الجمعة، ٢٧ مارس ٢٠٠٩

المنحه الربانيه

بسم الله الرحمن الرحيم..
ماحدش بيحب المرض..انا عن نفسى بكرهه جدا..بس هاعمل ايه..هو مصمم يصاحبنى وبيعزنى جدا
احاول اضحك عليه واقوله خد اجازه منى شويه..ابدا...ياعم انا لسه كنت مستضيفاك ..واستحملتك..وعملت معاك واجب ضيافه حلو..خليك بقا زوق..وتعالى بعد سنه ولا حاجه..اطلاقا ..انا معاك وقاعد ..ومش مفارق (له فى ذلك حكم)
بيبنى وبينكم قلت يمكن العد التنازلى بدا..الحق بقى اعملى كام تسبيحه حلوه على كام استغفار..على كام جزء قرءان..يمكن يمكن اعرف اختم صحيفتى بحاجه تنور وجهى عند لقاء الله

وقعدت كدا مع نفسى اشكر ربنا على الابتلاء..وان الابتلاء نعمه..وان الابتلاء بيرفع درجات الانسان..لآما يعنى (ودا مش تبعنا..هههههه)بيكفر زنوب..(هو حد فينا بيعمل ذنوب)..وش بيغمز
المهم يعنى..قعدت افتكر فى اللى راح واللى مش جاى ..واعيط ..واقول ياخسارتك يابت..دانت لسه صغيره ..دانت يادوبك معديه الخمسين
طيب يا حلوه زمان وانتى صغيره قوى قوى(فى العشرينات يعنى)كنتى بتصلى سنن الصلاه..كنتى بتصلى قيام ليل
الاقى نفسى ااقول :ايه الكلام ده..دانا كنت فى الكليه..وكنت بذاكر..واه كنت بقوم ليل ..بس ايام الامتحانات..كنت بقوم الليل بطوله مع كوباية قهوه (ماقولكش)وافضل ادح .وادح...امال يعنى بقيت ..رئيس قسم من فراغ(ودا موضوع تانى ..ابقى احكى عليه وقت تانى)
اهو كنت بعمل اللى عليا..مذاكره وسهرللصبح
شفتوا بقا..انا لم اقصر والله على ذلك شهيد
بس ياخساره للدنيا الفانيه

باين عليا خرجت عن الموضوع
موضوع ايه... موضوع ايه
اه..قعدت احاسب نفسى..وطبعا بين كل وقت والتانى ..أقرا جزء قرءان..وكمان اسبح ربنا (سبحان الله وبحمده ..سبحان الله العظيم)..
وبعدين يغلبنى النوم من التعب..بس والله الاقى لسانى وانا نايمه بيوحد ربنا (لا اله الا الله ..وحده لاشريك له ..له الحمد وله الملك وهو على كل شيء قدير).
.

وبعدين وعلى طريقة افلام زمان..الاقى موجه جايه من بعيد(افلام على بدرخان...لما كان الحبيب يجى يقرب من حبيبته..ويحصل مالا يحمد عقباه)احنا اتربينا على كده..ماليش دعوه ببتوع اليومين دول
المهم بقا الاقى نفسى ..مع حبيبى وجوزى وابو بناتى ..الله ايه الحلم الجميل ده..ونقعد مع بعض قعده رومانسيه.. ترد الروح .(الحلم بتاعى وانا وجوزى ..حد ليه عندنا حاجه) ..بس برضه التعب ..مافيش فايده منه...يصحينى من احلاها حلم..الاقين بصرخ واقول يااااااااااااااااااااارب..رحمتك
ماليش غيرك..انت الرحمه.. انت الحنان..انت الشافى..انت الحبيب..انت السميع الرحيم
اه..هو الحبيب..انت حبيبى يا رب..انت اللى بتسمعنى :لا اله الا انت سبحانك..انى كنت من الظالمين(وكذلك ننجى المؤمنين) صدق الله العظيم
الاقى سكينة روح..ورضا بقضاء الله..الاقى هدوء.. وشفاء يغلفان جسدى
الاقى حاجه حلوه فى ريقى ـتستعذب نداء الله..يا اللــــــــــــــــــــــــــــــــــــــــــــــــه..جميل نداء الله والواحد مريض..ليها طعم جميل
الاقى انى وجدت الحبيب الابدى ..السرمدى..اللى بيبقربنى منه ..غصب عنى.. بيقولى انا وبس..ماينفعش يبقى جوانا حبيبيبن..هو الله هو الله هو الله وبس
وافوق من التعب..افتكر انى كنت بحلم بزوجى الغالى وافرح انى شفته..بس ياخساره لسه ماجاش اوان اللقاء
والاقى نفسى بقول لبنتى ..مافيش عندك حاجه حرشه..جعانه
وبنتى تهلل..ماما خفت ..ماما خفت..ماما عايزه تاكل...
اتفضلوا معايا..بقالى يومين بدلع وباكل فراخ (مسلوقه..بامر الطبيب)..بس حلوه ونعمه والحمد لله على الصحه

