الجمعة، ٢٦ يونيو ٢٠٠٩

ما أجمل الرجوع اليه....سبحانه وتعالى

السلام عليكم ورحمة الله وبركاته

جيالكم النهارده
وانا كلى اسف..كلى حزن ...حزن برضه ..اه حزن .........المره دى حزن من نوع تانى
حزن على ضعف الايمان ...حزن على الاستسلام...حزن ممزوج بالخوف من الله...وبرضه حزن ممزوج بالفرح بالعوده الى طريق الله
حزن لانى تركت نفسى للشيطان...يقلب عليا المواجع ...ويشعرنى بانى ضحيه للقدر...القدر الذى لم ينصفنى... القدر الذى ظلمنى ...القدر الذى ليس عنده غيرى ليلعب بى وبقلبى المسكين التعبان

فعلا تركت نفسى لعبه فى يد الشيطان..ونسيت فى غفلة منى ان القدر مكتوب علينا منذ ولادتنا
تركت نفسى احاول الهرب من الاحزان(كما تبدوا لى) كما كانت تفعل افلام زمان...عندما كان بطل الفيلم تعصف به النوائب فيجرى الى الحانه والى الكباريه(عافانا الله واياكم)..ليشرب وينسى احزانه...وانا حاولت الهروب من الحزن الى البكاء ولوم القدر(استغفر الله العظيم)
بعد ان اعمانى الشيطان عن الرضا بقضاء الله وعن رؤية فضل الله ونعمته عليا
بان حول نعم الله امام عينى..الى انها نقمة من الله على...وانى سوف ارى ايام بلا طعم ولا سعاده بعد زواج ابنتى الثانيه...وانه اصبحت الحياة ملهاش لازمه وان الموت هو الراحه

وفى يوم من الايام ..صليت المغرب ...وكان قلبى ينفطر من الحزن....ولا ارغب حتى فى الكلام مع بنتى المتزوجه ....التى تريد ان تطمئن عليا
ونمت بعد صلاة المغرب وانا اشعر بالحزن يمزقنى
نمت وقلت هابقى اقوم اصلى العشاء بعد ان انسى بالنوم مابى...

كنت اريد ان اهرب بالنوم من احزانى....وانى ساصبح وحيده فى هذه الدنيا....وان خلاص بناتى هايبعدوا ..وبان مهمتى خلصت وماحدش هايفتكرنى بعد كدا
نمت وكنت اتحدث مع ربى ...بانى سيده مسكينه ضعيفه لاحول لى ولاقوه ..وبانى كيف ساعيش وحدى...كيف اعود من العمل فلا اجد احد بالبيت....وان ماحدث لى ماهو الا عقاب الله لى على زنب عملته.
ونمت وانا استغفر الله العظيم

وصحوت قبيل الفجر بساعه ..وانا اشعر بالحيويه والراحه النفسيه...
وقد كنت قرات قبل ذلك عن ساعة السحرومافيها من جمال وقرب من الله عز وجل
فتوضأت وصليت العشاء
ووجدت فى نفسى رغبه للكلام مع الله والشكوى اليه من الوحده بعد خطوبة بنتى ....وانها اصبحت فى وادى وانا فى وادى...وان الدنيا اصبحت لى كخرم ابره .....وانى اصبحت اريدك يا رب ولا اريد سواك
فما كان منى الا اقمت الصلاه وصليت ركعتين حاجة لله...
تحدثت الى الله .....بكيت بين يديه....تمنيت منه عز وجل ان يشعرنى بحنانه ورضاه واستغفرته من ضعفى الانسانى
واستعذت به من الشيطان الرجيم
وجدت نفسى اناجى ربى بما فى نفسى...وجدت انى قد ارتحت عندما اعترفت بضعفى لله...
وانى قد كلمت ربى بما يعرفه عنى ولكنى ارتحت وانا اطلب العون منه وحده

وقتها فقط شعرت بان الله هو المقدر لما يحدث...وان القدر مكتوب علينا بخيره وشره
واحسست كانى اسمع (وعسى ان تكرهوا شيئا وهو خير لكم)
طبعا لم اسمع شيئا ...ولكنى تذكرت كلام الله عز وجل
وتذكرت (الا بذكر الله تطمئن القلوب)
وتذكرت (ان كيد الشيطان كان ضعيفا)

وقتها عرفت انى كنت لعبه فى ايد الشيطان...وانه يريدنى ان اخسر ماوعدنى الله به من جزاء الصابرين
ازاى انسى ان سبحانه وتعالى رزقنى الخير كله بتربية بناتى بعونه وعطائه الواسع
ازاى انسى انه سبحانه وتعالى:: لم ينسانى يوما وانا وحدى اكافح علشان اربى بناتى خير تربيه على الايمان والصلاه والحجاب والقرآن
و قد ساعدنى وكان خير معين

