الاثنين، 6 أبريل، 2009

القنطره.. القنطره

بسم الله الرحمن الرحيم
اشكرك يا ثندر على سؤالك عليا واسفه انى قافله التعليق..لانى ماكنتش عايزاكوا تتعبوا فى الرد عليه
وجت بنتى قالتلى أكيد حد زمانه رد عليكى فى اللى قبل كدا
والله قلت دا لو حصل ..يبقى اكيد هايكون ابنى ثندر
وفعلا رحت البوست اللى فات لقيتك يا ثندر بتسئل عليا
وبكدا برضه انت اللى خلتنى اكتب دلوقتى
انا بس فى حالة رعب من وقت ماكنت تعبانه
اكيد هاتقولوا من ايه؟
هاحكيلكم..كان عندنا سبوع احدى زميلاتى وطبعا انا ماكنتش ااقدر اروح لانى كنت تعبانه ..المهم وصلتنى برضه هدية السبوع ..التى هى عباره عن كتيب صغير ..يقول :خطط لمستقبلك
بدأت القراءه..وها ..ها...وصلت لمرحلة من الذعر والخوف والرهبه.. ليه كل دا ؟...تعالى نشوف سوى

كلنا عارفين هانموت ..وهاندخل القبر..ودا اول لقاء مع حساب ربنا
واما ان يكون روضه من رياض الجنه او حفره من حفر جهنم ..عفانا الله واياكم
وهكذا الى يوم النفخ فى الصور
ثم البعث..وهو ان تنمو اجسادنا مره اخرى على ما متنا عليه..اللهم احسن خاتمتنا
ثم الحشر ويقول العزيز الحكيم فى هذا اليوم(يايها الناس اتقوا ربكم ان زلزلة الساعة شيء عظيم..يوم ترونها ..تزهل كل مرضعة عما ارضعت..وتضع كل زات حمل حملها..وترى الناس سكارى وماهم بسكارى..ولكن عذاب الله عظيم)

وفى هذا اليوم يكون لكل شانه..فيتخاصم الضعفاء والمتكبرون
وفيه يخطب الشيطان قائلا:اعوز بالله من الشيطان الرجيم.زبسم الله الرحمن الرحيم(وقال الشيطان لما قضى الامر ان الله وعدكم وعد الحق ووعدتكم فاخلفتكم..وما كان لى عليكم من سلطان..الا ان دعوتكم فاستجبنم لى ..فلا تلومونى ولموا انفسكم..ما أنا بمصرخكم وماأنتم بمصرخى انى كفرت بما اشركتمونى من قبل..ان الظالمين لهم عذاب اليم)صدق الله العظيم

وحال الاتقياء فى هذا اليوم انهم امنون لا يفزعون ويمر اليوم عليهم كوقت صلاة الظهر او العصر(اللهم اجعلنا منهم)
وينادوا(الا ان اولياء الله لاخوف عليهم ولا هم يحزنون)صدق الله العظيم

ثم الشفاعه(اللهم شفع فينا محمدا واسقنا من يده شربة هنيئه لا نظمأ بعدها ابدا)
ثم الحساب بعد دخول اهل الجنه الجنة بغير حساب

ثم تتطايرالصحف ..فمن ياخذ كتابه بيمينه..ومن ياخذه بشماله(فاما من اوتى كتابه بيمينه..فسوف يحاسب حسابا يسيرا..وينقلب الى اهله مسرورا..واما من اوتى كتابه بشماله..فسوف يدعوا ثبورا ويصلى سعيرا)

ثم الميزان..ويكون بعد الحساب ..لوزن اعمالنا لتقدير ولو حبة خردل من ايمان
ومايثقل الموازين بمتعب لنا فى دنيانا ولا ثقيل على افئدتنا والستنا
فقال رسول الله صلى الله عليه وسلم:كلمتان خفيفتان على اللسان ..ثقيلتان فى الميزان ..حبيبتان الى الرحمن:سبحان الله وبحمه ..سبحان الله العظيم
وقال :الطهور شطر الايمان..والحمد لله تملا الميزان ..وسبحان الله والحمد لله تملآن مابين السماء والارض
وقال:صلى الله عليه وسلم:ان اثقل شيء يوضع فى ميزان العبد يوم القيامه..خُلُقُ حسن وان الله يبغض الفاحش البذىء

