله
وان اعمالنا بتاعة السنه كلها هاتطلع السماء ونبدا عام جديد بكتاب جديد
ورسول الله صلى الله عليه وسلم قال ( احب ان يصعد عملى وانا صائم )
يلا نشد من عزيمة بعض ونحاول نصوم علشان يطلع كتاب عملنا واحنا صايمين وينزل كتابنا الجديد واول حاجه فيه اننا صايمين بأذن الله

تانى حاجه كنت هاتكلم فيها ان فى سؤال جالى من حبيبة قلبى ايناس وكنت مأجلاه لغاية قبل رمضان علطول...لكن فوجئت بان ايوش الجميل هى كمان بتهدى الى هذا السؤال الصادق من القلب الطيب...
ولقيت ان دا احسن وقت اجاوب فيه وانى اختم اعمالى فى كتابى بيه وان اكون صادقه مع الله ومعاكم ومع نفسى
واتمنى ان ربنا يجعله فى ميزان حسناتى ...لانى فعلا بحب الصدق...بس للحق اقول ان التعامل مع البشر بيغيرنا ويجعلنا نتلون معهم حتى نصل لحقوقنا وخدوا بالكم من حقوقنا....فقد اصبح الحق مظلوما وضائعا فى وسط بشر نسيوا ربنا....لكن بنعمة الله وفضله قلوبنا لاتتغير لاننا نستعين بالله على الظالم ويجيلنا يمين نروحله يمين ..ويجلنا شمال نروحله شمال لغاية ماناخد حقنا من عنيه....وربنا بقا يديله على قد نيته
عموما مش دا موضوعنا
موضوعنا انى هنا هاجاوب على السؤال ان شاء الله
وانى بعد كدا فى اجازه لغاية العيد بأذن الله
وهاقولكم من دلوقتى كل سنه وانتم طيبين بمناسبة رمضان ان شاء الله ويعيده علينا ربنا بالخير واليمن والبركات والهدى والصلاح والفلاح وتقبل الاعمال باذن الله
وممكن احد ابنائى يقولى لسه بدرى يا ماما هاقول وارد لا مش بدرى ولا حاجه
لانى عايزه اسخن قبل رمضان استعدادا لرمضان...زى بتوع الكوره قبل الماتش
لانى طبعا عارفين المفاصل عايزه تزييت... والعقل عايز تربيط ...والقلب عايز تجديد...
وطبعا دا كله محتاج وقت وتركيز
اعاننا الله واياكم على قيام رمضان ايمانا واحتسابا لوجه الله الكريم
ودا مايمنعش ان من حين الى اخر هاقولكم سلام عليكم واطمن عليكم بكلمه صغيره.....وممكن يعنى انى اقرا مدونه ولا اتنين من باب دفع الملل وتجديد الحياه

نيجى للسؤال اللى بيقول ..........: اذكر 10 اشياء صادقه فى حياتك

1 ...المصحف بتاعى...احب كتاب واجمل صديق واقرب الى قلبى من ولادى والدنيا كلها.....ربنا مايحرمنيش قراءته والنظر فيه حتى اخر نفس فى عمرى

2 .....بيتى ..هو واحة الصدق والاحساس بالامان ..اول مابدخله بحس انى بعدت عن شرور العالم وبتمنى انى افضل فيه ماخرجش منه الا الى لقاء الله

3 ....القنوات الدينيه على الفضائيات....حقيقى بتسعدنى عندما ارى بها شباب الدعاة امثال شريف شحاته.. ومصطفى حسنى ..ومعز مسعود..والدكتور محمد عطيه...وامام مسجد النور بالعباسيه...وكمان من يومين كان فى شاب داعيه على قناة نورمينا الاردنيه...بس بجد تحفه ربنا يكتر من امثاله...وغيرهم كتير ومانساش طبعا ابو قلب صافى :محمود المصرى... والحوينى ...والباسم ::حسين يعقوب.... والجاد جدا::محمد حسان

