الاثنين، 20 أبريل، 2009

اول مره اغضب

بسم الله الرحمن الرحيم
اول مره هاكتب وانا غضبانه
انا فعلا غضبانه ومضايقه جدا
ايه اللى بيحصل ده
كتير قوى..ادخل مدونه اقرأ فيها..واجى اعلق على الكلام ..يقولى انتِ مش من الاعضاء المدعوين للتعليق
طيب ايه البواخه دى
طيب رضينا ان مالك المدونه ينزل التعليق بعد مايوافق عليه(ال يعنى يملك الدنيا ومافيها)مع ان كلنا عارفين ان الملك لله وحده
لكن يسبنى اقرأ..واركز معاه ..وبعدين يقولى يلا مع السلامه
مامن الاول يقفلها على اللى بيحبهم ولا اللى يستحقوا احترامه وبس..ومايتعبناش معاه..(سواء طبعا كان ذكرا او انثى)
لا اوجه كلامى لشخص معين
بس اكتر حاجه زعلتنى ..انى اروح عند ناس بحبهم الاقيهم قافلين الباب فى وشى..ومن غير مايقولوا ولا يعتذروا..ولا ينوهوا عن هذا الامر
وبعدين بيعملوا كدا ليه؟ نفسى اعرف؟؟
لو حد مزهقهم يلغوا التعليق بتاعه
لو زعلانين من حد يقولوا واحنا نساعدهم ونجيبلهم حقهم
احنا هنا بحس اننا اسره واحده ..مش كفايه اللى بنشوفه فى شغلنا وفى بيوتنا ومع قرايبنا
كمان هانعمل فى بعض كدا هنا
امال الواحد يروح فين بقا
دانا ماصدقت لقيت حبايب هنا من غير غرض ولا تصنع
وعموما اللى يحبنا هانحبه
واللى يكرهنا هانكرهه
والله بجد
لم يعد فى العمر بقيه
ولا انتوا مش واخدين بالكم ..وعايزين تتعبونا على اخر العمر

اسفه لو كنت زعلانه او متضايقه..بس الموضوع كبر قوى وانا مش حمل دخول على النت والتدوير على دعوه هنا ولا دعوه هناك

وكمان ناس مش عايزه اصلا تعليق
ورغم ذلك حاطين بتاع مش عارفه اسمه ايه.. بيعرفهم مين دخل عندهم ..هما ليهم حق يقفلوا التعليق او مايقفلوهوش
وهما احسن حالا من اللى بيسيبونا نقرا ..وبعدين يقولونا يلا هانرش ميه.. وسعوا من هنا .. مش عايزين دوشه

فى الاخر الله يسامحهم
ولو فضلوا كدا كتير..انا مخصماهم
سلام عليكم



هناك 36 تعليقًا:

موناليزا يقول...

مين بس ممكن يزعلك او حتى يقصد يضايقك!!
ماتزعليش ياحبيبتى محدش عارف ظروفهم ايه ولا ايه اللى خلاهم يعملوا كدة
التمسى ليهم الاعذار
ولو بيعلقوا عندك اسأليهم وشوفى اسبابهم ايه؟
مش يمكن بيجيلهم تعليقات بايخة!
مش يمكن متضايقين ومحتاجين بفضفضوا وخلاص من غير مايسمعوا حد.
مش يمكن مش هيقدروا يردوا على التعليقات وعشان كده قفلوها.
فيه اسباب كتير احنا ممكن مانعرفهاش بس الاكيد انهم بيحبوكى ومايقصدوش كدة ابدا
(روقى بقى:)) بوسة كبيرة وحضن جميل لاحن قلب
عايزة دعوة حلوة منك قبل ماامشى:)
بحبك فى الله

thunder يقول...

