الاثنين، ٣ أغسطس ٢٠٠٩

الصدق....ولا غير الصدق

السلام عليكم ورحمة الله وبركاته

بداية اهنىء كل ولادى هنا واخواتى بالنصف من شعبان ....كل عام والجميع بخير...
وربنا يبارك لنا فى شعبان ويبلغنا رمضان ونحن جميعا فى خير وسعه وراحة بال ورضا من ربنا....امين يا رب العالمين
وان غدا تبدا الايام القمريه ...وان ربنا يقوينا لصيامها ان شاء الله
وان اعمالنا بتاعة السنه كلها هاتطلع السماء ونبدا عام جديد بكتاب جديد
ورسول الله صلى الله عليه وسلم قال ( احب ان يصعد عملى وانا صائم )
يلا نشد من عزيمة بعض ونحاول نصوم علشان يطلع كتاب عملنا واحنا صايمين وينزل كتابنا الجديد واول حاجه فيه اننا صايمين بأذن الله

تانى حاجه كنت هاتكلم فيها ان فى سؤال جالى من حبيبة قلبى ايناس وكنت مأجلاه لغاية قبل رمضان علطول...لكن فوجئت بان ايوش الجميل هى كمان بتهدى الى هذا السؤال الصادق من القلب الطيب...
ولقيت ان دا احسن وقت اجاوب فيه وانى اختم اعمالى فى كتابى بيه وان اكون صادقه مع الله ومعاكم ومع نفسى
واتمنى ان ربنا يجعله فى ميزان حسناتى ...لانى فعلا بحب الصدق...بس للحق اقول ان التعامل مع البشر بيغيرنا ويجعلنا نتلون معهم حتى نصل لحقوقنا وخدوا بالكم من حقوقنا....فقد اصبح الحق مظلوما وضائعا فى وسط بشر نسيوا ربنا....لكن بنعمة الله وفضله قلوبنا لاتتغير لاننا نستعين بالله على الظالم ويجيلنا يمين نروحله يمين ..ويجلنا شمال نروحله شمال لغاية ماناخد حقنا من عنيه....وربنا بقا يديله على قد نيته
عموما مش دا موضوعنا
موضوعنا انى هنا هاجاوب على السؤال ان شاء الله
وانى بعد كدا فى اجازه لغاية العيد بأذن الله
وهاقولكم من دلوقتى كل سنه وانتم طيبين بمناسبة رمضان ان شاء الله ويعيده علينا ربنا بالخير واليمن والبركات والهدى والصلاح والفلاح وتقبل الاعمال باذن الله
وممكن احد ابنائى يقولى لسه بدرى يا ماما هاقول وارد لا مش بدرى ولا حاجه
لانى عايزه اسخن قبل رمضان استعدادا لرمضان...زى بتوع الكوره قبل الماتش
لانى طبعا عارفين المفاصل عايزه تزييت... والعقل عايز تربيط ...والقلب عايز تجديد...
وطبعا دا كله محتاج وقت وتركيز
اعاننا الله واياكم على قيام رمضان ايمانا واحتسابا لوجه الله الكريم
ودا مايمنعش ان من حين الى اخر هاقولكم سلام عليكم واطمن عليكم بكلمه صغيره.....وممكن يعنى انى اقرا مدونه ولا اتنين من باب دفع الملل وتجديد الحياه

نيجى للسؤال اللى بيقول ..........: اذكر 10 اشياء صادقه فى حياتك

1 ...المصحف بتاعى...احب كتاب واجمل صديق واقرب الى قلبى من ولادى والدنيا كلها.....ربنا مايحرمنيش قراءته والنظر فيه حتى اخر نفس فى عمرى

2 .....بيتى ..هو واحة الصدق والاحساس بالامان ..اول مابدخله بحس انى بعدت عن شرور العالم وبتمنى انى افضل فيه ماخرجش منه الا الى لقاء الله