4....صورة فرح بنتى وجوزها...بحبهم قوى وبفرح بيهم لان بنتى كانت سعيده جدا يوم فرحها وجوز بنتى امور كدا وزى العسل

5....مصليتى... زمان كانت صادقه معايا :لانى كنت بحب الصلاة والسجود عليها....لكن دلوقتى مش بقدر وبصلى وانا قاعده على كرسى الصالون...لكن اعمل ايه بحبها لان لى ذكريات حلوه معاها

6.....دفتر مذكراتى وقلمى الرصاص ال( 9 ملى)...مازلت احبهم ..رغم انى مدونتى احتلت جزء كبير من حياتى...ولكن قلمى اكتب به مالا استطيع البوح بها الا لربى فقط

7.....حبى لزوجى الله يرحمه......:مازلت احبه واتمنى رجوعه..ودا مش من فراغ...دا لانه كان الحنان فى حياتى والضحكه الحلوه ...ولانى خدت منه حنان ماخدتوش من اهلى.... وربنا يجمعنى انا وهو فى الجنه وذريتى .... اللهم امين

8.....مرتبى ومعاش زوجى:...بفرح بيهم لانهم نتاج فضل الله على انا وبناتى ولانى قدرت اعلم ولادى وازوج بنتى من غير ما مد ايدى لحد.....ولانه من ريحة جوزى حتى الان وكانه جنبى وبيدينى مرتبه كل شهر وكأنه مابعدش عنى وعايش معانا
وفى حديث قدسى لله عز وجل (مؤمنه بيه اشد الايمان ..عن تجربه) بيقول فيه :انظروا يا عبادى لبيت فيه يتيم..ان وجدتوه معزز مكرم :فملؤا البيت بركه ..وان وجدتوه مهان :فاملؤا البيت حسره وفقر.....والحمد بفضل الله كان بيتى مملؤا بالبركه

9....العمل الصالح ....مهما كان نوعيته ....واتمنى من ربنا يعيننى على العمل الصالح... ودايما يدلنى عليه

10.....بناتى :ودول اجمل حاجه فى حياتى..ولو ان ربنا سبحانه وتعالى قال فى كتابه الكريم: (المال والبنون زينة الحياة الدنيا)ثم اكمل والباقيات الصالحات خير عند ربك ثوابا وخير املا...وكمان قال::( ان من ازواجكم واولادكم عدوا لكم..فاحزروهم)
ودا معناه انى بخاف من ان حبى لهم يعطلنى عن مرضاة الله....بس الحمد لله هما عارفين حبى لله وبيسا عدونى وبيساعدوا نفسهم على طاعة الله اكتر واكتر..اللهم لك الحمد والشكر
و بدعى ربنا يخليهمولى ومايحرمنيش منهم... ولما اموت يكونوا جنبى وبيطبطبوا عليا وبيقروا (سورة ياسين )..علشان ربنا يرحمنى عند مماتى.. ويخفف عنى سكرات الموت

كدا خلصت الحمد لله....ودا مش معناه ان دول هما الصدق فى حياتى وبس .....
الحمد لله فى حياتى صدق كتير...
وبفرح قوى انى صادقه مع ربنا اولا وقبل كل شيء
وانى صادقه معكم واحب افضل كدا من غير احراج من حد

نيجى بقا للاهداء
اهدى هذا السؤال لابنائى واصدقائى واخواتى
احمد (الهامى 2 ).....ثندر

معتصم....................اكيد

جيجيى والعالم...........فكره من الزمان دا

ورده......................بندقه

محمد غاليه.........حنين(مدونة الضاحكون )

الطائر الحزين..........همس الاحباب

نهر الحب...............مونليزا

روفى..................ميمى

يويو................انجى ابراهيم(هات من الاخر)

حماده عفشه......طوبه فضه وطوبه ذهب

ام احمد المصريه........صاحب مدونة صمت الحنين

صاحب مدونة القدر وانا.........صاحبة مدونة يوميات عانس

نعكشه (التى احبها وهى زى ماهيا)......ياسمين صاحبة مدونة انسانه


ودا طبعا مش اجبار على احد...وياريت تعتبروه حب منى اليكم...واللى يجاوبه ياريت يبعتلى دعوه لقراءته وقت مايحب هو يجاوب
وكل الناس اللى بيحبونى وانا بحبهم من غير ماعرفهم
لانى بحب الناس الطيبه كلها

