الاثنين، ٢٢ يونيو ٢٠٠٩

فضفضه حزينه

سلام عليكم ورحمة الله وبركاته

معلش استحملونى
انا دلوقتى دمى تقيل قوى...
ده برضه من الحر ولا من الحزن ولا من ايه الله اعلم
يمكن ضعف ايمان....يمكن احساس بالحرمان

اصلى طول عمرى بحب اعرف انا زعلانه ليه ...ودا بيتعبنى جدا
بس اعمل ايه ..ربنا مدينى القدره على تحليل المواقف ...والبحث عن الحلول الممكنه

واحيانا باجى على نفسى جامد وانفذ الحلول الممكنه حتى لو على حساب نفسى المهم الصح يتعمل
وطبعا دا كله كان بيتنفذ طول ماكان فى ايدى القضيه

لكن دلوقتى المواضيع خرجت عن السيطره
واصبح الامر فى ايد ربنا طبعا من قبل ومن بعد
لكن قصدى ان ابنتيا اصبحا فى وضع يجعلهما يتحملا مسئولية نفسهيما

وبالتالى لم اصبح الام التى تستطيع فعل ماتريده وماتراه مثاليا

عارفه ممكن تقولولى بلاش ديكتاتوريه وسيبيهم يعملوا اللى هما عايزينه
والحقيقه انى فعلا تركت بنتى المتزوجه ولم اعد اتدخل فى شئونها باعتبارها فى بيتها
وتتحمل مسئوليه بيتها هى وزوجها
ولكن
المشكله فى بنتى اللى لسه معايا
ليها تصرفات تجنن
وطبعا دا كله جاى من انها مازالت شباب فى شباب
وانا طبعا ست كبرت وبزهق بسرعه
وكل يوم ادعى ربنا انه يخلصنى منها وتروح بيتها يالسلامه
وهى تسمع الكلمه دى وتجنن
انتى مش بتحبينى
انتى تعبتى منى وبقيتى خلاص شيفانى تقيله عليكى

وانا بقول والله ابدا
هى بس الحكايه ان المركب ام ريسين تغرق
وباعتبارى طول عمرى ماسكه زمام الامور ...فطبعا لايمكن اتنازل عن وضعى الاستراتيجى فى البيت
وهكذا كل يوم وتانى يحصل الصدام اللى بين الاجيال
هى شخصيتها قويه ونفسها تمشى كلامها عليا
وانا طبعا لايمكن
وكل اللى بطلبه من ربنا انها تروح بيتها وتعمل اللى هى عايزاه فيه

ربنا يكملها جوازها على خير
احنا يا دوبك قاريين الفتحه
عقبال الجميع
طبعا اللى لسه ماتجوزوش بس

بس ياعينى على خطيبها
ربنا معاه بقا..

دانا حتى حزينه من يوم قراية الفاتحه وحاسه انى هاتحرم من حنانها وقربها
يظهر ان القط بيحب خناقه فعلا
انا يوم قراية الفاتحه كنت حزينه جدا ومافيش اى مشاعر للفرحه
بعد جواز اختها واحساسى بانها ضاعت منى وان تعب السنين راح لغيرى
وانى ملحقتش اتهنى بيها
والله وانا حزينه
فعلا بنربى وغيرنا ياخد على الجاهز
وادى بنتى التانيه كمان
يبقى ليه نخلف ونربى

بس سبحان الله برضه عيزاها تروح بيتها
لانه دا حقها انها تعيش مع زوج يحبها ويرعاها ويعوضها غياب باباها

وانا بقا ليا ربنا وابنائى اللى هنا معايا

عرفتوا بقا الحر بيعمل ايه
معلش بقا
دمى تقيل انا عارفه...........وكمان مخى تعبان ويمكن مافيش تسلسل فى الكلام...
بس دى حالتى دلوقتى
انا قلت انقلها زى ماهى
بدل ماتاخر عليكم وتقلقوا عليا


ودى على فكره فضفضه بس
يعنى انا مش عايزاكم تتعبوا فى الرد او التعليق....انا بخير
كفايه تقروا وتستحملوا دمى التقيل النهارده
سلام عليكم
واشوفكم على خير
باى باى

هناك ٣٨ تعليقًا:

د/على خميس يقول...

هل فعلا ممكن اكون اول تعلييييييييييييييييييق ؟؟؟؟؟؟

اسماء واحلام فى وجدانى يقول...

