الخميس، ٢٣ أبريل ٢٠٠٩

عالم من التدوينات..الاخلاص دليلها

بسم الله الرحمن الرحيم
احبتى فى الله
لم اكن اعلم ان موضوعى السابق سيكون له..رد الفعل هذا
مابين مؤيد لغضبى ..وبين مندهش منه..وبين رافض له
وكثيرين قالو ان الموضوع لا يستاهل كل هذا الغضب

وانا اتسائل دلوقتى ..ازاى؟؟؟
اذا كان التاج اللى لف المدونات كلها ..غالبيتهم: اجابوا على سؤال : مااهمية النت لك..بانه كل حياته
وماأهمية المدونه:بانها بتربطهم بالعالم وبتخلى لحياتهم معنى

طيب لما ازعل بقا من حبايبى..يبقى ليا حق
لانى بحس هنا ان بقا ليا اهل وابناء واحباب
صحيح لم نراهم وجها لوجه..ولكن نراهم بقلوبنا..بعقولنا..بعيوننا..باسماعنا
ولا يعنى هما المكفوفين والصم والبكم ..ماينفعوش يكلمونا ويشوفونا
اكيد بيحصل بس بمعاونة الاخرين حواليهم

يعنى مش لازم نعرف بعض بالجسد والشكل والصوره
احنا بنتعارف على المستوى الانسانى
وبنثق فى بعض
ويمكن حد فينا يحب التانى ..ويتعرف عليه وتصبح صداقه على المستوى العملى الفعلى
واعرف صداقه تحولت لزواج ناجح..وهذا شيء جميل..لانه حدث على مدى شهور..ولم يكن ذلك الامر فى الحسبان

ان النت والمدونات اصبحت واقع فى حياتنا لا نستطيع ان نتجاهله او نلغيه من حياتنا
اصبح كالنادى الذى نذهب اليه لنلتقى فيه مع اصحابنا وحبايبنا
وممكن جدا الا نتوافق مع الكثيرين..وممكن ان نختلف..وممكن ان يكرهك ذلك الانسان ..وانت نفسك تكره ذلك الشخص
ولكننا هنا لانكره ولا نحب من الباب للطاق زى مابيقولوا
لا
احنا بنحب ونكره بعد مانتعايش مع افكار هذا وكلمات هذه
يعنى دخلنا جوا الشخص..وخبرناه وتعاملنا معاه..وبعدين خدنا القرار

طيب لما نقابل ناس زى الذهب..وحبيناهم وحبونا
دول نفرط فيهم بسهوله ازاى؟؟ مش ممكن طبعا..لازم نتمسك بيهم لاخر لحظه

طيب لما نقابل ناس زى الالماظ.. أحترمناهم واحترمونا
دول نستغنى عنهم ازاى..مش ممكن طبعا..ولازم ندور عليهم وقت شدتهم وانصهارهم
لانهم بيرجعوا احسن من الاول واقوى وافضل
يبقى لازم اننا ننتظر رجعوهم ..وبشوق كمان
لازم يحسوا ان ليهم مكان عندنا ..فى قلوبنا..قبل عقولنا..لازم يطمنوا ان مهما غابو فمكانهم محفوظ

التعارف هنا بمحض ارادتنا والتعليقات هنا بمحض ارادة صاحبه..وليس على احد ان يجامل..وليس على احد ان يرد المجامله
احنا محتاجين الكلمه الصادقه
ولو حصل اختلاف فى وجهات النظر..ببساطه شديده نقول اننا مختلفين ..وبكل احترام ممكن نتناقش..ودا اللى بيعمل العلاقات الطيبه اللى بينا..
يعنى مش بس الاتفاق فى الرأى
لأ.. كمان الاختلاف فى الرأى
وتعدد الموضوعات..ويمكن نكتب فى نفس الموضوعات ..بس من وجهات نظر مختلفه..ونلاقى نفسنا بنتعرف على نقاط لم نكن نعلمها او اسقطناها من حساباتنا

