الجمعة، ١٥ مايو ٢٠٠٩

بحبك يارب

بسم الله الرحمن الرحيم
النهارده من اول ماصحيت..حاسه انى عايزه اكلم ربنا..عايزه ااقوله شكرا ..بحبك..وحشتنى قوى يارب
اول ماصحيت..رحت عملتلى مج شاى بلبن ,
وجيت افتح المدونه وارش ميه واروقها والذى منه
لفيت شويه عند حبايبى اللى بحب اقرأعندهم..مش لازم يكونوا بيجوا عندى على فكره يعنى

المهم تعبت..بعد كم التعليقات اللى بكتبها واحاول فيها ماستطعت تلخيص تعليقى على قد ماقدر..قوم اعمل ايه بقا
قلت كفايه كدا يل بت يا حجيجه..وقفلت المدونه وقعدت أقرأسورة الكهف..جميله جدا..وانهارده الحمد لله كان سكرى مظبوط..فعشت معاها بكل عقلى وقلبى...والسوره دى هى اللى عرفتنى ان ربنا هايكون معايا بعد وفاة جوزى الله يرحمه
لما تكلم رب العزة عن اليتيمين فى السوره..وانه (جل وعلا ) شايل كنزهم لما يكبروا ويقدروا يتصرفوا فيه ..ودا لسببين::
الاول.. ان القريه بخيله وظالمه وممكن بسهوله يطمعوا فى مال الايتام
ثانيا.. ان ابوهما كان صالحا.والمال الحلال عمره مايضيع
ثالثا..ان القوه والرعايه والعزه والنصر من الله..مش معنى ان ابويا مات او انهم الاتنين ماتوا ان خلاص مافيش رعايه..لا..ربنا موجود وهو اللى خلقنا وهو اللى بيسبب الاسباب

ودا بيفكرنى ..اول زوجى ما مات .. كان قلبى هايتخلع من بين ضلوعى من شدة الحزن..لانه كان احن عليا من امى وابويا..وفعلا والله بدون مبالغه حسيت باليتم اكتر من بناتى لما مات..لان بناتى كانو صغيرين قوى ومش عارفين حاجه..وكنت انا شخصيه قويه من برج الاسد
لا اقبل بالضعف ..وكنت مشحونه تحدى منه قبل مايموت وكان عمال يقوينى ويدفعنى انى اقابل الحياه بعد منه بقوه

وفعلا كنت اعطى لبناتى الحب من قلبى اللى مليان بحبه... وفى نفس الوقت ادخل حجرتى ابكى لانى مش لاقيه اللى يعوضنى خسارتى الكبيره فى زوجى الغالى
وبمرور الايام..ومع قراءة القرءان..والاستغفار..والدعاء بالصبر..وان ربنا يعوضنى عما ضاع منى خيرا منه..مع انى ماكنتش وقتها فاكره ان فى حاجه احسن من جوزى فى الدنيا دى كلها
عارفين ربنا عوضنى بايه
بانى ختمت القرءان ..ولااول مره فى سنه..........مش معنى ذلك انى ختمته قبل كدا فى وقت اكبر.........لالالالالالا
معنى كلامى انى لاول مره اختمه فى حياتى..30 سنه من عمرى مافيش مره ختمت القرءان فيها

وسورة ياسين ما اجملها وهى تقرا لما نريد..كنت اقراها بنية ان ربنا يرحم زوجى...وكان الله يعطينى نفس الاجر
واية الصبر فى سورة البقره (يايها الذين امنوا استعينوا بالصبر والصلاة ان الله مع الصابرين)
(ولنبلونكم بشىء من الخوف والجوع ونقص من الاموال والانفس والثمرات وبشر الصابرين (155) الذين اذا اصابتهم مصيبة قالوا ان لله وانا اليه راجعون(156)اولئك عليهم صلوات من ربهم ورحمة واولئك هم المهتدون(157) صدق الله العظيم