انا عارفهم وحقك عليا يا ماما هما اصلا.... اقول اية بس ؟؟؟ مقتنعين انهم بيكتبوا لنفسهم طب لية نتاثر باراء الناس طالما بتكتب اللى بيعبر عنا ومش معقول راى فرد ياثر عليا
امى الحبيبى حقك عليا انا وبالله عليكى متزعلى من حد واكيد حضريتك هتلتمسى ليهم الاعزار
وانا معا موناليزا فى دا
بوسة كبيرة وحضن جميل لاحن قلب
وحقك علينا والله جميعاااااااااااا
امى العزيزة دمتِ بكل ماتحبى وفى رعاية الله وحفظه يااااااارب

الفراغ يقول...

مونليزا حبيبتى
متزعليش منى
انا كدا دايما احب ااقول اللى جوايا
بس والله خايفه انهم يوم يفتحوا التعليق برضه مش هاعرف
لانى خلاص مش رايحه عندهم
وانا بحبك خالص خالص
وربنا يسعدك ويرزقك الرضا والتوفيق
واحلى بوسه وحضن حنون لاحلى بنوته فى الدنيا
واوعى تمشى
خليكى عندنا..كلامك حلو ..وقلبك احلى
بس برضه لسه زعلانه
لما اروق هاقولك

الفراغ يقول...

ثندر ابنى العزيز
علشان خاطرك هافكر اعذرهم
وفعلا كلامك صح..بس طالما هما بيكتبوا لنفسهم
يبقى نسيبهم لنفسهم ..مش هاندور عليهم
وبعدين حقك عليا انا اللى زعلتك
ولما الزعل يروح هاقولك
وعلشان خاطرك ربنا معاهم

HaMaDa 3aFshA يقول...

السلام عليكم
امنا العزيزة لم هذا الغضب كله من اغضبك نغضبه ونقف له بالمرصاد أيجرؤ احدهم ان يغضب امنا الغالية ونحن على قيد الحياة
ولكن أسألك بعاطفة الامومةالرقارقة عندك ان تلتمسى لأبنائك العذر فلطالما ضاقت الصدور ان تتقبل الكلمات او ان تسمع الاذن الاصوات فدعيهم حتى حين وسيعودن آسفين لانهم اغضبوكى ولو لثانية وتركو صوت العقل والعاطفة معا بعيدا عن آذانهم فهم من خسر وليس انتى ايتها الام الحنون
وان كنتى ما زلتى غاضبة فاعطنى اسماء مدوناتهم ونستخدم معهم اساليبا رخيصة فى العقاب هههههههههه بس مش هنهون عليكى
دمتى بكل الخير والحب والود والحنان وأسأل الرحمن ان يجعل ايامك بيننا خير وسعادة وان ينفعك بما تعلمتى وان ينفعنا بما علمتنا وان يرزقك الخير كل الخير من هذه الصحبة آمين آمين يارب العالمين
لاتحرمينى من دعائك
تحياتى

الـمـصـــرية - إمرأة ..وأفتخـر يقول...

حبيبتي أم قلب أبيض الفراغ

أنا بقول قلبك أبيض لأنك كتبتي اللي مزعلك بعفوية وبراءة رهيبة جدا

ولا يهمك يا قمر يمكن الناس دول زهقانين من حد ورافضين يقروا تعليقات تضايقهم منه

يمكن أسباب كتير

ماتفكريش ولا تزعلي نفسك

طيب أقولك على حاجه تفرفشك

العبدة لله عندها 13 مدونة تعالي اكتبي تعليقات فيهم كلهم وهتلاقي الباب مفتوح عالبحري

روق يا قمر الحكاية مش ناقصة وعلى رأيك في البيت والشغل وكل حاجه مش هيبقى هنا كمان

على فكرة أضفتك عندي ومش بشوفك

إيميلي هو eegychamp@hotmail.com

يشرفني التعرف بيكي

أحبك في الله

فكرة من الزمن ده يقول...