والى لقاء دائم لاينقطع ابدا الى ماشاء الله

لقـــــــــــــــــــــــــــاء الاحبه

السلام عليكم ورحمة الله وبركاته

بحبكم كلكم وبشكركم على كثرة سؤالكم عليا كل واحد باسمه واعتذر عن عدم الرد عليكم فى التعليقات
وارجوا اعتبار كتابتى هذا البوست بمثابة اعتذار عن التاخير وارجوا ان يرضى حبكم لى ويجيب عن غيابى ...وشكرا ليكم كلكم

اولا بعتذر عن طول الغياب..ودا كان لظروف مرضيه غصب عنى ...لانه تقريبا بوظت تعليمات الدكتره فى السفر
ودا كان ليه الاثر السيء عليا بعد مارجعت....وكان لازم من تظبيط المسائل مره اخرى....

ثانيا بحبكم والله ووحشتونى جدا جدا...واسمحولى ااقولكم انى نبهتكم وقلتلكم انكم وحشتونى وهاروح اقرأكل مافاتنى فى الفتره اللى سافرتها
بصراحه كنتم واحشنى قوى قوى وكنت كل ماجى اقعد اكتب بوست جديد الاقى مولضيه عند ولادى جديده ااقوم اعمل ايه؟
ااقفل على البوست واجرى اروح اقرا اللى انتوا كاتبينه واعلق عليه وانا سعيده قوى انى رجعت لبيتى التانى قصدى مدونتى حبيبتى ومدونات ولادى واخواتى

ثالثا بقا واللى انتوا منتظرينه انى ان شاء الله النهارده هاحكيلكم عن مغامراتى فى ساعات السفر
نبدأ... بسم الله
شوفوا يا حبايبى يا غاليين انا وصلت تقريبا العصر كدا
على الحمام عدل طبعا من الحر والعرق والتلزيق... اجاركم الله
بعدين صلاة الظهر والعصر جمع وقصر(طبعا لانى على سفر ومقيمه اقل من 15 يوم)
بعديها بقا الغدا ومش هاقولكم كان ايه علشان ماجريش ريقكم...عموما انا اللى ريقى بيجرى دلوقتى ...بصراحه ماأحلى الكسل والاكل زى العسل...وبعدين بقى فنجان الشاى المعتبر...وبنتى صممت تسقينى فى طقم الشاى الملوكى اللى محطوط فى النيش ...ومطلعش من يوم جوازها الا مرتين....واحد لمدير جوزها فى الشغل والتانيه لماما حبيبتها(زى مابتقولى طبعا)
بعدين خد عندك نوم لغاية 11 بلليل نمت ماحستش بنفسى ولا حد صحانى ولا قالى انتى فين
صحيت لقيت بنتى وجوزهابيتفرجوا على tv
اتوضيت وصليت المغرب والعشا وشربت عصير مانجه( اتفضلوا امس)ههههههههههه
وكانو عايزين يخرجونى اتعشى بره فى الهوا الجميل لكن طبعا رفضت اصلا انى اتعشى
وقضينا الليله فى الفرجه على مسرحيه وقزقزة اللب