يمكن انا بحكى الكلام ده..علشان كل مبتلى فى الدنيا يعرف ان الابتلاء رحمه فى حد زاته
ودا ان تعلمته بدرس قاسى من ربنا..بس دلوقتى انا بخاف على كل انسان فى الدنيا..ممن احبهم او حتى لا اعرفهم
ربنا كله رحمه وحنيه ..ربنا كله حنان وعطاء وحب
اتعملت ودا على يد زميل ليا (الله يرحمه الف رحمه والف رحمه على روحه)
ان ربنا هايعوضنى خير لو صبرت..ان ربنا هايدينى ويوسع رزقى ورزق ولادى لو اتقيت الله وصليت بالليل والناس نيام
ان ربنا هايحبنى وهايصلح حال ولادى من غير اى مجهود منى لو استحملت شويه من ايذاء الناس وكلامهم الذى لايرحم سيده ارمله فى عز شبابها زى مايبيقولوا(والله يسامح كل انسان مارحمنيش وانا فى عز ازمتى ومش دريانه بالدنيا حواليا)

ياكل مبتلى..اذكر الله..ياكل مبتلى.. تذكر الله
اللى فقد حبيبه..واللى فقد عمله..واللى اتخلع..واللى اتطلقت..واللى ترملت..واللى مريض..واللى زرعه اتحرق..واللى بيته اتهد..واللى عنده امتحان (اى كان نوعه)
واللى واللى واللى ..وماحدش مرتاح
الدنيا ماهياش رحلة سعاده...بالعكس الدنيا دار امتحان وابتلاء
علشان ربنا يشوف مين اللى بنعبده..ومين اللى بنلجأ اليه

احنا لازم نحطم الصنم اللى فى قلوبنا..لان لا حب الا لله ..لا حب الا فى الله
بنحب ولادنا ونربيهم على طاعة الله ..وان الله ورسوله هو الاول فى قلوبنا
ثم ياتى من ياتى بالدور فى حياتنا
ابائنا
اخواتنا
اصدقائنا
احبابنا
ازواجنا..............كل له دور فى حياتنا..بس الدور ده ..لازم ولابد يكون بيقربنا من الحبيب الاول والاخير.. وهو الله
لازم نعرف ان باب ربنا مفتوح وان ماخذ منك لن يعوضك عنه غير الله...ولن يصبرك عليه غير الله

اتعلم بقا يا انسان...مش لازم تتعب زى ماغيرك تعب على ما عرف
اتعلم من تجربة غيرك
واول مايحصلك مصيبه(ودا مش كلامى دا كلام ربنا)سبحانه وتعالى هو اللى سمى اى ابتلاء للبنى ادم مصيبه...اجرى على ربك...وقول ان لله وانا اليه راجعون
وتذكر اية 155_156_157..من سورة البقرة
انها ايات جامعه ..لم تترك نوع من انواع الابتلاء..وايضا اعطتك العلاج...
فلا تبعد عن ذكر الله وعن الصلاة وقراءة القرءان

اسئلنى انا...وزى مابيقولوا اسئل مجرب ولا تسئل طبيب
بحبكم فى الله
سلام عليكم


هناك ١٩ تعليقًا:

رحلتنا في الحياة يقول...

اللهم ارزقنا حبك وحب من احبك وحب كل اعمل يقربنا لحبك

♥نبع الغرام♥♪≈ يقول...

السلام عليكم ورحمة الله وبركاته
ربنا يبارك فيك ويزيدك يارب
ويجعلها بميزان حسانتك
اللهم أمين يارب العالمين
بحبك يارب ياحنين قووى
تحياتى
أختك إيناس

همس الاحباب يقول...

جزاكى الله خيرا
على تلك النصائح والتذكرة العطرة
اللهم ارزقنا حبك وحب من احبك
وحب كل عمل او فعل يقربنا من حبك وعبادتك
بارك الله فيكى وجزاكى عنا خيرا
تحياتى وتقديرى

HaMaDa 3aFshA يقول...

