الأربعاء، ١٠ يونيو ٢٠٠٩

موضوع قابل للرفض او القبول

بسم الله الرحمن الرحيم

بقالى فتره منش عارفه اتكلم فى ايه
والفتره دى مش عدت كدا..لا..كل يوم الاقى اى حد من ولادى هنا بيسئلوا عليا
انتِ فين يا امى؟.....طمنينا عليكِ... فين الجديد يا ماما؟ليه مش بتفتحى الاميل؟

الحكايه دى اوحتلى بموضوع هاتكلم فيه النهارده...........واتمنى اسمع رايكم فيه....لانى حاسه انه يهمنا كلنا......او ليه تاثير كبير فى علاقتنا باصحابنا واصدقائنا واخواتنا هنا

الموضوع ببساطه..............

انى لاحظت اننا كلنا بنتعرض لبعض الضغوط العصبيه او النفسيه
او ممكن ضغوط عمل ..او حتى انشغال عائلى او اجتماعى
وممكن نتعرض لا قدر الله لتعب او مرض...ومش بنرضى نقول..يمكن خوفا على مشاعر واحاسيس الغير
يمكن كمان نتعرض لكسل..او زهق...او زعل.....او ملل...او اكتئاب ممكن يطول او يذهب سريعا
يعنى انا هنا حاولت اجيب كل المبررات اللى قدرت افكر فيها........ويمكن يكون فى غيرها كتير
المهم ان الحياه لاتخلو عادة من المنغصات

ايه سبب كلامى ده؟؟؟؟؟؟؟؟؟
ان احنا هنا بقينا تقريبا بنعرف بعض وبقى لينا حقوق مكتسبه عند بعضنا
واحيانا كثيره ممكن يحصل زعل بعض الناس من بعضهم.........وطبعا دا ناتج من العلاقات القويه والاخويه والمشاعر الصادقه بينا وبين بعض

وكمثال على ذلك(وانا هاتكلم عن نفسى علشان ماحرجش حد)
انا اول ماكتب موضوع...بعد كتابتى ليه علطول ببدأ أنتظر ابنائى وتعليقاتهم
وفى ناس بالزات بنتظرهم..وللحق هم كثيرون.....وبزعل احيانا انهم اتاخروا فى التعليق

وفى ناس بفرح بانهم اهتموا وكتبوا تعليق
وفى ناس بزعل قوى لو حتى ماقالوش سلام عليكم

الفكره اللى بحاول اوصلها...ان لو الناس المهمه دى فى حياة كل واحد منا ..قد اصابه مكروه لاى سبب لانعلمه..او خلينا نقول حصله ظروف لا نعلمها

هل ياترى ماندلوش عذره
هل ياترى هانسلم بان من حقه انه يغيب كدا من غير اى اشاره منه
هل ياترى هاتفضل العلاقه بينا وبين هذا الشخص قويه زى ماكانت
هل هانقدر نسامحه
هل هانفضل نحبه
وهل وهل وهل.........طبها كل واحد ممكن يحط الاسئله اللى جواه ويشوف الاجابات عنده شكلها ايه عن نفسه وعن الاخرين


طيب هانعمل ايه فى ذلك الوضع المقلق
هانواجه ازاى الحكايه دى...واحنا اصلا عايشين وبنتنفس فى المدونات من خلال الاخرين
لاننا مش لوحدنا...والا كنا قفلنا مدونتنا وقلنا خلاص خلينا فى حالنا

والله انا فكرت ...ودا تفكير على قدى ...وغير ملزم لاى حد
وزى ماقلت فى البدايه انى منتظره رايكم