تانى يوم...ولا ااقولكم انتوا كدا هاتناموا منى ...انا هاحكيلكم عن المهم وبس ...مش كدا احسن برضه!هههههه
بس على فكره تانى يوم حسيت انكم وحشنى قوى قوى وكنت حاسه ان عايزه ااقوم اروح بيتى تانى ...بنتى عندها كمبيوتر لكن معندهاش نت للاسف...وقضت اليوم بلعب العاب غريبه كدا زى لعب الاطفال بس اعمل ايه عايزه الوقت يعدى ودا اليوم اللى بعتلكم فيه الرساله عن طريق جوز بنتى...بعد طبعا معرفش الباس ورد ( واللى هاغيره ان شاء الله )
المهم بقا بعد رسالتى اليكم استسلمت للامر الواقع...وهديت وبدات احس بالامان انى مش ورايا حاجه قلقانى
وحضرت التحضير لفرح..وبعون الله امكم حبيبتكم وفقت راسين فى الحلال...بصراحه يعنى هما كانوا متوفقين بس فى شوية عراقيل بسيطه
وبما انهم اصحاب بنتى وجوزها وعرفت الموضوع طلبت انى ازور بيت العروسه واللى هما عاملين المشكله
ورحت والاقى ال ايه الزعل انه ماجابش مروحه وهى كمان مش عاجبها الفرح فى الشارع
طيب بالزمه دا زعل اساسا....طيب يا جماعه المروحه دى هاتيجى بعد الصباحيه ولا اى حد ان شالله انا هاجيبها هدية الصباحيه للعروسه

ياجماعه حسوا بالعريس دا خلاص مستنى يقول لله ...دا هاياكل شكك هو عروسته...المهم يبقوا مع بعض وهاينسوا اى حاجه بعد وقبل كدا
وام وابوا العروسه مش هايفتكروا حاجه غير فرحة وسعادة بنتكم....وهو سؤال واحد سئلته للعروسه الاهم عندك عريسك وحبيبك ولا الفرح وكلام اصحابك..اتكسفت طبعا وقامت دخلت اوضتها ودا كان ابلغ رد على السؤال واللى اقتع اهلها بان كل اللى بتعمله دا من تاثير كلام الناس وبس...واللى لاهايعجبهم الفرح فى نادى ولا قاعه ولا شارع ...وبس عايزين يقعدوا يقولوا بنت فلان فرحها ماتمش ويفرحوا فى غم الناس ووقف الحال
وقعدنا نضحك وابو العروسه اتكسف وقال خلاص يعنى هاقعد بنتى جنبىأهوى عليها انا..ههههههه
ومن هنا رضيوا برضه بالفرح فى صوان بالشارع....... حتى فى البيت وخلاص توفيرا للفلوس وفكرت ابو العروسه بيوم فرحه
وان ماكنش فى لا نوادى و قاعات بس كان فى رضا وسعاده والعروسه للعريس والجرى لل.............

وقام الراجل اتصل بالعريس اللى كان منتظر المكالمه دى بفارغ الصبر وجه وحددوا موعد الفرح وحضرت الفرح الخميس اللى فات وكانوا من اجمل العرسان وربنا يسعدهم وصحيح مارحتش الصباحيه وخلعت من المروحه بس بعتلهم صباحيتهم طبق بسبوسه عسل....بزمتكم مش احلى من المروحه!هههههههههههههههههه
وكمان خرجت اتعشينا بره على النيل.... طبعا سندوتشات بس مع تُرمس الشاى والتَرمس اللى اللى بنتى عملاها ومجهزاه من يوم مارحتلها..كانت القعده جميله جدا ويومها روحنا الساعه 3 صباحا ومصحناش تانى يوم الا على الظهر