ثم ياتى الحوض فى اخر ايام الحشر ..ثم يساق كل امه مع الههم الذى كانوا يعبدونه من دون الله
ثم يتبع المؤمنون ربهم وينصب لهم الصراط..ويعطوا انوارهم ويسيرون على الصراط ويطفأ الله نور الكافرين

والصراط يمر عليه المؤمنون والمنافقون فقط..بعدما يلقى بالكفار فى النار
وكلنا نعلم حديث الصراط..وانه منا من يمر فوقه كطرف العين..او كالبرق..او كالريح..او كالطير ..او كا أجاويد الخيل فنجد
الناجى..المخدوش . المكدوس فى جهنم

ثم النار ..وكلنا تعرفها ونعرف ابوابها السبعه..ونعلم جيدا حرها وجحيمها

ثم القنطره..وما ادراك ما لقنطره؟؟؟
كنت فاكره انها الجنة او النار..وحتى اللى هايدخلوا النار من المسلمين هايخرج بعد ماياخد جزائه من العذاب
ولكنى وجدت القنطره حاجزا بين النار والجنه
وقال رسول الله صلى الله عليه وسلم يخلص المؤمنون من النار فيحبسون على قنطره بين الجنة والنار..فيقتص لبعضهم من بعض..حتى اللطمه..قلنا يارسول الله كيف وانما نحشر حفاة عراه ..قال:: بالسيئات والحسنات

رحمتك يا رب..يبقى خد جزائه ودخل النار ويخرج علشان يروح الجنه مايقدرش ..علشان عليه حقوق لاحد الناس
طيب هو اصلا ماعندوش حسنات..يقوم غريمه يديله من سيئاته..

الله اكبر على العدل الامتناهى..اتخفف من سيئاتى بان اعطيها لمن ظلمنى مثلا..او هو يأخذ من حسناتى

والله انه فعلا يوم يكرم المرء او يهان

ثم الجنه لمن يستحقها والخلود الابدى فيها

رزقنا الله واياكم الجنة بالقول والفعل والعمل الذى يرضى رب العباد
وجعلنا من الصالحين الغير ظالمين(اللهم امين)


هناك 21 تعليقًا:

همس الاحباب يقول...

بارك الله فى حضرتك
وجزاكى خيرا
وجعلنا واياكى من اهل الجنة
دمتى بكل ود
تحياتى وتقديرى

dr aly khamis يقول...

السلام عليكم و رحمة الله و بركاته
جزاك الله خيرا أم المدونين ..
أسأل الله أن يسترنى و يسترك و يستر كل مسلم و مسلمة فى هذا اليوم..
و أن يزدنا يقينا و إيمانا..
و أن يدخلنا الجنة بلا حساب و لا عذاب..فلن نحتمل غمسة واحدة فى النار ... رحماك يا رب يا كريم

ايوشة يقول...

رزقنا الله واياكم الجنة بالقول والفعل والعمل الذى يرضى رب العباد
وجعلنا من الصالحين الغير ظالمين
امين يارب العالمين
بارك الله فى حضرتك يارب

WhItE HeArT يقول...

ربنا يكرمك يارب
بوست بجد هايل

وجزاك الله كل خير

mohamed ghalia يقول...

ربنا يجعلك يا أمى من أهل الفردوس الأعلى

thunder يقول...