ولانى كمان مقدرش استغنى عن حبايبى واخواتى واصدقائى الاعزاء والغاليين عليا جدا
فكرت ان لما نكتب موضوع....اواى حد طبعا ......
مش بالضروره ان يجى كل انسان نعرفه مهما كانت درجة الغلاوه ليه ويعلق عندى...
ودا تخفيف عن الاخرين....واعطائهم حرية التعبير
بس فى نفس الوقت ...مش هانديله حرية الانسحاب او الامتناع التام عن زيارتنا ..وحق التواصل والجيره والمحبه والاخلاص
بمعنى انى كتبت موضوع ومنتظره تعليقك ليا
بس انت تعبان او مش فاضى او حتى الموضوع ماعجبكش
مش مشكله
برضه زرنى وكلمنى كلمتين صغيرين
يعنى بالاصح طمنى عليك
قولى انا معاكى ..انا موجود

ونفس الحكايه مع صاحب الموضوع
لو انه بعد كتابة موضوعه وتعليق الاصدقاء والاخوه عليه
لقى نفسه لاى سبب مش عايز او خلينا نقول مش قادر يرد

ياترى نزعل منه ونقول دا بقى مستغنى ولا مش معبرنا
لا ابدا اكيد عايزين نحس ببعض
ونقدر بعض
بس حتى لو بكلمتين صغيرين
ان شالله حتى كلمة شكرا لكل من علق عندى


واسمحولى اتكلم عن نفسى تانى...
يعنى بجد انا بتعب جدا جدا لما بقعد ارد على كل واحد باسمه
رغم ان كل واحد عندى غالى جدا على قلبى وليه مكانه كبيره قوى
بس بحس بنفاذ الطاقه لدى...ومش بقدر انى اخد وقتى فى التفكير فى الموضوع الجديد اللى ممكن اتكلم فيه بعد كدا

طبعا الكلام ده لا ينطبق على الكل ..لان كل واحد وقدرته وطاقته

بس بالنسبالى ...انا بحب اقرا التعليق واشوف راى الاخرين ايه ...وشكرا جدا ...وليك كل تقديرى وتحياتى
وشايفه انى لما اروح اعلق عنده على موضوع هو كاتبه انى ااقوله شكرا لزيارتك عندى ..ثم اترك له التعليق وبذلك اكون عملت التواصل المطلوب بينا وبين بعض
دا بيدى فرصه اكبر لزيارات متعدده لعدد كبير من المدونين والتعليق عندهم
وبذلك بتذيد المنفعه المعرفيه والاجتماعيه والعلميه

مش عارفه انا وضحت فكرتى ولا لأ
بس مستعده للمناقشه مع اى حد
ودا لان الموضوع معروض للمناقشه...وللرفض او القبول


ملحوظه مهمه جدا
اشكر الابن العزيز والغالى ...احمد(اسماء واحلام فى وجدانى)
لانه انسان مرهف الاحساس..قلبه كبير...
ولانه لما كان زهقان وعنده شويه ملل ...كان بيزورنى ويقول سلام عليكم ...وكمان بيزورنى دايما وينبهنى على ان فى اخوه غائبون ولم يعلقوا بعد...ودا احساس عالى قوى ..وتواصل مش عارفه بجد انى ااقدره ولكن يجب ان اشكره عليه
وكمان لازم اشكره لان تصرفه ده هو اللى اوحالى بهذا البوست اللى كتبته دلوقتى
بعد ماقرات اللى كاتبه عن ابنى ثندر اللى بيعتذر عن غيابه لانشغاله

اشكرك يا احمد
واشكرك يا ثندر وادعوا لك بالتوفيق
واشكر كل اللى بيتعبوا وبيقروا اللى بكتبه
دمتم لى ابناء واخوه واصدقاء
وسلام عليكم


هناك ٢٢ تعليقًا:

اسماء واحلام فى وجدانى يقول...

اول تعليق

اتشرف باهدائه الى كل اخواتى

الموجودين هنا

اسماء واحلام فى وجدانى يقول...