كمان بنبقى محتاجين رأى محايد..ونلاقى نفسنا بنسمع اراء كتيره ودا شيء جميل جدا
عارفين ليه..لان ماحدش بيجبرك تعمل برأيه..ولا هايزعل انك ماخدتش برأيه..دا نصيحه لوجه الله خالصه..وانت حر فيها ..تعمل بيها او لا
انا عن نفسى لو طلبت نصيحه ولا رأى من احد المقربين ليا..دى بتبقى مشكله معاه
لانه شايف انه بذل مجهود معايا ولازم فى النهاية اعمل بما قاله..وان ماعملتش بكلامه ابقى مش محترماه ولا مقدراه
وكأن عقلى خلاص لغيته واشتريت عقله هو(ودا تقفيل المصنع..وضمان طول العمر)هههههههههههههه
اضحكوا الله يخليكم..
وكملوا قراءه

لكن احنا هنا.. بنحترم الكبير والصغير..الشاب والرجل.. والبنت والسيده..الأم والفتاه
كلنا على مستوى واحد من الاحترام المتبادل
بل انا عن نفسى استفيد واتعلم من الشباب الصغير..لان لهم افكار جديده..وقلوب تنبض بالامل..
وايضا احاول من جانبى ان اعطى ماأستطيع من حب او نصيحه لو (حد طلبها)..احاول ان يكون كلامى مفيد على قد ماقدر.. او من وجهة نظرى..
وفى نفس الوقت مانقدرش نستغنى عن الكبار سنا وخبره..دول ليهم مكانه خاصه واحترام كبير جدا

ياجماعة الموضوع مش كلمه فى صفحه
....لا ..الموضوع..عِشْرَة .. زى العيش والملح
وماحدش يخون العيش والملح
وانا عن نفسى ..بعتبر الكلمه امانه..ولو بينا اى حد بيغشنا..فدا يعتبر ليس منا(زى حديث رسول الله صلى الله عليه وسلم)
احنا بينا اتفاق غير مكتوب..بالاحترام..بالحب..بالاخلاص..بالثقه

واحنا هنا لانعرف بعض زى ماقلت قبل كدا..ودا يعتبر حصن امان لكل منا..فلا تجريح.. ولا تعدى على الحريات
بالعكس احنا هنا بنقف مع بعض.. وجنب بعض بمنتهى الاخلاص والحب..ولا ننتظر من بعض حاجه غير الاحساس بالانسانيه المجرده من الاغراض..لاننا مش عايزين من بعض حاجه خالص..غير الاخلاص فى العمل والنصيحه
ودا متهيئلى: بيسموه ..الحب فى الله
وانى يشهد الله انى احب اصدقائى وابنائى هنا فى الله
بارك الله فيكم
مش عايزه اطول عليكم..وان شاء الله نتقابل فى كلام جديد

واللى مش موافق على كلامى ولا عاجبه
هو حر
انا بعمل اللى عليا..والباقى على ربنا


هناك ١٧ تعليقًا:

رحلتنا في الحياة يقول...

ااووووووووووول تعليق باذن الله

رحلتنا في الحياة يقول...

الحمد لله طلعت اول تعليق قبل كل الناس وقبل ثندر نفسه

رحلتنا في الحياة يقول...

ماما واللى فعلا فى حبك فى مقام ماما بالظبط بجد والله المدونات وعالم التدوين اجمل ما فيه اننا اتعرفنا واتقربنا من اصدقاء واخوات واهل كمان فى الشدة والفرح فى كل وقت مع بعض اكيد لما بناخد قرار البعد بيكون صعب جدا وبدليل اننا بنرجع تانى بس ساعات بنحاول اننا نبعد فى هدوء علشان مش نقلق علينا ولا نعذب معانا ناس حبناهم وحبونا
انا عالم النت والتدوين بالذات اجمل شئ فى حياتى دلوقتى انى بقيت على صلة بالعالم حواليا وانا محبوسة فى بيتنا معتقدش لو عشت حياتى لها هلاقى صحبة وصداقة واخوة زى اللى لقيتها فى عالم التدوين طبعا

رحلتنا في الحياة يقول...

P: دى بئا لثندر هههههههه اخيييييييييرا لحقت التعليق الاول

koketa يقول...

فى احتلال للمدونة يا ايووووشة
اربع تعليقات فى بوووست واحد
حراااام عليكى

koketa يقول...

انا ضفت حضرتك تاااااااااانى ياريت الاضافة تكون وصلت

حور الجنة يقول...

