السبت، ٢ مايو ٢٠٠٩

بشوات زمان... رجعوا يا جدعان

بسم الله الرحمن الرحيم

اعتذر عن التغيب..وربنا يديكم الصحه جميعا
واعتذار رسمى لثندر ابنى الغالى جدا..لانى لم اعطه الفرصه ليسئل عن صحتى
وعاتبنى على غلق التعليقات..وقالى انى عملت زى الناس اللى كنت زعلانه منهم فى البوست اللى فات

بس انا بختلف مع ثندر..ليه
لانى لم اكتب بوست علشان القراءه..انا بس كتبت تنويه عن غيابى..وكمان قدمت اعتذار لقفلى التعليق وهو علشان متعبش حد فى انه يزورنى ويكتب تهنئه..هههههههههههه..قصدى يكتب سلامتك يا ماما..ويعطل نفسه..وخصوصا ان حكاية تعبى دى بقت دمها تقيل وبتتكرر كتير..وبصراحه بحس انى غلسه قوى..وبقول لنفسى هو انتى فاكره نفسك قاعده فى مدونه ولا مستشفى

سيبكم بقى من سيرة المرض و الحاجات البايخه دى.. انا رجعت اهو الحمد لله

بس المشكله بقى انى مافيش فى دماغى حاجه للكتابه

لا فى كتير ..بس مش عايزه اوجع دماغكم
فى انى فكرت ثم فكرت ثم فكرت
ومش عارفه دا تفكير سليم ولا ناتج عن عقل تعبان وضغطه كان 180 على 110وخدوا بالكم..كان كان فعل ماضى

المهم فكرت فى ايه
الحكومه دى عباره عن ايه
رجال اعمال..وهؤلاء رجال الاعمال معاهم ثروات كبيره ..وبيكبروها اكتر واكتر..من بيع مصر واراضيها..والله ومبانيها
بجد بجد تعبانين الوزراء دول

دول قينلهم فى الوزاره لو عرفت تاخد قرش من جيب الشعب هانديك اتنين ليك..وكل ماتحشر الناس فى المواصلات..ليك عندنا عربيه هديه..ولو عرفت تتطفش الشعب ولا تجيبله مصيبه تاخده ..ليك عندى سفريه ..(هانعملها كأنك رايح تتعالج)..دا لزوم منع الحسد والقر
امال هما ماسكين فيها ليه..دول بتوع المسابقات اللى على كبير قوى..مش تقولى كرمبو

يعنى دول ناس متنقيين على الفرازه ..ولاد بشوات
ودول بقى اللى الثوره خدت املاكهم واممت شركاتهم
ووزوعوا ثروتاهم على الشعب..اللى كان غلبان وفقير ..وعملولهم مدارس ومستشفيات وجامعات
وبدا الشعب يقول بلدى وثروتى..علمى ومكانتى..ابحاثى ومصانعى
كانوا عايزين يردوا الجميل لبلدهم واهلهم
لكن ولكن ولكن...........ومليون لكن

لكن بقا دول جاتلهم الفرصه على الطبطاب
عملوا ايه

مدارس اشكال والوان مايقدر عليها الا اللى معاه فلوس.. واللى مامعوهوش يطلع ابنه سمكرى ولا سباك..ليه لان مافيش مدارس مجانى ولان المصانع اتباعت وسرحوا العمال..
يقوموا يروجوا لفكرة الوطن محتاج عمال اكتر منها شهادات جامعيه
ودا طبعا من وجهة نظرى تخلف..بس هما بيضحكوا بيه على عامة الشعب الفقير

كمان عاملين يبنوا عمارات وفيلات وقصور..والله قصور(وهو ياعينى مش قادر يجيب للشعب 6 %علاوه)بجد مسكين هايقطع روحه علشانا

المهم.. لمين هذه الفيلل والقصور..نفسى اعرف ,,للشباب اللى مش لاقى شغل ولا جواز..ولا للحراميه والفنانين..ورجال الاعمال وولادهم ..والوزراء المساكين اللى اتنهبت املاكهم زمان ومازلوا عايشين على احقاد ابائهم اللى حكوهالهم وهما داخلين يناموا

