السبت، ١ أغسطس ٢٠٠٩

لقـــــــــــــــــــــــــــاء الاحبه

السلام عليكم ورحمة الله وبركاته

بحبكم كلكم وبشكركم على كثرة سؤالكم عليا كل واحد باسمه واعتذر عن عدم الرد عليكم فى التعليقات
وارجوا اعتبار كتابتى هذا البوست بمثابة اعتذار عن التاخير وارجوا ان يرضى حبكم لى ويجيب عن غيابى ...وشكرا ليكم كلكم

اولا بعتذر عن طول الغياب..ودا كان لظروف مرضيه غصب عنى ...لانه تقريبا بوظت تعليمات الدكتره فى السفر
ودا كان ليه الاثر السيء عليا بعد مارجعت....وكان لازم من تظبيط المسائل مره اخرى....

ثانيا بحبكم والله ووحشتونى جدا جدا...واسمحولى ااقولكم انى نبهتكم وقلتلكم انكم وحشتونى وهاروح اقرأكل مافاتنى فى الفتره اللى سافرتها
بصراحه كنتم واحشنى قوى قوى وكنت كل ماجى اقعد اكتب بوست جديد الاقى مولضيه عند ولادى جديده ااقوم اعمل ايه؟
ااقفل على البوست واجرى اروح اقرا اللى انتوا كاتبينه واعلق عليه وانا سعيده قوى انى رجعت لبيتى التانى قصدى مدونتى حبيبتى ومدونات ولادى واخواتى

ثالثا بقا واللى انتوا منتظرينه انى ان شاء الله النهارده هاحكيلكم عن مغامراتى فى ساعات السفر
نبدأ... بسم الله
شوفوا يا حبايبى يا غاليين انا وصلت تقريبا العصر كدا
على الحمام عدل طبعا من الحر والعرق والتلزيق... اجاركم الله
بعدين صلاة الظهر والعصر جمع وقصر(طبعا لانى على سفر ومقيمه اقل من 15 يوم)
بعديها بقا الغدا ومش هاقولكم كان ايه علشان ماجريش ريقكم...عموما انا اللى ريقى بيجرى دلوقتى ...بصراحه ماأحلى الكسل والاكل زى العسل...وبعدين بقى فنجان الشاى المعتبر...وبنتى صممت تسقينى فى طقم الشاى الملوكى اللى محطوط فى النيش ...ومطلعش من يوم جوازها الا مرتين....واحد لمدير جوزها فى الشغل والتانيه لماما حبيبتها(زى مابتقولى طبعا)
بعدين خد عندك نوم لغاية 11 بلليل نمت ماحستش بنفسى ولا حد صحانى ولا قالى انتى فين
صحيت لقيت بنتى وجوزهابيتفرجوا على tv
اتوضيت وصليت المغرب والعشا وشربت عصير مانجه( اتفضلوا امس)ههههههههههه
وكانو عايزين يخرجونى اتعشى بره فى الهوا الجميل لكن طبعا رفضت اصلا انى اتعشى
وقضينا الليله فى الفرجه على مسرحيه وقزقزة اللب

تانى يوم...ولا ااقولكم انتوا كدا هاتناموا منى ...انا هاحكيلكم عن المهم وبس ...مش كدا احسن برضه!هههههه
بس على فكره تانى يوم حسيت انكم وحشنى قوى قوى وكنت حاسه ان عايزه ااقوم اروح بيتى تانى ...بنتى عندها كمبيوتر لكن معندهاش نت للاسف...وقضت اليوم بلعب العاب غريبه كدا زى لعب الاطفال بس اعمل ايه عايزه الوقت يعدى ودا اليوم اللى بعتلكم فيه الرساله عن طريق جوز بنتى...بعد طبعا معرفش الباس ورد ( واللى هاغيره ان شاء الله )
المهم بقا بعد رسالتى اليكم استسلمت للامر الواقع...وهديت وبدات احس بالامان انى مش ورايا حاجه قلقانى
وحضرت التحضير لفرح..وبعون الله امكم حبيبتكم وفقت راسين فى الحلال...بصراحه يعنى هما كانوا متوفقين بس فى شوية عراقيل بسيطه
وبما انهم اصحاب بنتى وجوزها وعرفت الموضوع طلبت انى ازور بيت العروسه واللى هما عاملين المشكله
ورحت والاقى ال ايه الزعل انه ماجابش مروحه وهى كمان مش عاجبها الفرح فى الشارع
طيب بالزمه دا زعل اساسا....طيب يا جماعه المروحه دى هاتيجى بعد الصباحيه ولا اى حد ان شالله انا هاجيبها هدية الصباحيه للعروسه