3 ....القنوات الدينيه على الفضائيات....حقيقى بتسعدنى عندما ارى بها شباب الدعاة امثال شريف شحاته.. ومصطفى حسنى ..ومعز مسعود..والدكتور محمد عطيه...وامام مسجد النور بالعباسيه...وكمان من يومين كان فى شاب داعيه على قناة نورمينا الاردنيه...بس بجد تحفه ربنا يكتر من امثاله...وغيرهم كتير ومانساش طبعا ابو قلب صافى :محمود المصرى... والحوينى ...والباسم ::حسين يعقوب.... والجاد جدا::محمد حسان

4....صورة فرح بنتى وجوزها...بحبهم قوى وبفرح بيهم لان بنتى كانت سعيده جدا يوم فرحها وجوز بنتى امور كدا وزى العسل

5....مصليتى... زمان كانت صادقه معايا :لانى كنت بحب الصلاة والسجود عليها....لكن دلوقتى مش بقدر وبصلى وانا قاعده على كرسى الصالون...لكن اعمل ايه بحبها لان لى ذكريات حلوه معاها

6.....دفتر مذكراتى وقلمى الرصاص ال( 9 ملى)...مازلت احبهم ..رغم انى مدونتى احتلت جزء كبير من حياتى...ولكن قلمى اكتب به مالا استطيع البوح بها الا لربى فقط

7.....حبى لزوجى الله يرحمه......:مازلت احبه واتمنى رجوعه..ودا مش من فراغ...دا لانه كان الحنان فى حياتى والضحكه الحلوه ...ولانى خدت منه حنان ماخدتوش من اهلى.... وربنا يجمعنى انا وهو فى الجنه وذريتى .... اللهم امين

8.....مرتبى ومعاش زوجى:...بفرح بيهم لانهم نتاج فضل الله على انا وبناتى ولانى قدرت اعلم ولادى وازوج بنتى من غير ما مد ايدى لحد.....ولانه من ريحة جوزى حتى الان وكانه جنبى وبيدينى مرتبه كل شهر وكأنه مابعدش عنى وعايش معانا
وفى حديث قدسى لله عز وجل (مؤمنه بيه اشد الايمان ..عن تجربه) بيقول فيه :انظروا يا عبادى لبيت فيه يتيم..ان وجدتوه معزز مكرم :فملؤا البيت بركه ..وان وجدتوه مهان :فاملؤا البيت حسره وفقر.....والحمد بفضل الله كان بيتى مملؤا بالبركه

9....العمل الصالح ....مهما كان نوعيته ....واتمنى من ربنا يعيننى على العمل الصالح... ودايما يدلنى عليه

10.....بناتى :ودول اجمل حاجه فى حياتى..ولو ان ربنا سبحانه وتعالى قال فى كتابه الكريم: (المال والبنون زينة الحياة الدنيا)ثم اكمل والباقيات الصالحات خير عند ربك ثوابا وخير املا...وكمان قال::( ان من ازواجكم واولادكم عدوا لكم..فاحزروهم)
ودا معناه انى بخاف من ان حبى لهم يعطلنى عن مرضاة الله....بس الحمد لله هما عارفين حبى لله وبيسا عدونى وبيساعدوا نفسهم على طاعة الله اكتر واكتر..اللهم لك الحمد والشكر
و بدعى ربنا يخليهمولى ومايحرمنيش منهم... ولما اموت يكونوا جنبى وبيطبطبوا عليا وبيقروا (سورة ياسين )..علشان ربنا يرحمنى عند مماتى.. ويخفف عنى سكرات الموت

كدا خلصت الحمد لله....ودا مش معناه ان دول هما الصدق فى حياتى وبس .....
الحمد لله فى حياتى صدق كتير...
وبفرح قوى انى صادقه مع ربنا اولا وقبل كل شيء
وانى صادقه معكم واحب افضل كدا من غير احراج من حد

