اهداء الى الاحباء

سلام عليكم يا كل احبابى واصدقائى
انا بكتب البوست ده مخصوص النهارده لانى فعلا فرحانه بيكم قوى
بكتبه علشان ااقولكم ان حياتى كانت فاضيه وكنت اشعر بفراغ كبير قوى
لكن جيتم انتم ومليتوا حياتى بالحب وخلتونى اشعر بانى عايشه من جديد
صحيح بنتى عايشه معايا وبنتى التانيه دايما بتسئل عليا
لكن انتم اصحابى وحبايبى اللى اخترتهم واختارونى
اللى بجرى عليهم اول مارجع من الشغل اه والله اجرى ااقول ياترى مين كلمنى النهارده وبفرح قوى من التواصل القلبى الممدود من غير ماحد يعاتب ولا يقول اتاخرت عليا لان ببساطه كدا دا مش مفروض على حد فيكم لكن هو تواصل الاحساس
وبجد نفسى اكلم كل اخ وابن وصديق وطبعا نفس الكلمه بس للاخوات والبنوتات والصديقات وفعلا هاتكلم معاكم لانى اصبحت اشعر بان كلكم حبايبى اللى عايشه بيكم ومعاكم
وطبعا اول واحد هاكلمه ابنى s.m لانه بجد دايما بيسئل عليا يارب اشوفك عريس وفرحان ونفسى تعرف انت مين لانك واحد غالى علينا واكيد على كل اللى يعرفوك
....................................................
صديقتى الغاليه بستان الحب
فعلا انت قريبه من قلبى وكلامك حسسنى ان ليا اخت تنتظرنى لما اكون محتجاها لانى فعلا محتاجه الحب ده
يارب يخليكى ليا
................................................
اخى وصديقى بيرم المصرى
ماعدتش بقدر انتظرك كل خميس لازم تكون معانا يوميا كلامك اصبح هو الدواء اللى بيشفى القلب
نفسى نقرأ لك عن الصداقه وعن تحمل الحياه اليوميه
اعزرنى نفسى اجدك معايا فى زحمة الحياه والمواصلات والمعاناة فى العمل
ورجاء خاص تكتب وتضمد جراح المحرومين من حب اخوتهم وابائهم
..............................................................
اما اخى وصديقى الطائر الحزين
اللى ماكنش ليا غيره اول ماعملت المدونه فله ودى واحترامى وربنا مايحرمنيش من وجوده عندى دائما
بس بقوله كانت مفاجأه انك انت صاحب مدونةالضاحكون بجد مدونه جميله جدا وحبيتها من اول نظره ويارب دايما تستقبلنى هناك
.........................................
بنتى الغاليه مونليزا
دخلت مدونتك فاحببتها ارتاحت روحى عندك فانت كماء زلال يروى العطاشى فى حب الله والتقرب اليه
انت كالمسك يعطر الابدان ويغسل جراح المعذبين من الحياة
انت كبلسم يطبطب على القلوب المتعبه
مدونتى تعانق مدونتك وتتمنى ان نكون معا فى الطريق الى الجنه
...........................................................................
اخى المعتصم
وقفت بجوارى عندما احتجت لمن يشعر بجراحى وجراح تؤام روحى
بجد اعتز بك صديق واخ وربنا مايحرمنيش منك
..............................................................
بنتى العزيزه بندقه
اول من علقت عندى وفتحت نفسى للكتابه وشجعتنى لما كان الناس لسه متعرفنيش
على فكره زرت مدونتك دمها خفيف قوى وقرات كمان بوستات سابقه
متحرمش منك يا دكتوره بجد نورتينى
منتظره البوست الجديد عندك علشان تسعدى قلوب محبيكىبدمك الخفيف
اول مره اعرف ان فى دكتوره دمها خفيف كدا
دمتى فى امان الله
........................................................................
ابنى الغالى سفاح كرموز اللى دايما منور عندى
وابنى الغالى محمود غاليه يارب ماتحرمش من وجودك الدائم
وبنتى الحبيبه انسانه عاديه
حبيبتى نائمه فى الارياف
الابنه العزيزه بنت خيخه ربنا يخرجها من احزانها يا رب
ولن انسى من علقوا لى ولو مره واحده وهم