فاكرين من 10 سنين كدا..قالوا العشر الاوائل فى كل كليه هاتعينوا معيدين
ولاد الناس الكادحه اللى نفسها تبان على وش الارض وياخدوا فرصتهم..موتوا نفسهم فى المزاكره وطلعوا اوائل ونافسوا ولاد المدرسين
يادوبك كام سنه يمكن 3 او 4 بكتيره
ولغوا الحكايه دى..ورجع الغلبان اللى مالوش ضهر يحميه يندب حظه ويقول مافيش فايده..دى مش بلدى وراح رمى نفسه فى البحر وهو وحظه ..هو واهله اللى شقيوا عليه لغاية مابقى راجل..
بس بلده مش عايزاه.. لا راجل ولا نص.. يعنى هاتعمل بيه ايه.. ماهو احنا فى سلام وسعاده ..يعنى احنا هانربيك ومش محتاجين تضحيتك لتراب الوطن..لكن هانضحى بيك انت.. بلده رميته للبحر ..بلده بتقوله اشتغل نقاش.. ولا مكوجى.. ولا مندوب مبيعات فى احسن الاحوال
ولما يصرخ ويقول انا خريج جامعه يقولوله ماحدش قالك اتعلم

امال انتو عاملين وزراء على مين وليه
يطلعوا لسانهم لينا
ويردوا يقولوا:امال هاناخد فلوسكم ازاى ..ونشغلكم عندنا عبيد لينا ازاى..ونرجع بوس الايادى ازاى

و انت يا فقير يا عدمان يا صدمان ياللى لا ليك كلمه ولا كيان
عايز توصل تبقى انت الوزير وانا اروح فى خبر كان

احنا رجعنا لزمن ماقبل الثوره يا جدعان
رجعنا لزمن الثروه فى ايد حفنه من الحراميه ...هما يملكوا واحنا نستنى الفتات الواقع من ايديهم تحت ارجلهم
القلب موجوع والفكر مشغول..والعقل رايح جاى
هذا غيض من فيض
لسه كتير موجوعين منه..نقول على الكهربا اللى البشوات الكبار هما وولادهم مابيدفعوش ولا مليم فيها واحنا اللى بنكع فواتير قد كدا
نقول على البنزين اللى يملا عربياتهم هما واهاليهم واهالى اهاليهم بيملوها بفواتير مدفوعه مسبقا
نقول ايه ونعيد ايه..وماخفى كان اعظم..(.ماهم مداستهم على رسنا )دى كانت كلمة عبيد زمان....فاكرينها!!!!!!!!!
معلش وجعت دماغكم..اصل كانت حرارتى عاليه..
زى مصر بالظبط..

سؤال اخير وهامشى علطول..
لما هو مش عارف يدبر شئون بلده..مايسبها للى يقدر
لما احنا كتير وتاعبينه مايروح يرتاح
يظهر حرارتى هاتعلى تانى
ااقولكم سلام عليكم
اسيبكم بعافيه




هناك ٤٨ تعليقًا:

فكرة من الزمن ده يقول...

اول تعليق

فكرة من الزمن ده يقول...

الحمدلله نجحت قبل ما ييجي تندر

فكرة من الزمن ده يقول...

والله العظيم ماكنت عارفة اكتب اسمي من كتر ما انا خايفة لابعدين تندر يسبقني

فكرة من الزمن ده يقول...

انا هاقرا وجاية تاني عندي ليكي حكايات كتيرة

فكرة من الزمن ده يقول...