نيجى بقا للاهداء
اهدى هذا السؤال لابنائى واصدقائى واخواتى
احمد (الهامى 2 ).....ثندر

معتصم....................اكيد

جيجيى والعالم...........فكره من الزمان دا

ورده......................بندقه

محمد غاليه.........حنين(مدونة الضاحكون )

الطائر الحزين..........همس الاحباب

نهر الحب...............مونليزا

روفى..................ميمى

يويو................انجى ابراهيم(هات من الاخر)

حماده عفشه......طوبه فضه وطوبه ذهب

ام احمد المصريه........صاحب مدونة صمت الحنين

صاحب مدونة القدر وانا.........صاحبة مدونة يوميات عانس

نعكشه (التى احبها وهى زى ماهيا)......ياسمين صاحبة مدونة انسانه


ودا طبعا مش اجبار على احد...وياريت تعتبروه حب منى اليكم...واللى يجاوبه ياريت يبعتلى دعوه لقراءته وقت مايحب هو يجاوب
وكل الناس اللى بيحبونى وانا بحبهم من غير ماعرفهم
لانى بحب الناس الطيبه كلها

والى لقاء دائم لاينقطع ابدا الى ماشاء الله

هناك ٥٤ تعليقًا:

رحلتنا في الحياة يقول...

اول تعليق:)

رحلتنا في الحياة يقول...

وتاااااااااااانى تعليق ليا

رحلتنا في الحياة يقول...

وتالت تعليق لثندر دى توصية

رحلتنا في الحياة يقول...
أزال أحد مشرفي المدونة هذا التعليق.
رحلتنا في الحياة يقول...

اروح اقرا بقى :)

رحلتنا في الحياة يقول...

هو البوست فين مش ظاهر ليه عندى بس :(

yoyo يقول...

ماشى يا ست آيوشة
ناس بتعتمد على نفسها وتجى بقى مواصلات
ومش عارف توك توك ايه و عجلة ايه
وانتى جاية تحجزى
يالا برده لنا رب اسمه الكريم

yoyo يقول...

ماما
ست الكل
افهم من كدا ان حضرتك حبيتى تعرف اد ايه احنا صادقين مع نفسنا
ومحتاجة تشوفى هنقول ايه
لان البوست بس مجرد عنوان
الا انه بييحمل الكتير و الكتير من الكلام

yoyo يقول...

الصدق
لو الانسان كان صادق مع نفسه
اكيد هيكون صادق مع الاخرين وهيكون فى نوع من الاحترام و التواصل الراقى
لكن ازاى هاكون انا مش صادقة مع نفسى وهاقدر اتعامل واطلب الصدق من غيرى
يبقى لازم الاول ابدا بنفسى و اتسامح معاها و اكون صادقة معها ولها
ومن بعد كدا ابدا باللى حواليا

yoyo يقول...

ماما
عدم وجود موضوع فى قلب البوست شىء غريب
يارب تكونى بالف خير يارب
ياريت حضرتك تطمنينا عليكى يارب
دمتى بالف خير و صحة
بنتك
يويو

الفراغ يقول...

ايوش ويويو حبايبى

انا اسفه جدا على سوء الفهم اللى حصل غصب عنى
يظهر انى ضغط على زرار غلط من غير ماخد بالى بعد كتابة العنوان
ولم انتبه لذلك الا بعد نشر الموضوع

واسفه انى تعبتكم معايا
وهاحجزلكم التعليقين التالييين بعد منى ليكم انتم مخصوص
والى لقاء

الفراغ يقول...

تعليق ايوش التوصيه
المكان هنا محجوز ونرجوا عدم الاقتراب او التصوير

الفراغ يقول...

التعليق هنابتاع الابنه الغاليه يويو
ولو حد قرب هاضرب علطول بعصاية الاستك
وقد اعزر من بنجر
انا بقول اهو

اسماء واحلام فى وجدانى يقول...