ازاى اسيب نفسى تحزن وتزعل كل هذا الزعل والحزن
وانا المفروض ان اكون سعيده بان الله من عليا اخيرا برضاه ...وانه يكافئنى على كفاح السنين بخطوبة بنتى لرجل الحمد لله يحمل صفات الرجوله والايمان
كيف احزن وانا اقد اكملت رسالتى الحمد لله على خير وجه
كيف احزن وهذه سنة الحياه....
كيف احزن وانى قد اهديت الدنيا الحمد لله بنتين ارجوا من الله ان يكونا ردئا لى من النار
كيف احزن وبنتى المتزوجه لا تألوا بالا كل يوم ان تتصل بى لتطئمن عليا

اللهم لك الحمد كما ينبغى لجلال وجهك ولعظيم سلطانك
كما انعمت عليا بالرؤيه الصحيحه للامور انعم عليا برضاك
واستغفرك واتوب اليك

ما أجمل الرجوع اليه....سبحانه وتعالى
اللهم اسئلك علما نافعا ...ورزقا طيبا...وعملا متقبلا
اللهم امين

هناك ٦٣ تعليقًا:

Bondoka يقول...

الحمد لله على نعمه الكثيره
واحلاها نعمه الرضا

فعلا يا امى انه نفث من الشيطان ليحزن الذين امنوا

هى سنه الحياة التى خلقنا الله من اجلها تعمير الارض وحضرتك ربيتى ابنائك احسن تربيه واكيد هيردوها ليكى بعد زواجهم ولو بقدر بسيط من تعبك وسهرك هما ليهم مين غيرك وهيلاقوا فين قلب احن منك

ربنا يخليكم لبعض ويبعد اى زعل عنكم

الحمد لله ان حضرتك بخير الان

yoyo يقول...

ماما ربنا يبعد عنك وعن قلبك الحزن يارب
دايما الشيطان بيقرب من الانسان فى لحظات ضعفه و حزنه و يبدا يزيد همه و يحاول يبعده عن ربه
وقتها يبدا الانسان يتمرد على القدر و يقول ليه بس يارب انا
انا بس عملت ايه غلط عشان تعاقبنى بالشكل دا
ليه مش نفكر ان المؤمن دايما مصاب ودا ابتلاء من ربنا لصبرنا وقوة تحملنا
عارفة يا ماما لو وقت الحزن من ربنا نقرب اكتر
اكيد الهم والحزن من قلوبنا هيتبدد

yoyo يقول...

اجمل رسالة فى الدنيا دى كلها يا ماما
لما تكبرى وتربى بنات و تشوف ثمرة تعبك فى نجاحهم و تحقيقهم لذاتهم
وقتها هتحسى بسعادة و فرحة ان تعب السنين وسهر الليالى مش راح هدر

المهم اننا نعيش فى رضا و نرضى بنصينا و نصبر و ان شاء الله ربنا هيعوضنا كل الخير

ماما انت احن واطيب قلب
ربنا يارب يسعدك و يسعد قلبك يارب
ويبعد عنك كل الحزن واللهم اللهم آآمين يارب
دمتى امى باالف خير وصحة
تحياتى
يويو

yoyo يقول...

معليش بقى يا ماما حتة احتلال كدا
بما ان احمد مش هنا ولا حتى ثندر بقى
يبقى اخد راحتى

yoyo يقول...

والله وراحت عليك يا احمد
مش انا المحتلة الازليه بقى
يبقى لازم اقوم بمهامى على اكمل وجه بقى

yoyo يقول...

ثندر سندويتش حلاوة بالفستق و حقك محفوظ يا رفيق الكفاح

yoyo يقول...

التعليق دا بقى عشان خاطر ميمى يارب ترجع لنا بالسلامة من السفر يارب
وان شاء الله تكون قضت وقت جمبل وخلصت كمان شغلها

yoyo يقول...

والتعليق دا عشان خاطر هناء يارب تخلص الامتحانات على الف خير بقى
وترجع لنا بالف سلامة يارب

yoyo يقول...

ربنا مش يحرمنا منك ابدا يا ماما
ويارب دايما يطمنا عليكى ياست الكل

عشان دايما بتوحشينا
دمتى لنا بالف خير و صحة
بنتك / يويو

همس الاحباب يقول...

الحمد لله على نعمه التى لا تعد ولا تحصى
والحمدلله على نعمة الرضا بقضاء الله وقدره
جزاكى الله خيرا
ونعم التربية ما ربيتى
بارك الله فيهما واقر عينيكى بهما دائما
تحياتى

همس الاحباب يقول...

يعنى انا كده المفروض التعليق الثالث
وبما ان يويو فاضية وبتلعب بفيت التعليق العاشر
سبحان الله
ممكن يا يويو تسددى الديون اللى عليك وبعدين تعلقى براحتك
يا بنتى انتى عليكى يجى عشرتاشر الف جند متاخرين من التعليقات السابقة
وبعدين هى ماما ترش ميه وتروق المدونة
وانتى تيجى تبهدلى الدنيا

همس الاحباب يقول...

بس بصراحة
المدونة طراوة وهواها بحرى
عندك حق يا يويو العبى براحتك
ثوانى اجيب جردل ميه وعصاية الغلية واقف على باب المدونة

اسماء واحلام فى وجدانى يقول...