ربنا يرحمنا جميعا ويحشرنا مع الانبياء والصالحين اللهم امين فعلا يا امى لما بفكر فى الموقف دا والله بخاف جداااا ربنا يرحمنا جميعا ويحسن خاتمنتنا اللهم اجمعين يارب
يمكن ايوش لخصت اللى على لسانا بطريقة احسن منى ربنا يتقبل منها يااارب
امى العزية جداااااااااااااااااا دمتِ يارب بكل ما تحبى وفى طاعة وحفظ الله
وربنا يديم عليكى يارب نعمة الصحة وتمام العافية ياااااارب
لكن لى ملحظة بعد ازنك ي ماما مش معنى المرض او مرحلة عديت عليها انى ارهب نفسى بى الخوف من الاخرة ايوا المفروض كل يوم بنعمل مراجعة لانفسنا احنا اكتسابنا اية وخسرنا قد اية لكن مش معنها انى افرض على نفسى طوق بدل ما يساعدنا يسحبنى لفوق لا يكتفنى فى نفس الديرة وفعلا والله بوست جميل جدااا ربنا يديم علينا ياارب اراء حضريتك وميحرمنا ابدا منك اللهم امين

الفراغ يقول...

همس الاحباب

دكتور..على خميس

ايوش الجميل


القلب الابيض


محمد غاليه


اشكركم وجزاكم الله كل خير وجمعنا واياكم فى جنة الخلد بلا سابقة عذاب..
اللهم اميــــــــــــــــن


ابنى الغالى ثندر
انا بعتز جدا بخوفك عليا وعلى سعادتى
وبعترف بان تعليقك دايما حافز ودافع ليا لان استيقظ دائما من الصمت والسكون الى الحياة وزخمها
وعلى فكره بقا انا كنت هاهديك التاج لانى نفسى اتعرف عليك اكتر
بس انتظرت لما اعرف ردك..بعد اذنك..ممكن اهديهولك؟؟؟

فكرة من الزمن ده يقول...

مافيش كلمة توصف احساسي بعد ما قريت البوست ده
بقالي فترة متنحة
مش اول مرة اقرا الكلام ده
لكن حقيقي اثر فيا اوي
ربنا انفعنا بما علمتنا وعلمنا ما ينفعنا
شكرااااااا شكرااا تحياتي
وتمنياتي لحضرتك بدوام الصحة والسعادة

Beram ElMasry يقول...

الاخت العزيزة . الفراغ
السلام عليكم ورحمة الله وبركاته
كرسى وشمسية : تعليقات مرحة وذكية وأمسيات رائعة مع شخصك الكريم بشرط حضور أبنتك العزيزة , وأعرف أن بناتك كثر , أدام الله بينكم المحبة والود
لك تحياتىو السلام ، ولا سلام مع اليهود

thunder يقول...

ياه يا امى حضرتك تشاورى واانا انفذ ..والله رفضة من ايوش وحروف لكن حضريتك ابنك ميقدرش اوعدك ارد عليه ان شاااء الله يااااااااااارب
امى العزيزة ربنا يحافظك ويخاليكى لينا ياااارب وميحرمنا ابدا منك اللهم امين
دمتِ بكل ماتحبى

ELMASRYA - MRS WRITER يقول...

مواضيعك كلها نافعه وربنا يجعلها في ميزان حسناتك بإذن الله

أنا اتأخرت في التعليق على أربع مواضيع فاتوا لكن سامحيني كان عندي ظروف هتعرفيها لو زرتي مدونتي بنات أفكاري وعرفتي اللي حصل وهو مرتبط بموضوعك برضه سبحان الله

لينك المدونة هو :

http://banatafkarie.blogspot.com/

سبحان الله فعلا لأني أعيش حالة الرعب اللي مريتي بيها دي

وفكرت جديا إني أكتب ليكم ملخص كتاب خطط لمستقبلك لأني اطلعت عليه من فترة طويله وأثر فيا بشدة

فكرت أكتب لكني كنت أؤجل هذه الخطوة حتى حدث ما حدث

الظاهر إن الإنسان لازم تجيله من وقت للتاني حاجه تنبهه وتفوقه

موضوعك رائع وربنا يقينا حر نار جهنم ويجعلنا من المتقين الذين يدخلون جنته بعفوه ورحمته ومغفرته اللهم آمين

خالص مودتي وتحياتي

على فكرة أضفتك للإيميلين بتوعي

thunder يقول...