اولا بعد حجز التعليقات حمد الله على سلامتك والف لا باس عليكي الحمد لله الضغط نزل اكيد اخدتي هزار من بتاع ميمايا العسل




ثانيا البوست بقى في كلام كتير عايزي تقال بس نعمل ايه




الوزرا القدام قادمون طيب مش من حقهم بعد ما الشعب الوحش اخد ثرواتهم ووزعها على نفسه انهم يستردوها تاني؟



دي من عيوب الثورة اللي عالجت من الاصل باخطاء شنيعة وكان نتيجتها كل الخراب اللي احنا فيه



طبعا ده لا يبرر كل الفساد اللي بقى البلد بتسبح فيه لحد الركب نتيجة الحكومة الراسمالية وزواج السلطة والمال بطرق غير شرعية
والخصخصة اللي باعت تراب البلد ببلاش
وشردت ناس واسر ميات الالوف


اما هو ليه مش قادر يجيب علاوة لانه ديمقراطي والمثل بيقول
طاطي راسك طاطي ..طاطي

انت في وطن ديمقراطي


وبعدين يعني هايقطع نفسه ما احنا اللي كتير ومالينا البلد


على راي الزعيم يارب الشعب كله يموت علشان يصحوا مايلاقوش حد يحكموه


وربنا يبطخه ويجرجرنا


ويديله بطيخ من غير بذر علشان الزعيم مايعدشي يتفتف

انا اصلا اشك انه اصبح واعي لما يقول
اقولك على حاجة اقري القصيدة دي والله هاتظبط لك الضغط ولا هزار ميمايا
وقولي يسلمك فومك يا عم فاجومي
بس اوعي تجيبي سيرة فكرة احسن اروح انا اكل عيش وحلاوة
http://lforce.blogspot.com/2009/02/blog-post_9514.html

فكرة من الزمن ده يقول...

ثالثا البوست اللي انا كتبته ده كان بسب غلاوتك انتي وطبعا الناس التانية لكن كان البوست بتاعك هو اللي خلاني احس انه ميثاق وعقد بينا على الحب في الله والتعاون على المعروف تحياتي ودمتي بكل خير وصحة يارب وسلامي لبنتك

همس الاحباب يقول...

الف سلامة على حضرتك
وحمدلله على السلامة
وبعدين هى التعليقات عندك بالحجز ولا ايه
وايه الاستعمار اللى فى التعليقات السابقة
هههههههههه

همس الاحباب يقول...

اما البوست فده عبارة عن جزء من مليون جزء عن اللى بيحصل فى البلد
وفعلا رجعنا لعصر الاقطاع من تانى
ومش بعيد تتحول مصر لمملكة وعذبة كماان لفئة قلبلة والباقى عبيد ليهم
تسلم الايادى يا ماما وربنا يطمنا عليكى

mohamed ghalia يقول...

حمدا لله على سلامتك يا ماما
إن شاء الله اكيد هيجى الوقت وحالنا يتصلح بينا
بس شبابنا يشتغل

الفراغ يقول...

بنتى فكره
اشكرك على الغلاوه اللى ليا عندك
وانك رديتى ببوست مخصوص علشان تفهمينى الموضوع
بس بصراحه انا مافهمتش حاجه
يمكن علشان كنت تعبانه فى الوقت ده
وماكنتش متابعه المدونات
المهم
رحت جرى على مدونتك وقرات البوست من اوله لااخره ولقيت 219 تعليق..
قرات شويه وطبعا ثندر وميمى واحلام واسماء فى وجدانى بصراحه عاملين اللى يقدروا عليه وزياده
ولانى مع ثندر فى ان الموضوع كله مايستاهلش
فانا برضه هاقفل على الموضوع ومش عايزه افهم حاجه ولا عايزه اعرف اسم المدونه اللى شتمتك
خلينا مع بعض حبايب
ولا كانى عرفت حاجه
وعلى فكره يا فكره
انسى الموضوع ده..واشطبيه من زاكرتك
ويلا بقا سمعينا احلى رومانسيه

فكرة من الزمن ده يقول...