امي الحبيبة ام المدونين
استعيذي بالله اكيد في حاجة تانية في العالم التاني كمان مزعلاكي
وعلشان كده الموقف ده زعلك اكنر
فعلا هي حاجة تدايق
لكن المهم انتي اوعي تزعلي نفسك
والله انت حاجة كبيرة عندنا ومهمة جدا
زعلك على عيني ولو اعرف مين اللي عمل كده كنت بعت لهم تندر يروح يخرب لهم اساست المدونة زي ما بهدل لي المدونة
وهما اكيد هايحرموا
اضحك بقى ياجميل وكفاية
كل الناس اللي بيحبوك ومش مستحملين زعلك دول

انا كمان بيدايقني لما اقرا بوست والاقي صاحبه قافل التعليقات
طيب قول قبلها
وكمان اللي بيقفل مدونته خالص بعد ما كانت مفتوحة كمان ممكن يقول لنا قبلها او يكتب اعتذار في الف حل وحل
بس ممكن نعذرهم كمان يمكن كل واحد وليه ظروفه اللي ربنا وحده اعلم بيها
ربنا يفك كرب الجميع
بس اهم حاجة اضحك انت وفرح قلبنا

فكرة من الزمن ده يقول...

بالنسبة للبوست اللي قريتيه عنده ممكن اخسرك
هو فعلا كان مقصود بيه من احب
بس في فترة الخصام الكبير
والحمد لله عدت
لكن انا الان زعلانة برضو ومودي منه مش اوي علشان كده نزلت ممكن اخسرك بس هو عارف كمان انها من فترة طويلة وعارف اني زعلانه
وكمان هو بيحبكم

فكرة من الزمن ده يقول...

انا قلت ادورلك على نكتتين يضحكوكي بس يارب ما يكونوش بايخين
اضحك بقى يا ابو علي ياخفيف الدم
محشش وقفوه الدوريات قالوا له : "ليش ماربطت الحزام"
قال : "أصلآ مش لابس بنطلون ...! "




محشش سألوه وش أصعب شئ: "قال انك تحدد السكسوكة وانت تاكل لبان"


واحد عبيط صاحبته قدمتله هدية ببغاء واتصلت بيه قالت له ايه اخبار الهدية
قال لها عادي طعمه زي الفراخ

تحياتي يا ام المدونين طمنيني ضحكتي ولا قولتي ههاي بايخة

ABO JOSEF يقول...

السلام عليكم ورحمة الله
بصراحة انا مش عارف وصلت هنا إزاي
فأنا من عادتي أدخل من مكان إلي مكان ومن قارة إلي قارة عبر الإنترنت ومن دولة أوروبية الي أخري بالكرفان

ولكن لما وصلت الي مدونة حضرتك إرتاحت عيناي باللون الأخضر الجميل السائد بها وأكتر ما عجبني هو كلام حضرتك وإيمانك بالله عزَ وجلَ وصبرك علي ما إبتلاك به من مرض وتقبللك بالحياة بحلوها ومرها

أختي الفاضلة
هوني عليكي .....فالدنيا مليئة بأمثال من تكلمتي عنهم وهم يحيطون أنفسهم بأسوار وهمية

أختي في الله
أتمني لك الصحة والسعادة وراحة البال
تحياتي وتقديري

المغترب
أبو يوسف

Bondoka يقول...

ياااااااااه حضرتك زعلانه جدا
ولا يهمك تعالى فى مدونتى اكتبى كل التعليقات اللى تعجبك

ده انا اتشرف بكلامك بجد

ولا تزعلى نفسك خالص

يوسفيات..محمد يوسف يقول...

التمس لأخيك سبعين عذرا

ع العموم هما اللي خسرانين

متزعليش نفسك أبدا

ايوشة يقول...