كل سنة وحضرتك طيبة

ورمضان كريم

اسماء واحلام فى وجدانى يقول...

حضرتك بتحجزى ليويو

حاضر

انا بقى باحجز

لوردة

والبادى اجمل

اللى هو حضرتك طبعا

اسماء واحلام فى وجدانى يقول...

صفحة التعليقات دى ستشهد حرب اهلية من الدرجة الاولى

حد يقولى ليه

طبعا يا جماعة لان البوست ده هيكون البوابة الوحيدة اللى هنقدر نطمن بيها على الانسانة الطيبة صاحبة المدونة دى

طب حد يقولى وانت مالك

طبعا الحد اللى هيقول كده اكيد هيفطر عشرة ايام فى رمضان

واحد يسالنى ازاى وليه

ارد واقوله لان اللى هيحصل فيه منى هيكون صعب جدا واكيد هو عارف ليه مش هيقدر يصوم

حد يقولى فى حد يعمل كده
وهو داخل على رمضان

طبعا مش هارد عليه الا بكلمة صغننة وهى
روح شوف الاخ اللى اتكلم قبلك

ها
فى حد عنده اى استفسار

اسماء واحلام فى وجدانى يقول...
أزال أحد مشرفي المدونة هذا التعليق.
اسماء واحلام فى وجدانى يقول...
أزال المؤلف هذا التعليق.
الفراغ يقول...

ايوش...واحمد(الهامى 2)
حاولت اعمل شيء غريب ومانفعش
حاولت انقل تعليق احمد مكان الحجز اللى ايوش حجزتهوله
لكن لم تنجح المحاوله انا اسفه على اللى حصل
وياريت تكتب التعليق تانى يا احمد
لانى خدته كوبى وراح منى برضه
معلش بقا
لعب امهات شقيه
وعلى فكره بقا انا حجزت لايوش ويويو علشان ايوش كانت حجزالك
وانت طبعا مش محتاج توصيه
لا انت ولا ورده
والى لقاء قريب لما تجاوب السؤال يا شاطر

همس الاحباب يقول...

اولا
كل سنة وحضرتك طيبة
ورمضان كريم عليكى باذن الله
وبعدين اجابتك جميلة قوى وصادقة ونابعة من قلب صافى
ربنا يكرمك وما يحرمناش من حضرتك

همس الاحباب يقول...

وبعدين ايه الاحتلال ده يا جدعان
هو الواحد ينشغل شوبة يجى يلاقى الاولاد عاملين كده
عامة سماح المرة دى

اسماء واحلام فى وجدانى يقول...

اللى اقصده من موضوع الحجز ده اننا كلنا نكون فاكرين بعض هنا انا افتكر وردة ميمى ثندر يويو ايوشة فكرة علياء ايناس هناء نهر الحب لان ساعات بيكون فينا حد مشغول وبيقا صعب انه يكون موجود اينعم ممكن نلاقيه عامل بوست جديد بس علشان يقول للكل انه موجود ده غير متاعب الحياة نفسها
فبيبقا شىء جميل انه لو اتاخر واول ما يجى يلاقينا فاكرنه

اسماء واحلام فى وجدانى يقول...

ايوشة

اشكرك على التعليق الرابع اللى انتى حجزتيه ليا وشكلك حجزتيه تحت تهديد القطط علشان كده راح وبح خلاص

بس بردة ربنا يخليكى والقطط تهددك دايما

وكل سنة وانتى طيبة ويارب رمضان يغيرك ويخليكى تحبى القطط والله دى كائنات رقيقة جدا وعضتها بسيطة يعنى يا دوب 3 شكات وتخفى على طول
طبعا بعد الشر عليكى
الكلام ده لو حضرتك فكرتى تايذيهم زى العادة

ايوشة

رمضان كريم وكل سنة وانتى طيبة

نهر الحب يقول...