اشكرك يا جمل ام للمدونين على الشعور الجميل المتبادل اكيد وهي باختصار واحدة اتهمتني اني سرقت خطيبها وحاجات تانية كمان وانا ربنا يعلم لو فتلة بتاعة حد عندي بتشوكني مابال خطيبها
اما من حيث الرومانسية اتمنى الاحتلال يكون عجبكتحياتي وسعيدة ايضا ان الحوار ده كله حصل وتندر لسة ما عنده خبر
ههههههههه

الفراغ يقول...

همس الاحباب
منور يا احمد
اهو تفريغ شحنة غضب يا احمد
ربنا معاك

الفراغ يقول...

محمد غاليه
اين انت؟...وحشتنى كتير
كنت بفكر فى نظره ..وابحث عن السعاده..وانا ملازمه للفراش
ان شاء الله اروح اقرأ كل ماهو جديد

وشكرا على الزياره الغاليه

همس الاحباب يقول...

ههههههههه
ماما هو مين احمد ده
يلا ما علينا خليها احمد كلها اسماء جميلة
هههههههههه
المهم تكونى بخير وسعادة

الفراغ يقول...
أزال المؤلف هذا التعليق.
الفراغ يقول...

الفراغ يقول...

ابنى خالد
اعزرنى...وما تدقش على الذاكره
وانا سعيده بيك
حتى عتابك جميل..وهو يعنى على رايك احمد وحش
خالد واحمد اخوات
ابقى سلملى على احمد اخوك..هههههههههههههههههه

حور الجنة يقول...

حمدالله على سلامتك ياحاجه
وبجد نورتي والبوست جااااامد
وعلى فكره المفروض اكون انا اول تعليق بس لقيت التعليقات مقفوله
بس معليييييييييش ملحوووووقه

Beram ElMasry يقول...

بارك الله فيك وشكرا لدعاءك وساحاول زيارتكم غير اني الان في ازمة حيث اني لا اري واملي علي ابنتي التعليقات فقط وسازورك عندما تنزاح الغمة وشكرا لدعاؤك لي
ولك تحباتي والسلام ولا سلام مع اليهود

Beram ElMasry يقول...

الاخت العزيزة الغالية ارجو اولا وقبل كل شئ ان تكون كريمتكم بخير ولما تتفسحوا وتكلوا جيلاتي اذكريني بالخيلا وادعي لي وكالعادة جاء تعليقك ذكي وقوي فلا تحرميني النقد والتعليق
ولك تحباتي والسلام ولا سلام مع اليهود

رحلتنا في الحياة يقول...

السلام عليكم اخبار حضرتك ايه يارب تكونى بخير الف سلامة على حضرتك يارب بخير دايما كده يارب المرة اللى فاتت جيت اعلق كانت التعليقات مش بتتحط معرفش العيب كان من المتصفح عندى ولا ايه
المهم انى اطمنت على حضرتك عقبال ما اطمن على ثندر :(

اسماء واحلام فى وجدانى يقول...

فى اول زيارة لى هنا باشكر

ايوشة اوى اوى لانها عرفتنا بشخصية

جميلة جدا

بس اللى واضح ان فكرة واخدة توكيل

التعليقات كله ومنوراه

اتمنا ان تتقبلى زيارتى الاولى

وربنا يرجع لنا ثندر بالسلامة

لانه بجد واحشنى اوى والفراغ اللى

سايبه وحش

احمد

القمر الساهر يقول...

الف سلامة عليكي ربنا يشفيكي وكل مرضى المسلمين

انا دايما بقول الناس الحكام دول الله يكون في عونهم كدا وهما واقفين امام ملك السموات والارض يتحاسبوا على ملايين البشر

مش يستاهلوا الشفقة ؟؟؟

ربنا يرحمنا برحمته

تقبلي مروري الاول في مدونتك الرائعة

اسماء واحلام فى وجدانى يقول...

بكل تاكيد اسعدنى وجودك

وان شاء الله سيتغير هذا الوضع

فان توفانى الله ستبقى هذه الصورة

فى نبض الحياة تشعل القلوب

وسيكون هذا الطفل فى يوما ما رجل

وربما يستطيع ان يفعل ما لم يستطيعه

غيره

اتمنا لك كل التوفيق

HaMaDa 3aFshA يقول...