ورحنا فين كمان... روحنا فين كمان...روحنا السيرك بس انا مش انبسط فيه معرفش ليه !!!!!!! يمكن عقده من الصغر وانا مش فاكره؟!!
الله اعلم.....و اللى عنده تفسير لذلك الكره لهذا المكان.... يقولى !!!!!!!!!
كمان اتعزمنا على غداء عمل فى بيت صديق جوز بنتى وهما راحوا يشتغلوا واحنا الستات بقا هاتكم يا رغى فى كل حاجه والضحك ماشاء الله واصل لااخر الشارع وانا نسيت انى قد امهم ورجعت 30 سنه لورا.....لدرجة ان جوز بنتى وصاحبه سابوا الشغل وجم يقعدوا معانا
وقالى ايه يا ماما دانا ماسمعتش الضحك دا من ساعة ماتجوزنا....انتى تقعدى معانا علطول بعد كدا....
ربنا يسعدهم يا رب ويفرحهم بعيل يملا البيت عليهم سعاده وبر ...قولوا امين....
اهو زى مانتوا شايفين الدنيا مابتريحش حد اهو صديقهم دا متزوج بقاله 5 سنين ولسه ربنا معوضش عليهم بطفل
وبنتى ربنا كرمها وحامل بس اللى منغص عليها حياتها انى مش جنبها وحاسه بالغربه مع جوزها رغم انه بيحاول يعوضها غيابى انا واختها بس هانعمل ايه هى كدا الحياه ....تديك حاجه وتاخد قصادها حاجات....
وبالمناسبه عن الرضا بقضاء الله توفى احد جيران بنتى قبل ماروح والحمد لله لانى مش بستحمل المواقف دى وبفتكر علطول المرحوم جوزى الله يرحمه...بس حضرت العزاء لمدة 10 دقايق ونزلت بسرعه لان بصراحه الزوجه ماكنتش قد الموقف وزعلت اهل جوزها منها
واتكهرب المكان وقلنا مالناش دعوه...ورجعنا اتنكدنا بقية اليوم...وقضيناه قاعدين فى البلكونه ناكل عنب ونشرب مانجه بصراحه اخر نكد ههههههههههههههههه
واخر ليله معاهم روحنا للدكتور متابعه مع بنتى للحمل والحمد لله النونو بخير وهى مبسوطه قوى انها راحت معايا انا مش مع جوزها ...سبحان الله الست بتفرح بجوزها وهى رايحه تتابع الحمل ...لا.. بنتى فرحانه بامها ..وبتقول علشان الدكتوره تعرف ان ليا ام ومش مقطوعه من شجره....ال يعنى هاتخلى العيل اتنين هههههههههههه

بس خلاص... ويوم مامشيت بنتى قطعت نفسها من العياط وعايزه تيجى معايا بس طبعا انا رفضت وقلتلها هاجيلك تانى اول رمضان ..كل سنه وانتم طيبين... وكل الحبايب طيبين وبخير ويعيد علينا وعليكم الايام بالصحه والهنا والسعاده والايمان..... اللهم امين

ورجعتلكم وانا كلى شوق ليكم...ويارب ماتكونوش زهقتوا من كلامى
ملحوظه
ثندر.......محدش يعرف عنى حاجه يا ثندراكتر من اللى انت تعرفه وماحدش يعرف انا فين ولا فيا ايه..... وارجوا عدم الزعل
احمد (أ سماء واحلام فى وجدانى).......خليك ستر وغطا عليا ومتنساش انى كنت تعبانه من السفر..... وجل من لايسهو
وربنا يطمنا على يويو وترجعلنا بالف سلامه

والى لقاءقريب بأذن الله

اهلا بحبايبى كلهم

السلام عليكم ورحمة الله وبركاته

ما احلى الرجوع الى البيت والعائله والابناء الغاليين والحبايب والاصحاب
مش عارفه ااقولكم وحشتونى قد ايه
عارفين انا عامله زى البنوته اللىكانت مستنيه العيد
وجه العيد
عيدى هو العوده اليكم
بسئل نفسى انا ازاى قدرت اغيب كل ده عن ولادى وحبايبى
بس ارجع واقول انى برضه ريحتكم من وجع الدماغ بتاعى
بس اوعوا تكونوا نستونى اصل عيالى تفرح فيا لانهم مش مصدقين الحب اللى بحبهولكوا كلكوا هنا
وحشتنى يا ثندر انت فين يا احمد اجمل ورده وارق ايناس .. ايوش الجميل...ميمى وجيجى ويويو وهناء...همس الاحباب... حماده .. واكيد.. والطائر الحزين....سقراط مصر اللى نورنى مره واحده بس مش ناسياه
روفى وطوبه دهب وطوبه فضه(لهم شكر خاص جدا جدا)لانى اول مره اعرف انهم بيتابعوا ما اكتب بجد لهم كل حبى واخلاص وتحياتى
كمان بنتى عابرة السبيل ام بوجى وطمطم ان شاء الله بجد بشكرك على سؤالك عليا رغم انك فى قمة رعايتك لبوجى
ابنى المثقف الكبير محمد غاليه
العزيزه المتجدده دائما مونليزا...فكره.. وجارة القمر...نهر الحب الكريمة الاخلاق
وكمان اشكر قلم رصاص اللى رد الزياره بسرعه
كان لازم اسلم على كل حبايبى واحد واحد باسمه لانكم وحشتونى وحشتونى قوى قوى
وكمان بنتى بتسلم عليكم قوى قوى لانى فعلا كنت سعيده قوى عندها بعد ماطمنتكم عليا
وان شاء الله احكيلكم على الزياره واللة شفته فيها واللى اتعلمته واللى عرفته
لان فعلا السفر والتغيير بيعلم كتير
وهاقولكم انا نفسى الف على مدوناتكم كلكم واقرا كل اللى فاتى...وارد عليكم
واعيش معاكم من جديد
لكم كل حبى
والى لقاء
والسلام عليكم ورحمة الله وبركاته