اللؤلؤه____محمود طه__ كلام على بلاطه___ حاجات جوايا ___ ريكو___نودى 1987___البنت المشمشيه______ادم المصرى __الفقيره ام البنات____رومانسى_____زينب المسلمى__عابرة السبيل
.......................................................
ابنائى واحبائى
خليتوا لحياتى معنى ولون يارب ماتحرمش منكم
ولو فى يوم غبت عنكم غصب عنى
يارب دايما تفتكرونى بودكم وعطفكم
سامحونى وجعت دماغكم
يظهر انى رغايه بس دا من كتر حبى ليكم
سلام عليكم

رحمتك يا رب

ياترى يا هل ترى دا حلم ولا علم
جائتنى تجرى وتنتحب دموعها تغرقنى وقلبى يلفها برداء من الحنان الطاغى انى لا اطيق الدموع
دموع البراءة فقط فانى اشعر بالدموع المزيفه
صديقتى توائم روحى بئر اسرارى اه من دموع الاحبه خاصة عندما لايكون لك احبة غيرهم
هدات الدموع وان كان فى العين بقية دمعة تترقرق لامعه واهة كبيره تشعرك كما لو كان اعزة الناس قد ولوا واندثروا
ولكنى اقول لها لا يا حبيبتى ففى الدنيا احباء مازالوا على العهد باقين
فلتبكى وتنتحبى فلن اسئلك مايبكيكى الا عندما تهدأين
قالت والقلب يبكى الم نسمع عن المثل المأثور( انا واخويا على ابن عمى وانا وابن عمى على الغريب)
قلت اه على اهاتك يا حبيبتى لقد عز الاخ وضاع ابن العم اصبحنا افراد متفرقين ولكنى معك وعلى استعداد للتضحيه بنفسى من اجلك
بكت بحرقة اكثر ابكت عيناى معها انه اخوها الذى يعلم ماعانت فى حياتها ووقفت ضد التيار ولم ترضى باهدار كرامتها من اجل المال او القرش السهل كانت تعتقد بان اخوها يمشى مرفوع الرأس بان اخته قد رفعت كرامة الاسره كلها والان جاء الوقت وانقلب الحال
انه يقف مع اعدائها بل اعدائهم كلهم يقف معهم ضدها باى منطق تباع الاخت من اجل المال باى وجه تضع وجهك فى وجه عدوى وتقول له ان اختى عبيطه ومجنونه بل انها لاتعرف مصلحتها
اه يازمن
اه يا دنيا ولكنى لن اسلم ولن انحنى ولن امد يدى لاخذ ثمن العمر وثمن الكفاح
انه ربى فقط الذى له الفضل والمنه
ولكنها تسئلنى سؤال صعب جدا على فكيف يكون عليها
سئلتنى ماذا افعل مع اخى وقد باعنى واهان كرامتى وكرامة ابنائى انى لااطيق ان ارى وجهه انى لا اعلم كيف احدثه وقد جرحنى وجرح قلبى بل انه ادمى قلبن واصابنى بنزيف الاخوه
وتركتنى وهى تقول ليتنى ماعشت ليتنى ماكان لى اخوة ليتنى ماكان لى ضمير يعذبنى
اه يا ربى من صلة الرحم المظلومه ا
اه يا ربى من اخوة الدم العقيمه
ابكوا معى فان قلبى قد بكى
ولن اجد غير يد الله ترحمنى وترحم توأم روحى
يارب يارب ليس لى الاك حبيب وليس لى اياك رحيم
وادعوك اختى ان تقولى قول رسول الله صلى الله عليه وسلم
اذا حذبك امر فلتقل(اللهم انى عبدك وابن عبدك وابن امتك ناصيتى بيدك ماضى فى حكمك عدل فى قضائك اسئلك بكل اسم هو لك سميت به نفسك او انزلته فى كتابك او علمته احد من خلقك او استأثرت به فى علم الغيب عندك ان تجعل القرآن ربيع قلبى ونور صدرى وجلاء حزنى وذهاب غمى وهمى ) الا اذهب الله تعالى همه وابدل مكان حزنه فرحا
اللهم امين وصلى الله وسلم على رسوله الكريم افضل الصلاة واتم التسليم