ميمى ميمى ميمي ميمى

هناء هناء هناء هناء

ميمى ميمى ميمى ميمى

هناء هناء هناء هناء

والنتيجة النهائية 8 / 8

يارب ترجعوا لينا بالسلامة

ميمى ترجع من الغربة اللى وقعت فيها

وهناء ترجع من الامتحانات المؤذية

اسماء واحلام فى وجدانى يقول...

امى الحبيبة

انا مش باعلق عند حد خالص بس طبعا الكلام ده ما يمشى هنا هنا الحب وهنا دفا بجد باحس ان قلبى مستريح اوى هنا
ربنا يخليكى لينا دايما يا رب وبعدين انتى ولادك كتير يعنى ما تخافيش احنا قاعدين لك هنا ومش ناوين نروح كده ولا كده انا عن نفسى لابد هنا ومش هامشى هو انا ........ علشان امشى

اسماء واحلام فى وجدانى يقول...

امى الحبيبة

انا مرت عليا فترة كنت باقيم فيها الليل على طول وكنت باكلم ربنا
الله على ده احساس لامة تتكلمى وانتى متاكدة ان اللى بتكلميه حاسس بيكى اوى وعارف كمان انتى هتقولى ايه عدت عليا ليالى كتير وانا كده
فى الاول كنت محتاج اقرب منه لانى مريت بمحنة شديدة اوى وبعد كده لاقيت نفسى كل ليلة لوحدى باقيم الليل وباكلمه
لحظات الحزن فى حياتنا كتير بس اكيد قربنا من ربنا بيبعدنا اوى عنها
اما بالنسبة لشوشو بيه فالمدهول ده
قدرنا ونصيب كل بنى ادم يعنى مفيش مهرب منه مهما عملنا هيفضل ورانا ورانا ربنا يقويكى عليه ويقوينا عليه

اسماء واحلام فى وجدانى يقول...

امى الحبيبة

بعد اذنك عايزين نشوف الناس اللى بترش مية دى والناس المحتلة هو ايه هو احنا شوية والله اعملكوا وصلة من البحر واغرق المكان كله بس مية ايه
مية مالحة يعنى اللى هيتزحلق نهاره هيكون مش ولابد وخصوصا الناس اللى فى بالى ربنا يحميهم طبعا انا باهزر لانهم مش يهونه عليا انا ،، وبالنسبة للاخ اللى جايب الجردل وعصاية الغلية دى بقى هنسيب عليه واحد شوشو بس ايه لسة ورور علشان يتعلم عليه براحته
اما بقى عن موضوع التسعيرة ده
انا معاك يا خالد لان يويو بصراحة عاملة مدونتى زى مراجيح السبتية
ومولد ابو العباس وساعات ام العباس
انا دعيت عليها قبل كده والدعوة مش عاملة حاجة بس اكيد ولا اقولك

منك لمازنجر يا يويو

اسماء واحلام فى وجدانى يقول...

التعليق ده بخصوص الناس المتاخرة
انا مش عارف هما بيرحوا فين بس تقريبا هما اتعوده انى احجزلهم
طيب ربنا يخلينا ليهم دايما واحجزلهم
بس طبعا كله بحسابه
ومش عايز حد يقولى الحساب يوم الحساب

كلمات من نور يقول...

الحمدلله على نعمة الإسلام وكفى بها من نعمة

الحمدلله يا سيدتي الطيبة أن الله يحبك وجعلك تهزمي شيطان نفسك واستجاب لكي بأن تقرب إليكي عند مناجاتك وألهمك الصواب و الهمك حبح وطاعته

وفقك الله لما يحب ويرضى و جعل بناتك قرة عين لكي و أمهات مؤمنات قانتات عابدات

صمت الحنين يقول...

السلام عليكم ورحمة الله وبركاته

مأجمل الرجوع الى الله سبحانه وتعالى
والشكوى اليه فانه قريب سميع مجيب الدعوات
ربنا يكرم حضرتك وينور قلبك بنور الايمان ويسعد ايامك ان شاء الله

دمتى بكل خير وسعاده

yoyo يقول...

*همس الاحباب
هو انا كمان طلعت مديونة لا المبلغ بسيط اوى
هههههههههه انا عند ماما الفراغ يعنى معايا تصريح بقى
انا مش بهدل حاجة ولا حصل برجع تانى وارتب

yoyo يقول...

جردل وكمان عصاية ماشى يا خالد
ههههههههه
مدونة ماما الفراغ احن واطيب قلب بيجمعنا كلنا والله
ربنا مش يحرمنا منها ابدا ابدا
تحياتى
يويو

yoyo يقول...

يا اهلا يا اهلا
مش بنخاف ياا بو حميد
لا من مياه مالحه ولا ميه مش مالحة انا اصلا بموووووووووووووووت فى الميه
مين بقى الناس اللى هتزحلق دى
انت شرير هههههههه

الله بقى هو انتوا هتعملوا عليا اتفاق ولا ايه
يعنى تسعيرة ورقابة ومش عارف ايه
ولا بيهمنى الكلام دا خالص خالص
انا برده لها

ياااه دعيت عليا بالغالى و الله
الا مازينجر بقى هو انا اقدر
هههههههههه
تحياتى
يويو

الطائر الحزين يقول...