انا اسفة لو كنت انا اللى مقصودة بالكلام ده انا بجد اسفة بس مش عايزة اتعبكم تانى معايا انا حضرتك على عينى وراسى والله العظيم ومقدرش على زعل حضرتك ثانية لكن انا عارفة انى بتخنق كتير وانا مش عايزة اضايق الناس تانى بكلامى الكئيب ويعلقوا وبعدين انا مش بسمع الكلام يبئا اتعبهم ليه ومعلش انا هقفل المدونة اللى فتحتها انا قولت لثندر كده بلاش اتعب الناس معايا بئا انا هعيش اقرف نفسى وبس ومش اسمح لنفسى اضايق الناس العزيزة لقلبى تانى
انا اسفة على الغضب اللى سببته لحضرتك
اتمنى تسمحينى :((

حور الجنة يقول...

لا انا اول مره ازور مدونتك بس سمعت عليها كتييير القكي زعلانه كده
لاااا مينفعش
خلاص معليش اقولك حاجه تعالي مدونتي وهي هاتنور
وبجد زيارتك الجميله فرحتني
وهو حد يطول ان حضرتك تنوريه
ومعليش
التمسي الاعذار
بقلبك الكبيييير الصافي زي اللبن الحليب


وبحبك جدا في الله

ومحبش اشوفك زعلانه ومتزعليش

حور الجنة يقول...

كلمتي لايووش

ياحبيبتي متشليش حاجه لو حدك وزي مانا شايفه لاني تقريبا جديده
ان الحجوجه بتحبك وانتي عمرك ما هاتقرفي حد
لانهم كلهم بيحبوكي
وياسيتي ربنا يفرج همك
عايزه علبى اقولك حاجه جوايا
انا بحبك اوي في الله
يمكن تستغربي لكن معرفش انا حاسه كده اوي
وياجميل افتكري ان ربنا مش بيبتلي عبد الا لو بيحبه
وربنا يرزقك حب الله وكل الناس
ومعليش اني طولت بس لقتني عايزه اكلمك
اختك حور

الفراغ يقول...

ابنى حماده
انت كلامك كله حكمه..وفى نفس الوقت كله حنان
مش قادره قدام كلامك الا ان اهدأ
وفعلا مش هاقدر اتكلم عنهم الا بالخير لان منهم من احبهم واقدرهم جدا..
ربنا معاهم..ويرجعهم بالسلامه واشكرك جدا جدا فاحساسك والله جعل عينى تدمع من الحنان وخصوصا كلمة(أيجرؤ احدهم ان يغضب امنا الغالية ونحن على قيد الحياة)
ربنا يباركلى فيكم ويسعدكم ويهنيكم بالزوجه الصالحه

الفراغ يقول...

اختى الحبيبه ..المصريه وافتخر
انا بفرح قوى بالتواصل معاكم
وعلشان كدا بحبكم وبحس بالعشره معاكم
وانا هاجى يا حبيبتى..وازورك
هو انا ليا كام مصريه افتخر بيها
وانا فرحانه بيكى قوى
وان شاء الله تدوم الزيارات

الفراغ يقول...

حبيبتى ..فكره من الزمن دا
ربنا يخليكى واشكرك على كل الكلام الجميل ده
والله انتو خليتوا الزعل راح بحبكم ليا
وفعلا انا عارفه ثندر هايعمل حاجه من غير مايقولى
وانتى كمان..دا كتير عليا قوى
والله بحبكم
وقلبى بيبكى من احساسكم بيا وزعلكم علشانى
يا خبر..ماكنتش متوقعه كل هذا الحب..والله جميلكم على راسى وحبكم فى قلبى مالوش حدود
وعايزين بقى نسمع اخبار حلوه عن الحبيب المجهول
والله ضحكت من النكت..بس ضحكت اكتر من حبك وحناك الغالى ده
بجد انتى نعمه من ربنا
ربنا يسعدك ومايقفليكيش مدونه فى طريقك ابداهههههههههههههه

الفراغ يقول...