السلام عليكم
امنا الغالية اخبرتك آنفا انى ما رأيت احدا يتعامل مع الابتلاء بحب مثلما رأيتك تجعلين الابتلاء شئ جميل ذا مذاق شهى وتفقدينه جرعة الألم التى به
ورجوت من الرحمن ان اكون مثلك فى معاملة المحن والمصائب ولكن ذلك فضل الله يؤتيه من يشاء
يقول صلى الله عليه وسلم: (ما أُعْطِي أحد عطاءً خيرًا وأوسع من الصبر)
قال صلى الله عليه وسلم: (من أصيب بمصيبة في ماله أو جسده، وكتمها ولم يشْكُهَا إلى الناس، كان حقًّا على الله أن يغفر له).
[الطبراني].
يقول النبي صلى الله عليه وسلم: (يقول الله تعالى: ما لعبدي المؤمن عندي جزاءٌ إذا قبضتُ صَفِيهُ من أهل الدنيا ثم احتسبه إلا الجنة) [البخاري].
ارجو على الله ان يصدق فيكى قول رسول الله صلى الله عليه وسبم وان يكون جزائك على صبرك الجنة انه ولى ذلك والقادر عليه
والاية دى من الايات اللى بتجعل نفس الواحد تصفو وتهتدى الى ان ما جاءه الخير كل الخير
قال تعالى: {ما أصاب من مصيبة في الأرض ولا في أنفسكم إلا في كتاب من قبل أن نبرأها إن ذلك على الله
يسير . لكيلا تأسوا على ما فاتكم ولا تفرحوا بما آتاكم} [الحديد: 22-23].

دمتى بكل الخير وحفظ الله
لا تحرمينى دعائك
تحياتى

thunder يقول...

ايههههههههههه العيال دى قاعدين على باب المدونه
طب اجحز مكاااااااااااان

thunder يقول...

الإبتلاء سنة الحياة الماضية

"جعل الله تعالى الإبتلاء سنّة الحياة الماضية، فقال سبحانه: {الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلاً وَهُوَ الْعَزِيزُ الْغَفُورُ } سورة الملك-2

وقال سبحانه: {وَلَنَبْلُوَنَّكُمْ حَتَّى نَعْلَمَ الْمُجَاهِدِينَ مِنكُمْ وَالصَّابِرِينَ وَنَبْلُوَ أَخْبَارَكُم} سورة محمد-31

وقال عزّ من قائل: {وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأَنفُسِ وَالثَّمَرَاتِ وَبَشِّرِ الصَّابِرِينَ} سورة البقرة-155

وجعل الصبر زاد العقلاء، وعدّة الدعاة الألبّاء، وشعار الأصفياء، وبه يتفاضل المؤمنون الأتقياء، ويرتقي العابدون الأولياء.

فهل يتصوّر ظهور فضل ذي الفضل، وتميّز معادن بعض الرجال عن بعض إلا بالإبتلاء والصبر ؟

وهل عرف فضل أنبياء الله ورسله، وأوليائه وأهل طاعته، فكانوا موضع التأسي والإقتداء إلا بصبرهم على أذى الخلق، وتحملهم في سبيل الله ما لم يقدر عليه سواهم من الناس ؟ "اهـ.

""وقد أثنى الله على الصابرين، ورفع مقامهم، ووعدهم أعظم المثوبة والجزاء، فقال سبحانه: {... إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ} سورة الزمر-10

ووعد الصابرين المحتسبين: {الَّذِينَ إِذَآ أَصَابَتْهُم مُّصِيبَةٌ قَالُواْ إِنَّا للَّهِ وَإِنَّـآ إِلَيْهِ رَاجِعونَ * أُولَـئِكَ عَلَيْهِمْ صَلوَاتٌ مِّن رَّبِّهِمْ وَرَحْمَةٌ وَأُولَـئِكَ هُمُ الْمُهْتَدُونَ } سورة البقرة: 156- 157

وبيّن لنا في كتابه العزيز، وهدي نبيّه الكريم أن الصبر لا يقدر عليه إلا أولو العزائم من الرجال، فقال سبحانه:

{... وَاصْبِرْ عَلَى مَآ أَصَابَكَ إِنَّ ذَلِكَ مِنْ عَزْمِ الاُْمُورِ } سورة لقمان-17

وقال تعالى: {وَلَمَن صَبَرَ وَغَفَرَ إِنَّ ذَلِكَ لَمِنْ عَزْمِ الأُمُورِ } سورة الشورى-43

وقال سبحانه: {فَاصْبِرْ كَمَا صَبَرَ أُوْلُواْ الْعَزْمِ مِنَ الرُّسُلِ...} سورة الأحقاف-35

كما كشف لنا في كتابه العزيز، وسنّة نبيّه المصطفى وهديه ، عن حكم جليلة، وآثار حميدة للإبتلاء والصبر، لو تفكّر بها المؤمن، وعقلها كل من ابتلي بأي نوع من الإبتلاء، لعظم صبره، وقويت عزيمته وتحملّه، بل ولتلذذ بالإبتلاء، كما يتلذذ المتلذذون بلذات الدنيا الفانية، ومتعها المنغصّة، وشهواتها التي لا تنفك عن الآلام والأكدار.