امى الحبيبة
طبعا الموضوع ده صعب جدا اننا نقرر فيه احنا عايزين ايه ولكن الاكيد ان مفيش حد فينا هيقدر يبعد عن التانى مهما كان التمن والكلام ده اللى جوايا بجد ممكن تختلف الدرجة من شخص لاخر لكن النتيجة فى الاخر واحدة هى اننا مش هنقدر نبعد
انا لامة قلت انى هابعد ده كان لاسباب صعبة عليا وكان صعب انى اقولها بس اكيد فى ناس عرفتها والناس دى هما كانوا سبب رجوعى وبعدين انا كان فى نيتى انى اتابع بس لكن مش هاقدر اكتب تانى ،، يمكن البعض كان شايف انى غلطان لكن البعض ده اكيد كان هيعذرنى لو عرف اللى انا فيه
انا مشعارف انا خرجت عن الموضوع ولا لسة فيه
لانى بصراحة فرحان بانى اول تعليق وانا لامة بافرح مش باعرف افكر ولا اتكلم
انا باقول امشى دلوقتى وارجع اكمل بعدين

اسماء واحلام فى وجدانى يقول...

والتعليق ده

مخصوص للناس

المتاخرة

معلشى بقى يا امى بكرة يتعلموا

ويجوا بدرى

اسماء واحلام فى وجدانى يقول...

اما بقى التعليق ده علشان اقولك
ان ميمى كانت تعبانة جدا والحمد لله ربنا تمم شفائها

ويويو كمان كانت تعبانة بس هى لسة مش اوى زى الاول بس الحمد لله انها ابتدت تظهر
وربنا يطمنا على الكل يارب

GiGi world يقول...

ياااااااااااااااااه
بجد التعليقات دي فعلا مهمه انا عارفه
احنا كمدونين رايي ان انا لجانا للعالم ده لاننا عايزين نحس ان فى ناس كتير حوالينا ناس تكلمنا تحس بينا
بجد التعليقات مهمه بتحس باهميتك بتطمن الناس عليك
بتمنى حتى لما حد يختلف معايا يكلمنى برده
لكن مايهملنيش خصوصا بجد ناس معينه
بتعب قوى انهم مابعلقوش
تحياتى ياامى الغاليه الحبيبه الرائعه
تقبلينى بنت محتاجه بجد لام ربنا يخلى ماما لكن ساعات فى حاجات عايزه اكتر من ام وكل قلب حنين والاهم مخلص فى الدنيا دي
ربنا يبارك لحضرتك ويعزك يارب ويبارك فى اولادك يارب

رحلتنا في الحياة يقول...

برضه زرنى وكلمنى كلمتين صغيرين
يعنى بالاصح طمنى عليك
قولى انا معاكى ..انا موجود


ربنا يكرمك يارب ساعات كتير بحس انى محتاجة احس كل يوم انكم جنبى ويمكن انزل اكتر من بوست علشان محتاجة اتكلم معاكم واكيد بزعل لو فترة مرت ولقيت البعض بعد او انشغل بس انا بتلمس العذر ولما يرجع تانى انا بكون مبسوطة
وفى ناس مخصوصة بتسنى كل مرة انها تعلق عندى وحتى بزعل لما يغيبوا عن مدوناتهم ومش يكتبوا فيها لفترة كبيرة
احنا لينا الحق فيهم انهم يطمنونا دايما عليهم
ربنا يخلى حضرتك يارب ومش يحرمنا منك ابدا

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
اولا ادعو الله انك تكونى بخير وفى احسن صحه يارب
ثانيا : حضرتك كتبتى عن موضوع بيتعبنا كلنا وكلنا بنمر بيه
وكلام حضرتك صح مليون فى الميه
ومافيش حاجه اسمها رفض
لا كله قبول يعنى قبول

ممكن نقصر مع بعض وده بيكون نتيجه للظروف
انما مش ممكن ننسى بعض ابدا
ولازم نلتمس العذر لاخواتنا وحبايبنا مهما حسينا انهم بعدوا او انشغلوا عنا
ربنا يبارك فى حضرتك ويديكى الصحه
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

الفراغ يقول...