مممممممممممممممممممممممممممم
امى العزيزة كدا بقلق والله وبعدين انا نزلت طيب التاج علشان خاطرى ياامى طمنينى عليكى والبوست الجديد ينزل ان شاء الله قريب مش هقول بكرة ان شاء الله بس ينزل
امى العزيزة جداااااااااا دمتِ بكل ما تحبى ياااااااااااااااااااارب

thunder يقول...

بما انى يا ماما صاحى نوع ما فى مود كويس
ملقتش الا انى العب هنا نيااهاااااااااا وطبعا محدش موجود غيرى دلوقتى او فى التوقيت دا فالعب براحتى على ما حد يكتشف الجريمة
بس انا عرفت ان حضريتك كنتى تعبانة والحمد لله دلوقتى الحمد لله بقيتى بخير وربنا يديم عليكى ياااارب نعمة الصحة ويمن عليكى بالشفااااااااء اللهم امين
دمتِ بكل
ما تحبى ياااااارب وفى رعاية الله وحفظة
....
ابداء اللعب

thunder يقول...

واحد قبل ما يموت جمع ولادة التلاتة وحب يوصيهم

يفضلوا ايد واحدة واعطى لكبيرهم عود خشب كسره بسهولة اعطاه اثنين كسرهم بسهولة اعطاه خمسين عود كسرهم بسهولة قالهم طالما معاكم البغل ده مفيش خوف عليكم
................................
واحد تاكسجى نايم مراتة دخلت علية بالليل

وقفلت الباب بشويش..صحى قال لهاافتحية واقفلية تانى
................................
1-مره ولد سأل ابوه هل الحب اعمى يابابا قاله بص فى وش امك وانت تعرف
................................
بلدياتنا ومعاه واحد لبناني بيدوروا على زوجاتهم فى السوق, فاتفقوا كل واحد يدور على مرات التانى, فاللبنانى بيوصف زوجته وبيقول: شعرها أصفر وعيونها زرق وقوامها سمبتيك,

ها وشو أوصاف زوجتك؟ رد ابلدياتنا وقاله: سيبك من مراتى ويلا بينا ندور على مراتك.

..............................
بلدياتنا بيكتبوا محاضرة مع الدكتور كل ما يمسح السبورة يقطعوا الورقة
.............................
واحد وقع من الدور الثاني لقى مصرعه، وواحد وقع من الدور الرابع لقى حتفه، وواحد وقع من الدور الثامن لقى الاثنين مع بعض
............................
مرة واحد جزار راح يخطب، فأبو العروسة بيقوله المهر خمسين ألف جنيه.. قاله الجزار: ليه هو الكيلو بكام؟
.............................
واحد مسطول راكب طيارة خبط على كتف المضيفة وسألها الحمام فين؟ قالتله الناحية التانية راح عالكتف التاني وسألها الحمام فين؟
.............................
واحد سباك نفسه اتسدت الشقه غرقت
.............................
واحد وقع في حفرة حدفوله حبل طلع مشنوق
.............................
بلدياتنا أشترى تاكسي كل لما حد يقوله تاكسي يقوله أيوه تاكسي
..............................
بلدياتنا نزل في محطة الرمل رجله غرزت
..............................
مسطول ركب العربية بتاعته ملقاش الدركسيون ولا التابلوه ولا الفتيس راح عمل بلاغ في القسم إن العربية اتسرقت بعد شويه اتصل بالقسم قالهم الغوا البلاغ أصل أنا كنت راكب ورا
...............................
بلدياتنا ربح مليون جنيه خافوا يبلغوه يموت مصدوم. قال العمده: أنا أقوله. قال يا محمدين لو كسبت مليون هاتعمل بيهم إيه؟ قال: أديك نصهم. مات العمدة!!
..............................
مسطول قطع رأس أخوه وهو نايم وقعد يضحك ويقول: هيتجنن لما يصحى وميلقهاش !!
..............................
ولد بيسأل أبوه: هي الحمير بتتجوز؟؟ قاله: يا بني مبيتجوزش أصلاً غير الحمير
..............................
مسطول صدم شرطي وموته راح متصل بـ122 وقالهم: أحب أبلغكم إنكم بقيتوا 121
..............................
بلدياتنا نجح في انتخابات مجلس الشعب، ففي أول جلسة قاعد جنب واحد افندى فالأفندى عزم عليه بسيجارة مارلبورو، وبعد شويه بيسالوا إيه رأيك في الديمقراطية ياحاج؟؟.. فرد الحاج : والله أحسن من الكيلوبترا !!
...............................
واحد بلدياتنا دخل السينما فوجد يافطة مكتوب عليها ممنوع الدخول لأقل من 16 رّوح البلد وجاب 15 نفر وجه.