الله

اللهم ما ردنا اليك ردا جميلا

الفراغ يقول...

دكتوره بندقه
والله وحشتينى
كلامك زى العسل
ومنتظره موافقتك على نقل البوست من عندك




بنتى يويو
كلامك صح ...يعنى نقرب من ربنا من اول لحظه واليطان يقف عطلان عن العمل...
ماينفعش ..لازم يشتغل برضه
هههههههههههههه
ربنا يكفينا شره

وفعلا يا ايه لازم مانبعدش عن ربنا علشان نشعر بنعمه علينا
ربنا يتقبل دعائك ويسعدك

الفراغ يقول...

خالد
ربنا يعزك
ويقبل دعائك
وسيب يويو براحتها يا خالد
مانتوا اخوات
ربنا مايحرمنيش منك

الفراغ يقول...

اسماء واحلام
والله الدفا اللى هنا بسببكم يا احمد
يعنى انتوا اساس الحب فى مدونتى
والمدهول الشيطان ده ربنا يكفينا شره
وينعم علينابقيام ليله..لانها متعه لا تعادلها متعه
والطيور اللى غايبه دى مسيرها ترجع ..بس بنقولها بسرعه لانهم وحشونا
والمدونه تحت امر حبايبها...لانكم منورين كلكم

الفراغ يقول...

كلمات من نور
كلامك بلسم ونور للقلوب
وتقبل دعائك
ونتمنى الزياره الدائمه

الفراغ يقول...

صمت الحنين
منوره وتقبل الله دعائك
دمتى بكل خير

الفراغ يقول...

الطائر الحزين
تقبل الله دعائك
انا سعيده بتواجدك
وكمان بفرح بوجودك فى مدونة الضاحكون
وياريت تنورنى دائما

HaMaDa 3aFshA يقول...

السلام عليكم
انتهت الامتحانات وعدنا لخير صحبة عدنا نسير فى دروب الخير مع اهل الخير كلهم
كيف احوالك امى ارجو على الله ان تكونى فى تمام الصحة والعافية ويسر الحال وطيب المعاش
حزنت لما قرأت البوست الماضى لان هذه لم تكن امى رمز الصبر والرضا ولكنى سعدت بالعودة والاوبة لله سبحانه وتعالى وعودة روح الرضا والحمد ادامها الله عليكى نعمة فان الصبر هذا والرضا من اجل نعم الله على العبد رزقنا الله اياها
وتذكرى دائما حسبنا من قولك عسى ان تحبو وعسى ان تكرهوا ما أيده الواقع من شر فيما نحب وخير فيما نكره
عن أنس بن مالك رضي الله عنه عن النبي صلى الله عليه وسلم قال : عظم الجزاء مع عظم البلاء وان الله إذا أحب قوما ابتلاهم فمن رضي فله الرضى ومن سخط فله السخط . رواه ابن ماجه
بارك الله فيكى وزادك علما وايمانا واثابك خير الثواب انه ولى ذلك والقادر عليه
تحياتى ولا تحرمينى الدعاء

الفراغ يقول...

حماده
حمدلله على عودتك بخير ونجاح باذن الله
واسفه ياحماده ..ولكن ينطبق عليا قول الله عز وجل(وخلق الانسان ضعيفا)
المهم عودتك بخير فرحتنى
وعقبال نبارك على النجاح ان شاء الله قريبا

اسماء واحلام فى وجدانى يقول...

فكرة من الزمن ده

والواد ثندر بتاع الورقة اللى مكتوب عليها بحر وشكله هيغرقنا

و وردة زهرة المدونة


امل جارة القمر

ايوشة عدوة القطط

ايناس عاشقة الاحزان

الناس دى راحت فين بقى على العموم ربنا معاهم ويحضروا بسرعة



امى الحبيبة
احنا محتاجين اد اربعين كليو مستكة وخمسين عين عفريت واتنين كليو نشارة من النوع المفتخر واربعة كليو فحم
ونعمل توليفة بخور انما ايه عجب

ونخلى يويو تلف علينا واحد واحد تبخرنا من اى شوشو معدى
بس يارب ما تتحرق حاكم انا عارفها مالهاش فى الشعوذة
وخالد يمشى وراها بجردل المية اللى سايبه على باب المدونة علشان يويو لو فكرت كده ولا كده هو يلحق الموقف ويسيطر عليه وطبعا حقهم محفوظ

فكرة من الزمن ده يقول...

