الثلاثاء، ١٧ مارس ٢٠٠٩

عدت يا عيد...

بسم الله الرحمن الرحيم
مش عارفه ليه كل مايقرب عيد الام اصاب بالحزن والخوف
بناتى بيجبولى هديه ..هدايا وببقى فرحانه بيها..او يمكن ببين فرحتى بيها..علشان مايزعلوش انى مش فرحانه..او يفتكروا انهم مش عارفين يفرحونى..
انا اول مره ااقول الكلام ده...وهما اول مره هايقروه.. ومش عارفه هايحسوا بأيه..

بس انا قلت ايه فايدة المدونه ولو ماكنتش ااقول بحريتى كل اللى بحس بيه

هى المدونه دى بنكتب فيها علشان مين؟
اكيد علشانى
انا مش صحفيه ولا كاتبه قصصيه
انا انسان
انا احساس وقلب وروح
صدقونى نفسى افرح
روحت مدونه لبنتى علياء اسمها خواطر علياء
لقيت وردتين... بس وردتين حلوين..صحوا فيا عشق السنين
سنين ومرت ..زى الثوانى
حسيت وانا بتفرج عليهم ..كانى بشم ريحتهم...حسيت وكأنهم هما انا وزوجى
كنا وردتين حلوين
لكن الزمن ..القدر..مابيسبش حد على حاله
بس انا حسيت ان لسه انا وزوجى وردتين..بس فى خيالى
خيالى انا ..مش خيال حد تانى ..
حتى لو كان الخيال ده خيال ولادى
معلش يا ولادى..سامحونى ..غصب عنى..فى يوم عيدى ..بفتكر الورده اللى كانت تملآ حياتى بعبير الشوق

سامحونى
وكل عام وانتم بخير..

بس خلاص ...بلاش نكد
ايه الستات المصريه دى ...الولاد يعملوا كل اللى يقدروا عليه ويحوشوا طول السنه..وانا اجى على اخر لحظه ااقلبها غم
دا اسمه كلام
طبعا مايصحش
يلا اللى عنده نكته يضحك..اللى مش هايضحك هانزغزغه
فين الهديه..ولا انتوا ماهتصدقوا...انا فاتحه ايديا الاتنين..ايه مش هاتقضى...
طيب خلاص ..آدى حجرى..املوه بقى
ربنا مايحرمنيش منكم... وقابلونى السنه الجايه
بس تكون الهديه اكبر من كدا...هههههههههههه

هناك ١٣ تعليقًا:

أميرة يقول...

ربنا يديكي الفرحة الي نفسك فيها :)

كل سنة وحضرتك طيبة


انا استغربت لما قولتي انك مش بتكوني فرحانة

طيب قوليلي بتفرحي ازاي

انا نفسي اسعد امي

قوليلي ايه يفرحك ويفرحها

لو علي الزمان انه يرجع يبقي بنطلب مستحيل

لو علي بكرة انه يجي .. كل شيئ باوان وميعاد

لو في الفرح

ربنا يفرح قلب كل مشتاق بحبه وزيارة المصطفي صلي الله عليه وسلم :)

قولي امين :)

كل سنة وكل ام طيبة ويارب يارب يارب يرزقني النعمة دي يااااااااارب

موناليزا يقول...

ياحبيبتى كل سنة وانتِ طيبة وولادك دايما منورين حياتك

رحلتنا في الحياة يقول...

السلام عليكم عليكم
مش عارفة كلام حضرتك اثر فيا جدا جايز موضوع هدايا عيد الام مش بتسعدهم اوى زى ماانا متخيلين واحنا بنكون معتقدين اننا عملنا اللى علينا بكده
اى هدية فى الدنيا مش هتكون مناسبة للام بس احنا بنحاول نعمل اى حاجة لو بسيطة علشان نسعدهم
ربنا يديم عليكى الفرح والسعادة دايما ياااااااارب وهفكر فى نكتة ورجع تانى
كل سنة وانتى طيبة يارب

Ophelia - cfd يقول...

كل سنه وانتى طيبه :) فى عيدك

متهيألى الأم بتبقى مش محتاجه هدايا من ولادها قد ما هى محتاجاهم جمبها محتاجه تشوفهم سعداء وفرحانين وكويسين ..

------

ربنا يفرح حضرتك ويدخل السرور على قلبك ..

mohamed ghalia يقول...

كل سنة وإنتى طيبة يا أمى

thunder يقول...

انا اول مرة مبقاش لاقى ولا كلمة اقولها ومش عارف اعمل كومنت حتى اللوجو اللى بيبكى مش عاوز كمان يتحط انا شوفت البوست من اول ما نازل وكل لما اجى اكتاب معرفش مش غلاسة من النت لكن لان ولا كلمة هتقدر تقول اللى انا عاوز اقوله على رغم ما وجع الكلام الا انه قابى لكل ام مش حابة تفرض على اولادها عبئ بس ياماما عيد الام مش عبئ علينا بقدر ماهو تعبير عن عرفان ومجهود لثمرة سنين والوردة اللى حضريتك بتفتكريها دا عرفان منك بتاثيرها فى حياتك ودا حق اخواتى انه يعبروا بتاثرهم بفضلك عليهم واعتقد دا حقهم
وكل سنة وحضريتك طيبة يا ماما

thunder يقول...