طيب ازاى اول تعليق يروح عليا
اللى يجزيه البولوجر دايما يعملها معايا مش مشكلة

د/على خميس يقول...

اه و الله اول تعليق
الحمد لله
السلام عليكم فى ألول أسأل الله أن يشرح صدرك

هو حضرتك الحياة علاقة تبادلية ..اديها بعض السلطات اللى حضرتك ممكن تستفنى عنها و هى ممكن تفرح بيها و تتلهى فيها عن الحاجات المهمة و بالمرة تتدرب علشان لمل تكون مسئولة عن بيت تعرف تديره

بارك الله فيك
تقبلى تحياتى

اسماء واحلام فى وجدانى يقول...

امى الحبيبة

طبعا انا مش هاقدر اتكلم فى الموضوع ده بشكل او باخر لانه تقريبا موجود فى كل بيت او بمعنى اصح شباب اليومين دول تفكريهم مختلف اوى اوى
واى تحفز بسيط ممكن نعتبره انه آمر واجب التنفيذ بس طبعا الحقيقة غير كده خالص الحقيقة ان الام او الاب نفسهم يشوفه ولادهم اجمل ناس فى الدنيا
واحنا للاسف مش هنحس بالكلام ده الا لامة ربنا يرزقنا بالاولاد
ويعذوبونا ساعتها بس هنعرف اننا كنا غلطانين انا باتكلم بصيغة الجمع لانى واحد منهم
بس اقولك على حاجة بجد والله
انا حاسس اوى بأمى وبتعبها وكنت حاسس اوى بوالدى الله يرحمه وبتعبه
الحمد لله

اسماء واحلام فى وجدانى يقول...

تسمحلى بقى يا امى احتل مدونتك شوية
طبعا انا هنا لوحدى لا يويو ولا ثندر الجو رايق اوى
عايز اقول لميمى الف حمدلله على سلامتك يا ميمى وربنا يبعد عنك كل شىء وحش وما تغبيش عننا تانى يارب


وفكرة ترجع بالسلامة وتنورنا من تانى

ويهدى يويو من الاحتلال اللى بتعمله فى الناس على الفاضى وعلى المليان

اسماء واحلام فى وجدانى يقول...

وطبعا ده التعليق بتاع الناس
اللى انا واثق ومتاكد انهم نايمين دلوقتى وبياكله رز مع الملايكة اكيد طبعا مع الملايكة لان الشيطان لو قرب منهم هيتحرق
ده احساس مجرد احساس

اسماء واحلام فى وجدانى يقول...

هناااااااااااااااااااء

ربنا يوفقك دايما يارب
ومكانك مجحوز فى قلب ماما الفراغ دايما
وربنا يقدرنى على حجز مكانك هنا لحد ما ترجعى ناجحة باذن الله

رحلتنا في الحياة يقول...

السلام عليكم ياماما ليه بقى الحزن ده بقى فى حد يزعل على خبر جميل بالشكل ده ربنا يتمم لها بخير يارب
وانا مقدرة شعور حضرتك شئ عصب نعيش عمرنا كله متعلقين بناس واقرب الناس لقلبنا وفجاة نحس انهم هيسيبونا علشان يبدوا حياتهم بس دى سنة الحياة
اتارى الامهات كلهم قلبهم ابيض وحنين جدا بس حضرتك قلبك طيب جداااااا جداااااااا انا دلوقتى عرفت ليه ماما بتتضايق منى لما بخرج برة البيت وابات لايام كتير برة مع انى لما بكون موجودة فى البيت مش بنبطل خناق :)

على العموم ياست الكل متزعليش هى بس تجوز وتروح بيتها واجى انا اقعد معاكى على طوووول ولا فى مانع

♥نبع الغرام♥♪≈ يقول...

السلام عليكم

حبيبتى الغاليه ليه بس حزينه كده وانا معاكى

تعرفىى بجد ساعات بحس قووى انى وحضرتك قريبين من بعض فى كل حاجه

حتى فى طريقة التفكير وبجد سعيده قوى بيكى

انا حاسة بيكى ياحبيبتى والف مبروك وربنا يتتمم بخير

حبيبتى الغالية انا مسافرة اجازه كده صغنونه ارتاح فيها شوية
وبجد هتوحشينى الكام يوم اللى جايين دول
وابقى اسئلى عليا

بحبك قووى
ايناس

mohamed ghalia يقول...