اهلا بيكم علشان اعديكم منى
اعرفكم ان بنتى وحبيبتى قاعده عندى الاسبوع ده وطبعا انا فرحانه بيها جدا وطايره من الفرح عقبالكم
انا قاعده جنبها طول النهار عملنا الغدا سوى وخرجنا سوى وجبنا ايس كريم فى عز البرد ادعولى دايما تجيلى وافرح بيها هى واختها علطول دا كان كلمتين وبس على ما نتقابل فى بوست جديد ان شاء الله بعد سفرها بيتها بازن الله سلام

دعوة حب

ايه يا جماعه انتو فين
بقالى اسبوع بكتب ولا حد هنا طيب ماشى
لكن انى عندى برد ولا حدش يقولى سلامتك دا يزعلنى قوى
لكن ولا يهمكوا انا اصلا بكلم نفسى كتير المهم انى اتكلم وكانى بكلم حد
عموما سلامتكم كلكم من البرد والانفلونزا وبعزركم يمكن يكون عندكم امتحانات انتو او عيالكم ربنا مع الجميع
اللهم اسئلك الشفاء فلا شفاء الا شفائك شفاء لا يغادر سقما
الحمد لله الذى لا يحمد على مكروه سواه
بس ااقولكم حاجه انا وراكم والزمن طويل
هافضل اكتب واروح عندكم اقرا لكم واعلق عندكم واحرجكم انسانيا وعاطفيا لغاية ماتيجوا عندى واستقبلكم بالاحضان وافرح بيكم
بس من دلوقتى اهلا بيكم اهلا بيكم

زهق

مش عارفه مالى زهقانه ليه سؤال غريب صح قولى ايه اللى مايزهقش الضرب اللى فى غزه والعراق افغانستان هو اشمعنى المسلمين واللى يزهق ويغيظ اكتر اننا مستسلمين وساكتين ومستحملين حاجه غريبه طيب تعالى نشوف عندنا احنا اللى يزهق ويغيظ ان فاتورة الكهربا غليت ولما تسئل وزير الكهربا يقولك علشان الناس ماتستهلكش كتير ويوفروا كهربا احترت واحتار دليلى هى دى حجه برضه طيب قول كلام نصدقه هو احنا خلاص انكتب علي وشنا العبط والهبل فكرونى بفيلم نجيب الريحانى لما كان بيحاسب صاحب العزبه على تمن الخروف حاجه تجنن تعالى كمان نشوف وسبحانه من ابدع وانشا هذه العبقريه الفذه دوروا ياخدوا فلوس من جيب الشعب المسكين ازاى قاموا طلعوا بفكره جهنميه ال ايه تجديد البطاقه كل 7 سنين غصب عنك رضيت ام لم ترضى بيناتك اتغيرت او لا هاتغيرها هاتغيرها ربنا يبارك فيك ياصاحب العقل الفذ والعبقريه اللى مش على حد ويخليك لمصر دا طبعا من ضمن ولاد الراجل اللى برضه دفعنا فلوس القمامه على فاتورة الكهربا واللى زود فاتورة التليفون واللى جابلنا اتوبيسات بصفين كراسى علشان الناس ماتقفش وقال عليها مميزه طبعا مميزه لانها معموله للتحرش الاجبارى ورحم الله الازهر والحياء والاحترام ورحم هذا الاب بابنائه الكمل اللى واخدين بالهم من اخواتهم وجيرانهم اصل قبل مايموت جمع ولاده وقالهم هاقلوكوا على سر يا ولاد ايه يا بابا انتوا عارفين مصر دى مش بلد المصريين دى بلدكم انتم والشعب دا كله خدامكم ليه يابابا اصل يا ولاد انا الحلوانى اللى بناها واللى بنى مصر كان فى الاصل ايه...........................حلوانى

