السبت، ٢٥ أبريل ٢٠٠٩

ساعة.. سحر

بسم الله الرحمن الرحيم

اه يا ضهرى..يارب ارحمنى ..انا خلاص هاموت..مش قادره ..ارحمنى يا رب
يارب الساعه بقت 2 الصبح..نفسى انام شويه..مش قادراااااااااااااااااااااااااااااا
الووووووو..ماما ازيك يا حبيبتى..انتى صاحيه..ربنا يخليكى وانتى بتصلى..ادعيلى انام..ماشى ياماما لو قدرت..حاااااااااااااااااضر :حاضرررررررر..مع السلامه يا حبيبتى
يارب..يارب..طيب والله لتوضى واصلى ركعتين زى ماما ماقلتلى ...الله اكبر الله اكبر
الحمد لله..اللهم لك الحمد والشكر..يارب ساعدنى وخد بايدى..وخلى لى بهاء وباباه..يارب اولد بالسلامه ..

يا خبر كنت هانسى ميعاد حسين..حسين ..اصحى يا حسين..حسين..ميعاد الطياره يا حسين
كدا كنت هاتضيعى الرحله منى....انتى ست انتى..انتى زوجه..والله مش عارف اتجوزتك ازاى؟!!!
معلش حقك عليا...تعبانه والله يا حسين..الحمل النوبدى تاعبنى اوى ..اعمل ايه بس ياربى هلاقيها منين ولا منين
ياحسين حرام عليك..دانا تعبانه بقالى ساعتين ..ومش راضيه اصحيك تودينى للدكتور
طيب حتى قولى سلامتك..قولى مالك فيكى ايه..
اه ..هنبدأ حدوتة كل مره
.بقولك ايه انا مش فضيلك..ابقى أملى شريطين وانا اسمعهم فى الطياره
طيب يا حسين ..انا عايزه 500 جنيه..علشان هاروح للدكتور والادويه..وبهاء محتاج شوية حاجات للمدرسه
هو انا لازم كل مره قبل هامشى تنفضى جيوبى
اتفضلى يا ستى 200 جنيه اهم..وامسكى ايدك شويه..هو مافيش رحمه خالص
دول هايعملوا ايه..دا الدكتور لوحده هايخدهم..
اتفضلى كمان 100 جنيه...يا حسين حرام عليك..بتدينى القرش بالتنقيط..هو يعنى اللى فى بطنى دا ابنى لوحدى..
مش كفايه مارحتش معايا ولا مره للدكتورمن ساعة ماحملت
فاضيلك انا بقا..حاجه غريبه والله..ستات اخر زمن..ال دكتور ال..انا الطيار حسين اروح اقعد فى عيادة دكتور كلها حوامل واستنى المدام لما تولد
طيب يا حسين حقك عليا
بس ابنك لما يزعل منك انك ماجبتش طلباته ابقى رد عليه
انا ماشى....يارب ترتاحوا منى خالص..عيشه تقرف..عيشه تزهق ..كل شويه هات هات ..مافيش مره خد
ياحسين احمد ربنا.. داحنا ساعة سحر.. وربنا بيقبل الدعاء..قول ربنا يبارك..احنا الحمد لله احسن من غيرنا كتير ..وكتير قوى كمان
ناقصنا ايه..الحمد لله ربنا مدينا المال والبنون..ربنا يبارك فيهم
عندنا العربيه..اللى انت مش راضى تدينى مفاتيحها..وربنا مدينا الصحه..عايز ايه تانى..ليه مش بتشكر ربنا
اه ..اشكره على ام قويك اللى انا اتجوزتها
الله يسامحك..انا مش هازعل منك علشان رايح الشغل بس..ولم ترجع بالسلامه يبقلنا كلام تانى..وتكون رايق علشان نعرف نتفاهم
اه يا عاقله..قصدك علشان هاكون قبضت وتاخدى القرشين ..تصرفيهم ولا تضيعيهم عليكى وعلى عيالك وعلى البيت