وإن يكن الأصل في المؤمن أن يسأل الله العافية، ويستعيذ به سبحانه من جهد البلاء، كما جاء ذلك في دعاء النبي صلى الله عليه وآله وسلم وهديه في السنّة المطهرّة."اهـ.


أنواع الإبتــــلاءات وأشـــدّها :

"ودا للعلم! أن الإبتلاءات على ثلاثة أنواع:

النوع الأول: الإبتلاء بالتكاليف الإلهية، أمراً ونهياً، وندباً وكراهة وإباحة، ويلحق بهذا النوع، ما يصيب العبد من إبتلاء من الناس وأذى بسبب ذلك، لكراهتهم لتمسكّه بدينه، ودعوته إلى سبيل ربّه.
ومن حكمة السلف في ذلك، قولهم: "قضى الله في هذه الديار أن يبتلى الأخيار بالأشرار".

النوع الثاني: الإبتلاء بالمصائب والنوازل، التي لا يمكن أن تنفك عنها أحوال العبد في هذه الحياة، كالفقر والمرض، وفقد الولد والوالد، ونقص الأموال، وتبدّل الأحوال،

قال الله تعالى: {ما أصاب من مصيبة في الأرض ولا في أنفسكم إلا في كتاب من قبل أن نبرأها إن ذلك على الله يسير لكيلا تأسوا على ما فاتكم ولا تفرحوا بما آتاكم والله لا يحب كل مختال فخور} سورة الحديد: 22-23

النوع الثالث: الإبتلاء بأذى الخلق وظلمهم، وعداوتهم وكيدهم، وتسلّط الفجار والأشرار، أو كل ذي قوّة جبار، وأكثر ما يكون هذا النوع، على سبب من أسباب الدنيا، تنافساً فيها، وتحاسداً عليها، وتكاثراً في جمع زينتها وحطامها، وفي ذلك يقول الحق سبحانه:

{ وجَعلنا بعضَكم لبعض فتنة أتصبرون وكان ربّك بصيراً} سورة الفرقان-20. " اهـ.

طبعا دا يا امى مقال كنت قرائتها وحضريتك كملتى عليه بمقالك يارب ينفعنا كلنا بيه ويجمعنا اجمعين على حوض خير خلق الله اجمعين يااارب وفعلا يا امى لو لا حضريتك وصبرك دا والله يمكن على الاقل انا كنت ياست انما انا بستمد قوتى من حضريتك وثقتك فى الله
ربنا يحفظك لينا يااااااااااااااارب
ويديم عليكى الصحة والعافية ويرعاكى برحمته
دمتِ بكل حب وود يارب

الفراغ يقول...

ايوش الجميل
انتى فين يا قمر
ربنا يتقبل منك

الفراغ يقول...

عاشقة الاحزان
اختى ايناس
اتمنى زيارتك تتكرر
ويتقبل الله دعائك ويرزقك واينا حبه وحنانه
اللهم امين

الفراغ يقول...

خالد..يا اهلا يا اهلا
ربنا يتقبل دعائك ويرزقنا العمل الصالح
اللهم امين

الفراغ يقول...

اسماء واحلام
شرفت عندنا وحللت اهلا ونزلت سهلا
ربنا معاك وينور طريقك
اللهم امين

ELMASRYA - MRS WRITER يقول...

يا حبيبتي ربنا يزيد إيمانك ويثبتك ويصبر قلبك أكتر وأكتر

ربنا يرحم زوجك ويجعل صبرك على فقده في ميزان حسناتك ويجمعك به في جنة الخلد تسعدوا وتهنئوا فيها

موضوعك ونصايحك غالية ربنا يجعلها في ميزان حسناتك

دمتي سالمة بحفظ الرحمن

الفراغ يقول...

