الثلاثاء، ٣١ مارس ٢٠٠٩

واخيرا فهمت يعنى ايه تاج

بسم الله الرحمن الرحيم
جائنا البيان التالى...قصدى جالى التاج التالى من الابنه الغاليه ايوش
اللى بحب اسميها ايوش الجميل
وانا كنت عايزه ارد عليه يوم الجمعه...بس يمكن يوم الجمعه يكون عندى مشوار
فقلت خير البر عاجله..نبدا بسم الله


اسمك؟
خلينى براحتى..ونقول اسمى ام المدونين(كما اطلقتم عليا هنا)



المشهور بيه وسط اصحابك؟
الحجوجه


سنك؟
50 سنه و7 شهور


مجال دراستك؟
خريجة تربية وافخر بذلك


اسم مدونتك؟
هى مدونه واحده اللى كلكم تعرفوها
الفراغ




صورتك الرمزية فى المدونة بتعبر عن ايه؟

بتعبر عن حبى للورود وانه فرحه وجمال مهدى من ربنا الى النفوس المتعبه

هل فكرت فى اغلاق المدونة ؟ والسبب؟
لا مافكرتش ااقفلها
وان كنت افكر احيانا فى اخذ اجازه لانى ببقى تعبانه او مش محدده حاجه مفيده اتكلم فيها


ايه رد فعلك لو حد قل ادبه فى تعليق ؟
اعتقد انى اكبر من اى حد يفكر يقل ادبه عندى
ولو حصل
هلغى كلامه لان تربيتى ماتسمحليش انزل لمستويات زى دى




اسوأ مدونه؟
بتاعة واحد مش عاجبه العيشه ولا اللى عايشينها
ومابيبطلش شتيمه عمال على بطال..ولما الناس نصحته بالايمان والرضا بقضاء الله
للاسف شتمهم

هيحصل ايه للايميل بعد ماتموت؟
بنتى هاتفتحه تقول للناس ان ماما ارتاحت بين ايادى الله (ان شاء الله)
وبس ..هاتتقفل.. ونشوفكم ان شاء الله فى الجنه

اديت الباسوورد لحد قبل كدة؟
بنتى وبس

السفر بالنسبة لك ايه؟
بحبه جدا..وخصوصا فى القطار..لانه بيدينى احساس بالتغيير
وبتفرج على الدنيا اللى مش قادره اشوفهاوانا ماشيه على رجلى
وبكون فى وسط الناس بجد

الموود بتاعك ايه ؟
هاديء..ولكنى سريعة الحزن
وبرضه سريعة الفرح وبنسى الاساءه..بس باخد وقت


بتعمل ايه فى وقت فراغك ؟
4 حاجات
1 اكتب بوست جديد
2اقرأ قرءان
3اتفرج على التلفزيون
4 ارغى مع بنتى..بس لو كانت فاضيه

الأكلة المفضلة ؟
بحب كل حاجة الحمد لله وافضل الملوخيه الخضراء
والبسله بالجزر والباميه الخضراء
والسمك المشوى


الصفات التى اخذتها من والدك؟
الله يرحمه(كنت بحبه قوى)
اخدت منه الطيبه والحنان اللى مالوش حدود



الصفات التى اخذتها من والدتك ؟
الله يرحمها
انا مختلفه تماما عن امى..فيما عدا قوة الشخصية واتعلمت يعنى ايه اقتصاد


اكتر ست حاجات بتكرههم ؟
قسوة القلب(بمعنى عدم الحنان)
الظلم
التكبر
النفاق
الصيف والحر
الصرصور


اكتر ست حاجات بتحبهم ؟
الحنان
القرءان
الحب
الافلام الرومانسيه بتاعة زماااااااااااااااااااان
الحقول الخضراء وهواها النقى
المدونات



شخصيتك نوعها ايه ؟
(بشهادة الاخرين)
طيبه..ملتزمه..احيانا ديكتاتوريه(لانى احب المثاليه)