حبيبتي ماما الفراغ
وحشتيني قوي قوي
وبجد انا خجلانة منك جدا جدا
لكن عارفة ان قلبك كبير
والله بحبك في الله
لكن ظروفي صعبة
لكن الحمدلله انا بخير
اجمل علاج لبعض الظروف البعد والشغل والحمدلله انا حاسة اني بخير اومي
وكل الناس وحشاني جدا
ونفسي اروح لكل واحد في بيته
ومدونته واقولك انك وحشتني
لكن قلت اجمل حاجة اني اقول لهم هنا في بيت العيلة المكان الجميل اللي بيجمعنا كلنا
اني بحبكم في الله ووحشتوني
ميمايتي
وتندر ويويو واحمد وايوشة وكيارا وسارا وادم وحكومة عادل وشوشو ودودو مواجهات وغرام ود عمرو فاروق وعتلموالبنت المشمشية وفراشة وكللل الناس مش عايزة اكون ناسية حد بس اعذروني

ومبروك الف مبروك على خطوبة بنت حضرتك
وخجلانة جدا ان كان في بوست في اسمي اول واحدة ومكنش ليا حظ اني اكون موجودة واعلق فيه واشكر حضرتك على الحب اللي حاسينه هنا كلنا
حبيت اطمنك واقولك يا احن قلب ماتقلقيش
وكل لما اقدر ادخل ان شاء الله اجي اسلم
وقريب احاول انزل بوست اكون موجودة بيه قلت افضل من اني اقفل فكرة لاني ما اعرفش اكتب غير كده
وحتى لوحزين ما تقلقيش فده هايكون مجرد عمل فني اكون موجودة بيه مش اكتر
بحبكم في الله والي ان نلتقي قريبا

mohamed ghalia يقول...

ماما
أنا قولت أجى أطمن عليكى
أخبار حضرتك ايه؟
البوست يقلق بجد

yoyo يقول...

صباحك سكر يا ست الكل

يارب يبعد عنا الشيطان
اخبار حضرتك ايه
يارب تكونى فى افضل حال و بكل خير وسعادة
اللهم آآمين

yoyo يقول...

بس بقى انا معايا تصريح من ماما اعمل اللى انا عاوزة براحتى
ماشى يا خالد و انت يا احمد

ماشى يا احمد
انا عارفة عاوز تخلص منى و من احتلالى
بخور ونار بقى وساعتها قضاء وقدر
ههههههههههه
اقولك انا اعمل فيها نيرون واولع فى حبة مدونات كدا مش عاوزبنهم وابخر الحبايب بس
خلاص يالا هات اللى عليك الاول

yoyo يقول...

* فكرة من الزمن ده

حمد لله على سلامتك يا قمر
و الله انتى كمان وحشتينى جدا
اكيد طبعا احنا هنا بنتجمع فى البيت الكبير عند احن واطيب قلب ماما الفراغ
يارب دايما مش يحرمنا منها ولولا من وجودنا حواليها

د/على خميس يقول...

السلام عليكم و رحمة الله و بركاته
العنوان من أجمل ما قرأت :
ما أجمل الرجوع إليه ... سبحانه و تعالى

الرجوع إلى الله لا يستلزم الذهاب عنه فهو سبحانه الوحيد الذى نرجع اليه برغم من كوننا معه كل لحظة
الرجوع إلى الله على الدوام صفة الأنبياء و المؤمنين ... أسأل الله أن نكون جميعا منهم

الشيطان يعدكم الفقر ... كل الفقر ... فقر الفلوس .. المشاعر ... الصحاب ... كل أنواع الفقر..

تقبل الله منك و لا تنسينا من صالح دعائك

تقبلى تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
ست الكل
تحياتى
يارب تكونى بخير وفى احسن الاحوال دايما
بالفعل ياست الكل
مااجمل الرجوع اليه سبحانه وتعالى
ولو نظرنا وتأملنا قوله عز وجل
((الا بذكر الله تطمئن القلوب))
لعرفنا جيدا انه وصف لنا علاج هموم قلوبنا فى هذه الايه الكريمه
فلننظر الى الايه فنجد ان فيها لفظ تطمئن وليس ترتاح او تأمن
والطمأنينه هى الراحه والامان معاً
وهذا ماكان وماحدث معكِ والحمد لله ان تغلبتى على هواجس الشيطان الضعيف سريعا
واخيرا ندعو الله ان يردنا اليه دائما مردا جميلا
ست الكل تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

الفراغ يقول...

الفراغ يقول...

الاول معلش استئذنكوا ارد على (فكره من الزمان ده)
اخيرا يا فكره نورتينا...
بجد ماتعرفيش انا فرحانه بوجودك اد ايـــــــــــــــــه
وقبى سعيد بيكى وبوجودك وبهلتك وبطلعتك علينا
ويارب يسهلك الظروف ويحللك مشاكلك

خليتى عنيا تبكى من كلمة (بيت العيله)
عارفه دى اجمل كلمه بحبها وبتمناها
وفعلا انتوا كلكم محسسنى بان دونتى بيت العيله ...ومحققلى اللى نفسى فيه
يارب يارب يارب ..ماتحرمش من وجودكم معايا وحواليا

ويكفينى منك يا فكره انى الاقى اسمك موجود فى وسط التعليقات
لاننا مش هاننساكى ومش عايزينك تنسينا

واديكى شفت انا مريت بحاله حزن وحشه
بس مافكرتش اقفل المدونه ولا ابعد
وقلت اجمل حاجه اكتب اللى تاعبنى ...ووالله كلام ابنائى وحبايبى هنا بتريحنى وبتسعدنى وبتكون البلسم للجراح
او النور اللى بينورلى فى عز الضلمه
ربنا مايحرمناش من بعض
وان كان على خطوبة بنتى
اشكرك وعقبالك...ولو ان كل اللى بيتخطبوا واولهم بنتى بينسوا الناس اللى بتحبهم
بس يلا الغربال الجديد ليه شده
هههههههههههههههه
بحبك فى الله

الفراغ يقول...