ابنى العزيز ثندر
خلاص انا عرفت اوصلك ازاى
اكتب بوست ..واستناك تيجى تعلق عليه
وماشاء الله ماشاء الله انت كتبت بوست عندى فى التعليقات
ربنا يقويك ودايما تكمل ما ابداه
صحيح ابنى يا ولاد
جزاك الله كل خير عنى وعن القآرئين
وبطل بكش بقى يا ثندر واخرج من الجو اللى انت عايش فيه
تكنش يا واد يا ثندر بتحب؟؟!!!!!!
قولى انا امك
وان اخطبلك ست ستها
دانت تقعد على البساط وتنقى ست البنات
طمنى عليك يا استاذ ثندر اصلى بعد كدا هاخد اول طياره وجرى على المنصوره
وانت حر بقا
انت اللى هاتغرم الغدا والعشا
ويمكن فطار تانى يوم...وماقلقش على المبيت
انا مش ببات فى لوكندات
يعنى غرمان غرمان
ابقى ورينى بقا هاتتصرف ازاى
انت اللى جبته لنفسك

الفراغ يقول...

ابنى حماده
لم اتعامل مع الالم بحب
ولكنى تعاملت معه بصبر على امل ان ارى النور فى نهاية النفق
وقد كان والحمد لله
وربنا يكفيك شر المحن والابتلاء
ويتقبل دعائك واكون فعلا اهلا لرضا الله واستحق جائزة الرحمن
اللهم امين

رحلتنا في الحياة يقول...

مكنش ظاهر الصبح غير العنوان بس لما جيت اقرا
ماشاء الله على حضرتك ربنا يكرمك دايما ويجعل ايامك كلها سعادة وسرور كده دايما
ربنا رحيم جدا بعباده لما بينزل الابتلاء بينزل جنب منه الرحمة والصبر والسكينة

فكرة من الزمن ده يقول...

اجمل ام
قبل مااكتب اي كلمة عندي جيت اقولك ازيك وحشتيني واطمنك انا بخيرب الحمدلله
وسلامتك الف سلامة من البكا يارب
وانا كنت تعبانة عضويا ده سبب تاخيري مش حاجة نفسية
الحمدلله ربنا لطيف بينا وبيصبرنا بحاجات تانية

yoyo يقول...

صباحك سكر
يا احن واطيب قلب يا حتة السكر
والله يا ماما انا فرحانة اوى بوجودى هنا
يارب دايما يبعد عنك الالم والاحزان يا امى
الحمد لله على كل حال فدائما المؤمن مصاب وتلك اختبار من الله سبحانه وتعالى
اللهم ارزقنا حبك وحب من احبك
اللهم آآمين يارب العالمين

مشاء الله يا امى ربنا يثبت و يقوى ايمانك وينزل فى قلبك الطاهر السكينة والامان

دمتى بالف خير وصحة
تحياتى
بنتك
يويو

اسماء واحلام فى وجدانى يقول...

الصمت لا يمنع الاحساس من الوصول الى

القلب والقلب سينبض دائما بحب من احب

مادام فيه رمق،اخرج من صمتى لامى ولكل

من يحتاج حديثى فانا الاحساس الذى

يحيا بحبكم وانا القلب الذى ينبض

بحبكم وانا العقل الذى لايفكر الا

فى كيفية اسعادكم

امى الحبيبة اعتذر عن هذا الصمت

Unknown يقول...

السلام عليكم ورحمة الله وبركاته هذه اول زيارة لمدونتك ولن تكون الاخيرة انشاء الله بل اطمع فى ان نتواصل بالزيارات ادام الله عليك نعمة الصبر والهمك الصواب ..
فانا اهوى كتابة الزجل ولى مدونة اسمها
(واحة الزجل)وقد كتبت ارثى امى وهذا مقطع منها:
لو حتى كبر سنى
لو الشعر شاب منى
لو دابت سنان فمى
محتاج حضنك يا امى
والى اللقاء مع خالص تحياتى..

thunder يقول...

ههههههههههههههههه
حضريتك تشرفى بس ياامى
دا هتبقة احلى واحسن غرامه فى الكون
وياريت اجيب لنفسى كدا على طول بس حضريتك تشاورى بس