لماذا دخلت عالم التدوين من الاساس؟
عرفت ان ممكن الاقى ناس تكلمنى وتناقشنى ونختلف مع بعض بس من غير زعل
وخصوصا بعد زواج احدى بناتى ..والاخرى مشغوله بدراستها
ولانى محتاجه احس انى عايشه لسه(لان الشغل لا يعطينى الاحساس بالحياه..على العكس انا بكون فرحانه جدا وانا خارجه من الشغل)



احلى جملة قيلت فى وصف مدونتك؟
مدونه هادئه وبها معلومات دينيه تدخل القلب بدون ازعاج
ولا تعصب


احلى بوست كتبته؟ ضع اللينك ثم اذكر لماذا؟
بحب كل ماكتبته وان كان "منحه ربانيه" اقرب لنفسى
و"قصة حنان" ..اقرب لقلبى




افضل مدونة قرأتها؟
مدونات كتير..المهم تكون صادقه ومن القلب
زى مدونة :موناليزا..فكره من الزمان ده..همس الحب..واخرين بس مش فاكره الاسم دلوقتى




افضل بوست قرأته؟
اى بوست اطلع منه هادئه نفسيا
او ضاحكه من قلبى
وبلاش تحديد اسماء


الشغل بالنسبة لك ايه؟
عذاب..وان كان يقولون لى :انه ارحم من قعدة البيت(بس نفسى اقعد فى بيتى)

الانترنت بالنسبة لك ايه؟
بيربط حياتى باللى بحبهم
يعنى بيخلى لحياتى طعم




تمرر التاج ده لمين ؟

نفسى كل واحد من ابنائى المدونين يجاوب عليه
بس خايفه يكسفونى ..او مايكونوش فاضيين

هناك ١٨ تعليقًا:

Ophelia - cfd يقول...

اول تعليييييييييق

بجد إجابات جميله وصريحه

ربنا يبارك فيكى ودايماً تبقى معانا

وإحنا ولادك :)

الفراغ يقول...

زهرة الامل
بجد انتى جميله قوى
واسعدتينى بردك السريع
ويارب اكون فعلا قد انى اكون زى ماما

رحلتنا في الحياة يقول...

ربنا يكرمك يارب اجاباتك كلها جميلة اوى ومبسوطة جدااااااااااا ان حضرتك حلتى التاج
ومبسوطة اكتر اننا اتعرفنا على حضرتك اكتر واكتر
وكمان حضرتك طلعتى خريجة تربية كارير واحد يعنى :)
ربنا يخليكى لينا ياااااااااارب

الفراغ يقول...

ايوش الجميل
وماتحرمش منك ابدا يا رب

mohamed ghalia يقول...

جميلة إجاباتك ياماما
ربنا يسعدك ويكرمك إنتى وبنتك حضرتك

WhItE HeArT يقول...

ايه الاجابات الجميله دي ياامي

دي الاجابات النموذجيه اللي بتقولي عليها

بس هو لي سؤال بسيط هو الدكتاتورية مرادف للمثاليه مش ممكن تكون المثاليه مفهوم مختلف من شخص لآخر؟

ربنا يكرم حضرتك يارب وبجد الواحد سعيد جدا بالتعرف على حضرتك

تحياتي

thunder يقول...

ممممممممممممممممممممممممممم
تاج جميل لاجمل واحن ام وردود فعلا حلوة جدااااااااا واحساس الصدق فيها ياامى ظاهر ربنا يديم وجودك يارب مابينا وميحرمنى ابدا من حضريتك يارب

همس الاحباب يقول...

ربنا يسعد حضرتك
وده شرف لينا انك تكونى اما لنا جميعا
بارك الله فى حضرتك
واجاباتك اكثر من رائعة
وتنم عن صدق وصراحة ونقاء حضرتك
دمتى بكل ود

فاتيما يقول...