ابنى محمد غاليه
ان كام القلق يخليك تيجى تزورنى
فياريت تكون قلقان
ههههههههه
انا بخير يا محمد
ربنا مايحرمنيش منك
وافرح بنجاحك

الفراغ يقول...

انا هارد على اسماء واحلام...ويويو سوى
تصل انا بينى وبينكم مسمياهم الاصدقاء الاعزاء
والله مش عارفه ابطل ضحك من اللى بتعملوه سوى
انتوا عارفين انا حاسه انا على الشط وانتوا بتجروا ورا بعض
يارب يسعدكم ويفرح قلبكم
وفعلا يا احمد احنا هانجيب اللى بتقول عليه ده وعلى حسابى ياعم ...بس علشان نبخر المدونه وكتر من عين العفريت علشان نحرقها ونبعد اى عين وحشه واللى يدخل عندنا اللى بيحبنا وبس
ويويو هى اللى تقوم بالمهمه ومافيش مانع من جمع الاعانات العينينه لزوم رش الرمل (الاحتياط واجب برضه)
عين بتغمز

الفراغ يقول...

الفراغ يقول...

دكتور على خميس

ان شاء الله انت فى بلدك مصر دلوقتى
واحب اولا اهنيك بالعوده الى اولادك وحبيبتك ست الكل ام عبدالله
وثانيا اشكرك على زيارة المدونه وعايزه اديك اجازه اجبارى(بعتبارى ماما)
ربنا يسعدكم واجازه سعيده

جارة القمر يقول...

مااحلى الرجوع الى الله سبحانه وتعالى

ربنا يهدينا لما يحبه ويرضاه لنا

مودتي

الفراغ يقول...

المعتصم(ابو صلاح)
انت مرورك مسك وعنبر
وفعلا الا بذكر الله تطمئن القلوب
وهوفعلا العوده سريعا لله والتغلب على الشيطان ده بيبقى نعمه من ربنا
وربنا يردنا اليه دائما ردا جميلا
وتمنياتى بالسعاده

الفراغ يقول...

جارة القمر
كل الموده لقربك وزيارتك
وربنا يرزقنا رضاه وحبه

ديالا يقول...

فعلا اجمل حاجه الرجوع اليه

نعمه ميحس بيها الا الي جربها

ربنا يزيدنا ايمان ويهدينا

تقبلي مروري

akeed يقول...

ما اجمل الرجوع اليه يا لها من جمله هى تاج على رؤس التائبين ما اجمل اللجوء الى الله عز وجل و العوجة اليه و التوبه من الذنوب .


دمتى بكل خير وجزاكِ الله خيراً

اسماء واحلام فى وجدانى يقول...

يــــــــــــــويــــــــــــــــو


معاش ولا كان اللى يقدر يقول انه عايز يخلص منك هى النحلة تقدر تستغنا عن الوردة ولا السما تكون من غير شمس وقمر ولا البحر يكون من غير مياه ولا الارض من غير بشر انا طبعا باهزر معاكى جدا جدا جدا وبعدين احنا قاعدين فى بيتنا نقول اللى عايزينه وده بامر من ست الكل
بس بردة ده مش هيمنعك انك تلفى علينا واحد واحد وتبخرينا وعلشان اكون كريم معاكى وياريت ما تسالى مين كريم ده لانه والله ما اعرفه
ليكى عليا كل مدونة تبخريها بربع جنيه ورق تاخدى نصف وانتى داخلة والنص التانى وانتى خارجة اصل بصراحة انا اضمنك برقبتى وبكل عمرى بس افرضى انك خلعتى اروح انا ى الرجلين يرضيكى كده طبعا انا عارف انك بتقولى بينك وبين نفسك اه يرضينى

اسماء واحلام فى وجدانى يقول...

فكرتنا اللى من الزمن ده

حمدلله على سلامتك تعرفى لو كنت قفشتك فى مكان غير هنا كنت اقمت عليكى الحد فورا بس المرة دى سماح وزى ما قلت ليويو هاقولك ماتسالنيش مين سماح انا مش عارف انا باجيب الاسامى دى منين

المهم يا فكرة انك تكونى موجودة دايما لان والله بجد غيابك بياثر على الكل هنا لو كان يرضيكى قولى واحنا هنقيم عليكى الحد هنا وبصراحة انتى حبايبك كتير ما هيصدقوا طبعا انا عارف ان ماما مش هتوافق بس الكلام ده مش هيحصل هنا اكيد فى مدونة تانية

حمدلله على سلامتك وياريت ياريت ما تغبيش تانى كفاية الناس اللى غايبة

اسماء واحلام فى وجدانى يقول...