ياجماعه حسوا بالعريس دا خلاص مستنى يقول لله ...دا هاياكل شكك هو عروسته...المهم يبقوا مع بعض وهاينسوا اى حاجه بعد وقبل كدا
وام وابوا العروسه مش هايفتكروا حاجه غير فرحة وسعادة بنتكم....وهو سؤال واحد سئلته للعروسه الاهم عندك عريسك وحبيبك ولا الفرح وكلام اصحابك..اتكسفت طبعا وقامت دخلت اوضتها ودا كان ابلغ رد على السؤال واللى اقتع اهلها بان كل اللى بتعمله دا من تاثير كلام الناس وبس...واللى لاهايعجبهم الفرح فى نادى ولا قاعه ولا شارع ...وبس عايزين يقعدوا يقولوا بنت فلان فرحها ماتمش ويفرحوا فى غم الناس ووقف الحال
وقعدنا نضحك وابو العروسه اتكسف وقال خلاص يعنى هاقعد بنتى جنبىأهوى عليها انا..ههههههه
ومن هنا رضيوا برضه بالفرح فى صوان بالشارع....... حتى فى البيت وخلاص توفيرا للفلوس وفكرت ابو العروسه بيوم فرحه
وان ماكنش فى لا نوادى و قاعات بس كان فى رضا وسعاده والعروسه للعريس والجرى لل.............

وقام الراجل اتصل بالعريس اللى كان منتظر المكالمه دى بفارغ الصبر وجه وحددوا موعد الفرح وحضرت الفرح الخميس اللى فات وكانوا من اجمل العرسان وربنا يسعدهم وصحيح مارحتش الصباحيه وخلعت من المروحه بس بعتلهم صباحيتهم طبق بسبوسه عسل....بزمتكم مش احلى من المروحه!هههههههههههههههههه
وكمان خرجت اتعشينا بره على النيل.... طبعا سندوتشات بس مع تُرمس الشاى والتَرمس اللى اللى بنتى عملاها ومجهزاه من يوم مارحتلها..كانت القعده جميله جدا ويومها روحنا الساعه 3 صباحا ومصحناش تانى يوم الا على الظهر

ورحنا فين كمان... روحنا فين كمان...روحنا السيرك بس انا مش انبسط فيه معرفش ليه !!!!!!! يمكن عقده من الصغر وانا مش فاكره؟!!
الله اعلم.....و اللى عنده تفسير لذلك الكره لهذا المكان.... يقولى !!!!!!!!!
كمان اتعزمنا على غداء عمل فى بيت صديق جوز بنتى وهما راحوا يشتغلوا واحنا الستات بقا هاتكم يا رغى فى كل حاجه والضحك ماشاء الله واصل لااخر الشارع وانا نسيت انى قد امهم ورجعت 30 سنه لورا.....لدرجة ان جوز بنتى وصاحبه سابوا الشغل وجم يقعدوا معانا
وقالى ايه يا ماما دانا ماسمعتش الضحك دا من ساعة ماتجوزنا....انتى تقعدى معانا علطول بعد كدا....
ربنا يسعدهم يا رب ويفرحهم بعيل يملا البيت عليهم سعاده وبر ...قولوا امين....
اهو زى مانتوا شايفين الدنيا مابتريحش حد اهو صديقهم دا متزوج بقاله 5 سنين ولسه ربنا معوضش عليهم بطفل
وبنتى ربنا كرمها وحامل بس اللى منغص عليها حياتها انى مش جنبها وحاسه بالغربه مع جوزها رغم انه بيحاول يعوضها غيابى انا واختها بس هانعمل ايه هى كدا الحياه ....تديك حاجه وتاخد قصادها حاجات....
وبالمناسبه عن الرضا بقضاء الله توفى احد جيران بنتى قبل ماروح والحمد لله لانى مش بستحمل المواقف دى وبفتكر علطول المرحوم جوزى الله يرحمه...بس حضرت العزاء لمدة 10 دقايق ونزلت بسرعه لان بصراحه الزوجه ماكنتش قد الموقف وزعلت اهل جوزها منها
واتكهرب المكان وقلنا مالناش دعوه...ورجعنا اتنكدنا بقية اليوم...وقضيناه قاعدين فى البلكونه ناكل عنب ونشرب مانجه بصراحه اخر نكد ههههههههههههههههه
واخر ليله معاهم روحنا للدكتور متابعه مع بنتى للحمل والحمد لله النونو بخير وهى مبسوطه قوى انها راحت معايا انا مش مع جوزها ...سبحان الله الست بتفرح بجوزها وهى رايحه تتابع الحمل ...لا.. بنتى فرحانه بامها ..وبتقول علشان الدكتوره تعرف ان ليا ام ومش مقطوعه من شجره....ال يعنى هاتخلى العيل اتنين هههههههههههه