السلام عليكم
امنا ام المدونين حمدالله على سلامتك وادام الله عليكى نعمة الصحة والعافية وجعل لكى من الاجر ما وعد لصبر المؤمنين وايمان المسلمين
"إن الله لايغير ما بقوم حتى يغيروا ما بأنفسهم"
دا عيبنا امى دايما مستنين حد من برة يجى يغير حالنا كلنا حاسين بالغلاء والشقاء ولكن جميعنا اتحدنا ويوم اتحدنا اتحدنا فى الصمت والخضوع والخنوع ضيعنا حقوق الله بيننا فسلط علينا حكامنا نسيناان اعدل الكلام هى كلمة الحق نسينا ان ما وعد ربنا حقا ووجب علينا العمل والاجتهاد لننال وعد الله ضاعت منا غيرة الاسلام وتهاونا فى كل شئ حتى صرنا اهون الاشياء
ارجو على الله ان يرفع عنا ما نحن فيه وان يرحمنا بفضل العابد الزاهد منا وبفضل الاطفال والشيوخ وان يكفينا ما لانطيق وان يجعل لنا من الخير رفيق انه ولى ذلك والقادر عليه
حمدا لله على سلامتك مرة اخرى ولا تتغيبى ثانية دمتى فى حفظ الله وعنايته
دعواتك تحياتى

thunder يقول...

امى العزيزة جدااااااااااااا
بجد والله وحشتنى اووووووووووووووووى اووووووووووووووووووووووووووووووى
اولا الحمدلله ان حضريتك بخير ويارب تفضلى على طول بخير يارب
ثانيا انا فعلا كنت زعلان واتمنى من حضريتك انك متقفليش التعليقات لاى سبب تانى بعد ازنك لانه من حقنا اننا نطمن على حضريتك
نيجى بقة للبوست
مع حضريتك انه عصر اقطاعى متماثل فى صور من بشوات زمان فعلا كفاية الباشا بتاع الحديد لما حاول يتفقوا على بند فى مجلس الشعب وقف وبص للاعضاء انتم بتعملوا اية كل اللى رافعين ايديهم نزلوها فى ثانية
مش دا دليل على اننا داقين عصافير وحجم عائلى وغيره وغيره وغيره فعلا بقت صور تحرق الدم ونماذج مستفذه لا و كمان فى جملة من الريس وهو بيقول لرجل الاعمال لازم تقوم بدعوة المواطنين البسطاء على افطار فى رمضان ويكون فى شيراتون وهيليتون وموفنبيك وتاكلهم كافيار والله قال كدا مش دا حاجة تخالى الواحد يطق من جنابه ما بدل ما هما يعزمونا وزع بعدل الله انته واحكم بعدل الله
لااله الا الله
امى العزيزة فرحان ان حضريتك فتحتى التعليقات واسف على التاخير وماشى يا فكرة هو حظك بس معلش مرة دى اتاخرت
امى دمت بكل سعادة ورضى وفى حفظ الله ورعايته ياااااااااااااااااااااااارب

الفراغ يقول...

حور الجنه
منوره..وشكرا على سؤالك الدائم



اخى بيرم المصرى
منور بوجودك..بس والله انا عايزه راحتك
ارجوك لاتكلف نفسك عناء الرد
ربنا ينورلك عنيك..كفايه مجهود التفكير فى القصيده..ربنا مايحرمناش من كتباتك الرائعه
دمت سيدى بيرم ومصرى صميم

الفراغ يقول...

ايوش حبيبتى
ولا يهمك تاخير او مش تاخير انتى فى القلب علطول
يدوم التواصل

الفراغ يقول...

اسماء فى وجدانى
طبعا انا كمان بشكر ايوش
ويارب اكون عند حسن ظنكم بى
ولئن ايوش جميله جدا واكثر من رائعه..فاكيد اصدقائها هايكونوا زيها
يارب نتلاقى دائما بكل خير

الفراغ يقول...