بعد اذنك يا امى

انا ناوى الف على كله

وردة وردة وردة

انى ايه حكايتك بقى يعنى احجزلك وارجع زاروح وارجع واروح وارجع وانتى لسة نايمة يعنى ينفع احارب يويو لوحدى يرضيكى كده

يارب ترجعى بسرعة وتنورى مكانك هنا يارب دايما يا زهرة المدونة

thunder يقول...

امى العزيزة انا شايف احتلال وعودة الابنه الضالة ههههههههههه
وعليه انا كمان والله العظيم دمعت مش هقول بكيت لكن فعلا حاسيت بفرحة جوايا اووووووى الحمد لله فعلا ان هنا بيتنا وكلنا مهما بعدنا بنرجع كلنا هنااا
يعنى يويو وفكرة واحمد وايوش وغيرهم كتير وميمى وكل واحد بيدخل بفكر مين لسة مجاش ويقول اسمه ربنا ياااارب يديم علينا الحب جيمعااااا ويجعل مدونتك ياامى بيت الفرح ولم الشمل والجمع
بالنسبة للبوست نو كومنت ....
امى العزيزة دمتِ بكل حب و ود وفى رعاية وحفظ الله دائما

yoyo يقول...

صباحك سكر يا ماما
وحشتنى جدا يا ست الكل
يا طيب واحن قلب
يارب تكونى بالف خير يارب

و الله يا ماما احمد اللى بيبدا انا مش بعمل حاجة
طالما حضرتك قولتى خلاص نبخر المدونات كلها
ههههههههه ونرش كمان رمل
دى اوامر ست الكل
تسلمى ليا يارب
بنتك / يويو

yoyo يقول...

أحـــــــمــــــــد

صباحك سكر
الله بقى انا بتكسف
ايه الكلام الحلو دا كله
يا خوفى منك ههههههههه

طبعا احنا هنا فى بيتنا مع ست الكل

ربع جنيه بس
يعنى رايحة جاية وداخلة خارجة على ربع جنية
ماشى انا اعملها واخلع بقى
هههههههههه ومنك لهم
وهابقى انا الضحية واقول هم اللى قالولى
انا هاخد العربون واقول اللاتفاق مع احمد واهرب للخارج
مش تخاف م شهانساك بالعيش و الحلاوة انت برده مش هتهون عليا ابدا ابدا

اسماء واحلام فى وجدانى يقول...

يــــــــويـــــــــو

ولامة احنا فى بيتنا
ليه الكسوف بقى

وبعدين انا مش باخوف يعنى للدرجة دى
دى هى الحكاية عود كبريت فى مدونتك
الجميلة اوى اللى شبه افلام الكرتون


وبعدين انا قلت كل مدونة بربع جنيه ورق يعنى اكيد هتعملى مبلغ مش بطال تقدرى تبنى به مستقبلك اللى مش باين له ملامح لان اكتر المدونين حضرتك محتلهم
يعنى الخير كتير اوى كمان

بس ولا يهمك وراكى رجالة

فاكرة الرجالة اللى قالوا عمرهم فدا ناس والناس خلعت منهم اكيد اكيد الرجالة دول هياخدوا حقهم تالت ومربع

المشكلة ان الواحد مش بيهون عليه يذئى الناس الغالية
طيب نعمل ايه فى القلب اللى هيفضل يسامح على طول كده

هاعديها المردة دى بس

اسماء واحلام فى وجدانى يقول...

امى الحبيبة

ازيك وحشتينى جدا جدا جدا

من فترة وحضرتك مش باينة لو كنتى زعلانة من حد هنا قولى واحنا نفهمه ان كده مش صح مع انى عارف انك مش زعلانة من حد فينا
تفتكرى يا امى ،،البنى ادم لامة بيكون مخنوق اوى ممكن يعمل ايه
اكيد بيجىء على اضعف شىء قصاده ويكسر فيه من غير ما يفهم الشىء كان انسان زيه ولا جماد مع ان الجماد فى دراسة قالوا انه بيحس بصاحبه المهم انه بيكسر من غير ما يفكر ايه نتيجة التكسير دى اهم شىء انه نرضى نفسه مش مشكلة بقى على حساب غيره وغيره ده هيحصله ايه بعد كده بردة مش مشكلة
تفتكرى ليه فى ناس بتعمل كده

yoyo يقول...

يرضيكى كدا بقى ياماما
حضرتك مش هنا واحمد عمال يقطع فيا كدا

يارب حضرتك تكونى بالف خير
وبعدين هو مين دا اللى يقدر ولا حتى يفكر انه يزعل ماما يا احمد

ربنا يبارك لنا فى حضرتك يارب

yoyo يقول...