وهكذا عدت من الرحله القصيره مع المرض..بس خدت شوية مواعظ
الموت مش بالمرض..الصبر جميل والالتجاء الى الله اجمل واجمل
الصحه نعمه وفرصه من ربنا ..لنتذكره(بالتسبيح والتوحيد والحمد والتكبير)
المرض دا نعمه فى صورة ابتلاء..(وعسى ان تكرهوا شيء وهو خير لكم)
المرض تذكره علشان نقرب لربنا ونناديه ونعترف له بالقدره..فهو القادر على كل شيء..وهو الواحد..الذى لابد ان يكون الواحد فى القلب ..وفى العقل..وفى الروح.(.فليس كمثله شيء)..وهو النافع..ومافيش لى حاجه هتنفعنى عند ربنا غير حبه واقترابى منه ورضاه عنى
لازم افتكر ربنا علطول..مش لازم مع المرض ممكن يكون مع الفرح ..لكن المهم: انى الحق نفسى باستمرار ..غيرى راح ومالحقش يصلح حاله مع ربنا ..ربنا يعافينا جميعا

المهم
اتمنى للجميع الصحه
وتعالو نذكر ربنا شويه(الا بذكر الله تطمئن القلوب)

وعمر الشقى بقى...لسه فى العمر بقيه..مش قلتلكم منحه ربانيه..(واذا مرضت فهو يشفينِِِ)

وكمان خدت فرصه تانيه..يمكن اقدر اعوض اللى ضيعته من حياتىللهم لك الحمد والشكر ..كما ينبغى لجلال وجهك ..وعظيم سلطانك)
وجوزى يستنى شويه عليا...انت مستعجل على ايه.. صحيح وحشتنى ..بس(والباقيات الصالحات خير عند ربك ثوابا..وخير املا))

الحق بقا أقرأ: سورة الكهف..ماحدش ضامن عمره...ههههههههه
وحشتونى واشوفكم على خير

هناك ١٣ تعليقًا:

ELMASRYA - MOSLEMA LELLAH يقول...

يا حبيبتي ربنا ينعم عليكي بالصحة والعافية والستر وراحة البال

انتي كلامك جميل قوي

مافيهوش كلاكيع وتعقيد وبيوصل للقلب بسهولة شديدة

أولا ربنا يرحم شريك حياتك ويجمعك بيه في الجنه وتخلدوا في السعادة أبد الأبد

ثانيا تجربة المرض فعلا على قد ماهي فيها ألم على قد مابتقربنا أكتر واكتر لربنا واسألي مجربة ده انا مريضة قديمة وخبرة ههههه

عجبني تمسكك بذكر الله وحرصك على عمل كل ما أوصى به رسولنا الحبيب لذكر الله والتسبيح له

جعل الله كل أيامك منيرة بنور القرءان ومملوءة بالسكينة والإطمئنان بالله والرضا بكل ما يقدره لنا لأن كل أقدارنا خيرا ودائما قولي في كل موقف يحدث لعله خيراحتى تتغلغل الراحة إلى بالك وحياتك

إيه حكاية سن الخمسين والحاجات دي؟ الشباب شباب القلب والروح يا قمراية

خالص مودتي ودمتي سالمة

شاب كــ طخين ـــــا يقول...

السلام عليكم

ربنايكرمك ويتمم لك الشفاء
وكلامك كلة صح الواحد بينسى كتير اوى نعمة ربنا ومبيعملش حاجة تشفعلة يوم الحساب
ربنا يهدينا كلنا
ربنا ينعم عليكى با الصحة ويتتم لك الشفاء

mohamed ghalia يقول...

ربنا يحفظك دايما ياماما
ويجزيكى كل خير
دمتى بكل الود أمى

thunder يقول...

((وش بيعيط ))
اولا مكسوف لانى متاخر الفترة دى رغم انى بسئل والله لكن برضوا مقصر فى حقك يا امى
الحمد لله ان ربنا من عليكى بشفاء وربنا يديم على الصحة ياااااااااااااارب
ومش لاقى ولا كلمة لان(ELMASRYA - MOSLEMA LELLAH )
قال كل اللى اللسان عجز عن قوله
ومش هقدر اقول بعد كلهم غير ياااااااااااااااااااااااااارب يحفظك يا امى ويديم نعمة الصحة عليكى ياارب
ومع حضريتك فى الكلمة دى (وجوزى يستنى شويه عليا...انت مستعجل على ايه.. صحيح وحشتنى ..بس(والباقيات الصالحات خير عند ربك ثوابا..وخير املا))

ياارب يرحمة ويدخله الجنة برحمة يارب لكن فعلا احنا لسة محتاجين امى بينا
دمتِ بكل ود وخير ياااااااااارب وصحة

غير معرف يقول...