* جماعة بلديتنا حبوا يعملوه مزرعة فراخ مرة زرعوا الفراخ بمنقارها الفراخ ماتت

المرة التانية زرعوها برجليها الفراخ برضه ماتت قاموا بعتوا لقريبهم العالم

فى بلاد برة فقالهم: ابعتولي عينة من التربه أحللها
.............................
كفاية كدا لعب اخرج بقة والف على الناس
امى العزيزة دمتِ بكل خير وود يااااااااااارب

همس الاحباب يقول...

ماما العزيزة
يا رب تكونى بخير
ويصحة وسعادة
انا جيت اطمئن عليكى
لقيت ثندر قالب المدونة مراجيح

وبعدها متقمص دور حماده سلطان
واحد بلدينا
ههههههههه
تحياتى

thunder يقول...

همس الاحباب .......
ما انا اعمل اية ياهمس والله انا عامل كدا من القلق والله على ماما
وبعدين حبيبت لو بتشوف حاجة تضحك ماشى ياست وائل علا ء انا حمادة سلطان هههههههههههههههههه
ما علينا المهم ماما هتاخد حقى انا نوكومنت طبعا فى حضورها
دمت بكل ماتحبى يارب لو ردت عليكى طمنينى بالله عليكى عليها

3abratalsabeel يقول...

السلام عليكم

جزاك الله خيرا عن هذا الموضوع المفيد واعتزر عن عدم تواجدى باستمرار وذلك لظروف خاصة بى
الى جانب اننى لا استطيع متابعة المواضيع الطويلة وان كانت مفيدة

الفراغ يقول...

ابنتى الحبيبه::فكره
اشكرك وتقبل الله دعائك
كلامك زى العسل
كلنا بيجى علينا الفتره..ونرجو الله ان يعنينا على حسن عبادته

الفراغ يقول...

اخى بيرم المصرى
اراك دائما تسكن القمه
واشكر اهتمامك


ثندر..اشكرك
ولقد قرأت اجابة التاج
بس فى حاجات كتير مش قدرت افهمها
لان الكلام مقطع
ان شاء الله هألفلك تاج من عندى هديه


اختى الحبيبه..المصريه
جزاك الله كل خير ونفعنا بما علمنا
اما عن التاخير فى الزياره..ولا يهمك
كلنا بنعذر بعض..المهم تواجدك فى وسطينا دائما

الفراغ يقول...

ابنى الغالى.. همس الاحباب(خالد)
زيارتك واطمئنانك عليا..دول نيشان اعلقه على صدرى..اتباهى به وسط المدونات


ابنى الحبيب.. ثندر
اعتبر المدونه بتاعتك
والعب زى مانت عايز
انا خلاص عملالك توكيل رسمى
بس خد بالك من اخواتك وحبايبك
دول احنا من غيرهم ولا حاجه..وناقصنا مية مليون حاجه
اما عن النكت
والله يا ثندر كونك حماده سلطان او وائل ولا علاء(دول مين يعنى)
انت فى نظرى ابنى وبس ولو حد زعلك قولى
بس انا عارفه كلكم هنا احباب
ربنا يجمعنا كلنا صحبه فى الجنه يا رب

الفراغ يقول...

ابنتى العزيزه.. عابرة السبيل
ربنا مايحرمنيش من مرورك الكريم
واعتذر عن المواضيع الطويله..بس والله حاولت تلخيص الكتاب على قد ماقدرت
دانا كنت عايزه اكتب قد كدا مرتين
وربنا معاك فى ظروفك الخاصه