اخوه يا عرب

سلام عليكم بجد وحشتونى نفسى اكلمكم تانى ونتواصل من جديد على فكره لسه النت داخل جديدالنهارده المهم كل عام وانتم بخير بمناسبة العام الجديد الهجرى والميلادى
وطبعا عمرنا ماننسى فى الوقت الحالى اننا ندعى لاخواتنا الغزاويين والفلسطينيين عموما بان ربنا ينصرهم ويرفع راية الاسلام على ايدهم ويعنيهم ويصبر الثكالى منهم ويقوى رجالهم ويرحم شهدائهم ويجعل مثواهم الجنه
بس احب اعرف اهلنا فى فلسطين انهم مايهاجموناش عمال على بطال احنا برضه اخواتهم اللى طول عمرنا معاهم ومصر ادت كتير طول عمرها رغم اننا نعتبر افقر بلد فى العرب بس عمرنا ما مدينا ايدينا لحد
ونفسى ااقول لكل اللى بيهاجم مصر تقدروا تقولولى ليه مابتهاجموش مثلا السعوديه قلب العرب واكتربقعه بنحبها فى الدنيا كلها عملت ايه السعوديه مثلا جت قدمت كام مليار لمصر اللى بتقولولها حاربى معانا فين دنانير الكويت ولا مصر دايما اللى مكتوب عليها الغلب ولازم نفضل محتاجين وفقرانين وهما عايشين بيلعبوا بالفلوس لعب وعند الفقير فى بلدهم بدل العربيه اتنين والله مش بحسدهم
لكن احنا دفعنا كتير من حياتنا ومن ولادنا وشبابنا واخواتنا وابائنا فى كل الحروب اللى فاتت
يا عرب احنا مش الحيطه المايله ليكم احنا هانفضل طول عمرنا احسن ناس ان شاء الله
واخر كلمه هاقولها ومن غير زعل انتو بتهجمونا علشان مابنديش ريالات لكن عندنا احسن رجالات واذا كنا اخوه وعرب صحيح يبقى لازم اللى يقدم حياته اخوه يدفع تمن سلاحه ولا اييييييييييييييييييييييييه

بسم الله الرحمن الرحيم ازيكم وحشنتونى ومبسوطه جدا ان النت لسه موجود وانى ااقدر اتكلم معاكم
بجد انتم فين بشكر قوى اخويا الطائر الحزين لانه سئل عليا وكان نفسى يقولى اخباره ايه يا رب يكون بخير وكمان بسئل فين بقية اخواتى وولادى وبعتذر والله جدا ليكم كلكم انا ماكنتش اقصد انى خلاص بقول وداعا انا كنت اقصد ان النت كان بيقطع لفترات طويله
ودا كان مخوفنى انى معرفش التقى بيكم تانى فقلت اسلم عليكم بدرى بدرى لاحسن ماشفكوش تانى بس خلاص .
المهم بقى موضوعنا النهارده تاعبنى قوى تعالوا احكموا معايا: انا وانت وغيرنا الناس الطيبه يسامحوا لغاية فين؟
انا عن نفسى ووالله مش بشكر فى نفسىبحب انى اسامح وخصوصا مع اللى بحبهم )ماهو مابعرفش اعيش من غير حبهم يبقى ليه اشيل منهم( ( طبعا هما هنا بيطمعوا فينا اكتر وساعات مابيهموهمش زعلنا من فرحنا ! طيب لما الموضوع يزيد عن حده والزعل يكون كبير شويه
نعمل ايه نسامح برضه
عارفين الحقيقه انى ماسامحتش وكانت النتيجه ان معدتى بعيد عن القارىء اصبحت ملعبا للغثيان والالام ولا عارفه انام ولا اصحى واكتئاب فظيع والاكل ماكنش بيدخل معدتى باليومين والتلاته وان اكلت فيدوبك ملعقة ارز وطبعا لم تتحسن حالتى الا بقراءة القرءان
واية الكرسى واناللى مزعلنى مايقصدش واكيد هايتاسفلى واننا مش واخدين من الدنيا حاجه الا الكلمه الحلوه وبخت من سامح وكلام من
دا كتير بقوله لنفسى طبعا بس على مين معدتى حالفه مية حلفان ابدا لاتراجع ولا استسلام والشيطان حسبى الله ونعم الوكيل
مش عايز يبعد عنى
اعمل ايه هو انا اتغيرت؟ يعنى بقيت شريره؟! ولا ايه اللى حصل؟ بجد نفسى اعيش الهدوء النفسى والطمئنينه الروحيه
نفسى ارجع اعيش فى سلام دائم مع معدتى ومع من احبهم ولا استطيع العيش بدونهم
قولولى تعملوا ايه لو كنتم مكانى بعد الشر عنكم