و ان كان انا زعلان شوية بس النكت دى هدية منى
خنفس سمع شريط لعمرو خالد اتحجب
.............................
-صعيدى حب ينتحر باس حماته
..............................
- واحد قبل ما يموت بيقولة له قول الشهادة رد وقال دبلوم صناعة
..............................
واحد ندل جيرانه خبطوا عليه بالليل وقالوله

ماتشربش مياه من الخزانات لانها ملوثة دخل ينام فمراته بتسأله فى ايه قالها مافيش حاجة اشربة مياه و نامى
...........................
مسطول راح المحكمه القاضى بيسأله

انت متجوز مين؟قاله متجوز واحده ست القاضى:انت بتهرج هو فى حد بيتجوز واحد راجل قاله اى اختى
...........................
سألو واحد بخيل طحن: تعمل ايه لو الدنيا برد؟ قال:

أروح جنب الدفاية. قالو: ولو الدنيا بردت أكتر؟ قال:أقرب من الدفاية. قالو: ولو بردت أكتر؟ قال: ألزق في الدفاية. قالو: طب ولو نزل تلج؟ قال: أشغل الدفاية بقى وأمري لله
...............................
مرة واحد صعيدى بس عايش فى القاهرة بعت بنته علشان تجيبله فيلم فلما رجعت

وخبطت على الباب الاب قال مين اللي على الباب؟ قالت له انا يا بابا قال لها جبتيلنا ايه معاكي؟ قالت له العار قال ادفنوها

.............................
مسئول بيقول لمسئول ايه اخبار

الصوره الى على علبه السجاير قله ناس كتير بطلتها يا ريس قله الحق نزلها على رغيف العيش
............................
مرة واحد صعيدى سالوه عرف السيفون قال

صندوق فيه حبل لو شديتة ياتلحق تشرب يا متلحقش
........................... شوية رخامة منى انا عارف اعمل اية الطبع بيغلب التطبع ياله كفاية كدا سلام واشوف وشكم بخير يارب

thunder يقول...

نسيت ارخم نكتة قولت ارجع اضيفها واتزحلق تانى

..........................
ازاى نصطاد الفيل الازرق!!!!!!!؟؟
بالسهم الازرق


طب ازاى نصطاد الفيل الاحمر !!!!!!!؟؟
ننزل فيه ضرب لغاية ما يزرق و نصطادة بالسهم الازرق.....

طب ازاى بقة نصطاد الفيل الابيض !!!!!؟؟
نحطة في موقف محرج يقوم يحمر من الخجل نقوم نزلين فيه ضرب احد ما يزرق و نصطاده بالسهم الازرق

............................................

simply me يقول...

ياه
انا اول مره اعرف كده
كنت فاكره ان عيد الام بيكون يوم سعيد لكل الامهات
ماجاش فى بالى خالص ان امى تكون زعلانه وبتفكر فى زمان

بس انا عرفت ايه احلى هديه دلوقتى

....... صوره عمو بالحجم الطبيعى
ههههههههههههههه
عشان ماتحسيش انك لوحدك


وحاولى تقربى من اولادك هما اكيد اتمتداد ليكى ولوالدهم وهيفكروكى بيه

وربنا يفرحك دايما

life يقول...

كل سنة وانتى طيبة ياست الستات
كل سنة وانتى احلى وردة

كل سنة وحياتك سعادة

وربنا يصبرك على غياب الوردة التانية

ويعوضك خير فى أولادك


ولو على الهدية والله لو مليون هدية مش هتوفى حق الامهات علينا ابداً

بس ربنا قال الجنة تحت أقدام الامهات فى هدية أروع من كده

ربنا يفرح قلبك ويبعد عنه الحزن


لك خالص مودتى

الفراغ يقول...

بسم الله الرحمن الرحيم
ابنتى العزيزه اليس
انا فرحانه بيكم وبوجودكم فى حياتى
بس انتى عارفه اكتر حاجه تفرحنا انكم ماتنسوناش
ربنا يسعدك

الفراغ يقول...

بسم الله الرحمن الرحيم
موناليزا..وانت طيبهوماتحرمش من مرورك عليا




ايوشه حبيبتى..احنا بنفرح لما بتكونوا حوالينا..بهديه او من غير هديه..المهم احساسكم بينا
دمتى بكل خير


انتى اسم على مسمى...زهرة الامل
ربنا مايحرمناش من الامل
لسه عندى امل..بس فى ربنا اكتر
منوره يا امل..ورايحه ازورك فى بيتك هناك..
ماتقطعيش الزيارات



ابنى الغالى ...محمد غاليهوانت كمان بالف خير وحبايبك كلهم



ثندر..كفايه احساسك بيا ومعايا
دا احسن هديه
وتانى هديه مجموعة النكت دى..متعرفش شالت عن قلبى الحزن ووالله بضحك اهو
ربنا يسعدك يا ثندر.. ودايما يملى قلبك ايمان..حب..رضا..موده..اخلاص..
ودايما تملى مدونتى فرحه وسعاده بوجودك

ابنتى الغاليه..بندقه
الموضوع مش بالصور يا دكتوره
الموضوع احساس بالرفيق..بالعشره..بان حد يحس بيكى
احنا دلوقتى فى زمن انا وبس ..ومش مهم مين قدم ايه ومين خد ايه
ربنا يسعد ايامك


لايف
كلامك بلسم للمجروحين
واشكرك على دعائك
هو كدا بس..الكلمه الطيبه بتداوى جروح كتيره..بس لما تبقى طالعه من القلب ,,مش واجب وخلاص
دمت بكل سعاده
وانا رايح اشوف مدونة الحياه..بعد ازنك

الفراغ يقول...

انا رحت مدونة لايف
لقيت الدخول بتزاكر
وانا مامعيش تمن التزكره
قلت ارجع ااقولها
يمكن تدخلنى على حسابها