ياماما فضفضى برحتك
إحنا عشان نسمعك
كل واحد بياخد نصيبة وقدره هيشوفه

الفراغ يقول...

دكتور على خميس
والله منور
ربنا يبارك فيكم...انتم شباب زى بعض
واكيد عارف المثل اللى بيقول فيها لا اخفيها
ربنا يخليكم لينا




احمد ابنى الغالى(اسماء واحلام زمان)
ياعم ماتقدش الاول ولا التانى ولا الاخير
المهم انك موجود معانا هنا...ومنور عندنا
والله يا احمد انا بفرح بآرئها...ومبسوطه كمان انها كبرت وبقا ليها راى تدافع عنه
لكن المشكله فى طريقة فرض الراى
عموما انتوا ولادنا وغاليين علينا
وربنا مايحرمناش منك

الفراغ يقول...

ايوش الجميله
عقبالك يا جميل
بس اوعى تبعدى عن مامتك
احنا بنعمل اللى فيه سعادتكم
بس من جوانا مش عايزين تبعدوا عننا متر حتى
والله يا شيماء تنورى وتطلعى من عندى عروسه كمان
بس كدا ماما هاتزعل منى
انتى بس تيجى نقعد مع بعض شويه
وفعلا انتوا ماليين عليا الدنيا
رنا يخليكم ليا

الفراغ يقول...

اختى الحبيبه.... ايناس
ان شاء الله اجازه سعيده وترجعلينا بالسلامه
وربنا يبارك فيكى وعقبال حبايبك
وانا مبسوطه جدا ان لقيت اللى بيفكر زى تفكيرى
ورب اخ لم تلده امك
منتظره رجعوك بالسلامه

الفراغ يقول...

محمد غاليه
اهو بنفضفض ...يارب نرتاح
وربنا يرزقنا الرضا والايمان

الفراغ يقول...

اسماء واحلام
انت تحتل المدونه وبراحتك
وتسئل عن حبايبنا كلهم براحتك
وربنا يطمنا عليهم
بس انا ليا سؤال شخصى وقوى وممل عن فكره
لو يعنى هى مخصمانى تقولى وانا كدا هارتاح
لكن هى بتكتب عندها ومش بتجيب سيرتى خالص
وانا بقا زعلانه
انا عايزه فكره من الزمان ده
كلمينى على الماسنجر ..نفسى اتكلم معاكى
والا هاكتب عنك بوست...واقلب المدونات كلها عليكى....اسفه هاحولها عليكى ...لغاية ماتقدريش تردى من كتر حبايبك
قلتى ايه يا فكره؟
تكلمينى احسن...صح!
منتظراك...بحبك

akeed يقول...

السلام عليكم

هذه هى الحياه مراحل كل مرحلة لها سعادتها و حزنها و تضحياتها لاكن فى اكثر الاحيان تكون التضحيات لها اثر السعادة و خاصة لو كانت التضحيات لانسان تحبينه .

فأبنتك لابد ان تكون لها اسرة وزوج و تشعر معه بالمشاعر التى لا تستطيع الام ان تعطيها لها و سوف تكونين فى غاية السعادة عندما تجدينها سعيدة فى حياتها مع زوجها و لاسيما الاحفاد ايضا فسوف يزداد عدد احفادك ان شاء الله

حياه بلا عنوان يقول...

السلام عليكم انا سعيده جدا انى دخلتالمدونه مره تانيه بس زعلانه لان حضرتك زعلانه بس الحياه فيها كل يوم حاجه جديده فى الفرح وفيها الجزن مش على طول فرح ومش على طول حزن كلنا بنتعلم من الحياه سعات كتير بنزعل وسعات كتير بنفرح بس الاكتر اننا بنزعل بس بنحاول نخرج نفسنا من الزعل والحزن لان الزعل والحزن عمره ما هيوصلنا لشىء ابدا المهم اننا نعمل حاجه اننا نتفائل ونحاول منزعلش نفسنا هو انا اعارفه ان الزعل مش بئيد الواحد بس بنحاول اننا نتغلب الزعل شويا دى الحياه الزعل موجود والفرح موجود بحيى حضرتك على الفضفضه الجميله دى تحياتى

الفراغ يقول...

حياة بلا عنوان
كلامك صح ..والحياة على كدا وكدا
ودا قدر لازم نرضى بيه
بس لما يبقى ساعة الفرح نزعل وساعة الزعل برضه نزعل يبقى بقيلنا ايه فى الحياه نفرح بيه
مافيش غير انى ادعى ربنا
اللهم ارزقنا رضاك والرضا بما قسمته لنا
امين يارب العالمين

الفراغ يقول...