خلاص يا حسين اتفضل فلوسك اهيه..ولما ابنك بقى ولا بنتك يتولدوا محتاجين رعايه ولا حضانه.. ولاالف بعد الشر عن ولادى
مش عايزه منك حاجه ياحسين...يارب هاتهولى بالسلامه..معافى سليم..يارب ماليش غيرك
انا رايح فى داهيه...ابقى قابلينى لما ارجع
مع السلامه ترجع لبيتك بالسلامه..مش لما يبقالى بيت..دابيتك ياهانم انتى وابنك..وبيت اللى جايبهولى فى السكه...دى حاجه تقرف
هو انا لاقى راحتى ولاّعارف اعيش هنا خالص

يا حسين حرام عليك ..دانا كنت بموت من شويه..ومارضتش اقولك ولا اصحيك..ويمكن اولد كمان وانت مش موجود..يعنى انت تقريبا مش بتتعب فى حاجه خالص..دا ربنا يخلى ماما هى اللى قايمه بكل حاجه معايا
طيب يا ستى روحيلها ربنا يخليهالك....انا بقا مش جاى قبل اسبوعين
هاخلص الرحلتين اللى عندى..وعندى حفلة نانسى هاروح احضرها فى لبنا ن...يمكن انسى الهم بتاعك انتى وعيالك

ماشى يا حسين ..ربنا معاك ويوفقك..وابقى قول لنانسى تعمل اغانى للاطفال..علشان ابنك بيحبها ..وصوتها حلو قوى
حتى الحفله اللى هاروحها علشان انسى الغلب اللى انا عايش فيه ..عايزاها لمصلحتك ومصلحة عيالك..يا ساتر على الستات ومخهم
بتتجوز الراجل علشان تخنقه..لكن تدلعه ولا تعيشه نص نص ..حتى..ابدا

ويخرج حسين..ويدفع بابا الشقه بعنف..حتى ان ابنه يستيقظ من الفزع.
ايه ياماما هو فى زلزال ولا ايه يا ماما..
ربنا يستر يا حبيبى....بابا فين ياماما..هو راح المطار..هو هيروح لطنط نانسى.. يقولها تعملى اغنيه.. هو الزلزال ممكن يروح لبابا فى الطياره..ماما انتى مش بتردى ليه؟..ماما انتى هاتولدى امتى؟؟..ماما انا بحبك وبحب بابا..وطنط نانسى..وبحب اخويا الصغير..ماما ردى عليا..ماما ماما..ماما انتى نمتى..
ويجرى بهاء على التليفون ويدير الرقم السريع..الحقينى يا تيتا..ماما مش بترد ..انا كنت بكلمها لما صحيت على الزلزال..بس هى سكتت ومش بترد
اهو يا تيتا كلميها...التليفون على ودنها كلميها
طيب يا تيتا انا هاقعد مؤدب لغاية ماتيجى..وهاجيب لماما ازازة البرفان ..هى بتحبه وبتحطه لما بابا بيجى

وذهب حسين الى عمله غاضبا..ولكنه ينسى كل شيء حتى بيته واولاده وزوجته..ويعيش على فكره واحده انه سيمضى ليله ساهره مع اغانى نانسى..وسيطلب مقابلتها اخر الليله ليسلم عليها..انها النموزج الذى يتمناه ..ويتمنى العيش معها طوال حياته..يابخت جوزها بيها
هى دى الزوجات صحيح بلا حمل بلا ولاده وعيال ومصاريف
وينهى حسين عمله ويذهب الى لبنا ن خصيصا ليحضر حفلة نانسى..ولكن الحفل يؤجل لتعب نانسى وانها تحتاج الى راحه لانها ضعيفه والبيبى محتاج غذا..والام محتاجه رعايه وهدوؤ