بس خلاص... ويوم مامشيت بنتى قطعت نفسها من العياط وعايزه تيجى معايا بس طبعا انا رفضت وقلتلها هاجيلك تانى اول رمضان ..كل سنه وانتم طيبين... وكل الحبايب طيبين وبخير ويعيد علينا وعليكم الايام بالصحه والهنا والسعاده والايمان..... اللهم امين

ورجعتلكم وانا كلى شوق ليكم...ويارب ماتكونوش زهقتوا من كلامى
ملحوظه
ثندر.......محدش يعرف عنى حاجه يا ثندراكتر من اللى انت تعرفه وماحدش يعرف انا فين ولا فيا ايه..... وارجوا عدم الزعل
احمد (أ سماء واحلام فى وجدانى).......خليك ستر وغطا عليا ومتنساش انى كنت تعبانه من السفر..... وجل من لايسهو
وربنا يطمنا على يويو وترجعلنا بالف سلامه

والى لقاءقريب بأذن الله

هناك ٣٢ تعليقًا:

اسماء واحلام فى وجدانى يقول...

اول تعليق

كالعادة

لاحمد

اسماء واحلام فى وجدانى يقول...

وتانى تعليق


بردة كالعادة


لزهرة المدونة


وردة

yoyo يقول...

ست الكل
وحشتنى جدا جدا جدا

اسماء واحلام فى وجدانى يقول...

تالت تعليق بقى

عايز اقولك ان يويو

يويو رجعت وسبحان الله زى ما هى

نفس الجبروت اللى مشيت به

ربنا يستر علينا من احتلالها الازلى

واتوقع انها هتيجى

وتحتلك مدونة حضرتك بكل وضوح وعلانية

yoyo يقول...

دا التعليق التالث ليا بقى من بعد الغياب يا ماما
الواحد راجع وعنده حماسة عليا اوى للاحتلال
ربنا يسهل بقى

اسماء واحلام فى وجدانى يقول...

جبنا سيرة القط

لسة باكتب التعليق

ربنا يجعل كلامنا خفيف عليهم

حمد لله على سلامتك يا يويو

منورانا

ايه اخبار ابن لادن

yoyo يقول...

يا سبحان الله يا احمد هو انت قلبك حاسس بوجودى هنا ولا ايه
ههههههه
لازم طبعا اجى هنا عن ماما
عند احن واطيب قلب فى الدنيا دى كلها
ربنا يبارك لنا فيها يارب
ومش يحرمنا منها ابدا

yoyo يقول...

ماشى يا احمد مش كان العشم
دا انا حتى طيبة ومش بعمل حاجة خالص خالص
هههههههههه
خلى بالك بقى
وخد حذرك انا
رجعت و بقوة

yoyo يقول...

اه بخصوص بن لادن
بيسلم عليك ولو حابب اوصل له حاجة يالا انا فى الخدمة
مش عارفة ايه طيبة القلب دى بس يا ناس

اسماء واحلام فى وجدانى يقول...

يويو

حمدلله على سلامتك للمرة التانية التالتة والرابع ولاخر رقم ممكن نوصله

احتلى بس براحة
شوية فى ناس لسة هتيجى

yoyo يقول...

الف مليون سلامة عليكى يا ماما
لا مش ينفع مش نسمع كلام الدكاترة
لازم نهتم شوية و نخلى بالنا من نفسنا
ربنا يبارك لنا فى حضرتك

yoyo يقول...

ما شاء الله يا ماما يارب دايما يجعل حضرتك فى الخير و الفرح
احيانا بنهتم بالمظاهر و الشكليات و نحمل العريس فوق طاقته بس عشان خاطر زى فلانة وزى علانة مش اكتر

ربنا يارب يتمم لبنت حضرتك على الف خير و تقوم بالسلامة و تجيب نونو زى القمر كدا يارب

yoyo يقول...

أحمد
الله يسلمك يارب
تسلم
بالنسبة للاحتلال
الله اعلم بقى

yoyo يقول...

ماما
سعيدة جدا بتزامن رجوعى من عودة حضرتك لينا مرة تانية
ربنا مش يحرمنا منك ابدا ابدا
وبجد والله حضرتك كنتى وحشانى جدا
يارب دايما معنا على الف خير يارب

يويو

اسماء واحلام فى وجدانى يقول...

اولا حمد لله على سلامتك يا امى الحبيبة وخدى بالك ان السنة لسة طويلة يعنى مش عايزين غياب تانى
طبعا ده بعد اذنك
اما بخصوص المانجة فدى لها حساب تانى
وكمان مش قلتى اسم المسرحية طب ليه كده
اما بقى بخصوص الفرح فانا الحمد لله على الحياد ماليش دعوة غير انى ابارك لحضرتك واقولك الف مبروك

thunder يقول...