اكيد

احنا بنضحى بسعادتنا علشانكم
بس بنقعد نجتر الاحزان ونموت من الحزن
بس املى فعلا انه ربنا يرزقنى احفاد قبل ما اموت
يمكن ساعتها بس اعرف يعنى ايه فرح تانى
لان الحب بقلبى مش لاقى حد عايزه خلاص
ومش هاديه لحد الا اذا طلبه
لكن احفادى هاديهم من غير حساب
ربنا يسمع منك ويجوا احفادى اللى بسمع عنهم بس

اسماء واحلام فى وجدانى يقول...

امى الحبيبة

انا روحت لفكرة وقلتلها بس طبعا انا اتصالى بيها عن طريق المدونة فقط بس انا وصلت رسالتك ليها وان شاء الله ترجعلنا بالسلامة وهى ان شاء الله اكيد بخير ربنا يخليكى لينا دايما وتسالى عننا

همس الاحباب يقول...

تلك هى سنة الحياة
اباء وامهات وابناء والابناء يصبحوا اباء وامهات وهكذا
فانا مش متفق معك فى وجهة نظرك يا ماما اننا بنربى وغيرنا بياخد على الجاهز دى رسالة وكل منامجبر عليها
ربنا يبارك فى حضرتك وتفرحى بيهم وباحفادهم وبكرة لما تلاقى عيالهم بيتنططوا فى البيت هتقولى ان اعز الولد ولد الولد
جزاكى الله خيرا على تعبك معاهم وكفاية انك اب وام لهم
وبعدين عديها شوية الناس لبعضيها
ولو البنت شخصيتها قوية يبقى مش عيب
لانها طالعة لمامتها
هههههههههه
تحياتى وتقديرى

thunder يقول...

ههههههههههههههههههههه
نو كومنت يا امى وان كان انا بضحك اووووووى
ومش هقول سبب ضحكى لكن معتقدتش انى اختى زعلنة من حضريتك وكلامها دا فعلا يدل على اللى جواها
ربنا يديم الحب ما بينكم ياااارب وصراع الاجيال دا يقل شوية وربنا يتم ليها على كل خير يااااااااارب

yoyo يقول...

صباحك سكر يا ماما

وحشتنى اوى اوى اوى اوى
يارب تكونى بالف خير وصحة يارب

yoyo يقول...

لا يا ماما انتى دمك زى السكر و الله شربات مكرر
بيكفى اننا نحس و نتواصل مع حضرتك بالمشاعر دى

yoyo يقول...

عارفة يا ماما حضرتك اتكلمتى عن حال اغلب البيوت ان بحس بالاحساس دا مع مامتى رغم انى بنتها الكبيرة بس الحمد لله احنا مش علاقة ام وبنتها و بس لا علاقة اخوية وصداقة مش لها حدود بس دا مش يمنع انى شخصيتى صعب انى اخضع بسهولة يعنى بحتاج انى اقتنع الاول تقريبا دا بيرجع للتربية الحمد لله اتربيت ان يكون ليا شخصية من صغرى و اقول رايى جايز دا كان سبب انى بقيت لماضة شوية لا بصراحة شويتين بس دى طبيعتى

yoyo يقول...

سنة الحياة يا ماما و دى اجمل رسالة فى الدنيا ان الام تربى و تكبر لحد ما تشوف احفادها واحفاد احفادها
الشعور بيكون صعب لما تحسى ان جزء منك خلاص هيبدا ينفصل عنك و يبدا حياته من جديد

ربنا يبارك لها يارب و يرزقها الذرية الصالحة اللهم آآآمين يارب

هونى على قلبك الطيب يا ست الكل
ربنا يبارك لنا فيكى يارب و مش يحرمنا منك ابدا

دمتى امى بالف خير وصحة
تحياتى
يويو

yoyo يقول...

معليش بقى يا ماما
اسمحى ليا اشوف الناس اللى بتحاول تحتل دى

yoyo يقول...

* احمد
معليش بقى يا بنى انا جيت
يعنى صباح الاحتلال الازلى الابدى بقى
لما اشوف هتعمل ايه
يا مازينجر
ههههههههه

yoyo يقول...