القمر الساهر
اولا اسجل اعجابى باسم المدونه
بجد كله رومانسيه
واحيانا يصعب عليه
يارب يكون السهر دائما فى احلى امسيه
وردا على كلامك
هانعمل ايه اذا كانوا نسيوا تقوى الله
وفعلا ربنا يرحمهم ويرحمنا
مش عارفين لو كنا مكانهم كنا هانتصرف ازاى
الحمد لله اننا مش مكانهم دانا بنتين وبحاول اعدل بكل طريقه بينهم ومش عاجب
الله اعلم بنواياهم ..وربنا هو الحكم العدل

اسماء واحلام فى وجدانى يقول...

يكفينى وجودك الطيب بدون كلمات

*****

وللمرة التانية اشكر ايوشة بسبب

بسبب وجودى هنا

وباتمنا انى اكون عندك فى منزلة ابنك

ثندر thunder

الفراغ يقول...

حماده عفشه
كل كلامك صح
ومانملك الا الدعاء بالاطفال الرضع والشيوخ الرتع
جزاك الله كل خير على سؤالك عنى ودعائك لى
بس انت اتاخرت عليا المره دى
ربنا يخليك وتفضل معانا قريب
واشكرك مره اخرى

الفراغ يقول...

أبنى الحبيب الغالى ثندر
وحشتنى جدا جدا جدا
وكنت اشعر بالغربه حتى داخل مدونتى بدون وجودك..لولا ابنائى الاحباء الذين كانو يبحثون عنك معى
ايوش حبيبتى.. واسماءواحلام فى وجدانى..وفكره..
على فكره مهما قلت ورديت عليا
لايشفع لك الغياب بدون عزر
كنت فين؟؟؟؟؟؟؟؟؟؟؟؟؟؟؟؟؟
وليه التاخير دا كله؟؟؟؟؟؟؟؟؟؟؟؟؟؟
حاضر يا ثندر مش هاقفل التعليقات تانى حتى لو حصل ايه.. علشان خاطرك
بالنسبه لكلامك
هاقول اللى هما ولا احنا نملك ارزاق الناس
والرزق بايد ربنا
وكلامه عن الكفيار وفندق هيلتون وماشابه لايهمونا فى شيء
وان دل كلامه على انه لا يعنيه الا الدنيا ونسى حظ الاخره

عموما تمالك اعصابك يا ثندر وربنا يديلك وتعزمنا فى الميرديان (انا قابله عزومتك انت..بس ممكن اجيب بناتى واجوازهم معايا)
ياسلام يا ثندر انا فرحت برجوعك زى عودة علاء الدين من رحلاته..

اما باشا الحديد..فليك رب اسمه الكريم
وهو الحكم العدل

خلى بالك من نفسك يا ثندر
وربنا يمتعك بالصحه
ودايما الاقيك فى اوائل المعلقين
لان بنتى فكره عارفه مكانتك عندى فبتعاكسك وهى اللى صبرتنى على غيابك
وكمان ابنى الغالى اسماء واحلام فى وجدانى عايز يبقاله مكانه زيك عندى
طيب قولى بقا..انا كدا هاتحسد عليك
بجد ربنا مايحرمنيش منكم كلكم

يلا يا ثندر منتظره بوست جديد

وعلى فكره انا التاج اللى فات مش عجبنى قوى لانى مش انا اللى فكرت فيه
لكن اسمحلى افكر كدا فى كام سؤال معتبر يخلينى اتعرف عليك اكتر
سلام والى لقاء

اسماء واحلام فى وجدانى يقول...

وكمان ابنى الغالى اسماء واحلام فى وجدانى عايز يبقاله مكانه زيك عندى

ممكن تعديل بسيط

عايز اشيل كلمة ((عايز ))واخلى مكانها

كلمة (( باتمنا ))

********
وكمان عايز حضرتك تعاقبينى لو جيت فى مرة هنا من غير ما اشكر اختى ايوشة
*********
ولازم نعاقب ثندر عقاب لذيذ على ذوقك
علشان ما يعملش كده تانى لان ربنا وحده اللى اعلم القلق كان عامل ايه فيا

ابنك احمد

القدر و انا يقول...