السلام عليكم ورحمة الله وبركاته
إزيك ياماما والله حتوحشينى لحد العيد
كل سنة وأنت بالخير دائما وبصحة جيدة وأعاد الله عليك رمضان بالخير واليمن والبركات,وربنا يخليكى لينا ويخليكى لبناتك يارب,اللهم أمين.
إجاباتك جميلة فعلا تنم عن مشاعر صادقة ووفاء وحب وتقدير شديد لزوجك أعانك الله وصبرك على فراقه ولحقكى به فى الجنة بإذن الله.
أدام الله عليك حسن العبادة,وأشكرك على غهداء السؤال لى ولكنى سبقتك وجاوبت عليه.

كل سنة وأنت بخير دائما

دمتى بالخير ياماما


نهر الحب

طوبه فضه وطوبه دهب يقول...

allah 3leky ya agmal om tslm adeky nfsy bs a3ml asra rb3 ely 3mlteha wawsl wlo gozaa mn el wasltelo rbna ykrmk wyzedk sadk m3a nafsk wkorb leh wkhshya logho blla 3leky ad3ely m3aky ya agmal om

♥نبع الغرام♥♪≈ يقول...

وحشتنى قوووووووووووووووووووى ياقمر ى
والله بجد بفرح لما بلاقى لحضرتك بوست يا اغلى واحن ام بالدنيا كلها

بحبك قووووووووووووووووووووووووووى

♥نبع الغرام♥♪≈ يقول...

احم احم وكمان اجازه لبعد العيد ان شاء الله تعالى بجد كده حرام
عااااااااااااااااااا

تسيبينا كل ده يا حياتى

لالالالالالالالالالالالالالالالالا
انى احتج قووووووووووووووى

حضرتك لما بتغيبى عننا شويه صغار بجد بموت من القلق عليكى يا حبيبتى مابالك من الوقتى لحد العيد ياااااااااااااااااااه

كتير علينا قووى بجد
لالالا طب ادخلى طمنينى عليكى بجد حتى بأى كلمه بالله عليك

والله بحبك قووووووووووووووووووى

♥نبع الغرام♥♪≈ يقول...

ربنا يديكى الصحه والعافيه
يارب وكل سنه وكل شهر وكل يوم واسبوع وثانيه وحضرتك بكل خير ويجعله رمضان سعيد علينا يارب

اللهم امين يارب

وربنا يشفيكى ويعطيكى الصحه ويقوى ايمانك يا امى ويجعل بكل حرف كتبتيه بميزان حسانتك يارب العالمين

دمتى بكل خير

♥نبع الغرام♥♪≈ يقول...

امى الحبيبه

بجد محتاجه منك طلب

بالله عليكى تدعليلى من قلبك الطاهر النقى الجميل انا فى حد جميل قووى فى حياتى وبنحب بعض قووووووووووووووى ونفسنا حلمنا يتحقق بالله عليكى ادعيلى من كل قلبك
يارب يحقق حلمى ويكون الايام دى يارب

بحبك قوووووووووووووووووووووى
انوسه

الفراغ يقول...

الهامى 2
كل سنه وانت طيب وبعوده الايام
والحجز اللى انت بتعمله طبعا فاهمه قصدك منه بس انا حبيت انه يكون مليان مش حجز بس




همس الاحباب
كل سنه وانت طيب...واشكرك على الاطرا ء على اجابتى
ويارب تفيد اى حد
ولكنى اراها فضفضه
والحمد لله انها مع حبايبى



نهر الحب كفايه انك تردى عليا هنا
لانك انسانه جميله وقلبك جميل
وكل سنه وانت طيبه


طوبه دهب وطوبه فضه
اشكرك على الكلام الحلو دا
وبدعيلك بالسعاده ورضا الله
وكل عام وانتى بالف خير وصحه انتى وكل حبايبك وربنا ينولك اللى فى بالك ويحققلك كل امالك وتكونى اسره تسعدك وتسعديها
قولى امين