بجد ياحجوجه كلامك طالع من القلب ومحدش يقدر يلومك في زعلك
لانه بدافع حبك وقلقك كاأم غاليه علينا
وياست الكل التمسيلهم الاعذار وفي الاخر هايلفوا يلفوا وهايرجعوا تاني لقلوب احبتهم وخافت عليهم

تحياتي لكلماتك الصادقه وحبك النابع من قلبك

الفراغ يقول...

ايوش الجميل
انا كلى فخر وسعاده انك حبيتينى زى مامتك
واحنا عمرنا لا نقلق ولا بنتعذب الا ببعاد الاحبه..
وانا زيك والله يا ايوش محبوسه فى البيت لا بروح ولا باجى ..من الشغل للبيت ومن البيت للشغل
وعلشان كدا النت والتدوين واراء المعلقين هى حياتى اللى اخترتها بأرادتى محدش فرضها عليا
وعلشان كدا انتى وكل ابنائى اللى هنا معاكم فى المدونات..غاليين عليا جدا ويعز عليا فراقكم او نسيانكم
يارب افرح بيكى يا ايه
اشوفك دايما بخير

المعتصم يقول...

بسم الله الرحمن الرحيم
السلام عليكم ورحمةالله وبركاته
ست الكل
تحياتى
اولا طبعا بعتذر علشان انا حاسس انك كنت زعلانه فى البوست اللى فات منى انا
بس هى الظروف غصب عنى
ثانيا طبعا مع حضرتك حق فى كل كلمه
احنا فى المدونات وعالم التدوين مابنعرفش بعض معرفه شخصيه يعنى مافيش اى شبهة مصلحه او مجامله او نفاق
وعلشان كده محبتنا بتكون لله وفى الله بس
وربنا يديم بينا الحب ده خالص لوجهه تعالى
هه بقى هتسامحينى ولا هقعد اعيط قدام المدونة لغاية ماابل بلوجر كله من كتر الدموع ؟؟؟؟
ههههههههههههههه
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

thunder يقول...

ههههههههههههههههههههه
ناشى يا ايوشى لكن مش مهم مين الاول ومين التانى المهم المبداء واحنا متفقين على اية وفعلا انا مع ماما الفراغ فى كل كلمة فى البوست لان كلنا مشفناش بعض ولا نعرف هيئتنا اية انما عقول وارواح وحب بدون مقابل
اتمنى كل اللى بيفكر يسب عالم التدوين يرجع حساباته ويعرف قد اية فى ناس بتقلق عليه وبتخاف عليه بدون مقابل
امى العزيزة كنت سعيد رغم حزنك فى البوست اللى فاتت لانى سعادتى جت لانى عارف ان مافيش ابن من ابناء هيقدر يزعلك واول ما هيعرف ان اغضبك هيجى يرمى نفسه بين ايديكى يعتزر وقد كان
لكن فى انا او اللى كان نوع ما بعيترض مش بتعترض على فكرة التماس العزر بس لان فيهم اللى كان ليه عزره بجد وكان حقة يختلى لو بنفسة ثوانى
انما انا اعتراضت على ان حضريتك تزعلى لانهم والله عارف مش هيقدروا يبعدوا عن حضريتك
امى العزيزة ربنا يديم الحب دا علينا جميعا ياااااارب ويحفظك لى ولينا ياااااااااارب
وميحرمنى ابدا من حضريتك ياااااااب

ELMASRYA - MOSLEMA LELLAH يقول...
أزال المؤلف هذا التعليق.
ELMASRYA - MOSLEMA LELLAH يقول...

إنتي جميلة وكلامك جميل يتوزن بميزان الدهب

كل اللي قلتيه صحيح

وعجبني قوي موضوع إن الدخول للمدونة زي الذهاب للنادي للترويح عن النفس

عندك حق وطبعا لما بيكون للكتابة هدف الإفادة لمن حولنا بيكون هدف عظيم جدا

إستمري حبيبتي في بث كل مايدور داخل قلبك النقي وعقلك الراجح لنا حتى نستفيد ونسعد

دمتي سالمة بحفظ الرحمن

mohamed ghalia يقول...

يارب ياماما دايما بينا وجنبنا
ربنا يحفظك لينا ويسعدك

الفراغ يقول...