نانسى حبيبتى تعبانه..نانسى محتاجه هدوؤ ورعايه ..انا قاعد هنا مش سايب لبنان الا لما اطمن على نانسى
وبعدين ازاى جوزها المغفل ده يسبها تشتغل ..ولا تروح تغنى وهى حامل وتعبانه..صحيح يدى الحلق للى بلا ودان..اه لو دى مراتى..كنت شيلتها من على الارض شيل....هههههههه كنت حملت انا بدالها
بس دى هاتقعد 3 ايام فى المستشفى..ويمكن الحفله تبقى بعد 4 ايام كمان
ولا يهمنى..هو نانسى حد يسيبها ويمشى..
ويبقى حسين فى لبنان ليبعث لنانسى يوميا باقة ورد يبثها كل الاشواق والتمنيات بولاده سهلااااااااااااااااااااااااااااااااااااا
علشان تجيب نونو جميل زيها وتغنيله اغانى حلوااااااااااااااااااااااااا يحبها زى كل اغانيها السابقه
المهم تقوم بالسلامه وتغني للى بيحبوها..وهايجننوا عليها ..ومش طايلين ضفرها..

وتعدى الايام.. وتقوم نانسى.. وتغنى.. وحسين العاشق الولهان لايدرى من امر بيته شيئا
وتنتهى الرحله.. ويعود حسين الى مصر.. ولكنه لا يعود الى بيته!!
..

انه يعود ليلقى حتفه فى الطريق الى البيت ويذهب حسين الى خالقه

وتلد هناء.. بنت جميله ..ماشاء الله لاقوة الا بالله..انها اجمل ما رأت عيناها
وتسميها نانسى..وتجلس بالساعات لتسمع شريطها الجديد للاطفال
ولكنها تبكى ..الله يرحمك يا حسين..كنت بتزعق صحيح..بس برضه وصيت نانسى على اغانى اطفال لابنك بهاء وبنتك نانسى
عمرى مهانساك ابدا يا حسين
دا حتى بنتك طالعه شبهك
الله يرحمك...يلا يا بهاء...علشان لسه هاطلع العربيه من الجراج
يلا يا بهاء المشوار طويل على مانوصل لتيتا ..ونرجع تانى
بس انتى ياماما لغاية دلوقتى مجاوبتيش على سؤالى.. يوم الزلزال ماحصل..
هواللى خلى بابا يموت
ياه يابهاء..يا حبيبى احنا كنا فى وقت السحر ..اللى ربنا بيقبل فيه الدعاء
ابقى اصحىصلى ..وادعى ربنايخليك ليا انت واختك ..وتكبر وتبقى طيار زى بابا قد الدنيا.. وادعى انك تشوف بابا ..واسئله انت ..يمكن يقدر يرد على سؤالك

ماشى يا ماما ..انا هابقى اصحى واصلى وادعى ربنا
بس نفسى كمان ااقول لربنا ان يخلى طنط نانسى تغنى اغانى حلوه لبابا ..علشان يعرف انى بحبه حتى بعد مامات

صح يا حبيبى ابقى اطلب من ربنا كل اللى انت عايزه
ومتنساش تقول الله يرحمك يابابا ويغفرلك..داهو اللى وصى طنط نانسى تغنيلك
تمت

هناك ١٨ تعليقًا:

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
لا بس كده حسين هيدخل الجنه
طالما انه هو اللى وصى نانسى تعمل اغانى للاطفال
حسبى الله ونعم الوكيل
فيه ناس كده فعلا
ربنا يديهم كل حاجه
الاسرة والزوجه الوفيه المحبه والمال والعمل المرموق والاطفال
لكن هما بيبقوا جاحدين لكل نعم الله عليهم ونفسهم فى حاجات تانى تغضب ربنا عليهم
حسبى الله ونعم الوكيل
بوست جميل ياست الكل
ولعلنا نستفيد (يمكن ربنا يقدرنا نقوم نصلى وندعى فى ساعة السحر)
تحياتى ودمتى بكل خير وود
والسلام عليكم ورحمة الله وبركاته

المعتصم يقول...