ايناس بس من غير احزان
وانا بفرح بيكى عندك وعندى وفى كل مكان الاقيكى فيه
وانا فعلا قلت كدا يا ايناس انى هادخل اطمن عليكم واكسر الملل واقرالى مدونه ولا اتنين لو لقيت يعنى حد كاتب جديد
ماتقلقيش انا معرفش خلاص اعيش من غيركم

ويارب يارب يا ايناس يجمع شملكوا على خير ونفرح بيكم قريبا ببركة الايام الجميله دى
بس انتى صومى تقربا الى الله الايام القمريه دى وربنا ان شاء الله هايحقق املكم بانه وحده
وقال رسول الله صلى الله عليه وسلم
(ليس للمتحابين الا النكاح) اى الزواج
والله فرحتى قلبى
ربنا يسعدكم..وتفرحونا اكتر بالخطوبه قريبا قريبا قريبا علشان ربنا يبارك فيكم ولكم
واحنا نبارك لكم واكون اول من يهنى

mohamed ghalia يقول...

كم هو رائع الصدق فى حياتك
ربنا يسعدك دايما ياماما

رحلتنا في الحياة يقول...

اخيرا البوست ظهر ربنا يكرمك يااطيب قلب بجد ماشاء الله اجمل اجابات محدش طبعا كان هيقدر يجاوب الاجابات دى الا حضرتك ربنا يزيدك ايمان وقرب ليه يااااااارب وربنا يخليلك بناتك اللهم امين يارب العالمين ويقر بيهم عينك
وربنا يجمع حضرتك وزوج حضرتك باذن الله فى الفردوس الاعلى باذن الله
بجد والله االاجابات تخلى الانسان يخجل من نفسه ويحاول يعيد تفكيره من تانى
كل سنة وانتى طيبة ياست الكل



احمد انا مش هحب القطط ابدااااااا دول اعدائى الى اخر العمر ولا شكر على واجب بخصوص حجر التعليق كل سنة وانت بالصحة والسلامة

جارة القمر يقول...

دمتي بكل الخير

ما اجمل صفاء وصدق روحك

رائعة انتي ياسيدتي


احترامي

akeed يقول...

ربنا يبارك فيكى و يحفظ اولادك و يرحم زوجك و يجمعك به فى الجنه ان شاء الله و تعودى بالسلامةان شاء الله

اسماء واحلام فى وجدانى يقول...

بقى



انا



محتال

الفراغ يقول...

محمد غاليه
كل سنه وانت طيب
واشكرك




ايوشه
ياه انتى بتدينى اكتر مما استحق يا ايه
دانا بحاول بس بفضل الله انى اواصل ومابعدش عن الطريق الصح
ربنا يقوينا ويرضا عنا وكل سنه وانتى والاسره طيبه


جارة القمر
اشكرك وكل سنه وانتى طيبه
بس نفسى اعرف انتى رايحه فين وهاتبعدى عننا ليه
يارب يكون كل الامور بخير



اكيد
منور والله
وكل سنه وانت طيب

الفراغ يقول...

احمد(الهامى )
هههههههههههههههههههه
استفذك الرد عليك
ايه رايك مش رد جديد؟!!!!!!!!
اسمحلى ااقول اللى فى نفسى
مع ان الرد مفروض يكون فى مدونتك مش هنا
لاننا بنتكلم عنك
أقرأردى عندك

HaMaDa 3aFshA يقول...

السلام عليكم امى
الحمد لله انك بخير وادام الله عليكى النعم ورفع عنكى النقم وبارك لك فى شعبان ورفع لك عملك وهو راض سبحانه غير غضبان وتقبلك فى الصالحين وكتبك فى الصديقين والشهداء واعلى مقامك واعز مكانك
عذرا على تأخيرى وانشغالى ولكنى والله لا ادخل البيت هذه الفترة لايام متواصلة التدريب والعمل والمنزل فى تلت محافظات اتهريت سفر ادعيلى بالتوفيق والسداد والنجاح امى
هجاوب على سؤال حضرتك قريبا انا واخد اجازة يومين بس اودى الحاجة ام فتحى للدكتور نطمن عليها وافضالك ادعيلها بقا دى من اصدق الحاجات فى حياتى
سلامى وتحياتى

اسماء واحلام فى وجدانى يقول...