اسماء واحلام
انا رحتلك مدونتك
تحياتى



جيجى والعالم
نورتى هنا
وانا رحتلك عندك
تحياتى


ايوش العسل
انا معاك علطول يا جميل ودايما ابحث عن الجديد عندك
تحياتى


المعتصم
منور وتعليقى سبقنى عندك
تحياتى

همس الاحباب يقول...

ههههههههه
هههههههه
لا مش مجنون انا
انا عبيط بس
اصلى دلوقتى فهمت حاجة مش كنت واخد بالى منها فى الضاحكون
ربنا ما يحرمناش من حضرتك ولا من سؤالك
علينا ابدا

همس الاحباب يقول...

اما بالنسبة للموضوع بتاع البوست
فدائما تكتبى بقلب الام والسؤال عن اولادك شىء اساسى
احييكى على احساسك بكل من حولك
ولكن الموضوع ليس بسيط كما نتصور
نظرا لظروف الحياة والانشغال
ولكل انسان عذره وظروفه
لذلك اعتقد ان المحبة والاخلاص فى التعامل فيما بيننا اساس للتواصل
تحياتى

همس الاحباب يقول...

شكر خاص لحضرتك
والاخ احمد بمناسبة السؤال فى البوست الماضى عن تاخيرى
تحياتى

thunder يقول...

ههههههههههههه
احمد احتل المدونة علشان انا مش عارف ادخل فترة الصبح ولا اية
اولا يا امى ان معاكى فى كلامك فعلا لو طمنى بعض لو بحرف هيكون راحه على الاقل للقلوب اللى حاسة بقلق يعنى اية المانع لاى شخص لو دخل وقال مثالا موضوع جيد حتى من غير ما يقراء المهم انه قال انا موجود وبخير يا جماعة بس معلش فى ظرف مخالنيش اقراء المهم اننا اطمنى
نيجى بقة للموضوع التانى
معظمنا واخد اميلات بعض لية معرفش الاوف مش بيوصل ودا كان مسبب لى نوع من النرفزة لانى كنت ببعت لناس كتير واستنى الردود ومافيش حد بيرد وافتكرت انهم بيقراءو الاوف ومش بيردوا لكن عرفت انه تقريبا الياهو فى مشاكل ومش بيوصل الاوف على اوقات فبقة الببديل تانى المدونات وعلشان كدا هى اقرب فرصة نتواصل فيه ونطمن على بعض ودا يثبت كلام حضريتك ان لو دخل اى شخص وقال حرف ودلل على وجودة بكدا هيطمنى عليه
امى العزيزززة وحشتنيى وحياة ربنا اووووووووووووووووووووووووووى اوووووووووووووووووووووووووووى
وفعلا مفتقد حضريتك الفترة اللى فاتت جدااا بسبب الضغط العصبى اللى انا فيه ووحياة ربنا كل مالاقى فرصة على النت بدخل اطمن على حضريتك وعلى باقى العيال اللى محدش بعبرنى فيهم غير اختى اللدود وبقالها فترة هى كمان متقوقعة ومش لاقيها بقالها يومين هى كمان
لكن لما شوفت تعليقها هنا اطمنت وعرفت انها بخير
ودا تانى بياكد كلامك
امى العزيزة دمتِ بكل حب و ود وفى رعاية وحفظ الله دائماااااا

موناليزا يقول...