عزيزى ..ابويوسف
اشكر الظروف اللى عرفتك مدونتى
واشكر كلامك الهاديء الرزين
وفعلا كما قلت (يحيطون انفسهم باسوار وهميه)
شكرا على الزياره وياريت تتكرر
واشكرك على اعجابك بالالوان..اما الايمان والصبر فارجوا الله ان يتقبل منافهذا من فضل ربى(ليبلونى أأشكر ام اكفر)الحمد لله على كل شيء
والسفر فيه الف فايده وفايده
يارب تنفعنا بعلمك وخبرتك
واسمحلى ان شاء الله بالزياره
وربنا يسعدك فى الغربه

الفراغ يقول...

دكتوره بندقه
ياهلا يا هلا
بجد وحشتينى ..انتى جايه فى الوقت المناسب
انتى كدا عرفتى الدواء المناسب
وهو انى اروح اعلق باستمرار فى مدونتك الذيذه
اشكرك بجد
وانتى تشرفى اى مدون يا دكتوره
ربنا يسعدك

الفراغ يقول...

يوسفيات
اشكرك على الزياره والمجامله الحلوه
وان شاء الله ارد الزياره

الفراغ يقول...

ايوش الجميل حبيبى
انا قلتلك قبل كدا..اوعى تقفلى المدونه
اصل ازعل جدا جدا وهانسحب من التدوين
لاننا بكدا نبقى مش نافعين لبعض
احنا مش زهقانين منك ولا متضايقيين
احنا بنحبك بالاكتئاب من غير اكتئاب عاوزينك
واحنا مش بنقولك غير( استغفرى ربنا) كتير..وفى كل حركه وسكون وفى نومك وفى يقظتك(وبس)

انا كنت زعلانه..بس الزعل راح خلاص..بس اوعى تزعلينى اكتر بقفلك المدونه..صدقينى هانوحشك
عارفه كل يوم افتحى المدونه واكتبى استغفر الله العظيم ..وبس
يعنى هاتاخدى ثواب من قالها
يبقى تضيعى ثوابك ليه
يلا روحى افتحى التعليق
بلاش دلع بنات
ربنا يهون عليكى الزهق ويملأ قلبك راحه وسعاده ويرزقك بمن يصحيكِ بالليل ويخليكِ تعدى النجوم بالليل برضه ههههههههههه

الفراغ يقول...

بنتى ..حور الجنه
الله يبارك فيكى ويسعدك
كلامك لايوش نابع من قلب صافى وربنا يزود فى محبيها
هى فعلا بنت ممتازه وجدعه وزى السكر
وتقريبا كدا محسوده علطول
احنا لازم نعملها زار..هههههههههههههههه
وهو انا ااقدر ازعل وانا عندى ناس تعرفنى وبترد عليا حلوين زيكم
ربنا يخليكم ليا ونتجمع فى الفرح علطول
وربنا يخليكوا لبعض انتى وايوش وتكون معرفة خير ان شاء الله
وفعلا ..ربنا بيبتلى من يحبه
جزاكى الله كل خير
هاشوفك فى المدونه علطول ان شاء الله
وانتى اوعى تقطعى زيارتك

نعكشة يقول...

بما إني مستفزة

فحلوة الطريقة دية

ان الواحد يخلي ناس معينة بس تعلق
ازاي بنعملها بقة ؟؟؟
..............


سيبك من الكلام اللي فوق دة

معلش لحظة
انا بس عندي سؤال
زي ما حضرتك قلتي
حرية صاحب المدونة إنه يفتح التعليقات أو لأ
حضرتك تقري و تركزي أو لأ دية حرية حضرتك

ومادام هوه متخطاش حدود حرية حضرتك
فين المشكلة بقة؟؟؟؟؟؟

ولا تفرقة عنصرية ولا بطيخ
يمكن اتعرض إنه مثلا ان الناس اللي كانت بتعلق عندة كانت بتقول كلام مبيعجبوش
فبالتالي منع الناس كلها انها تعلق عنده ما عدا بعض الاصدقاء اللي هوه واثق فيهم

اتخذ لأخيك سبعين عذراً

و بعدين اللي قافل التعليقات و بيشوف مين اللي جاله
فين اللي بيضايق في الموضوع؟؟؟

هل هو طلب من أي حد إنه يروحله عشان يروح عنده
لأ

اللي عايز يجي يجي
و اللي عايز ميجيش ميجيش

و هوه هيقرا و يعلق براحته

.......