أحــــــــــمـــد

بقى كدا يعنى هو دا تهديد
مش بخاف ولا بيهمنى يعنى
اى حركة كدا ولا كدا هاخطف القطط بتاعتك بقى

ماشى ماشى يا مازينجر بقى المدونة زى افلام الكارتون

ماله بقى مستقبلى الباهر الممتاز حاجة كدا ميت فل و عشرة
مس انجليزى و فى اوقات الفراغ و الاجازات محتلة عسولة كدا لمدونات
دا اقل حاجة عندى والله
هههههههه رفقا بالاخرين يعنى

الرجالة دول طلعوا مش جيشنا طالعوا من جيش العدو ودخلوا غلط دا كان السبب الاساسى

ياسلام على طبية قلبك
ياسلام على الحنية
ياسلام على التسامح
ياسلام عـــــ
لا برده ولا بيهمنى
تعديها مش تعديها
انا لها وساحة مراجيح السبتيه قصدى مدونتك تشهد على كدا

وردة يقول...

السلام عليكم ورحمة الله وبركاته
انا اسفة جدااااااااااا علي التأخير
معلش حضرتك قلبك كبير وبيسامح
والله وحشاني جدااا وتقريبا حضرتك اول حد اعلق عنده انهاردة
الحالة اللي حضرتك مريتي بيها كتيير جدا بنمر بيها واول ما نحس بخنقة او ان الدنيا ضاقت علينا اوووي واننا بقينا في وحدة رغم الناس اللي حوالينا بنلجأ لربنا
اكيد هو احن حد علينا في الدنيا ديه كلها
بس الجميل بجد واللي اكتشفته مؤخرا من حوالي سنتين كده هي المناجاه
الله بجد لما تقعدي تحكي اللي وجعك لربنا وتكلميه
انا حسيت احساس حضرتك لاني مجرباه وكنت بحس ان هموم الدنيا كلها بتهون وانا بين ايد ربنا
بجد ربنا يدمها علينا نعمة
مفيش اجمل من الدعاء والمناجاه
عبادة مش محتاجة لا مكان ولا زمان ولا اي شئ غير انك تلجئ لربنا سبحانه وتعالي
مفيش حجاب ولا وسيط والله العظيم بتحسي ان ربنا سامح نجواكي وبيرد عليكي
ربنا يديم علي حضرتك الرضا ده اكبر نعمة من عند ربنا وكمان يبارك في صحتك وبناتك
واللي بعتبر نفسي واحدة منهم
اشكرك يا احن الناس علي مرورك الكريم عندي
ربنا يكرمك
سلام

وردة يقول...

معلش ياست الكل التعليق ده لاحمد
ازيك يا احمد
مرسي علي الحجز ياسيدي ربنا يكرمك دايما صاحب واجب وجمايلك غرقتني
انت عارف الكسل بقي
بس اليومين اللي فاتو كان ضغط شغل كبير والحمد لله خلص خلاص
والله مش عارف اقولك ايه
بس بردو
الحساب يوم الحساب
ههههههههههه
وطبعا مش يرضيني اسيبك لوحدك
بس مأدرش ادخل بينك وبين يويو
انا مش قدها ياعم
وهي كمان قلبها كبير ومش حتهون عليها
مرسي مرة تاني علي سؤالك عني ربنا يكرمك
وشكرا طبعا لست الكل
مش عارفين نقول لحضرتك ايه
غير ربنا ييسرلك امرك ويبعد عنك الحزن والهم
سلام

اسماء واحلام فى وجدانى يقول...

امى الحبيبة

والنبى خليكى جنبى شوية الحرب كبرت على ابنك ومحتاج حد يدافع عنه

اسماء واحلام فى وجدانى يقول...

وردة

وطبعا مش يرضيني اسيبك لوحدك
بس مأدرش ادخل بينك وبين يويو
انا مش قدها ياعم

طيب ليه كده يا وردة والله انا فرحت اوى لامة حسيت انك هتقفى جنبى وفجاءة لاقيتك بتقولى انك مش اد يويو طب جربى كده واحنا نسوى الهوايل سيبك انتى من افلام الكرتون زى ما قلت قبل كده هو عود كبريت واحد ونخلص الموضوع كله
عارف ومتاكد ان يويو قلبها كبير وانها مش تهون علينا بس يرضيكى اللى هى بتعمله ده محتلنى احلى احتلال وطبعا سيتك زيها واكتر محتلة المدونة البريئة
اللى المفروض انى صاحبها بس من الواضح انكم اصحابها

شوفى بقى يا وردة يا بنت بنت بنتى
لازم نعمل حلف على يويو فورا

والله انا حاسس ان جدران البوست ده من الحرب دى بتتهز والمدونة لولا ان جدرانها اساسه حب ووفاء بينا كلنا كان زمانها وقعت من لعب يويو ده

ربنا يستر على مدوناتنا كلنا حاكم اللى ربنا يكرمه يرزقه بيويو

والحمد لله احنا رزقنا واسع والاحتلال على ودنه من يويو هانم اللى النمل ماشى وراها فى كل مكان من السكر اللى بيوقع منها

ها يا وردة قلتى ايه
رغم انك جاية متاخرة الا انك نورت المدونة مع انها طبعا منورة من الاول بس لامة حد بيغيب ويجى الاحساس بيكون اجمل واجمل والاجمل لامة كله يجىء يارب

اسماء واحلام فى وجدانى يقول...

وردة

وردة


ربنا يكرمك

سلام