عاجبنى انك اتكلمتِ فى الموضوضوع ده
لانى كنت عايزة اعبر عن وجهة نظرى وماكنتش عارفة اخصص موضوع ليه
وبما انك فتحتِ باب النقاش فهقول رايى
بصى ياستى
انا بيضايقنى انى اعلق عند حد وهو مايردش على تعليقى عنده
وبيضايقنى برضه انى ارد على التعليقات عندى ومالاقيش حد بيتابع ردى عليه

فى الموقف الاول بتضايق لانى مش بعلق غير لما اكون حسيت ان فيه حاجة عندى ممكن أقولها وممكن كمان اترك ملحوظة او استفسار فمن حقى اعرف الرد على استفسارى او الرأى فى تعليقى او مدى تقبل ملحوظتى من عدمه

فى الموقف الثانى بقى لانى بهتم بجميع التعليقات حتى لو على موضوع قديم ولازم ارد عليها حتى لو هتاخد منى وقت كبير بس احتراما وتقديرا لمن زارونى وتركوا تعليق لازم ارد عليهم قبل حتى ماانشر موضوع جديد

اسماء واحلام فى وجدانى يقول...
أزال المؤلف هذا التعليق.
اسماء واحلام فى وجدانى يقول...

الكلام ده كلام ثندر

ووحياة ربنا كل مالاقى فرصة على النت بدخل اطمن على حضريتك وعلى باقى العيال اللى محدش بعبرنى فيهم غير اختى اللدود وبقالها فترة هى كمان متقوقعة ومش لاقيها بقالها يومين هى كمان
لكن لما شوفت تعليقها هنا اطمنت وعرفت انها بخير
ودا تانى بياكد كلامك

*****************************

انا مش معاك فى الكلام ده يا ثندر لانك بكده مش مقدر ظروفنا احنا كمان الحب اللى بينا مكانه فى القلب مش فى المدونة اينعم المدونة هى الشىء الملموس الوحيد اللى ممكن نثبت به اننا بنود بعض لكننا فى الحقيقة كل واحد فينا فى اى مكان اكيد بيفكر فى الباقى انا بافكر فى ماما الفراغ فى ميمىفى فكرة فى ايوشة فى ميمى فى وردة فى خالد فى هناء فى يويو فيك انت شخصيا بس كل واحد وله ظروفه يعنى انا مثلا دلوقتى انت عارف موضوعى مع الكمبيوتر ومع ذلك قاعد وبرد عليك مع انك قلتلى ابعد شوية بس انا لامة شوفت كلامك قلت لنفسى لازم ارد عليك واقولك ان الحب مكانه فى القلب وده كفاية اوى
ربك رب قلوب

الفراغ يقول...

همس الاحباب
شكرا على الزياره
وااقدر لك انشغالك



ثندر
انا عارفه انك مشغول ربنا معاك
وانا راضيه بوجودكبتى طريقه ترضاها بس اطمن عليك


مونليزا
كلامك مظبوط..
والنقطه دى انا نسيتها فى كلامى
وهى ان لازم يكون فى رد على التعليق لمايكون هناك استفسار
اما بعد ذلك فطبعا انا قلت دا كلام معرض للرفض لو القبول
وانا برد عليكى اهو


اسماء واحلام
مفروض ماردش لانك بتكلم ثندر
لكن مش فاهمه ايه معنى كلامك ده
(يعنى انا مثلا دلوقتى انت عارف موضوعى مع الكمبيوتر ومع ذلك قاعد وبرد عليك مع انك قلتلى ابعد شوية بس انا لامة شوفت كلامك قلت لنفسى لازم ارد عليك واقولك ان الحب مكانه فى القلب وده كفاية اوى
ربك رب قلوب)

يعنى ايه ثندر بيقولك ابعد شويه؟؟؟
اما كفايه ان الحب فى القلب فدا كويس بس عايزه افهم انت ليه زعلان
ممكن افهم؟

اسماء واحلام فى وجدانى يقول...
أزال المؤلف هذا التعليق.
اسماء واحلام فى وجدانى يقول...

ارسلت لحضرتك رسالة على الايميل

yoyo يقول...