الفراغ
تقبلى مرورى
بوست اكتر من رائع
روعته فى واقعيته ومصداقيته
الله على اسلوبك فى التعبير (القلب موجوع .. والفكر مشغول والعقل رايح جاى ..هذا غيض من فيض )
الف سلامة عليك من كل شر
شكرا لزيارتك عندى اختى الحبيبة
وربنا يدوم المحبة والمودة بيننا جميعا
ايميلى ndkhalil@yahoo.com
حتى يمكننا التواصل
تحياتى

الفراغ يقول...

ابنى الغالى ..اسماء واحلام فى وجدانى..
انتا خلاص بقيت اخو ثندر واحنا نتشرف بيك طبعا..وكمان اخوك همس الاحباب(خالد)
بجد انا فرحانه بيكم جدا جدا فوق الوصف
ومافيش اجمل من ان يكون عندى 3 اولاد فى اخلاقكم وحنانكم
اما عقاب ثندر..فدا بقا هايكون عقاب لذيذ وعلى مزاجك وهو انه يكتبلنا بوستين ورا بعض
بدون فاصل زمنى.. اكتر من يومين
ايه رايك..تمام كدا العقاب ده

الفراغ يقول...

اختى القدر وانا
زيارتك شرفتنى
وانتى كنتى بتيجى زمان عندى بس نسيتينى شويه
بس انا لا انسى احبابى
ودائما يبقى التواصل..قريبا بازن الله

اسماء واحلام فى وجدانى يقول...

امى الحبيبة

كلامك على عين وراسى وجميل طبعا زيك

حضرتك بس ياريت ثندر ينفذ بسرعة

لان واحشنا اوى

على فكرة هو حضرتك تعرفى ان اسمه زعيم

الاشرار هو طبعا مش كده خالص

بس ضحكته الشريرة هى السبب

فى اطلاق هذا الاسم عليه انا باشكرك

جدا جدا لاحساسك الجميل بينا كلنا

كاولادك ويارب يخليكى لينا كلنا

اللهم امين يارب العالمين

**********
وكالعادة لن انسا صاحبة الفضل

فى هذا الاحساس الجميل الذى امتلكنى

ايوشة ايوشة ايوشة

ابنك احمد

thunder يقول...

اية العقاب دااااااااااا لا يا ماما التفاح والمانجة ارحم
ان شاء الله اوعدك بجد بس استعيد شوية من صحتى وان شاء الله هملئ المدونات كله مش عندى بس وبجد ياامى وحشتنى جدااااا جدااااااااااااااااااا
دمت ِ ليا ام وفى رعاية الله وحفظه دائما يااااااااااااااااااااااااارب

اسماء واحلام فى وجدانى يقول...

امى العزيزة

لقد قمت بنشر موضوع جديد

وقمت بحجز اول تعليق فهو اهداء منى

الى امى العزيزة

فاتمنا ان تتقبلى هذه الهدية المعنوية

المتواضعة جدا جدا جدا



*********

ايوشة

ربنا يكرمك يا رب

mimi يقول...

انا بقي ميمي

مش هشكر أحمد ( أسماء وأحلام في وجداني)علشان هوا اللي قاللي علي المدونة دي

ولا هشكر فكرتي ( فكرة من الزمن ده)

ولا حتي هشكر الرعدالزئبقي ( ثندر)

لأ ....