اعملي ريلاكسيشن كدة
و روقي الامور
وهتلاقي الموضوع مش مستاهل غضب ولا أي حاجة

.........

سلام عليكِ

نعكشة يقول...

وعلى رأي يوسوفيات

هما الخسرانين :)

حور الجنة يقول...

السلام عليكم
انا فرحانه ان حضرتك خلاص مش زعلانه
وربنا يديم المعروف بنا
وان شاء الله مفيش زعل تاني
وبعدين انتي بتوصيني اني مقطعش الزياره
فيه حد يعرف حضرتك ويقطع الزياره برضه
يبقى غلطان
ربنا يزود محبيينك ياغاليه
ربنا يبارك في صحتك

بستان الحب يقول...

أختى وحبيبتى التى رأيتها بقلبى :والله العظيم خفيفة الظل حتى وحضرتك زعلانه ،ادخلتى على قلبى السرور ،على كل حال ربنا وحده يعلم بظروف الناس دى ؟؟ده أعرف بعض المدونات لا تسمح لاحد ان يقرأموضوعاتها والله شىء مضحك ؛المهم اوعى تزعلى ويكفيكى أبناءك وأحبابك فهم ليسوا بقليل دمتى حبيبتى فى سعاده وراحة بال

فكرة من الزمن ده يقول...

ياخبر ابيض كل الكلام الحلو ده ليا انا ربنا يخليكي يارب ويبارك لنا في صحتك وتمتعينا وتنصحينا دايما بكلامك اللي ما نقدرش نستغنى عنه
والله اهم حاجة اننا قدرنا نحسسك بالحب ده ونضيع زعلك ويارب ما يرجعش تاني
ودعواتك لينا يارب
حلوة الحبيب المجهول دي عجبتني حاقول له على اللقب الجديد
هههههههه
تحياتي

فكرة من الزمن ده يقول...

ياخبر ابيض كل الكلام الحلو ده ليا انا ربنا يخليكي يارب ويبارك لنا في صحتك وتمتعينا وتنصحينا دايما بكلامك اللي ما نقدرش نستغنى عنه
والله اهم حاجة اننا قدرنا نحسسك بالحب ده ونضيع زعلك ويارب ما يرجعش تاني
ودعواتك لينا يارب
حلوة الحبيب المجهول دي عجبتني حاقول له على اللقب الجديد
هههههههه
تحياتي

الفراغ يقول...

ابنتى العزيزه نعكشه
اولا مش اى حد بيهمنى انى اعلق عنده

ثانيا فعلا كل واحد حر انه يفتح التعليقات اولأ..بس انا بكلم ناس كنت بعلق عندهم..وليهم اعزاز خاص فى قلبى ويعز عليا انهم يقفلوا التعليقات ومعرفش اكلمهم واعرف ايه اللى مزعلهم(لانهم اصلا بيهمونى وبهمهم)

ثالثا..اللى قافل التعليق..وبيشوف مين بيروحله ويعلق بمزاجه دا اصلا مش مهم يعلق عندى هو كمان لان عمر ماهيكون بينا تواصل ومش بيهمنى اصلا..دا كان كلام من ضمن التصنيفات اللى كنت بكتبها فى البوست

اما يا فندم حرية الانسان انه يسيبنا نقرا ثم مانعلقش عنده لانه مانع التعليق ..دى انا وضحت موقفى منها..لانه طالما مش عايزنا نعلق كان قال من الاول..لاننا بنحترم اللى يحترم فكرنا وارادتنا..وطالما هو مستغنى عن راينا ..طيب مايستغنى عن قرايتنا لمواضيعه كمان..
وعموما انتى اثريتى البوست برايك واشكرك
رغم انى ماكنتش فاكره ان الموضوع هاياخد كل الاهميه دى
والحمد لله انك جيتى بعد مازعلى راح وحبايبى رجعولنا
ومن ناحية هما اللى خسرانين..ابدا دانا اللى كنت هاخسر ناس محترمه وعزيزه عليا وكان لازم ابذل جهد علشان يفضلوا معانا وحوالينا..ويعرفوا انهم غاليين علينا..
والا مكناش زعلنا منهم ولا عليهم

دمتى بكل ود

الفراغ يقول...