صباحك سكر يا احن قلب

و الله يا ماما انا عارفة انى مقصرة جدا مع حضرتك بس و الله ربنا يعلم حبى لحضرتك اد ايه و كمان كان فى ظروف و الحمد لله بقيت احسن دلوقتى
وكمان كان فى مشكلة فى انى ادخل على مدونة حضرتك و الحمد لله غيرت المتصفح و قدرت اكتب لحضرتك مرة تانية

عارفة ياماما و الله لما دخلت عالم التدوين دا مش كان فى دماغى انى ممكن اقابل ناس و احبهم و ارتبط بيهم بالشكل دا حتى من غير ما نتقابل و الله بحس انى وسط اسرتى و حبايببى ومهما حصل مش بقدر انى ابعد وحتى لو حصل و بعدت برجع تانى وكلى لهفة و شوق كبير

و الله يا ماما انا بتفق مع حضرتك و حضرتك لك الحرية فى اتباع الاسلوب المريح فى ناس بالفعل بترد على التعليقات هناك عند اصحابهم منهم
طبعا ( عمو فشكول) و اعتقد ان الوضع دا بيكون اريح و اسهل له
المهم اننا نطمن على بعض
لان الحب اللى اتوجد فى القلوب حب صادق و مستحيل انه يتغير حتى وان بعدتنا الظروف

سامحنى لغيابى عنك يا امى
بس زى ما احمد قال لحضرتك مش كان بايدى
ربنا يشفيك يا احمد يارب انت كمان

ربنا يخليكى لنا ومش يحرمنا منك ابدا يا ماما

تحياتى
يويو

الفراغ يقول...

يويو انتى تنورى اى وقت ويارب يكون الحال احسن دلوقتى
وربنا يشفى احمد ويطمنا عليه
واشكرك على رضائك بانى ارد عندك
بس افرضى بقا انك ماكنتيش كاتبت بوست جديد علشان اروح ارد عليه
هههههههههههههههه
عموما انا برد طول مانا صحتى كويسه
اشكرك جدا ولك تحياتى

الفراغ يقول...

سلامتك يا احمد
انا لسه حالا رحت قرات الاميل
وعرفت حكاية منعك من الجلوس على الكمبيوتر
وانا يهمنى صحتك وراحتك
ياريت تاخد وقتك..وربنا يتمم شفاك على خير
وهاننتظرك ترجع بالسلامه
تحياتى

فكرة من الزمن ده يقول...

حبيبتي ماما الفراغ
وحشتين والله وحشتيني
واسفة لو كان غيابي فيه قلة ذوق مني
بس والله غصب عني

والبوست ده حتى لوعتاب وانا من المقصودين بيه
فده والله سعيدة اني اكون في جزء من بالك
وزيارتك ليا ونصيحتك اخجلتني اوي
ومش عارف اقولك ايه
بس بحبك في الله اوي

وحسيت بحب اوي
لما قريت كلامك عن احمد
ولما دخلت لقيت بيقول اول تعليق اهديه لاخواتي
بجد خسارة ان كل المشاعر والحاسيس دي بتكون على ورق
والعالم الخارجي مش بيكون كده
لكن عزاؤنا
انه ربنا بعت لنا نقطة بيضا في سواد الايام
بتنور لنا حتى ولو كان النور مش بينور كل جوانب حياتنا لكن يكفينا نقاؤه


اما بالنسبة للموضوع فانا معاكي طبعا
ان الواحد بينتظر زيارة احباؤه واخواته
وكلمة شكر ممكن تكون معبرة بشكل مؤقت اذا كان اي فرد في هذه العائلة بيعاني او بيمر بظروف ما
لكن كمان ممكن نلتمس عذر للي ماقدرش يكتب الكلمة دي
لا يعلم بالدواخل الا الله

وحقيقي احمد اخ بمعنى الكلمة لانه مرة سال عليا وكان زعلان اني مش باعلق عنده
وكتب عندي اسمه فقط
ونبهني ان تعليقاتي اختفت من عنده وروحت وضحت الحكاية
فالصمت دائما يحدث كثير من اللابس اما الحوار يجلي البصائر ويصفي النفوس

تحياتي يام المدونين