الشكر ليكي أنتي ...
انتي اللي أحتويتي كل واحد فينا ... أنتي حسستيني أنك صحبتي من زماااااااان
انتي اللي اتكلمتي بصراحة عن حاجات غايبة عن عقولنا كلنا رغم اننا بنقابلها كي يوم

أنتي زي الأم اللي يتجمع ولادها حواليها علشان بس يشمو ريحتها
ويتدفو بديل جلابيتها

انا معرفش ستك كام
وظروفك أيه
بس والله حبيتك في الله

تقبلي مروري لأول مرة

ومش أخر مرة بأذن الله

اسماء واحلام فى وجدانى يقول...

ست الكل

ولادك بيكتروا يوم ورا يوم

ربنا يخليكى لينا يا رب ويكرمك بكل

خير ويقويكى علينا كلنا ومفيش حاجة

تفرقنا ابدا يا رب اجمل كلمة باحسها

يارب يخليكى ليا ولميمى ولثندر ولفكرة

ولخالد ولايوشة وكل اللى ناوى ينضملنا

ابنك احمد

********

ايوشة الجميلة

ابقى خدى ليك دعوتين من فوق

من عند ماما الفراغ وفراغ ازاى وانتى

ملتينى احاسيس جميلة اوى

الحمد لله
الحمد لله

yoyo يقول...

مش عارفة اقول ايه
بصراحة حاسة بحالة حب وود جميلة اوى
دى اولى زيارة ليا لمدونة حضرتك وان شاء الله مش هتكون الاخيرة
بجد حاسة بروح حلوة اوى
حاسة بقلب أم كبيير واخدها ولادها فى حضنها
حنان الدنيا كله ملك ايدها هى وبس
أنا سعيدة جدا بمعرفتى بمدونتك حضرتك
وكمان هاعتبر نفسى لو تسمحى بنتك زى ولادك أحمد و خالد و ثندر ودا طبعا شرف ليا
الف سلامة على حضرتك

تقبلى مرورى و تقديرى
دمت بالف خير وصحة

تحياتى
يويو

thunder يقول...

انا جيتتتتتتتتتتتتتتتتت
فينك بقة يا ماما كل دا طب فى عقوبة اتنفذت اهوة ونزلت بوست
يارب تكونى بخير يارب والبوست الجديد ينزل قريب ان شااء الله
مممممممممممممممم
طب حضريتك مشغولة فى الامتحانات ولا اية
طمنينى بجد والله لانى بقلق بسرعة وبخاف حضريتك تكونى تعبانة

وبعدين قررت ارش المدونه بيرسول علشان العيال دى زى الناموس
امى العزيزة دمت ِ بكل حب وود وفى رعاية الله يااااارب ديماااا وحفظه

HaMaDa 3aFshA يقول...

السلام عليكم
مابال الغياب امنا الغالية ؟
ارجو على الله ان تكونى فى تمام الصحة والعافية وان نسمع منك فى القريب العاجل ما يسرنا عنك ويطمئننا ونرجو على الله ان يعينك على ما انتى فيه وشغلك عنا
دمتى بكل الخير والود وحفظك الله ورعاكى
تحياتى ابنك احمد(حمادة عفشة)

رحلتنا في الحياة يقول...

السلام عليكم ورحمة الله وبركاته
اخبارك حضرتك ايه يارب تكونى بخير وحشتنينا جداااااا وغياب حضرتك طول المرة دى

اسماء واحلام فى وجدانى يقول...

يا ترا القمر غايب ليه

وفين اراضيه

محتاجين حد يوقف ثندر اللى طايح فى كل المدونات بيعوض اللى فاته
واحشنا وجودك اوى
ابنك احمد

Beram ElMasry يقول...

الفراغ
العزيزة الغالية لما يبقي فاضل "زلطة واطلع بره" يبقي مش هلحق اكتب نشيد التحرير ولا حتي تأبين نفسي
وادعو لي بالسلامة كما ادعو لك ولابنتك بالخير كله شكرا علي تعليقاتك الطريفة
ولك تحباتي والسلام ولا سلام مع اليهود

الضاحكون يقول...

اخبارك ايه يا ست الكل
يا رب تكونى بخير
طمنينا على حضرنك
تحياتى
خالد همس الاحباب
( احمد سابقا )