طبق بسبوسة بدل المرواحة وفى الحر دا لا عااااااااااااااااااااااااااااااااا
المراوحة احسن طبعا والبسبوسة تجيلى انا لانى مدمنها والله
اية دااااااا
طبعا احمد و يويو
محتلين المكان ودا يزعللللللللل وهغرق هنا عااااااااااااااااا
لغايط ما تصطادوا منها سمك وبجد ياامى ربنا يجعل ثواب توافيق بينا العروسين فى ميزانك ياااارب
دمتِ يااحسن واجمل ام بكل حب و ود وفى رعاية وحفظ الله دائما وكل سنة وحضريتك طيبة يااارب وليا عزوم من الاخر فى رمضان ياافطار ياسحور غلاسة بقى ياامى عااااااااااااااااااااا

MOHAMMED ELBANNA يقول...

حمداً لله على سلامتك
في انتظار جديدك
محمـد البنا
طريق النجاح

همس الاحباب يقول...

امممممممممم
ماشية معاك بسبوسة
عامة انا جاااااى اسلم واثبت حضور
وراجع تانى طبعا
مع انى كنت عايز اسمع الحكاية كلها بالتفصيل
مش مقتطفات
عامة ربنا يسعدك
والف مليون سلامة على حضرتك

♥نبع الغرام♥♪≈ يقول...

السلام عليكم

امى الحبيبه

وحشتنىىىىىىىىىىىىىىىىىىىىىىىىى
قووووووووووووووووووووووووووووووووووى

جدا جدا جدا يا احن واطيب قلب بالدنيا كلها

ربنا ما يحرمنيش منك ياست الكل وبجد بكون سعيده قووى لما بقرء اى كلمة تكتبيها لنا
ربنا يبارك فى حضرتك ويعطيكى الصحه والعافيه اللهم امين

تحياتى ليكى
انوسه

GiGi world يقول...

بجد البوست ده جميل قوى
كله حب واتباط وعلاقات انسانيه بنتمناها كلنا
يارب يرزقنا دايما صلاح القلوب
دعواتك ليا بجد

mohamed ghalia يقول...

ربنا يسعدك ويكرمك ياماما ودايما كده بينا

rovy يقول...

الف حمد لله على سلامك و يارب دايما فرحانه و دايما منوره التدوين
جميل جداا اسم البوست على فكره :)
طبعا افتكرتينى اكيد و انتى بتكتبيه :)
ربنا يسعد قلبك و يطمنك على ابنتك الحبيبه و يبارك لك فيها و تقوم بالف سلامه هى و البيبى ان شاء الله ..

دمتى فى رعاية الله

تحياتى دوما

mimi يقول...

أحمد احتل التعليقات كالعادة

بدونة الحياة اكيد قهوة سادة

mimi يقول...

صديقتي العزيزة

حمد الله علي السلامة ... ربنا يسعد أوقاتك كلها يارب

mimi يقول...

ثندر ... عازماك علي مكرونة ... اللي أنت بتحبها وأوعي تزعل نفسك ... أبداااااااااااااا

mimi يقول...

المدونة قلبت مطعم وكافيه

شاي ومانجة وبسبوسة ومكرونة

طيب ... تلت نيفة وربع شيش علي حساب حضرتك بقي ... ومش تنسي اللبيبسي حبيب قلبي

ههههههههههه

وحشتينا وعلي رأي أحمد

أجازاتك .. قربت تخلص ... السنة لسة فيها أيام كتير جاية

اسماء واحلام فى وجدانى يقول...

فى حاجة غريبة انا حاسس بيها هنا

رحلتنا في الحياة يقول...

ربنا يسعدك ايامك كلها ياماما يارب ودايما حواليكى كل الناس اللى بتحبك وبنتك طبعا عندها حق تزعل انك هتسبيها وتمشى انا لو منها هقفل عليكى ومش هطلعك ابداااااااااا من الشقة هههههه
الحمد لله انك نورتى المدونة من تانى ربا يخليكى لينا يااااااارب

رحلتنا في الحياة يقول...

كل سنة وانتى بالصحة والسلامةورمضان كريم عليكى ياااااااااارب

موناليزا يقول...

ربنا يقوم بنتك بالسلامة
ومبسوطة بجد بانك وفقتى راسين فى الحلال
ايوة كده ربنا يكرمك لاحسن الشيطان شادد حيله اليومين دول والناس عمالة تطلق
عايزة بوسة كبيرة يا اطيب قلب:)

thunder يقول...

كل سنة وحضريتك طيبة يااااااااااارب ياامى

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
اولا حمد الله على السلامه
ثانيا ربنا يقوم بنتك بالف سلامه ان شاء الله
والحمد لله ان حضرتك انبسطتى فى اليومين دول
وان شاء الله تكون ايام حضرتك كلها سعادة وفرح
تقبلى مرورى وتحياتى
والسلام عليكم ورحمة الله وبركاته