اجابات حضرتك فيها صدق و بساطة كبيرة
ربنا يسعد أيامك كلها و تفرحى دايما ببناتك و الشغل يهديلك فيه الأحوال
خالص حبى ليكى

Beram ElMasry يقول...

الاخت العزيزة . الفراغ
السلام عليكم ورحمة الله وبركاته
(جائنا البيان التالى...قصدى جالى التاج التالى من )
اصدق كلمة البيان التالى
لك تحياتى والسلام عليكم ، ولا سلام مع اليهود

د/على خميس يقول...

السلام عليكم و رحمة الله و بركاته
بارك الله فيك يا أم المدونين
فى أول زبارة لى لمدونتك حبيت أقولك انها عجبتنى أوى ...
دمتى فى سبيل الله
دمتى مع القرآن
دمتى على خطى الحبيب
دمتى للمدونين
تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
اولا حمدالله على سلامتك ويارب تكونى فى اتم صحه وعافيه
ثانيا اجابات حضرتك صادقه قووووى وطالعه كده من القلب الواحد بيحسها على طول مافيهاش تكلف ولا تصنع
ربنا يبارك فيكى ويباركلك فى بناتك ويفرح قلبك بيهم دايما يارب
ودايما كده منورة بلوجر كله

اه على فكرة الملوخيه الخضرا والبسلة والباميه شغالين انما انا مش باكل السمك المشوى علشان بس العزومه الجايه عندكم تبقى عامله حسابك ومع الخضار نمشيها فراخ بدل السمك (اوعى تجيبى بط مابحبهوش خالص )هههههههههههههههههه

تحياتى ودمتى بكل خير وود
والسلام عليكم ورحمة الله وبركاته

thunder يقول...

مممممممممممممممممممممم امى الاختفاء دا يقلق
حضريتك فين يارب تكونى بخير يااااااااارب وربنا مايحرمنا ابدا من حضريتك يااااارب وبعدين يا ماما لو حد من اعليال دول قال لحضريتك حاجة مزعلك قولى للا والله بس
وبعدين يا امى
((خلينى براحتى..ونقول اسمى ام المدونين(كما اطلقتم عليا هنا)))
زعلتنى اوى لانى حاستها من حضريتك انها علشان السن اولا حضريتك مش كبيرة ثانيا والاهم ام المدونيني لحنيتك يا ماما وحب اللى بدون مقابل ولا انتظار الجزاء المهم ياامى علشان خاطرى
طمنينى حتى لو برد على الناس
امى العزيزة دمتى بكل ود وخير يارب وربنا مايحرمنى ابدا منك ياااااااااارب

مهندس / على درويش يقول...

السلام عليكم //

أجابات جميله تدل فعلا على شخصيه جميله طيبه

ربنا يخليكي ويبارك فيكي يا رب



تحياتي وتقديري

فكرة من الزمن ده يقول...

اسفة اوي على تاخيري
وبنشكر التاج اللي عرفنا عليكي اكتر وقربنا منك اكتر
واشكرك جدا يا ام المدونين على وجود اسمي من ضمن اللي بتحبي تقريلهم
ويارب يديم بيننا المحبة في الله ياربوالود
دمتي بكل خير وصحة وسعادة

thunder يقول...

ممممممممممممممممممممممم
طب يا ماما واللى عاوز يقولك امين على الدعاء بقة ولا يضيف من شعوره عليه حضريتك قافلة على التعليق فيه اتمنى ان الحجر يتفك على الكومنت وبعدين يا ماما حضريتك كنتى فين اليومين اللى فاتوا دول
على العموم يا امى دمت بكل ود وخير ياااااااااااااااااااااااااارب

الضاحكون يقول...
أزال المؤلف هذا التعليق.
الضاحكون يقول...

اللهم امين
اللهم تقبل منا ومنكى
بس حضرتك قافلة باب التعليقات ليه
لعل المانع خير

خالد همس الاحباب