الف الف سلامه

الحمد لله انك بخير دلوقتى
فعلا عندك حق احنا بنفتكر ربنا فى وقت المرض والامتحانات بس
هههههههههه

اللهم اعنا على ذكرك وشكرك وحسن عبادتك

وكل جمعة وحضرتك طيبه

Ophelia - cfd يقول...

ألف سلامه عليكى ..

ربنا يتم شفاكى على خير يارب :)

رحلتنا في الحياة يقول...

على فكرة انا زعلانة من نفسى اوى انى مجتش اقرا البوست من بدرى :(
الف الف الف سلامة على حضرتك ربنا يديم عليكى الصحة دايما يارب بجد البوست فى الاول كان حزنى جدا والحمد لله انك بخير دلوقتى اكيد لازم نفتكر الموت فى كل لحظة بس مش معنى كده الفكرة تسيطر علينا
ربنا يديم عليكى صحته يااااااااارب وعلى فكرة انا لازم اطمن عليكى بجد عايزة اكلمك لو حضرتك معندكيش مانع

فكرة من الزمن ده يقول...

الف سلامة عليكي
كفارة وطهور يارب
ربنا يشفيكي ويشفي كل مريض
وجميل اننا في الشدة كمان نحمد ربنا على كل النعم قبل ما نطلب منه نعمة الشفا
واكيد ر بنا عالم بينا واقرب لينا من ما نتخيل
تحياتي ام المدونين وطمنينا عليكي ارجوكي

الطائر الحزين يقول...

حفظك الله طهور ان شاء الله
أمن يجيب المضطر إذا دعاه

HaMaDa 3aFshA يقول...

السلام عليكم
اول رد ليا بس بجد ربنا يكرمك ويعزك ويزيدك ايمانا وتثبيتا
كنت فاكر نفسى بصبر وواد جامد وبتحمل قوى وبقدر اشيل بس انا كنت بحس انها هموم حضرتك خلتينى احس انهااجمل شعور انا افتقدته فعلا التعامل مع الله سبحانه وتعالى بحب شئ تانى احساس جميل لما تحس ان اى حاجة جتلك جت بحب وان ما فيش حد بيحبك اكتر منه تشكيله وتدعيه لانه برحمته بيك هيرفع عنك وما فيش غيره يقدر يرفع عنك
حمدا لله على سلامتك واطال فى عمرك وحسن فى عملك حتى تلقينه بامر الله وقد زادك فى الاحسان احسانا وغفر لك من الذنب والتقصير ما كان وامر لك بمقعدفى الجنة مع خير الصحب والاحبة ومتعك برؤية وجهه الكريم واظلك فى ظله يوم لاظل الا ظله
قال صلى الله عليه وسلم
عجبا لأمر المؤمن إن أمره كله خير ، وليس ذاك لأحد إلا للمؤمن ؛ إن أصابته سرّاء شكر ؛ فكان خيراً له ، وإن أصابته ضرّاء صبر ؛ فكان خيراً له . رواه مسلم .
قال عليه الصلاة والسلام : من يستعفف يعفه الله ، ومن يستغن يغنه الله ، ومن يتصبر يصبره الله ، وما أعطي أحد عطاء خيراً وأوسع من الصبر . رواه البخاري ومسلم .
وعنوان السعادة في ثلاث :
• مَن إذا أُعطي شكر
• وإذا ابتُلي صبر
• وإذا أذنب استغفر
عذرا على الاطالةوتقبلى فائق تقديرى واحترامى امنا الغالية
احمد عبدالوهاب

موناليزا يقول...

ياحبيبتى الف سلامة عليكِ وطهور ان شاء الله
وفعلا وقت المرض بنكون فى اضعف حالاتنا
ربنا يعافينا جميعا ويعيننا على طاعته فى السراء والضراء

الفراغ يقول...

بسم الله الرحمن الرحيم
ابنائى الغاليين
المصريه المسلمه
امبارح كان عمرى عشرين
محمد غاليه
ثندر
بندقه
زهرة الامل
ايوشه
فكره من الزمن ده
الطائر الحزين(يارب يفرح)
حماده عفشه
مونليزا

دمتم ابنائى واحبابى..سالمين فى اتم صحه واسعد حال
اشكر قلبكم الطيب الفياض بالحنان
والى لقاء قريب

الفراغ يقول...
أزال المؤلف هذا التعليق.