هيييييييييييييييييه
اول تعليق
اغيظ بقى البت ايوشه بنت خالى
وثندر بالمرة هه
ههههههههههههههههههههههههه

المعتصم يقول...

ياسلام ياست الكل
وزارة المواصلات
بس كده
خلاص
وزارةالمواصلات وكمان معاها وزارة الطرق والكبارى
غاليه ومطالبتيش
ربنا يديكى الصحه وطولة العمر

حور الجنة يقول...

لاحول ولاقوة الا بالله
يعني خايف على نانسي ومش خايف
على مراته وعمال يقول انه لو مراته هيراعيها ماهو باين كان راعى زوجته واولاده اللي من لحمه ودمه

جزاكي الله خيرا قصه ممتازه
بس ياترى هي حقيقيه وفيه رجاله كده فعلا؟

thunder يقول...

احفظ مكااااااا ن العيال دى مصدوق يسبقونى قبل اية طيب وليك مرة يا معتصم

thunder يقول...

امى العزيزة البوست حلو جدااااا جدااا عجبانى فيه هدوء الزوجه وقدرتها على تسير الامور اووووى فعلا دى الهدية اللى اى حد يتمنها لانها حد عاقل بيعرف ازاى يتعامل فى مختلف المشاكل والاوقات
على رغم انى القصة مؤثرة الا ان فعلا لازم ناخد بالنا من افعالنا وكلامنا لان فى معنى الحديث عن الرسول صلى الله عليه وسلم (( لاتدعوا على انفسكم وابنائكم لعلها تكون ساعة اجابة ))
ربنا يغفر لينا ولكل اموات المسلمين يارب
امى العزيزة دمتِ بكل ما تحبى وفى رعاية الله وحفظة ياااااااااااااااااااارب

موناليزا يقول...

ياااه
معقول فيه زوج كدة(انا عارفة انه فيه واكتر من كدة كمان بس انتى عارفة الحقيقة دايما بتوجع:))
حاسة انك عايزة توصلى رسايل كتير اوى من خلال القصة دى
منها- تحمل الزوجة لزوجها حتى وهى فى شدة الامها
- انكارالزوج للنعمة اللى هو فيها
- الدعاء وقت السحر واهميته
- سوء الخاتمة
- حب الزوجة لزوجها مهما فعل او قال
- براءة الاطفال حتى فى اسئلتهم

تسلمى ياحبيبتى

simply me يقول...

القصه جميله جدا ومؤثره فعلا
ونفهم منها حاجات كتير
زى مثلا : #اننا نقدر النعمه اللى معانا ونحافظ عليها(واكبر نعمه من ربنا علينا هى الزوج\الزوجه الصالحه)
#الدعاء والتوجه لله هو افضل طريق للنجاح فى الحياه والصبر على متاعب الدنيا
#وقت السحر من احلى الاوقات اللى ربنا يتنزل فيها للسماء الدينا ويقول "هل من داعى فاستجيب له هل من تائب فاغفر له"

ربنا يتقبل منا الدعاء جميعا

كده برضه يا سونه يا خاين تسيب هناء وهى تعبانه وتروح لنانسى
D:ههههههههههه

رحلتنا في الحياة يقول...

نخلص من ثندر يطلع المعتصم طيب ماشى ماشى هحاول اعرف فين رفيق اللى بيوصلك النت ده واقوله يفصل النت خااااالص

البوست عجبنى جدا وضحكنى مع انه المفروض مش يضحك بس مكتوب حلو اوى تسلم ايديكى ياااااااارب
اما حسين فده فى منه كتير مش عارفين قيم اللى فى ايديهم وفى غفلة فى حياتهم وبتكون نهايتهم سوء الخاتمة
ربنا يحسن خاتمتنا جميعا امين يارب العالمين

نعكشة يقول...