ابنى العزيز :معتصم
حمد لله على سلامتك
وانا ااقدر ازعل منك يا معتصم
انا عارفه انك صعيدى وممكن تهدلى المدونه
دانت يا راجل عايز تيجى تحتل القاهره
بجد انا مت على روحى من التعليقات بتاعتك فى اخر بوست كتبته
وشكرا على الدموع..بس خلاص سامحتك
هو انا لسه هاستنى انشف خد مندلين وعيط بعيد
بجد بوست يجنن ولا التعليقات انت وايوش بنت خالك ولا بنت عمتك
شكلكم صحيح هاتحتلو القاهره
بس انا بقى عايزه وزارة المواصلات اه ونبى..دانا رجلى بتوجعنى من الوقفه على الاتوبيس كل يوم..يعنى هاتاخد فيا ثواب لما تخلينى وزيرة المواصلات
وانا هانتخبك وزير كل الوزراء
وهاعملك دعاية.. انك احسن من الرابسو وافضل من الامين ..ودمك اخف من اللى بيضحك علطول ده.. ومش عارفين هو مبسوط على طول كدا ليه
لكن انت هاتضحك 3 مرات بس فى اليوم.. بعد الاكل طبعا
خد بالك منى ..اه انا ست كبيره بس لاوم وزارتك يبقى فيها خبره وناس كمل كدا كبيره ..ناس هاتقعد كام سنه ويتكلوا على الله
انت هاتقعد تعلم وتفتح مخ لسه
ياعم خدهم كبار..يخلصوا بدرى بدرى
وتبقى ضربت عصفورين بحجر واحد...هاتقولى ازاى..
الكبار هايعملوا الللى بالك بالى فى سنه ماهم عايزين يعوضوا اللى فاتهم بسرعه
وتلاقى نفسك بترضى جمهور الصاعيده بتعديل وزارى كبير يرضيهم ويسعدهم
خدتى بالك بقا ولا لسه
اهو نورتك
والا هاعمل انا حلف فى الطريق المعاكس
بس هاخد معايا ايوش..دى بنت صعيديه اه..بس اخر جدعنه ومتافهمه
خد بالك من متفاهمه دى
وتعيش مصر حره مصريه صعيديه دهقلاوقيه اسكندرانيه
دايما تيجى وتنورعندى

الفراغ يقول...

ابنى الغالى.. ثندر
هو كان تقدير من ربنا..جه فى الوقت دا بالزات..لانى كنت بدخل عند ايوش وكلمات ومش عارف اعلق عندهم خالص
وقلت ازاى دا يحصل واحنا متكلمين مع بعض قبل كدا
وقعدت ادور فى البوستات السابقه يمكن يكونوا قالوا حاجه عن الوضع الحالى لكن مش لقيت
وكمان كان فى شوية مدونات بتابعها..برضه لقيتها قفلت
يعنى كان تقدير ربنا معايا كدا
علشان بس ينزل بوست زى دا فى الوقت دا
يّخرج ايوش من عزله كانت هتفرضها على نفسها
يلا كان موقف وراح لحاله..بس فعلا اانا لقيت هنا ناس ولاد حلال ..
ربنا يديم المعروف بينا
وربنا مايحرمنيش منك يا ثندر
بس فين البوست الجديد يا كسلان

الفراغ يقول...

اختى الحبيبه..المصريه
دمتى بحفظ الله
واشكرك على المجامله اللطيفه بتاعتك
بصراحه فعلا انا بحس ان المدونه دى مهمه جدا فى حياتى واصبحت لا استغنى عنها ولا عن ابنائى واصدقائى القارئين والمعلقين

فعلا هى افضل من النادى بالنسبالى
واشكرك على دعوتى لاخراج كل ما بعقلى من افكار..وربنا يجعلها فى ميزان حسناتى ويغفر لى كل تقصير.. او خطأغير مقصود ..
او سهو او نسيان..
والله هو الولى وهو المعين
اشكرك حبيبتى ودمتى بكل خير

الفراغ يقول...

ابنى محمد غاليه
نفسى مره اعرف رايك فى موضوعنا
انت مجامل بس مش فاضى
اشكر مرورك وهاستنى رايك المره دى
وربنا يسعدك ومتتأخرش عليا
منتظره دايما رايك ..لان ليك (نظره) مختلفه