يا خبر يا حور الجنه
دانت تشرفينى وتنورينى وتسعدينى بوجودك
وربنا يديم المحبه يا رب

الفراغ يقول...

حبيبتى ..بستان الحب
التعليق بينور بنور حبك
وفعلا انا بكتفى بمن يملكون فى قلوبهم الحب والحنان
وهما دول برضه اللى كنت زعلانه منهم
بس هما غاليين عليا قوى قوى وربنا مايحرمناش منهم ابدا
اختى الغاليه دمتى فى حفظ الله

koketa يقول...

السلام عليكم
ازى حضرتك
ليه حضرتك زعلانة كدا
لالالا شئ يستحق
انا فعلا حصل معاية مع ناس كنت بتابعهم
واضح انها بقت موضة
على فكرة انا ضفت حضرتك عندى
على الميل وحضرتك مقبلتيش الاضافة
عايزة اتعرف على حضرتك

الفراغ يقول...

ابنتى كوكيتا
اهلا بيكى..
فتحت الاميل ولم اجد اضافه من احد
وانا تحت امرك وتشرفينى بمعرفتك
بس انتى فين
منتظراكِ على الاميل

ABO JOSEF يقول...

بسم الله الرحمان الرحيم
عزيزتي (الفراغ )
شكراً لردك وكلماتك الرقيقة وأنا لا أبالغ ان قلت إني أري فيك إنسانة صدوقة مع نفسها وتحاول أن تتغلب علي ما فشل فيه الكثيرات ألا وهو مقاومة الفراغ والتغلب عليه
أولاً إسمحيلي أن أدعوكي بالسيدة (الأم الديناميكية)
ثانياً أعتذرلأن لغتي العربية ليست سليمة مئة في المئة فأنا من السهل علي أن أكتب بالألمانية أو الإيطالية وهذا لبعدي فترة طويلة عن اللغة العربية

بالمناسبة مدونتي ( وأقولها بكل صراحة ) قد لا تروق لك ولمعظم الناس لأنها تعبر عن إحساس إنسان يهوي السياحة والعيش بطريقة مختلفة بعض الشئ عما هو معروف لدي العرب والمصريين ....لذا أرجو المعذرة
إذن سيدتي الأم الديناميكية ...حضرتك مدعوة لزيارة مدونتي المتواضعة وإختيار المنطقة التي تريدين قضاء إجازتك فيها وإختيار الكرفان المناسب ولكي أن تسطحبي معكي من تشائين
فأهلاً ومرحباً بكم جميعاً ..ليس في ألمانيا أو إيطاليا فقط ...أو في أوروبا كلها
بل وفي عيوننا مقامكم
تحياتي وتقديري
وسلامي لمصر وكل المصريين

dr aly khamis يقول...

السلام عليكم و رحمة الله و بركاته
الأم الكريمة ..
أعتقد أننى جئت متأخرا ..
فالحمد لله أرى أن الغضب راح خلاص و إن شاء يكون ذهابة بلا عودة ..وان واى
أذكرك بقول حبيبك صلى الله عليه و سلم ( لا تغضب )
و قول الصالحين من بعده ( إن لم تجد لأخيك عذر فقل لعله له عذر لا أعرفه )
و على العموم اللى مش عايز تعليقات جميلة زى بتعة حضرتك هو اللى خسران ..
أنا طبعا مستنى تهرينى تعليقات علشان أنا مبحبش أكون خسران
تحياتى الشديدة لحضرتك
بارك الله فيك