والله انا لو محتااااااااااااااال

تبقى الحلوة اللى بحبها

زعيمة عصابة

لانها ببساطة كده قدرت تسيطر على قلب محتال ومش اى محتال ده محترف احتيال تصورى حضرتك كله اتكلم على انى محتال ونسيوا المحتالة اللى خلتنى كده
عجبتك لك يا زمن
انا المظلوم
وتقوله عليا الظالم

اسماء واحلام فى وجدانى يقول...

قلبى وعقلى وروحى
يتسرقوا منى قصادكم وتقوله عليا محتال

كلمات من نور يقول...

بن باز رحمه قال أن الاحتفال بليلة النصف من شعبان باطل لا أساس له في الشرع ولم يحدث أن احتفل به رسولنا المصطفى أو صحابتنا ومشايخنا

لذلك أتمنى من الله ألا نقع في هذه البدعة فنأثم كما يأثم الكثيرون

رمضان كريم للجميع إن شاء الله

♥نبع الغرام♥♪≈ يقول...

السلام عليكم

وحشتنى قووووووووووووووووووووى

داعواتك ياغاليه ليا بالله عليكى


انا جايا اطمن يا حبيبتى واسلم على احلى ام بالدنيا كلها

ربنا ما يحرمنى منك يارب

ويشفيكى ويديكى الصحه قادر ياكريم

بحبك قووووووووووى
كل سنه وانتى طيبه

موووووووووووواه

الفراغ يقول...

حماده
الف سلامه على الحاجه ام فتحى
وربنا يقويك يا بنى والله
صعبت عليا بجد ..3 محافظات..دا كتير قوى
عموما اجازه مريحه ان شاء الله
ونلتقى على خير

الفراغ يقول...

ابنى الغالى
احمد
دا اجمل خبر سمعته يا احمد عنك من يوم معرفتك
فين هى الحراميه اللى قدرت تسرق قلب احمد
عرفنى عليها علشان اشكرها
ومين قال عليك مظلوم
انت كنت ظالم لقلبك وروحك
لكن دلوقتى بدعيلك بكل السعاده اللى فى الدنيا يا احمد
من قلب ام بتحبك وتتمنالك كل الرضا والهنا
اللهم امين

الفراغ يقول...

كلمات من نور
جزاك الله خيرا
مافيش احتفال بالنصف من شعبان ولكنى اصوم لترفع الاعمال وانا صائمه
وليتقبل الله منا
امين يا رب العالمين

الفراغ يقول...

ايناس
بدعيلك والله فى الفجر وعند الافطار وربنا يتقبل اللى فيه سعادتك والخير لمستقبلك

ماتحرمش من سؤالك ابدا يا ايناس
ويملا قلبك دايما بحب خطيبك وزوج المستقبل ان شاء الله

rovy يقول...

بارك الرحمن فيكى غاليتى و بارك لكى فى بناتك يارب و رحم زوجك الغالى و جمعك به بعد عمر مديد فى الجنه ان شاء الله
اجابات رائعه سيدتى .. احسست صدقها فأحببتك و احببت اجاباتك الصادقه ..

اشكرك لأنك تذكرتينى فى اهداء التاج او السؤال ..فهذا شرف لى و يسعدنى و اتمنى حقا ان اجاوبه لكنى استأذنك الى ان تمر هذه الفتره التى اشعر بها ببعض اللخبطه فى حياتى حتى يصفو ذهنى و استطيع التركيز و الاجابه بصدق مثلك عزيزتى الغاليه .. دعواتك لى بأن يعيننى الرحمن و ان اهتدى الى ما فيه الخير فيما يشغلنى ..
كل عام و انتى بالف خير و انتى الى الرحمن اقرب و على طاعته اقدر ..