وحشتـــــــــــــــــــــــــــــــــــــــــــــــــــوونى

سلام عليكم

ازيكم يا حبايبى
وحشتونى بشكل مش ممكن
انا كانى محبوسه فى سجن...

بنتى هاتزعل منى دلوقتى لما تقرأ هذا الكلام
طبعا عرفتوا ليه؟!!!!!!!!
لانى عندها...وهى مش راضيه تسيبنى اروح بيتى

بس انا حبيت اطمنكم عليا.....
ماتقلقوش لانى عارفه زمانكم بتدوروا عليا وقلقانين
زمان احمد وثندر قربوا يبلغوا الانتربول عنى
والله وحشتونى كلكم وبالاسم كل واحد باسمه
وحشتنى يويو وفكره وحماده وايوش وميمى وايناس وورده وهمس الاحباب
وحشنى كل اللى بيسئل عليا وكل اللى بروح اكتب تعليق عندهم عندهم
فاكره جيجى والفقيره ام البنات وفاكره مونليزا.... وبستان الحب ... وصوت من مصر وفاكره اكيد
عارفين انا عامله زى اللى فى غربه ...وبيفتكركل ذكرياته الحلوه

بس اطمئنوا انا اتخطفت خطف كدا من القاهره...حتى مالحقتش اقدم اجازه من الشغل وكلمتهم بالموبايل يكتبولى اجازه اعتيادى (خدمه يعنى)

طبعا بنتى هاتزعل لانها بتحاول تسعدنى بكل ماتستطيع من مجهود
لكن تعملوا ايه بقا فى اللى بيحب اصحابه واخواته
وحشتونى وحشتونى........ وحشتونى اكتر من بيتى كمان
امرى الى الله شويه كدا ورجعالكم قريبا قريبا

الرساله دى كتبتها بايدى وجوز بنتى راح عند واحد صاحبه يبعتهالى اليكم
والا كنت زمانى فى طريقى الى القاهره
يعنى انا كدا شغلت الجميع معايا

مش عايزه اسكت عايزه افضل اتكلم معاكم
لكن غصب عنى هاسيبكم دلوقتى....
وان شاء الله لما ارجع نبقى نتكلم كتير
سلامى للجميع....وهاتوحشونى اكتر على ماجى
الى اللقاء
سلام عليكم

قيمة الوقت

السلام عليكم

ابنائى الاعزاء
دا موضوع عجبنى منذ فتره عند الابنه بندقه صاحبة مدونة: ببساطه انا..............http://only00me.blogspot.com/
طبعا انا بشكرها انها سمحتلى بنقله هنا
وطبعا اللى عايز يروح ويقراه عندها يتفضل براحته خالص لانها مدونه لذيذه جدا بس صاحبتها كسلانه فى الكتابه شويه
بس انا بعذرها لانها بكالوريوس طب
ربنا معاها
بعد اذنها انا تدخلت فى الكلام شويه بسيطه ..لكنها لا تغير سياق الكلام