اسلوبك القصص حلو و سلس ماشاء الله

عجبني كمان إن القصة فيه من وراها هدف واضح
اسلوبك في الوعظ حلو عامتاً

بس بما إني عبدو المعترض
فانا لازم اعترض

مش عاجباني حتة نانسي و اغاني الاطفال

انا عندي سؤال غير الاعتراض

هما ليه كدة؟؟؟

يعني لية كان بيفكر كدة مع نانسي او اي واحدة مشهورة او اي ست برة بيته
و مراته لأ

؟؟؟؟

مش عارفة


تسلم إيدك

سلام عليكِ

ELMASRYA - MRS WRITER يقول...

إيه الجمال ده كله يا حبيبتي؟

إحنا معانا أديبة وقاصة بارعة أهو

الموضوع إللي كتبتيه لنا مؤلم جدا

والمفيد منه إننا نتعلم ماندعيش على أنفسنا أو أولادنا دعوة وحشة وخصوصا أوقات إستجابة الدعاء إللي من ضمنها وقت السحر

ربنا يغفر لنا جميعا ويسامحنا ويجعلنا من أهل جنته بعفوه ومغفرته

دمتي سالمة بحفظ الرحمن ولا تنسيني من صالح دعائك

أحلى حياة يقول...

السلام عليكم

يانهاري
ايه دا بجد
انا وانا باقرا ردوده على مراته اتخنقت وخفت اوي
حاجه صعبه اوي بجد
يلا الله يرحمه بقى مطرح ما راح :D
ويعفو عنا يارب :)))

همس الاحباب يقول...

بسم الله ماشاء الله
اسلوب السرد اكثر من رائع
القصة بها من المعانى والعبر الكثير لاولى الالباب
انا تخيلت الموضوع فى بدايته شخصى وحقيقى
تسلم الايادى يا ست الكل
تقبلى خالص تحياتى

فكرة من الزمن ده يقول...

اولا انا قريت البوستين دول امبارح وكنت زعلانة جدا اني مش عارفة اكتب تعليق لظروف كتيرة
الحمد لله اني عرفت اكتب اليوم

البوست اللي فات حقيقي
لازم ينطبع ويبقى ميثاق شرف المدونين
كل كلامك فيه حقيقي ومحسوس ولازم نطبقه كلنا

فكرة من الزمن ده يقول...

اما البوست ده فجميل اوي
ويحمل معاني وعبر كتير اوي
وزي ما استدعى دموعي
استدعى كمان ضحكة جامدة لما قريت الجملة دي

.ربنا يبارك فيهم
عندنا العربيه..اللى انت مش راضى تدينى مفاتيحها.

ست مش بتضيع وقت التانيب مع الدعاء مع الطلبات
فكرتني بخيرية احمد محموووووووود انت جيت احبيبييي

هههههههههه

جميل اوي اوي
وحشتينا يا ام المدونين
تحياتي وامنياتي لك بدوام الصحة والعافية

thunder يقول...

؟؟؟؟؟ يارب تكونى بخر لان حضريتك حتى مردتيش على الناس اتمنى من الله انك يارب تكونى بكل خير وبصحة جيدة ويكون سبب عدم وجدو حضريتك النت علشان خاطرى يا ماما طمنينى عليكى
امى العزيزة جداا دمت فى رعاية وحفظ الله دائما ابدا ياااااااااااارب

د/على خميس يقول...

السلام عليكم و رحمة الله و بركاته
ما شاء الله جميل السرد و المعنى
أسأل الله أن يبارك فيك
و أن يتوب على بهاء و أم بهاء من سماع الست نانسى سواء بتغنى للأطفال أو الأفيال و يهديها هى كمان ..سبحانه قادر على كل شئ
تحياتى

رحلتنا في الحياة يقول...

السلام عليكم ياماما اخبار حضرتك ايه يارب تكونى بخير انا قولت اجى اسلم على حضرتك علشان وحشتينى بجد ووحشتنى طلتك على المدونة