خالص تحياتى دوما

HaMaDa 3aFshA يقول...

امى الغالية الحمد لله ان حضرتك بخير
هو حضرتك بتفتحى الميل امتى؟
عاوز اتكلم مع حضرتك عشان اليومين اللى بالى بالك ههههه
محتاج رأيك امى عشان شخصيتى تحتم عليا الا ابوح بما فى قلبى
وفعلا محتاج النصح الايام دى
تحياتى

اسماء واحلام فى وجدانى يقول...

امى الحبيبة

تفتكرى انى ممكن ازعل من ميمى باى شكل من الاشكال تعرفى ان مفيش شىء ممكن يزعلنا من بعض لاننا عرفنا بعض كويس ولو تفتكرى فى تعليق ليا قبل كده قلت ان ميمى من اعز الناس وااقربهم لنفسى ازاى بقى هازعل منها
قلت لميمى منك لله وكنت اعنى ان لا يكون هناك حجاب بينها وبين الله كما فهمت منها وياريتنى زيها كده
انا عمرى ما ازعل من ميمى ابدا

♥نبع الغرام♥♪≈ يقول...

الله عليكى بجد والله بكيت وانا بقرء رد كلامك ليا يا حبيبتى بس تعرفى بجد محتاجه اتكلم معاكى قوووى

ممكن لو حبيتى

انا ممكن اسيب ليكى الميل

عشان محتاجه ليكى قووى بجد ممكن عشان خطرى

بحبك قوووووووووووووووووووووووووووى قووووى
منتظراكى

yoyo يقول...

ست الكل

كل سنة وحضرتك طيبة
رمضان كريم
ويارب متجمعين على الف خير يارب

yoyo يقول...

يا نهار ابيض ماما بتحجز ليا
يا سعدى يا هناى و الله
تسلمى يارب

الحمد لله اننا اطمنا على حضرتك
وطبعا اجابات حضرتك من القلب اوى
وان شاء الله هاجاوب على السؤال دا قريب
كفاية انه من حضرتك والله
كل سنة وحضرتك طيبة مرة تانية
بنتك
يويو

القدر و انا يقول...

الفراغ
اختى الحبيبة
اولا شرفتينى بزيارتك الكريمة
ثانيا عجبتنى ردودك الصافية
بارك الله لك فى كل ما تحبين
وشكرا على هديتك الغالية

شجرة الدر يقول...

السلام عليكم
انا سعيدة جدا بتعرف عليك سيدتي الفاظلة
ويشرفني ان تقبليني صديقة عندك
وسعدت جدا بتعليقك في مدونت لما لقيته
واقلك انا حسيت بقرب منك غير عادي لانك ام رائعة جداولانك ام بنات ايتام وانا يتيكة زاد شوقي لمعرفتك اكثر
اما عن اسؤال
الحجات الصادقة كثيرة جدا نذكر منها عدا لا حصرا
1-توكلي على الله
2-خوفي من ربنا مع الاخطاء وتكرار التوبة(انا بشر )) بخطء واصيب
3-ماغرسه والدي فييا من عزة نفس
4-حبي لهوايتي وهي الرسم على القماش
5-قلبي ابيض لا احمل احقاد لاحد
6-حبي لناس
7-حب الناس ليا ودي في كل مكان اروح اشوف حب الناس واعمل صدقات غير متوقعة واتأقلم بسرعة
8-هجر اجمل مكان عشا فيه طاعة لله
9-اصراري على ان لا اكون شئ زائدا في الدنيا
10- حب الجنة لكل مسلم
انا طولت عليكم واتمنى اني قدرت اتواصل معاكم كلكم من خلال هذا اللقاق
سلامي لبناتك الغلين
والف شكر مرة اخري