* هناء
من قلبى و الله بدعى لك وانت وكل اللى زيك يارب يوفقكوا ومش يضيع تعبكم ابدا يارب
فى انتظارك ترجعى لنا بالف خير
تحياتى
يويو

الفراغ يقول...

ابنى العزيز احمد
انا بشكرك جدا جدا جدا على تحمل المسئوليه معايا...
مانا هعمل ايه يا احمد..بنتى خلاص مش فضيالى
ماعنديش غيركم اسئل عليكم..واعيش بقربكم
لغاية ماكل واحد فيكم انتم كمان يروح بيته...واقعد بقا انتظر الكتاكيت الصغيره
ربنا يسعدكم وافرح بيكم كلكم فى بيوتكم يارب مع الزوج الصالح والزوجه الصالحه
اللهم امين

الفراغ يقول...

خالد
ماشى يا خالد
انت معاها ولا معايا
بجد انت خلتنى اضحك من قلبى
ماهم بيقولوا( اكفى القدره على فمها تطلع البت لامها)
صح يا خالد
بس امها مسكينه ولوحدها ونفسها عيالها يفضلوا جنبها
فعلا سنة الحياه...ربنا يسعدكم كلكم فى بيوتكم يا رب

الفراغ يقول...

عقبالك يا ثندر
وافرح بيك ...دانت ابنى البكرى





ايه حبيبتى

ماتحرمش منك...كلامك صح 100%
اصعب شيء ان جزء منك ينفصل عنك
عارفه دلوقتى نفسى ماتبعدش عنى لحظه
رغم ان كانت امنيتى فى الحياه انى اجوزهم وارتاح من المسؤليه
بس احساسى انى اعيش من غير وجودهم جنبى
دا صعب قوى قوى
ربنا يسعدكم فى بيوتكم ...بس برضه ماتنسوناش

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
يارب تكونى بخير وفى احسن الاحوال وفى اتم صحه يارب
وبعدين فين النكد اللى بتقولى عليه ده ؟؟؟
والله انا بضحك وانا بقرا البوست
اصل نفس الموقف ده حاصل بينى وبين بابا فى البيت هنا
حتى قفلنا مع بعض ومش راضى يكلمنى بقاله يومين
يعنى عايش نفس الموقف بالظبط
ههههههههههههههههههه
وعموما ربنا يتمملها على خير وتشوفيها عروسه منورة الكوشه وتفرحى قلبك بيها
وربنا يرزقها هى واختها بالذريه الصالحه اللى هتملى عليكى الدنيا يارب
على فكرة امى عندكم فى الجيزة واخده منى اجازة انا واخويا الصغير
هههههههههههههههههههههههههههههه
اتخنقت مننا وهربت شويه واخدت معاها روح قلب ستو (مصطفى باشا الصغير الحفيد وولى العهد)
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

بـسـمـــة صـــــلاح يقول...

صحيح دي اول زياره ليا
بس حاسه والله كإني اعرفك من زمان مش عارفه ليه
مفيش تقل دم ولا حاجه ياخالتو
الف مبروك لبنت حضرتك ربنا يتمملها على خير
وتفرحي بيها
انا حاسه بيكي والله
حاسه بشعور الام لما بنتها تتجوز انا شفت اكتر من موقف
واقربه كان مع خالتي الصغيرة
ربنا يسعدك يارب
وهو فعلا الحر بيعمل عمايله
ههههههههههههه

تقبلي مروري الاول
دمت بود
تحيـــ بسومةــاتي(:

اسماء واحلام فى وجدانى يقول...

امى الحبيبة
انا بعتلك رسالة على الايميل

همس الاحباب يقول...

صح يا ست الكل
بس احنا ما عندناش مانع انها تطلع ربعك بس
المهم بكرة الجمعة
وحضرتك وعدتى انك تكلمينى من عشرتاشر جمعة فاتت
يا رب ما تبقاش العشرتاشر لعد المائة
هههههههههه

جارة القمر يقول...

معلش

الحياة كدة

عاشر عاشر لا بد تفارق

ربنا يوفقهم بحياتهم

وكوني قوية

احساس الفراغ بعدهم صعب

بس لازم تتحملي

ربنا معك

كوني بخير دائما مودتي

Unknown يقول...

ربنا يتملها على خير يارب ويقدرك على اتمام رسالتك
حضرتك باين من قرائتي لكلامك في المرة الأولى انك شخصية رائعة وعظيمة جدا
ربنا ييسرلك الحال يارب
هي دي سنة الحياة فعلا
خالص تحياتي