ودلوقتى تعالوا نقرا

لكي تدرك قيمة العشر سنوات .... إسأل زوجين انـفـصلا حديـثاًبعد عشره طويله

لكي تدرك قيمة الأربع سنوات .... إسأل شخص مـتخـرج من الجامعة حديثاً

لكي تدرك قيمة السنة .... إسأل طالب فـشـل في الإختبار النهائي

لكي تدرك قيمة الشهر .... إسأل أم وضعت مولودها قبل موعده

لكي تدرك قيمة الأسبوع .... إسأل محرر في جريدة أسبوعية

لكي تدرك قمة الساعة .... إسأل من دخل السجن مظلوما

لكي تدرك قيمة الدقيقة .... إسأل شخص فاته القطار .. الحافلة .... أو الطائرة

لكي تدرك قيمة الثانية ولكي تدري قيمة الجزء من الثانية ...... إسأل شخص فاز بميدالية فضية في الأولومبيات

لكي تدرك فيمة الصديق .... إخسر واحد

لكي تدرك قيمة الأخت .... إسأل شخص ليس لديه أخوات

لكي تدرك قيمة الحياة .... إسأل عن إحساس من على فراش الموت

لكي تدرك قيمة ذكر الله ...... مت وأنظر ماذا فقدت من عمرك وأنت غافل
الوقت لا ينتظر أحد وكل لحظة تمتلكها هي ثروة وستغتغلها أكثر إذا شاركت بها شخص غير عادي

رساله....الى كل من يهمه الامر

السلام عليكم ورحمة الله وبركاته


الى كل من يهمه الامر
مش عارفه اكتب حاجه ....وليه اكتب؟
انا الست الكبيره ...اقعد اكتب واقرا..وادور على مواضيع اعتقد انها تنفعنى وتنفع اولادى ...او على الاقل تناسبهم
بحاول اتواصل مع الجميع سواء كانوا موجودين او لأ
المهم اقدر ااقدم شيء كل ماقدر على الكتابه
وبيجيلى اكتئاب وزهق وملل...وبرضه اقاوم واقول خلينى قدوه ليهم واحاول الا ابعد عن المدونه

ولكنى فى الفتره الاخيره وجدت انى وحدى هنا
وجدت انى اكتب ...وابحث عمن اقرا له
فلا اجد الا بوست من اسبوع او اسبوعين وايضا مدونات بتعتذر عن الكتابه او التواصل مع الاخرين
اجد مدونات متعللين بالشغل والارهاق وانه فى غير استطاعتهم ان يكتبوا
وأخرين يعتذروا بالسفر
المهم انى اظل ابحث فى الريدر عن موضوعات جديده لاابنائى الاعزاء .....لا اجد

اسمحولى اسئلكم.....اين ايوش ومدونتها تخاريف....اعتقد انها استسلمت وفضلت الاعتزال
اين ثندر...وهو من ساعة ماشتغل ماعدش بيكتب الا كل شهر تقريبا
اين يويو... وميمى... وفكره من الزمان ده...واحزان ايناس ....واسماء واحلام
اين المعتصم....اين محمد غاليه حتى هو كمان بقا كسلان بقا بيكتب موضوع كل اسبوعين
اين هناء...اين حماده عفشه....

انى اشعر بالوحده....بالاغتراب....
اشعر بانى اعيش فى بلد ليس بها احد
فقط انهم ياتون للتعليق عندى
طيب وانتوا .....ماذا تفعلون....لماذا لاتكتبون
وبعد التعليق عندى او عند غيرى ....ماذا ستفعلون؟

انى اعترض على هذا الاسلوب
فليس الموضوع بكثرة التعليقات عندى
وملو فراغ التعليقات باسم واحد يتكررعشرات المرات
مع الاعتزار لكل ابنائى الذين يفعلون ذلك
لانى اتعب فى الرد عليهم بلا فائدة تذكر
انى اريد ان أقرأموضوعات جديده عندهم وعندهم بالذات


واذا لم يحدث ذلك
وحتى يحدث ذلك ........فانى بعد الاعتذار اليكم
اعتبرونى فى اجازه
وشكرا